ມ.ສິງຖນົນຫາບ້ານມອບ ແປງໃໝ່

ຈໍາປາທອງ
2017-04-19
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ຖນົນດິນແດງ ຍາວ 22 ກິໂລແມັດ ຕັດຜ່ານ 10 ບ້ານ ຈາກເມືອງສິງ ໄປຫາບ້ານມອມ ແຂວງຫລວງນໍ້າທາ ໄດ້ຮັບການສ້ອມແປງ (ຮູບຖ່າຍເດືອນ ເມສາ 2017)
ຖນົນດິນແດງ ຍາວ 22 ກິໂລແມັດ ຕັດຜ່ານ 10 ບ້ານ ຈາກເມືອງສິງ ໄປຫາບ້ານມອມ ແຂວງຫລວງນໍ້າທາ ໄດ້ຮັບການສ້ອມແປງ (ຮູບຖ່າຍເດືອນ ເມສາ 2017)
RFA/VD

ຖນົນດິນແດງ ຍາວ 22 ກິໂລແມັດ ຕັດຜ່ານ 10 ບ້ານ ຈາກເມືອງສິງ ໄປຫາບ້ານມອມ ແຂວງຫລວງນໍ້າທາ ຊຶ່ງເປັນດ່ານ ເຂົ້າ-ອອກ ລາວ-ຈີນ ໄດ້ຮັບການ ສ້ອມແປງໃໝ່ແລ້ວ. ການສ້ອມແປງນັ້ນ ມີຂຶ້ນພາຍຫລັງ ທີ່ປະຊາຊົນຈົ່ມທຸກວ່າ ທາງເສັ້ນນີ້ ເປ່ເພຫລາຍ, ການ ເດີນທາງບໍ່ສະດວກ ແລະຍັງເກັບຄ່າໃຊ້ທາງແພງອີກ. ຕາມການເປີດເຜີຽຂອງທ່ານ ສິນທະລາ ຫົວໜ້າຫ້ອງການໂຍທາທິການ ແລະຂົນສົ່ງ ເມືອງສິງ ຕໍ່ RFA ໃນມື້ວັນທີ 19 ເມສາ:

"ພວກເຮົາເຮັດນີ້ເຂົາເຈົ້າກ່າສະດວກຫຼາຍຂຶ້ນແລ້ວໃດ ມັນລົດກ່າບໍ່ຄາ ບໍ່ໄດ້ໄປນອນຫຍັງຄືເກົ່າຫັ້ນແລ້ວ ແຕ່ວ່າການເກັບນີ້ ມັນເປັນແນວນີ້ ເຮົາຈະເກັບນໍາແຕ່ ຣົດທີ່ ຕ່າງສິນຄ້າ ເທົ່ານັ້ນ  ພວກທີ່ຊົມໃຊ້ ພວກທີ່ເຮັດໃຫ້ ທາງເຮົາເພນີ້ແຫລະວ່າຊັ້ນສະ, ຖ້າວ່າບໍ່ຕ່າງສີນຄ້າ ຣົດ ປະຊາຊົນທົ່ວໄປນີ້ ພວກເຮົາບໍ່ເກັບຢູ່ແລ້ວ ປະຊາຊົນຫັ້ນເນາະ".

ສໍາລັບການເກັບຄ່າໃຊ້ທາງ ທັງຂາໄປຫລືຂາກັບນັ້ນ ທາງບໍຣິສັດກໍານົດວ່າ ຣົດບັນທຸກໜັກ 6 ລໍ້ ຄັນນຶ່ງ 30,000 ກີບ, ຣົດ 10 ລໍ້ຄັນນຶ່ງ 100,000 ກີບ. ທ່ານເວົ້າວ່າຜ່ານມາ ທາງເມືອງຖ້າງົບປະມານ ຈາກຣັຖບານ ເພື່ອສ້ອມແປງທາງເສັ້ນນີ້ ແຕ່ຣັຖບານບໍ່ທັນມີເງິນ. ດັ່ງນັ້ນ ເມື່ອທ້າຍປີ 2016 ທາງເມືອງ ຈຶ່ງໄດ້ຕົກລົງໃຫ້ບໍຣິສັດ ເອກກະຊົນຈີນ ອອກເງິນສ້ອມແປງກ່ອນ ແລະໃຫ້ເຂົາເຈົ້າເກັບເງິນຄ່າໃຊ້ທາງໄປ ພ້ອມ ເພື່ອໃຫ້ປະຊາຊົນ ສາມາດທຽວທາງໄດ້.

ທາງເສັ້ນນີ້ເປ່ເພ ເປັນຫລຸບເປັນຂຸມ ຍ້ອນຣົດບັນທຸກສິນຄ້າໜັກຈາກຈີນ ແລະຈາກໄທ ທຽວຫລາຍ. ຫລັງຈາກສ້ອມແປງໃໝ່ແລ້ວ ການ ເດີນທາງ ກໍສະດວກກວ່າເກົ່າ. ດັ່ງ ປະຊາຊົນ ກ່າວວ່າ:

"ດຽວນີ້ໄຄແດ່ແລ້ວ ໄປມາກໍສະດວກກ່ວາເກົ່າທຽບໃສ່ ເຂົາເຮັດທີ່ຜ່ານມາຫັ້ນບໍ່ຢາກສົມກັບເງິນ ທີ່ເຮົາຈ່າຍດີແທ້ ກ່າຢາກໃຫ້ປູຢາງເລີຽ ກ່າແຮງດີ ກຸ້ມດົນອີກ".

ທ່ານ ສິນທະລາ ເວົ້າຕື່ມອີກວ່າ ສັນຍາອານຸມັດໃຫ້ບໍຣິສັດສ້ອມແປງ ແລະເກັບເງິນໄປພ້ອມນັ້ນ ເປັນສັນຍາແຕ່ລະປີ. ເມື່ອໃດທາງຣັຖບານ ມີເງິນສ້ອມແປງເອງແລ້ວ ກໍຈະ ໃຫ້ທາງບໍຣິສັດຈີນ ເຊົາເກັບເງິນຄ່າທາງ.

ເຕັມຫນ້າ