ເຈົ້າແຂວງ ລາວ-ກັມພູຊາ ພົບກັນຄັ້ງທີ 4

ສິດນີ
2017-10-12
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ການກໍ່ສ້າງ ໃນເຂດຊາຍແດນ ທີ່ທາງຝ່າຍລາວ ເວົ້າວ່າເປັນການສ້ອມແປງ ອາຄານເກົ່າ ທີ່ຊຸດໂຊມ ບໍ່ແມ່ນສ້າງຂຶ້ນໃໝ່, ແຕ່ຕ່າງຝ່າຍ ກໍມີຄໍາເຫັນ ທີ່ແຕກຕ່າງກັນ ຈຶ່ງເກີດມີຂໍ້ຂັດແຍ່ງກັນ
ການກໍ່ສ້າງ ໃນເຂດຊາຍແດນ ທີ່ທາງຝ່າຍລາວ ເວົ້າວ່າເປັນການສ້ອມແປງ ອາຄານເກົ່າ ທີ່ຊຸດໂຊມ ບໍ່ແມ່ນສ້າງຂຶ້ນໃໝ່, ແຕ່ຕ່າງຝ່າຍ ກໍມີຄໍາເຫັນ ທີ່ແຕກຕ່າງກັນ ຈຶ່ງເກີດມີຂໍ້ຂັດແຍ່ງກັນ
RFA

ທ່ານ ນາມ ວິຍະເກດ ເຈົ້າແຂວງອັດຕະປືຂອງລາວ ແລະ ທ່ານ ທອງ ສາວຸນ ເຈົ້າແຂວງຣັຕນະຄິຣີ ຂອງກຳພູຊາ ໄດ້ຮ່ວມປະຊຸມ ຮອບວຽນພົບພໍ້ກັນຄັ້ງທີ 4 ເມື່ອວັນທີ 9 ຕຸລາ 2017 ທີ່ແຂວງອັດຕະປື ເພື່ອປຶກສາຫາລືກັນ ໃນວຽກງານຕ່າງໆຣະຫວ່າງ 2 ແຂວງ.

ເຈົ້າໜ້າທີ່ແຂວງອັດຕະປື ຜູ້ຂໍສງວນຊື່ ທ່ານນຶ່ງ ກ່າວຕໍ່ເອເຊັຽເສຣີ ໃນມື້ວັນທີ 11 ຕຸລາ ນີ້ວ່າ ທັງສອງຝ່າຍ ໄດ້ຕົກລົງຮ່ວມມືກັນ ໃນ ຫຼາຍວຽກງານ, ໃນນັ້ນຮ່ວມດ້ວຍ ການສຳຣວດ ແລະສ້ອມແປງ ຫຼັກໝາຍຊາຍແດນ ທີ່ຊຸດໂຊມເສັຽຫາຍ ພ້ອມທັງຈະສເນີໃຫ້ ຣັຖບານ ລາວແລະກຳພູຊາ ສ້າງເສັ້ນທາງ 1J ຈາກເມືອງພູວົງ ແຂວງອັດຕະປື ໄປຫາແຂວງຣັຕຕະນະຄິຣີ ເພື່ອຄວາມສະດວກ ໃນການໄປມາ ຫາສູ່ ແລະຄ້າຂາຍ ຣະຫວ່າງສອງແຂວງ.

ໃນຂະນະດຽວກັນ, ເຈົ້າໜ້າທີ່ ປກຊ-ປກສ ແຂວງພາກໃຕ້ຂອງລາວ ກໍໄດ້ຢືນຢັນ ຕໍ່ຜູ້ສື່ຂ່າວ ເອເຊັຽເສຣີ ໃນວັນດຽວກັນວ່າ ສະຖານະ ການຕາມແນວ ຊາຍແດນ ລາວ-ກຳພູຊາ ກໍດີຂຶ້ນແດ່ແລ້ວ ແລະ ຊາວບ້ານສົ້ມປ່ອຍ ເມືອງພູວົງ ແຂວງອັດຕະປື ທີ່ໄດ້ເອົາ ງົວ-ຄວາຍ ໄປກິນຫຍ້າ ຢູ່ຟາກນ້ຳເຊກອງ ເບື້ອງຕິດກຳພູຊາ ກໍສາມາດໄປເອົາງົວ-ຄວາຍ ຂອງຕົນກັບມາໄດ້ແລ້ວ ຈຳນວນນຶ່ງ. ດັ່ງທ່ານກ່າວ ຕໍ່ ເອເຊັຽເສຣີ ຕອນນຶ່ງວ່າ:

“ເອີເພິ່ນກະ ໂຕໃດມັນເອົາມາບໍ່ທັນໄດ້ ກະຍັງຢູ່ຫັ້ນ ຫັ້ນແຫຼ້ວ ແຕ່ວ່າເບື້ອງເຊກອງ ເບື້ອງນັ້ນມັນກະຍັງບໍ່ໄດ້ ເອົາມາໝົດ ເພາະວ່າມັນ ກະເຄີຍລ້ຽງ ເຄີຍຫຍັງໄປກ່ອນ”.

ທ່ານກ່າວຕື່ມວ່າ ພາຍຫຼັງທີ່ມີຄວາມເຄັ່ງຕຶງ ເມື່ອ 2 ເດືອນຜ່ານມາສະຖານະການ ກໍເຣີ້ມເປັນປົກກະຕິ ເຖິງວ່າທະຫານກຳພູຊາຍັງວາງ ກຳລັງ ຈຳນວນນຶ່ງ ຕາມຊາຍແດນ ຢູ່ກໍ່ຕາມ:

“ເອີເພິ່ນຖອນ ບາດຖອນບາດເຂົ້າມາຫັ້ນນ່າ ຖືວ່າເພິ່ນມາຢູ່ຫັ້ນ 15 ຄົນເອົາເມືອ 3 ຫຼືເອົາເມືອ 10 ລະເອົາມາອີກ 5 ຕື່ມໄປຈັ່ງຊັ້ນນ່າ, ໄປໆມາໆຈັ່ງຊັ້ນລະ ເພິ່ນຫັ້ນນ່າ. ເພິ່ນກະວ່າ ມີແຕ່ວ່າໃຫ້ ຢູ່ນຳກັນໂດຍສັນຕິ ບໍ່ໄດ້ວ່າເຈົ້າ ຊິອັນນັ້ນອັນນີ້ ເຮົາຢູ່ສ່ຳໃດ ຢູ່ສ່ຳນັ້ນກ່ອນ ເພື່ອບໍ່ໃຫ້ມັນຍືດຍາວ ໄປອີກຫັ້ນນ່າ. ມີຫຍັງລະເຮົາ ຈັ່ງມອບໃຫ້ຂັ້ນເທິງ ເປັນຜູ້ແກ້ໄຂ”.

ຜ່ານມາ, ທ່ານ ທອງລຸນ ສີສຸລິດ ນາຍົກຣັຖມົນຕຣີລາວ ແລະ ທ່ານ ຮຸນເຊນ ນາຍົກຣັຖມົນຕຼີ ກຳພູຊາ ໄດ້ປະຊຸມ ປຶກສາຫາລືກັນເພື່ອ ແກ້ໄຂບັນຫາ ຂໍ້ຂັດແຍ່ງ ຢູ່ນະຄອນຫຼວງວຽງຈັນ ໃນວັນທີ 13 ສິງຫາ ແລະຜູ້ນຳທັງສອງ ກໍໄດ້ປະຊຸມກັນອີກ ຢູ່ກຸງພະນົມເປັນ ເມື່ອ ວັນທີ 1 ກັນຍາ 2017 ເພື່ອສືບຕໍ່ແກ້ໄຂ ຂໍ້ຂັດແຍ່ງ ໂດຍ ທັງສອງຝ່າຍໄດ້ຕົກລົງ ເປັນເອກພາບກັນ 4 ຂໍ້ ວ່າ ຈະແກ້ໄຂ 4 ຈຸດ ຄື ເສັ້ນຊາຍແດນ 0. 33 ເສັ້ນຊາຍແດນ 0 ຈຸດ 17 ເວີນຄໍາ-ໂອສະວ້າຍ ຫລືວ່າ ເຂດ 0 ຈຸດ 32 ໃຫ້ໄວ ເທົ່າທີ່ຈະໄວໄດ້.

ຄໍາເຫັນ (0)
  • ພິມ
  • ໃຊ້ຮ່ວມກັນ
  • ອີແມວລ໌
ເຕັມຫນ້າ