ຕັ້ງ​ແຕ່ ທາງ​ການ​ລາວ ​ແລະ ​ໄທ ມີ​ມະ​ຕິ ສົ່ງ​ຊາວ​ເຜົ່າມົ້ງລາວ ບ້ານ​ຫ້ວຍ​ນໍ້າ​ຂາວ ກັບ​ຄືນ ສປປລາວ​, ​ໃນ​ນັ້ນ ຈໍານວນ​ນຶ່ງ ຖືກ​ສົ່ງ​ໄປ ​ບ້ານ​ພັທນາ ຜາ​ຫລັກ, ຊຶ່ງ ​​​ທາງ​ການ​ລາວ ກໍ​ໄດ້​ຮັບຮອງ ​ໃຫ້​ເປັນ ປະຊາຊົນ​ລາວ ​ໂດຍ​ສົມບູນ​ ​ແລະ  ​​ອອກ ບັດປະ​ຈໍາ​ໂຕ ປະຊາຊົນ ​​​ໃຫ້.

​ທ່ານ ລາວ​ເປົ໋າ ຊົ໋ງ, ປະທານບ້ານ​ ບ້ານ​ພັທນາ​ຜາ​ຫລັກ, ​ແຂວງວຽງ​ຈັນ, ​ໃຫ້ຣາຍລະອຽດ ວ່າ:

“ຂະ​ເຈົ້າ ກໍ​ມີ​ບັດ​ປະຊາຊົນ ​ເປັນ​ພົລ​ເມືອງ​ລາວ ​ແລ້ວ, ​ແຕ່​ວ່າ 15 ປີ ຂຶ້ນ​ໄປ ​ເພິ່ນ​ຈະ​ອອກ​ບັດ​ໃຫ້​ໝົດ​ ​ເນາະ, ຂະ​ເຈົ້າ ມີ​ສິດ​ປິ່ນປົວ ຄື ພົລ​ເມືອງ​ລາວ​ແລ້ວ ມີ​ສິດທິ ສ​ເມີ​ພາບ ຕໍ່ໜ້າ​ກົດໝາຍ​ແລ້ວ ປັດຈຸບັນ.”

ຊາວ​ມົ້ງ ທີ່​ຖືກ​ສົ່ງ​ໄປ ​ບ້ານ​ພັທນາ​ຜາ​ຫລັກ, ປັດຈຸບັນ ມີ 11 ຄອບຄົວ, ມີ​ຈໍານວນ 63 ຄົນ, ຊຶ່ງ​ອໍານາດ​ການ​ປົກ​ຄອງ ທ້ອງ​ຖິ່ນ ປະ​ຈໍາ​ແຂວງ ​ຮັບຮອງ​ວ່າ ​ເປັນ​ພົລ​ເມືອງລາວ ​ແລະ ເຮັດ​ບັດປະ​ຈໍາ​ໂຕ ​ໃບ​ໃໝ່ ​ໃຫ້​ແກ່ ຜູ້​ທີ່​ມີ​ອາຍຸ 15 ປີ ຂຶ້ນ​ໄປ. ທ່ານ ກ່າວ​ຕື່ມ​ວ່າ:

“ດຽວ​ນີ້ ​ເພິ່ນ​ກໍ​ອອກ​ບັດ ​ໃຫ້​ແລ້ວ​ດ ຂະ​ເຈົ້າ ກໍ​ໄປມາຫາ​ສູ່​ກັນ ຢ່າງ​ຖືກຕ້ອງ ຫລື ວ່າ ຄ້າຂາຍ ຫລື​ວ່າ ຂະ​ເຈົ້າ ​ໄປ​ເຮັດ​ການ ບໍຣິການ​ອື່ນໆ ​ໄດ້​ຕາມ​ສະບາຍ ປັດຈຸບັນ.”