ຈີນ ໃຊ້ກອງປະຊຸມ ແມ່ນ້ຳຂອງ ແມ່ນໍ້າ ລ້ານຊ້າງ ອອກໜ້າ

ອຸ່ນແກ້ວ ສຸກສະຫວັນ
2018-01-12
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ນາຍົກຣັຖມົນຕຣີ ສປຈີນ ທ່ານ ຫລີ ເຄິຈຽງ ໃນກອງປະຊຸມ ຣັຖມົນຕຣີ ທີ່ ກຸງພະນົມເປັນ ປະເທດ ກັມພູຊາ ເມື່ອວັນທີ 10 ມົກກະຣາ 2018
ນາຍົກຣັຖມົນຕຣີ ສປຈີນ ທ່ານ ຫລີ ເຄິຈຽງ ໃນກອງປະຊຸມ ຣັຖມົນຕຣີ ທີ່ ກຸງພະນົມເປັນ ປະເທດ ກັມພູຊາ ເມື່ອວັນທີ 10 ມົກກະຣາ 2018
Screen captured:Pathedlao FB

ກອງປະຊຸມຜູ້ນຳປະເທດ ແມ່ນ້ຳຂອງ-ແມ່ນ້ຳລ້ານຊ້າງ ທີ່ຈັດຂຶ້ນ ຢູ່ພະນົມເປັນ ປະເທດກຳພູຊາ ແຕ່ວັນທີ 10-11 ມົກກະຣາ ໂດຍມີ ຜູ້ເຂົ້າຮ່ວມ ຈາກປະເທດລາວ, ຈີນ, ໄທ, ພະມ້າ, ວຽດນາມແລະກຳພູຊາ ໄດ້ມີການຣາຍງານຜົນ ຂອງການຈັດຕັ້ງ ປະຕິບັດໂຄງການ ຮ່ວມມືຕ່າງໆ ລະຫວ່າງ ຈີນ ກັບບັນດາປະເທດຂົງເຂດ ແມ່ນ້ຳຂອງ.

ແຕ່ ນັກວິຊາການເຫັນວ່າ ກອງປະຊຸມດັ່ງກ່າວ ແມ່ນການຂຍາຍບົດບາດຂອງຈີນ ໃນພາກພື້ນແມ່ນ້ຳຂອງ, ທ່ານ ອຽນແບຣ໌ ຜູ້ຊ່ວຍ ສາສດາຈານ ຈາກ ມະຫາວິທຍາໄລ ວິສຄອນຊິນ-ເມດິສັນ, ຣັຖ ວິສຄອນຊິນ ສະຫະຣັຖ ອະເມຣິກາ ຜູ້ທີ່ມີປະສົບການ ດ້ານການ ສຶກສາ-ວິຈັຍ ຢູ່ປະເທດແມ່ນ້ຳຂອງ ໄດ້ກ່າວຕໍ່ເອເຊັຍເສຣີ ໃນວັນທີ 11 ມົກກະຣາ ວ່າ:

“ເພິ່ນ [ຈີນ]ຢາກສະແດງບົດບາດຂອງເພິ່ນ ຢູ່ໃນພູມິພາກນີ້ນ່າ ລະກະໃຫ້ມີເກີດອັນໃດ ທີ່ວ່າເພິ່ນເອງເປັນຄົນ ສ້າງຂຶ້ນມານີ້ນ່າ ລະກະ ເລີຍຢາກ ລັກສນະວ່າ ເປັນ ເປັນ ເປັນ ພະເອກໃນໂຕນີ້ນິນ່າ ເນາະ ໃນອົງການແມ່ນ້ຳຂອງ ເພິ່ນບໍ່ໄດ້ເປັນນີ້ນ່າ ແລະເພິ່ນບໍ່ໄດ້ມີ ໂອກາດ ໄດ້ເປັນ ລະກະຫລາຍຄົນກະເລີຍ ເຂົ້າໃນແນວນັ້ນ.”

ອີງຕາມ ທ່ານ ອຽນແບດ, ປະເທດຈີນ ໄດ້ສ້າງຕັ້ງກຸ່ມຮ່ວມກັນ ລະຫວ່າງ ປະເທດແມ່ນ້ຳຂອງ ກັບປະເທດທີ່ຢູ່ ແມ່ນ້ຳລ້ານຊ້າງ ຄື ປະເທດຈີນ ນັ້ນເພື່ອໃຫ້ມີບົດບາດ ໃນການບໍຣິຫານ ຈັດການນ້ຳໃນເຂດ ແມ່ນ້ຳຂອງ ແລະ ເພື່ອໃຫ້ມີບົດບາດ ແຂ່ງຂັນ ກັບອົງການ ແມ່ນ້ຳຂອງ ຍ້ອນວ່າໃນອົງການແມ່ນ້ຳຂອງ ມີປະເທດລາວ, ໄທ, ກໍພູຊາແລະວຽດນາມ ໃນຂະນະທີ່ຈີນ ເປັນພຽງແຕ່ ຜູ້ສັງເກດການ ເທົ່ານັ້ນ.

ນອກຈາກນີ້ ມີການຣາຍງານວ່າ ໂຄງການລົງທຶນຕ່າງໆຂອງຈີນ ບາງໂຄງການກໍ່ສົ່ງຜົນກະທົບ ຕໍ່ປະຊາຊົນ ໂດຍສະເພາະ ການສ້າງ ເຂື່ອນໄຟຟ້າ ຢູ່ຕອນເທິງ ຂອງແມ່ນ້ຳຂອງ ແລະ ໂຄງການປູກກ້ວຍ ແລະ ປູກຢາງພາຣາ ຢູ່ພາກເໜືອຂອງ ປະເທດ ລາວ, ແລະ ອີກຫລາຍປະເທດ ຢູ່ໃນຂົງເຂດ ແມ່ນ້ຳຂອງ.

ສະນັ້ນ ໂຄງການຮ່ວມມືລະຫວ່າງ ປະເທດແມ່ນ້ຳຂອງ-ແມ່ນ້ຳລ້ານຊ້າງ ທີ່ຈີນ ເປັນຜູ້ລິເລີ້ມຂຶ້ນມາ ກໍເພື່ອຢາກສ້າງພາບພົດ ຂອງຕົນ ກ່ຽວກັບການອະນຸຮັກ ສິ່ງແວດລ້ອມ, ດັ່ງ ດຣ ອຽນ ແບຣ໌ ກ່າວຕື່ມອີກວ່າ:

“ເພິ່ນກະສົນໃຈຕໍ່ພາບພົດ ຂອງເພິ່ນຄືກັນເນາະ ເພິ່ນກະບໍ່ຢາກໃຫ້ເຫັນວ່າ ມີແຕ່ [ໂຄງ] ການກໍ່ສ້າງ ພຽງຢ່າງດຽວ ເນາະ ຕ້ອງຄິດວ່າ ມັນເປັນການພັທນາ ຮອບດ້ານ ລວມທັງດ້ານສິ່ງແວດລ້ອມ ເລື້ອງຫຍັງຕ່າງໆນນິນ່າ.”

ນອກຈາກນີ້, ກອງປະຊຸມ ໄດ້ຮັບຮອງເອົາເອກກະສານ 4 ສະບັບ ເພື່ອສົ່ງເສີມ ການຮ່ວມມືກັນ ໃນປີຕໍ່ໄປ ຊຶ່ງລວມມີ ຖະແຫລງການ ພະນົມເປນ ແລະ ແຜນປະຕິບັດງານ 5 ປີ ນັບແຕ່ປີ 2018-2022.

ຄໍາເຫັນ (0)
  • ພິມ
  • ໃຊ້ຮ່ວມກັນ
  • ອີແມວລ໌
ເຕັມຫນ້າ