ຊາວເຜົ່າມມົ້ງ ຈາກບ້າຫ້ວຍນໍ້າຂາວ ຖືກສົ່ງກັບ ທ້ອງຖິ່ນເດີມ

ຫວາດ ສີມູນ ຣາຍງານ
2008-07-05

ທາງກາຣ ແຂວງວຽງຈັນ ຮັບເອົາ ຊາວເຜົ່າມົ້ງ ຈາກບ້ານ ຫ້ວຍນ້ຳຂາວ ທີ່ຖືກທາງກາຣໄທຽ ສົ່ງມອບໃຫ້ ທາງກາຣລາວ 76 ຄອບຄົວ ກັບຄືນ ທ້ອງຖີ່ນ.

ແຫ​ລ່ງຂ່າວ ​ທ້ອງ​ຖີ່​ນ ​ແຈ້ງວ່າ: ໃນ​ມື້​ວັນ​ທີ່ 2 ກໍຣະກະດາ​ນີ້​ ຢູ່​ທີ່​ ເດີ່ນ​ໂຮງຮຽນ​ ມັທຍົມ​ ປາກ​ແຈ້ງ ​ເມືອງ​ວຽງ​ຄາ ​ແຂວງ​ວຽງ​ຈັນ ໄດ້​ມີ​ພິທີ​ ມອບ​ສົ່ງ ຊາວ​ລາວ​ເຜົ່າມົ້ງ ທີ່​​ເຂົ້າ​ເມືອງ ​ຜິດ​ກົດໝາຍ ຈຳ​ນວນ 76 ຄອບຄົວ​ ຮວມ​ເປັນ ​ທັງ​ໝົດ 354 ຄົນ ຣະຫວ່າງ​ ເຈົ້າໜ້າ​ທີ່ ​ກ່ຽວຂ້ອງ ຂອງ​ໄທຽ ​ແລະ ​ຄະນະ​ອຳນາ​ຈ ກາຣປົກຄອງ ​ແຂວງ​ວຽງ​ຈັນ.

ຊາວ​ເຜົ່າ​ມົ້ງ ດັ່ງກ່າວ ​ແມ່ນ​ພາຄສ່ວນ​ ຂອງ​ຊາວ​ມົ້ງ ທີ່​ໄປ​ອາສັຍ ​ຢູ່​ເຂ​ຕ ​ບ້ານ​ຫ້ວຍ​ນ້ຳຂາວ​ ແຂວງ​ເພັຊບຸນ​ ໃນຣະຍະ​ ຜ່ານ​ມາ​ ແລະ ​ທາງ​ກາຣ​ໄທຽ ​ໄດ້​ສົ່ງ​ ກັບ​ຄືນ​ ໃຫ້​ທາງ​ກາຣລາວ ​ໃນ​ມື້ ​ວັນ​ທີ່ 22 ມີຖຸນາ​ ຜ່ານ​ມາ​ ​ໃນ​ຈຳນວນ 837 ຄົນ​​ ແລ້ວ​ທາງ​ກາຣລາວ ​ກໍ​ໄດ້​ສົ່ງ​ ຕໍ່​ໄປ ​ຍັງ​ສູນ​ຕ້ອນຮັບ ຊົ່ວຄາວ ​ທີ່​ແຂວງ​ບໍຣິຄຳ​ໄຊ ​ເພື່ອ​ໃຫ້​ຄວາມ​ແນະນຳ​ ແລະ ​ອົບຮົມ ​ເຂົາ​ເຈົ້າ ກ່ອນ​ທີ່ ​ຈະ​ຈັດ​ສົ່ງ ​ກັບ​ຄືນ​ ທ້ອງ​ຖີ່​ນ​ເດີມ​ ຂອງ​ເຂົາ​ເຈົ້າ.

ພາຍຫລັງ ​ທີ່​ທາງ​ອຳນາ​ຈ ກາຣປົກ​ຄອງ ​ແຂວງວຽງ​ຈັນ ​ໄດ້​ຮັບ​ເອົາ​ ແລ້ວ​ກໍ​ຈະ​ມີ ​ກາຣມອບ​ຕໍ່ ​ໃຫ້​ທາງ​ເຈົ້າໜ້າ​ທີ່ ​ກ່ຽວ​ຂ້ອງ ​ທ້ອງ​ຖີ່​ນ ​ເພື່ອ​ໃຫ້​ ເອົາ​ໃຈ​ໃສ່ ​ເບີ່​ງ​ແຍງ ​ແລະ ​ໃຫ້​ຄວາມ​ຊ່ວຍ​ເຫລືອ ​ໂດຽສະ​ເພາະ​ທີ່​ພັກ​ພາ ​ອາສັຍ ​ແລະ ​ດ້ານ​ອາຫາຣ ກາຣກິນ​ ຈົນ​ກວ່າ ​ເຂົາ​ເຈົ້າ ຈະ​ສາມາດ ​ຫາ​ກຸ້ມ​ຕົນ​ເອງ ​ໄດ້ ຊື່​ງ ຄາດ​ວ່າ​ ຈະ​ໄດ້​ຈັດ​ສົ່ງ ​ໄປ​ໃນ​ຫລາຍໆ ​ເຂ​ຕ​ເຊັ່ນ: ​ເມືອງ​ຊະນະ​ຄາມ 2 ຄອບຄົວ ຈຳນວນ 13 ຄົນ, ​ເມືອງ​ແມດ 2 ຄອບຄົວ​ ຈຳນວນ 9 ຄົນ, ​ເມືອງ​ກາສີ 1 ຄົນ, ​ເມືອງ​ໝື່ນ 21 ຄອບຄົວ ຈຳນວນ 82 ຄົນ, ​ເມືອງ​ເຟືອງ 19 ຄອບຄົວ ຈຳນວນ 98 ຄົນ, ​ເມືອງ​ວັງ​ວຽງ 12 ຄອບຄົວ ຈຳນວນ 63 ຄົນ, ​ເມືອງ​ໂຮມ 8 ຄອບຄົວ ຈຳນວນ 34 ຄົນ, ​ເມືອງ​ໄຊ​ສົມ​ບຸນ 4 ຄອບຄົວ ຈຳນວນ 21 ຄົນ​ແລະ​ເມືອງ​ໂພນ​ໂຮງ 7 ຄອບຄົວ ຈຳນວນ 33 ຄົນ.

ພິມເຣື້ອງນີ້      ອີເມວລ໌ ເຣື້ອງ