សង្ខេបព័ត៌មានប្រចាំសប្ដាហ៍ ថ្ងៃ ៣០ មិថុនា ដល់ ៦ កក្កដា ២០០៨
ដោយ ជា មករា
2008-07-06
ព័ត៌មានសំខាន់ៗប្រចាំសប្ដាហ៍នេះរួមមាន អង្គការក្រៅរដ្ឋាភិបាល២បានប្រកាសត្រៀមដឹកនាំបាតុកម្មអហិង្សាមួយតវ៉ាពីបញ្ហាប្រាសាទព្រះវិហារ និងព័ត៌មានផ្សេងៗដទៃទៀត ។
ប្រាសាទព្រះវិហារ នៅលើភ្នំដងរែកនៃខេត្តព្រះវិហារ។
លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ៣០ មិថុនា ដល់ ៦ កក្កដា ឆ្នាំ២០០៨ ។
អង្គការ២ប្រកាសត្រៀមដឹកនាំបាតុកម្មតវ៉ាពីបញ្ហាប្រាសាទព្រះវិហារ
អង្គការក្រៅរដ្ឋាភិបាលចំនួន២បានប្រកាសត្រៀមដឹកនាំបាតុកម្មអហិង្សាតវ៉ាមួយដោយមានការហែក្បួនមនុស្សចំនួន៣ពាន់នាក់ដើម្បីជូនញត្តិទៅស្ថានទូតថៃនៅក្រុងភ្នំពេញ ក្រោយពេលរដ្ឋាភិបាលថៃបានសម្រេចតាមតុលាការថៃដកសេចក្តីគាំទ្រចំពោះការស្នើដាក់បញ្ចូលបា្រសាទព្រះវិហារជាបេតិភណ្ឌពិភពលោក ។
លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជានិងជាតំណាងក្រុមប្រឹក្សាឃ្លាំមើលកម្ពុជាបានមានប្រសាសន៍កាលពីថ្ងៃទី៣ កក្កដានេះ ថាការដែលតំណាងរាជរដ្ឋាភិបាលបានគូសផែនទីថ្មីដើម្បីដាក់ជូនអង្គការ UNESCO ភ្ជាប់ជាមួយឯកសារសុំដាក់ប្រាសាទព្រះវិហារជាបេតិកភណ្ឌពិភពលោកនោះវាអាចឲ្យកម្ពុជាបាត់បង់ទឹកដីមួយចំនួន ។
ប្រធានអង្គការក្រៅរដ្ឋាភិបាលមួយឈ្មោះមជ្ឈមណ្ឌលវប្បធម៌ជាតិនិងសីលធម៌សង្គម បានមានប្រសាសន៍ថា លោកមានគម្រោងរៀបចំបាតុកម្មមួយដែលមានមនុស្សចំនួន៣ពាន់នាក់ចូលរួមដោយហែជាក្បួនពីវិមានឯករាជ្យទៅស្ថានទូតថៃ ដើម្បីប្រគល់ញត្តិគាំទ្រការដាក់ប្រាសាទព្រះវិហារជាបេតិកភណ្ឌពិភពលោក ។
មន្រ្តីនគរបាលខ្មែរបានឲ្យដឹងថា គេបានដាក់កម្លាំងដើម្បីរក្សាសន្តិសុខនៅស្ថានទូតថៃ និងត្រៀមកម្លាំងដើម្បីជួយអន្តរាគមន៍ដល់បណ្តាទីស្នាក់ការក្រុមហ៊ុនថៃផងដែរ បន្ទាប់ពីមានព័ត៌មានដែលនិយាយថានឹងមានបាតុកម្មប្រឆាំងថៃក្នុងការរារាំងដល់ការដាក់បញ្ចូលប្រាសាទព្រះវិហារជាបេតិកភណ្ឌពិភពលោកនោះ ។
អង្គការសិទ្ធិមនុស្សសុំឲ្យអាជ្ញាធរវៀតណាមផ្ដល់សិទ្ធិពេញលេញដល់ ទឹម សាខន
អង្គការឃ្លាំមើលសិទ្ធិមនុស្ស Human Rights Watch បានចេញសេចក្តីប្រកាសមួយឲ្យអាជ្ញាធរវៀតណាមផ្តល់សិទ្ធិពេញលេញទៅឲ្យអតីតព្រះសង្ឃ ទឹម សាខន ដែលអាជ្ញាធរវៀតណាមអះអាងថាបានដោះលែងកាលពីពេលថ្មីៗនេះ ។
នៅក្នុងសេចក្តីប្រកាសរបស់អង្គការ Human Rights Watch បានបញ្ជាក់ថាអាជ្ញាធរវៀតណាមគួរតែផ្តល់សេរីភាពឲ្យលោក ទឹម សាខន ក្នុងការធ្វើដំណើរនិងជួបជុំសាច់ញាតិដោយឯកជន ។ ចំណែកឯរដ្ឋាភិបាលកម្ពុជាគួរតែប្រកាសជាសាធារណៈថា លោក ទឹម សាខន មានសេរីភាពត្រឡប់មកកម្ពុជាវិញហើយ ។
អាជ្ញាធរខែត្រកំពតបង្កើនសកម្មភាពរុះរើផ្ទះអ្នកស្រុកនៅឃុំតាកែន
ប្រជាពលរដ្ឋនៅឃុំតាកែន ស្រុកឈូក ខេត្តកំពត បានឲ្យដឹងថាកងកម្លាំងប្រដាប់អាវុធបានបង្កើនសកម្មភាពរុះរើផ្ទះសម្បែងរបស់ពួកគាត់កាលពីថ្ងៃសុក្រ កន្លងទៅនេះ ។
ខណៈដែលក្រុមមន្ត្រីនិងកងកម្លាំងប្រដាប់អាវុធបង្កើនសកម្មភាពរុះរើផ្ទះសម្បែងរបស់ប្រជាពលរដ្ឋនៅចំណុចអន្លង់ក្រោម ភូមិជ័យសេនា ឃុំតាកែន ស្រុកឈូក នៅវេលាព្រឹកថ្ងៃទី៤ ខែកក្កដា ឆ្នាំ២០០៨ ប្រជាពលរដ្ឋក៏បានបង្កើនការទាមទារសុំឲ្យប្រមុខរាជរដ្ឋាភិបាលថ្លែងបញ្ជាក់ឲ្យបានច្បាស់តាមរយៈវិទ្យុឬទូរទស្សន៍ថា តើរដ្ឋពិតជាត្រូវការដកយកដីពីពួកគាត់សម្រាប់ការអភិវឌ្ឍមែនឬយ៉ាងណា ។
បុរសម្នាក់ដែលជាកងកម្លាំងប្រដាប់អាវុធឈរជើងនៅចំណុចអន្លង់ក្រោមបានមានប្រសាសន៍ថា លោកបានសម្រេចចិត្តចាកចេញពីអង្គភាពព្រោះលោកមិនអាចទ្រាំមើលការលំបាករបស់ប្រជាពលរដ្ឋនៅតំបន់នោះ ។
តំណាងបក្សប្រជាជននៅក្រចេះដាក់ពាក្យបណ្ដឹងប្ដឹងប្រធានបក្សសមរង្ស៊ី
តំណាងគណបក្សប្រជាជនខែត្រក្រចេះបានដាក់ពាក្យបណ្ដឹងទៅគណៈកម្មការរៀបចំការបោះឆ្នោតខែត្រ ដើម្បីធ្វើការចោទប្រកាន់មេដឹកនាំគណបក្សប្រឆាំងថា មិនគោរពច្បាប់បោះឆ្នោតជ្រើសរើសអ្នកតំណាងរាស្ត្រ ។
តំណាងគណបក្សប្រជាជនឃុំក្រចេះ ស្រុកក្រចេះ គឺលោក សៅ សារ៉ាត់ បានប្ដឹងចោទប្រកាន់លោក សម រង្ស៊ី ថាបានឃោសនានៅសួនកុមារដោយចោទប្រកាន់ថា មេដឹកនាំសព្វថ្ងៃជាចោរលួចជាតិ ដែលបញ្ហានេះលោក សៅ សារ៉ាត់ បានទាមទារឲ្យរកភស្តុតាង ។
ការប្ដឹងចោទប្រកាន់នេះត្រូវបានលោក សម រង្ស៊ី ប្រតិកម្មតបថាលោកឥតមានចោទចំឈ្មោះអ្នកណាឡើយ ហើយថាលោកគ្រាន់តែស្រង់សម្ដីតាមរបាយការណ៍ របស់អង្គការ Global Witness តែប៉ុណ្ណោះ ។
អតីតព្រះមហាក្សត្រស្នើសុំឲ្យហ៊្វុនស៊ិនប៉ិចឈប់ប្រើព្រះឆាយាល័ក្ខណ៍ព្រះអង្គ
អតីតព្រះមហាក្សត្រ ព្រះបាទ នរោត្តម សីហនុ កាលពីថ្ងៃច័ន្ទដើមសប្ដាហ៍នេះបានស្នើឲ្យគណបក្សហ៊្វុនស៊ិនប៉ិច បញ្ឈប់ការយកព្រះឆាយាល័ក្ខណ៍របស់ព្រះអង្គ ទៅប្រើប្រាស់នៅក្នុងយុទ្ធនាការនៃការឃោសនារកសំឡេងឆ្នោត ។
សារលិខិតរបស់ព្រះអង្គដែលបានផ្ញើជូនទៅមេដឹកនាំគណបក្សហ៊្វុនស៊ិនប៉ិច ស្តីអំពីការហាមប្រាមនេះបានធ្វើឡើងនៅក្រោយពីគណបក្សនរោត្តមរណឫទ្ធិ ប្តឹងទៅអតីតព្រះមហាក្សត្រទ្រង់ជា្របថា គណបក្សហ៊្វុនស៊ិនប៉ិចរបស់លោក ញឹក ប៊ុនឆៃ កែវ ពុទ្ធរស្មី អរុណរស្មី បានយកព្រះឆាយាល័ក្ខណ៍ព្រះអង្គទៅបោកប្រាស់និងបំភ័ន្តមតិរាស្រ្តនៅខេត្តបន្ទាយមានជ័យ ។
ប្រធានគណបក្សហ៊្វុនស៊ិនប៉ិច លោក កែវ ពុទ្ធរស្មី មានប្រសាសន៍ទៀតថារូបថតនោះគឺជារូបថតមន្រ្តីជាន់ខ្ពស់របស់គណបក្សហ៊្វុនស៊ិនប៉ិច ជាមួយនឹងអតីតព្រះមហាក្សត្រ ហើយដែលគេបានចែកចាយទៅដល់សកម្មជនគណបក្សហ៊្វុនស៊ិនប៉ិចនៅមុនពេលឃោសនា ។
ក្រុមដូនជីនិងអាចារ្យចោទថាចៅអធិការវត្តរើសអើងបក្សនយោបាយ
ក្រុមដូនជីនិងអាចារ្យវត្តខ្លះនៅភូមិសួង ឃុំត្រពាំងធំ ស្រុកប្រាសាទបាគង ខេត្តសៀមរាប កាលពីថ្ងៃអង្គារ ទី១ កក្កដា បានចោទប្រកាន់ចៅអធិការវត្តថាបានរើសអើងនិន្នាការគណបក្សនយោបាយ ដោយបានបណ្តេញដូនជីខ្លះដែលគាំទ្រគណបក្សហ៊្វុនស៊ិនប៉ិចមិនឲ្យចូលវត្តសុំសីលទេ បើមិនចុះចូលជាមួយគណបក្សប្រជាជនកម្ពុជា ។
ចៅអធិការវត្តអារញ្ញរង្សី ព្រះតេជគុណ ដួន ឌុច បានមានព្រះថេរដីកាទទួលស្គាល់ថាព្រះអង្គពិតជាបានហាមឃាត់អាចារ្យវត្តនិងដូនជីដែលគាំទ្រគណបក្សហ៊្វុនស៊ិនប៉ិចមិនឲ្យចូលវត្តសុំសីលមែន ពីព្រោះតែមន្ត្រីគណបក្សប្រជាជនកម្ពុជាប្រចាំឃុំស្រុកបានគាបសង្កត់ព្រះអង្គទៅរកបច្ច័យកសាងវត្តមិនបាន ។
អាជ្ញាធរខែត្របាត់ដំបងស៊ើបអង្កេតករណីរថយន្តបក្ស"រណឫទ្ធិ"រងគ្រោះបែកកញ្ចក់
ស្នងការនគរបាលខេត្តបាត់ដំបង លោក កង សាខន បានអះអាងថា សមត្ថកិច្ចនគរបាលបានបើកការស៊ើបអង្កេតលើករណីរថយន្តរងគ្រោះបែកកញ្ចក់របស់គណបក្ស នរោត្តម រណឫទ្ធិ មួយជំហានហើយ ប៉ុន្តែមិនមានភស្តុតាងឬស្លាកស្នាមបាញ់ប្រហារដូចការចោទប្រកាន់នោះទេ ។
លោក ស៊ុត ឌីណា ប្រធានក្រុមការងារគណបក្ស នរោត្តម រណឫទ្ធិ បានអះអាងដោយចោទប្រកាន់ថា រថយន្តរបស់លោកត្រូវទទួលរងការបាញ់ប្រហារបែកកញ្ចក់ស្តាំខាងក្រោយ ដោយការប៉ងសម្លាប់នៅវេលាម៉ោង១២យប់នាថ្ងៃទី២៨ ចូលព្រឹកថ្ងៃទី២៩ នៅឃុំតាគ្រៃ ស្រុកកំរៀង ខណៈពេលក្បួនរថយន្តរបស់លោកធ្វើដំណើរត្រឡប់មកពីធ្វើការឃោសនានៅស្រុកភ្នំព្រឹកវិញ ។
បក្សនយោបាយ៣គ្រោងសហការជាមួយគ្នាដើម្បីប្រមូលសន្លឹកឆ្នោត
មេដឹកនាំគណបក្សខ្មែរសាធារណរដ្ឋ គណបក្សសង្គមយុត្តិធម៌ និងគណបក្សខ្មែរឈប់ក្រ បានមានប្រសាសន៍ឲ្យដឹងថា គេមានគម្រោងសហការជាមួយគ្នាជាផ្លូវការដើម្បីប្រមូលសន្លឹកឆ្នោតគណបក្សនីមួយៗឲ្យបានកើនឡើង ក្នុងពេលបោះឆ្នោតជាតិខាងមុខនេះ ។
លោក ជួន ណារ៉ុង អ្នកនាំពាក្យគណបក្សខ្មែរសាធារណរដ្ឋ បានមានប្រសាសន៍កាលពីថ្ងៃទី៣០ មិថុនា ឲ្យដឹងថា ការរួមគ្នារបស់គណបក្សទាំងបី គឺដើម្បីជួយប្រមូលសន្លឹកឆ្នោតឲ្យគ្នា ព្រោះគណបក្សទាំងបីនេះមិនបានឈរឈ្មោះនៅគ្រប់មណ្ឌលទេ តែគេមានអ្នកគាំទ្រនៅគ្រប់២៤មណ្ឌលទូទាំងប្រទេស ។
ទាក់ទងជាមួយការចូលគ្នានេះដែរ លោក បាន សុផល ប្រធានគណបក្សសង្គមយុត្តិធម៌ បានមានប្រសាសន៍ឲ្យដឹងថា ការចូលគ្នានេះមិនមានដាក់លក្ខខណ្ឌអ្វីទេ ហើយគណបក្សទាំងនោះ មានគម្រោងចុះហត្ថលេខាសម្ព័ន្ធភាពជាផ្លូវការនៅថ្ងៃទី៧ កក្កដា ខាងមុខនេះ ។
សកម្មជនបក្សសិទ្ធិមនុស្ស២នាក់នៅកំពង់ស្ពឺរងការវាយប្រហារនិងសម្លាប់
មន្ត្រីគណបក្សសិទ្ធិមនុស្សខេត្តកំពង់ស្ពឺបានឲ្យដឹងថា សកម្មជនគណបក្សខ្លួនពីរនាក់ត្រូវបានវាយប្រហារនិងសម្លាប់ក្នុងករណីពីរដោយឡែកពីគ្នាក្នុងថ្ងៃតែមួយ ។
អនុកម្មការវិន័យគណបក្សសិទ្ធិមនុស្សប្រចាំខេត្តកំពង់ស្ពឺ លោក ជ័យ ស៊ីថន បានឲ្យដឹងថាសកម្មជនគណបក្សម្នាក់ឈ្មោះ សូត្រ សុំ អាយុប្រហែល២៧ឆ្នាំ រស់នៅភូមិរឹទ្ធចែង ឃុំភ្នំតូច ស្រុកឧដុង្គ ត្រូវជនមិនស្គាល់មុខវាយបែកគ្រាប់ភ្នែក និងអារកសម្លាប់ វេលាម៉ោង៨យប់ថ្ងៃទី១ ខែកក្កដា ។
ទោះជាយ៉ាងណាស្នងការនគរបាលខេត្តកំពង់ស្ពឺបានបដិសេធថា ឈ្មោះ សូត្រ សុំ នោះ មិនមែនជាសកម្មជនគណបក្សសិទ្ធិមនុស្សនោះទេ ប៉ុន្តែជាប្រធានក្រុមប្រឹក្សាគណបក្សប្រជាជនកម្ពុជា ភូមិអង្គតាឯក ឃុំភ្នំតូច ស្រុកឧដុង្គ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១០ ដល់ ១៦ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ៣-៩ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២៧ តុលា ដល់ ២ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២០ ដល់ ២៦ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៣ ដល់ ១៩ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៦ ដល់ ១២ តុលា ២០០៨
