ທ່ານ George W Bush ​ອອກ​ຈາກ ທໍານຽບຂາວ ມື້​ວັນ​ຈັນ ທີ 4 ສິງຫາ​ນີ້ ​ເພື່ອ​ໄປ​ຢ້ຽມຢາມ ສາມ​ປະ​ເທດ ​ໃນ​ເອ​ເຊັຍ ​ໂດຍ​ຈະ​ໃຊ້​ເວລາ ນຶ່ງ​ອາທິດ. ​ເທື່ອ​ນີ້ ​ເປັນ​ຄັ້ງ​ທີເກົ້າ ​ທີ່​ທ່ານ ​ຈະ​ໄດ້​ໄປ​ຢ້ຽມຢາມ ​ຂົງ​ເຂດ​ນີ້. ​ໃນ​ການ​ເດີນທາງ ​ຄັ້ງ​ນີ້ ​ມີ​ແຜນ ຈະ​ຢ້ຽມຢາມ​ເກົາຫຼີ​ໃຕ້ ​ໄທ ​ແລະ​ ຈີນ.

ບ່ອນ​ທໍາ​ອິດ ​ທີ່​ທ່ານ​ ຈະ​ແວະ​ເຊົາ ຄື ກຸງ​ໂຊນ ​ເມືອງ​ເອກ ຂອງ ເກົາຫຼີ​ໃຕ້ ບ່ອນ​ທີ່ ​ບໍ່​ຮອດ​ເດືອນ​ນຶ່ງ ​ຜ່ານ​ມາ​ ໄດ້​ມີ​ການເດີນ​ກະບວນ ​ປະ​ທ້ວງ ກ່ຽວ​ກັບ​ ການ​ກັງວົນ​ນໍາ ຄວາມ​ປອດ​ໄພ ຂອງ ​ຊີ້​ນງົວ ທີ່​ນໍາ​ເຂົ້າ​ມາ ​ຈາກ ສະຫາຣັດ.

ປັດຈຸບັນ​ນີ້ ການປະ​ທ້ວງ ກ່ຽວ​ກັບ ​ການນໍາຊີ້​ນງົວ ​ເຂົ້າ​ມາ ​ຈາກສະຫາຣັດ ກໍ​ຄ່ອຍ​ ເບົາບາງ​ລົງ ​ແຕ່​​ໂຄງການ ປົດ​ອາວຸດ ນິວ​ເຄັລຽ ຂອງ ​ເກົາຫຼີ​ເໜືອ ຍັງ​ເປັນ​ທີ່ ​ໜ້າ​ເປັນ​ຫ່ວງ​ ຢູ່.

ຍ້ອນ​ວ່າ ​ເກົາຫຼີ​ໃຕ້ ​ມີ​ເຂດ​ແດນ ຕິດ​ກັບ ​ເກົາຫຼີ​ເໜືອ ຈຶ່ງ​ເຮັດ​ໃຫ້ ຄວາມ​ກັງວົນ ​ມີ​ຢູ່​ຕລອດ​ເວລາ. ເກົາຫຼີ​ເໜືອ ມີ​ຫົວ​ຈະຣວດ 11,000 ອັນ ທີ່​ແນ​ໄປ​ໃສ່ ກຸງ​ໂຊນ ​ເມືອງ​ເອກ ຂອງເກົາຫຼີ​ໃຕ້. ທຸກ​ສິ່ງ​ທຸກ​ຢ່າງ​ ເລັກໆ​ນ້ອຍໆ ທີ່​ຊາວ​ໂລກ ​ເຮັດ​ກັບ ເກົາຫຼີ​ເໜືອ ກໍຕ້ອງ​ໄດ້​ ລະມັດລະວັງ ​ເພາະ​ຈະ​ເຮັດ​ໃຫ້ ​ເກົາຫຼີ​ໃຕ້ ​ຢູ່​ຢ່າງ​ບໍ່​ເປັນ​ສຸກ​ໄດ້. ​ໂດຍ​ສະ​ເພາະ ສະຫາຣັດ ກໍ​ມີ​ຄວາມ​ເປັນ​ຫ່ວງ ຢ່າງ​ໃຫຍ່​ຫຼວງ ​ວ່າ ພວກ​ກໍ່​ການ​ຮ້າຍ ຈະ​ເອົາ ອາວຸດ ນິວ​ເຄລັຍ ມາ​ຈາກ​ໃສ.

ຫຼັງ​ຈາກ ເກົາຫຼີ​ໃຕ້​ແລ້ວ ປະທາ​ນາ​ທິບໍດີ ບຸດສ ກໍ​ໄປ​ ປະ​ເທດ​ໄທ ບ່ອນ​ທີ່​ທ່ານ ​ໄດ້​ປະກາດ ນະ​ໂຍບາຍ ຂອງ​ສະຫາ​ຣັດ ກ່ຽວ​ກັບ ​ເອ​ເຊັຍ. ​ໂດຍ​ສະ​ເພາະ ທ່ານ ​ປະນາມ ຣັຖບານ ​ທະຫານ​ພະ​ມ່າ ກ່ຽວ​ດ້ານ ສິດທິ​ມະນຸດ ​ໃນ​ປະ​ເທດ​ ຂອງ​ເຂົາ​ເຈົ້າ.

ຫຼັງ​ຈາກ​ ການ​ຢ້ຽມຢາມ​ ປະ​ເທດ​ໄທ​ແລ້ວ ປະທາ​ນາ​ທິບໍດີ ບຸດສ ກໍ​ຈະໄປ​ຮ່ວມ​ ໃນ​ພິທີ ​ ເປີດ​ການ​ແຂ່ງຂັນ ​ກິລາ​ໂອ​ລິ​ມປິກ 2008 ຢູ່​ກຸງ​ປັກ​ກິ່ງ ສປຈີນ. ການ​ຕັດສິນ​ໃຈ ​ໄປ​ຮ່ວມ​ ໄດ້​ສ້າງຄວາມວິພາກ​ວິຈານ​ ຢ່າງ​ຫຼວງ​ຫຼາຍ ​ໂດຍ​ໂຕ້​ແຍ້​ງວ່າ ການ​ທີ່ ປະທາ​ນາ​ທິບໍດີ ບຸດສ ​ໄປ​ຈີນ​ ໃນ​ຄັ້ງ​ນີ້ ຈະ​​ເປີດ​ໄຟຂຽວ​ໃຫ້ ຈີນ​ຜ່ານ ການ​ລົງ​ ບັນທຶກ​ ທີ່​ບໍ່​ດີ ກ່ຽວ​ດ້ານ ສິດທິ​ມະນຸດ ​ແລະ ສິດ​ເສຣີພາບ ​ທາງ​ດ້ານ ​ການ​ນັບຖື ສາສນາ​ ຂອງຈີນ.

ກ່ຽວ​ກັບ ​ບັນຫາ​ນີ້ ປະທາ​ນາ​ທິບໍດີ ບຸດສ ​ໄດ້​ກ່າວ​ຢໍ້າ ​ເມື່ອອອກ ຖະ​ແລງ​ການ​ ຕໍ່​ສື່ມວນ​ຊົນ ຢູ່ ກຸງ​ໂຊນ ​ເມືອງ​ເອກ ຂອງເກົາຫຼີ​ໃຕ້ ວ່າ:

“ທ່ານ​ໄດ້ ​ຄົບ​ກັບ ຜູ້ນໍາຈີນ ມາ​ໄດ້ 7 ປີ​ ເຄິ່ງ​ແລ້ວ ​ແລະ ຖ້ອຍ​ຄໍາ ຂອງທ່ານ ​ກໍ​ຍັງ​ຄື​ເກົ່າ ຢ່າ​ສ້າງ​ຄວາມ​ຢ້ານ​ກົວ ​ໃຫ້​ຜູ້​ຄົນ ທີ່​ນັບຖື​ສາສນາ ​ໃນ​ສັງຄົມ. ຕາມ​ຄວາມ​ຈິງ​ແລ້ວ ສາສນາ​ ເຮັດ​ໃຫ້​ສັງຄົມ ​ດີ​ຂື້ນ. ​ເຮົາ​ ຄວນ​ສົ່ງ​ເສີມ​ໃຫ້​ຄົນ ສ​ແດງ​ອອກ ​ເຖິງ​ຄວາມ​ຄິດ​ຄວາມ​ເຫັນ ​ຂອງ ຂະ​ເຈົ້າ. ຖ້າ​ຫາກ​ຄົນ ບໍ່​ສາມາດ ສ​ແດງ​ອອກ ເຖິງ​ຄວາມ​ຄິດ​ຄວາມ​ເຫັນ ​ຂອງຕົນ ​ແລະ ບໍ່​ສາມາດ ສັກກະ​ລະ​ບູຊາ ຫຼື ນັບຖື​ ສາສນາ ຢ່າງ​ມີ​ເສຣີ ທ່ານ​ ຄິດ​ວ່າ ​ມັນ​ເປັນ​ ຄວາມຜິດພາດ ​ແລະ ຂ້າພະ​ເຈົ້າ ​ກໍ​​ໄດ້ ອະທິບາຍ​ ໃຫ້ ພວກ​ຂະ​ເຈົ້າ ຮັບຮູ້ ທຸກໆ​ເທື່ອ. ການ​ທີ່ ທ່ານ​ ມາ​ຮ່ວມ​ກິລາ ​ໂອ​ລິ​ມປິກ​ກໍ​ຄື 1- ​ເພື່ອ ​ໃຫ້​ກຽດ ​ແລະ ສ​ແດງ​ເຖິງ ຄວາມ​ນັບຖື ປະຊາຊົນ​ຈີນ, ​ແລະ 2- ກໍ​ເພື່ອ​ສນັບ​ສນູນ ນັກ​ກິລາ ສະຫາຣັດ.

ທ່ານ ປະທາ​ນາ​ທິບໍດີ ບຸດສ ຍັງ​ໄດ້​ກ່າວ​ຕື່ມ​ອີກ​ວ່າ:

“​ແລະ ກໍ​ເປັນ​ໂອກາດ ທີ່​ຈະ​​ໄດ້​ກ່າວ ​ຕໍ່​ປະຊາຊົນ​ຈີນ​ ວ່າ ພວກ​ເຮົາ ​ນັບຖື ຄະ​ນົບ​ທັມ​ນຽມ ຂອງ​ພວກຂະ​ເຈົ້າ ​ແລະ ພວກ​ເຮົາ ​ນັບຖື ປະຫວັດສາດ ຂອ​ງພວກຂະ​ເຈົ້າ ​ແລະ ທ່ານ​ ໄດ້​​ເວົ້າ​ ຫຼາຍ​ໆ​ຄັ້ງ​ແລ້ວ ວ່າ ທ່ານບໍ່​ຕ້ອງການ ກິລາ​ໂອ​ລິ​ມປິກ ​ເພື່​ອເປັນ​ໂອກາດ ທີ່​ຈະ​ມາ​ເນັ້ນ ຄວາມ​ຄິດ​ຄວາມ​ເຫັນ ຄວາມ​​ເຊື່ອ​ຖື ຂອງທ່ານ ກ່ຽວ​ກັບ​ການ ການ​ມີ​ເສຣີພາບ ​ໃນ​ການ​ນັບຖື ​ສາສນາ ຍ້ອນ​ວ່າ ທ່ານ ​ໄດ້​ເວົ້າມາ ຕັ້ງ​ແຕ່ ທ່ານ​ໄດ້​ເປັນ ປະທາ​ນາ​ທິບໍດີ ພຸ້ນ​ແລ້ວ.

ທ່ານ​ໄດ້​ກ່າວ​ໃນ​ທີ່​ສຸດ.

ຍ້ອນ​ວ່າ ​ເປັນ​ຜູ້​ມັກ ​ກິລາ​ຜູ້​ນຶ່ງ ທ່ານ ບຸດສ ຈະ​ໄປ​ເບິ່ງ ​ການ​ແຂ່ງຂັນ ບາດສ​ເກັດ​ບອນ ຣະຫວ່າງ ສະຫາຣັດກັບ ຈີນ.

ຊາວ​ໂລກ ​ທີ່​ເບິ່ງ​ກິລາ ໂອ​ລິ​ມປິກ, ກຸ່ມ ​ເພື່ອ​ສິດທິ​ມະນຸດ ​ແລະ ສະມາຊິກ​ ສະພາ ສະຫາຣັດ ຫວັງ​ວ່າ ທ່ານ ບຸດສ ຈະ​ໃຊ້ ກິດຈະການ​ ໃນ​ຄັ້ງ​ນີ້ ຊຸກຍູ້​ໃຫ້ ຜູ້ນຳ​ຈີນ ຜ່ອນຜັນ ​ໃຫ້​ສິດ​ເສຣີພາບ ຕື່ມ​ຂື້ນ ​ແກ່ ​ປະຊາຊົນ ​ຂອງ​ຕົນ.

ທ່ານ​ບຸດສ ກ່າວ​ສ​ເມີ ​ວ່າ ຈະ​ສົນທະນາ ກ່ຽວ​ກັບ ບັນຫາ ສິດທິ​ມະນຸດ ​ເມື່ອ​ໄດ້ ​ໂອ້​ລົມ​ກັບ ປະທານ ​ປະ​ເທດ​ຈີນ ທ່ານ ຮູ​ ຈິນທາວ ​ແລະ ​ທັງ​ສອງ ກໍ​ມີ ​ໂຄງການ​ວ່າ ​ຈະ ພົບ​ປະກັນ.

ທ່ານ ບຸດສ ຮັບ​ຮູ້​ວ່າ ຄວາມ​ສຳພັນ ຣະຫວ່າງ ສະຫາ​ຮັດ ​ແລະ ຈີນ ນີ້ ​ລຶກລັບ​ຊັບຊ້ອນ​ຫຼາຍ ​ເພາະ​ມີ ​ການ​ຕໍ່​ໄຍ ທີ່​ລະອຽດ​ອ່ອນ ກັບ ຈັກກະພັດ​ ແຫ່ງ ເອ​ເຊັຍ​ນີ້.

​ເຖິງ​ຢ່າງ​ໃດ ​ກໍ​ຕາມ ປະທານ ປະ​ເທດຈີນ ພັດກ່າວຕື່ມ​ວ່າ ການ​ເມືອງ ກັບ ການແຂ່ງຂັນ ​ກິລາໂອ​ລິ​ມປິກ ບໍ່​ຄວນ​​ເອົາ​ມາ ປົນ​ກັນ. ປະທານ​ປະ​ເທດຈີນ ທ່ານ ຮູ​ຈິນທາວ ​ໄດ້​ກ່າວ​ວ່າ ຄວາມ​ສາມາດ​ ໃນ​ການ​ແຂ່ງຂັນ ຂອງ​ນັກ​ກິລາ ​ແລະ ການ​ສຳພັນ​ທະ​ໄມຕຣີ ຂອງ​ນາໆ​ຊາດ ຈະ​ຊີ້​ຂາດ ​ວ່າ ​ການ​ແຂ່ງຂັນ ກິລາ​ໂອ​ລິ​ມປິກ ຄັ້ງ​ນີ້​ໄດ້​ຮັບ​ຄວາມ ສຳ​ເຣັດ ຫຼື​ບໍ່ ບໍ່​ແມ່ນ ​ການ​ຂັດ​ແຍ່ງ​ກັນ ​ທາງ​ດ້ານ​ການ​ເມືອງ.

ໃນ​ການ​ໃຫ້ ​ສຳພາດ ກັບ​ຜູ້​ສື່​ຂ່າວ ນາໆ​ຊາດ, ທ່ານ ຮູ​ ຈິນທາວ ​ໄດ້​ກ່າວ​ວ່າ ການ​ເປັນ​ ເຈົ້າພາບ ຂອງ ກຸງ​ປັກ​ກິ່ງ ​ໃນ​ການຈັດການ​ແຂ່ງຂັນ ກິລາ​ໂອ​ລິ​ມປິກ 2008 ກໍ​ເພື່ອ​ຢາກ​ສ​ແດງ ​ໃຫ້​ເຫັນ​ວ່າ ຈີນ ​ມີ​ຈຸດປະສົງ ​ອັນ​ແຮງ​ກ້າ ທີ່​ຢາກ​ຈະມີ ​ຄວາມ​ສະ​ງົບ ຢາກ​ຜູກ​ມິດ​ໄມຕຣີ ກັບ​ຊຸມ​ຊົນ ທົ່ວ​ໂລກ.

ທ່ານ ຮູ ​ຈິນທາວ ບໍ່​ໄດ້​ກ່າວ​ ໂດຍ​ກົງ​ ກ່ຽວ​ກັບ ບັນຫາ ສິດທິ​ມະນຸດ​ ໃນ​ຈີນ ​ແລະ ການຈຳກັດ ​ການອອກ​ຂ່າວສານ ທີ່​ເປັນ​ອາການ ​ຄວບ​ງຳ ລາຍການ ຢູ່​ໃນ​ ປັດຈຸບັນ​ນີ້ ​ແຕ່​ທ່ານ​ ໄດ້​ປະນາມ ​ການດຶງ​ແກ່ ​ເອົາ ບັນຫາ​ການ​ເມືອງ ​ເຂົ້າ​ມາ​ພົວພັນ ​ກັບ ລາຍການ​ ກິລາ ​ແລະ ຍັງ​ເ​ຕືອນ ຜູ້​ສື່​ຂ່າວ ​ວ່າ ຂໍ​ໃຫ້​ອອກ​ຂ່າວ ຢ່າງ​ຍຸດຕິ​ທັມ.

ທ່ານ ກ່າວ​ວ່າ ການ​​ເຮັດ​ໃຫ້ ການ​ແຂ່ງຂັນ ກິລາ​ໂອ​ລິ​ມປິກ ກາຍ​ເປັນ​ ສະໜາມ​ການ​ເມືອງ ຈະ​ບໍ່​ຊ່ອຍ ຄີ່ຄາຍ​ບັນຫາ​ ຕ່າງໆ ​ໄດ້​ເລີຍ ​ແລະ ຍິ່ງ​ຈະ​ເຮັດ​ໃຫ້ ​ເປັນ​ການ ທຳລາຍ ບັນຍາກາດ ຂອງ ກິລາ​ໂອ​ລິ​ມປິກ ອີກ​ດ້ວຍ​.