ຜແນກ ພາສາລາວ > ຂ່າວ > ຂ່າວລາວ > ຊາວເຜົ່າມົ້ງ

ອົງການ ສາກົນ ສະແດງຄວາມເປັນຫ່ວງ ຕໍ່ການບັງຄັບສົ່ງ ຊາວລາວເຜົ່າມົ້ງ ກັບຄືນ

ອາວະຣີ ຣາຍງານ

2008-04-21

ອົງການເນຣະໂທດກັມ ສາກົນ ເວົ້າວ່າ ການທີ່ຣັຖບານໄທ ກຳລັງຈັດສົ່ງ ຊາວລາວເຜົ່າມົ້ງ ຈາກບ້ານຫ້ວຍນ້ຳຂາວ ກັບຄືນປະເທດລາວ ຢູ່ໃນຂະນະນີ້ນັ້ນ ເປັນການລະເມີດ ກົດໝາຍ ກ່ຽວກັບສິດທິມະນຸດ ຣະຫວ່າງຊາດ.

RFA

ເຜົ່າມົ້ງ ທີ່ບ້ານຫ້ວຍນໍ້າຂາວ ຂໍຄວາມຊ່ອຍເຫລືອ ຈາກ ນາໆຊາດ

ອົງການເນຣະໂທດກັມ ສາກົນ ຊຶ່ງມີສຳນັກງານໃຫຍ່ ຢູ່ນະຄອນຫລວງລອນດອນ, ປະເທດອັງກິດ ຣາຍງານ ເມື່ອວັນຈັນນີ້ ວ່າ ຣັຖບານໄທ ມີໜ້າທີ່ ປະຕິບັດ ແລະ ນັບຖືກົດໝາຍ ເຫລົ່ານັ້ນ ແລະ ຄວນຢຸດຕິການຈັດສົ່ງ ຊາວເຜົ່າມົ້ງກັບຄືນລາວ ໂດຍທັນທີທັນໃດ.

ອົງການເນຣະໂທດກັມ ສາກົນ ກ່າວອີກວ່າ ສຳຣັບຊາວລາວເຜົ່າມົ້ງ ທີ່ຖືກກັກຂັງ ຢູ່ໄທ ແລະ ທີ່ມີສິດເປັນອົພຍົບ ຢ່າງຖືກຕ້ອງຕາມກົດໝາຍນັ້ນ, ຣັຖບານໄທ ກໍຄວນ ເບິ່ງແຍງ ພວກເຂົາເຈົ້າ ໂດຍດີ ແລະ ຄວນເປີດໂອກາດ ໃຫ້ພວກເຂົາ ໄດ້ໄປຕັ້ງຖິ່ນຖານ ຢູ່ປະເທດ ທີ່ສາມ. ອົງການເນຣະໂທດກັມ ສາກົນ ກ່າວຢ້ຳວ່າ ຣັຖບານໄທ ບໍ່ຄວນຈັດສົ່ງ ບຸກຄົນ ທີ່ຢູ່ໃນຖານະໃດກໍຕາມ ກັບຄືນໄປປະເທດ ທີ່ພວກເຂົາເຈົ້າ ຈະໄດ້ຮັບອັນຕະຣາຍ.

ເມື່ອສອງສັບປະດາ ທີ່ຜ່ານມາ, ທາງການໄທ ໄດ້ຈັດສົ່ງຊາວລາວເຜົ່າມົ້ງ ຈາກບ້ານຫ້ວຍນ້ຳຂາວ 67 ຄົນ ກັບຄືນປະເທດລາວ, ຊຶ່ງທັງເຈົ້າໜ້າທີ່ ໄທ, ລາວ ແລະ ຊາວເຜົ່າມົ້ງ ທີ່ກັບຄືນເອງ ກໍເວົ້າວ່າ ຊາວເຜົ່າມົ້ງເຫລົ່ານີ້ ກັບຄືນປະເທດລາວ ດ້ວຍຄວາມສມັກໃຈ ບໍ່ໄດ້ຖືກບັງຄັບ ແຕ່ຢ່າງໃດ.

ເມື່ອປີກາຍ ທາງການລາວ ແລະ ໄທ ຕົກລົງກັນວ່າ ຈະຮ່ວມກັນ ຈັດສົ່ງຊາວລາວ ເຜົ່າມົ້ງ ຊຶ່ງມີຢູ່ເກືອບ 8,000 ຄົນນັ້ນ ກັບຄືນປະເທດລາວ ໃຫ້ສຳເຣັດ ພາຍໃນປີ 2008 ນີ້.

ພິມເຣື້ອງນີ້ ອີເມວລ໌ ເຣື້ອງ