ປະທານ​ ສະພາ​ແຫ່ງ​ຊາດ​ລາວ ສ​ເນີ ​ໃຫ້ຣັຖບານ​ ​ເອົາ​ໃຈ​ໃສ່ ​ແກ້​ໄຂບັນຫາ​ ການ​ສໍ້ຣາຊບັງ​ຫລວງ ຫລາຍ​ຂຶ້ນ ​ເພາະ​​ເຫັນ​ວ່າ ຍັງ​ເປັນ​ຫາ ​ທີ່ໜັກໜ່ວງ ​ໃນ​ສປປລາວ.

ການ ສໍ້ຣາຊບັງ​ຫລວງ ​ຍັງ​ເປັນ​ບັນຫາ ທີ່ ໜັກໜ່ວງ ​ແລະ ມີ​ຢ່າງ​ແຜ່​ຫລາຍ ຢູ່​ສປປລາວ ​ໂດຍ​ທີ່ທາງ​ການ ບໍ່​ສາມາດແກ້​​ໄຂ​ ໃຫ້​ລຸດຜ່ອນ​ລົງ​ໄດ້​ເທື່ອ ມາຮອດປັຈຸ​ບັນ​ນີ້. ດັ່ງ​ນັ້ນ​ ທາງຣັຖບານ ຈຶ່ງ​ຄວນ​ເອົາ​ໃຈ​ໃສ່ ຫລາຍ​ຂຶ້ນ​ຕື່ມ ​ເພື່ອ​ແກ້​​ໄຂ, ຕາມ​ຄໍາ​ເວົ້າ​ຂອງ ທ່ານ ທອງ​ສີ​ງ ທໍາ​ມະ​ວົງ ປະທານ ​ສະພາ​ແຫ່ງ​ຊາດ ​ຕໍ່ກອງ​ປະຊຸມ​ສພາ ​ແຫ່ງ​ຊາດ ສມັຍ​ສາມັນ​ຄັ້ງ​ທີ 7 ຂອງ​ສະພາ​ແຫ່ງ​ຊາດ ຊຸດ​ທີ 6 ​ໃນ​ມື້​ທີ 5 ຂອງ​ກອງ​ປະຊຸມ​.  ທ່ານ​ກ່າວ​ໃນ​ຕອນ​ນຶ່ງ​ວ່າ:

”​ແມ່ນ​ຢາກ​ໃຫ້ ຣັຖບານ ​ເອົາ​ໃຈ​ໃສ່ ຕື່ມ​ອີກ ​​ໃນ​ການຕາມ​ການ​ສໍ້ຣາຊ ບັງ​ຫລວງ ​ເພາະວ່າ ບັນຫາ​ນີ້ ຍັງ​ເປັນ​ບັນຫາ ທີ່​ແຜ່​ລາມ ​ອັນໜັກ ສົມຄວນ.”

ກ່ອນໜ້ານີ້ ​ໄດ້​ມີ​ ການ​ອອກ​ກົດໝາຍ ອອກ​ຂໍ້​ກໍານົດ ກ່ຽວກັບ​ ການ​ຕ້ານ ການ​ສໍ້ຣາຊບັງ​ຫລວງ ​ແຕ່​ກໍ​ປາກົດ​ວ່າ ການ​ສໍ້ຣາຊບັງ​ຫລວງ ຍັງ​ມີ ​ຢ່າງ​ແຜ່​ຫລາຍ ຢູ່​ຕໍ່​ໄປ.  ດັ່ງ​ນັ້ນ ທາງ​ສະມາ​ຊິກ​ສະພາ ຈຶ່ງ​ຢາກ​ຈະ​​ໃຫ້ ​ມີ​ການປະຕິບັດ​ ຕາມ​ກົດໝາຍ ທີ່​ໄດ້​ອອກ​ນັ້ນ ຢ່າງ​ຈິງ​ຈັງ​ ​ເຂັ້ມ​ງວດ ​ແລະ ມີ​ປະສິດທິພາບ. ປະຊາຊົນ ​ໃນ​ເຂດ​ແຂວງ​ວຽງຈັນ ທ່ານ​ນຶ່ງ ກ່າວ​ໃຫ້​ຄໍາ​ເຫັນ ​ກ່ຽວກັບ ບັນຫາ​ນີ້​ວ່າ:

”ປະຕິບັດ ຖື​ວ່າ ​ມັນ​ກໍ​ຍັງ ບໍ່​ທັນ​ໄດ້ ຮັບຜົນ ​ເທົ່າ​ທີ່​ຄວນ ວ່າ ​ທົ່ວ​ໄປ​ ມັນ​ກໍຍັງ​ມີ ​ບາງ​ກໍຣະນີ ທີ່​ເກີດ​ຂຶ້ນ ​ແຕ່​ວ່າ​ຜ່ານ​ມາ ທາງຣັຖບານ​ລາວ ກໍ​ໄດ້​ແກ້​​ໄຂ ມາ​ຫລາຍ​ ພໍ​ສົມຄວນ ​ແຕ່​ວ່າ ​ຄິດ​ວ່າ ມັນ​ກໍ​ຍັງ ບໍ່​ທັນ ​ໄດ້​ມີ​ປະສິດທິ​ຜົລ ​ເທົ່າ​ທີ່​ຄວນ​ເທື່ອ.”

ປະຊາຊົນ​ລາວ ທ່ານ​ນີ້ ຍັງ​ກ່າວ​ຕື່ມ​ວ່າ ບັນຫາ​ ການ​ສໍ້ຣາຊບັງ​ຫລວງ ຖື​ເປັນ​ບັນຫາ​ໃຫຍ່​ທີ່ ​ເກີດ​ຂຶ້ນ ​ໃນ​ທຸກ​ປະ​ເທດ ​ເນື່ອງ​ຈາກ ​ມີ​ຫລາຍ​ວິທີ ​ໃນ​ການ​ສໍ້ຣາຊບັງ​ຫລວງ ແລະ ​ກໍ​ເປັນ​ບັນຫາ​ທີ່ ​ເກີດ​ຂຶ້ນ​ ໃນ​ຫລາຍຂ​ແນ​ງການ ​ຫລາຍ​ພາກສ່ວນ ຫລາຍ​ເຂດ ດັ່ງ​ນັ້ນ ຈຶ່ງ​ເປັນ​ການ​ຍາກ ​ທີ່​ຈະແກ້​​ໄຂ ​ແລະ ​ໃຊ້​ເວລາ ຫລາຍ​ສົມຄວນ.

ຄວາມເຫັນ

ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.