ຫວ່າງ​ມໍ່ໆ ມາ​ນີ້​​ ເຈົ້າໜ້າ​ທີ່ ຣະດັບ​ສູງ ​​ກະຊວງ​ ແຮງ​ງານ ​ແລະ ​ສວັດດີກາຣ ສັງຄົມ ຂອງ​ລາວ ​ແລະ​ໄທຽ ​ໄດ້​ຮ່ວມ​ປະຊຸມ ​ຢູ່​ນະ​ຄອນ​ຫລວງ​ ວຽງ​ຈັນ ​ເພື່ອ​ປຶກສາ​ຫາຣື ​ເຣື່ອງກາຣພິສູດ ​ສັນ​ຊາຕ ​ແຮງ​ງານ​ຊາວ​ລາວ ​ທີ່​ລັກລອບ ​ເຂົ້າ​ໄປ ​ຫາ​ເຮັດ​ວຽກ​ງານ ​ຢູ່​ປະ​ເທດ​ໄທຽ ​ຢ່າງ​ບໍ່​ຖືກຕ້ອງ ​ຕາມ​ກົດໝາຍ ຊື່​ງທັງ​ສອງຝ່າຍ ​ເຫັນ​ພ້ອມ ​ທີ່​ຈະ​ໃຫ້ ​ມີ​ກາຣພິສູດ​ ກັນ​ໃໝ່​ອີກ​ຕື່ມ ​ຄັ້ງໜື່ງ ​ແລະ ​ຄາດ​ວ່າ ​ຈະ​ໃຫ້​ແລ້ວ​ເສຣັຈ ພາຍ​ໃນ ​ເດືອນ​ມີ​ຖຸນາ 2009 ທີ່​ຈະ​ມີ​ເຖີງນີ້ ​ແລະ ຣາຍລ​ະອຽດ ​ໃນ​ກາຣປະຕິບັຕ ວຽກ​ງານ​ນັ້ນ ທາງ​ເຈົ້າໜ້າ​ທີ່​ ສະ​ເພາະ​ກິ​ຈ ທັງ​ສອງ​ຝ່າຍ ​ຈະ​ໄດ້​ປະຊຸມ​ກັນ​ ໃນ​ເດືອນ​ກໍຣະກະດາ ​ນີ້​ເພື່ອ​ກຳໜົດ​ ວັນ​​ເວລາ​ແລະ​ ສະຖານ​ທີ່​ ເພື່ອ​ຈະ​ໄດ້ ​ປະກາດ​ ໃຫ້​ບັນດາ​ ນາຍ​ຈ້າງ ​ໃຫ້​ຄວາມ​ຮ່ວມ​ມື ​ຕໍ່​ໄປ.

ທາງ​ເຈົ້າໜ້າ​ທີ່ ​ກ່ຽວຂ້ອງ​ ຝ່າຍ​ໄທຽ ​ກໍ​ໄດ້​ ເປີດ​ເຜີຽ ​ວ່າ: ​ບັນດາ ແຮງ​ງານ ​ຊາວ​ລາວ ​ທີ່ເຮັດ​ວຽກ ​ຢູ່​ປະ​ເທດ​ໄທຽ ຢ່າງ​ຖືກຕ້ອງ ​ຕາມ​ກົດໝາຍ​ ມີພຽງ ປະມານ 6,500 ຄົນ ​​ເທົ່າ​ນັ້ນ ​ແລະ ​ສ່ວນ​ທີ່​ໄດ້​ໄປ ຣາຍງານ​ຕົວ ​ກັບ​ທາງ​ກາຣ​ໄທຽ ​ແລ້ວ ​ແຕ່​ຍັງ​ບໍ່​ທັນ ​ໄດ້​ຮັບ ​ກາຣພິສູດ​ ສັນ​ຊາຕ ​ເທື່ອນັ້ນ ມີທັງ​ໝົດປະມານ 14,000 ຄົນ.

ເຖີງຢ່າງ​ໃດ ​ກໍ​ຕາມ ​ໃນ​ເມື່ອ ​ຈຳນວນ​ທັງ​ໝົດ ​ດັ່ງກ່າວ​ ຫາກຜ່ານ​ ກາຣພິສູດ​ສັນ​ຊາຕ ຄັ້ງ​ໃໝ່​ນີ້ ​ແລ້ວນັ້ນ ກໍ​ຈະ​ເຮັດ​ໃຫ້ ​ເຂົາ​ເຈົ້າ ທັງ​ໝົດ​ ເປັນ​ແຮງ​ງານ ​ທີ່​ຖືກຕ້ອງ​ ​ແລະ​ ຈະ​ໄດ້​ຮັບ ​ຄວາມ​ຄຸ້ມ​ຄອງ​ຕາມ​ກົດໝາຍ ​ຂອງ​ໄທຽ.