ແມ່ຍິງລາວຄ້າຢາບ້າ ມີເພີ້ມຂື້ນ

ມີແມ່ຍິງລາວ ເຂົ້າກ່ຽວຂ້ອງ ເຣື້ອງກໍ່ ອາສຍາກັມ ເພີ່ມຂຶ້ນເລື້ອຍໆ ໂດຍສະເພາະ ການຄ້າ ຢາເສພຕິດ.
ມະນີຈັນ
2013-02-15
ອີແມວລ໌
ຄໍາເຫັນ
ໃຊ້ຮ່ວມກັນ
ພິມ
  • ພິມ
  • ໃຊ້ຮ່ວມກັນ
  • ຄໍາເຫັນ
  • ອີແມວລ໌
F-drugs
ການສະແດງ ດົນຕຣີ ຮ້ອງເພງ ຕ້ານ ຢາເສພຕິດ ທີ່ ນະຄອນຫຼວງ ວຽງຈັນ ປີ 2011
UNODC

ເຈົ້າໜ້າທີ່ ກອງບັນຊາການ ປ້ອງກັນ ຄວາມສງົບ ໃນນະຄອນຫລວງ ວຽງຈັນ ຜູ້ຂໍສງວນຊື່ ທ່ານນຶ່ງ ໄດ້ເປີດເຜີຍຕໍ່ RFA ວ່າມີ ແມ່ຍິງລາວ ເຂົ້າກ່ຽວຂ້ອງ ກັບການກໍ່ ອາສຍາກັມ ເພີ່ມຂຶ້ນ ຢ່າງຕໍ່ເນື່ອງ ໂດຍສະເພາະ ໃນເຂດ ນະຄອນຫລວງ ວຽງຈັນ ຊຶ່ງເປັນເຂດ ທີ່ມີການກໍ່ ອາສຍາກັມ ຫລາຍທີ່ສຸດ.

ຕາມຣາຍງານ ການຈັບກຸມ ພວກລັກລອບ ຄ້າ ຢາເສພຕິດ ມີແມ່ຍິງລາວ 407 ຄົນ ຖືກຈັບໄດ້ ໃນຈໍານວນ ຜູ້ຕ້ອງຫາ ທີ່ຖືກຈັບ ທັງໝົດ 2129 ຄົນ ໃນຊ່ວງຫລັງ 6 ເດືອນ ຂອງປີ 2012, ຖ້າປຽບທຽບ ກັບຣະຍະ 6 ເດືອນ ຂອງຕົ້ນປີ ດຽວກັນ ມີແມ່ຍິງລາວ ພຽງ 76 ຄົນ ທີ່ຖືກຈັບ ຍ້ອນຄ້າ ຢາເສພຕິດ ຈຶ່ງເຫັນໄດ້ວ່າ ແມ່ຍິງລາວ ກ່ຽວຂ້ອງ ກັບການຄ້າ ຢາເສພຕິດ ເພີ່ມຂຶ້ນ ຫຼາຍກວ່າ 5 ເທົ່າ, ສິ່ງທີ່ໜ້າ ເປັນຫ່ວງ ກໍຄື ໃນກຸ່ມ ທີ່ຖືກຈັບໄດ້ ນັ້ນສ່ວນໃຫຍ່ ແມ່ນວັຍລຸ້ນ ອາຍຸສະເລັ່ຽ ຕໍ່າກວ່າ 18 ປີ, ພາກັນຮວມຕົວ ເປັນກຸ່ມແກ້ງ ກໍ່ອາສຍາກັມ ແບບເກງຢ້ານ ຕໍ່ກົດໝາຍ.

ສໍາລັບ ແມ່ຍິງລາວ 407 ຄົນ ທີ່ຖືກ ຈັບໄດ້ນັ້ນ ສ່ວນໃຫຍ່ ກໍແມ່ນ ສະມາຊິກ ຂອງ 20 ແກ້ງ ທີ່ເປັນເຄືອຂ່າຍ ຂະບວນການ ຄ້າຢາເສພຕິດ ທັງໃນໄທ ພະມ້າ ກໍາພູຊາ ວຽດນາມ ແລະ ຈີນ. ເຈົ້າໜ້າທີ່ ຍຶດຂອງກາງໄດ້ ເປັນຢາບ້າ 12 ລ້ານ ກວ່າ ເມັດ, ຝີ່ນ 199 ກິໂລກຣາມ ແລະ ກັນຊາແຫ້ງ ອັດເປັນແທ່ງ 2266 ກິໂລກຣາມ.

ທ່ານວ່າ ບໍ່ສາມາດ ບອກຊື່ ກຸ່ມແກ້ງ ເຫົ່ລານັ້ນໄດ້ ແລະດຽວນີ້ ກໍມີການ ຮ່ວມມື ກັບຝ່າຍ ໄທ ວຽດນາມ ແລະຈີນ ໃນການ ຕິດຕາມ ແລະ ກວດລ້າງ.