ການສໍາຣວດ ພື້ນທີ່ ຕາຝັ່ງເຈື່ອນ ເຂດກໍາແພງນະຄອນ
ມະນີຈັນ ຣາຍງານ
2008-11-20
ກົມໂຍທາ ທິການ ເລີ່ມລົງສໍາຣວດ ພື້ນທີ່ ຕາຝັ່ງເຈື່ອນ ໃນເຂດ ນະຄອນຫລວງວຽງຈັນ ຂະນະທີ່ ປະຊາຊົນ ໃນພື້ນທີ່ ຍັງບໍ່ມີ ຄວາມໝັ້ນໃຈ ໃນໂຄງການ.
ຕາຝັ່ງ ແຄມຂອງ ບ້ານເກົ້າລ້ຽວ ເຈື່ອນ ຢ່າງໜ້າວິຕົກ
ເປັນທີ່ແນ່ນອນແລ້ວວ່າ ໜ່ວຍງານຮັບຜິດຊອບ ການປ້ອງກັນຕາຝັ່ງເຈື່ອນ ໃນເຂດນະຄອນຫລວງວຽງຈັນ ມີແຜນການ-ກັ້ນຕະລິ່ງເຈື່ອນ ຊຶ່ງແຜນການກໍ່ສ້າງທັງໝົດ ມີ 12 ຈຸດ 3 ຫລັກກິໂລແມັດນັ້ນ ຍັງຢູ່ໃນຂັ້ນຕອນ ລົງສໍາຣວດ. ທ່ານ ບົວຜັນ ເທດດາວັນ ຮອງຫົວໜ້າຫ້ອງການ ໂຄງການ ປ້ອງກັນ ຕາຝັ່ງເຈື່ອນ ເຜີຍເຖິງ ແຜນການ ກໍ່ສ້າງນັ້ນວ່າ:
“ກໍາລັງ ອອກແບບສໍາຣວດ ໃນປັດຈຸບັນນີ້ ຍັງບໍ່ທັນໄດ້ ລະອຽດ ພໍເທື່ອ ແລ້ວໃຫ້ ນະຄອນຫລວງ ເປັນຜູ້ຈັດຕັ້ງ ປະຕິບັດ.”
ຈຸດທີ່ ຈະກໍ່ສ້າງນັ້ນ ແຍກອອກ ເປັນ 2 ຊ່ວງ ຄື ຊ່ວງ 2 ຈຸດ 3 ກິໂລແມັດ-ແຕ່ບໍຣິເວນ ປາກປ່າສັກ-ເຖິງຫາດດອນຈັນ ແລະ ອີກຊ່ວງນຶ່ງ ແມ່ນຈາກ ປາກປ່າສັກ-ເຖິງເກົ້າລ້ຽວ-ເຖິງພື້ນທີ່ ວັດຖໍ້າພຣະ ໂດຍໃຊ້ທຶນ ຂອງເກົາຫລີໃຕ້ 32 ລ້ານ ໂດລາສະຫະຣັດ.
ກ່ຽວກັບ ແຜນການ ປ້ອງກັນຕາຝັ່ງເຈື່ອນນີ້ ປາກົດວ່າ ປະຊາຊົນ ເຂດເກົ້າລ້ຽວ ໂດຍໄປແລ້ວ ກໍຮູ້ພໍລວມໆ ຫາກບໍ່ຮູ້ ລາຍລະອຽດ:
“ເປັນໂຄງການແທ້ ຍັງບໍ່ທັນຮູ້ວ່າກໍຖືວ່າບໍ່ມີໂຄງການກັນເຈື່ອນ ບໍ່ມີທຶນມາຊ່ວຍເຫລືອ ເພາະວ່າມັນຝົນຕົກນະ ແລ້ວມັນມີນໍ້າຖ້ວມ ນໍ້າຫຍັງມັນກໍໄຫລລົງມາ ດິນຊາຍກໍເຈື່ອນລົງເລີຍ.”
ເລື່ອງບັນຫາ ແຄມຂອງພັງ-ຕາຝັ່ງເຈື່ອນນີ້ ປາກົດວ່າ ບໍ່ມີແຕ່ ໃນເຂດນະຄອນ ຫລວງວຽງຈັນ ເທົ່ານັ້ນ ທີ່ປະເຊີນ ແຕ່ພື້ນທີ່ ທາງເຂດ ແຂວງພາກເໜືອ ຂອງລາວ ເຊັ່ນບໍ່ແກ້ວ ກໍປະເຊີນ ບັນຫາ ດິນແຄມຂອງເຈື່ອນ ຂ້ອນຂ້າງໜັກ ເຊັ່ນກັນ ຊຶ່ງສົງໃສກັນວ່າ ສ່ວນນຶ່ງ ອາດມີສາເຫດ ມາຈາກເຂື່ອນ ທີ່ສ້າງໃສ່ແມ່ນໍ້າຂອງ ຕອນເທິງ ແລະ ການຣະເບີດແກ່ງຫີນ ຂອງຈີນ ເຮັດໃຫ້ນໍ້າ ຂອງໄຫລແຮງ ຣະດັບນໍ້າ ຂຶ້ນ-ລົງ ບໍ່ປົກກະຕິ ດິນແຄມຂອງ ເຈື່ອນລົງ ຢ່າງໄວວາ ແລະ ສົ່ງຜົນກະທົບກະເທືອນ ຕໍ່ຊີວິດ ການເປັນຢູ່ ແລະ ບ້ານເຮືອນ ຂອງປະຊາຊົນ ຕາມແຄມແມ່ນໍ້າຂອງ.
Social Media
ຄວາມເຫັນ
ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.
ເບິ່ງຄວາມເຫັນທັງໝົດ.