ລາວ,ກໍາພູຊາ ຍັງຂັດກັນ ເຂດຊາຍແດນ

ຈໍາປາທອງ
2018-01-10
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ທ່ານ ທອງລຸນ ສີສຸລິດ ນາຍົກຣັຖມົນຕຣີລາວ ໄປພົບປະກັບ ນາຍົກຣັຖມົນຕຣີ ກໍາພູຊາ ທ່ານ ຮຸນ ເຊນ ທີ່ກຸງພະນົມເປັນ ໃນວັນທີ 1 ກັນຍາ 2017 ເພື່ອສືບຕໍ່ແກ້ໄຂ ຂໍ້ຂັດແຍ່ງ ເຂດຊາຍແດນ.
ທ່ານ ທອງລຸນ ສີສຸລິດ ນາຍົກຣັຖມົນຕຣີລາວ ໄປພົບປະກັບ ນາຍົກຣັຖມົນຕຣີ ກໍາພູຊາ ທ່ານ ຮຸນ ເຊນ ທີ່ກຸງພະນົມເປັນ ໃນວັນທີ 1 ກັນຍາ 2017 ເພື່ອສືບຕໍ່ແກ້ໄຂ ຂໍ້ຂັດແຍ່ງ ເຂດຊາຍແດນ.
Screen captured FB video

ກອງປະຊຸມຄນະກັມການ ຮ່ວມມືຮັກສາຄວາມສງົບຮຽບຮ້ອຍ ຕາມຊາຍແດນທົ່ວໄປ ລາວ-ກັມພູຊາ ແລະ ກັມພູຊາ-ລາວ ຄັ້ງທີ 3 ຖືກຈັດ ຂຶ້ນຢູ່ ນະຄອນຫລວງວຽງຈັນ ເປັນເວລາ 4 ມື້ ຄືແຕ່ມື້ວັນທີ 23 ເຖິງວັນທີ 26 ທັນວາ 2017 ທີ່ຜ່ານມາ ແລະເມື່ອກ່ອນໜ້ານັ້ນ ຄືກາງ ເດືອນ ທັນວາ ກໍມີກອງປະຊຸມຊາຍແດນ ຣະຫວ່າງ ແຂວງຈໍາປາສັກ ແລະແຂວງຊຽງແຕງ ທີ່ເຂດຊາຍແດນສອງປະເທສ ລາວ-ກໍາພູຊາ ແຕ່ບໍ່ສາມາດຕົກລົງບັນຫາຫຍັງກັນໄດ້ ຍ້ອນຝ່າຍກຳພູຊາ ບໍ່ຍອມຮັບເງື່ອນໄຂທີ່ຝ່າຍລາວ ສເນີຮວມທັງ ການຖອນທະຫານ ຫ່າງຈາກເສັ້ນ ຊາຍແດນນຳດ້ວຍ. ຕາມຄວາມເວົ້າ ຂອງເຈົ້າໜ້າທີ່ຣະດັບສູງ ປກຊ-ປກສ ແຂວງຈຳປາສັກ ຜູ້ຂໍສງວນຊື່ ທ່ານນຶ່ງ ຕໍ່ໍ່ວິທຍຸເອເຊັຽເສຣີ:

“ກອງປະຊຸມຣະຫວ່າງຈຳປາສັກ ກັບຊຽງແຕງ ຫັ້ນສຳເຣັດແລ້ວ, ເນື້ອໃນກອງປະຊຸມ ທີ່ຊິເອົາກັນຈັ່ງໃດ ລະຖືວ່າຍັງບໍ່ລົງລອຍກັນເທື່ອ. ຜົລການປະຊຸມຫັ້ນ ກະຍັງບໍ່ທັນໄດ້ຣະບຸຣະອຽດນ່າ ເພາະວ່າຖືວ່າບໍ່ມີແນວ ຕົກລົງກັນໄດ້, ເວົ້າກັນແນວນັ້ນໂລດ ບໍ່ມີແນວຕົກລົງກັນໄດ້. ພວກເຮົາຫັ້ນສເນີໃຫ້ ກຳພູຊາອອກຈາກຂອບເຂດ ຊາຍແດນ ເບື້ອງລະ 50 ແມັດ, ມັນກະຍັງບໍ່ອອກ."

ທ່ານກ່າວຕື່ມວ່າ ຝ່າຍລາວໄດ້ຍື່ນຂໍ້ສເນີ ໃຫ້ຝ່າຍກຳພູຊາຮັບເອົາ ຮວມທັງຂໍໃຫ້ຄນະກັມມະການ ປັກຫຼັກໝາຍຊາຍແດນ ຂອງທັງສອງຝ່າຍ ໄປກວດກາ ເຂດຊາຍແດນ ເພື່ອປັກຫຼັກໝາຍ:

“ສເນີໃຫ້ຄນະກັມມະການປັກ ຫຼັກໝາຍ 2 ຝ່າຍລົງກວດກາ ບ່ອນທີ່ຝ່າຍກຳພູຊາປຸກຫຼັງເຮືອນ ຢູ່ຂອບເຂດຊາຍແດນ ປັກຫຼັກໝາຍ 36 ຮອດ 40 ລົງກວດກາ ວ່າໃຜເຂົ້າໄປ. 2 ລະເວົ້າເຣື້ອງບ່ອນວ່າ ກຳພູຊາເຮັດເຂື່ອນຕັນນ້ຳຫັ້ນ, ເຂື່ອນຕັນນ້ຳຢູ່ 38 ຢູ່ຫຼັກໝາຍ 38, ຫຼັກ 35 ຫາ 38, ກະຖືວ່າຢາກລົງໄປ ກວດກາເບິ່ງ. ບາດນີ້ນ້ຳຫັ້ນມັນຫຼາຍມັນລົ້ນມາ ທາງເຮົາພີ້ ທາງເຮົາລະນ້ຳຖ້ວມທາງ ລະໄປບໍ່ໄດ້ ໄປຍາກມາຍາກ."

ກອງປະຊຸມຄະນະກັມການຮ່ວມມືຮັກສາຄວາມສງົບ ຮຽບຮ້ອຍຕາມຊາຍແດນ ທົ່ວໄປລາວ-ກັມພູຊາ ແລະ ກັມພູຊາ-ລາວ ຄັ້ງທີ 3 ແມ່ນ ພົລຈັດຕະວາ ສີພັນ ພຸດທະວົງ ຫົວໜ້າກົມທະຫານ ຊາຍແດນ ກົມໃຫຍ່ ເສນາທິການ ກອງທັບ ປະຊາຊົນລາວ, ປະທານຄະນະກັມການ ຮ່ວມມື ຮັກສາຄວາມສງົບຮຽບຮ້ອຍ ຕາມຊາຍແດນທົ່ວໄປ ລາວ-ກັມພູຊາ ແລະ ພົລໂທ ເສັຍ ໂຊເຈັຍ ຮອງເສນາທິການ ຮ່ວມຫົວໜ້າກົມ ກິຈການຊາຍແດນ ກອງບັນຊາການ ທະຫານສູງສຸດ, ປະທານຄະນະກັມການ ຮ່ວມມືຮັກສາ ຄວາມສງົບຮຽບຮ້ອຍ ຕາມຊາຍແດນ ທົ່ວໄປ ກັມພູຊາ-ລາວ ເປັນປະທານຮ່ວມ.

ກອງປະຊຸມຄັ້ງນີ້ ຖືກຈັດຂຶ້ນໂດຍປະຕິບັດ ຕາມບົດບັນທຶກການຮ່ວມມື ຣະຫວ່າງ 2 ກະຊວງປ້ອງກັນປະເທດ ລາວແລະກັມພູຊາ ແລະ ບົດບັນທຶກ ຂອງ ຄະນະກັມການຮ່ວມມືຮັກສາ ຄວາມສງົບຮຽບຮ້ອຍ ຕາມຊາຍແດນທົ່ວໄປ ລາວ-ກັມພູຊາ ແລະ ກັມພູຊາ-ລາວ ຄັ້ງທີ 2.

ໃນກອງປະຊຸມຄັ້ງທີ 3 ນີ້, ຄະນະຜູ້ແທນ 2 ຝ່າຍ ໄດ້ປຶກສາຫາລື ແລະແລກປ່ຽນຄຳຄິດຄຳເຫັນ ຊຶ່ງກັນແລະກັນ ແລະເຫັນດີ ຮ່ວມກັນ ບາງບັນຫາ ດັ່ງນີ້:

-ສອງຝ່າຍສນັບສນູນຖແລງການຮ່ວມ ຣະຫວ່າງນາຍົກຣັຖມົນຕຣີ ສປປລາວ ແລະນາຍົກຣັຖມົນຕຣີ ຣາຊອານາຈັກ ກັມພູຊາ ໃນວັນທີ 12 ສິງຫາ 2017 ທີ່ນະຄອນຫລວງວຽງຈັນ ແລະ ການພົບປະ 2 ຝ່າຍ ຣະຫວ່າງນາຍົກ ຣັຖມົນຕຣີຂອງ 2 ປະເທສ ລາວ-ກໍາພູຊາ ທີ່ກຸງ ພະນົມເປັນ ໃນມື້ວັນທີ 1 ກັນຍາ 2017 ຊຶ່ງນາຍົກຣັຖມົນຕຣີທັງ 2 ໄດ້ຕົກລົງເຫັນດີ ໃຫ້ຖອນກຳລັງ ຂອງທັງ 2 ຝ່າຍ ອອກຈາກເສັ້ນ ຊາຍແດນ ໃນເຂດທີ່ມີການຂັດແຍ່ງກັນ ແລະຢຸດເຊົາ ການດຳເນີນກິຈການ ໃນພື້ນທີ່ຊາຍແດນ ບໍຣິເວນ ແກ້ງຕໍໝາກຄອຍ ຫ້ວຍຕາເງົາ ຣະຫວ່າງ ເມືອງສນາມໄຊ ແຂວງອັຕຕະປື ແລະເມືອງແສງປານ ແຂວງຊຽງແຕງ ຊຶ່ງເປັນບໍຣິເວນ ຊາຍແດນ ທີ່ຍັງມີການຂັດແຍ່ງກັນ ແລະເຫັນດີໃຫ້ຄະນະກັມການ ຊາຍແດນຮ່ວມ ລາວ-ກັມພູຊາ, ກໍາພູຊາ-ລາວ ລົງສຳຣວດ ແລະປັກຫຼັກໝາຍຊາຍແດນ ໃນບໍຣິເວນ ດັ່ງກ່າວຮ່ວມກັນໂດຍໄວ.

ໃນທີ່ປະຊຸມ ຝ່າຍສປປລາວ ໄດ້ສເນີໃຫ້ຝ່າຍກໍາພູຊາ ຖອນກຳລັງທະຫານທັງໝົດ ອອກຈາກເຂດຊາຍແດນ ແລະຢຸດເຊົາ ການດຳເນີນ ກິຈການຕ່າງໆ ຢູ່ບໍຣິເວນຊາຍແດນ ແກ້ງຕໍໝາກຄອຍ ຫ້ວຍຕາເງົາ ທີ່ວ່ານັ້ນ ແລະສເນີໃຫ້ຄະນະກັມການ ເຕັກນິກ ຊາຍແດນຮ່ວມ ລາວ-ກັມພູຊາ, ກັມພູຊາ-ລາວ ລົງສຳຣວດ ແລະປັກຫລັກໝາຍ ຊາຍແດນຮ່ວມກັນ ໂດຍໄວ ຕາມການຕົກລົງ ຂອງນາຍົກຣັຖມົນຕຣີ 2 ປະເທສລາວ ແລະກັມພູຊາ. ຝ່າຍລາວສເນີໃຫ້ຝ່າຍກັມພູຊາ ຍົກຍ້າຍເຮືອນ ທີ່ກໍ່ສ້າງ ຢູ່ເລີກເຂົ້າມາ ໃນດິນແດນລາວ ຈຳນວນ 3 ຫລັງ ແລະຢູ່ຕິດກັບ ເສັ້ນຊາຍແດນ ຈຳນວນ 6 ຫລັງ ຢູ່ບໍຣິເວນ ຫລັກໝາຍຊາຍແດນ  ທີ່ທັງ 2 ຝ່າຍ ໄດ້ເປັນເອກພາບປັກຫລັກໝາຍ ສຳເຣັດແລ້ວ.

ແຕ່ທາງຝ່າຍກໍາພູຊາ ໄດ້ສເນີບັນຫາຫຍັງແດ່ຢູ່ໃນກອງປະຊຸມຄັ້ງທີ 3 ທີ່ວ່ານັ້ນ ທາງການສປປລາວ ບໍ່ໄດ້ເປີດເຜີຍໃຫ້ ສາທາຣະນະຊົນ ຮູ້, ມີແຕ່ຂ່າວ ທົ່ວໄປ ບອກໃຫ້ຮູ້ວ່າ ຝ່າຍກັມພູຊາ ບໍ່ມີຄວາມພໍໃຈ ນໍາການທີ່ທະຫານ ສປປລາວ ປຸກສ້າງເຮືອນ ແລະກໍ່ສ້າງເສັ້ນທາງ ຢູ່ໃກ້ກັບຊາຍແດນ ກັມພູຊາ.

ເຖິງຢ່າງໃດກໍຕາມ 2 ຝ່າຍກໍຍັງເຫັນດີເປັນເອກພາບ ໃນການປົກປັກຮັກສາຄວາມສງົບ ຄວາມເປັນລະບຽບຮຽບຮ້ອຍຕາມແນວຊາຍແດນ ຂອງ 2 ປະເທດລາວ-ກັມພູຊາ. ແຕ່ໃນກອງປະຊຸມ ຄະນະກັມການຮ່ວມມື ຮັກສາຄວາມສງົບ ຮຽບຮ້ອຍ ຕາມຊາຍແດນ ທົ່ວໄປ ລາວ-ກັມພູຊາ ແລະ ກັມພູຊາ-ລາວ ບໍ່ໄດ້ລົງນາມ ໃນຂໍ້ຕົກລົງຫຍັງ ຮ່ວມກັນ ຍ້ອນເຫດຜົລ ທີ່ວ່າ ທັງ 2 ຝ່າຍຍັງມີຄວາມຄິດເຫັນ ທີ່ແຕກຕ່າງກັນ ຊຶ່ງແຕ່ລະຝ່າຍ ຈະໄດ້ນໍາເອົາບັນຫາຕ່າງໆ ໄປລາຍງານ ຂໍທິດຊີ້ນຳ ຈາກຂັ້ນເທິງ ຂອງຕົນ ເພື່ອຮ່ວມກັນແກ້ໄຂ ແບບ ສັນຕິວິທີ ໂດຍໄວ.

ເມື່ອປີກາຍ ນາຍົກຣັຖມົນຕຣີ ຂອງສອງປະເທດ ໄດ້ຕົກລົງກັນວ່າ ລາວ ແລະ ກັມພູຊາ ຈະພະຍາຍາມ ແກ້ໄຂບັນຫາ ຂໍ້ຂັດແຍ້ງ ຊາຍແດນ ໃຫ້ແລ້ວ ໃນໄວໆນີ້. ສາເຫດ ທີ່ເຮັດໃຫ້ ສປປລາວ ແລະ ກັບກຳພູຊາ ຍັງບໍ່ສາມາດຕົກລົງ ກັນໄດ້ໃນການແບ່ງ ເຂດແດນ ແລະປັກຫລັກໝາຍ ຊາຍແດນ ສຳເຣັດນັ້ນ ແມ່ນເປັນຍ້ອນ ເບື້ຶອງ ສປປລາວ ອີງໃສ່ເຂດ ຊາຍແດນ ຕາມແຜນທີ່ ທີ່ປະເທດຝລັ່ງເສດ ເປັນຜູ້ກຳນົດກ່ອນ. ສ່ວນກຳພູຊາ ແມ່ນຍືດເອົາເຂດ ຊາຍແດນ ຕາມແຜນທີ່ ທີ່ສະຫະຣັຖ ອະເມຣິກາ ເປັນຜູ້ກຳນົດ ຕາມຫລັງ.

ແຜນທີ່ 2 ອັນທີ່ວ່ານີ້ ມີການກຳນົດເສັ້ນຊາຍແດນ ແຕກຕ່າງກັນ. ດັ່ງນັ້ນຈຶ່ງ ເຮັດໃຫ້ທີ່ຜ່ານມາ ສອງປະເທດນີ້ ບໍ່ລົງລອຍກັນ ແລະ ມີບັນຫາ ເຣຶ່ອງການແບ່ງປັນ ເຂດຊາຍແດນ ແຕ່ກໍບໍ່ເປັນບັນຫາ ທີ່ສົ່ງຜົນກະທົບ ຕໍ່ຄວາມສຳພັນ ຣະຫວ່າງປະເທດ ຮ້າຍແຮງຄືຣະຍະ ຫລັງໆມານີ້ ໃນຂະນະທີ່ ທາງການ ສປປລາວ ແລະ ກຳພູຊາ ໄດ້ເອກະພາບ ກັນແກ້ໄຂບັນຫາ ຊາຍແດນໃນ 4 ຂໍ້ ທີ່ວ່າຈະແກ້ໄຂ 4 ຈຸດ ຄືຢູ່ ເສັ້ນຊາຍແດນ 0,33, 0,17 ເວີນຄຳ-ໂອສະວາຍ ແລະເສັ້ນຊາຍ 0,32 ໃຫ້ໄວເທົ່າທີ່ ຈະເຮັດໄດ້.

ຂ່າວລ້າສຸດຣາຍງານວ່າ ຜົລຂອງການຂັດແຍ່ງ ທາງດ້ານຊາຍແດນ ຣະຫວ່າງ 2 ປະເທສລາວ ແລະກຳພູຊາ ເຮັດໃຫ້ປະຊາຊົນລາວ ໄດ້ຮັບຄວາມເດືອດຮ້ອນ ໃນການທຳມາຫາກິນ ເປັນຕົ້ນປະຊາຊົນ ເມືອງພູວົງແຂວງອັດຕະປື ທີ່ຢູ່ໃກ້ ຊາຍແດນ ແຂວງຣັດຕະນະຄີີຣີ ຂອງກຳພູຊາ ບໍ່ສາມາດເຂົ້າໄປ ເກັບກ່ຽວເຂົ້າ ໃນນາຂອງຕົນໄດ້ ເພາະທະຫານ ກຳພູຊາ ຫ້າມບໍ່ໃຫ້ເຂົ້າໄປ ພາຍຫຼັງມີບັນຫາ ນຳກັນ ຣະຫວ່າງ 2 ປະເທສ ແລະເຂົ້າໃນນາ ທີ່ວ່ານັ້ນ ຖືກປະຊາຊົນ ກຳພູຊາ ເກັບກ່ຽວເອົາ. ດັ່ງ ເຈົ້າໜ້າທີ່ ແຂວງອັດຕະປື ທ່ານນື່ງກ່າວໃນ ມື້ວັນທີ 20 ທັນວາທີ່ຜ່ານມາວ່າ:

"ເຂົາກະບໍ່ໄປກະຖິ້ມເລີຍຫັ້ນແຫລະ ກໍາເຈັຍເຂົາກະກ່ຽວໄປກິນລະກະແລ້ວ ແຕ່ກ່ອນຫັ້ນເຂົາກະເຄີຍເຮັດໄຮ່ເຮັດນາ ຢູ່ແຖວນັ້ນ ພາຍຫລັງ ໄດ້ມີຂໍ້ຂັດແຍ່ງກັນຫັ້ນ ທາງກໍາປູເຈັຍ ປະກາດບໍ່ໃຫ້ ທາງນີ້ເຂົ້າໄປ ຫັ້ນນະ ມັນກະຍັງເປັນເຂດໃຈກາງ ທີ່ທັງສອງຝ່າຍ ບໍ່ທັນໄດ້ອ້າງ ກັມສິດຫັ້ນນະ."

ທ່ານເວົ້າວ່າ ດີແຕ່ຢູ່ໃນເຂດ ທີ່ມີບັນຫາຂໍ້ຂັດແຍ່ງກັນນັ້ນ ບໍ່ມີເຮືອນປະຊາຊົນ ຢູ່ຫລາຍ. ທ່ານເວົ້າຕື່ມອີກວ່າ ເຣຶ່ອງການແບ່ງເຂດ ຊາຍແດນ ແລະການປັກຫລັກໝາຍ ຊາຍແດນຢູ່ເຂດ ເມືອງພູວົງ ແຂວງອັດຕະປື ທີ່ຕິດກັບແຂວງ ລັດຕະນະຄີຣີ ຂອງ ກຳພູຊາ ມາເຖິງປັດຈຸບັນ ກໍຍັງບໍ່ເຫັນວ່າມີຫຍັງຄືບໜ້າ ແຕ່ຢ່າງໃດ ເພາະ ທາງຣັຖບາລ ຝລັ່ງເສດ ຍັງບໍ່ທັນສົ່ງແຜນທີ່ ໃຫ້ທາງການລາວ ແລະກຳພູຊາ ເພື່ອທີ່ຈະໃຊ້ ເປັນຫລັກຖານ ອ້າງອີງນັ້ນ.

ຄໍາເຫັນ (1)
  • ພິມ
  • ໃຊ້ຮ່ວມກັນ
  • ອີແມວລ໌

sieng

ຈາກ champasak

Lao and Cambodia will fight for the border conflict soon. Laos has lost it land about 25 miles KLM from Houa phan to kham kert and Laos is a part of Vietnam, the Lao pdr are not thing to fight the Vietnam. In cambodian and Laos border now, cambodian has adjust thye Laos berder land for about 5 klm, cambodia has build a border route to protect the land. Cambodia priminister
husen is reject any agreement between Laos and cambodia.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 11, 2018 04:24 AM

ເຕັມຫນ້າ