ມ.ທ່າແຂກຫົນທາງເປ່ເພ

ສິດນີ
2017-09-28
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ເສັ້ນທາງຢູ່ເມືອງຫີນບູນ ແຂວງຄໍາມ່າວນ
ເສັ້ນທາງຢູ່ເມືອງຫີນບູນ ແຂວງຄໍາມ່າວນ
RFA/PN

ຖນົນຫົນທາງໃນຫລາຍບ້ານ ຢູ່ເມຶອງທ່າແຂກເປ່ເພ ຢ່າງຫນັກ, ເປັນຕົ້ນທີ່ບ້ານດອຍແສງນາເສ ເມືອງທ່າແຂກ ແຂວງຄຳມ່ວນ ປະຊາຊົນ ປະມານ 100 ຄອບຄົວ ແລະໃນເຂດອື່ນໆ ກຳລັງໄດ້ຮັບຄວາມເດືອດຮ້ອນ ຍ້ອນຖນົນຈາກບ້ານ ເຂົ້າໄປຫາເມືອງ ເປັນບວກເປັນຫນອງ ໃຊ້ການບໍ່ໄດ້ ໃນເວລານີ້ ຫລັງຈາກ ມີຝົນຕົກຫນັກຫລາຍມື້. ດັ່ງຊາວບ້ານທ່ານນຶ່ງ ຜູ້ບໍ່ປະສົງອອກຊື່ ກ່າວຕໍ່ເອເຊັຽເສຣີ ໃນມື້ວັນທີ 27 ກັນຍາ ນີ້ວ່າ:

"ຊີວິດໄທບ້ານດອຍນີ້ ກໍຍາກທີ່ສຸດ ຫົນທາງຂາດ ຍາກທີ່ສຸດເປັນຂຸມເປັນຫລຸບ ມີນ້ຳຖ້ວມທາງ ມາບ້ານເອື້ອຍນະ ມີຖນົນທາງແດງ ເປັນທຸກປີນ້ອງເອີ່ຍ ທຸກປີຝົນຕົກແຮງ ນ້ຳຖ້ວມແລ້ວກໍໄປເມືອງບໍ່ໄດ້ ຢູ່ບ້ານພູບ້ານຝາສຸດ ລຳບາກ ຊ່ວງເຈັບໄຂ້ເດ ໄປກໍບໍ່ໄດ້ຍາກ ການເດີນທາງໄປ ນີ້ແຫລະລຳບາກທີ່ສຸດ".

ນາງເວົ້າວ່າເສັ້ນທາງທີ່ໃຊ້ການບໍ່ໄດ້ ມີຄວາມຍາວປະມານ 15 ຫຼັກເປັນເສັ້ນທາງດິນແດງ ຈາກບ້ານດອຍໄປຫາຖນົນໃຫຍ່ ຫ່າງຈາກເມືອງ ທ່າແຂກ ປະມານ 40 ປາຍຫລັກ. ທຸກໆປີໃນຣະດູຝົນ ຖນົນສາຍນີ້ ຈະຖືກນ້ຳຖ້ວມ ຕຣອດ ຣົດຈັກຣົດໃຫຍ່ ກໍໄປບໍ່ໄດ້ ການເດີນທາງກໍ ລຳບາກຍ້ອນ ເປັນຂີ້ຕົມ. ຊາວບ້ານຕ້ອງໄດ້ ຊື້ອາຫານແຫ້ງ ກັກຕຸນໄວ້ ເລີ້ມແຕ່ເດືອນ 8 ຫາເດືອນ 11 ຍາມເຈັບໄຂ້ ກໍຕ້ອງໄດ້ອົດທົນ ຍ້ອນເຂົ້າເມືອງບໍ່ໄດ້. ການສ້ອມແປງ ຈາກຣັຖບານ ກໍບໍ່ມີຍ້ອນ ຂາດງົບປະມານ:

"ເພີ່ນກໍມາເທື່ອນຶ່ງ ເຂົ້າມາຊ່ອຍເຮັດທາງແດງມາໃຫ້ ເພີ່ນທຶນບໍ່ຫລາຍ ຄົນເພີ່ນກໍມາເທື່ອນືຶ່ງ ຢາກໄດ້ແຮງທີ່ສຸດຖນົນ ຢາກໄປໃນເມືອງ ໃຫ້ສະດວກສະບາຍ ໃນຍາມເຈັບໄຂ້ ເວລາເກີດອັນຕຣາຍ ຍ້ອນວ່າໄກໃນເມືອງ ປະມານ 40 ຫລັກ ກິໂລ ທຸກຍາກ ແຮງບ້ານນອກ ນອກສຸດໆ ຍາມນີ້ກໍເຂົ້າໃນເມືອງ ບໍ່ໄດ້ແລ້ວ ຝົນຕົກຫລາຍ ຢາກຈະໃຊ້ ກໍບໍ່ໄດ້ ປົກກະຕິ".

ປະຊາຊົນທ້ອງຖິ່ນ ໃນເຂດດັ່ງກ່າວ ຕ້ອງການຢາກໃຫ້ ອົງການຊ່ອຍເຫລືອຕ່າງຊາດ ເຂົ້າມາຊ່ອຍຂະເຈົ້າ ຍ້ອນບັນຫານີ້ຊຳເຣື້ອ ມາເປັນ ເວລາດົນນານ ທາງການລາວ ກໍບໍ່ເອົາໃຈໃສ່ຍ້ອນ ຂາດງົບປະມານ. ເມື່ອຫລາຍປີ ຜ່ານມາ ກໍມີຜູ້ເຖົ້າຜູ້ແກ່ ເສັຽຊີວິດ ຍ້ອນບໍ່ສາມາດ ເຂົ້າມາປິ່ນປົວ ໃນໂຮງຫມໍ ໃນເມືອງ ໃນຍາມເຈັບໂຊ.

ຄໍາເຫັນ (0)
  • ພິມ
  • ໃຊ້ຮ່ວມກັນ
  • ອີແມວລ໌
ເຕັມຫນ້າ