ຍານາງ Jennifer Pagonis ​ໂຄສົກ ​ຂອງ​ອົງກາຣ ສະຫະ​ ປະຊາ​ຊາຕ ດ້ານ​ຜູ້​ອົພຍົບ ຫລື UNHCR ​ໃຫ້​ຄຳ​ເຫັນ ​ດັ່ງກ່າວ ​ຕໍ່​ທາງ​ສື່​ມວລຊົນ ​ຢູ່ນະຄອນ​ Geneva ​ໃນ​ມື້​ວັນ​ທີ່ 27 ມີ​ຖຸນາ​ນີ້ ​ກ່ຽວ​ກັບ​ ເຣື່ອງທີ່​ທາງ​ກາຣ​ໄທຽ ​ໄດ້​ສົ່ງ​ ​ຊາວ​ເຜົ່າ​ມົ້ງ ຈຳນວນ 837 ຄົນ​ ຄື​ນ​ໃຫ້​ແກ່ ​ທາງ​ກາຣ ສປປລາວ ​ໃນ​ມື້​ວັນ​ອາທິດ​ຜ່ານ​ມາ ​ທີ່​ອາຈ​ເຮັດ​ໃຫ້ ​ບາງ​ຄອບຄົວ​ ຕ້ອງ​ໄດ້​ພັດ​ພາກ ​ຈາກ​ກັນ.

ຍານາງ Pagonis ​ໄດ້​ກ່າວ​ເນັ້ນ ວ່າ: ທາງ UNHCR ​ເປັນ​ຫ່ວງ​ນຳ ​ບັນດາ​ ຜູ້ນໍາ ໃນ​ກຸ່ມ​ຊາວ​ມົ້ງ 8 ຄົນ​ ພ້ອມ​ກັບ ຄອບຄົວ​ ຮວມ​ເປັນ​ ທັງ​ໝົດ 18 ຄົນ​ ດ້ວຍ​ກັນ ​ທີ່​ປາກົດ​ ຖືກ​ບັງຄັບ​ ໃຫ້ກັບ​ຄືນ​ເມືອງ​ລາວ ​ພ້ອມ​ກັບ ​ຄະນະ​ທັງ​ໝົດ​ນັ້ນ.

ພ້ອມ​ດຽວ​ກັນ​ນີ້ ​ທາງ​ໂຄສົກ ​ຂອງ​ກະຊວງ ​ກາຣຕ່າງປະ​ເທດ ​ຂອງ​ໄທຽ ກໍ​ຢືນຢັນ​ວ່າ ​ຊາວ​ເຜົ່າ ມົ້ງທັງ​ໝົດ ​ທີ່​ກັບ​ຄືນ ​ປະ​ເທດ​ລາວ ​ໃນ​ວັນ​ອາທິດ​ນັ້ນ ​ແມ່ນ​ໄປ​ດ້ວຍ ​ຄວາມ​ສະມັກ​ໃຈ ​ແລະ ​ວ່າ ​ມີ​ແຕ່​ ພວກ​ທີ່​ກໍ່​ຄວາມ​ວຸ້ນວາຍ ​ຫລື​ ສ້າງ​ຄວາມ​ປັ່ນ​ປ່ວນ ​ເທົ່າ​ນັ້ນ ທີ່​ອາຈຖືກ ​ເນຣະ​ເທດ ​ແລະ ​ນອກຈາກ​ນັ້ນ ກໍ​ຍັງ​ມີ​ຕື່ມ​ອີກ ​ບໍ່​ຕໍ່າ​ກວ່າ 6,000 ຄົນ​ ທີ່​ວ່າ ​ພໍ​ໃຈ ​ແລະ ​ພ້ອມ​ແລ້ວ ​ທີ່​ຈະ​ກັບ​ຄືນ ​ປະ​ເທດລາວ ​ເຊັ່ນ​ກັນ.