ໂຄງການພັທນາແມ່ນ້ຳຂອງ ແມ່ນ້ຳລ້ານຊ້າງ

ສິດນີ
2018-01-11
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ໃນວັນທີ 10-11 ມົກກະຣາ 2018, ຈັດຂຶ້ນທີ່ ນະຄອນຫລວງພະນົມເປັນ ຊຶ່ງປະກອບດ້ວຍ ກັມພູຊາ ລາວ ວຽດນາມ ພະມ້າ ໄທ ແລະ ຈີນ
ກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ໃນວັນທີ 10-11 ມົກກະຣາ 2018, ຈັດຂຶ້ນທີ່ ນະຄອນຫລວງພະນົມເປັນ ຊຶ່ງປະກອບດ້ວຍ ກັມພູຊາ ລາວ ວຽດນາມ ພະມ້າ ໄທ ແລະ ຈີນ
Photo credit: Support Prime Minister Thongloun Sisoulith

ບັນດາຜູ້ນຳຈາກ 6 ປະເທດອ່າງແມ່ນ້ຳຂອງອັນໄດ້ແກ່ ລາວ ຈີນ ກຳພູຊາ ພະມ້າ ໄທ ແລະວຽດນາມ ໄດ້ຫາລືກັນ ກ່ຽວກັບການພັທນາ ທີ່ຍືນຍົງ ຕາມລຳແມ່ນ້ຳຂອງ ໃນໂຄງການ ຄວາມຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ທີ່ໄດ້ຈັດຂຶ້ນຢູ່ ກຸງພະນົມເປັນ ປະເທດກຳພູຊາ ໃນມື້ວັນທີ 10-11 ເດືອນມົກຣາ ນີ້ພາຍໃຕຫົວຂໍ້; ແມ່ນ້ຳແຫ່ງສັນຕິພາບ ແລະການພັທນາທີ່ຍືນຍົງ.

ນາຍົກຣັຖມົນຕຣີ ທ່ານ ທອງລຸນ ສີສຸລິດ ໄດ້ນຳພາຄນະຜູ້ແທນລາວ ເຂົ້າຮ່ວມກອງປະຊຸມດັ່ງກ່າວ. ຈຸດປະສົງຂອງກອງປະຊຸມ ເທື່ອນີ້ ຊຶ່ງເປັນເທື່ອທີສອງ ຈະເປີດໂອກາດໃຫ້ແກ່ບັນດາຜູ້ນຳ ຈາກປະເທດສະມາຊິກ ຮ່ວມກັນທົບທວນຜົລ ການຈັດຕັ້ງປະຕິບັດ ວຽກງານຕ່າງໆ ໃນຣະຍະທີ່ຜ່ານມາ ຕາມຖແລງການຈາກກອງປະຊຸມ ຄັ້ງທີ່ນຶ່ງ ທີ່ເມືອງຊັນຍາ ປະເທດຈີນ ໃນມື້ວັນທີ 23 ມີນາ ປີ 2016, ຮ່ວມທັງ ການທົບທວນ ຄວາມຄືບຫນ້າໃນໂຄງການນີ້ ແລະທິດທາງການປະຕິບັດງານ ໃນອະນາຄົດ.

ກອງປະຊຸມເທື່ອນີ້ ຍັງຈະອອກແຜນການຄວາມຮ່ວມມື ການພັທນາທີ່ຍືນຍົງ ຕາມລຳແມ່ນ້ຳຂອງ ສະບັບທຳອິດ ໃນຣະຍະ 5 ປີ ຣະຫວ່າງ ປີ 2018-22 ເພື່ອການບັງຄັບໃຊ້ ຍ້ອນວ່າການພັທນາ ຕາມລຳແມ່ນ້ຳຂອງ ໃນຣະຍະຜ່ານມາ ບໍ່ຍືນຍົງຍ້ອນມີ ບັນຫາຫຼາຍຢ່າງເປັນຕົ້ນ ນ້ຳຖ້ວມ ພັຍແຫ້ງແລ້ງ ຕາຝັ່ງເຈື່ອນ ການຫາຍສາບສູນຂອງຝຸງປາ ການປະມົງ ແລະການໄຫຼຂອງແມ່ນ້ຳຂອງ ຊຶ່ງໂຄງການແມ່ນ້ຳຂອງ ແມ່ນ້ຳລ້ານຊ້າງ ຕ້ອງການ ແກ້ໄຂບັນຫາດັ່ງກ່າວ ໃຫ້ດີຂຶ້ນ. ຕໍ່ໄປແມ່ນ ສປປລາວ ຈະເປັນເຈົ້າພາບຮ່ວມກັບຈີນ. ດັ່ງທ່ານ ທອງລຸນ ສີສຸລິດ ກ່າວຮັບການເປັນເຈົ້າພາບຮ່ວມກັບຈີນວ່າ:

ໂຄງການແມ່ນ້ຳຂອງ-ແມ່ນ້ຳລ້ານຊ້າງ ແມ່ນການອຸດຫນູນຕັ້ງຂຶ້ນໂດຍຣັຖບານຈີນ ເພື່ອຜົລປໂຍດ ຣະຍະຍາວຂອງຈີນນັ້ນເອງ ດັ່ງນັ້ນ ໃນປີ 2015 ຈີນ ຈື່ງສ້າງຕັ້ງໂຄງການ ແມ່ນ້່ຳລ້ານຊ້າງ ແມ່ນ້ຳຂອງ ຂື້ນມາ,

ນຶ່ງ-ແມ່ນຕ້ານ ການລິເລີ້ມໂຄງການ ແມ່ນ້ຳຂອງ ຫລື MEKONG INITIATIVE ຂອງສະຫະຣັດ ເພື່ອບໍ່ໃຫ້ສະຫະຣັດ ຂຍາຍອິດທິພົລ ເຂົ້າມາໃນເຂດນີ້ ດ້ວຍການໃຊ້ການພັທນາ ແມ່ນ້ຳຂອງບັງຫນ້າ .

ສອງ-ແມ່ນເພື່ອຂຍາຍອິດທິພົລຂອງຈີນ ມາໃນປະເທດລຸ່ມແມ່ນ້ຳຂອງ ທາງນ້ຳ ເພາະຈີນ ຮູ້ດີວ່າ ປະເທດເຫລົ່ານີ້ ອາສັຍແມ່ນ້ຳຂອງ ໃນ ການຫາຢູ່ຫາກິນ ຫລືຫາລ້ຽງຄອບຄົວ ມາໄດ້ຫລາຍເຊັ່ນຄົນແລ້ວ.

ສາມ-ເພື່ອບໍ່ຢາກໃຫ້ ປະເທດລຸ່ມແມ່ນ້ຳຂອງ ຕ້ານແຜນການສ້າງເຂຶ່ອນຂອງຈີນ 16 ເຂື່ອນໃນສ່ວນເທິງຂອງແມ່ນ້ຳຂອງ ຊຶ່ງໃນປັດຈຸບັນ ສ້າງແລ້ວ 6 ເຂື່ອນ ຊຶ່ງເປັນເຂື່ອນຂນາດໃຫຍ່ນຳອີກ.

ຕາມແຜນການ ໃນໂຄງການຄວາມຮ່ວມມື ແມ່ນ້ຳລ້ານຊ້າງ-ແມ່ນ້ຳຂອງ ຈະມີການພັທນາປະເພດຕ່າງໆ ສ່ວນໃຫຍ່ ຈະເປັນການພັທນາ ທາງດ້ານເສຖກິດ ໃນປະເທດອ່າງແມ່ນ້ຳຂອງ ເປັນຕົ້ນການກະເສດຊົລປະທານ ການປະມົງການເດີນເຮືອ ສິນຄ້າ ແລະການປັບປຸງຊີວິດ ການເປັນຢູ່ ຂອງປະຊາຊົນທ້ອງຖິ່ນໃຫ້ດີຂຶ້ນ. ສປປລາວກໍຈະໄດ້ຮັບ ການຊ່ອຍເຫຼືອຫຼາຍລ້ານໂດລາ ໃນໂຄງການນີ້ໃນແຕ່ລະປີ ຮ່ວມທັງ ປະເທດໃຕ້ນ້ຳອື່ນໆ ດັ່ງ ໄທ ກຳພູຊາ ພະມ້າ ວຽດນາມ ກໍໄດ້ຮັບການຊ່ອຍເຫລືອ ໃນໂຄງການນີ້ເຫມືອນກັນ ເພາະ ຈີນ ຮູ້ດີວ່າທຸກຢ່າງ ຊື້ໄດ້ດ້ວຍເງິນ ແລະຈີນ ກໍບໍ່ຕ້ອງການຢາກໃຫ້ປະເທດເຫລົ່ານີ້ ຕ້ານຈີນໃນໂຄງການສ້າງໃຫຍ່ໆ ຂອງຈີນ ດັ່ງການຣະເບີດແກ້ງຫີນ ແລະ ການສົ່ງສີນຄ້າມາທາງນ້ຳ ຮ່ວມທັງການຮັກສາ ຄວາມປອດພັຍ ແລະຕ້ານກຸ່ມອາສຍະກຳປະເພດຕ່າງໆ ຕາມລຳແມ່ນ້ຳຂອງ.

ດັ່ງນັ້ນ ຈີນ ຈຶ່ງຕັ້ງໂຄງການນີ້ຂຶ້ນມາ ເພື່ອຜົລປໂຍດຂອງຈີນ ໃນຣະຍະຍາວ ຫລາຍປະເທດໃນຂົງເຂດ ຈະໄດ້ຮັບການຊ່ອຍເຫຼືອ ແຕ່ຈະ ແລກດ້ວຍການເສັຽອະທິປະຕັຍ ແລະຖືກຄວບຄຸມຈາກຈີນ ຫລາຍຂຶ້ນ.

ສຳລັບໂຄງການສ້າງເຂື່ອນ ຣັຖບານຄອມມິວນິສຈີນ ເວົ້າວ່າໂຄງການເຂືື່ອນໃຫຍ່ໆໃນຈີນ ໄດ້ຊ່ອຍຫລຸດຜ່ອນບັນຫາ ຄວາມທຸກຍາກຂອງ ປະຊາຊົນຈີນກວ່າ 800 ລ້ານຄົນ ເມື່ອທົສວັດຜ່ານມາ ຍ້ອນການຊົລປະທານ ແລະການກະຈ່າຍນ້ຳທົ່ວເຖີງ ໃນເຂດແຫ້ງແລ້ງ, ດັ່ງນັ້ນ ໂຄງການສ້າງເຂື່ອນ ຖືວ່າເປັນໂຄງການທີ່ດີ ໃນການພັທນາເສຖກິດຂອງຊາດ ຈຶ່ງມີການຂຍາຍໂຄງການສ້າງເຂື່ອນ ໄປໃນຫລາຍປະເທດ ໃນໂລກ ທີ່ຮ່ວມດ້ວຍສປປລາວ ທີ່ຈີນລົງທຶນສ້າງເຖິງແມ່ນວ່າ ປະຊາຊົນລາວຈະໄດ້ຮັບ ຜົລກະທົບຫລາຍປານໃດກໍຕາມ.

ແຕ່ນັກວິເຄາະເວົ້າວ່າ ໂຄງການແມ່ນ້ຳຂອງ-ແມ່ນ້ຳລ້ານຊ້າງ ເປັນແຜນການຂອງຈີນ ມາແຕ່ຕົ້ນໃນການຂຍາຍອິດທິພົລຂອງຈີນ ທາງດ້ານ ເສຖກິດ ການຄ້າການລົງທຶນ ແລະການຄວບຄຸມການໃຊ້ນ້ຳ ໃນແມ່ນ້ຳຂອງ ຮ່ວມທັງຄວບຄຸມວິຖີຊີວິດ ຂອງ ປະຊາຊົນທ້ອງຖິ່ນ ໃນເຂດ ປະເທດໃຕ້ນ້ຳ ເພາະຈີນຮູ້ດີວ່າ ຖ້າສາມາດຄວບຄຸມນ້ຳ ໃນແມ່ນ້ຳຂອງໄດ້ ທີ່ປະຊາຊົນໃນ 6 ປະເທດ ໃນຈຳນວນ 60 ລ້ານຄົນ ອາສັຍ ການທຳມາຫາກິນ ກໍແມ່ນການຄວບຄຸມ ຊາຕາກັມ ຂອງປະເທດນັ້ນໆ.

ທ່ານວ່າແມ່ນ້ຳຂອງ ຫລືແມ່ນ້ຳລ້ານຊ້າງ ເປັນແມ່ນ້ຳນານາຊາດ ຈີນ ບໍ່ມີສີດຄວບຄຸມ ການໃຊ້ນ້ຳໃນແມ່ນ້ຳຂອງ, ປະເທດລຸ່ມແມ່ນ້່ຳຂອງ ກໍມີສິດໃນການໃຊ້ ຊັພຍາກອນນ້ຳ ໃນແມ່ນ້ຳຂອງຮ່ວມກັນ. ຫລາຍປະເທດກໍຄັດຄ້ານຈີນ ກ່ຽວກັບບັນຫານີ້ ແຕ່ກໍເຮັດຫຍັງບໍ່ໄດ້ ຍ້ອນຈີນ ມີອຳນາດ ທາງດ້ານເສຖກິດ ແລະການເງິນໃນຂົງເຂດ.

ຖ້າຈີນສາມາດຄວບຄຸມ ນ້ຳໃນແມ່ນ້ຳຂອງໄດ້ ຈີນກໍຈະສາມາດຄວບຄຸມເສຖກິດການຄ້າ ແລະຊີວິດການເປັນຢູ່ ຂອງປະຊາຊົນທ້ອງຖິ່ນ ຫລາຍລ້ານຄົນ ທີ່ອາສັຍແມ່ນ້ຳສາຍນີ້ ໃນການດຳຣົງຊີວິດໃນແຕ່ລະວັນ. ໃນການແກ້ໄຂບັນຫານີ້ ຈີນ ຈຶ່ງສ້າງຕັ້ງ ໂຄງການແມ່ນ້ຳຂອງ ແມ່ນ້ຳລ້ານຊ້າງ ຂຶ້ນມາເພື່ອຕອບສນອງ ຄວາມຕ້ອງການ ຂອງປະຊາຊົນ ແລະບັນດາຜູ້ນຳ ຈາກ 6 ປະເທດ ອ່າງແມ່ນ້ຳຂອງ ດ້ວຍການ ໃຊ້ການຊ່ອຍເຫລືອ ແລະການພັທນາມາບັງຫນ້າ.

ຄໍາເຫັນ (0)
  • ພິມ
  • ໃຊ້ຮ່ວມກັນ
  • ອີແມວລ໌
ເຕັມຫນ້າ