ລາວ-ກໍາພູຊາ ຜູກສັມພັນ

ຈໍາປາທອງ
2017-03-16
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ທ່ານ ບຸນຍັງ ວໍຣະຈິດ(ຊ້າຍ)ຜູ້ນຳສູງສຸດສປປລາວ ຖືກຕ້ອນຮັບໂດຍ ສົມເດັດ ໂນໂຣດົມ ສີຫາໂມນີ ກະສັດແຫ່ງຣາຊອານາຈັກ ກຳປູເຈັຽ
ທ່ານ ບຸນຍັງ ວໍຣະຈິດ(ຊ້າຍ)ຜູ້ນຳສູງສຸດສປປລາວ ຖືກຕ້ອນຮັບໂດຍ ສົມເດັດ ໂນໂຣດົມ ສີຫາໂມນີ ກະສັດແຫ່ງຣາຊອານາຈັກ ກຳປູເຈັຽ
Screen captured

ການໄປຢ້ຽມຢາມ ກຳພູຊາ ຂອງ ທ່ານ ບຸນຍັງ ວໍຣະຈິດ ຖ້າມກາງ ຄວາມຂັດແຍ່ງ ທາງດ້ານ ຊາຍແດນ ຣະຫວ່າງ ປະເທສ ຊຶ່ງ The Cambodia Daily ຣາຍງານວ່າ ທະຫານລາວ ກວ່າ 400 ຄົນ ຂ້າມຊາຍແດນ ເຂົ້າໄປເຂດ ກຳພູຊາ ແລະ ໃຫ້ທະຫານ ຝ່າຍກໍ່ສ້າງ ກຳພູຊາ ຢຸດ ສ້າງຖນົນ 257 ກິໂລແມັດ.

ໂດຍຕອບສະໜອງ ການເຊື້ອເຊີນຂອງ ສົມເດັດ ໂນໂຣດົມ ສີຫາໂມນີ ກະສັດແຫ່ງ ຣາຊອານາຈັກ ກຳປູເຈັຽ, ທ່ານ ບຸນຍັງ ວໍລະຈິດ ເລຂາທິການໃຫຍ່ ຄນະບໍຣິຫານງານ ສູນກາງພັກ ປະຊາຊົນ ປະຕິວັດລາວ ໄປຢ້ຽມຢາມ ກຳປູເຈັຽ ໃນນາມ ປະທານ ປະເທສ ໃນມື້ວັນທີ 22 ແລະ 23 ກຸມພາ 2017 ໃນຂນະທີ່ ສອງປະເທສນີ້ ມີບັນຫາ ຊາຍແດນ ນຳກັນ.

ສື່ມວນຊົນ The Cambodia Daily ຣາຍງານ ໃນມື້ວັນທີ 22 ກຸມພາ ຄືມື້ດຽວກັນກັບ ທ່ານ ບຸນຍັງ ໄປຢ້ຽມຢາມ ກໍາພູຊາ ໂດຍອີງໃສ່ ຄໍາເວົ້າ ຂອງພວກ ທະຫານລາວ ວ່າຄວາມຂັດແຍ່ງ ນັ້ນເກີດຂຶ້ນ ໃນມື້ວັນທີ 8 ກຸມພາ ເມື່ອ ທະຫານລາວ ກວ່າ 400 ຄົນ ໄດ້ຂ້າມເຂດ ຊາຍແດນ ເຂົ້າໄປເມືອງ Siem Pang ຂອງກຳພູຊາ ແລະ ຂໍບໍ່ໃຫ້ທະຫານ ຝ່າຍກໍ່ສ້າງ ກຳພູຊາ ສ້າງຖນົນ ທີ່ມີຄວາມຍາວ 257 ກິໂລແມັດ ແຕ່ເມືອງຊຽງແຕຣງ ໄປຫາ ເມືອງ Siem Pang ຕາມແນວຊາຍແດນ ກໍາພູຊາ-ລາວ ທີ່ມີຄວາມຍາວ ທັງໝົດ ປະມານ 600 ກິໂລແມັດ.

ການກະທໍາຂອງທະຫານລາວ ດັ່ງກ່າວ ເຮັດໃຫ້ທາງຝ່າຍ ກໍາພູຊາ ບໍ່ດີໃຈ ແຕ່ກໍເຮັດຫຍັງ ບໍ່ໄດ້ ເພາະບໍ່ຢາກ ໃຫ້ບັນຫານັ້ນ ບານປາຍ. ດັ່ງທີ່ທ່ານ Chhum Socheat ໂຄສົກ ກະຊວງປ້ອງກັນ ປະເທສ ກໍາພູຊາ ໄດ້ກ່າວຕໍ່ The Cambodia Daily ວ່າ:

“ພວກເຮົາໄດ້ສ້າງ ຖນົນສາຍນີ້ ໃນດິນແດນ ກໍາພູຊາ ໂດຍອີງໃສ່ ແຜນທີ່ ທີ່ຝຣັ່ງເສສ ເປັນຜູ້ສ້າງຂຶ້ນ” ແລະວ່າ “ເຖິງຢ່າງໃດກໍຕາມ ຝ່າຍລາວ ກໍຍັງກ່າວຫາ ພວກເຮົາວ່າ ພວກເຮົາ ສ້າງຖນົນນັ້ນ ຢູ່ໃນເສັ້ນ ຊາຍແດນ ຂອງສອງປະເທສຢູ່”. ທ່ານເວົ້າວ່າ “ພວກເຮົາ ພຍາຍາມ ທີ່ຈະແກ້ໄຂ ບັນຫານີ້ ຢ່າງ ສັນຕິວິທີ ເພາະພວກເຮົາ ບໍ່ຕ້ອງການ ທີ່ຈະໃຫ້ ມີຄວາມຂັດແຍ່ງ ກັບປະເທສ ເພື່ອນບ້ານ” ແລະວ່າ “ປົກກະຕິແລ້ວ ການນໍາອາວຸດ ເຂົ້າມາ ໃນດິນແດນ ຂອງພວກເຮົາ ແມ່ນເປັນສິ່ງທີ່ ຜິດ ແຕ່...ພວກເຮົາ ບໍ່ຕ້ອງການ ໃຫ້ບັນຫານີ້ ກາຍເປັນເຣຶ່ອງໃຫຍ່ ແນວໃດ”.

ກ່ຽວກັບເຣຶ່ອງທີ່ວ່ານີ້ ຕາມຄຳເວົ້າຂອງ ເຈົ້າໜ້າທີ່ ຣະດັບສູງ ຂອງລາວ ແລ້ວແມ່ນວ່າ ຄວາມຂັດແຍ່ງ ຕາມຊາຍແດນ ຣະຫວ່າງ ແຂວງຈຳປາສັກ ແລະ ແຂວງຊຽງແຕງ ຂອງ ກຳພູຊາ ແມ່ນມີແທ້ ແຕ່ບໍ່ເປັນ ບັນຫາໃຫຍ່, ຈະບໍ່ສົ່ງ ຜົນກະທົບ ຕໍ່ການພົວພັນ ຂອງທັງສອງ ປະເທດ ແຕ່ຢ່າງໃດ ຍ້ອນການ ປັກຫລັກໝາຍ ຊາຍແດນ ຍັງບໍ່ທັນ ສຳເຣັດ ຊຶ່ງ ຣັຖບາລ ຂອງ ສອງປະເທສ ນີ້ຍັງ ເຈຣະຈາກັນຢູ່. ດັ່ງທີ່ທ່ານ ກ່າວຕໍ່ ວິທຍຸ ເອເຊັຽເສຣີ ໃນມື້ວັນທີ 1 ມິນາ ນີ້ວ່າ:

"ການເຄື່ອນໄຫວ ຍັງປົກກະຕິຢູ່ດອກ ແຕ່ວ່າ ກະບໍ່ໄດ້ ຜິດກັນດອກ ບໍ່ໄດ້ຫຍັງກັນ ໂຕນີ້ ມັນແຕ່ດົນແລ້ວ ເພາະມັນ ລະຫວ່າງ ເສັ້ນຊາຍແດນ ການປັກຫລັກ ໝາຍຊາຍແດນ ມັນບໍ່ທັນແລ້ວ ຄືຈັ່ງຊັ້ນ ຍັງເປັນເຂດ ຊ່ອງວ່າງຢູ່ ເຈລະຈາກັນຢູ່ ລະຫວ່າງ ຣັຖບານ ຂອງທັງສອງ ປະເທດ".

ທ່ານກ່າວຕື່ມວ່າ ສາເຫດທີ່ ລາວ ແລະ ກຳພູຊາ ມີບັນຫາ ກ່ຽວກັບ ການແບ່ງປັນ ເຂດແດນ ກັນຢູ່ນີ້ ແມ່ນເປັນຍ້ອນ ເບື້ອງ ສປປລາວ ຍຶດເອົາ ການແບ່ງເຂດແດນ ຕາມແຜນທີ່ ທີ່ຝຣັ່ງເສສ ສ້າງຂຶ້ນ ຂນະທີ່ ຝ່າຍກຳພູຊາ ຍຶດເອົາ ຕາມແຜນທີ່ ທີ່ສະຫະຣັຖ ອາເມຣິກາ ສ້າງຂຶ້ນ ຊຶ່ງເປັນແຜນທີ່ ທີ່ແຕກຕ່າງກັນ ໃນການກຳນົດ ເຂດຊາຍແດນ ຣະຫວ່າງ ສອງປະເທສ ນີ້. ແລະ ເຈົ້າໜ້າທີ່ ຫ້ອງວ່າການ ເມືຶອງໂຂງ ກໍເວົ້າ ແບບດຽວກັນ ໃນມື້ວັນທີ 1 ມິນາ ນີ້ວ່າ:

"ຈັ່ງວ່າ ຄືບໍ່ມີ ຄືບໍ່ມີ ບໍ່ໄດ້ຍິນ ບໍ່ໄດ້ຍິນ ຂ່າວເດີ".

ຂໍ້ຂັດແຍ່ງດ້ານຊາຍແດນ ຣະຫວ່າງ ສປປລາວ ແລະ ກຳພູຊາ ໃນຣະຍະ ຫຼັງໆມານີ້ ຕາມຣາຍງານ ຂອງ The Cambodia Daily ແມ່ນເກີດຂຶ້ນ ເມື່ອເດືອນ ເມສາ ປີກາຍ ຍ້ອນທະຫານ ສປປລາວ ພຍາຍາມ ສ້າງຄ້າຍ ໃກ້ບໍຣິເວນ ຊາຍແດນ ເຮັດໃຫ້ ທາງການ ກຳພູຊາ ເພີ້ມກຳລັງ ຕາມແນວຊາຍແດນ ແລະ ເມື່ອຕົ້ນເດືອນ ແລ້ວນີ້ ທະຫານ ກຳພູຊາ ກໍສ້າງຖນົນ ຕາມບໍຣິເວນ ຊາຍແດນ ແຕ່ຖືກ ທະຫານ ສປປລາວ ເຂົ້າໄປຂັດຂວາງ ບໍ່ໃຫ້ສ້າງ ຂນະທີ່ ຣັຖບາລ ຂອງ ສອງປະເທສ ໄດ້ຕົກລົງ ກັນວ່າ ຈະບໍ່ປຸກສ້າງ ສິ່ງໃດໆ ຕາມແນວ ຊາຍແດນ ຈົນກວ່າ ຈະມີການ ປັກຫລັກ ໝາຍເຂດແດນ ຣະຫວ່າງ ສອງປະເທສ ຄັກແນ່.

ແຕ່ເຣຶ່ອງທີ່ວ່າ ທະຫານລາວ ຫລາຍຮ້ອຍຄົນ ຂ້າມຊາຍແດນ ເຂົ້າໃນເຂດ ກໍາພູຊາ ແລະ ການຂັດແຍ່ງ ຣະຫວ່າງ ສປປລາວ ແລະ ກໍາພູຊານັ້ນ ທາງການ ຂອງ ທັງສອງຝ່າຍ ພຍາຍາມ ປົກປິດ ບໍ່ໃຫ້ເຮຶ່ອງນີ້ ຂຍາຍວົງກວ້າງ ໄປສູ່ ສາທາຣະນະຊົນ. ສໍາລັບ ຢູ່ ສປປລາວ ແມ່ນແຕ່ ເຈົ້າຫນ້າທີ່ ແຂວງຈຳປາສັກ ທີ່ມີຊາຍແດນ ຕິດກັບ ກໍາພູຊາ ກໍຍັງບໍ່ຮູ້. ດັ່ງທີ່ທ່ານ ເວົ້າກັບ ວິທຍຸ ເອເຊັຽເສຣີ ໃນວັນທີ 24 ກຸມພາ ນີ້ວ່າ ຕົນບໍ່ຮູ້ກ່ຽວກັບ ຂໍ້ຂັດແຍ່ງ ຕາມແນວ ຊາຍແດນ ລາວ-ກຳພູຊາ ຕາມທີ່ ສຳນັກງານ ຂ່າວຈາກ ກຳພູຊາ ຣາຍງານນັ້ນ ແຕ່ຢ່າງໃດ:

"ຄືບໍ່ໄດ້ຍິນນະ ຂ້ອຍຄືບໍ່ໄດ້ຍິນ ວ່າເມືອງ ເມືອງກະ ບໍ່ຈັກໃດ ມັນບໍ່ມີນະ ບໍ່ໄດ້ຍິນນະ".

ກ່ຽວກັບເຣື້ອງທີ່ວ່ານີ້ ວິທຍຸ ເອເຊັຽເສຣີ ໄດ້ຕີດຕໍ່ ໄປຍັງຜແນກ ປ້ອງກັນຄວາມສງົບ ແຂວງຈຳປາສັກ ແລະ ທັງກະຊວງ ປ້ອງກັນ ປະເທດ ສປປລາວ ເພື່ອຂໍຮູ້ ຂໍ້ມູນເພີ້ມຕື່ມ, ແຕ່ບໍ່ມີ ເຈົ້າຫນ້າທີ່ ຄົນໃດ ໃຫ້ຄຳຕອບໄດ້ ຂນະທີ່ ປະຊາຊົນ ຈໍາປາສັກ ຜູ້ນຶ່ງ ທີ່ບໍ່ປະສົງ ບອກຊື່ ໄດ້ເວົ້າ ໃນທໍານອງ ດຽວກັນກັບ ເຈົ້າຫນ້າທີ່ ແຂວງຈຳປາສັກ ທ່ານນັ້ນວ່າ:

"ບໍ່ໄດ້ຍີນ ມິດຈີ່ລີ່ຢູ່".

ເຣຶ່ອງການຂັດແຍ່ງຊາຍແດນ ສອງປະເທສ ທີ່ວ່ານີ້ ເຈົ້າໜ້າທີ່ ຣັຖບາລ ກໍາພູຊາ ໄດ້ເວົ້າເຖິງຫຼາຍ ແລະ ໄດ້ເວົ້າວ່າ ທັງສອງຝ່າຍ ຈະພົບພໍ້ກັນ ເພື່ອປຶກສາ ຫາລື ກ່ຽວກັບ ສະພາບການ ນັ້ນ. ແລະ ຫລາຍຄົນ ກໍເວົ້າວ່າ ຄວາມຂັດແຍ່ງ ຊາຍແດນ ຣະຫວ່າງ ສອງປະເທສ ທີ່ວ່ານີ້ ຄາດວ່າ ຄນະຜູ້ແທນ ສູງສຸດ ສປປລາວ ຈະໄດ້ ເຈຣະຈາ ກັນກັບຝ່າຍ ກໍາພູຊາ ຮວມທັງ ໃນຣະຍະ ພົບພໍ້ກັນ ຣະຫວ່າງ ທ່ານ ບຸນຍັງ ວໍລະຈິດ ແລະ ນາຍົກ ຣັຖມົນຕຣີ ຮຸນ ເຊນ ເພື່ອແກ້ໄຂ ບັນຫາ ດັ່ງກ່າວ.

ແຕ່ຂ່າວຂອງທາງການລາວ ບໍ່ໄດ້ຣາຍງານ ແນວໃດ ໃຫ້ ສາທາຣະນະຊົນ ຮູ້ກ່ຽວກັບ ການຂັດແຍ່ງ ທາງດ້ານ ຊາຍແດນ ຣະຫວ່າງ ສອງປະເທສ ນອກເໜືອ ໄປຈາກວ່າ ທ່ານ ບຸນຍັງ ໄດ້ພົບພໍ້ ເຈຣະຈາກັນກັບ ນາຍົກ ຣັຖມົນຕຣີ ຮຸນ ເຊນ, ໄດ້ເວົ້າເຖິງ ການສົ່ງເສີມ ການພົວພັນ ການຄ້າ, ການລົງທຶນ, ການກະສິກັມ ແລະ ການທ່ອງທ່ຽວ.

ຕາມຄໍາເວົ້າຂອງທ່ານ Ian Baird ຜູ້ຊ່ວຍ ສາສດາຈານ ດ້ານພູມີສາດ ມະຫາວິທຍາລັຍ Wisconsin Madison ແລະທັງເປັນ ຊ່ຽວຊານ ປະຫວັດສາດ ການເມືອງລາວ ເວົ້າວ່າ ການຂັດແຍ່ງ ຊາຍແດນ ຣະຫວ່າງ ລາວ ແລະກໍາພູຊາ ບໍ່ມີຫຍັງໃໝ່. ຊາຍແດນ ບາງສ່ວນ ຂອງ ສອງປະເທສນີ້ ຍັງຕັດແບ່ງກັນ ບໍ່ທັນຈະແຈ້ງ ດັ່ງນັ້ນ ບາງຄັ້ງຄາວ ຈຶ່ງເກີດ ຄວາມເຄັ່ງຕຶງ ຢູ່ເຂດ ຊາຍແດນນັ້ນ. ຢູ່ຫລາຍເຂດຕາມ ຊາຍແດນ ລາວ-ກໍາພູຊາ ທີ່ມີການ ຂັດແຍ່ງກັນ ຮວມທັງ ຢູ່ເຂດ ຕາມລໍານໍ້າ ເຊກອງ ຢູ່ ແຂວງອັດຕະປື ຂອງລາວ ແລະ ແຂວງຊຽງແຕຣງ ຂອງ ກໍາພູຊາ.

ທ່ານ Ian Baird ເວົ້າຕື່ມອີກວ່າ ມັນມີຄວາມ ເປັນໄປໄດ້ ທີ່ ຄວາມຂັດແຍ່ງຢູ່ ເຂດໃດ ເຂດນຶ່ງນັ້ນ ຈະບານປາຍ, ແຕ່ການ ຕໍ່ສູ້ກັນ ໃດໆນັ້ນ ຈະບໍ່ນໍາໄປສູ່ ການປະທະກັນ ທາງທະຫານ ໃນຂນະທີ່ ບັນດາ ນັກການເມືອງ ຣະດັບສູງ ຂອງ ສອງປະເທສ ຍັງມີການ ພົວພັນ ກັນດີ.

ເວົ້າເຖິງຊາຍແດນ, ເສັ້ນຊາຍແດນ, ການປັກຫລັກໝາຍ ຊາຍແດນ ແລະ ການຂັດແຍ່ງ ທາງດ້ານຊາຍແດນ ຣະຫວ່າງ ສອງປະເທສ ລາວ ແລະ ກໍາພູຊາ, ວິທຍຸ ເອເຊັຽເສຣີ ໄດ້ຖາມໄປຍັງ ຫ້ອງການ ຊາຍແດນ ແຫ່ງຊາດ, ກົມກົງສຸນ, ກົມຊາຍແດນ, ກົມສົນທິສັນຍາ ແລະ ກົດຫມາຍ ແລະ ກົມການຂ່າວ ກະຊວງການ ຕ່າງປະເທສ ສປປລາວ; ມີແຕ່ຫ້ອງການ ຊາຍແດນ ແຫ່ງຊາດ ບອກວ່າ ບໍ່ສາມາດ ເວົ້າໄດ້.

ແຕ່ເຖິງຢ່າງໃດກໍຕາມ ການໄປຢ້ຽມຢາມ ກໍາພູຊາ ຂອງ ທ່ານ ບຸນຍັງ ວໍຣະຈິດ ປະທານ ປະເທສ ສປປລາວ ຄັ້ງນີ້ ກໍຖືກຕ້ອນຮັບ ຈາກ ສົມເດັດ ໂນໂລດົມ ສີຫາໂມນີ ເປັນຢ່າງດີ. ທັງສອງຝ່າຍ ໄດ້ພົບພໍ້ກັນ ທີ່ ພຣະຣາຊວັງ ແລະ ໄດ້ແຈ້ງໃຫ້ກັນ ຊາບ ກ່ຽວກັບ ສະພາບການຕ່າງໆ ຂອງແຕ່ລະ ປະເທດ, ໄດ້ແລກປ່ຽນ ຄຳຄິດຄຳເຫັນ ນຳກັນ ເພື່ອເສີມຂະຫຍາຍ ສາຍພົວພັນ ມິດຕະພາບ ແລະ ການຮ່ວມມື ຣະຫວ່າງ ສອງປະເທສ ແລະ ທັງໄດ້ແລກປ່ຽນ ທັສນະ ໃນບາງບັນຫາ ພາກພື້ນ ແລະ ສາກົນ ທີ່ທັງສອງຝ່າຍ ມີຄວາມສົນໃຈ.

ກ່ຽວກັບການຮ່ວມມືສອງຝ່າຍ ທ່ານ ອຽງ ໂສພານເລດ ຜູ້ຊ່ວຍ ນາຍົກ ຣັຖມົນຕຣີ ກໍາພູຊາ ເວົ້າວ່າ ສປປລາວ ກຳປູເຈັຽ ຈະສືບຕໍ່ ແລກປ່ຽນ ການຢ້ຽມຢາມ ກັນ ຣະຫວ່າງ ຜູ້ນຳຂັ້ນສູງ ກໍຄື ຄນະຜູ້ແທນ ຂັ້ນຕ່າງໆ ຂອງສອງປະເທດ ຢ່າງເປັນ ປົກກະຕິ ແລະ ປະຕິບັດ ຂໍ້ຕົກລົງຕ່າງໆ ທີ່ທັງສອງຝ່າຍ ມີນໍາກັນ ໃຫ້ປະກົດຜົນ ເປັນຈິງ ເທື່ອລະກ້າວ.

ທັງສອງຝ່າຍ ໃຫ້ຄໍາໝັ້ນ ນໍາກັນວ່າ ຈະສົ່ງເສີມ ການພົວພັນ ການຄ້າ, ການລົງທຶນ, ການກະສິກັມ ແລະ ການທ່ອງທ່ຽວ ຣະຫວ່າງ 2 ປະເທສ ແລະ ຈະຮ່ວມມືກັນ ຕໍ່ໄປ ໃນການປ້ອງກັນ ຄວາມສງົບ, ປ້ອງກັນ ການຄ້າໄມ້ ເຖື່ອນ ແລະ ຢາເສບຕິດ ໃນ ເຂດຊາຍແດນ ນໍາດ້ວຍ.

ທ່ານ ອຽງ ໂສພານເລດ ເວົ້າວ່າ ຄໍາໝັ້ນສັນຍານັ້ນ ໄດ້ມີຂຶ້ນ ໃນເວລາ ພົບພໍ້ກັນ ຣະຫວ່າງ ນາຍົກຣັຖມົນຕຣີ ຮຸນ ເຊນ ແລະ ທ່ານ ບຸນຍັງ ວໍຣະຈິດ ທີ່ເດີນທາງ ໄປຢ້ຽມຢາມ ກໍາພູຊາ ຊຶ່ງທັງສອງຝ່າຍ ເຫັນພ້ອມ ນໍາກັນ ທີ່ຈະຊຸກຍູ້ ການພັທນາ ໂຄງຮ່າງ ພື້ນຖານ ເຊື່ອມໂຍງກັນ ທັງທາງບົກ ແລະທາງນໍ້າ ແລະ ພລັງງານໄຟຟ້າ.

ເມື່ອປີ 2015 ການຄ້າສອງຝ່າຍ ມີມູນຄ່າ 24 ລ້ານ 5 ແສນ ໂດລາ ສະຫະຣັຖ ຂນະທີ່ ການລົງທຶນ ຣະຫວ່າງ ສອງປະເທສນີ້ ມີມູນຄ່າ ຂ້ອນຂ້າງໜ້ອຍ. ທາງດ້ານ ການທ່ອງທ່ຽວ ປະຊາຊົນລາວ ໄປທ່ຽວ ກໍາພູຊາ ບໍ່ເຖິງ 370 ພັນຄົນ ເມື່ອປີກາຍ ຂນະທີ່ ແຕ່ເດືອນ ມົກກະຣາ ຫາ ເດືອນກັນຍາ ປີດຽວກັນນັ້ນ ມີຊາວ ກໍາພູຊາ ມາທ່ຽວ ລາວ ພຽງປະມານ 12 ພັນຄົນ. ຕາມຂໍ້ມູນ ຂອງກົມ ພັທນາ ການທ່ອງທ່ຽວ ກໍາພູຊາ.

ຄໍາເຫັນ (2)
  • ພິມ
  • ໃຊ້ຮ່ວມກັນ
  • ອີແມວລ໌

lao army

ຈາກ Nong bouathong

Cambodian and Lao, the friendship is not for lastlong, because the communist and the freedom of King. We looked the eyes of two countries Cambodian and Laos is much different. The umbrella which the Cambodian make to welcome the King and the Lao President Bunya volachit the Lao seems not comfortable. Lao has killed his own King took to the re-educational camp in Vienxai for torture .


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 21, 2017 09:47 PM

ຄ.ນະຄຳມວ່ນ

ຈາກ ທ່າແຂກ

ລະຫວ່າງລາວກັບກຳພູຊານັ້ນ ສ້າງຄວາມສາມັກຄີຮັກແພງກັນ ນັ້ນລະດີກວ່າຊັງກັນ, ໂຮມກັນແມ່ນເຮົາຢູ່ແຕກຫມູ່ເຮົາຕາຍ ຈິບຫາຍວາຍວອດຫມົດທຸກຢ່າງ, ປັຈຈຸບັນນີ້ສະພາບການທົ່ວໄປຂອງໂລກມັນບໍ່ແນ່ນອນດອກນ້າ, ສະຫາຍພັກ-ຣັຖ ເອີຍ, ຂໍໃຫ້ສັ່ງຊາຕີລາຄາໃຫ້ແນ່ນອນລອບຄອບ ມັນຈຶ່ງຊອບໃນບັ້ນປາຍ ແທ້ໆໄດ.!!!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 19, 2017 02:23 PM

ເຕັມຫນ້າ