ຜູ້ຕາງໜ້າ​ ຂອງ​ບໍຣິສັດ ​ທັງ​ສອງ ​ໄດ້​ລົງ​ນາມ​ ໃນ​ສັນຍາ​ສະບັບ​ນີ້ ​ເມື່ອ​ວັນ​ສຸກ ວັນ​ທີ່ 18 ​ເມສາ​ນີ້ ທີ່​ນະຄອນຫລວງ​ຮາ​ໂນ່ຍ, ປະ​ເທດ​ວຽດນາມ. ສັນຍາ​ສະບັບ​ດັ່ງກ່າວ ​ບົ່ງໄວ້​ວ່າ ບໍຣິສັດ Vatech-Hydro ຂອງ​ອອສ​ເຕຣັຍ, ຊຶ່ງ​​ເປັນປະ​ເທດ​ນຶ່ງ ​ໃນສະຫະພາບ​ຢູ​ໂຣບ ຈະ​ລົງທຶນ​ເຖິງ 42 ລ້ານ​ດອນ​ລ່າ ​ສະຫະຣັຖ​ ເພື່ອ​ຊື້​ຈັກ​ປັ່ນ​ໄຟຟ້າ ຊື້​ອຸບປະກອນ ​ແລະ ​ໃຫ້​ບໍຣິການ​ທາງ​ດ້ານ​ແທກ​ນິກ ທຸກ​ຢ່າງ ​ແກ່ບໍຣິສັດ ເຂື່ອນ​ເຊ​ກະ​ໝານ ສາມ ຊຶ່ງ​ເປັນ​ບໍຣິສັດ​ ລົງທຶນ​ຮ່ວມ ຣະຫວ່າງ​ລາວ​ ແ​ລະ ​ວຽດນາມ.

ປັດຈຸບັນ ບໍຣິສັດ​ຮ່ວມ ​ລາວ ​ແລະ ​ວຽດນາມ ນີ້ ກຳລັງ​ລົງທຶນ ສ້າງ​ເຂື່ອນ​ດັ່ງກ່າວ ຊຶ່ງ​ຈະ​ເປັນ​ເຂື່ອນຂນາດ​ກາງ ຈະ​ຜລິດ​ກະ​ແສ​ໄຟຟ້າ​ໄດ້ ​ປະມານ 250 ​ເມ​ກາ​ວັດ ​ແລະ​ ຈະສ້າງ​ໃຫ້​ສຳ​ເຣັດ​ໃນ​ປີ 2010. ຖ້າ​ສຳ​ເຣັດ​ແລ້ວ ​ໄຟຟ້າ ​ທີ່​ຜລິດ​ໄດ້​ເຖິງ 90 ສ່ວນ​ຮ້ອຍ ຈະ​ຖືກ​ສົ່ງ​ໄປ​ຂາຍ​ທີ່​ວຽດນາມ.

​ເຂື່ອນ​ເຊ​ກະ​ໝານ​ສາມ ​ເປັນ​ເຂື່ອນ​ ທີ່​ຕັ້ງຢູ່ໃນ​ເຂດ ​ເມືອງ​ດັກ​ຈຶ່ງ, ​ແຂວງ​ເຊ​ກອງ. ທາງ​ບໍຣິສັດ​ກໍ່ສ້າງ​ ຈະ​ລົງທຶນ​ ປະມານ 273 ລ້ານ​ດອນ​ລ່າ​ ສະຫະຣັຖ​ ເພື່ອ​ສ້າງ. ໃນ​ຂະນະ​ນີ້ ປະກົດ​ວ່າ ວຽດນາມ ​ມີ​ຈຸດປະສົງ ​ຢາກ​ລົງທຶນ​ສ້າງ​ເຂື່ອນ​ໄຟຟ້າ ​ຢູ່​ລາວ ຫລາຍ​ຂື້ນ. ​ເມື່ອ​ສັບປະດາ ​ທີ່​ແລ້ວ ທ່ານ ຫງຽນຊິນ​ຮຸ່ງ, ຮອງ​ນາຍົກຣັຖມົນຕຣີວຽດນາມ, ກໍ​ໄດ້​ຕິດ​ຕໍ່​ກັບ ຣັຖບານລາວ ​ເພື່ອ​ຂໍ​ລົງທືນ​ສ້າງ​ເຂື່ອນ​ ໄຟຟ້າ​ນ້ຳ​ແອດ 1, ນ້ຳ​ແອດ 2 ​ແລະ ນ້ຳ​ແອດ 3 ຢູ່​ແຂວງ​ຫົວພັນ. ​ເຂື່ອນ​ເຊ​ກະ​ໝານ​ນຶ່ງ ກໍ​ແມ່ນ​ວຽດນາມ ​ເປັນ​ຜູ້​ລົງທຶນ​ສ້າງ​ເຊັ່ນ​ກັນ.