ຂໍ້ຂັດແຍ່ງທີ່ດິນ ບ.ພອນໄຊ

ມະນີຈັນ
2017-07-21
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
ທາງການລາວ ເວົ້າວ່າດິນຢູ່ ບ້ານພອນໄຊ ເມືອງຫລວງພຣະບາງ ທີ່ປະຊາຊົນ 55 ຄອບຄົວ ອາໃສຢູ່ນັ້ນ ເປັນດິນຂອງບໍຣິສັດ ບຸນທ່ຽງ ດວງປະເສິດ
ທາງການລາວ ເວົ້າວ່າດິນຢູ່ ບ້ານພອນໄຊ ເມືອງຫລວງພຣະບາງ ທີ່ປະຊາຊົນ 55 ຄອບຄົວ ອາໃສຢູ່ນັ້ນ ເປັນດິນຂອງບໍຣິສັດ ບຸນທ່ຽງ ດວງປະເສິດ
Citizen Journalist

ເຈົ້າໜ້າທີ່ອໍານາດການປົກຄອງ ຢູ່ເມືອງຫລວງພຣະບາງ ທ່ານນຶ່ງ ເວົ້າວ່າ ດິນ ຢູ່ບ້ານພອນໄຊ ເມືອງຫລວງພຣະບາງ ທີ່ ປະຊາຊົນ 55 ຄອບຄົວ ອາສັຍຢູ່ ໂດຍບໍ່ມີ ໃບຕາດິນນັ້ນ ເປັນດິນຂອງ ບໍຣິສັດ ບຸນທ່ຽງ ດວງປະເສີດ ມາຕັ້ງແຕ່ປີ 2005 ແຕ່ໄດ້ມີ ການບຸກລຸກທີ່ດິນ ແລະ ມີຕົວແທນ ບໍຣິສັດ ເຂົ້າໄປເຈຣະຈາ ກັບ ປະຊາຊົນ ຫລາຍຄັ້ງແລ້ວ ແຕ່ຕົກລົງກັນບໍ່ໄດ້:

"ດິນນັ້ນເປັນດິນ ອອກໃບຕາດິນ ໃຫ້ບໍຣິສັດບຸນທ່ຽງ ດວງປະເສີດ ມາຕັ້ງແຕ່ 2005 ແລ້່ວບໍຣິສັດ ສງວນປ່ານັ້ນໄວ້ ແລ້ວກໍມີ ປະຊາຊົນ ພະນັກງານ ບໍ່ທັນບໍານານ ເຂົ້າມາ ບຸກລຸກ ກໍພຍາຍາມເຄລັຽກັນ 5 ປີແລ້ວ ບໍ່ລົງລອຍ ຂະເຈົ້າ ບໍ່ຍອມໜີ ແລ້ວຈໍານວນ ທີ່ມາປຸກຕູບ ປຸກຫຍັງໃສ່ ບໍ່ມີເອກສານ ຫຍັງ ນໍາເຊົ່າທີ່ດິນ ຈັກໜ່ອຍ"

ທ່ານກ່າວຕື່ມວ່າດຽວນີ້ ທາງບໍຣິສັດ ຕ້ອງການເອົາທີ່ດິນ ສ້າງໂຮງງານ ແຕ່ກໍຍັງບໍ່ທັນ ມີການຕົກລົງ ກັນໄດ້ ເຣື່ອງຄວາມເສັຽຫາຍ ແລະ ການຊົດເຊີຍ. ແຕ່ກ່ອນ ບໍຣິສັດ ບຸນທ່ຽງ ດວງປະເສີດ ມີທີ່ດິນ ຫຼາຍຕອນ, ຕອນນຶ່ງ ເປັນຕອນບ່ອນ ມະຫາວິທຍາລັຍ ສຸພານຸວົງ ຕັ້ງຢູ່ ໃນປັດຈຸບັນນີ້. ໃນເວລານັ້ນ ຣັຖບານ ຢາກໄດ້ດິນຕອນດັ່ງກ່າວ ເພື່ອສ້າງມະຫາວິທຍາລັຍ ຣັຖບານຈຶ່ງ ແລກປ່ຽນທີ່ດິນ ໂດຍເອົາທີ່ດິນ ຕອນນີ້ ແລ້ວຍົກທີ່ດິນ ບໍຣິເວນ ບ້ານພອນໄຊ ທັງເຮັດ ໃບຕາດິນ ຢ່າງຖືກຕ້ອງ ໃຫ້ແກ່ ບໍຣິສັດ ບຸນທ່ຽງ ດວງປະເສີດ. ເຈົ້າໜ້າທີ່ ອະທິບາຍ ເພີ່ມວ່າ:

"ດິນຕອນນີ້ນັ້ນໝາຍວ່າ ລາວ ຊື້ຈໍານວນນຶ່ງແລ້ວ ກໍພາກຣັຖ ຊົດເຊີຍລາວ ດິນລາວ ຖືກມະຫາວິທຍາລັຍ ສຸພານຸວົງ ແລ້ວລາວໄປຂໍນໍາ ເຈົ້າແຂວງ ຊົດເຊີຍເອົາດິນ ແລ້ວມາ ໄດ້ດິນຢູ່ບ້ານເຮົານີ້ ແລ້ວລາວກໍໄດ້ຊື້ດິນ ທີ່ຖືກຕ້ອງຕາມກົດໝາຍ ຢູ່ບ້ານເຮົານີ້ ປະມານ ກວ່າ ຮ້ອຍເຮັກຕາ ຢູ່ພຸ້ນລະ".

ເຮືອນຂອງປະຊາຊົນທີ່ຖືກ ທາງບໍຣິສັດ ເຂົ້າມ້າງນັ້ນມີ 10 ປາຍຫລັງ, ຈໍານວນນຶ່ງ ເປັນເຮືອນຂອງ ພະນັກງານ ບໍານານ, ຈໍານວນນຶ່ງ ເປັນເຮືອນຂອງທະຫານ ແລະອີກ ຈໍານວນນຶ່ງ ເປັນເຮືອນຂອງປະຊາຊົນ ທີ່ຍ້າຍມາຢູ່ ໂດຍບໍ່ໄດ້ແຈ້ງໃຫ້ ທາງອໍານາດ ການປົກຄອງ ບ້ານຊາບ.

ສປປລາວ ມີການຂັດແຍ່ງ ທີ່ດິນຫລາຍ ເກືອບວ່າທຸກບ້ານທຸກເມືອງ ສ່ວນຫລາຍ ກໍເປັນຂໍ້ຂັດແຍ່ງ ຣະຫວ່າງ ອໍານາດ ການປົກຄອງ ທ້ອງຖິ່ນ ແລະ ປະຊາຊົນ.

ດັ່ງນັ້ນ ທາງກະຊວງຊັພຍາກອນ ທັມຊາດແລະ ສິ່ງແວດລ້ອມ ຈຶ່ງເປີດສາຍດ່ວນ 1514 ເພື່ອໃຫ້ ປະຊາຊົນ ໂທໄປແຈ້ງບັນຫາ ກ່ຽວກັບ ຂໍ້ຂັດແຍ່ງ ໃນເຣື່ອງທີ່ດິນ ໄດ້ໂດຍກົງ.

ເຕັມຫນ້າ