ສອງອ້າຍນ້ອງຂົນເງິນ 98 ລ້ານບາດ ຈາກໄທ ຖືກຈັບ

ສິດນີ
2017.12.13
F-money ການຂົນເງິນ ເຂົ້າ-ອອກ ນອກປະເທດ ໂດຍບໍ່ມີການຜ່ານຂັ້ນຕອນທີ່ຖືກຕ້ອງ ຂອງການເຄື່ອນຍ້າຍເງິນສົດ ຂອງຄົນລາວສອງອ້າຍນ້ອງ
ຮູປ:ໂທລະໂຄ່ງ / ເຈົ້າໜ້າທີ່ດ່ານໜອງຄາຍ ແລະ Facebook page ອີ່ຈັນ

ໃນວັນທີ 12 ທັນວາ ປີ 2017 ເຈົ້າຫນ້າທີ່ຊາຍແດນຂົວມິດຕະພາບ ລາວ-ໄທ ແຫ່ງທີນຶ່ງ ແຂວງຫນອງຄາຍ ໄດ້ຈັບຄົນລາວສອງຄົນ ຖານລັກລອບຂົນສົ່ງເງິນເກືອບຮອດ 98 ລ້ານບາດເຊື່ອງໄວ້ໃນຣົດຍົນ ໂຕໂຍຕາສີທອງ ເລກທະບຽນ ກກ 1844 ນະຄອນຫຼວງວຽງຈັນ.

ຜູ້ຕ້ອງຫາຄົນລາວສອງຄົນຊື່ ທ້າວ ສຸບັນ ເຕັຽສີຣີ ອາຍຸ 30 ປີ ແລະທ້າວຄຳບອນ ເຕັຽສີຣີ ອາຍຸ 24 ປີ ເປັນອ້າຍນ້ອງກັນ ໃຫ້ການຕໍ່ ເຈົ້າໜ້າທີ່ຕຳຣວດວ່າໄດ້ນຳເງິນ 2 ລ້ານ 5 ແສນໂດລາ ຈາກລາວມາແລກເງິນບາດຢູ່ໄທຕົກເປັນເງິນ 98 ລ້ານບາດ ທີ່ແຂວງໜອງຄາຍ ເພື່ອເອົາໄປເຮັດທຸຣະກິດແລກປ່ຽນເງິນຕຣາຢູ່ລາວ ທັງສອງເປັນຄົນ ເມືອງຈັນທະບູຣີ ນະຄອນຫລວງວຽງຈັນ ຖືກຈັບໃນຂນະທີ່ຂົນເງິນ ຈຳນວນດັ່ງກ່າວກັບເມືອລາວ.

ກ່ອນການຈັບກຸມ ເຈົ້າຫນ້າທີ່ຍາມດ່ານໄທ ໄດ້ສັງເກດເຫັນສິ່ງທີ່ຜິດປົກກະຕິ ຂອງບຸກຄົນທັງສອງຈາກການ ເຂົ້າ-ອອກ ດ່ານຫລາຍເທື່ອ ຈຶ່ງທຳການກວດຄົ້ນຣົດ ຂອງສອງຄົນນັ້ນ ໃນທີ່ສຸດກໍພົບເງິນ ຈຳນວນດັ່ງກ່າວ, ດັ່ງ ທ່ານ ນິມິດ ແສງອຳໄພ ຫົວຫນ້າດ່ານສຸລະກາກອນ ແຂວງຫນອງຄາຍ ກ່າວໃນຕອນນື່ງວ່າ:

"ທັງສອງເຂົ້າ-ອອກ ຫຼາຍຄັ້ງດ້ວຍຣົດຄັນນີ້ແຫລະ ແຕ່ວ່າໃນຮອບເດືອນເຄິ່ງ ທີ່ຜ່ານມາ ຈົນເຖິງມື້ວານນີ້ ທີ່ເຮົາສົງສັຍ ຫລືເຮົາມີຂ່າວ ທີ່ເຊື່ອຖືວ່າ ມີການຂົນເງິນອອກປະມານສັກ 9 ຄັ້ງ ຫລາຍນ້ອຍບໍ່ຮູ້ນະ ແຕ່ເຂົາໃຫ້ປາກຄຳວ່າ ຄັ້ງຫລ່າສຸດ ເຂົາເອົາເງິນມາແລກ 8 ແສນຫລຽນແລະກໍເອົາກັບໄປ."

ທ່ານກ່າວຕື່ມວ່າ ທັງສອງໄດ້ຍື່ນປະກັນຕົວ ແລະຄຳຮ້ອງຕໍ່ສານຂໍຣະງັບຄະດີ ໂດຍຈະຍອມມອບເງິນທັງຫມົດ ໃຫ້ແກ່ທາງການໄທ:

"ເຮົາຍຶດແລ້ວ ສ່ວນບຸກຄົນນັ້ນ ຕອນນີ້ເຂົາຍື່ນຄຳຮ້ອງ ຂໍຣະງັບຄະດີ ບໍ່ຕ້ອງຟ້ອງຮ້ອງຕໍ່ສານ ໂດຍຍອມຍົກເງິນທັງຫມົດໃຫ້ ຕົກເປັນ ຂອງທາງການໄທ ຊຶ່ງໃນຫລັກການນີ້ ເຮົາກໍໃຫ້ປະກັນຕົວໄດ້ ແຕ່ຫ້າມອອກນອກປະເທດ ກໍຈະລໍກົມພິຈາຣະນາ ຊຶ່ງໃນຫລັກການເຮົາ ກໍປະຕີບັດຕາມກົດເກນ ຂອງກົມຢູ່ແລ້ວ ຖ້າທຸກຢ່າງເຫັນພ້ອມ ກໍປ່ອຍຕົວຜູ້ຕ້ອງຫາ ກັບປະເທດໄດ້."

ທາງການໄທຈະກວດສອບ ຄະດີດັ່ງກ່າວເພີ້ມຕື່ມວ່າ ມີສິ່ງທີ່ກ່ຽວພັນກັບການເຮັດທຸຣະກິດ ຜິດກົດຫມາຍຫລືບໍ ເພື່ອເປັນການຂຍາຍຜົລ ຕິດຕາມຈັບກຸມ ກຸ່ມລັກຂົນສົ່ງ ສິ່ງທີ່ຜິດກົດຫມາຍ ຂ້າມແດນເພີ້ມອີກ ຊຶ່ງໃນຣະຍະ 1 ປີຜ່ນມາດ່ານສຸລະກາກອນ ທີ່ແຂວງຫນອງຄາຍ ສາມາດຈັບ ຜູ້ລັກລອບຂົນສົ່ງ ສິ່ງທີ່ຜິດກົດຫມາຍ ໄດ້ປະມານ 200 ຄະດີ ສ່ວນໃຫຍ່ເປັນຄະດີ ຄ້າຢາເສບຕິດ ຂ້າມແດນ.

ແຕ່ເຈົ້າຫນ້າທີ່ໄທ ສົງສັຍວ່າເງິນຈຳນວນ 98 ລ້ານບາດ ທີ່ຍຶດໄດ້ຈາກຄົນລາວສອງຄົນ ອາດມາຈາກ ພາກສ່ວນຂອງກຸ່ມຄ້າ ສິ່ງທີ່ຜິດ ກົດຫມາຍ ແລະຈະໂອ້ລົມເຣື້ອງນີ້ ກັບທາງການລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.