ລາວ-ຈີນ ຜູກມັດຍຸທສາດ ຮອບດ້ານ

ຈໍາປາທອງ
2017-11-14
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ທ່ານ Xi Jinping ເລຂາທິການໃຫຍ່ ຄະນະບໍຣິຫານງານ ສູນກາງພັກ ຄອມມິວນິສຈີນ ປະທານປະເທສ ມາຢ້ຽມຢາມລາວ ໃນມື້ວັນທີ 13 ແລະ 14 ພຶສຈິກາ 2017
ທ່ານ Xi Jinping ເລຂາທິການໃຫຍ່ ຄະນະບໍຣິຫານງານ ສູນກາງພັກ ຄອມມິວນິສຈີນ ປະທານປະເທສ ມາຢ້ຽມຢາມລາວ ໃນມື້ວັນທີ 13 ແລະ 14 ພຶສຈິກາ 2017
Screen captured CCTV video

ທ່ານ Xi Jinping ເລຂາທິການໃຫຍ່ ຄະນະບໍຣິຫານງານ ສູນກາງພັກ ຄອມມິວນິສຈີນ, ປະທານປະເທສ ມາຢ້ຽມຢາມລາວ ໃນມື້ວັນທີ 13 ແລະ 14 ພຶສຈິກາ 2017 ພາຍຫລັງ ເຂົ້າຮ່ວມກອງປະຊຸມ ເສຖກິດ ເອເຊັຍ-ປາຊີຟິກ ຫລື APE ແລະຢ້ຽມຢາມ ວຽດນາມ ມາແລ້ວ.

ທ່ານສີ ຈິ້ນຜິງ ໄດ້ພົບພໍ້ກັບ ທ່ານບຸນຍັງ ວໍລະຈິດ ເລຂາທິການໃຫຍ່ ຄະນະບໍຣິຫານງານ ສູນກາງພັກປະຊາຊົນ ປະຕິວັດລາວ ປະທານ ປະເທສ ແລະມີງານລ້ຽງ ອາຫານຄ່ຳ ໃນມື້ວັນທີ 13 ພຶສຈິກາ. ໃນຣະຫວ່າງ ການພົບພໍ້ກັນ ທັງສອງຝ່າຍ ໄດ້ຕົກ ລົງທີ່ຈະເຮັດວຽກ ຮ່ວມກັນ ເພື່ອການຮ່ວມມື ທາງດ້ານຍຸທສາດ ຣະຫວ່າງ ສອງປະເທສ ສປປລາວ ແລະຈີນ ໃຫ້ຂຶ້ນສູ່ຣະດັບໃໝ່ ຊຶ່ງໄດ້ມີການລົງນາມ ໃນຂໍ້ຕົກລົງຮ່ວມມື ນຳກັນ 17 ສະບັບ ທີ່ຈະເຮັດໃຫ້ການຮ່ວມມື ຣະຫວ່າງ ສອງປະເທສນີ້ ເລິກເຊິ່ງ ແລະຂຍາຍຕົວ ກວ້າງອອກ ຊຶ່ງຮວມທັງ ບັນທຶກ ຄວາມເຂົ້າໃຈກັນ ກ່ຽວກັບ ການສ້າງແລວທາງ ເສຖກິດ ຂອງ ສອງປະເທສ, ຂໍ້ຕົກລົງທາງດ້ານ ວິທຍາສາດ ແລະ ເທັກໂນໂລຈີ, ການຮ່ວມມື ໃນການພັທນາ ຊັພຍາກອນມະນຸດ ແລະການຮ່ວມມື ທາງການເງິນ ເພື່ອສົ່ງເສີມ ວິສາຫະກິດ ຂນາດກາງ ແລະຂນາດນ້ອຍ ຢູ່ ສປປລາວ.

ພ້ອມກັນນັ້ນ ຍັງໄດ້ລົງນາມ ໃນສັນຍາວ່າດ້ວຍການລົງທຶນ ຮ່ວມກັນສ້າງທາງດ່ວນ ນະຄອນຫລວງວຽງຈັນ-ວັງວຽງ ຊຶ່ງເປັນພາກສ່ວນນຶ່ງ ຂອງໂຄງການທາງດ່ວນ ນະຄອນຫລວງ ວຽງຈັນ-ບໍ່ເຕັນ ທີ່ໄດ້ວາງແຜນໄວ້ ແລະທັງສັນຍາ ກູ້ຢືມເງິນຈີນ ສຳລັບໂຄງການ ສາຍສົ່ງໄຟຟ້າ ແລະບັນທຶກ ຄວາມເຂົ້າໃຈກັນ ກ່ຽວກັບ ການຊ່ວຍເຫລືອ ໃນລະຍະ 3 ປີຂ້າງໜ້າ. ຝ່າຍຈີນປະກາດໃຫ້ການຊ່ວຍເຫລືອ ທາງການເງິນແກ່ ສປປລາວ ຈຳນວນ 4 ຕື້ຢວນ ຫລື 5,000 ຕື້ 11 ລ້ານກີບ ໃນລະຍະ 3 ປີຂ້າງໜ້າ.

ທັງສອງຝ່າຍສະແດງຄວາມຍິນດີ ເປັນຢ່າງຍິ່ງ ຕໍ່ການພົວພັນສອງຝ່າຍ ແລະການຮ່ວມມື ໃນທຸກດ້ານຣະຫວ່າງ ສອງປະເທສ ສປປລາວ ແລະຈີນ ໃນຫລາຍປີທີ່ຜ່ານມາ ຊຶ່ງໄດ້ມີການຂຍາຍຕົວ ແລະເລິກເຊິ່ງຂຶ້ນ ແລະເປັນເພື່ອນມິດ ທີ່ສນິດສນົມ ແລະ ເປັນຄູ່ພາຄີທີ່ດີ. ແລະ ຖືວ່າ ສປປລາວ ແລະຈີນ ຍຶດໝັ້ນຢູ່ໃນ ການເປັນພາຄີ ຍຸທສາດ ແບບຄົບວົງຈອນ.

ທັງສອງຝ່າຍ ພະຍາຍາມປະຕິບັດ ແຜນການຮ່ວມມືກັນ ໃນພາກຕົວຈິງແຕ່ປີ 2016 ເຖິງປີ 2020, ໃນການຝຶກອົບຮົມ ບຸຄລາກອນ ຣະດັບບໍຣິຫານ ພັກແລະຣັຖ ຂອງລາວ ຢູ່ປະເທສຈີນ ແລະເພີ່ມທະວີ ການຮ່ວມມືກັນ ເຮັດໃຫ້ລາວ ປ່ຽນອອກຈາກ ປະເທສ ທີ່ບໍ່ມີ ທາງອອກ ສູ່ທະເລ ເປັນປະເທສ ທີ່ເຊື່ອມໂຍງທາງບົກ ຊຶ່ງສອດຄ່ອງກັບຂໍ້ລິເລີ່ມ ”ນຶ່ງວົງແຫວນ-ນຶ່ງເສັ້ນທາງ” ຂອງທ່ານ ສີ ຈິ້ນຜິງ.

ເວົ້າເຖິງການຢ້ຽມຢາມລາວ ຂອງທ່ານ ສີ ຈິ້ນຜິງ ທ່ານ ວັນລັງ ຄໍາສຸກ ຮອງປະທານ ພັນທະມິດ ເພື່ອ ປະຊາທິປະຕັຍ ໃນລາວ ແລະ ທັງເປັນ ປະທານ ພັນທະມິດ ທີ່ສະຫະຣັຖ ອະເມຣິກາ ເວົ້າວ່າ:

ການຢ້ຽມຢາມທີ່ວ່ານີ້ ເປັນຄັ້ງທຳອິດ ຂອງຜູ້ນໍາສູງສຸດ ພັກ-ຣັຖຈີນ ນັບຕັ້ງແຕ່ ຜູ້ນຳ ສປປລາວ ເວົ້າເຖິງການພົວພັນ ແລະການຮ່ວມມື ກັບຈີນວ່າ ຈະເສີມຂຍາຍ ສາຍພົວພັນ ທີ່ເປັນມູນເຊື້ອ ກັບຈີນ ບົນຈິດໃຈ ຄູ່ຮ່ວມມືຍຸທສາດ ຮອບດ້ານ, ໝັ້ນຄົງ, ຍາວນານ ດັ່ງຈະຮູ້ໄດ້ ຈາກມະຕິ 10 ຂອງພັກ ປະຊາຊົນ ປະຕິວັດລາວ.

ແລະໃນມະຕິ 9 ກໍເວົ້າວ່າ ໄດ້ຕັ້ງໜ້າເພີ້ມທະວີ ມິດຕະພາບ, ຄວາມສາມັກຄີ ອັນເປັນມູນເຊື້ອ ຣະຫວ່າງ ປະຊາຊົນ ສອງຊາດ ລາວ-ຈີນ, ໄດ້ຊຸກຍູ້ສົ່ງເສີມ ການຮ່ວມມື ຮອບດ້ານ ຣະຫວ່າງ ສອງປະເທສ ໃຫ້ຂຍາຍຕົວຢ່າງ ແຂງແຮງ ບົນພື້ນຖານ ການພົວພັນ ແບບຄູ່ຮ່ວມມື ຍຸທສາດຮອບດ້ານ ທີ່ໝັ້ນຄົງ ຍາວນານ.

ແຕ່ຕາມນະໂຍບາຍ ຂອງຈີນ ທີ່ມີຕໍ່ ສປປລາວ ພາຍຫລັງທີ່ ຜູ້ນໍາພັກ ປະຊາຊົນ ປະຕິວັດລາວ ເລີກລົ້ມການເປັນ ປໍລະປັກ ກັບຈີນ ຈຶ່ງໄດ້ມີມາ ແຕ່ປີ 1977 ຊຶ່ງເປັນປີ ທີ່ວຽດນາມ ແລະ ສປລາວ ມີສົນທີສັນຍາ ມິດຕະພາບ ແລະການຮ່ວມມື ນໍາກັນຈົນ ເຖິງປີ 1986 ນັ້ນແມ່ນຕັ້ງ ຢູ່ໃນຫລັກການ ທີ່ວ່າ ການຮ່ວມມືກັນ ຕ່າງຝ່າຍຕ້ອງມີ ຜົລປໂຍດ ບໍ່ແມ່ນເຮັດ ຄືເມື່ອກ່ອນ ທີ່ມີແຕ່ ສປປລາວ ເອື່ອຍອີງ ໃສ່ແຕ່ ການຊ່ວຍເຫລືອລ້າ ຂອງຈີນ.

ສິ່ງດັ່ງກ່າວສະແດງອອກໃຫ້ຮູ້ ຢູ່ໃນຄໍາປາສັຍ ຂອງ ທ່ານ ອຸນຈາປາວ ຫົວໜ້າພັກ ຄອມມິວນິສ ຈີນ ທີ່ບອກໃຫ້ຜູ້ນຳ ສປປລາວ ຮູ້ຢູ່ ໃນກອງປະຊຸມ ໃຫຍ່ຄັ້ງທີ 6 ຂອງພັກ ປະຊາຊົນ ປະຕິວັດລາວ ເມື່ອ 21 ປີທີ່ຜ່ານມາວ່າ ການພົວພັນ ຣະຫວ່າງຈີນ ແລະ ສປປລາວ ແມ່ນຢູ່ບົນພື້ນຖານ 4 ຫລັກການຄື: ເຄົາຣົບຄວາມເປັນ ເອກກະຣາດ ເປັນເຈົ້າຕົນເອງ ສເມີພາບ ເຄົາຣົບຊຶ່ງກັນແລະກັນ ບໍ່ແຊກແຊງ ວຽກງານ ພາຍໃນຂອງກັນ.

ແລະອັນສໍາຄັນແມ່ນ ການຮ່ວມມືທາງດ້ານເສຖກິດ, ການຄ້າ, ວິທຍາສາດ-ເຕັກນິກ ແລະວັທນະທັມ ຣະຫວ່າງ ສອງປະເທສ ຈີນ ແລະ ສປປລາວ ຕ້ອງຕັ້ງຢູ່ ບົນພື້ນຖານ ຄວາມສເມີພາບ, ຕ່າງຝ່າຍຕ່າງ ມີຜົລປໂຍດ ຊຶ່ງທ່ານ ຂິນຖາວອນ ບຸນຜາຄົມ ນັກວິຊາການ ດ້ານ ເສຖກິດລາວ ທີ່ຣັຖ Florida ສະຫະຣັຖ ອາເມຣິກາ ເວົ້າວ່າ ຫລັກການຕ່າງຝ່າຍ ຕ່າງມີຜົລປໂຍດ ຂອງຈີນ ທີ່ວ່ານັ້ນ ໃນຄວາມເປັນຈິງ ລ້ວນແລ້ວແມ່ນ ແຕ່ຝ່າຍຈີນ ໄດ້ຮັບ:

ປັດຈຸບັນ ຈີນລົງທຶນຢູ່ລາວ 766 ໂຄງການ, ດ້ວຍມູນຄ່າ ການລົງທຶນ 7 ຕື້ປາຍໂດລາ ສະຫະຣັຖ, ຈັດຢູ່ໃນອັນດັບ ທີ 1 ຂອງຕ່າງ ປະເທດ ທີ່ມາລົງທຶນ ຢູ່ລາວ ແລະການຊ່ວຍເຫຼືອ ຂອງຈີນ ໃຫ້ແກ່ ສປປລາວ ກໍເພີ່ມຂຶ້ນ ໃນແຕ່ລະປີ ຮວມທັງວຽກງານ ການປ້ອງກັນ ປະເທສ ນໍາດ້ວຍ.

ໃນຣະຫວ່າງມາຢ້ຽມຢາມລາວ ຄັ້ງນີ້ ທ່ານ ສີ ຈິ້ນຜິງ ຢືນຢັນວ່າ ຈີນຈະເຮັດວຽກ ຮ່ວມກັບ ສປປລາວ ໃນການສ້າງ ການພົວພັນ ແລະ ຮ່ວມມື ສອງຝ່າຍໃຫ້ໄດ້ ຮັບຜົລສຳເຣັດ ຍິ່ງໆຂຶ້ນ. ພ້ອມດຽວກັນນັ້ນ ທ່ານກໍໄດ້ ເຊື້ອເຊີນ ທ່ານ ບຸນຍັງ ວໍລະຈິດ ໄປຢ້ຽມຢາມຈີນ ໃນໂອກາດ ທີ່ເໝາະສົມ ນໍາດ້ວຍ.

ຄໍາເຫັນ (1)
  • ພິມ
  • ໃຊ້ຮ່ວມກັນ
  • ອີແມວລ໌

ຄ.ນະຄຳມ່ວນ

ຈາກ ທ່າແຂກ

ຜູກເຂົ້າຕື່ມ, ມັດເຂົ້າຕື່ມ ເຣື່ອງຄວາມຈະເລີນຮຸ່ງເຮືອງຂອງລາວ ເພື່ອເຮັດໃຫ້ລາວລຸດພົ້ນ ຈາກຄວາມທຸກຍາກໃນ ປີ ສອງພັນຊາວ, ຈີນໃຫ້ເງິນກູ້ ເພື່ອບັນເທົາຄວາມກະຫາຍ ຂອງພວກພັກ-ຣັຖ ສປປລາວແດງ, ແຕ່ປະຊາຊົນລາວ ແທ້ໆນີ້ຕີ້ ຈະທຸກຂ໌ພ້ອມດ້ວຽຍາກລຳບາກລົງກ່ວາທີ່ຜ່ານມາ ເປັນຫລາຽລ້ານເທົ້າ,ເວົ້າໄດ້,ແຕ່ຈະຫ້າມພວກ ພັກ-ຣັຖ ສປປລາວແມ່ນ ປານວ່າເອົາຄ້ອນຟາດຫົວພວກເພິ່ນພູ້ນຕີ້,ເທົ່ານີ້ແລ້ວ,ຂໍປະກອບຄຳເຫັນນຳ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 16, 2017 04:21 AM

ເຕັມຫນ້າ