ຕາມ​ແຜນການ​ເດີມ ທາງ​ການ​ລາວ ຈະ​ຕ້ອງ​ສົ່ງ​ເສີມ ກະ​ເສດ​ຕະກອນ​ລາວ ​ໃນ 8​ ແຂວງ​ພາກ​ເໜືອ ​ໃຫ້​ປູກ​ເຂົ້ານາ​ແຊງ​ ໃຫ້​​ໄດ້​ໃນ​ເນື້ອ​ທີ່ ທັງໝົດ ບໍ່​ຕໍ່າ​ກວ່າ 13 ພັນ 800 ​ເອັກ​ຕາຣ, ແຕ່​​ໃນ​ຕົວ​ຈີ​ງ ປາກົດ​ວ່າ ປະຕິບັດ​ໄດ້​ ໃນ​ເນື້ອ​ທີ່​ພຽງ 9950 ​ເອັກ​ຕາຣ. ທັງ​ນີ້ ​ກໍ​ເປັນ​ຍ້ອນ ຣະ​ບົບຄອງ​ຊົນລະປະທານ ບໍ່​ສາມາດ ​ຕອບ​ສະໜອງນໍ້າ​ ​ສໍາລັບ​ພື້ນ​ທີ່ ​ປູກ​ເຂົ້າ ຢ່າງ​ພຽງພໍ​ໄດ້.

ເຈົ້າໜ້າທີ່​ລາວ ກ່າວກ່ຽວກັບ ​ເຣື້ອງ​ນີ້ ​ວ່າ:

“ການສະໜອງນໍ້າ ​ສໍາລັບ​ນາ​ແຊງ ​ປີ​ນີ້ ຈະ​ບໍ່​ໄດ້​ເຕັມ​ຮ້ອຍ ​ເພາະ​ບັນຫາ ​ສະພາບ​ດິນ​ຟ້າ​ອາກາດ ມີ​ການ​ປ່ຽນ​ແປງ ນໍ້າ​ມີ​ການ​ບົກ​ແຫ້ງ ບໍຣິມາດ​ນໍ້າ ໜ້າ​ເຂື່ອນ ​ກໍ​ບໍ່ພຽງພໍ ການ​ແກ້​ໄຂ​ ເຣື້ອງ​ນໍ້າ​ພວກ​ເຮົາ ກໍ​ມີ​ວິທີ​ການ​ ໂດຍ​ສະ​ເພາະ ​ເຂດ​ຕ່າງໆ ກໍານົດ​ຂອບ​ເຂດ​ ການ​ອະນຸລັກ ​ເພື່ອ​ບໍ່​ໃຫ້​ປ່າ​ໄມ້​ຖືກ​ທໍາລາຍ.”

ການ​ບົກ​ແຫ້ງ​ລົງ ​ຢ່າງໜັກໜ່ວງ ຂອງ​ນໍ້າ ມີ​ສາ​ເຫດໂດຍ​ກົງ ມາຈາກ ການ​ຕັດ​ໄມ້ ທໍາ​ລາຍປ່າ  ຊຶ່ງ​ເປັນ​ປັດ​ໃຈ ສໍາຄັນປະການ​ນຶ່ງ ທີ່​ກໍ່​ໃຫ້​ເກີດ​ບັນຫາ ພາວະ​ໂລກຮ້ອນ ຫລື Global warming.

ແລະ ​ເຖີງ​ແມ່ນ​ວ່າ ​ເຂດ​ພາກ​ກາງ ​ແລະ ​ພາກ​ໃຕ້​ຂອງ​ລາວ ຈະ​ສາມາດ​ປູກ​ເຂົ້າ ​ແລະ​ ມີ​ຜົນ​ຜລິດ​ເຂົ້າ ​ເກີນ​ຄວາມ​ຕ້ອງການ ບໍ​ຣິ​ໂພ​ກ ​ພາຍ​ໃນກໍ​ຕາມ ​ແຕ່​ຍ້ອນຣາຄາ​ນໍ້າມັນ ​ທີ່​ແພງ​ຂຶ້ນ​ເລື້ອຍໆ​ນັ້ນ ​ເຮັດ​ໃຫ້​ບໍ່​ຄຸ້ມ​ຄ່າ​ ທີ່​ຈະ​ຂົນ​ສົ່ງ​ເຂົ້າ ​ໄປ​ຍັງ​ແຂວງ​ພາກ​ເໜືອ ​ເພາະ​ປະຊາຊົນ​ ມີ​ຣາ​ຍ​ໄດ້​ຕໍ່າ ຢູ່​ແລ້ວ​ ແລະ ບໍ່​ສາມາດ ​ທີ່​ຈະ​ຊື້​ເຂົ້າ ທີ່ຣາຄາ​ແພງ​ຂຶ້ນ ​ນັ້ນ​ໄດ້.