ນັກລົງທຶນ ຕ່າງປະເທດ ບໍ່ໝັ້ນໃຈ ການສັມປະທານ ທີ່ດິນ
ຈະເຣີນສຸກ ຣາຍງານ
2008-06-11
ນັກລົງທຶນຕ່າງປະເທດ ສົນໃຈ ເຂົ້າໄປລົງທຶນ ການທ່ອງທ່ຽວ ໃນແຂວງສວັນນະເຂດ ແຕ່ມີບັນຫາ ຄວາມບໍ່ຊັດເຈນ ເຣື້ອງສັມປະທານ ທີ່ດິນ ຈາກຣັຖບານ.
ມີນັກທຸຣະກິດ ຕ່າງປະເທດຫລາຍຄົນ ສົນໃຈ ລົງທຶນ ທີ່ດິນ ໃນແຂວງສວັນນະເຂດ ເພື່ອພັທນາ ດ້ານການທ່ອງທ່ຽວ ແລະ ບໍຣິການ, ໂດຍສະເພາະ ທຸຣະກິດ ໂຮງແຮມ, ຮ້ານອາຫານ ແລະ ປັ້ມນໍ້າມັນ. ແຕ່ສ່ວນຫລາຍ ນັກທຸຣະກິດ ເຫລົ່ານັ້ນ ກັບບໍ່ມີຄວາມໝັ້ນໃຈ ເຣື້ອງການເຊົ່າ ແລະ ສັມປະທານ ທີ່ດິນວ່າ ພາກຣັຖ ຈະດໍາເນີນ ການຈັດສັນ ໃຫ້ໄດ້ ຫລືບໍ່.
ເຈົ້າໜ້າທີ່ ກ່ຽວຂ້ອງ ຈາກຫ້ອງການທ່ອງທ່ຽວ ແຂວງສວັນນະເຂດ ໃຫ້ຣາຍລະອຽດ ວ່າ:
“ດຽວນີ້ ກໍມີ ບາງພາກສ່ວນ ຜູ້ສົນໃຈ ເຣື້ອງຢາກເຮັດໂຮງແຮມ ມີທັງ ອັອສເຕຣເລັຍ ແລະ ກໍມີນັກລົງທຶນ ພາຍໃນອີກ ຈໍານວນນຶ່ງ ໃຫ້ຄວາມສົນໃຈຫລາຍຢູ, ແຕ່ເຮົາ ຍັງຄາ ເຣື້ອງການຈັດສັນ ທີ່ດິນ ໃຫ້ຍັງບໍ່ທັນໄດ້ສໍາເຣັດ ດັ່ງນັ້ນ ເພິ່ນກໍຍັງ ລໍຖ້າຄໍາຕອບ ຢ່າງເປັນທາງການ ກັບເຣື້ອງຣັຖບານ ຢູ່.”
ການທີ່ຣັຖບານ ປະກາດ ໂຈະ ການໃຫ້ສັມປະທານ ທີ່ດິນ ແກ່ນັກລົງທຶນນັ້ນ, ເຮັດໃຫ້ນັກລົງທຶນ ບາງກຸ່ມ ເຣີ້ມຖົກຖຽງ ແລະ ກັບໄປຄິດທົບທວນ ເຣື້ອງການໃຫ້ສັມປະທານ ທີ່ດິນ ຂອງຣັຖ ອີກຄັ້ງ. ເຖິງຢ່າງໃດ ກໍຕາມ, ຫ້ອງການທ່ອງທ່ຽວ ແຂວງ ມີຄວາມໝັ້ນໃຈ ວ່າ ນັກລົງທຶນ ຈະບໍ່ປ່ຽນໃຈ, ໂດຍສະເພາະ, ການລົງທຶນ ພັທນາທຸຣະກິດ ທ່ອງທ່ຽວ, ເພາະວ່າ ຫ້ອງການທ່ອງທ່ຽວ ໄດ້ເຊີນ ນັກລົງທຶນ ຫລາຍຄົນ ເຂົ້າໄປຢ້ຽມຊົມ ພື້ນທີ່, ພ້ອມທັງ ເຊີນຊວນ ໃຫ້ໄປລົງທຶນ ເພື່ອເປັນການປັບປຸງ ແລະ ຫາຜົນກໍາໄລ.
“ພວກເພິ່ນ ກໍໃຫ້ຄວາມສົນໃຈຢູ່ເນາະ ມີແຕ່ ລໍຖ້າເບິ່ງ ທາງເມືອງທາງແຂວງ ເສັດສິ້ນ ໃນການຈັດສັນແລ້ວ ເພາະ ພວກເຮົາ ກໍສືບຕໍ່ ປະຕິບັດຕາມ ເບິ່ງແຜນທີ່ ພວກເຮົາ ທີ່ວາງໄວ້ ຈະມີການປັບປຸງ ຄືແນວໃດ.”
ສະເພາະ ເຣື້ອງການລົງທຶນ ທຸຣະກິດ ໃນແຂວງສວັນນະເຂດ, ປັດຈຸບັນ
ນັກທຸຣະກິດ ໃຫ້ຄວາມສົນໃຈກັນ ຫລາຍຂຶ້ນ, ໂດຍສະເພາະ ໂຄງການ ສວັນ ເວກັສ ທີ່ເປັນໂຮງແຮມ
ແລະ ກາຊີໂນ, ກໍາລັງຈະເປີດ ໃຫ້ບໍຣິການ ໃນອານະຄົດ ຂ້າງໜ້ານີ້, ຊຶ່ງຈະກາຍເປັນ
ຈຸດດຶງດູດ ສໍາຄັນ ທີ່ເຮັດໃຫ້ນັກລົງທຶນ ຊາດອື່ນໆ ໃຫ້ຄວາມສົນໃຈ ລົງທຶນ
ໃນແຂວງສວັນນະເຂດ ຫລາຍຂຶ້ນ.
Social Media
ຄວາມເຫັນ
ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.
ເບິ່ງຄວາມເຫັນທັງໝົດ.