ພາກໃຕ້ຄົນໄຂ້ເລືອດອອກ ເພີ່ມຂຶ້ນ

ມະນີຈັນ
2017-08-10
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ໃນເຂດ ຊົນນະບົດ ແຂວງຄໍາມ່ວນ
ໃນເຂດ ຊົນນະບົດ ແຂວງຄໍາມ່ວນ
Screen captured Khammouan video

ປັດຈຸບັນຢູ່ຫລາຍແຂວງ ທາງພາກໃຕ້ ຂອງປະເທດລາວ ມີຜູ້ຕິດເຊື້ອໄຂ້ເລືອດອອກ ເພີ່ມຂຶ້ນ, ຢູ່ແຂວງຄໍາມ່ວນ ມີຜູ້ຕິດເຊື້ອທີ່ສະສົມມາ ຕັ້ງແຕ່ເດືອນເມສາ ຂອງປີນີ້ມີທັງໝົດ 500 ປາຍຄົນ ທີ່ມີຢູ່ທຸກເມືອງ. ໃນປີນີ້ແມ່ນເລີ້ມຢູ່ ເມືອງມະຫາໄຊ ທີ່ກວດພົບເມື່ອ ເດືອນເມສາ ຄືຕອນຝົນເລີ່ມຕົກ. ຕາມຄໍາເວົ້າ ຂອງເຈົ້າໜ້າທີ່ ສາທາຣະນະສຸກແຂວງ ໃນມື້ວັນທີ 9 ສິງຫານີ້:

"ປັດຈຸບັນຕົວເລກ ສະສົມນີ້ກໍມີແຕ່ 500 ປາຍເປັນທຸກເມືອງ ເມືອງລະ 10 ເມືອງລະ 20 ເມືອງລະ 30 ມັນກໍກະແຈກກະຈາຍໄປຫັ້ນນະ ກໍເລີ່ມມະຫາໄຊ ກ່ອນ ກໍເລີ່ມແຈກຈາຍ ອະເບສກໍເດືອນ 4 ຫັ້ນແຫລະ".

ປັດຈຸບັນ ຢູ່ແຂວງຄໍາມ່ວນ ມີຜູ້ຕິດເຊື້ອໄຂ້ເລືອດອອກ ເສັຽຊີວິດ 1 ຄົນໃນເມືອງມະຫາໄຊ. ເມືອງທີ່ມີຜູ້ຕິດເຊື້ອ ຫຼາຍທີ່ສຸດ ໃນຂນະນີ້ຄື ເມືອງທ່າແຂກ ໂດຍສະເພາະ ໃນເຂດເທສບານເມືອງ ຍ້ອນມີນໍ້າຂັງ ຢູ່ຕາມບ້ານຕ່າງໆ. ທ່ານເວົ້າວ່າ ທາງ ສາທາຣະນະສຸກ ເມືອງກໍໄດ້ ພຍາຍາມ ລົງພົ່ນຢາຂ້າຍຸງ ແລະແຈກ ຊາຍອະເບສ ໃຫ້ບ້ານ ທີ່ມີຜູ້ຕິດເຊື້ອ ໄຂ້ເລືອດອອກ.

ສໍາລັບຢູ່ແຂວງສະຫວັນນະເຂດ ເຈົ້າໜ້າທີ່ຫ້ອງການ ສາທາຣະນະສຸກແຂວງ ກ່າວວ່າດຽວນີ້່ ຢູ່ແຂວງສະຫວັນນະເຂດ ບໍ່ມີຜູ້ຕິດເຊື້ອ ໄຂ້ ເລືອດອອກ ເພີ່ມຂຶ້ນ ແລະພຍາດນີ້ ບໍ່ໄດ້ຣະບາດ ແຕ່ກໍມີຄົນ ເປັນຕາມປົກກະຕິ ຄືໃນທຸກປີ ທີ່ຜ່ານມາ ໂດຍສະເພາະ ໃນຣະດູຝົນ:

"ອໍ໊ ດຽວນີ້ມັນເຊົາແລ້ວ ມັນບໍ່ໄດ້ລະບາດແລ້ວ ມັນກໍບໍ່ໃສ່ສິວ່າລະບາດ ມັນມີເຄສຊື່ໆເນາະ ກໍມີມານອນ ໂຮງໝໍ ມາປິ່ນປົວນະ".

ຢູ່ແຂວງສວັນນະເຂດ ມີຜູ້ຕິດເຊື້ອໄຂ້ເລືອດອອກ ທັງໝົດ 670 ຄົນແຕ່ຍັງບໍ່ມີຣາຍງານ ວ່າມີຜູ້ເສັຽຊີວິດ ຍ້ອນ. ປັດຈຸບັນ ທົ່ວປະເທດລາວ ມີຜູ້ຕິດເຊື້ອ ໄຂ້ເລືອດອອກ ທັງໝົດ 5 ພັນ 7 ຮ້ອຍປາຍຄົນ. ເວົ້າສະເພາະ ຢູ່ນະຄອນຫລວງ ມີຜູ້ຕິດເຊື້ອ 1 ພັນ 4 ຮ້ອຍຄົນ ແລະ ເສັຽຊີວິດ 1 ຄົນ, ຮອງລົງມາຄື ແຂວງສະຫວັນນະເຂດ 670 ຄົນ, ແຂວງຈໍາປາສັກ 600 ປາຍຄົນ ແລະມີຜູ້ເສັຽຊີວິດ 3 ຄົນ ແລະ ແຂວງຄໍາມ່ວນ 500 ປາຍຄົນ ມີຜູ້ເສັຽຊີວິດ 1 ຄົນ.

ເຕັມຫນ້າ