ອາຊຽນຫາລືປາບຢາເສພຕິດ

ມະນີຈັນ
2016-08-29
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ກອງປະຊຸມເຈົ້າໜ້າທີ່ ອາວຸໂສ ຕ້ານຢາເສບຕິດ ທີ່ບາງກອກ ປະເທດໄທ ເມື່ອວັນທີ 26 ສິງຫາ 2016
ກອງປະຊຸມເຈົ້າໜ້າທີ່ ອາວຸໂສ ຕ້ານຢາເສບຕິດ ທີ່ບາງກອກ ປະເທດໄທ ເມື່ອວັນທີ 26 ສິງຫາ 2016
RFA

ບັນດາປະເທດ ອາຊຽນ ຮວມທັງ ສປປລາວ ຫາລືກັນ ກ່ຽວກັບ ການປາບປາມ ຢາເສພຕິດ, ກອງປະຊຸມ ເຈົ້າໜ້າທີ່ ອາວຸໂສ ຕ້ານ ຢາເສພຕິດ ທີ່ ບາງກອກ ປະເທດໄທ ເມື່ອວັນທີ 26 ສິງຫາ 2016 ນີ້ ໂດຍມີ ສໍານັກງານ ຄນະ ກັມມະການ ປ້ອງກັນ ແລະ ປາບປາມ ຢາເສພຕິດ ຂອງໄທ ເປັນເຈົ້າພາບ ຈັດຂຶ້ນ. ໃນກອງປະຊຸມ ມີຜູ້ເຂົ້າຮ່ວມ ຈາກ ເລຂາທິການ ຄນະ ກັມມະການ ປ້ອງກັນ ແລະປາບປາມ ຢາເສພຕິດ ທັງ 10 ປະເທດ ອາຊຽນ ຮວມໄປເຖິງ ຈີນ ນໍາດ້ວຍ. ທ່ານ ສີຣີນຍາ ສິດທິໄຊ ເລຂາທິການ ຄນະ ກັມມະການ ປ້ອງກັນ ແລະ ປາບປາມ ຢາເສພຕິດ ກ່າວເປີດ ກອງປະຊຸມ:

"ທ່ານກ່າວວ່າ ວັດຖຸປະສົງ ຂອງ ກອງປະຊຸມນີ້ ກໍເພື່ອສົ່ງເສີມ ຄວາມຮ່ວມມື ຂອງທັງ 10 ປະເທດ ອາຊຽນ ໃນ ການຕໍ່ຕ້ານ ຢາເສພຕິດ ໂດຍມີ ມາຕຖານ ສໍາຄັນ ຄືດ້ານ ການປາບປາມ, ການປ້ອງກັນ, ການບໍາບັດ ແລະ ຟື້ນຟູ ສະມັຖພາບ. ນອກນັ້ນ ຍັງມີມາຕຖານ ເສີມອີກ 2 ມາຕຖານ ຄືການວິຈັຍ ດ້ານວິຊາການ ແລະ ການພັທນາ ທາງເລືອກ".

ທ່ານກ່າວວ່າ ກອງປະຊຸມ ໃນມື້ນີ້ ເປັນເທື່ອທີ 37 ແລ້ວ ທີ່ປະເທດ ອາຊຽນ ຮ່ວມກັນ ຈັດຂຶ້ນ ເພື່ອຫາລື ແລະ ແລກປ່ຽນ ຄວາມຮູ້ໃໝ່ ໃນການ ຕໍ່ຕ້ານ ແລະ ປາບປາມ ຢາເສພຕິດ. ເປັນຕົ້ນວ່າ ຮ່ວມກັນ ສ້າງເຄືອຂ່າຍ ຄວບຄຸມ ສານເຄມີ ທີ່ສາມາດ ນໍາໄປຜລິດ ຢາເສພຕິດ ໄດ້ ຫລັງຈາກ ນໍາເຂົ້າປະເທດ, ແລະ ຕ້ອງຈັດ ຝຶກອົບຮົມ ການ ປະຕິບັດງານ ຂອງ ເຈົ້າໜ້າທີ່ ປາບປາມ ຢາເສພຕິດ ໃນ ພູມີພາກ ອາຊຽນ.

ນອກນັ້ນ ຍັງໄດ້ຫາລື ເຖິງແນວທາງ ແຜນ ປະຕິບັດ ການປິດລ້ອມ ແຫລ່ງຜລິດ ຢາເສພຕິດ ຄືເຂດ ສາມຫລ່ຽມຄໍາ ບ່ອນຜລິດ ຢາເສພຕິດ ທີ່ໃຫຍ່ ອັນດັບ 3 ຂອງໂລກ ແລະ ມີການລັກລອບ ນໍາເຂົ້າ ປະເທດໄທ ລາວ ແລະ ກັມພູຊາ ຈໍານວນຫຼາຍ ທຸກປີ. ແຜນດັ່ງກ່າວ ຈະມີການ ຮ່ວມມືກັນ ຂອງ ປເທດອາຊຽນ ຮວມເຖິງ ຈີນ ເກົາຫລີໃຕ້ ແລະ ຍີ່ປຸ່ນ. ໃນຂນະດຽວກັນ ທ່ານ ພຸດທະສະຫວາດ ສຸນທະລາ ຮອງຫົວໜ້າ ສໍານັກງານ ປ້ອງກັນ ແລະ ປາບປາມ ຢາເສພຕິດ ຂອງລາວ ກໍກ່າວວ່າ:

"ການແຜ່ຣະບາດ ມາຈາກ ໃນເຂດ ສາມຫລ່ຽມຄໍາ ຫລືວ່າ ການສົ່ງ ເຂົ້າມາຜ່ານ ສນາມບິນ ຜ່ານທ່າເຮືອ ສໍາຄັນ ສໍາຄັນ ຂອງອາຊຽນ ກໍມີຈໍານວນ ເພີ່ມຂຶ້ນ, ດັ່ງນັ້ນ ພວກເຮົາ ຕ້ອງໄດ້ ຮ່ວມມືກັນ ໃນການ ສະກັດກັ້ນ ຂໍຖື ໂອກາດນີ້ ຮຽກຮ້ອງ ມາຍັງບັນດາ ປະເທດ ເພື່ອນມິດ ແລະ ກໍອົງການ ຈັດຕັ້ງສາກົລ ຂໍໃຫ້ ພິຈາຣະນາ ໃຫ້ການ ຊ່ວຍເຫລືອ ແກ່ ສປປລາວ ຂອງພວກ ຂ້າພະເຈົ້າ ຊຶ່ງຍັງມີ ຄວາມຫຍູ້ງຍາກ ດ້ານ ເສຖກິດ ເປັນປະເທດ ທີ່ ກໍາລັງ ພັທນາ ແລະ ຕ້ອງການ ຊ່ວຍເຫຼືອ ໃນການ ແກ້ໄຂ ບັນຫາ ຢາເສພຕິດ".

ທ່ານກ່າວ ຕື່ມວ່າ ຕອນນີ້ ປະເທດລາວ ມີ ຢາເສພຕິດ ຣະບາດຫຼາຍ ທາງ ເຈົ້າໜ້າທີ່ ກໍປະສົບ ຄວາມຫຍູ້ງຍາກ ໃນການ ປາບປາມ ໂດຍສະເພາະ ດ້ານ ງົບປະມານ ແລະ ເຄື່ອງມື ຊຶ່ງ ຍັງຕ້ອງການ ໃຫ້ບັນດາ ປະເທດ ອາຊຽນ ຮວມເຖິງ ອົງການ ຈັດຕັ້ງ ສາກົລ ເຂົ້າມາ ຊ່ວຍເຫລືອ.

ຄໍາເຫັນ (1)
  • ພິມ
  • ໃຊ້ຮ່ວມກັນ
  • ອີແມວລ໌

ຄ.ນະຄຳມ່ວນ

ຈາກ ທ່າແຂກ

ຢາເສບຕິດເປັນພິດຮ້າຍແຮງ ຕໍ່ຊີວິດຂອງມະນູຕແລະສັງຄົມ ທົ່ວທຸກຂົງເຂດ, ຢາກປ້ອງກັນແລະປາບປາມ ບັນຫາດັ່ງກ່າວນີ້ ຈະຕ້ອງສ້າງຄວາມສາມັກຄີກັນ ໃຫ້ແຫນ້ນ, ສະສົມກຳລັງຈິຕ ຢ່າງມີສະຕິ, ຢ່າປ່ອຍໃຫ້ວິທີຄິດແນວລົບ ມາຄອບງຳຈິດໃຈ, ຄົນສ່ວນໃຫຍ່, ຫລືສັງຄົມສ່ວນໃຫຍ່ມີທູກຂ໌, ເພາະທຳຕົນເອງ ໃຫ້ເກີດທຸກຂ໌. ສະນັ້ນຢ່າເປັນເຫຍື່ອຕົວເອງໂດບເດັດຂາດ ຄື: ພາວະຕັນຫາແລະວິພາວະວະຕັນຫາ ພາໃຫ້ຄົນແລະສັງຄົມນັ້ນ ເກີດທຸກຂ໌, ດ້ວຍເຫຕນີ້ ຈົ່ງພາກັນ ຄິດຈິງ, ເວົ້າຈິງ, ປະຕິບັດຈິງ ບັນຫາທຸກຢ່າງ ກໍ່ຈະປະສົບຜົລສຳເລັດຈິງ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 30, 2016 01:45 PM

ເຕັມຫນ້າ