ສັນຍາມິຕພາບ ລາວ-ວຽດນາມ

ຈໍາປາທອງ
2017-07-16
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ປະທານອົງການ ສາມະຄີ ນັກລົບເກົ່າ ອະດີດ ນາຍທະຫານ ແຫ່ງ ພຣະຣາຊອານາຈັກລາວ ທ່ານ ພັນເອກ ຂາວ ອິນສີຊຽງໃໝ່
ປະທານອົງການ ສາມະຄີ ນັກລົບເກົ່າ ອະດີດ ນາຍທະຫານ ແຫ່ງ ພຣະຣາຊອານາຈັກລາວ ທ່ານ ພັນເອກ ຂາວ ອິນສີຊຽງໃໝ່
RFA

ໃນຂະນະທີ່ຢູ່ ສປປລາວ ແລະວຽດນາມ ກໍາລັງສລອງສອງວັນ ຄືວັນສ້າງຕັ້ງສາຍພົວພັນ ທາງການທູດ ຄົບຮອບ 55 ປີ ແລະ ວັນເຊັນ ສົນທິສັນຍາ ມິຕພາບ ການຮ່ວມມື ຄົບຮອບ 40 ປີ ຊຶ່ງຫລາຍ ຄົນເວົ້າວ່າ ໃນການພົວພັນ ຮ່ວມມື ຣະຫວ່າງ ສອງ ປະເທດນັ້ນ ເກືອບ ວ່າທັງໝົດ ອໍານວຍ ຜົລປໂຍດ ໃຫ້ວຽດນາມ ຝ່າຍດຽວ ຍ້ອນວຽດນາມ ຄຸມຜູ້ນຳ ພັກ-ຣັຖ ສປປລາວ ທຸກດ້ານ ເປັນຕົ້ນແນວທາງ, ແຜນນະໂຍບາຍ, ກໍາລັງ ປະກອບອາວຸດ ແລະ ແຜນພັທນາ ເສຖກິດ-ສັງຄົມ ຂອງລາວ, ເຖິງແມ່ນ ໃນເອກກະສານ ທາງການຕ່າງໆ ລະບຸໄວ້ເຖິງ ຄວາມສເມີພາບ ແລະ ຕ່າງຝ່າຍຕ່າງໄດ້ ຮັບຜົລປໂຍດ.

ມື້ນີ້ ຂ້າພະເຈົ້າ ຈໍາປາທອງ ຈະເວົ້າເຖິງການ ເຂົ້າມາຮ່ວມຣົບ ຢູ່ປະເທສລາວ ໃນສມັຍສົງຄາມ ແລະ ການພົວພັນ ຮ່ວມມື ທາງດ້ານ ການທະຫານ ຣະຫວ່າງ ສປປລາວ ແລະ ສ.ສ.ວຽດນາມ ຫລັງສົງຄາມ ຊຶ່ງຜູ້ນໍາ ສອງປະເທສນີ້ ກໍານົດໄວ້ ຢູ່ໃນ ອະລໍາພະບົດ ແລະ ໃນມາດຕຣາ 2 ຂອງສົນທິສັນຍາ ດັ່ງກ່າວ, ເຖິງການ ປົກປັກຮັກສາ ປະເທສ ແລະ ຄວາມສງົບ ຂອງຊາດ ຕ້ານກໍາລັງ ພາຍນອກ.

ໃນສມັຍສົງຄາມ ຫຼາຍຄົນເວົ້າວ່າ ຜູ້ນໍາພັກ ຄອມມິວນິສ ວຽດນາມເໜືອ ໄດ້ສົ່ງ ກອງທະຫານ ຂອງຕົນ ເຂົ້າມາສູ້ຮົບ ຢູ່ລາວ ເປັນຈໍານວນ ຫຼວງຫຼາຍ ແລະ ໃນປັດຈຸບັນ ກໍຍັງປະຈໍາ ຢູ່ ສປປລາວ ໂດຍຖືເອົາ ສົນທິສັນຍາ ມິຕພາບ ແລະ ການຮ່ວມມື ປີ 1977 ເປັນຂໍ້ອ້າງ.

ເວົ້າເຖິງທະຫານວຽດນາມເໜືອ ເຂົ້າມາສູ້ຣົບ ໃນສມັຍສົງຄາມ ຢູ່ລາວ ນາຍທະຫານ ກອງທັບ ແຫ່ງ ພຣະຣາຊອານາຈັກ ລາວ ແລະ ໜ່ວຍຣົບພິເສດ ແອັສຊີຢູ ເວົ້າວ່າມີແທ້. ດັ່ງ ພັນເອກ ຂາວ ອິນສີຊຽງໃໝ່ ອາດີດນາຍທະຫານ ຊັ້ນພັນໂທ ກອງທັບ ແຫ່ງ ພຣະຣາຊອານາຈັກ ລາວ ແລະ ພັນເອກໜ່ວຍຣົບ ພິເສດ ແອັສຊີຢູ ເວົ້າຕໍ່ ວິທຍຸ ເອເຊັຍເສຣີ ເມື່ອບໍ່ດົນ ມານີ້ວ່າ ການສູ້ຣົບ ໃນບັ້ນຣົບຕ່າງໆ ທົ່ວປະເທສ ຕັ້ງແຕ່ເໜືອ ຕລອດໃຕ້ ທີ່ທ່ານໄດ້ ເຂົ້າຮ່ວມນັ້ນ ລ້ວນແລ້ວ ແຕ່ໄດ້ສູ້ຣົບ ກັບ ກອງທະຫານ ວຽດນາມເໜືອ: ສຽງ

ສະເພາະຢູ່ເຂດທົ່ງໄຫຫີນ ແຂວງຊຽງຂວາງ ທີ່ໄດ້ມີບັ້ນຣົບໃຫຍ່ ແລະສູ້ກັນ ຢ່າງດຸເດືອດ ໃນທ້າຍຊຸມປີ 1960 ນັ້ນ ດຣ.ບຸນທອນ ຈັນທະລາວົງ ວີເຊີ ປະທານ ພັນທະມິດ ເພື່ອ ປະຊາທິປະໄຕ ໃນລາວ ທີ່ມີສູນກາງ ຢູ່ ປະເທສ ເຢັຍຣະມັນ ຜູ້ເປັນຄົນ ຊຽງຂວາງ ຊຶ່ງຣະຍະນັ້ນ ຍັງເປັນນັກຮຽນ ຍານາງ ໄດ້ ຜະເຊີນ ກັບພັຍສົງຄາມ, ເຫັນດ້ວຍຕາ ຂອງຕົນເອງ ຢືນຢັນຕໍ່ ວິທຍຸ ເອເຊັຍເສຣີ ໃນວັນທີ 12 ກໍຣະກະດາ 2017 ນີ້ວ່າ ເຫັນທະຫານ ວຽດນາມ ເຂົ້າມາສູ້ຣົບ ເປັນ ຈໍານວນ ຫລວງຫລາຍ: ສຽງ

ເພື່ອໃຫ້ແນ່ໃຈວ່າ ມີທະຫານວຽດນາມເໜືອ ເຂົ້າມາສູ້ຣົບ ຢູ່ລາວ ໃນສມັຍສົງຄາມນັ້ນ ແທ້ຫລືບໍ່ ແລະການ ປະຕິເສດ ຂອງຜູ້ນໍາ ພັກ ປະຊາຊົນ ປະຕິວັດລາວ ທີ່ວ່າບໍ່ມີ ທະຫານ ວຽດນາມເໜືອ ຈັກຄົນ ເຂົ້າມາຮ່ວມຣົບ ນັ້ນມີຄວາມຈິງ ຫລືບໍ່ນັ້ນ ຫຼາຍໆຄົນ ຮວມທັງພັນເອກ ຂາວ ແລະ ດຣ. ບຸນທອນ ເວົ້າວ່າ ມີທະຫານ ວຽດນາມເໜືອ ເຂົ້າມາສູ້ຣົບ ຢູ່ລາວແທ້ ແລະ ການປະຕິເສດ ຂອງຜູ້ນໍາ ສປປລາວ ທີ່ວ່ານັ້ນ ບໍ່ມີມູນ ຄວາມຈິງ ແຕ່ຢ່າງໃດ.

ເວົ້າສະເພາະໃນບັ້ນຣົບ ທົ່ງໄຫຫີນ ຊຽງຂວາງ ທີ່ຫລາຍຄົນເວົ້າວ່າ ຄືກັນກັບ ບັ້ນຣົບໃຫຍ່ ຕ່າງໆຢູ່ລາວ ເກືອບວ່າ ທັງໝົດແມ່ນ ກອງທະຫານ ຄອມມິວນິສ ວຽດນາມ ຈຳນວນ ຫລວງຫລາຍ ເປັນກຳລັງ ສູ້ຣົບຕົ້ນຕໍ ຊຶ່ງ ດຣ.ບຸນທອນ ເວົ້າວ່າ: ສຽງ

ແລະ ພັນເອກ ຂາວ ກໍເວົ້າວ່າ: ສຽງ

ບໍ່ພຽງເທົ່ານັ້ນ ແມ່ນແຕ່ໃນຖແລງການຮ່ວມ ລາວ-ວຽດນາມ ກໍເວົ້າເຖິງການ ສືບຕໍ່ ຮ່ວມມືກັນ ຊອກຫາ ກະດູກ ຂອງທະຫານ ແລະ ຊ່ຽວຊານ ວຽດນາມ ທີ່ເສັຍຊີວິດ ໃນປາງສົງຄາມ ຢູ່ລາວ ແລະ ສົ່ງກັບຄືນ ປະເທສ ແລະ ຢູ່ກອງປະຊຸມ ສາມັນ ກໍາລັງ ປ້ອງກັນຊາດ ຄັ້ງທີ 7 ຣະຫວ່າງ ກອງບັນຊາການ ທະຫານ 8 ແຂວງ ພາກເໜືອ ຂອງລາວ ແລະ ກອງບັນຊາການ ທະຫານເຂດ 2 ຂອງກອງທັບ ປະຊາຊົນວຽດນາມ ທີ່ ແຂວງຫວງພະບາງ ໃນມືວັນ ທີ 6 ກໍຣະກະດາ 2017 ນີ້ ກໍຍັງເວົ້າວ່າ ຈະສືບຕໍ່ ສໍາຣວດ ຂຸດຄົ້ນ ກະດູກ ຂອງທະຫານ ແລະ ຊ່ຽວຊານ ວຽດນາມ ທີ່ເສັຍຊີວິດ ໃນປາງສົງຄາມ ຢູ່ບັນດາ ແຂວງພາກເໜືອ ຂອງລາວ ແມ່ນແຕ່ຢູ່ ນະຄອນຫຼວງ ວຽງຈັນ ກໍຍັງມີ ຊຶ່ງມາເຖິງ ປັດຈຸບັນ ຂ່າວວ່າ ໄດ້ມີການຄົ້ນພົບ ແລະ ສົ່ງກະດູກ ກັບໄປ ວຽດນາມ ແລ້ວ 23,000 ປາຍຄົນ.

ແລະເມື່ອວັນທີ 26 ມິຖຸນາ ທີ່ຫາກໍຜ່ານມານີ້ ໃນກອງປະຊຸມ ຄນະປະຕິບັດງານ ພິເສດ ລາວ-ວຽດນາມ ຄັ້ງທີ 22 ທີ່ນະຄອນຫຼວງ ວຽງຈັນ ຊຶ່ງຝ່າຍ ວຽດນາມ ແມ່ນພົນໂທ ເລ ຈຽມ ຮອງຣັຖມົນຕຣີ ກະຊວງ ປ້ອງກັນ ປະເທສວຽດນາມ ຫົວໜ້າຄນະ ຜູ້ແທນວຽດນາມ ເຂົ້າຮ່ວມນັ້ນ ກໍໄດ້ເວົ້າເຖິງ ບັນຫາ ດັ່ງກ່າວ ຂນະທີ່ເວລາ ພົບພໍ້ກັນ ທ່ານ ທອງລຸນ ສີສຸລິດ ນາຍົກຣັຖມົຕຣີ ສປປລາວ ກໍໄດ້ເວົ້າວ່າ ທະຫານ ວຽດນາມ ເສັຍຊີວິດ ແລະ ຫາຍສາບສູນ ຢູ່ໃນປາງສົງຄາມ ຢູ່ລາວ ເປັນຈໍານວນ ຫລາຍພັນ ຄົນ ແລະໃນປີຜ່ານມາ ສາມາດເກັບກູ້ ກະດູກທະຫານ ໄດ້ເຖິງ 270 ຄົນ.

ເວົ້າເຖິງການການພົວພັນ ຮ່ວມມື ທາງດ້ານການທະຫານ ຣະຫວ່າງ ສປປລາວ ແລະວຽດນາມ ບົນພື້ນຖານ ສົນທິ ສັນຍາ ມິຕພາບ ແລະການຮ່ວມມື ປີ 1977, ຕາມຖແລງການຮ່ວມ ລາວ-ວຽດນາມ ທີ່ເວົ້າເຖິງ ທັງການຮ່ວມມື ໃນຂົງເຂດ ປ້ອງກັນຊາດ, ປ້ອງກັນ ຄວາມສງົບ ຢູ່ແຕ່ລະ ປະເທສ ກໍຄືສອງປະເທສ ໃຫ້ໝັ້ນຄົງ ຊຶ່ງລ້າສຸດ ກໍແມ່ນ ກອງປະຊຸມ ສາມັນ ກໍາລັງ ປ້ອງກັນຊາດ ຄັ້ງທີ 7 ຣະຫວ່າງ ກອງບັນຊາການ ທະຫານ 8 ແຂວງພາກເໜືອ ຂອງລາວ ແລະ ກອງບັນຊາການ ທະຫານ ເຂດ 2 ຂອງກອງທັບ ປະຊາຊົນ ວຽດນາມ ທີ່ແຂວງຫວງພະບາງ ໃນວັນທີ 6 ກໍຣະກະດາ 2017 ນີ້ ຊຶ່ງໃນນັ້ນ ຕີຣາຄາ ການປະຕິບັດ ວຽກງານ ການພົວພັນ ຮ່ວມມື ແລະ ການຊ່ວຍເຫລືອ ຊຶ່ງກັນແລະກັນ ທີ່ຜ່ານມາ ແລະວາງທິດທາງ ແຜນການ ພົວພັນ ຮ່ວມມື 6 ເດືອນ ທ້າຍປີ 2017 ແລະປີ 2018 ໂດຍທີ່ຈະ ແລກປ່ຽນ ຄນະຜູ້ແທນ ແລະເຮັດວຽກ ຮ່ວມກັນ ຢ່າງເປັນ ປົກກະຕິ...

ພ້ອມກັນນັ້ນ ໃນການພົບພໍ້ກັນ ຣະຫວ່າງ ພົນຈັດຕະວາ ຜາລົມ ລິນທອງ ຮອງຫົວໜ້າ ກົມໃຫຍ່ ການເມືອງ ກອງທັບ ປະຊາຊົນລາວ ແລະ ພັນເອກ ພິເສດ ເຢືອງ ດຶກທ້ຽນ ຫົວໜ້າ ກົມປ້ອງກັນ ຄວາມສງົບ ກົມໃຫຍ່ ການເມືອງ ກອງທັບ ປະຊາຊົນ ວຽດນາມ ທີ່ນະຄອນຫລວງ ວຽງຈັນ ໃນວັນທີ 27 ມິຖຸນາ ນັ້ນວ່າ ຈະສືບຕໍ່ ເສີມຂຍາຍ ການພົວພັນ ຮ່ວມມື ໃນຂົງເຂດ ວິຊາສະເພາະ ເປັນຕົ້ນແມ່ນ ວຽກງານ ການສືບສວນ ສອບສວນ, ການປ້ອງກັນ ແລະ ແກ້ໄຂຄະດີ ຕ່າງໆ ໃນກອງທັບ ນໍາດ້ວຍ.

ເບິ່ງລວມແລ້ວ ຫລາຍຄົນເວົ້າວ່າ ການພົວພັນຮ່ວມມື ທາງດ້ານ ການທະຫານ ຣະຫວ່າງ ສປປລາວ ແລະວຽດນາມ ແມ່ນໄດ້ ດໍາເນີນໄປຢ່າງ ສນິດແໜ້ນ ທັງໃນປາງສົງຄາມ ແລະ ໃນຣະຍະ 42 ປີ ຜ່ານມາ ຊຶ່ງໃນປີ 2017 ນີ້ ກໍໄດ້ມີການ ສລອງ ສອງວັນ ຄື: ວັນເຊັນ ສົນທິສັນຍາ ມິຕພາບ ແລະ ການຮ່ວມມື ຣະຫວ່າງ ສອງ ປະເທສ ຄົບຮອບ 40 ປີ ແລະ ວັນສ້າງຕັ້ງ ສາຍພົວພັນ ທາງການທູດ ຄົບຮອບ 55 ປີ ທີ່ກໍາລັງ ດໍາເນີນໄປ ຢູ່ໃນຂນະນີ້.

ເຕັມຫນ້າ