ຜແນກ ພາສາລາວ > ຂ່າວ > ຂ່າວລາວ > ຊາວເຜົ່າມົ້ງ

ສະຫະຣັດ ເປັນຫ່ວງ ກັບຊາວເຜົ່າມົ້ງ ຖືກສົ່ງກັບ

ໂພໄຊສວັນ ຣາຍງານ

2008-06-28

ສະມາຊິກ ສະພາສູງ ສະຫາຣັດ ຂໍໃຫ້ ສະຫາຣັດ ອະເມຣິກາ ທຳຄວາມກົດດັນ ທາງການໄທ ບໍ່ໃຫ້ສົ່ງ ຊາວລາວເຜົ່າມົ້ງ ກັບຄືນ ປະເທດ.

ສະມາຊິກ ສະພາສູງ ສະຫາຣັດ 7 ທ່ານ ຮຽກຮ້ອງໃຫ້ ຮັຖມົນຕຣີ ກະຊວງ ການຕ່າງປະເທດ ຍານາງ ຄອນໂດລີຊາ ໄຣສ ຕິດຕາມ ພົວພັນ ກັບການສົ່ງ ຊາວລາວເຜົ່າມົ້ງ ຈາກບ້ານຫ້ວຍນ້ຳຂາວ ກວ່າ 800 ຄົນ ກັບຄືນ ປະເທດລາວ ເພາະຢ້ານ ຈະຖືກປະຫັດ ປະຫານ ກັ່ນແກ້ງ.

ສະມາຊິກ ສະພາສູງ ສະຫາຣັດ ບໍ່ດີໃຈ ທີ່ທາງການໄທ ສົ່ງຊາວລາວ ເຜົ່າມົ້ງ ກັບຄືນປະເທດ ເມື່ອວັນ ອາທິດ ທີ່ຜ່ານມາ ໂດຍທີ່ ບໍ່ໄດ້ ມີການສັງເກດການ ຈາກພວກເຈົ້າໜ້າທີ່ ທີ່ເປັນກາງ. ພວກເພິ່ນ ໄດ້ສົ່ງ ເອກກະສານ ຫາ ຍານາງ ໄຣສ ເມື່ອອາທິດນີ້ ເພື່ອຂໍຮ້ອງ ໃຫ້ທຳຄວາມກົດດັນ ທາງການໄທ ໃຫ້ເຮັດຖືກຕ້ອງ ຕາມກົດ ມາດຕະຖານ ສະຫະ ປະຊາຊາດ ດ້ານສິດທິມະນຸດ.

ເອກກະສານ ດັ່ງກ່າວ ມີຂໍ້ຄວາມວ່າ ສະຖານະການ ກ່ຽວຂ້ອງ ກັບການສົ່ງ ຊາວລາວເຜົ່າມົ້ງ ກັບຄືນ ປະເທດ ນັ້ນ ບໍ່ແຈ່ມແຈ້ງ ໂປ່ງໃສ ພວກເຮົາ ຢາກຂໍຮ້ອງ ໃຫ້ທ່ານ ເຮັດທຸກ ວິທີທາງ ທີ່ຈະໄດ້ ຄວາມກະຈ່າງແຈ້ງ ວ່າ ແມ່ນຫຍັງ ເກີດຂື້ນ ໃນພິທີການ ສົ່ງພວກຂະເຈົ້າ ກັບຄືນ ປະເທດ ນັ້ນ.

ຊາວລາວເຜົ່າມົ້ງ ທີ່ຕັ້ງຖິ່ນຖານ ຢູ່ສະຫາຣັດ ກ່າວວ່າ ພວກຕົນ ຢ້ານວ່າ ພວກອົບພະຍົບ ມົ້ງລາວ ອາດຈະຖືກ ປະຫັດປະຫານ ກັ່ນແກ້ງ ແລະ ລົງໂທດ ໃນປະເທດ ຄອມມິວນິສລາວ ຊຶ່ງເປັນບ້ານເກີດ ເມືອງນອນຂອງຕົນ. ເພາະ ຊາວລາວເຜົ່າມົ້ງ ເຄີຍ ສູ້ຣົບ ຄຽງຂ້າງ ກອງທະຫານ ສະຫາຣັດ ໃນສົງຄາມ ວຽດນາມ.

ອົງການ ເພື່ອສິດທິມະນຸດ ກ່າວເມື່ອ ວັນພະຫັດ ຜ່ານມາວ່າ ການສົ່ງ ຊາວລາວເຜົ່າມົ້ງ ກັບຄືນປະເທດ ຄັ້ງນີ້ ອາດຈະມີ ຜູ້ທີ່ບໍ່ໄດ້ ສມັກໃຈ ຮວມຢູ່ນຳ ອັນນີ້ ກໍຈະຜິດຕໍ່ ກົດມາດຕະຖານ ສິດທິ ມະນຸດ ສາກົນ.

ໂຄສົກ ຂອງກະຊວງ ການຕ່າງປະເທດໄທ ກ່າວວ່າ ຊາວລາວເຜົ່າມົ້ງ ກວ່າ 800 ຄົນ ກັບຄືນ ປະເທດດ້ວຍຄວາມສມັກໃຈ. ແຕ່ກຸ່ມຊ່ອຍເຫຼືອ ດ້ານມະນຸດ ສະຍະທັມ, ພວກແພດ ບໍ່ມີພົມແດນ ຊ້ຳພັດ ເຊື່ອຄືກັນກັບ ຄະນະ ສະມາຊິກ ສະພາສູງ ສະຫາຣັດ ທີ່ວ່າ ຊາວລາວເຜົ່າມົ້ງ ກວ່າ 800 ຄົນ ນີ້ ອາດຈະຖືກ ບັງຄັບໃຫ້ກັບຄືນ.

ພິມເຣື້ອງນີ້ ອີເມວລ໌ ເຣື້ອງ