ນັກປັນຍາຊົນຍິນດີນໍາ ຄນະນໍາ

ສົມເນ
2016-04-21
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ທ່ານ ບຸນຍັງ ວໍຣະຈິດ ແລະ ທ່ານ ທອງລຸນ ສີສຸລິດ ຜູ້ນໍາຄົນສໍາຄັນ ຂອງ ສປປລາວ ໃນຂັ້ນຕໍ່ໄປ
ທ່ານ ບຸນຍັງ ວໍຣະຈິດ ແລະ ທ່ານ ທອງລຸນ ສີສຸລິດ ຜູ້ນໍາຄົນສໍາຄັນ ຂອງ ສປປລາວ ໃນຂັ້ນຕໍ່ໄປ
Screen captured from LNTV video

ນັກປັນຍາຊົນ ໃນ ນະຄອນຫຼວງ ວຽງຈັນ ຫຼາຍຄົນ ພໍໃຈນໍາ ການແຕ່ງຕັ້ງ ຄນະ ບໍຣິຫານ ຊຸດໃໝ່ ທີ່ ສະມາຊິກ ສະພາ ແຫ່ງຊາຕ ຊຸດທີ 8 ໄດ້ ຮັບຮອງເອົາ ຢູ່ ກອງປະຊຸມ ຄັ້ງທໍາອິດ ເມື່ອ ວັນທີ 20 ເມສາ ນີ້ວ່າ ສ່ວນຫຼາຍ ເປັນ ປັນຍາຊົນ ລຸ້ນໃໝ່ ທີ່ມີ ຄວາມຮູ້ ຄວາມ ສາມາດ ແຕ່ຢາກຂໍ ເວລາ ເບິ່ງການ ປະຕິບັດ ຕົວຈິງ ເສັຽກ່ອນ, ຕາມ ການສັງເກດ ຂອງ ນັກປັນຍາຊົນ ຄົນນຶ່ງ ທີ່ ບໍ່ປະສົງ ອອກຊື່:

"ຖືວ່າໃຄແດ່ ວ່າຊັ້ນສາ ຖ້າທຽບໃສ່ ພວກລຸ້ນເກົ່າ ຫັ້ນນະ ປັນຍາຊົນ ກ່າມີຫຼາຍ ຄື ທອງລຸນ ລາວກ່າມີ ບົດບາດ ຕໍ່ສາກົນ ຫຼາຍ ຖ້າ ທຽບໃສ່ ແຕ່ເກົ່າແລ້ວ, ຄິດວ່າ ແນວນັ້ນ ດີກວ່າເກົ່າ".

ຄນະນໍາ ບໍຣິຫານ ຊຸດໃໝ່ ທີ່ກອງປະຊຸມ ສະມາຊິກ ສະພາ ເລືອກເອົານັ້ນ ປະກອບ ດ້ວຍ, ທ່ານ ບຸນຍັງ ວໍຣະຈິດ ປະທານ ປະເທດ, ທ່ານ ພັນຄໍາ ວິພາວັນ ຮອງປະທານ ປະເທດ, ທ່ານ ທອງລຸນ ສີສຸລິດ ນາຍົກ ຣັຖມົນຕຣີ, ແລະ ຮອງນາຍົກ ຣັຖມົນຕຣີ 3 ຄົນ ຄື ທ່ານ ບຸນທອງ ຈິດມະນີ, ທ່ານ ສອນໃຊ ສີພັນດອນ, ແລະທ່ານ ສົມດີ ດວງດີ.

ນັກປັນຍາຊົນ ທ່ານນີ້ ໃຫ້ ຂໍ້ສັງເກດ ວ່າ ຄນະນໍາ ການບໍຣິຫານ ຣັຖບານ ຊຸດນີ້ ສ່ວນຫຼາຍ ເປັນຄົນໜຸ່ມ, ນອກຈາກ ທ່ານ ບຸນຍັງ ນັກ ປະຕິວັດ ເກົ່າແກ່ ທີ່ ມີອາຍຸສູງ ແດ່ແລ້ວ. ທ່ານວ່າ ພວກເພິ່ນ ກ້າວຂຶ້ນມາ ໃໝ່ນີ້ ບໍ່ປະກົດ ວ່າມີ ຊື່ສຽງ ທີ່ບໍ່ດີ ມີຄວາມ ຕັ້ງໃຈ, ບໍ່ຢາກ ເຮັດ ໃນສິ່ງທີ່ ບໍ່ຖືກຕ້ອງ. ແຕ່ ເຖິງຢ່າງໃດ ກໍດີ ທ່ານວ່າ, ຂໍເບິ່ງການ ປະຕິບັດ ວຽກງານ ໂຕຈິງ ຂອງພວກເພິ່ນ ຕໍ່ໄປ ເສັຽກ່ອນ ເພາະ ບາງເທື່ອ ພວກເພິ່ນ ອາດຄິດວ່າ ໂອກາດນີ້ແມ່ນ ເປັນຂອງ ພວກເພິ່ນແລ້ວ ມັນກໍມີ ຄວາມ ເປັນໄປໄດ້ ເຊັ່ນກັນ. ນັກ ປັນຍາຊົນ ອີກ ທ່ານນຶ່ງ ທີ່ ບໍ່ປະສົງ ອອກຊື່ ແລະສຽງ ກ່າວວ່າ, ໂຄງສ້າງ ການຈັດຕັ້ງ ຂອງຄນະນໍາພາ ການບໍຣິຫານ ຣັຖບານ ຊຸດນີ້ງາມຫຼາຍ ແຕ່ວ່າ ໂຕຈິງນັ້ນ ຈະເປັນແນວໃດ ກໍຍັງຍໍ່ຮູ້.

ຫລັງຈາກ ການເລືອກຕັ້ງ ເອົາ ຄນະນໍາ ໃນສາຍພັກ ເມື່ອເດືອນ ມົກກະຣາ ຜ່ານມາແລ້ວ ນັກປັນຍາຊົນ ຫຼາຍຄົນ ມີຄວາມຫວັງ ວ່າ, ທ່ານ ທອງລຸນ ຄວນເປັນ ນາຍົກ ຣັຖມົນຕຣີ ເພາະ ທ່ານ ມີ ປະສົພການ ໃນວຽກງານ ຕ່າງ ປະເທດ. ສິ່ງທີ່ ນັກ ປັນຍາຊົນ ຄາດບໍ່ເຖິງ ນັ້ນ ແມ່ນການ ແຕ່ງຕັ້ງ ທ່ານ ສົມດີ ດວງດີ ທີ່ບໍ່ຢູ່ໃນ ຄນະ ກັມມະການ ກົມການເມືອງ ໃຫ້ເປັນ ຮອງນາຍົກ ຣັຖມົນຕຣີ ຮັບຜິດຊອບ ວຽກງານ ເສຖກິດ ການເງິນ, ຊຶ່ງ ຫຼາຍໆຄົນ ເວົ້າວ່າ ມ້າມືດ. ສໍາລັບ ທານ ສອນໄຊ ສີພັນດອນ ນັ້ນ ຫຼາຍຄົນ ເຫັນວ່າ ບໍ່ຜິດແປກ ຫຍັງ ເພາະທ່ານ ເປັນລູກຊາຍ ຂອງ ອະດີດ ປະທານ ປະເທດ ແລະ ທັງມີ ປະສົພການ ວຽກງານ ບໍຣິຫານ ພາກຣັຖ ຫຼາຍສົມຄວນ. ສໍາລັບ ທ່ານ ພັນຄໍາ ວິພາວັນນັ້ນ ຫຼາຍຄົນ ເວົ້າວ່າ ເປັນຄົນ ທີ່ ໜ້າສົນໃຈ ເພາະເປັນຜູ້ ກ້າປາກ ກ້າເວົ້າ ແບບກົງໄປ ກົງມາ.

ຄໍາເຫັນ (1)
  • ພິມ
  • ໃຊ້ຮ່ວມກັນ
  • ອີແມວລ໌

ຄ.ນະຄຳມ່ວນ

ຈາກ ທ່າແຂກ

ເວລາພິສູດມ້າ, ຫນ້າທີ່ພິສູດຄົນ, ຮັກປະເທດຊາຕ, ຫລື ຮັກຫນ້າທີ່ ແລະອຳນາດ, ບໍ່ນານເກີນລໍ ກໍ່ຈະປາກົດຜົລເປັນຈິງ ອອກມາໃຫ້ເຫັນດອກຫນາ! ຂອບໃຈ!!!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Apr 21, 2016 09:51 PM

ເຕັມຫນ້າ