ສັນຍາ ລາວ-ວຽດນາມ ຖືກ ປະນາມ

ສິດນີ
2017-07-16
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ອົງການ ພັນທະມິດ ເພື່ອ ປະຊາທິປະຕັຍ ໃນລາວ
ອົງການ ພັນທະມິດ ເພື່ອ ປະຊາທິປະຕັຍ ໃນລາວ
Alliance for Democracy in Laos

ພັ​ນ​ທະມິ​ຕ ​ເພື່ອ​ປະ​ຊາ​ທິ​ປະ​ໄຕ ​ໃນ​ລາວ​ ໄດ້​ອອກ​ຖ​ແລງກ​ານ ​ປະ​ນາມ ສັນ​ຍ​າ​ພິ​ເສດ ​ລາວ-ວຽດ​ນາມ ​ໃນ​ວັນ​ຄອບ​ຮອບ 40 ປີ. ຖ​ແລງ​ການ ດັ່ງ​ກ່າວ ​ຣະ​ບຸ​ວ່າ ສັນ​ຍາ​ພິ​ເສດ​ ລາວ-ວຽດ​ນາມ ທີ່​ໄດ້​ເຊັນ​ກັນ​ ໃນ​ມື້​ວັນ​ທີ​ 18 ກໍ​ຣະ​ກະ​ດາ ​ປີ 1977 ຣະ​ຫວ່າງ ຟາມ​ວັນ​ດົງ​ ກັບ ​ໄກ​ສອນ ພົມ​ວິ​ຫານ ນັ້ນ ເປັນ​ສັນ​ຍາ ​ທີ່​ວຽດ​ນາມ​ ສາ​ມາດ​ຄອບ​ຄອງ​ລາວ​ໄດ້​ ໃນ​ທຸກ​ດ້ານ​ ແລະ ເປັນ​ສັນ​ຍາ​ ທີ່​ຝ່າຍ​ລາວ ​ເປັນ​ຜູ້​ເສັຽ​ປຽບ ​ອັນ​ໃຫ​ຍ່​ຫລວງ ​ຝ່າຍດຽວ. ດັ່ງ ດຣ. ບຸນທອນ  ຈັນທະລາວົງ ວີເຊີ ປະທານ ອົງການ ດັ່ງກ່າວ ກ່າວວ່າ:

“ພວກເຮົາ ອົງການພັນທະມິດ ເພື່ອ ປະຊາທິປະຕັຍ ໃນລາວ ໄດ້ອອກຖແລງການ ປະນາມ ຄົບຮອບວັນທີ່ ເຊັນສັນຍາ ຄວາມຮ່ວມມື ລາວ-ວຽດນາມ ວັນທີ 18 ກໍຣະກະດາ ປີ 1977 ກໍຍ້ອນວ່າສັນຍານີ້ ເປັນສັນຍາ ເຮັດໃຫ້ວຽດນາມ ຄອບຄອງລາວ ໃນທຸກດ້ານ ເຮັດໃຫ້ ຝ່າຍລາວ ເສັຽປຽບ ຢ່າງໃຫຍ່ຫລວງ ພຽງຝ່າຍດຽວ ແລະ ຍ້ອນສັນຍານີ້ແລ້ວ ຈຶ່ງເຮັດໃຫ້ ວຽດນາມ ເຂົ້າມາຄອບຄອງລາວ ໄດ້ຕາມໃຈ ຢຽບຢ່ຳສິດທິ ຂອງຄົນລາວ ໃນຫຼາຍດ້ານ ທາງດ້ານການທະຫານ ການເມືອງ ວັທນະທັມ ການສຶກສາ ເສຖກິດ ການຍຶດເອົາ ດິນດອນ ຕ່ອນຫຍ້າ ຂອງລາວ ໃນຫຼາຍແຂວງ ຫຼາຍແຫ່ງ ຕາມຊາຍແດນ ຂອງລາວ ແລະ ບັນຫາ ທີ່ສຳຄັນ ທີ່ສຸດ ໃນສະພາບ ປັດຈຸບັນກໍຄື ວຽດນາມ ມິສິດເໜືອກວ່າ ຄົນລາວ, ກໍຄືປ່ອຍໃຫ້ ຄົນວຽດນາມ ມາຢູ່ລາວຫລາຍ ແລະ ທາງການວຽດນາມ ຍັງບີບບັງຄັບ ໃຫ້ຣັຖບານ ສປປລາວ ມອບສັນຊາດ ໃຫ້ແກ່ຄົນວຽດນາມ ມາຢູ່ລາວ ແລະກໍບີບໃຫ້ ທາງການລາວ ໃຫ້ເງື່ອນໄຂສະດວກ ຕໍ່ນັກທຸຣະກິດ ວຽດນາມອີກ ອັນນີ້ເປັນເຫດຜົລ ທີ່ເຮັດໃຫ້ ພວກເຮົາ ບໍ່ຍອມຮັບຮູ້ ສັນຍາ ມີດຕະພາບ ລາວ-ວຽດນາມ ທີ່ເພີ່ນເຊັນກັນ ທີ່ຈະຄົບຮອບ 40 ປີ ພວກເຮົາ ຈຶ່ງໄດ້ ອອກຖແລງການນີ້. ຕໍ່ການສັນຍາ ລາວ-ວຽດນາມ ຄົບຮອບ 40 ປີ ທີ່ຈະມາເຖິງນີ້.

ພວກເຮົາອົງການພັນທະມິດ ເພື່ອປະຊາທິປະຕັຍ ໃນລາວ ກໍຄືປະຊາຊົນລາວ ທຸກທົ່ວຫນ້າ ທີ່ມີຄວາມຮັກຊາດ ທວງທາງການ ວຽດນາມ ໃຫ້ຍົກເລີກ ສັນຍາພິເສດ ລາວ-ວຽດນາມ ພວກເຮົາຄົນລາວ ບໍ່ຕ້ອງການສັນຍານີ້ ຄົນລາວສາມາດ ປົກຄອງ ດ້ວຍຄົນລາວເອງ ສາມາດ ພັທນາ ປະເທດລາວເອງ ແລະ ຄົນລາວຕ້ອງການ ໃຫ້ມີການປ່ຽນແປງ ໃນລາວ ໄປສູ່ ປະຊາທິປະຕັຍ ພວກເຮົາທວງໃຫ້ ສສ ວຽດນາມ ຈົ່ງຍຸຕິການ ເຂົ້າມາ ບີບບັງຄັບ ຄົນລາວໃຫ້ຍອມ ເພື່ອຮັບໃຊ້ ວຽດນາມ ປ່ອຍໃຫ້ ການປົກຄອງ ໃນລາວ ໄປສູ່ ປະຊາທິປະຕັຍ.”

ຖ​ແລງ​ການ ຍັງ​ຣະ​ບຸ​ຕໍ່​ໄປ​ວ່າ ເທົ່າ​ເຖິງ​ປັດ​ຈຸ​ບັນ ວຽດ​ນາມ ​ຍັງ​ສືບ​ຕໍ່​​ ການ​ກືນ​ກິນ​ລາວ ໃນ​ຫ​ລາຍ​ຮູບ​ແບບ​ ເປັນ​ຕົ້​ນ ໃນ​ທຸກ​ຂັ້ນ​ຕອນ​​ ອຳ​ນາດການ​ປົກ​ຄອງ ​ໃນ​ລາວ ​ຈະ​ມີ ​ທີ່​ປຶກ​ສາ​ ຫລື​ ນັກຊ່ຽວ​ຊານ ຈາກວຽດ​ນາມ ເຂົ້າ​ມາ​ ຄວບ​ຄຸມ ​ສັ່ງ​ກາ​ນ ​ຢ່າງ​ເຄັ່ງ​ຄັດ. ນອ​ກ​ຈາກ​ນັ້ນ ຍັງ​ມີ​ ກອງ​ທະ​ຫານ​ວຽດ​ນາມ ບໍ່​ວ່າ​ໃນ​ເຄື່ອງ​ແບບ ​ຫລື​ ນອກ​ເຄື່ອງ​ແບບ ເຂົ້າ​ມາ​ສັງ​ກັດ​ ຢູ່​ໃນ​ ແຕ່​ລະ​ທ້ອງ​ຖິ່ນ, ແຂວງ​ຕ່າງໆ​ ໃນ​ລາວ ເພື່​ອ​ບັງ​ຄັບ​ຂົ່ມ​ຄູ່ ຄົນ​ລາວ ບໍ່​ໃຫ້​ມີ​ປາກ​ສຽງ ​ໃນ​ການ​ປົກ​ຄອງ ​ປະ​ເທດ​ຊາດ​ ດ້ວຍ​ຄົນ​ລາວ​ເອງ. ອົງ​ການ​ດັ່ງ​ກ່າວ​ໄດ້​ຮຽກ​ຮ້ອງ​ໃຫ້​ ທາງກ​ານ​ລາວ ​ຍົກ​ເລີກ​ສັນ​ຍາ​ນີ້ ກັບ​ວຽດ​ນາມ ​ໃຫ້​ຄົນ​ລາວ ​ປົກ​ຄອງ​ກັນ​ເອງ ແບບ​ປະ​ຊາ​ທິ​ປະ​ຕັຍ ປາ​ສ​ຈາກ ວຽດ​ນາມ​ ເຂົ້າ​ມາ​ຫ​ຍຸ້ງກ່ຽວ. ດຣ. ບຸນທອນ ກ່າວເພີ້ມວ່າ:

"ພວກເຮົາທວງໃຫ້ ທາງການ ສປປລາວ ກໍແມ່ນຝ່າຍນຶ່ງ ທີ່ຮ່ວມເຊັນສັນຍາ ມິດຕະພາບພິເສດ ລາວ-ວຽດນາມ ນີ້ໃຫ້ຍຸບເລີກ ສັນຍາ ພິເສດ ທີ່ເຊັນກັນ ໃນມື້ວັນທີ 18 ກໍຣະກະດາ ປີ 1977 ເພາະໃນສັນຍານີ້ ໄດ້ບົ່ງໃວ້ວ່າ ສັນຍານີ້ ຈະຖືກຍົກເລີກໄດ້ ຖ້າຣັຖບານ ຝ່າຍໃດນຶ່ງ ສເນີຢາກໃຫ້ ຍົກເລີກ ສະນັ້ນ ມັນມີຄວາມຈຳເປັນແລ້ວ ທີ່ຝ່າຍລາວ ຕ້ອງສເນີໃຫ້ ຍົກເລີກ ຢ່າງບໍ່ມີ ເງື່ອນໄຂ".

​ຖ​ແລງ​ການ​ ຣະ​ບຸ​ເພີ້ມ​ວ່າ ວຽດ​ນາມ​ ນອ​ກ​ຈາກ ​ຄວບ​ຄຸມ​ລາວ​ແລ້ວ ຍັງ​ໄດ້​ຂົນ​ເອົາ ​ຊັບ​ສິນ ​ອັນ​ມີ​ຄ່າ​ ຂອງ​ລາວ ໄປ​ວຽດ​ນາມ ຢ່າງ​ມະ​ຫາ​ສານ ເປັນ​ຕົ້ນ​ການ​​ຕັດ​ໄມ້​ ແລະ​ ຂົນ​ໄມ້​ທ່ອນ​ ອອກ​ຈາກ​ລາວ ​ໄປ​ວຽດ​ນາມ ໂດຍ​ແມ່ນ ກອງ​ທັບ​ວຽດ​ນາມ ​ເປັນ​ຜູ້​ຄວບ​ຄຸມ. ນອ​ກ​ຈາກ​ນັ້ນ ກໍ​ຍັງ​ມີ​ ການ​ຂຸດ​ຄົ້ນ ​​ເອົາ​ແຮ່​ທາດ ອັນ​ລ້ຳ​ຄ່າ​ ແລະ ​ຊັ​ພ​ຍາ​ກອນ ​ທັມ​ມະ​ຊາດ ​ປະ​ເພດອື່ນໆ​ ຂອງ​ລາວ​ ໄປ​ວຽດ​ນາມ.

ວຽດ​ນາ​ມ​ຍັງໄດ້​ທຳ​ລາຍ ​ວັ​ທ​ນະ​ທັມ ແລະ ​ຂ​ນົບ​ທຳ​ນຽມ​ຂອງ​ລາວ ​ໃນ​ຫລາຍ​ເຂດ ​ແລະ ​ຫລ​າຍ​ຫົວ​ເມືອງ ​ແລະ ​ບັງ​ຄັບ ​ໃຫ້​ພ​ະນັກ​ງານ​ຣັດ ຮຽນ​ພາ​ສາ​ວຽດ​ນາມ ຕາມ​ໂຮງ​ຮຽນ ​ແລະ ​ສະ​ຖາ​ບັນ​ຫລາຍ​ແຫ່ງ. ​ໃນ​ລາວ​ ກໍ​ສອນ ​ແລະ ​ໃຊ້​ພາ​ສາ​ວຽດ​ນາມ ດັ່ງ​ໂຮງ​ຮຽນ ​ມິດຕະ​ພາບ​ ວຽງ​ຈັນ-ໂຮ່ຈີ​ມີນ​ ທີ່​ປ່​ຽນ​ຊື່​ ຈາກ​ໂຮງ​ຮຽນ​ ສີ​ໂຄດ​ຕະ​ບອງ, ວຽດ​ນາມ​ ພ​ຍາ​ຍາມ ​ປ່ຽນ​ປ​ວັດ​ສາດ​ລາວ.

​ວຽດ​ນາມຍັງໄດ້​ຍຶດ​ເອົາ ​ດິນ​ດອນ​ຕ່ອນ​ຫ​ຍ້າ​ຂອງ​ລາວ ​ໃນ​ຫລາຍ​ແຂວງ ​ຕາມ​ແນວ​ຊາຍ​ແດນ ເປັນ​ຕົ້ນ​ທີ່​ແຂວງ​ຊຽງ​ຂວາງ, ຄຳ​ມ່ວນ ​ແລະ ​​ຫລາຍ​ແຂວງ ໃນ​ເຂດ​ພາກ​ໃຕ້, ບາງ​ແຂວງກວມ​ເອົາ​ ດິນ​ລາວເຖິງ 15 ກິ​ໂລ​ແມັດ.

ເຕັມຫນ້າ