ຢາບ້າທັງເສພ ທັງຂາຍຢູ່ລາວ

ເຣື້ອງ ການຄ້າ ຢາເສພຕິດ ແລະ ການເສພຢາບ້າ ຢູ່ໃນລາວ ມີຄວາມຮຸນແຮງ ຂຶ້ນນໍາທຸກມື້.
ຈໍາປາທອງ
2013-02-14
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
F-drug-use
ຢາບ້າ ທີ່ກໍາລັງ ສ້າງບັນຫາ ໃຫ້ກັບ ເຍົາວະຊົນ ໃນສປປລາວ ແລະ ໃນປະເທດ ເພື່ອນບ້ານ
irinnews.org

ທ່ານ ເລັກ ບຸນວັດ ຜູ້ຕາງໜ້າ ອົງການຕ້ານ ຢາເສພຕິດ ແລະ ອາສຍາກັມ ສະຫະປະຊາຊາດ ປະຈໍາລາວ ເປີດເຜີຍວ່າ ສະພາບການ ເຣື້ອງຄ້າ ແລະ ການໃຊ້ ຢາເສພຕິດ ຢູ່ລາວ ມີຄວາມ ຮຸນແຮງຂຶ້ນ ໂດຍສະເພາະ ຢາບ້າ ໄດ້ຂຍາຍ ກວ້າງອອກ ຢ່າງໄວວາ ຈາກ ຕົວເມືອງ ໄປສູ່ ຊົນນະບົດ ຊຶ່ງແຕ່ກ່ອນ ຜູ້ທີ່ຕົກ ເປັນທາດ ຂອງ ຢາເສບຕິດ ສ່ວນໃຫຍ່ ແມ່ນຊາວໜຸ່ມ ແຕ່ດຽວນີ້ ມີທັງ ພໍ່ຄ້າ ຊາວໄຮ່ຊາວສວນ ຮວມເຖິງ ຜູ້ອອກແຮງງານ ນໍາອີກ. ທ່ານວ່າ:

"ທ່ານຄິດວ່າ ພວກທ່ານ ຍຶດຢາເສພຕິດ ໄດ້ຫລາຍຂຶ້ນ ຊຶ່ງສະແດງ ໃຫ້ເຫັນວ່າ ຢາເສພຕິດ ເຂົ້າມາລາວ ຫລາຍຂຶ້ນ. ພວກທ່ານ ບໍ່ມີຕົວເລກ ກ່ຽວກັບ ການລັກນໍາເຂົ້າ ມາລາວ ແຕ່ຫາກມີ ຕົວເລກ ໃນການຍຶດໄດ້ ໂດຍສະເພາະ ຢາບ້າ. ທ່ານຄິດວ່າ ການໃຊ້ ຢາບ້າ ກໍາລັງເພີ່ມຂຶ້ນ ແຕ່ຍັງ ບໍ່ໄດ້ເຮັດ ການສໍາຣວດ".

ພົນຈັດຕະວາ ສີສະຫວາດ ແກ້ວມາລາວົງ ຫົວໜ້າກົມໃຫຍ່ ຕໍາຣວດ ກ່າວ ໃນກອງປະຊຸມ ແລກປ່ຽນ ຄວາມຄິດ ຄວາມເຫັນ ກ່ຽວກັບ ຂະບວນ ຍຸຕິທໍາ 4 ພາກສ່ວນ ໃນວັນທີ 24 ແລະ 25 ມົກກະຣາ ຜ່ານມາວ່າ ໃນທົ່ວປະເທດ ລາວ ມີຄະດີ ຢາເສພຕິດ ເກີດຂຶ້ນ ທັງໝົດ 1303 ເຣື່ອງ, ຍຶດຢາບ້າໄດ້ ຫລາຍທີ່ສຸດ ຄື 12 ລ້ານເມັດ ແລະ ກັນຊາແຫ້ງ 226 ພັນ 6 ຮ້ອຍ ກວ່າກິໂລ.

ຂະນະດຽວກັນ ຊາວລາວ ຜູ້ໜຶ່ງ ກໍເຫັນວ່າ ສະພາບການ ຂອງ ຢາເສພຕິດ ຢູ່ລາວ ຮຸນແຮງຂຶ້ນຕື່ມ ເພາະມີ ເຈົ້າໜ້າທີ່ ເຂົ້າກ່ຽວຂ້ອງ ແລະ ຜູ້ມີເງິນ ມາພົວພັນນໍາ:

"ຕົວເມືອງໃຫຍ່ໆ ອາດຈະມີ ເມືອງຫລວງ ພຣະບາງ ວຽງຈັນ ສວັນນະເຂດ ປາກເຊ ຊ່ວງນີ້ ຊົນນະບົດ ທຸກແຫ່ງມີ ໝົດຮຸນແຮງ ບາງພື້ນທີ່ ຕ່າງໆ ທີ່ມີມາ ທັງຈໍາໜ່າຍ ທັງຜລິດ ກໍມີທຸກແຫ່ງ ແຕ່ມີຢູ່ຢ່າງນຶ່ງ ກໍຄື ເຈົ້າໜ້າທີ່ ມີສ່ວນກ່ຽວຂ້ອງ ຖ້າໃຜ ລູກເຈົ້າ ລູກນາຍ ກໍຈັບມື້ນີ້ ມື້ອື່ນອອກ ຈາກຄຸກ".

ປັດຈຸບັນ ຢູ່ລາວ ມີຜູ້ ຕົກເປັນທາດ ຂອງ ຢາເສພຕິດ ເຖິງ 55 ພັນຄົນ ທີ່ ຄວນໄດ້ຮັບ ການບໍາບັດ ປິ່ນປົວ. ທ່ານວ່າ ເພື່ອສະກັດກັ້ນ ບັນຫາ ທຸກຄົນ ໃນສັງຄົມ ຄວນເປັນເຈົ້າການ ຮ່ວມກັນ ໂດຍເລີ່ມຈາກ ຕົວເອງ, ຄອບຄົວ ຕ້ອງເຂັ້ມແຂງ ແລະ ເຈົ້າໜ້າທີ່ ພະນັກງານ ກໍຕ້ອງເດັດຂາດ ໃນການ ກວດກາ.