ཕྱི་ཟླ་ ༡༠ ཚེས་ ༣༡ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་དུ་མི་མང་བརྒྱ་ཕྲག་དུ་མར་མཇལ་ཁ་བསྩལ་བའི་སྐབས། རྒྱ་གར་གྱི་གློག་བརྙན་འཁྲབ་སྟོན་པ་སྭ་ཡྭ་ནི་གྷུཔ་ཏ་ལགས་ཀྱིས་མཇལ་ཁ་ཞུས་ཡོད་ཅིང་། ད་རེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མཇལ་བ་ནི་ཕྱི་ལོ་ ༢༠༡༧ ལོར་རྡ་སར་གློག་བརྙན་དུས་སྟོན་ཞིག་ཏུ་བཅར་ཏེ་༧གོང་ས་༧སྐྱབས་མགོན་ཆེན་པོ་མཆོག་མཇལ་ཁ་ཐོབ་པའི་རྗེས་ད་རེས་མཇལ་ཁ་ཐེངས་གཉིས་པ་ཡིན་འདུག་ལ། སྐབས་དེར་ཁོང་༧གོང་ས་མཆོག་གི་ཕེབས་ལམ་ཟུར་ནས་མཇལ་ཁ་ཞུས་པ་དང་སྐབས་དེར་མིག་ཆུ་དབང་མེད་དུ་ཤོར་ཡོད་པའི་མྱོང་ཚོར་སྐོར་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྗོད་བྱུང་།

(AFP)

ཁོང་གིས་ད་དུང་མུ་མཐུད་གསུངས་དོན་དུ། དེ་སྔ་ལོ་ ༡༠ གོང་མཇལ་ཁ་ཐོབ་པའི་སྐབས་སུ་འཕྲུལ་སྣང་ངོ་མཚར་ཆེ་བའི་ཚོར་སྣང་ཞིག་བྱུང་སྐོར་གསུངས་བྱུང་ལ། ད་རེས་མཇལ་ཁ་ཐེངས་གཉིས་པ་ཐོབ་པའི་སྐབས། ༧གོང་ས་༧སྐྱབས་མགོན་ཆེན་པོ་མཆོག་གིས་ཁོང་གི་གདོང་ལ་བྱུག་བྱུག་གནང་སྟེ་ཐུགས་བརྩེ་ཆེན་པོའི་ངང་བྱིན་གྱིས་རླབས་པའི་ཚོར་སྣང་བརྗོད་སྐབས། “ངས་ངོ་གདོང་མི་འཁྲུད་སྙམ་ཚོར་གྱི་འདུག ཧ་ཅང་བྱིན་རླབས་ཆེན་པོ་ཐོབ་བྱུང་” ཞེས་གསུངས་བྱུང་།

ཁོང་གིས་ད་དུང་། ༧གོང་ས་མཆོག་གི་སྐུ་ཟིལ་བ་ཁྲོམ་མེའི་འོད་སྣང་འདིའི་འོག སྐབས་འགར་ཚིག་གིས་བརྗོད་མི་ཐུབ་པའི་ཚོར་བ་དེ་བྱུང་ཞེས་དང་། ཁོང་ད་དུང་ཉུང་མཐར་ལོ་ངོ་ ༡༠༠ སྐུ་ཚེ་བརྟན་པར་སྨོན། འགྲོ་བ་མིའི་རིགས་ལ་༧གོང་ས་མཆོག་དགོས་མཁོ་མཆིས། འཛམ་གླིང་གོ་ལ་འདིར་དགོས་མཁོ་ཡོད་པས། སྐུ་ཁམས་གསལ་ཐང་ཡོང་བར་སྨོན་ལམ་ཞུ་གི་ཡོད་ཅེས་གསུངས་བྱུང་།

སཱ་ཡཱ་ནི་ གྷུཔ་ཏ་ལགས་ནི་རྒྱ་གར་གྱི་གློག་བརྙན་དང་དྲ་ཐོག་བརྙན་རིམ་གྲགས་ཅན་ཁག་ཏུ་འཁྲབ་རྩལ་སྣ་མང་བཏོན་པའི་བུད་མེད་འཁྲབ་སྟོན་པ་ཞིག་རེད། ཁོང་མོས་རྒྱ་གར་གྱི་གློག་བརྙན་དང་བརྙན་འཕྲིན་སྦྱོང་བརྡར་ཁང་ (Film and Television Institute of India) ནས་འཁྲབ་རྩལ་གྱི་སྦྱོང་བརྡར་མཐར་ཕྱིན་ཡོད། ཁོང་མོས་ Margarita with a Straw དང་ Article 15 དེ་བཞིན་ Axone ལྟ་བུའི་གློག་བརྙན་གྲགས་ཅན་ནང་དུ་འཁྲབ་སྟོན་བྱས་པ་མ་ཟད། དྲ་ཐོག་བརྙན་རིམ་ Four More Shots Please! དང་ Delhi Crime སོགས་ནང་དུའང་འཁྲབ་སྟོན་བྱས་ཡོད།།

(AFP)

ཁ་སྣོན་གསར་འགོད། བཀྲ་དབང་།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

(འབྲུག་རྒྱལ་མཆོག ངོ་དེབ་བརྒྱུད།)

ད་རེས་འབྲུག་རྒྱལ་ཁབ་ཀྱིས་ཇི་ལྟར་གདན་ཞུ་གསོལ་འདེབས་ཞུས་པ་ལྟར། དཔལ་ས་སྐྱ་༧གོང་མ་ཁྲི་ཆེན་རིན་པོ་མཆོག་དང་གདུང་སྲས་ཁྲི་འཛིན་རྣམ་པ། སྒྲུབ་བརྒྱུད་བསྟན་པའི་གཙུག་རྒྱན་དཔལ་༧རྒྱལ་དབང་ཀརྨ་པ་རིན་པོ་ཆེ་མཆོག་དང་། ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་༧སྐྱབས་རྗེ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག སྔ་འགྱུར་རྙིང་མའི་བླ་ཆེན་རྣམ་པ། ༧སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་རྡོ་རྗོ་སློབ་དཔོན་༧ངག་དབང་ཆོས་ཀྱི་སྣང་བ་མཆོག་མཆོག་བཅས་ཀྱིས་དབུས་པའི་རྒྱལ་ཁབ་ ༡༨ ཙམ་ནས་ནང་བསྟན་གྱི་བླ་སྤྲུལ་དང་། མཁན་པོ། ཆོས་ཕྱོགས་ཀྱི་སྐྱེས་ཆེན་བརྒྱ་སྐོར་ཞིག་གདན་འཛོམས་ཏེ་ཕྱི་ཟླ་ ༡༡ ཚེས་ ༡ ཉིན་འབྲུག་རྒྱལ་ཁབ་ཀྱི་དགེ་ལེགས་ཕུག་དྲན་ཤེས་གྲོང་ཁྱེར་གྱི་ཁྲོམ་ཁར་ཞོགས་པ་ཆུ་ཚོད་ ༣ ནས་ཕྱི་དྲོ་ཆུ་ཚོད་ ༣ བར་བྱང་ཆུབ་མཆོད་རྟེན་ ༡༠༨ ལྷན་ཅིག་ཏུ་བཞེངས་སྐྲུན་གྱི་ལས་འཆར་དེར་རབ་གནས་བྱིན་གྱིས་རླབས་གནང་གི་ཡོད་པ་དང་། འདི་ནི་བོད་བརྒྱུད་ནང་བསྟན་གྱི་བསྟན་བདག་བླ་ཆེན་རྣམ་པ་དང་ཆོས་རྒྱུད་རིས་མེད་ཀྱི་དབུ་ཁྲིད་བླ་ཆེན་རྣམས་པ་འདི་ལྟར་འབྲུག་ཆོས་ལྡན་གྱི་རྒྱལ་ཁབ་ནང་གདན་འཛོམས་རྒྱུའི་གཞི་རྒྱ་ཆེ་བའི་ཆོས་ཕྱོགས་ཀྱི་མཛད་རིམ་ཞིག་དང་སྔར་བྱུང་མྱོང་མེད་པའི་ལོ་རྒྱུས་ཀྱི་རང་བཞིན་ལྡན་པ་ཞིག་ཏུ་གྱུར་ཡོད་པ་རེད།

མཆོད་རྟེན་ ༡༠༨ བཞེངས་སྐྲུན།

༢༠༢༦ ཟླ་ ༡༡ ཚེས་ ༡ ཉིན་འབྲུག་དགེ་ལེགས་ཕུག་དྲན་ཤེས་གྲོང་རྡལ་དུ་༧མི་དབང་འབྲུག་རྒྱལ་མཆོག་དང་ཆོས་རྒྱུད་རིས་མེད་ཀྱི་བླ་ཆེན་རྣམ་པ་དབུ་བཞུགས་ཐོག་མཆོད་རྟེན་བཞེངས་སྐྲུན་གནང་ཡོད་པ་རེད།

ཁ་སྣོན། མཆོད་རྟེན་བཞེངས་སྐྲུན་གྱི་བརྙན་ཐུང་། ༢༠༢༦།༡༡།༠༡

པར་ལེན་དང་བརྙན་པར་སྒྲིག་སྦྱོར་བ། འཕྲིན་ལས་ཆོས་སྒྲོན། (འབྲུག་དགེ་ལེགས་ཕུག་ནས།)

བརྙན་ཐུང་སྒྲིག་སྦྱོར་བ། བཀྲ་དབང་།

འབྲེལ་ཡོད་གནས་ཚུལ།

དཔལ་༧རྒྱལ་དབང་ཀརྨ་པ་མཆོག་འབྲུག་ཡུལ་དུ་ཞབས་སོར་འཁོད་པ།

(མཚུར་ཕུ་བླ་བྲང་།)

དཔལ་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འབྲུག་ཡུལ་དུ་ཕྱི་ཟླ་ ༡༠ ཚེས་ ༣༠ ཉིན་ཞབས་སོར་འཁོད་ཡོད་ཅིང་། ཇི་ལྟར་གདན་འདྲེན་ཞུས་པ་ལྟར་འབྲུག་སྤ་གྲོ་ཤེས་རིག་མཐོ་སློབ་ཏུ་ནང་ཆོས་དང་འབྲེལ་བའི་གསུང་བཤད་གནང་འདུག་པ་མ་ཟད་། རིན་པོ་ཆེ་མཆོག་གིས་སྤ་གྲོ་སྐྱིད་ཆུ་ལྷ་ཁང་དུ་གནས་གཟིགས་གནང་འདུག

སྤ་གྲོ་ཤེས་རིག་མཐོ་སློབ་ཏུ་གསུང་བཤད་གནང་པའི་སྐབས་དཔལ་༧རྒྱལ་དབང་ཀརྨ་པ་རིན་པོ་ཆེ་མཆོག་གིས། “གསང་སྔགས་རྡོ་རྗེ་ཐེག་པའི་རྒྱལ་ཁབ་གཅིག་མ་གཏོགས་མེད་པ་འདི་དཔལ་ལྡན་འབྲུག་གི་རྒྱལ་ཁབ་འདི་ཡིན་པ་དང་། ༧མི་དབང་མངའ་བདག་རིན་པོ་ཆེ་ཡབ་སྲས་ཀྱི་བཀའ་དྲིན་ལ་བརྟེན་ནས་འབྲུག་གི་ནང་སེམས་ཀྱི་བདེ་སྐྱིད་རེད། ཕྱི་དངོས་པོའི་ཡར་རྒྱས་རེད། གང་ཅིའི་ཐོག་ནས་གཞན་དང་མི་འདྲ་བ་ཞིག་ཡོད་པ་འདི་ཚང་མས་མཁྱེན་གྱི་ཡོད་རེད། དེ་འདྲ་ཡིན་དུས། ང་རང་ཚོ་འབྲུག་གི་མི་སེར་ལ་སྐྱེས་པ་ཙམ་གྱིས་རང་བཞིན་གྱི་ང་ཚོས་རྒྱུན་དུ་གཤོད་བསྡད་པའི་དལ་འབྱོར་གྱི་ལུས་རྟེན་འདི་དལ་བ་བརྒྱད་དང་འབྱོར་བ་བཅུ་ཚང་བསྡད་པ་གཅིག དམ་པའི་ཆོས་སྒྲུབ་རྒྱུ་དང་དཀར་པོའི་དགེ་བའི་ལས་ལ་འཇུག་རྒྱུའི་མཐེུན་འཛོམས་ཡག་མེད་ན་མ་གཏོགས་འཛོམས་བསྡད་པ། འདི་འདྲ་གཅིག་གི་ཁོར་ཡུག་བཟང་པོ་ཟེར་ནའང་འདྲ། འདི་འདྲའི་རྒྱལ་ཁབ་རྩ་ཆེན་པོ་གཅིག་ལ་སྐྱེས་པ་འདི་ཁྱེད་རང་ཚོ་ཚང་མས་སྤོབས་པ་བྱེད་འོས་པ་གཅིག་དང་། གཅེས་སྤྲས་བྱ་འོས་པ་ཞིག་ཆགས་ཀྱི་ཡོད་རེད་བསམ་གྱི་འདུག་” ཅེས་གསུངས་འདུག

(Karmapa via FB)

ད་རེས་འབྲུག་རྒྱལ་ཁབ་ཀྱིས་ཇི་ལྟར་གདན་ཞུ་གསོལ་འདེབས་ཞུས་པ་ལྟར། སྒྲུབ་བརྒྱུད་བསྟན་པའི་གཙུག་རྒྱན་དཔལ་༧རྒྱལ་དབང་ཀརྨ་པ་རིན་པོ་ཆེ་མཆོག་དང་། ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་༧སྐྱབས་རྗེ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གིས་དབུས་པའི་བོད་བརྒྱུད་ནང་བསྟན་གྱི་བསྟན་བདག་བླ་ཆེན་རྣམ་པ་ཕྱི་ཟླ་ ༡༡ ཚེས་ ༡ ཉིན་འབྲུག་རྒྱལ་ཁབ་ཀྱི་དགེ་ལེགས་ཕུག་དྲན་ཤེས་གྲོང་ཁྱེར་གྱི་ཁྲོམ་ཁར་ཞོགས་པ་ཆུ་ཚོད་ ༣ ནས་ཕྱི་དྲོ་ཆུ་ཚོད་ ༣ བར་བྱང་ཆུབ་མཆོད་རྟེན་ ༡༠༨ ལྷན་ཅིག་ཏུ་བཞེངས་སྐྲུན་གྱི་ལས་འཆར་དེར་རབ་གནས་བྱིན་གྱིས་རླབས་ཕྱིར་ཆེད་ཕེབས་གནང་པ་ཞིག་ཡིན་པ་དང་། འདི་ནི་བོད་བརྒྱུད་ནང་བསྟན་གྱི་བསྟན་བདག་བླ་ཆེན་རྣམ་པ་འདི་ལྟར་འབྲུག་ཆོས་ལྡན་གྱི་རྒྱལ་ཁབ་ནང་གདན་འཛོམས་རྒྱུའི་གཞི་རྒྱ་ཆེ་བའི་ཆོས་ཕྱོགས་ཀྱི་མཛད་རིམ་ཞིག་དང་སྔར་བྱུང་མྱོང་མེད་པའི་ལོ་རྒྱུས་ཀྱི་རང་བཞིན་ལྡན་པ་ཞིག་ཏུ་གྱུར་ཡོད་པ་རེད།།

(Karmapa via FB)

ཁ་སྣོན་གསར་འགོད། བཀྲ་དབང་།

བརྙན་པར་སྒྲིག་སྦྱོར་བ། འཕྲིན་ལས་ཆོས་སྒྲོན།

ཕྱི་ཟླ་ ༡༠ ཚེས་ ༢༩ དགོང་དྲོ་ཕྱག་ཚོད་ ༨་༡༥ ཙམ་ལ་འབྲུག་ཡུལ་ནང་གིས་རི་བོ་ཝ་ཀི་ལའི་ཤམ་འོག་དུ་ཆགས་པའི་ཤིན་ཏ་ཕུའི་འཁྱགས་རོམ་གི་མཚོ་ཆུང་གད་ནས་འབྲུག་ཡུལ་ནང་གི་སྒ་ས་དང་སྤུ་ན་ཁ་རྫོང་ཁོངས་སུ་གློ་བུར་དུ་ཆུ་ལོག་གི་གནོད་འཚེ་བྱུང་ནས་ཟམ་པ་ཁག་ཅིག་ཆུས་འཁྱེར་བ་དང་། སྡོད་ཁང་མང་པོར་གནོད་འཚེ་བྱུང་ན་ཡང་། མིའི་ཚེ་སྲོག་ཤོར་བའི་གནས་ཚུལ་གང་ཡང་བྱུང་མེད་པ་འབྲུག་རྒྱལ་ཡོངས་ཆུ་དཔྱད་དང་གནམ་གཤིས་དཔྱད་རིག་ལས་ཁུངས་ (Bhutan’s National Center for Hydrology and Meteorology and Sarpang Dzongkhag) ཀྱི་འབྲེལ་ཡོད་ལས་བྱེད་ཀརྨ་བསྟན་འཛིན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་ལ། ཀརྨ་བསྟན་འཛིན་ལགས་ཀྱིས། “ད་རེས་ཆུ་ལོག་གིས་རྐྱེན་པས་གནོད་འཚེ་ཆེན་པོ་བྱུང་མ་སོང་ལ་མིའི་ཚེ་སྲོག་ཡང་ཤོར་མ་སོང་། ཆུ་ལོག་བྱུང་ཡུལ་ས་གནས་དང་དགེ་ལེགས་ཕུག་རྫོང་གཉིས་ཀར་ཁ་ཕྱོགས་ཁག་ཁག་ཡིན་དུས་ཆུ་ལོག་རྒྱུག་ཡུལ་དེ་ད་ལྟ་མཆོད་རྟེན་ ༡༠༨ བཞེངས་སའི་ས་ཆ་ནས་ཐག་རིང་པོ་ཆགས་ཀྱི་ཡོད་པ་རེད་“ ཅེས་གསུངས་སོང་།

ཡང་རང་གི་བདེ་འཇགས་ཆེད་མཚན་བརྗོད་འདོད་མེད་པའི་ས་གནས་ཡུལ་མི་ཞིག་གིས། ཆུ་ལོག་གིས་དོན་རྐྱེན་བྱུང་མ་ཐག་འབྲེལ་ཡོད་ལས་བྱེད་ཚོས་ཆུ་རྒྱུག་ཡུལ་གྱི་གཤམ་འོག་ཏུ་གནས་སྡོད་བྱེད་མཁན་ཡུལ་མི་ཚོར་ས་མཐོ་ས་དང་བཙན་སར་གནས་སྤོ་བྱ་དགོས་པའི་ཉེན་བརྡ་བཏང་ཡོད་པ་མ་ཟད།འབྲུག་གཞུང་དང་རྒྱ་གར་ནུབ་སྦང་གྷལ། ཨ་སམ་མངའ་སྡེ་གཞུང་ཕྱོགས་ནས་ཀྱང་དུས་ཐོག་ཏུ་ཆུ་ལོག་གི་ཤུགས་ཚད་དང་དེའི་གནོད་སྐྱོན་ཐད་དཔྱད་ཞིབ་གནང་མུས་ཡིན་འདུག

དེ་བཞིན་འབྲུག་གི་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་དང་འབྲུག་གི་སྲིད་བློན་ཚེ་རིང་སྟོབས་རྒྱལ་རྣམ་གཉིས་ནས་ཀྱང་ཆུ་ལོག་གི་གནོད་འཚེ་ཕོག་ཡུལ་ས་ཁུལ་ཁག་དུ་གཟིགས་ཞིབ་གནང་ཡོད་འདུག

ད་ལྟའི་ཆར་ཆུ་ལོག་གིས་རྐྱེན་པས་ས་རུད་དང་གཞུང་ལམ་ཆད་པ། དེ་བཞིན་འབྲུག་སྤུ་ན་ཁ་ནང་ལྕག་ཟམ་གཉིས་ཆུས་འཁྱེར་པ་ཙམ་ལས་མིའི་ཚེ་སྲོག་ཤོར་བའི་གནས་ཚུལ་གཅིག་ཀྱང་བྱུང་མི་འདུག

འབྲུག་དགེ་ལེགས་ཕུར་བོད་པའི་བླ་ཆེན་རྣམ་པ་གདན་འཛོམས་ཏེ་མཆོད་རྟེན་ ༡༠༨ བཞེངས་གསོལ་གྱི་མཛད་སྒོ་ཚོགས་ཡུལ་ནི་ཆུ་ལོག་བྱུང་ཡུལ་ནས་ཁ་ཕྱོགས་གཞན་དུ་ཡོད་པས་ཁུལ་དེར་ཕེབས་ལམ་སོགས་ལ་གནོད་འཚེ་གང་ཡང་བྱུང་མི་འདུག

ཁ་སྣོན་གསར་འགོད། སྒྲོལ་དཀར།

བརྙན་པར་སྒྲིག་སྦྱོར་བ། པ་སངས་ཚེ་རིང་།

ཀུ་རུཀ་ཤེ་ཏྲ་ས་ཚིགས་སུ་བདེན་པའི་རྒྱལ་ཁ་ཐོབ་པར་བོད་ལའང་དེ་བཞིན་འབྱུར་བར་དམིགས་ཏེ་རྡ་ས་ནས་ས་གནས་དེའི་བར་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་སོང་།

གཞུང་འབྲེལ་མ་ཡིན་པའི་ཚོགས་པ་ལྔ་སྟེ། དབུས་གཙང་ཆོལ་ཁ་དང་། མདོ་སྟོད་ཆོལ་ཁ། མདོ་སྨད་ཆོལ་ཁ། བོད་ཀྱི་བུད་མེད་ལྷན་ཚོགས། རྒྱལ་སྤྱིའི་དབུ་མའི་ལམ་གྱི་མི་མང་ལས་འགུལ་ཁང་བཅས་ཐུན་མོང་གིས། རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་དེར་ངོ་རྒོལ་དང་ཕྱིར་བསྡུ་ཡོང་བའི་གནོན་ཤུགས་སྤྲོད་ཆེད། བཞུགས་སྒར་རྡ་ས་ནས་རྒྱ་གར་གྱི་ཧར་ཡ་ན་མངའ་སྡེའི་ནང་གི་ལོ་རྒྱུས་རང་བཞིན་ལྡན་པའི་ས་ཚིགས་ཏེ་ཀུ་རུཀ་ཤེ་ཏྲ་ (Kurukshetra) བར་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་སོང་།

དབུས་གཙང་ཆོལ་ཁའི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་ཀྱིས། མ་ཧཱ་བྷ་རཏ་ཞེས་རྒྱ་གར་གྱི་ཧིན་དྷུའི་ལོ་རྒྱུས་སུ་གྲགས་པའི་བདེན་པ་དང་བདེན་པ་མིན་པའི་གནད་དོན་དང་འབྲེལ་བའི་རྒྱལ་སྲིད་ཀྱི་དམག་འཁྲུག་སྐབས་ Pandava སྤུན་ལྔ་པོས་བདེན་པ་མ་ཡིན་པའི་ཕྱོགས་སུ་འཐབ་སྟེ་བདེན་པའི་རྒྱལ་ཁ་ཐོབ་པ་ལྟར། དབུ་མའི་ལམ་གྱི་ཞི་བའི་ལས་འགུལ་དེའི་བརྒྱུད་བདེན་པའི་རྒྱལ་ཁ་ཐོབ་པར་མཚོན་ཆེད་དུ་ཀུ་རུཀ་ཤེ་ཏྲ་ (Kurukshetra) གྲོང་ཁྱེར་གྱི་ས་ཚིགས་དེར་ལས་འགུལ་མཇུལ་སྒྲིལ་གནང་གི་ཡོད་ཅེས་གསུངས་བྱུང་།

མི་རིགས་མཐུན་གྱི་ཁྲིམས་ལ་ངོ་རྒོལ།

དབུ་མའི་ལམ་མི་མང་ལས་འགུལ་ཁང་གི་ཚོགས་གཞོན་བསྟན་འཛིན་བཤེས་གཉེན་ལགས་ཀྱིས། ཉེ་ལམ་བོད་ནང་དགེ་རྒན་ཆེན་མོ་གནང་མྱོང་བ་དང་། བོད་ཀྱི་སློབ་གསོ་བ་དང་སྤྱི་ཚོགས་རིག་པའི་ཆེད་ལས་འབུམ་རམས་པ་རྒྱལ་ལོ་ལགས་ཀྱིས་བཅར་འདྲ་ཞིག་གི་བརྒྱུད། ཟླ་བ་གསུམ་གྱི་ནང་ཚུན་དུ་རྒྱ་ནག་གཞུང་གིས་ཁྲིམས་ཡིག་དེའི་འོག བོད་པའི་ཕྲུ་གུ་གཅིག་གི་ངོ་བོ་རྩ་བརླག་གིས་རྒྱ་སྒྱུར་ཐུབ་ཚེ། མི་རིགས་ཤིག་ལ་མཚོན་ན་ཧ་ཅང་ཛ་དྲག་གི་གནས་ཚུལ་ཞིག་ཡིན་ཞེས་གསུངས་པ་བཞིན། ལས་འགུལ་དེའི་བརྒྱུད་ང་ཚོས་རྒྱ་ནག་གཞུང་ལ་ངོ་རྒོལ་དང་ཁྲིམས་ཡིག་དེ་མཚམས་འཇོག་དགོས་པ་ཞུ་རྒྱུ། དེ་བཞིན་རྒྱ་གར་མི་སེར་དང་རྒྱལ་སྤྱིའི་སྤྱི་ཚོགས་ཀྱིས་ང་ཚོའི་ལས་འགུལ་ལ་དོ་སྣང་དང་རྒྱབ་སྐྱོར་གྱིས་ང་ཚོའི་ཚབ་ཞུས་ཏེ་རྒྱ་ནག་ལ་རེ་སྐུལ་གནང་རོགས་ཞུ་རྒྱུ་ཡིན་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

དབུས་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་ལས་འགུལ་དེའི་བརྒྱུད་རྒྱ་གར་གྱི་ས་གནས་ཆེ་ཆུང་འདྲ་མིན་ཁག་བརྒྱུད་གོམ་བགྲོད་གནང་སྐབས། དེའི་ནང་གི་དཔོན་རིགས་ཁག་དང་མཇལ་འཕྲད་ཀྱིས་བོད་དོན་ཞུ་གཏུག་གནང་རྒྱུ་ཡིན་པ་གསུང་གི་འདུག

ལས་འགུལ་དེའི་ནང་མཉམ་ཞུགས་གནང་མཁན་ཁྱོན་མི་གྲངས་ ༣༥ འདུག་པ་དང་། དེའི་ནང་ནས་དགུང་ལོ་མཐོ་ཤོས་ ༧༢ དང་ཆུང་ཤོས་ ༢༤ ཆགས་ཀྱི་ཡོད་འདུག ལས་འགུལ་དེ་བཞིན་ཕྱི་ཟླ་ ༡༠ ཚེས་ ༣༠ ཉིན་གྱི་སྔ་དྲོར་སྲིད་སྐྱོང་སྤེན་པ་ཚེ་རིང་ལགས་ཀྱིས་དབུ་འབྱེད་གནང་ཐོག མི་རིགས་མཐུན་སྒྲིལ་གྱི་ཁྲིམས་དེར་ཚོགས་སྒེར་ཚང་མས་རྒྱལ་སྤྱིའི་ཁྲོད་གོ་རྟོགས་ཀྱི་ལས་འགུལ་སྤེལ་དགོས་པ་ནན་བརྗོད་གནང་སོང་།།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

བོད་ནང་གི་དགོན་པ་ཆེ་གྲས་རྫ་སེར་ཤུལ་དགོན་དུ་རྒྱ་ནག་གཞུང་གིས་དགོན་པའི་དགེ་འདུན་པ་ཉུང་དུ་གཏོང་རྒྱུ་དང་གྲྭ་ཤག་༢༠༠ ཙམ་གཏོར་བཤིག་གཏོང་བའི་གནས་ཚུལ་ཐད་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ལན་འདེབས་གནང་པའི་ནང་། ཨ་རིས་རྒྱ་ནག་ལ་བོད་ཀྱི་ཆོས་ལུགས་དང་འབྲེལ་བའི་འཚོ་བ་ལ་ཐེ་གཏོགས་བྱེད་རྒྱུ་མཚམས་འཇོག་དགོས་པའི་སྐུལ་མ་བྱེད་ཀྱི་ཡོད་པ་བརྗོད་ཅིང་། བྱ་སྤྱོད་དེས་རྒྱ་ནག་གཞུང་གིས་ཆོས་ཕྱོགས་ཀྱི་ཚོགས་སྡེ་དང་ཆོས་ལུགས་ཀྱི་ཤེས་ཡོན་སྡེ་ཁག དེ་བཞིན་དགོན་པའི་ནང་གི་འཚོ་བ་ལ་གཞུང་གི་སྟངས་འཛིན་འོག་ཏུ་འཇུག་རྒྱུའི་འབད་བརྩོན་བྱེད་ཀྱི་ཡོད་པ་མངོན་གསལ་ཡིན་པ་ཕྱི་ཟླ་ ༡༠ ཚེས་ ༢༩ བརྗོད་བྱུང་།

ད་དུང་མགྲིན་ཚབ་པས་རྒྱ་ནག་གཞུང་གིས་རྫ་སེར་ཤུལ་དགོན་པའི་དགེ་འདུན་པའི་སྡོད་ཁང་གཏོར་བརླག་བཏང་ནས་དགེ་འདུན་པའི་གྲངས་འབོར་ལ་ཚད་བཀག་གཏོང་རྒྱུའི་འཆར་གཞི་ཡོད་པའི་གནས་ཚུལ་དེར་སེམས་འཚབ་ཆེན་པོ་བྱེད་ཀྱི་ཡོད་པ་མ་ཟད། བོད་མིའི་ཆོས་དད་རང་དབང་སྲུང་སྐྱོབ་དང་ཆོས་ལུགས་དང་རིག་གཞུང་གི་ངོ་བོ་མི་འདྲ་བ་དེ་དག་སྲུང་སྐྱོབ་བྱེད་པའི་འབད་བརྩོན་བྱེད་རྒྱུར་ཨ་རིས་རྒྱབ་སྐྱོར་གནང་གི་ཡོད་པ་དང་། བོད་རིགས་ནང་པ་ཚོར་གཞུང་གི་ཐེ་གཏོགས་མེད་པར་རང་དབང་གི་ཐོག་ནས་སོ་སོའི་ཆོས་དད་ཉམས་ལེན་བྱེད་རྒྱུའི་ཐོབ་ཐང་དགོས་པ་དང་། ཆོས་ཕྱོགས་ཀྱི་དབུ་ཁྲིད་ལ་སློབ་གསོ་དང་༧གོང་ས་ཏཱ་ལའི་བླ་མ་དང་༧པཎ་ཆེན་རིན་པོ་ཆེ་གཙོས་པའི་ཆོས་ལུགས་ཀྱི་དབུ་ཁྲིད་འདེམས་སྒྲུག་བྱ་རྒྱུའི་ཐོབ་ཐང་ལྡན་དགོས་ཞེས་བརྗོད་འདུག

(State Department)

བོད་ནང་གི་དགོན་པ་ཆེ་གྲས་རྫ་སེར་ཤུལ་དགོན་དུ་རྒྱ་ནག་གཞུང་གིས་བཅོས་སྒྲིག་ལས་འགུལ་ཞིག་སྤེལ་འགོ་བཙུགས་ཡོད་པ་དང་། དེའི་ནང་དགོན་པའི་དགེ་འདུན་པ་ཉུང་དུ་གཏོང་རྒྱུ་དང་གྲྭ་ཤག་བཤིག་རྒྱུ་ཡིན་སྐོར་བོད་ནས་བདེ་འཇགས་ཆེད་མིང་བརྗོད་འདོད་མེད་པའི་བོད་མི་ཁག་ཅིག་གིས་བརྗོད་བྱུང་ལ། སེར་ཤུལ་རྫོང་གི་མི་རིགས་ཆོས་དོན་ལས་ཁུངས་ནས་ཀྱང་དགོན་སྡེའི་དོ་དམ་ནན་དུ་གཏོང་རྒྱུའི་ཚོགས་འདུ་དང་གསལ་བསྒྲགས་སྤེལ་ཡོད་འདུག

དེ་ཡང་ཕྱི་ཟླ་ ༡༠ ཚེས་ ༢༧ ཉིན་ཨེ་ཤེ་ཡ་རང་དབང་རླུང་འཕྲིན་ཁང་ལ་བོད་ནང་གི་བོད་མིས་བརྗོད་པར། བོད་ཀྱི་དགོན་པ་ཆེ་གྲས་རྫ་སེར་ཤུལ་ཐེག་ཆེན་དར་རྒྱས་གླིང་དགོན་པར་རྒྱ་ནག་གཞུང་གིས་ཕྱི་ཟླ་ ༡༠ ཚེས་ ༢༥ དང་ཚེས་ ༢༦ ལ་གྲྭ་ཤག་ཕལ་ཆེར་ ༢༠༠ ཙམ་ཞིག་བཤིག་བཞིན་ཡོད་པ་དང་། ངོ་མ་ཚར་སོང། ངོ་མ་ཚར་སོང་ཞེས་བརྗོད་བྱུང་ལ། ཁོང་གིས་མུ་མཐུད་གསུངས་པར། གྲྭ་ཤག་མང་པོ་དེ་འདྲ་བཤིག་པའི་སྟེང་ལ་ད་དུང་གྲ་རྒྱུན་ཚོ་སྡོད་མི་ཆོག་པའི་འཆར་གཞི་བཟོས་ནས་ད་ལྟ་ཚོགས་འདུ་ཚོགས་བཞིན་ཡོད། ད་དུང་ཡུལ་ཤུལ་ཁུལ་ལ་ཡང་གྲྭ་པ་ལོ་ ༡༨ མན་ཆད་སློབ་གྲྭ་ལ་གཏོང་དགོས་པ་ཚོ་སློབ་གྲྭར་གཏོང་བ་དང་། དེས་མིན་ན་ཕྱི་ལ་སྡོད་བཅུག་ནས་དགོན་པའི་ནང་ཡོང་བཅུག་གི་མི་འདུག ངོ་མ་ཚར་སོང་། ང་ཚོ་བོད་ཀྱི་ཆོས་དང་རིག་གཞུང་། སྐད་དང་ཡི་གེ་ལ་སོགས་པ་མེད་པ་བཟོ་འགྲོ་གིན་འདུག ཡིད་སྐྱོ་པོ་རེད་འདུག་ཅེས་གསུངས་ཡོད།

དབུས་བོད་མིའི་སྒྲིག་འཛུགས་ཀྱིས་དགོན་པ་གཏོར་བཤིག་གཏོང་བའི་ཐད་སྐྱོན་བརྗོད།

དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་ཐབས་ལམ་དེ་དག་རྒྱ་ནག་གཞུང་གིས་ཉེ་ཆར་ལག་བསྟར་བྱེད་འགོ་བཙུགས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་གསར་པའི་འོག་བོད་མི་ཚོ་མི་རིགས་མཉམ་བསྲེས་དང་བོད་ཀྱི་ཆོས་དང་རིག་གཞུང་། སྐད་ཡིག་བཅས་རྩ་མེད་གཏོང་ཆེད་བེད་སྤྱོད་བཏང་བའི་སྦག་ཅིག་ཡིན་པ་དང་། རྒྱ་ནག་གཞུང་གིས་བོད་མི་རིགས་ཀྱི་ངོ་བོ་རྩ་མེད་གཏོང་རྒྱུའི་འབད་བརྩོན་བྱེད་བཞིན་པའི་སྐབས་སུ་བོད་མི་ཚོས་བཙུགས་པའི་དགོན་སྡེ་དང་སློབ་གྲྭ་ཁག་སྒོ་བརྒྱབ་རྒྱུའི་ཐབས་ཤེས་མུ་མཐུད་བྱེད་བཞིན་པར་སྐྱོན་བརྗོད་གནང་གི་འདུག

“རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་ནི་རྒྱ་ནག་དང་འཛམ་གླིང་སྤྱི་ལ་ཕན་ཐོགས་ཡོད་པ་ངོས་འཛིན་དང་ཡིད་ཆེས་བྱེད་དགོས་པའི་དུས་ལ་བབ་འདུག བོད་ཀྱི་ཆོས་དང་རིག་གཞུང་གཏོར་བརླག་གཏོང་བ་དེས་རྒྱ་ནག་དང་འཛམ་གླིང་གཉིས་ཀར་མཇུག་འབྲས་ངན་པ་ཞིག་ཡོང་ངེས་རེད་” ཅེས་ལེགས་བཤད་ལགས་ཀྱིས་ཨེ་ཤི་ཡ་རང་དབང་རླུང་འཕྲིན་ཁང་ལ་གསུངས་བྱུང་།

རྒྱ་ནག་གཞུང་གིས་རྒྱལ་སྤྱིའི་ཁྲིམས་ལུགས་ལ་ “འགལ་འཛོལ་” བྱེད་པའི་བྱ་སྤྱོད་དེས་རང་ཉིད་འཛམ་གླིང་གི་འགོ་ཁྲིད་ཅིག་ཏུ་འགྱུར་རྒྱུའི་དམིགས་ཡུལ་ལ་གནོད་སྐྱོན་གཏོང་རྒྱུ་རེད་ཅེས་མུ་མཐུད་གསུངས་བྱུང་།

རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་བོད་ནང་གི་དམ་དྲག་དེ་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ལུགས་དང་འབྲེལ་བ་ཡོད་པ་གསུངས་པ།

ཨ་རིའི་གྲོས་ཚོགས་ཀྱི་རྒྱལ་སྤྱིའི་ཆོས་དད་རང་དབང་ལྷན་ཚོགས་ (USCIRF) ཀྱིས་ད་རེས་བོད་ནང་གི་དགོན་པ་བཤིག་གཏོར་གྱི་གནས་ཚུལ་དེས་བོད་ཀྱི་ནང་པའི་ཤུལ་བཞག་རིག་གནས་ལ་གཏོར་བརླག་གཏོང་བའི་འབད་བརྩོན་གཞི་རྒྱ་ཆེ་བ་ཞིག་མཚོན་གྱི་ཡོད་པ་བརྗོད་བྱུང་།

(RFA Tibetan)

དེ་ཡང་ཕྱི་ཟླ་ ༡༠ ཚེས་ ༢༧ ཉིན་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ལན་འདེབས་ཤིག་གནང་བའི་ནང་ལྷན་ཚོགས་ཀྱི་ཚོགས་གཙོ་ཨ་སིཕ་མ་ཧ་མུཌ་ (Asif Mahmood) ལགས་ཀྱིས་བོད་ཀྱི་དགོན་སྡེ་ཁག་གཏོར་བརླག་གཏོང་རྒྱུ་དེ་ནི་རྒྱ་ནག་གཞུང་གིས་བོད་ནང་ཆོས་དད་རང་དབང་ལ་ངོ་རྒོལ་བྱེད་པའི་ལས་འགུལ་གཞི་རྒྱ་ཆེ་བ་ཞིག་དང་རྒྱ་ནག་དབང་འཛིན་པས་བོད་མི་ཚོར་བོད་ཀྱི་ནང་ཆོས་དང་ཁ་བྲལ་གཏོང་ཐབས་བྱེད་པའི་ཐབས་ཇུས་ཀྱི་ཆ་ཤས་ཞིག་ཡིན་ཞིང་། དེའི་ནང་ཕྱི་ཟླ་ ༧ པ་ནས་ལག་བསྟར་བྱས་པའི་མི་རིགས་མཐུན་སྒྲིལ་གྱི་ཁྲིམས་དྲག་པོ་དཉ་བརྒྱུད་ནས་གྲངས་ཉུང་མི་རིགས་ལ་བཙན་ཤེད་ཀྱིས་མཉམ་བསྲེས་བྱེད་པ་དེ་ཡང་ཚུད་ཡོད་ཅེས་གསུངས་བྱུང་།

ཨ་སིཕ་མ་ཧ་མུཌ་ལགས་ཀྱིས་ད་དུང་། རྒྱ་ནག་གི་ཁྲིམས་ལུགས་ཀྱི་ནང་ལོ་ ༡༨ མན་ཆད་རྣམས་ལ་ཆོས་ལུགས་ཀྱི་སློབ་གསོ་སྤྲོད་མི་ཆོག་པའི་བཀག་སྡོམ་བྱས་ཀྱི་ཡོད་པ་དང་། དེ་ནི་རྒྱ་ནག་དམར་ཤོག་ཚོགས་པས་དགེ་འདུན་པ་ཆོས་ཞུགས་བྱེད་མི་གསར་པ་དང་མ་འོངས་པའི་བོད་བརྒྱུད་ནང་བསྟན་གྱི་འགོ་ཁྲིད་ཚོར་རང་དབང་ངང་སྦྱོང་བརྡར་སྤྲོད་རྒྱུར་བཀག་འགོག་འབད་བརྩོན་བྱེད་པའི་ཆ་ཤས་ཤིག་ཡིན་པར་བརྗོད་བྱུང་།

(མི་སེར་གྱི་འདྲ་པར།)

སེར་ཤུལ་ཐེག་ཆེན་དར་རྒྱས་གླིང་དགོན་པ།

སེར་ཤུལ་ཐེག་ཆེན་དར་རྒྱས་གླིང་དགོན་པ་ནི་ ༡༧༦༠ ལོར་ཕྱག་བཏབ་པའི་དགེ་ལུགས་དགོན་པ་ཆེ་གྲས་ཤིག་ཡིན་ཞིང་། སེར་ཤུལ་རྫོང་གི་དགོན་པ་ཆེ་ཤོས་དང་། ད་ལྟ་དཀར་མཛེས་བོད་རིགས་རང་སྐྱོང་ཁུལ་གྱི་ཁོངས་ནས་དགོན་པ་ཆེ་གྲས་ཤིག་ཀྱང་ཆགས་ཤིང་། སེར་ཤུལ་དགོན་དུ་མཚན་ཉིད་དང་གསང་སྔགས་ཀྱི་གྲྭ་ཚང་ཡོད་འདུག་ལ། བོད་ནང་མཚོན་ན། ད་ཆ་དགེ་བཤེས་མཚན་གནས་གནང་ཐུབ་མཁན་གྱི་རི་བོ་དགེ་ལྡན་པའི་སློབ་གཉེར་ལྟེ་གནས་གལ་ཆེ་ཞིག་ཀྱང་ཆགས་ཡོད་འདུག དེ་སྔའི་དགེ་འདུན་པའི་ཞལ་གྲངས་ལྟར་ན། དགོན་པ་དེར་དགེ་འདུན་པ་ ༢༠༠༠ ལྷག་བྱུང་མྱོང་ཡོད་འདུག

འབྲེལ་ཡོད་གནས་ཚུལ།

རྫ་སེར་ཤུལ་དགོན་གྱི་གྲྭ་ཤག་བཤིག་པ་དང་དགེ་འདུན་པ་ཉུང་དུ་གཏོང་གི་ཡོད་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་༧སྐུ་ཚེ་ཧྲིལ་པོར་འགྲོ་བ་མིའི་བཟང་སྤྱོད་དང་། བྱམས་བརྩེ། འགྲོ་བ་མི་གཅིག་འགྱུར་གྱི་འདུ་ཤེས་བཅས་གོང་སྤེལ་དང་། འཚེ་བ་མེད་པའི་ཐབས་ལམ་བརྒྱུད་ཞི་བདེ་ལྡན་པའི་འཛམ་གླིང་སྐྲུན་ཐབས་སུ་རླབས་ཆེན་གྱི་མཛད་འཕྲིན་བསྐྱངས་གནང་མཛད་པར་ངོས་འཛིན་ཆེ་བསྟོད་ཞུ་ཕྱིར་ཨོཀ་སི་ཝ་ཤིང་ཊོན་དགེ་རྩ་ཁང་གིས་ ༢༠༢༦ ལོའི་ Metropolitan Chrysostomos གཟེངས་བསྟོད་བྱ་དགའ་འདི་བཞིན་ཨ་རིའི་རྒྱལ་ས་ཝ་ཤིང་ཊོན་གྱི་རྒྱལ་ཡོངས་གཙུག་ལག་ཁང་ངམ་ (Washington National Cathedral) དུ་ཕྱི་ཟླ་ ༡༠ ཚེས་ ༢༨ ཉིན་༧གོང་ས་༧སྐྱབས་མགོན་ཆེན་པོ་མཆོག་ལ་འབུལ་ལམ་ཞུས་ཡོད་པ་རེད།

“བྱམས་བརྩེ་ཉམས་ལེན་བྱེད་རྒྱུ་འདི་འགྲོ་བ་མི་ཚང་མར་མཁོ་བ་ཞིག་རེད།”

བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་གསུང་འཕྲིན་སྒྲོག་སྦྱང་ཞུས་པའི་ནང་། “༧གང་ཉིད་ཀྱིས་མིའི་གཤིས་རྒྱུད་བཟང་པོ་དང་། བྱམས་སྙིང་རྗེ། བཟོད་བསྲན་གི་སྐོར་ཁྱབ་སྤེལ་གནང་ཡོད་པས་འདི་དག་བརྒྱུད་འཛམ་གླིང་ནང་ཞི་བདེ་སྐྲུན་པ་དང་། བོད་སྐད་ནང་ཁ་དཔེ་ཡོད་པ་ལྟར་དཀའ་ངལ་གང་ཞིག་ཡིན་རུང་བརྩེ་བ་དང་བྱམས་སྙིང་རྗེའི་བརྒྱུད་ནས་སེལ་ཐུབ་པར་གཤོད་སྲོལ་ཡོད་ལ། འདི་དག་ནི་མིའི་བདེ་སྐྱིད་ཀྱི་རྩ་བ་ཡིན་པ་དང་། ཁྱད་ཆོས་འདི་དག་ང་ཚོའི་རྒྱུད་ལ་རང་བཞིན་གྱི་ཡོད་པ་ཞིག་རེད་ལ། རང་ལ་ལྟ་སྤྱོད་ངན་པ་འཛིན་མཁན་ཞིག་ཡིན་ཡང་བྱམས་བརྩེའི་ཀུན་སྤྱོད་ཀྱིས་དེ་དག་དོར་གྱི་མེད། གང་ལ་ཞེ་ན་འདི་ནི་མི་གཞན་ལ་ཕན་བདེའི་བསམ་པ་ཞིག་བཅང་པར་བརྟེན་ནས་བྱུང་གི་ཡོད་ཅེས་དང་། བྱམས་བརྩེ་ཉམས་ལེན་བྱེད་རྒྱུ་འདི་འགྲོ་བ་མི་ཚང་མར་མཁོ་བ་ཞིག་དང་ཉིན་རེའི་ལས་དོན་གང་ལ་འཇུག་ཀྱང་འབྲེལ་བ་ཡོད་པ་ཞིག་རེད་“ ཅེས་གསུང་འཕྲིན་བསྩལ་འདུག

“ཞི་བདེའི་བརྡ་ལན་ཁྱབ་སྤེལ་གནང་པ་ནི་ས་ཁམས་གཅིག་པུ་མིན་པར་ཆབ་སྲིད་ཀྱི་སྡེ་ཁག་ནང་དུའང་གལ་ཆེན་པོ་ཡིན་པ་བཀའ་སློབ་ནན་ཏན་གནང་ཡོད།”

གཟེངས་བསྟོད་བྱ་དགའ་འབུལ་བཞེས་ཀྱི་མཛད་སྒོའི་ཐོག ཨ་རིའི་གྲོས་ཚོགས་ཀྱི་ཚོགས་ཟུར་དང་འཐུས་མི་ལྕམ་ནེན་སི་པེ་ལོ་སི་མཆོག་གིས་བརྙན་གྱི་བརྒྱུད་ནས་༧གོང་ས་མཆོག་ལ་ཆེ་བསྟོད་ཀྱི་ངོ་སྤྲོད་ཞུས་ཡོད་པ་རེད།

(ཨེ་ཨེཕ་པི།)

དེ་ཡང་ལྕམ་ནེན་སི་པེ་ལོ་སི་མཆོག་གིས། “སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ང་ཚོར་རྒྱུན་དུ་མིའི་ནུས་པ་དངོས་དེ་བྱམས་བརྩེ་ཡིན་པ་ལས་དབང་ཤུགས་མིན་པའི་སྐོར་སློབ་སྟོན་གནང་ཡོད་པ་དང་། ༧གོང་ས་༧སྐྱབས་མགོན་ཆེན་པོ་མཆོག་དང་ལོ་མང་རིང་ཐུགས་འདྲིས་ཆེན་པོ་བྱུང་པ་འདི་ངོས་རང་ལ་ཧ་ཅང་གི་སྐལ་བ་བཟང་པོ་དང་ཨ་རིར་ཕེབས་བསུའི་སྣེ་ལེན་ཞུ་རྒྱུ་དང་། ཕྱི་ལོ་ ༢༠༠༧ ལོར་སྲིད་འཛིན་སྦུཤ་དང་ལྷན་རྒྱས་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་ཆེད་གདན་ཞུ་བྱ་རྒྱུའི་གོ་སྐལ་བྱུང་པར་ཆེ་མཐོང་ཆེན་པོར་རྩིས་ཀྱི་ཡོད་ལ། འདིས་བོད་མིའི་རང་དབང་འཐབ་རྩོད་གཅིག་པུ་མིན་པར། འགྲོ་བ་མིའི་བདེ་དོན་བརྩི་སྲུང་བྱ་རྒྱུར་ས་མཚམས་མེད་པ་འདི་འཇིག་རྟེན་ཀུན་ཁྱབ་ཀྱི་བདེན་དོན་ཡིན་པར་ངོས་འཛིན་བྱུང་ཡོད་ཅེས་དང་། ༧གོང་ས་༧སྐྱབས་མགོན་ཆེན་པོ་མཆོག་གི་ཆིབས་སྒྱུར་གྱི་མཛད་འཕྲིན་ནམ་ཡིན་ལ་ཞི་བདེའི་བརྡ་ལན་ཁྱབ་སྤེལ་གནང་པ་ནི་ས་ཁམས་གཅིག་པུ་མིན་པར་ཆབ་སྲིད་ཀྱི་སྡེ་ཁག་ནང་དུའང་གལ་ཆེན་པོ་ཡིན་པ་བཀའ་སློབ་ནན་ཏན་གནང་ཡོད་པ་རེད་”ཅེས་ཆེ་བསྟོད་ཞུས་འདུག

གཟེངས་རྟགས་དེ་སྔོན་ཆད་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ཨེ་ལི་ཝི་སེལ་ (Elie Wiesel) དང་། ཨིས་རེལ་གྱི་སྲིད་འཛིན་ཟུར་པ་ཤི་མོན་པེ་རེས་ (Shimon Peres) སོགས་གྲགས་ཅན་མི་སྣ་མང་པོར་ཕུལ་ཡོད་པ་རེད།

Metropolitan Chrysostomos གཟེངས་རྟགས་དེའི་མཚན་ཐོགས་སྟངས་ནི་ Zakynthos གླིང་ཕྲན་གྱི་ཆོས་དཔོན་Chrysostomos ཀྱི་མཚན་བཏགས་པ་ཞིག་ཡིན་པ་དང་། ཁོང་གིས་གླིང་ཕྲན་དེའི་སྤྱི་ཁྱབ་ (Loukas Karrer) ལགས་དང་མཉམ་དུ། འཛམ་གླིང་དམག་ཆེན་གཉིས་པའི་དམག་འཁྲུགས་བྱུང་པའི་སྐབས་འཇར་མཎ་གྱི་ན་ཛི་དམག་དཔུང་གིས་ Zakynthos གླིང་ཕྲན་དུ་འཛིན་བཟུང་བྱས་པའི་ཇིའུ་མི་རིགས་རྣམས་དམག་དཔུང་དེར་རྩིས་སྤྲོད་བྱེད་རྒྱུར་ཁས་ལེན་མ་བྱས་པར་ངོ་རྒོལ་བྱས་རྐྱེན་གྱིས་གླིང་ཕྲན་དེའི་ཇིའུ་མི་རིགས་ཚོ་དམག་འཁྲུགས་དེའི་རིང་འཚོ་གནས་ཐུབ་པ་བྱུང་བ་དེ་ཕྱག་རྗེས་ལ་ངོས་འཛིན་ཞུས་པ་ཞིག་རེད་འདུག

Oxi ཞེས་བྱ་དགའ་ཕུལ་མཁན་གྱི་ཝ་ཤིང་ཊོན་གྱི་ཚོགས་པ་དེའི་མཚན་བྱང་ཐ་སྙད་ནི་གྷིརིཀ་གི་ཚིག་བརྗོད་དུ་མིན་ཞེས་པའམ་ཡང་འཁོན་འཛིན་དང་སྡང་ཟུག་ལ་ངོས་ལེན་མེད་ཅེས་པ་དེ་མཚོན་གྱི་ཡོད་པ་རེད།།

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

མགོན་པོ་སྐྱིད་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་གི་འདྲ་པར་དང་། རེ་འབོད་ཡི་གེ་ལག་ཏུ་བཟུང་སྟེ་ཁྲིམས་ཁང་མདུན་གྱི་བསྡད་ཡོད་ཅིང་། དོན་ཚན་གཉིས་བཀོད་པའི་ཡི་གེའི་ནང་རྡོ་རྗེ་བཀྲིས་ཀྱི་ཁྲིམས་རྩོད་པས་གྱོད་གཞིའི་ཡིག་ཆར་ལྟ་བཤེར་བྱེད་བཅུག་དགོས་པ་དང་ཁྲིམས་ཁང་གིས་ནོར་འཁྲུལ་ཡོ་བསྲང་གི་ལས་ཀ་བསྐྱར་དུ་འགོ་བཙུགས་དགོས་ཞེས་དང་། རྡོ་རྗེ་བཀྲིས་ལ་ཉེས་པ་མེད་ཅེས་བྲིས་འདུག

མགོན་པོ་སྐྱིད་ལགས་ཀྱི་ཉེ་འགྲམ་དུ་ཉེན་རྟོག་མོ་ཌ་དང་ཉེན་རྟོག་པ་འཁྲིས་ལ་ཡོད་པ་མཐོང་རྒྱུ་འདུག་ལ། ཁོང་གི་བཟའ་ཟླ་ཆོས་སྐྱོང་ལགས་ཀྱིས་པར་ལེན་བྱས་ཏེ་རེ་འདུན་ཁག་གཉིས་ལ་ཁྲིམས་ལྟར་ལན་འདེབས་བྱས་མེད་པས་ས་གནས་དེར་བསྡད་ཡོད་སྐོར་བརྗོད་ཀྱི་འདུག

མགོན་པོ་སྐྱིད་ལགས་ཀྱི་བཟའ་ཟླ་ཆོས་སྐྱོང་ལགས་ཀྱིས་རྒྱལ་ཁབ་ཀྱི་རྩ་ཁྲིམས་ནང་བཞིན་ལག་བསྟར་བྱེད་དགོས་ཡོད་རུང་། རྩ་ཁྲིམས་བཞིན་སྐྱོད་ཀྱི་མེད་པ་དང་། མགོན་པོ་སྐྱིད་ལགས་སུ་ཉེས་རྡུང་བཏང་ནས་ལུས་པོ་ཡོངས་རྫོགས་རྨ་ཁ་བཟོས་ཡོད་པ་བརྗོད་ཀྱི་འདུག

(པར་ཚགས།)

དེ་བཞིན་པར་ལེན་བྱས་པའི་སྐབས་དེར་ཉེན་རྟོག་པས་པར་ལེན་བྱེད་མི་ཆོག་ཅེས་བརྗོད་པའི་སྐབས་ཁོང་གིས་བརྙན་པར་ལེན་ཆོག་གི་རེད། རྩ་ཁྲིམས་བཞིན་ལག་ལེན་བསྟར་གྱི་མི་འདུག གལ་སྲིད་རྩ་ཁྲིམས་བཞིན་ལག་བསྟར་བྱས་ན། པར་ལེན་དགོས་དོན་མེད་པ་དང་། སྨན་ཁང་ནང་གི་སྨན་པ་ཚང་མ་ཉོས་ཡོད་པ་མ་ཟད། མཐའ་སྐོར་ཚང་མ་རྗེས་འདེད་གཏོང་མཁན་རེད་འདུག་ལ། ད་རིང་ཟླ་ ༡༠ ཚེས་ ༢༦ ཡིན་པ་དང་། ཡང་འཛིན་བཟུང་བྱ་རྒྱུའི་གྲ་སྒྲིག་གིས་ད་ལྟ་ཉེན་རྟོག་པའི་མོ་ཌས་བསྐོར་ནས་འདུག་ཅེས་བརྙན་ནང་བརྗོད་འདུག

རྡོ་རྗེ་བཀྲ་ཤིས་ལགས་ནི་ལྷ་སའི་གཡག་མགྲོན་ཁང་ཚུད་པའི་མགྲོན་ཁང་དང་དེ་མིན་ཚོང་ལས་གཉེར་མཁན་གྱི་བོད་པའི་ཚོང་པ་གྲགས་ཅན་ཞིག་ཡིན་ཞིང་། ༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོའི་ལས་འགུལ་བྱུང་རྗེས། ལོ་དེའི་ཟླ་ ༧ པར་ཁོང་འཛིན་བཟུང་བྱས་པ་དང་། ༢༠༡༠ ལོར་ལྷ་སའི་འབྲིང་རིམ་མི་དམངས་ཁྲིམས་ཁང་གིས་དངུལ་བུན་གཡོ་ལེན་ཟེར་བའི་ཉེས་མིང་འོག་ཚེ་བཙོན་གྱི་ཁྲིམས་བཅད་བཏང་ཡོད། འོན་ཀྱང་ཁོང་དང་ཁོང་གི་ནང་མི། ཁྲིམས་རྩོད་པ་བཅས་ཀྱིས་ཉེས་བཙུགས་དེར་ཁས་ལེན་བྱས་མེད།

མགོན་པོ་སྐྱིད་ལགས་དང་ནང་མི་ཚོས་ལོ་མང་རིང་རྡོ་རྗེ་བཀྲ་ཤིས་ལགས་ཀྱི་གྱོད་དོན་ལ་བསྐྱར་ཞིབ་དགོས་པ་དང་། རང་ཉིད་ཀྱི་གཅུང་པོ་ཐུག་འཕྲད་ཀྱི་གོ་སྐབས་སྤྲོད་དགོས་པའི་རེ་འབོད་ཐེངས་མང་བྱས་ཡོད།།

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

རྒྱ་གར་བྱང་ཤར་ཨ་རུ་ནཱ་ཅལ་མངའ་ཁུལ་གྱི་ཧིན་བོད་ས་མཚམས་སུ་རྒྱ་དཀར་ནག་གཉིས་ཀྱི་མཐའ་སྲུང་དམག་མིའི་བར་གདོང་ཐུག་བྱུང་ཡོད་པ་ཧིན་བོད་མཐའ་མཚམས་སྐོར་སྲུང་གི་སྤྱི་ཁྱབ་འགོ་དཔོན་ཤཏྲུ་ལྗིཏ་ཀ་པུར་ལགས་ཀྱི་ར་སྤྲོད་བྱས་འདུག

དེ་ཡང་ཁོང་གིས་གསུངས་དོན་དུ། ཨ་རུ་ནཱ་ཅལ་ཁུལ་གྱི་ས་ཁུལ་འགའ་ཤས་ནང་ང་ཚོའི་མཐའ་སྲུང་དམག་མི་དང་རྒྱ་མིའི་དམག་མིའི་བར་གདོང་ཐུག་དྲག་པོ་བྱུང་པའི་གནས་སྟངས་ཆགས་ཡོད་པ་རེད། འདི་ནི་ད་ལྟའང་འགྲོ་མུས་རེད། ང་ཚོའི་དམིགས་བསལ་རྩལ་སྦྱོང་བྱས་པའི་དཔུང་དམག་གི་ལས་དོན་ཡག་པོ་གནང་སོང་ཞེས་གསུངས་འདུག

ཁོང་གིས་མུ་མཐུད་གསུངས་དོན་དུ། རྒྱ་ནག་དང་མཉམ་དུ་ང་ཚོས་རྒྱུན་སྲོལ་ལྟར་ཁ་གཏད་གཅོག་རྒྱུ་དེ་ཁག་པོ་ཆགས་འདུག གང་ཡིན་ཞུས་ན་རྒྱ་ནག་གིས་ངོས་ནས་དེང་དུས་ཀྱི་སྤུས་ཚད་ལྡན་པའི་ལག་ཆ་བེད་སྤྱོད་བྱེད་ཀྱི་ཡོད་པ་དང་འགྲོ་གྲོན་ཡང་མང་པོ་གཏོང་ཡོད་པ་རེད་ཅེས་དང་། འདི་ལོའི་ཕྱི་ཟླ་ ༧ པ་ནས་བཟུང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ཧིན་བོད་མཐའ་མཚམས་སུ་འཁེལ་བའི་ས་གནས་ཨ་ས་ཕི་ལ་དང་ཏག་ཤིང་ཁུལ་དུ་རྒྱ་མིའི་དམག་མིས་རྒྱ་གར་གྱི་ས་ཐོག་དུ་སྤྱི་ལེ་ ༧ ཙམ་འཛུལ་ནས་གུར་ཕུབ་སྟེ་གནས་སྡོད་བྱས་ཡོད་པ་མ་ཟད། རྒྱ་གར་གྱི་མཐའ་སྲུང་དམག་མི་དང་མཉམ་གདོང་ཐུག་གི་གནས་ཚུལ་རིམ་པར་བྱུང་ཡོད་པ་ཧིན་བོད་མཐའ་མཚམས་སྐོར་སྲུང་བའི་སྤྱི་ཁྱབ་འགོ་དཔོན་ཤཏྲུ་ལྗིཏ་ཀ་པུར་ལགས་ཀྱིས་བརྗོད་འདུག

ཨ་རུ་ནཱ་ཅལ་དང་བོད་ཀྱི་ས་མཚམས་ཏག་ཤིང་ཁུལ་དུ་གནས་སྡོད་བྱེད་མཁན་ཡུལ་མི་ཞིག་གིས། “འདི་ལྟ་བུའི་དོན་རྐྱེན་ནི་ལོ་མང་པོའི་གོང་ནས་བྱུང་དང་འབྱུང་བཞིན་ཡོད་པ་དང་ལྷག་པར་འདི་ལོའི་ཕྱི་ཟླ་ ༧ ཙམ་ནས་རྒྱ་མིའི་དམག་མིས་ང་ཚོའི་ས་ཐོག་དུ་སྐོར་གཡེང་བྱེད་པའི་གནས་ཚུལ་རིམ་པར་བྱུང་རྗེས་རྒྱ་གར་གིས་ངོས་ནས་མཐའ་སྲུང་དམག་མི་མང་དུ་བཏང་སྟེ་ང་ཚོ་ཡུལ་མི་ཚོ་བློ་བདེ་པོར་གྱུར་ཡོད་” ཅེས་འདི་གར་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

“བོད་འདི་རང་དབང་གི་རྒྱལ་ཁབ་ཁག་ཁག་ཡིན་པའི་གནས་སྐབས་ནས་བཟུང་དུས་ད་ལྟ་བར་ས་མཚམས་སུ་བཅད་ཐིག་ཞིག་བཀོད་མ་ཐུབ་པར་ལྷག་ཡོད།”

རྒྱ་གར་དབུས་གཞུང་གྲངས་ཉུང་མི་རིགས་ཀྱི་བདེ་དོན་བློན་ཆེན་ཀི་རེན་རི་ཇི་ཇུ་ལགས་ཀྱིས་ཁོང་གི་ངོ་དེབ་དྲ་རྒྱའི་ཐོག་བརྗོད་ལྟར་ན། ཨ་རུ་ནཱ་ཅལ་ཁུལ་གྱི་ཧིན་བོད་ས་མཚམས་སུ་རྒྱ་དཀར་ནག་གཉིས་ཀྱི་མཐའ་སྲུང་དམག་མིའི་བར་རྩོད་རྙོག་འབྱུང་བཞིན་པར། ཨ་རུ་ནཱ་ཅལ་ཁུལ་དུ་ཧིན་བོད་མཐའ་མཚམས་རྒྱ་ཆེན་པོ་ཡོད་པ་མ་ཟད་ཕྱོགས་གཉིས་བར་ས་མཚམས་ཀྱི་བཅད་ཐིག་གམ་ཀ་བ་ཞིག་ཡོད་མ་རེད། འདི་ནི་གནས་དོན་གསར་པ་ཞིག་མ་རེད། བོད་འདི་རང་དབང་གི་རྒྱལ་ཁབ་ཁག་ཁག་ཡིན་པའི་གནས་སྐབས་ནས་བཟུང་དུས་ད་ལྟ་བར་ས་མཚམས་སུ་བཅད་ཐིག་ཞིག་བཀོད་མ་ཐུབ་པར་ལྷག་ཡོད་པ་དང་། ས་མཚམས་སུ་དུས་ནས་དུས་སུ་རྩོད་རྙོག་ཡོང་བཞིན་པ་དེ་གསལ་པོ་རེད། དཀའ་རྙོག་གཙོ་བོ་དེ་རྒྱ་ནག་གིས་ངོས་ནས་ས་མཚམས་སུ་གཞུང་ལམ་དང་འཛུགས་སྐྲུན་གྱི་ལས་གཞི་བྱེད་འགོ་བཙུགས་ཡོད་པ་དང་། རྒྱ་གར་གྱི་ངོས་ནས་སྲིད་བློན་མོ་དྷིའི་གཞུང་འཛིན་འོག་ཕྱི་ལོ་ ༢༠༡༤ རྗེས་སུ་འཛུགས་སྐྲུན་གྱི་ལས་གཞི་འགོ་འཛུགས་གནང་པ་ཞིག་རེད་ཅེས་གསུངས་འདུག

རྒྱ་ནག་གིས་བོད་དུ་བཙན་འཛུལ་བྱས་པའི་རྗེས་རྒྱ་གར་དང་རྒྱ་ནག་དབར་ཀི་ལོ་མི་ཊར་ ༡༤༠༠ ལྷག་ཡོད་པའི་ས་མཚམས་ཁུལ་དུ་ཕྱི་ལོ་ ༡༩༦༠ ལོ་ནས་རྩོད་རྙོག་རབ་དང་རིམ་པར་བྱུང་ཡོད་པ་མ་ཟད། རྒྱལ་ཁབ་གཉིས་ཀྱི་མཐའ་མཚམས་དམག་མིའི་དབར་གདོང་ཐུག་རིམ་པར་བྱུང་དང་འབྱུང་བཞིན་ཡོད་ལ། མཐའ་མཚམས་སྲུང་སྐྱོབ་ཆེད་ཕྱོགས་གཉིས་ཀས་འགྲོ་གྲོན་ཨ་སྒོར་ས་ཡ་མང་པོ་གཏོང་བཞིན་ཡོད་པ་རེད།

ཡེ་ཤི་ཡའི་ནང་གི་སྟོབས་ཆེན་རྒྱལ་ཁབ་གཉིས་དབར་ད་ལྟ་འབྱུང་བཞིན་པའི་ས་མཚམས་ཀྱི་རྕོད་རྙོག་སེལ་ཏེ་མཐུན་འབྲེལ་ཡར་རྒྱས་ཀྱི་གནས་སྟངས་ཞིག་ཡོང་བ་ལ་བོད་དེ་ཞི་བའི་བསྟི་གནས་ཀྱི་གནས་འབབ་ཐོག་འགྱུར་ཐབས་སུ་བསམ་འདུན་བཅང་ཏེ་བོད་ཀྱི་གནས་དོན་སེལ་རྒྱུ་དེ་གལ་འགངས་ཆེན་པོ་ཞིག་ཆགས་ཡོད་པར་གནད་དོན་དབྱེ་ཞིབ་པ་ཚོས་ངོས་འཛིན་བྱེད་ཀྱི་ཡོད་པ་རེད།།

བརྙན་པར་སྒྲིག་སྦྱོར་བ། པ་སངས་ཚེ་རིང་།

བོད་ནང་གི་དགོན་པ་ཆེ་གྲས་རྫ་སེར་ཤུལ་དགོན་དུ་རྒྱ་ནག་གཞུང་གིས་བཅོས་སྒྲིག་ལས་འགུལ་ཞིག་སྤེལ་འགོ་བཙུགས་ཡོད་པ་དང་། དེའི་ནང་དགོན་པའི་དགེ་འདུན་པ་ཉུང་དུ་གཏོང་རྒྱུ་དང་གྲྭ་ཤག་བཤིག་རྒྱུ་ཡིན་སྐོར་བོད་ནས་བདེ་འཇགས་ཆེད་མིང་བརྗོད་འདོད་མེད་པ་ཞིག་གིས་བརྗོད་བྱུང་ལ། སེར་ཤུལ་རྫོང་གི་མི་རིགས་ཆོས་དོན་ལས་ཁུངས་ནས་ཀྱང་དགོན་སྡེའི་དོ་དམ་ནན་དུ་གཏོང་ཡོད་འདུག

དེ་ཡང་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་བོད་ནང་གི་བོད་མིས་བརྗོད་པར། བོད་ཀྱི་དགོན་པ་ཆེ་གྲས་རྫ་སེར་ཤུལ་ཐེག་ཆེན་དར་རྒྱས་གླིང་དགོན་པར་རྒྱ་ནག་གཞུང་གིས་ཕྱི་ཟླ་ ༡༠ ཚེས་ ༢༥ དང་ཚེས་ ༢༦ ལ་གྲྭ་ཤག་ཕལ་ཆེར་ ༢༠༠ ཙམ་ཞིག་བཤིག་བཞིན་ཡོད་པ་དང་། ངོ་མ་ཚར་སོང། ངོ་མ་ཚར་སོང་ཞེས་བརྗོད་བྱུང་ལ། ཁོང་གིས་མུ་མཐུད་གསུངས་པར། གྲྭ་ཤག་མང་པོ་དེ་འདྲ་བཤིག་པའི་སྟེང་ལ་ད་དུང་གྲ་རྒྱུན་ཚོ་སྡོད་མི་ཆོག་པའི་འཆར་གཞི་བཟོས་ནས་ད་ལྟ་ཚོགས་འདུ་ཚོགས་བཞིན་ཡོད། ད་དུང་ཡུལ་ཤུལ་ཁུལ་ལ་ཡང་གྲྭ་པ་ལོ་ ༡༨ མན་ཆད་སློབ་གྲྭ་ལ་གཏོང་དགོས་པ་སློབ་གྲྭ་ལ་གཏོང་བ་དང་། དེས་མིན་ན་ཕྱི་ལ་སྡོད་བཅུག་ནས་དགོན་པའི་ནང་ཡོང་བཅུག་གི་མི་འདུག ངོ་མ་ཚར་སོང་། ང་ཚོ་བོད་ཀྱི་ཆོས་དང་རིག་གཞུང་། སྐད་དང་ཡི་གེ་ལ་སོགས་པ་མེད་པ་བཟོ་འགྲོ་གིན་འདུག ཡིད་སྐྱོ་པོ་རེད་འདུག་ཅེས་གསུངས་བྱུང་།

བོད་ནང་གི་བོད་མི་ཁོང་གིས་ཕྱི་ཕྱོགས་ཀྱི་གསར་འགྱུར་བརྒྱུད་ལམ་ནས་གནས་ཚུལ་འདིར་དོ་སྣང་ཡོང་བའི་རེ་བ་གནང་གི་ཡོད་པ་དང་། ཁོང་གིས་གསུངས་པར། ཁོང་ཚོས་ད་ལྟ་དྲ་རྒྱ་ཐམས་ཅད་བཀག་ནས་ཡོད་ས་རེད། གནས་ཚུལ་འདི་ཚོ་བརྙན་འཕྲིན་དང་རླུང་འཕྲིན་གང་དུ་འགྲོ་བ་ཡིན་ན་ཡང་བཤད་ན་གཅིག་བྱས་ན་ཕན་ཐོགས་ཡོང་བ་ཅི་ཤེས། ངས་བྱས་ན་ཕལ་ཆེར་ཕན་ཐོགས་ཡོང་ས་རེད། ས་གནས་ནས་སྐད་ཆ་ག་ཚོད་བཤད་ན་ཡང་ཁོང་ཚོས་རྣ་ལྕོག་གིས་ཉན་གྱི་མི་འདུག ཡིད་ལ་བཞག་གི་མི་འདུག སྣང་མེད་དུ་གཏོང་གི་འདུག གང་འདྲ་ཆགས་ཀྱི་ཡོད་མེད་མི་ཤེས། ང་ཚོ་ནང་དུ་ཐབས་ཤེས་གང་ཡོད་ས་མ་རེད་ཅེས་བརྗོད་བྱུང་།

ཨེ་ཤེ་ཡ་རང་དབང་རླུང་འཕྲིན་ཁང་གིས་དཀར་མཛེས་བོད་རིགས་རང་སྐྱོང་ཁུལ་གྱི་སེར་ཤུལ་རྫོང་མི་རིགས་ཆོས་དོན་ལས་ཁུངས་ལ་གནས་ཚུལ་རྩད་གཅོད་བྱས་ཀྱང་། འབྲེལ་ཡོད་ལས་བྱེད་པས་དྲི་བར་ལན་འདེབས་མ་བྱས་པར་ཁ་པར་བཞག་སོང་།

འོན་ཀྱང་སེར་ཤུལ་རྫོང་མི་དམངས་སྲིད་གཞུང་གི་དྲ་ཚིགས་ཐོག་རྫོང་མི་རིགས་ཆོས་དོན་ལས་ཁུངས་ཀྱིས་དགོན་པའི་གྲྭ་བཙུན་དང་། ཆོས་ཕྱོགས་བྱེད་སྒོ ས་གནས། ནང་ཆོས་སློབ་སྦྱོང་། ལོ་ཆུང་དགོན་པར་ཆོས་ཞུགས་དང་། རྒྱལ་ཁབ་ཕྱི་ནས་དགོན་པའི་ནང་སླེབས་པའི་གྲྭ་བཙུན། སྒྲིག་འགལ་གྱི་ཆོས་ལུགས་མཁོ་ཆས་ཟེར་བ་གཙང་སེལ་སོགས་ལ་དོ་དམ་བྱེད་པའི་འགན་དབང་ཡོད་པ་གསལ་པོ་བཀོད་འདུག

(མི་སེར་གྱི་འདྲ་པར།)

བོད་བརྒྱུད་ནང་བསྟན་གྱི་རྩ་བ་དང་བོད་འཚོ་གནས་ཀྱི་རྩ་བ་མེད་པ་བཟོ་ཐབས།

རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་ཀྱིས། སེར་ཤུལ་ཁུལ་གྱི་ཐོས་བཞིན་པའི་གནས་ཚུལ་ལ་བལྟས་ན། རྒྱ་ནག་གཞུང་གིས་བོད་བརྒྱུད་ནང་བསྟན་ཆོས་ལུགས་ཀྱི་རྩ་བ་དང་སྒྲོམ་གཞི་འདི་མེད་པ་བཟོ་བའི་ཐབས་ཤེས་དང་ལམ་ལུགས་ཤིག་སྤེལ་གྱི་ཡོད་པ་དང་། གང་ལྟར་བོད་ཀྱི་ས་ཁུལ་ཁྱོན་ཡོངས་ལ་དགོན་སྡེའི་རིགས་སྣ་ཚོགས་ནས་རྒྱ་ནག་དམར་ཤོག་གི་བཀའ་གསུང་ཅི་སྒྲུབ་ཞུ་རྒྱུ་དང་དམར་ཤོག་གི་དམིགས་ཡུལ་འདི་གཙོ་བོར་ཟིན་པའི་ཐོག་ནས་ཉིན་རེའི་དགོན་པའི་ལས་དོན་བྱེད་དགོས་པ་མ་གཏོགས་སྔར་རྒྱུན་གྱི་བོད་བརྒྱུད་ནང་བསྟན་གྱི་ཆོས་ལུགས་ཀྱི་འགྲོ་ལུགས་བཞིན་བྱས་པ་ཡིན་ཚེ། དེ་ལ་དམ་དྲག་བྱེད་ཀྱི་ཡོད་པའི་མཚོན་རྟགས་ཤིག་ཡིན་པར་ང་ཚོས་བཤད་ན་མ་འགྲིག་པ་ཡོད་ཀྱི་མ་རེད། གང་ལྟར་གནས་ཚུལ་འདིས་རྐྱེན་པས་རྒྱ་ནག་གཞུང་གིས་ངོས་ནས་བོད་མིར་ཆོས་དད་རང་མོས་ཡོད་རེད་ཟེར་བ་དང་། བོད་བརྒྱུད་ནང་བསྟན་ཆོས་ལུགས་འདི་བཞིན་རྒྱ་ནག་གཞུང་གིས་དར་སྤེལ་བྱེད་ཀྱི་ཡོད་ཟེར་བའི་གནས་ཚུལ་འདི་དང་ལྡོག་ཕྱོགས་ཕྱིན་པ་ཞིག་ཆགས་འདུག་ཅེས་གསུངས་བྱུང་།

ཡང་སུད་སི་བོད་ཀྱི་སྐུ་ཚབ་དོན་གཅོད་ཁང་གི་ཡོ་རོབ་ཀྱི་རྒྱ་རིགས་འབྲེལ་མཐུད་པ་དང་གནས་དོན་དབྱེ་ཞིབ་པ་སངས་རྒྱས་སྐྱབས་ལགས་ཀྱིས་ངོས་འཛིན་གནང་བར། བོད་མི་རིགས་ཀྱི་ངོ་བོ་འཛིན་བྱེད་ཀྱི་བོད་ཀྱི་རིག་གཞུང་དང་ཆོས། བོད་འཚོ་བྱེད་ཀྱི་ཡོད་ཚད་འདི་རྩ་མེད་བཟོ་བཞིན་ཡོད་པ་འདི་རྒྱ་ནག་གི་སྲིད་བྱུས་དང་དམིགས་ཡུལ་རེད། དེར་བརྟེན་བོད་ཀྱི་དགོན་པ་ནི་བོད་ཀྱི་སྲོལ་རྒྱུན་རིག་གནས་སློབ་སྦྱོང་བྱེད་སའི་ལྟེ་གནས་ཡིན་དུས། རྒྱ་ནག་གཞུང་གིས་བོད་ལ་བཙན་འཛུལ་བྱས་པ་ནས་བཟུང་ལས་འགུལ་རབ་དང་རིམ་པ་བྱུང་ཡོད། ད་རེས་དགོན་པར་བཅོས་སྒྲིག་བྱ་རྒྱུར་ཁ་གཡར་ནས་གྲྭ་ཤག་གཏོར་བཤིག་དང་གྲ་པ་ཡར་མར་བཏང་སྟེ་སྲིད་བྱུས་འདིའི་དམིགས་ཡུལ་གསལ་པོ་རེད། དགོན་པའི་ནང་གྲ་བཙུན་ཚད་གཞི་བཟོས་པ་དང་། དགོན་པའི་ནང་དམར་ཤོག་གི་ཆབ་སྲིད་སློབ་གསོ་བཏང་བ། རྒྱ་ནག་དམར་ཤོག་ལ་རྒྱབ་སྐྱོར་བྱེད་མཁན་གྱི་དགོན་པར་སྒྱུར་རྒྱུ། དམིགས་ཡུལ་གཙོ་བོ་ནི་བོད་ཀྱི་ཡང་དག་པའི་ནང་ཆོས་སློབ་གཉེར་དང་རྒྱུན་འཛིན་བྱེད་མི་བཅུག་པ། བོད་མི་རིགས་འདི་རྡོག་རྩ་གཅིག་སྒྲིལ་ཡོང་བའི་ནུས་པ་ཡོད་པ་མེད་པ་བཟོ་རྒྱུ་འདི་རེད། རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་འདི་ལག་བསྟར་བྱས་པ་ནས་བཟུང་སྟེ་ཁྲིམས་ཀྱི་རྒྱབ་བརྟེན་ཡོད་པའི་ངོ་བོའི་ཐོག་ནས་བོད་ཀྱི་རིག་གཞུང་དང་། སྐད་དང་ཡི་གེ མི་རིགས་རྩ་མེད་བཟོ་བའི་སྲིད་བྱུས་འདི་མངོན་གསལ་དོད་པོ་ཆགས་ཡོད། དེར་བརྟེན་དགོན་པའི་དོན་རྐྱེན་འདི་རྒྱ་ནག་གཞུང་གིས་བོད་ཐོག་ལ་འཛིན་པའི་སྲིད་བྱུས་དང་འབྲེལ་བ་ཆགས་པ་ཞིག་ཡིན་དུས། གནས་ཚུལ་དེ་རིགས་བོད་ཀྱི་ས་གནས་གཞན་དུ་ཡོང་བའི་ཉེན་ཁ་ཡོད་པ་གསལ་པོ་རེད། ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ཕྱོགས་གང་ས་ནས་རྒྱལ་སྤྱིའི་སྤྱི་ཚོགས་ལ་འབོད་སྐུལ་བྱ་རྒྱུ་དང་། འདི་འདྲའི་སྲིད་བྱུས་མཚམས་འཇོག་པར་གཞུང་དམངས་སུ་ཡིན་རུང་ཚང་མས་ཤུགས་རྒྱག་དགོས་རྒྱུ་འདི་གལ་ཆེན་པོ་རེད་ཅེས་གསུངས་བྱུང་།

(མི་སེར་གྱི་འདྲ་པར།)

སེར་ཤུལ་རྫོང་གི་ཆོས་ལུགས་དྲིལ་བསྒྲགས་དང་དོ་དམ།

ད་ལོ་སེར་ཤུལ་རྫོང་གིས་ཆོས་ལུགས་ཁྱབ་ཁོངས་སུ་ ༣༣༡ ཞེས་པའི་དྲིལ་བསྒྲགས་དང་སློབ་གསོའི་ལས་འགུལ་རྒྱ་ཆེར་སྤེལ་བཞིན་ཡོད། དེའི་ནང་གི་ ༣ ཞེས་པ་དང་པོས་རྒྱལ་ཁབ་ཀྱི་འདུ་ཤེས། སྤྱི་འབངས་ཀྱི་འདུ་ཤེས། ཁྲིམས་ཀྱི་འདུ་ཤེས་ཟེར་བ་གསུམ་འཛུགས་རྒྱུ་དང་། ༣ ཞེས་པ་གཉིས་པས་སྤྱི་ཚོགས་རིང་ལུགས་ཀྱི་ཁྲིམས་ལུགས་དང་། བོད་བརྒྱུད་ནང་བསྟན་རྒྱ་ནག་ཅན་གྱི་གྲོས་བསྡུར། འཕྲོད་བསྟེན་བྱེད་སྒོ་བཅས་གསུམ་རེད་འདུག་ལ། ཡང་ ༡ ཞེས་པ་འདིས་དགོན་པ་རེ་རེར་ཁྲིམས་མཐུན་དང་ལག་ལེན་ཐུབ་པའི་དགོན་པའི་སྒྲིག་གཞི་བཅས་རེད་འདུག ཟི་ཁྲོན་ཞིང་ཆེན་འཐབ་ཕྱོགས་གཅིག་གྱུར་ལས་ཁུངས་ཀྱིས་ཟླ་བ་དྲུག་པར་སྤེལ་བའི་གནས་ཚུལ་ཞིག་གི་ནང་། སྲིད་བྱུས་འདི་སེར་ཤུལ་རྫོང་གི་བོད་བརྒྱུད་ནང་བསྟན་དགོན་པ་ ༤༥ དང་བཙུན་དགོན་ལྔ་ལ་ཁྱབ་པ་དང་། གྲྭ་བཙུན་ ༢༠༠༠ ལྷག་ལ་དྲིལ་བསྒྲགས་དང་སློབ་གསོ་སྤེལ་ཟིན་པ་གནས་ཚུལ་ནང་བཀོད་འདུག

ད་དུང་དྲིལ་བསྒྲགས་དེའི་ནང་། དམར་ཤོག་ཚོགས་པ་དང་རྒྱལ་ཁབ་ཀྱི་ཁྲིམས་སྲིད་དང་། རྒྱལ་ཁབ་གཅིག་གྱུར། མི་རིགས་མཐུན་སྒྲིལ། རྒྱ་ནག་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ཟེར་བ་སོགས་གྲྭ་བཙུན་ཚོར་སྒྲོག་འགྲེལ་བྱེད་པ་དང་། དགོན་པའི་དོ་དམ་ཁྲིམས་ལུགས་ཅན་དང་ཚད་ལྡན་ཅན་དུ་གཏོང་རྒྱུའི་སྐོར་ནན་བཤད་བྱས་ཤིང་། ད་ལོའི་དབྱར་ཁར། སེར་ཤུལ་རྫོང་མི་རིགས་ཆོས་དོན་ལས་ཁུངས་ཀྱིས་སློབ་ལོ་ལོན་པའི་བྱིས་པ་དགོན་པ་ནས་ཕྱིར་འཐེན་བྱས་ཏེ་སློབ་གྲྭར་བཀོད་སྒྲིག་བྱས་པའི་ལས་དོན་སྲ་བརྟན་ཡོང་ཆེད། དབྱར་ཁའི་གུང་གསེང་རིང་བྱིས་པར་སྡོད་ས་དང་སློབ་ཚན་བཀོད་སྒྲིག་གི་ལས་གཞི་སྤེལ་ཡོད་འདུག

གཞུང་གི་གཏན་འབེབས་ནང་དགོན་པའི་གྲྭ་བཙུན་གྱི་གྲངས་ཚད་དང་ཆོས་ཞུགས་བྱེད་མཁན་ལ་དོ་དམ།

རྒྱ་ནག་གི་རྒྱལ་ཁབ་ཆོས་ལུགས་ལས་དོན་ལས་ཁུངས་ཀྱིས་བསྐྱར་བཅོས་བྱས་པའི་《བོད་བརྒྱུད་ནང་བསྟན་གྱི་དགོན་པའི་དོ་དམ་བྱ་ཐབས།》ཞེས་པ་དེ་ ༢༠༢༥ ལོའི་ཟླ་ ༡ ཚེས་ ༡ ནས་ལག་བསྟར་བྱས་ཡོད་ཅིང་། གཏན་འབེབས་དེའི་ནང་། དགོན་པ་དང་ཆོས་བྱེད་མི་སྣས་རྒྱ་ནག་དམར་ཤོག་ཚོགས་པའི་འགོ་ཁྲིད་དང་སྤྱི་ཚོགས་རིང་ལུགས་ལ་རྒྱབ་སྐྱོར། རྒྱ་ནག་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ཟེར་བ་སྲ་བརྟན་དང་ཆོས་ལུགས་རྒྱ་ནག་ཅན་གྱི་ཕྱོགས་ལ་མུ་མཐུད་སྐྱོད་དགོས་པ་བཀོད་ཡོད་ལ། ད་དུང་གཏན་འབེབས་དེའི་དོན་ཚན་ ༡༥ དང་ ༡༦ ལ་གཞིགས་ན། དགོན་པ་རེ་རེའི་གྲྭ་བཙུན་གྱི་ཞལ་གྲངས་དེ་དགོན་པའི་ཤོང་ཚད་དང་དཔལ་འབྱོར་ནུས་པར་གཞི་བཞག་ནས་གཏན་འཁེལ་དང་། ཆོས་བྱེད་མི་སྣའི་གྲངས་ཚད་དེ་ལས་བརྒལ་མི་ཆོག་པ། གྲྭ་བཙུན་གྱི་མིང་ཐོ་རྫོང་རིམ་པའི་ཆོས་དོན་ལས་ཁུངས་ལ་དུས་བཀག་ལྟར་ཕུལ་དགོས་པ་གསལ་འདུག གྲྭ་བཙུན་གསར་པ་ཞིག་དགོན་པར་བསྡུ་དགོས་ན་ཡང་དགོན་པའི་དོ་དམ་ཚོགས་པའི་མོས་མཐུན་དང་ས་གནས་ནང་པའི་ཚོགས་པའི་ཞིབ་བཤེར་བརྒྱུད་དེ་རྫོང་རིམ་པའི་ཆོས་དོན་ལས་ཁུངས་ལ་ཐོ་འགོད་བྱ་དགོས་ཤིང་། ལོ་ཆུང་དགོན་པར་ཆོས་ཞུགས་བྱ་ཕྱོགས་ཐད་གཏན་འབེབས་དེས་འོས་འགན་སློབ་གསོའི་ལོ་ཚད་ནང་གི་བྱིས་པ་དགོན་པར་བསྡུས་ཏེ་ཆོས་སློབ་སྦྱོང་བྱེད་དུ་འཇུག་མི་ཆོག་ཅེས་བཀོད་འདུག དགོན་པའི་ནང་དུ་ནང་ཆོས་སློབ་སྦྱོང་འཛིན་གྲྭར་བསྡུ་བའི་སློབ་མ་ཡང་སྤྱིར་ལོ་ ༡༨ ལོན་དགོས་སྐོར་དོན་ཚན་ ༢༩ ཡི་ནང་བཀོད་འདུག

(མི་སེར་གྱི་འདྲ་པར།)

རྒྱ་ནག་གཞུང་གི་གཏན་འབེབས་དང་བོད་ནང་གི་བོད་མིའི་སེམས་འཚབ།

རྒྱ་ནག་གཞུང་གི་ཆོས་ལུགས་སྲིད་བྱུས་འདི་རྣམས་ནི་ཁྲིམས་ལྟར་ཆོས་ལུགས་དོ་དམ་དང་། དགོན་པའི་དོ་དམ། ཆོས་ལུགས་རྒྱུན་འཛིན། ལོ་ཆུང་བྱིས་པར་འོས་འགན་སློབ་གསོ་ཐོབ་པར་འགན་སྲུང་བྱེད་ཆེད་ཡིན་པ་འགྲེལ་བརྗོད་བྱེད་ཀྱི་ཡོད།

འོན་ཀྱང་བོད་ནང་ནས་ད་རེས་སེར་ཤུལ་དགོན་གྱི་གྲྭ་ཤག་བཤིག་པ་དང་གྲྭ་རྒྱུན་གཞོན་པ་ཕྱིར་འཐེན་བྱེད་ཀྱི་ཡོད་པ་དེས་བོད་ཀྱི་ཆོས་དང་རིག་གཞུང་། སྐད་ཡིག་བཅས་མི་རབས་རྗེས་མར་རྒྱུན་འཛིན་བྱེད་པའི་གནས་བབ་ཉམས་ཆག་འགྲོ་བར་སེམས་འཚབ་གནང་ཡོད།

དེ་བཞིན་ ༢༠༢༤ ལོའི་སེར་ཤུལ་གྲོང་རྡལ་གྱི་གཞུང་འབྲེལ་ཡིག་ཆ་ཞིག་གི་ནང་ལོ་ཆུང་བྱིས་པ་དགོན་པར་ཆོས་ཞུགས་བྱེད་པའམ་ནང་ཆོས་སློབ་སྦྱོང་བྱེད་པར་བཀག་སྡོམ་དང་། གྲྭ་ཤག་རེ་རེ་དང་མི་རེ་རེར་ཞིབ་བཤེར། སློབ་ལོ་ལོན་པའི་བྱིས་པ་དགོན་པར་བསྡུ་མི་ཆོག་པ་བཅས་གསལ་པོ་བཀོད་འདུག་ཅིང་། སེར་ཤུལ་རྫོང་དུ་ལོ་ཆུང་གྲྭ་པ་དགོན་པ་ནས་ཕྱིར་འཐེན་བྱས་པའི་གནས་ཚུལ་འདི་གསར་པ་མིན་པར། དེ་སྔ་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ནས་ ༢༠༡༨ ལོར་སེར་ཤུལ་དགོན་ནས་ལོ་ ༡༥ མན་གྱི་དགེ་འདུན་པ་ ༢༠༠ ལྷག་དགོན་པར་སློབ་ཞུགས་བྱེད་མི་བཅུག་པར་གཞུང་གཉེར་སློབ་གྲྭར་བཏང་བའི་གནས་ཚུལ་ཡང་བཏོན་ཡོད།

སེར་ཤུལ་ཐེག་ཆེན་དར་རྒྱས་གླིང་དགོན་པ།

སེར་ཤུལ་ཐེག་ཆེན་དར་རྒྱས་གླིང་དགོན་པ་ནི་ ༡༧༦༠ ལོར་ཕྱག་བཏབ་པའི་དགེ་ལུགས་དགོན་པ་ཆེ་གྲས་ཤིག་ཡིན་ཞིང་། སེར་ཤུལ་རྫོང་གི་དགོན་པ་ཆེ་ཤོས་དང་། ད་ལྟ་དཀར་མཛེས་བོད་རིགས་རང་སྐྱོང་ཁུལ་གྱི་ཁོངས་ནས་དགོན་པ་ཆེ་གྲས་ཤིག་ཆགས་ཤིང་། སེར་ཤུལ་དགོན་དུ་མཚན་ཉིད་དང་གསང་སྔགས་ཀྱི་གྲྭ་ཚང་ཡོད་འདུག་ལ། བོད་ནང་མཚོན་ན། ད་ཆ་དགེ་བཤེས་མཚན་གནས་གནང་ཐུབ་མཁན་གྱི་རི་བོ་དགེ་ལྡན་པའི་སློབ་གཉེར་ལྟེ་གནས་གལ་ཆེ་ཞིག་ཀྱང་ཆགས་ཡོད་འདུག དེ་སྔའི་དགེ་འདུན་པའི་ཞལ་གྲངས་ལྟར་ན། དགོན་པ་དེར་དགེ་འདུན་པ་ ༢༠༠༠ ལྷག་བྱུང་མྱོང་ཡོད་འདུག

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

འདི་ལོ་སློབ་དུས་གསར་པ་འགོ་བཙུགས་པའི་སྐབས་དེར་བོད་མདོ་སྨད་མགོ་ལོག་བོད་རིགས་རང་སྐྱོང་ཁུལ་གྱི་རྨ་ཆེན་རྫོང་དུ་ལོ་མང་རིང་བོད་ཕྲུག་ལ་ཤེས་ཡོན་སློབ་གསོ་སྤྲད་བཞིན་ཡོད་པའི་སློབ་གྲྭ་གསུམ་རིམ་པས་སྒོ་བརྒྱབ་པའི་གནས་ཚུལ་ཐོན་ཡོད་ཅིང་། དེའི་ནང་ར་རྒྱ་གངས་ལྗོངས་རྩྭ་ཐང་བུ་མོའི་སློབ་གྲྭ་དང་། མགོ་ལོག་རྟ་བྲག་དྭ་ཕྲུག་སློབ་གྲྭ དེ་བཞིན་ར་རྒྱ་གྲོང་རྡལ་བཅའ་སྡོད་སློབ་གྲྭ་གཉིས་པ་བཅས་ཚུད་ཡོད།

འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་མགོ་ལོག་བོད་རིགས་རང་སྐྱོང་ཁུལ་གྱི་སློབ་གསོ་ལས་ཁུངས་ལ་འབྲེལ་བ་བྱས་ཏེ་རྩད་གཅོད་བྱས་པར། འདིའི་དང་ཐོག་གི་ལས་ཀ་རྣམས་རྨ་ཆེན་རྫོང་སྲིད་གཞུང་དང་། རྨ་ཆེན་རྫོང་སློབ་གསོ་ལས་ཁུངས་ཀྱིས་འགན་ཁུར་ཡོད་པས། ང་ཚོས་ཞིབ་ཕྲའི་གནས་ཚུལ་རྒྱུས་མངའ་མེད་ཅེས་བརྗོད་བྱུང་། དེ་ནས་རྨ་ཆེན་རྫོང་སློབ་གསོ་ལས་ཁུངས་ལ་གནས་ཚུལ་རྩད་གཅོད་བྱེད་དུས། ང་ཚོ་སློབ་གསོ་ལས་ཁུངས་ཀྱིས་ལན་འདེབས་བྱེད་པའི་དབང་ཚད་མེད་ཅེས་བརྗོད་བྱུང་།

ཤེས་རྟོགས་བྱུང་བར་གཞིགས་ན། གོང་ཞུས་ཀྱི་སློབ་གྲྭ་འདི་རྣམས་འདི་ལོ་སློབ་དུས་གསར་པ་འགོ་བཙུགས་པའི་སྐབས་སུ་སྒོ་བརྒྱབ་ཡོད་པ་དང་། མགོ་ལོག་རྟ་བྲག་སློབ་གྲྭར་མཚོན་ན། ༢༠༠༥ ལོར་དེ་སྔ་ཇཱར་མ་ནི་ལ་ཡོད་པའི་རྟའུ་བློ་བཟང་དཔལ་ལྡན་ལགས་དམ་པ་ཁོང་གིས་བཙུགས་གནང་སྟེ་དྭ་ཕྲུག་ཚོར་སློབ་གསོ་དང་ཁྱིམ་ཚང་གི་དྲོ་སྐྱིད་ཁོར་ཡུག་ཅིག་བསྐྲུན་འདུག་ལ། འདས་པའི་ལོ་ངོ་ ༢༡ ཙམ་གྱི་རིང་སློབ་མ་ཚོས་སློབ་སྤྱི་ཐུབ་བསྟན་ཉི་མ་ལགས་སུ་སློབ་གཙོ་ཨ་ཕ་ལགས་ཞེས་འབོད་ཀྱི་ཡོད་ཅིང་། ཁོང་གིས་རྒྱུན་དུ་རང་ཉིད་ཀྱི་བུ་ཕྲུག་བཞིན་ཕྲུ་གུ་ཚོར་བྱམས་སྐྱོང་གསོ་སྐྱོང་གནང་ཡོད།

(མི་སེར་གྱི་འདྲ་པར།)

མགོ་ལོག་རྟ་བྲག་སློབ་གྲྭ་དབུ་བརྙེས་ནས་ལོ་ངོ་ ༢༠ འཁོར་བའི་མཛད་སྒོའི་ཐོག་སློབ་སྤྱི་ཐུབ་བསྟན་ཉི་མ་ལགས་ཀྱིས་ད་ལྟའི་ཆར་སློབ་མ་ཆིག་སྟོང་ལྷག་ཙམ་གསོ་སྐྱོང་བྱེད་དང་བྱེད་བཞིན་ཡོད་པས། སློབ་གྲོགས་འགའ་ཤས་གཞུང་ཞབས་པའི་ལས་ཀ་དང་། དགེ་རྒན་གྱི་ལས་གནས། ཚོང་ལས་སོགས་ལ་འབད་པས་སློབ་མ་གང་མང་འབྱོན་དང་བྱོན་བཞིན་ཡོད་པར་དགའ་བ་དང་སྤྲོ་བ་ཚད་མེད་སྐྱེ་བཞིན་ཡོད་ཅེས་གཏམ་བཤད་སྤེལ་ཡོད་འདུག ཡང་སྤྱི་ཚོགས་དྲ་ལམ་ཐོག་ཐོན་པའི་བརྙན་ཞིག་གི་ནང་དུ་སློབ་སྤྱི་ཐུབ་བསྟན་ཉི་མ་ལགས་ཀྱིས་ང་ཚོ་སློབ་ཕྲུག་རྣམ་པ་དང་དགེ་རྒན་རྣམ་པ་ཐུགས་སེམས་སྐྱོ་སྐྱོ་མ་གནང་། ང་ཚོ་ཚང་མ་ལས་དང་སྐལ་བ་ཡོད་ན། ལྷན་འཛོམས་ཡོང་བའི་དགེ་སློབ་ཚང་མ་མཉམ་དུ་དགའ་བའི་གླུ་དབྱངས་ལེན། སྐྱིད་པའི་བྲོ་འཁྲབ་རྒྱུའི་དུས་ཚོད་ཅིག་ཡོང་བར་ངས་སྙིང་ཐག་པ་ནས་སྨོན་འདུན་རྒྱུ་ཡིན་ཞེས་གསུངས་འདུག ཡང་གཏམ་བཤད་འདི་སློབ་གྲྭ་སྒོ་བརྒྱབ་པའི་མཚམས་འདིར་ཡིན་མིན་འགྲེལ་བརྗོད་གང་ཡང་བྱས་མི་འདུག

སྤྱི་ཚོགས་དང་སློབ་གསོ་རིག་པའི་ཞིབ་འཇུག་གནང་མཁན་འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་མགོ་ལོག་ཁུལ་གྱི་སློབ་གྲྭ་གསུམ་སྒོ་བརྒྱབ་པ་འདི་རྒྱ་ནག་གཞུང་གིས་བོད་ཁུལ་གྱི་སློབ་གསོའི་སྲིད་བྱུས་ལ་འགྱུར་བ་ཆེན་པོ་ཞིག་ཡིན་པར་ངོས་འཛིན་གནང་གི་འདུག་ལ། རྒྱ་ནག་གཞུང་གི་མིག་ནང་བོད་པ་རང་གིས་བཙུགས་པའི་ཁོང་ཚོ་སོ་སོའི་རིག་གཞུང་འདི་སྒྲིག་འཛུགས་ཀྱི་ཐོག་ནས་སློབ་སྦྱོང་བྱེད་ས་དང་སློབ་ཁྲིད་བྱེད་སའི་སྒྲིག་འཛུགས་ཤིག་མཐོང་རྒྱུར་མིག་ནང་གི་ཚེར་མ་ལྟར་ཆགས་ཡོད། དེར་བརྟེན་མེད་པ་བཟོས་པ་རེད་ཅེས་དང་། འདི་ནི་ཞི་ཅིན་ཕིང་མཚོ་སྔོན་ལ་སླེབས་རྗེས་འཇིགས་མེད་རྒྱལ་མཚན་ལགས་ཀྱིས་བཙུགས་པའི་སློབ་གྲ་སྒོ་བརྒྱབ་པ་དང་དེ་རྗེས་ཟི་ལིང་གི་མཚོ་ཤར་ཁུལ་དུ་སློབ་འབྲིང་གསར་པ་ཞིག་གསར་རྒྱག་བྱས་ཡོད་པ་གསུངས་བྱུང་།

(མི་སེར་གྱི་འདྲ་པར།)

རྒྱ་ནག་གཞུང་གིས་སྒོ་བརྒྱབ་པའི་སློབ་གྲྭ་གཞན་ཞིག་ནི་ར་རྒྱ་གངས་ལྗོངས་རྩྭ་ཐང་བུ་མོའི་སློབ་གྲྭ་འདི་ཡིན་ཞིང་། ༢༠༠༥ ལོའི་ཟླ་ ༡༠ ཚེས་ ༡༥ ཉིན་སློབ་གསོ་བ་འཇིགས་མེད་རྒྱལ་མཚན་ལགས་ཀྱིས་བཙུགས་གནང་བ་དང་། སློབ་ཁྲིད་ཐོག་བོད་ཡིག་དང་། རྒྱ་ཡིག དབྱིན་ཡིག་གསུམ་དང་། རྩིས་རིག ཚན་རིག རིག་གནས་དང་ལུས་རྩལ་སོགས་དེང་རབས་ཀྱི་སློབ་ཚན་དང་བོད་ཀྱི་རིག་གནས་ཟུང་འབྲེལ་བྱས་པའི་ཐོག་ར་རྒྱའི་སློབ་གྲྭ་ཁག་གིས་གྲྭ་སའི་རིག་ལམ་གྱི་སློབ་སྟངས་ལྟ་བུའི་ཐབས་ལམ་ཡང་དེང་རབས་སློབ་ཁྲིད་ནང་བེད་སྤྱོད་དང་། སློབ་མ་ཚོའི་ཁྲོད་བྱེད་སྒོ་སྣ་ཚོགས་གོ་སྒྲིག་བྱེད་པ་སོགས་ཡོད་འདུག གངས་ལྗོངས་རྩྭ་ཐང་བུ་མོའི་སློབ་གྲྭ་ནས་གསོ་སྐྱོང་བྱུང་བའི་བོད་པའི་བུ་མོ་མང་པོ་ད་ཆ་ལས་གནས་འདྲ་མིན་གྱི་ནང་རང་རྐྱ་འཕེར་བའི་ཐོག་ནས་སྤྱི་ཚོགས་ནང་ཞབས་འདེགས་གྲུབ་ནས་ཡོད་འདུག

སྤྱི་ཚོགས་དང་སློབ་གསོ་རིག་པའི་ཞིབ་འཇུག་གནང་མཁན་འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་རྒྱ་ནག་གཞུང་གིས་སློབ་གྲྭ་སྒོ་བརྒྱབ་པ་འདིས་ཤུགས་རྐྱེན་དང་པོ་འདི་སོ་སོའི་ཕ་ཡུལ་ལ་ཡོད་པའི་ཉེན་རེ་རེའི་ནང་ལག་ལེན་བྱེད་ཀྱི་བོད་ཀྱི་སྲོལ་རྒྱུན་དང་འགྲོ་ལུགས་འགྲོ་སྟངས་དང་རྒྱང་ཐག་རིང་རུ་འགྲོ་རྒྱུ་རེད། གཉིས་པ་འདི་བཅའ་སྡོད་སློབ་གྲྭའི་ནང་སླེབས་དུས་བསླབ་གཞི་ཆ་ཚང་རྒྱ་ནག་གི་སྟངས་འཛིན་བྱས་ནས་ཡོད་ཅེས་གསུངས་བྱུང་།

ཡང་མགོ་ལོག་ཁུལ་གྱི་ར་རྒྱ་གྲོང་རྡལ་བཅའ་སྡོད་སློབ་གྲྭ་གཉིས་པའམ་ཇ་སག་སློབ་ཆུང་འདི་ཐོག་མར་ ༡༩༩༥ ལོར་འབྲོག་པ་མང་ཚོགས་ཀྱིས་མ་དངུལ་བསྡུ་རུབ་བྱས་ནས་བཙུགས་པ་དང་། ༢༠༠༨ ལོར་ར་རྒྱ་གྲོང་རྡལ་བཅའ་སྡོད་སློབ་གྲྭ་གཉིས་པ་ཟེར་མིང་བསྒྱུར་བྱས་ཤིང་། སློབ་གྲྭ་འདི་ལོ་ངོ་ ༣༡ གི་རྗེས་སུ་རྒྱ་ནག་གཞུང་གིས་སྒོ་བརྒྱབ་ཡོད་འདུག

གོང་ཞུས་སློབ་གྲྭ་འདི་རྣམས་ཀྱི་སློབ་མ་དང་དགེ་ལས་ཚོའི་གནས་སྟངས་ཁ་གསལ་མེད་པའི་ཐོག་མགོ་ལོག་གི་སློབ་གསོ་ཚན་པ་ནས་ཕྱི་གསལ་ནང་གསལ་མེད་པར་སློབ་གྲྭའི་དགེ་ལས་ལ་གནོན་ཤུགས་ཆེན་པོའི་ཐོག་ནས་སློབ་གྲྭ་སྒོ་བརྒྱབ་ཡོད་པ་བོད་ནང་ནས་བརྗོད་བྱུང་།

(མི་སེར་གྱི་འདྲ་པར།)

མགོ་ལོག་ནང་གི་སློབ་གྲྭ་ཁག་སྒོ་བརྒྱབ་པའི་དུས་མཚུངས་སུ་མགོ་ལོག་གི་སློབ་མ་ཚོ་རང་གི་ས་ཁུལ་ནས་སྤྱི་ལེ་བརྒྱ་ཕྲག་གིས་རྒྱང་ཐག་ཆོད་པའི་ས་ཆར་སློབ་གསོ་སྤྲོད་པའི་སློབ་གྲྭ་ཆེ་གྲས་གཉིས་བཙུགས་ཟིན་ཡོད་ཅིང་། མགོ་ལོག་ཟི་ལིང་མི་རིགས་སློབ་འབྲིང་ནི་ ༢༠༡༩ ལོའི་ཟླ་ ༩ ཚེས་ ༡ ཉིན་དངོས་སུ་སློབ་འགོ་བཙུགས་པ་དང་། ཟི་ལིང་དུ་ཆགས་པའི་བཅའ་སྡོད་སློབ་གྲྭ་ཞིག་དང་། ༢༠༢༤ ལོའི་གཞུང་ཕྱོགས་ཀྱི་གྲངས་ཐོར་གཞིགས་ན། སློབ་མ་ ༨༠༠ ཡོད་པའི་ནང་ ༧༧༨ བོད་རིགས་ཡིན་པ་དང་། སློབ་མ་ཚང་མ་མགོ་ལོག་ཁུལ་ནས་ཡོང་བ་རེད་འདུག་ལ། མགོ་ལོག་ཟི་ལིང་མི་རིགས་འབྲིང་སློབ་ཀྱི་གཞུང་འབྲེལ་ངོ་སྤྲོད་ཁག་ནང་རྒྱ་ནག་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ཟེར་བ་སློབ་གསོའི་གཙོ་ཐིག་ཏུ་འཛིན་རྒྱུར་ནན་བཤད་བྱས་འདུག

ཡང་འདི་ལོའི་ཟླ་ ༩ ཚེས་ ༡ ཉིན་མགོ་ལོག་མཚོ་ཤར་སློབ་འབྲིང་འདི་ཡང་དངོས་སུ་འགོ་བཙུགས་ཡོད་པ་དང་། ཐོག་མར་སློབ་མ་ ༡༢༠༠ བསྡུས་པའི་ནང་། དམའ་འབྲིང་ལ་སློབ་མ་ ༥༠༠ དང་མཐོ་འབྲིང་ལ་སློབ་མ་ ༧༠༠ ཡོད་ཅིང། དགེ་རྒན་ ༨༤ དང་། མ་འོངས་པར་སློབ་མ་ ༣༦༠༠ ཤོང་བའི་འཆར་གཞི་ཡོད་འདུག གཞུང་ཕྱོགས་ཀྱིས་ས་གནས་གཞན་དུ་སློབ་གྲྭ་གཉེར་བ་ནི་མགོ་ལོག་གི་ས་བབ་མཐོ་བ་དང་། དགེ་རྒན་དང་སློབ་གསོའི་ཐོན་ཁུངས་མི་འདང་བའི་དཀའ་ངལ་སེལ་ནས་སློབ་གསོའི་སྤུས་ཚད་ཡར་རྒྱས་གཏོང་ཆེད་ཡིན་པར་བརྗོད་འདུག

འོན་ཀྱང་སྤྱི་ཚོགས་དང་སློབ་གསོ་རིག་པའི་ཞིབ་འཇུག་གནང་མཁན་འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་ངོས་འཛིན་གནང་བར། བོད་མི་རིགས་ཁྱོན་ཡོངས་ནས་རྒྱ་བསྒྱུར་བྱ་རྒྱུའི་འཆར་གཞི་རེད་འདུག ས་ཆ་ཆུང་ཆུང་ཞིག་གི་གནད་དོན་ཞིག་མ་རེད། འདི་ཁྱོན་ཡོངས་ལ་ཤུགས་རྐྱེན་ཆེན་པོ་ཐེབས་པའི་འཆར་གཞི་ཞིག་རེད། ཡིན་ན་ཡང་ང་ཚོ་བོད་མི་རིགས་འདི་ལོ་རྒྱུས་ཡུན་རིང་པོ་དང་ས་ཆ་རྒྱ་ཆེན་པོ། མི་འབོར་མང་པོ་ཡོད་པའི་མི་རིགས་ཆེན་པོ་ཞིག་ཡིན་ཙང་། ལུང་པ་མི་འདྲ་བར་ཐབས་ཤེས་མི་འདྲ་བ་དང་སྲིད་བྱུས་མི་འདྲ་བ་ལག་བསྟར་བྱས་ནས་མཐའ་མའི་དམིགས་ཡུལ་ནི་བོད་མི་རིགས་ཀྱི་མི་རབས་གསར་པ་རྒྱ་མིར་སྒྱུར་རྒྱུ་འདི་རེད་ཅེས་གསུངས་བྱུང།

མགོ་ལོག་ཁུལ་གྱི་སློབ་གསོ་ཚན་པ་ནས་སློབ་གྲྭ་ཆེ་འབྲིང་ཆུང་གསུམ་ནས་རྒྱ་ནག་ཀྲུང་ཧྭ་མི་རིགས་ཀྱི་འདུ་ཤེས་སློབ་གསོ་སྤེལ་དགོས་པ་དང་། སློབ་མ་ཚོས་དམར་ཤོག་ཚོགས་པའི་སྐད་ཆར་ཉན་དགོས་པ། དམར་ཤོག་ཚོགས་པའི་རྗེས་སུ་འབྲངས་དགོས་པ་སོགས་ཀྱི་སློབ་གསོ་དྲིལ་བསྒྲགས་ཤུགས་ཆེན་སྤེལ་བཞིན་ཡོད་པའི་ཐོག་སློབ་དུས་གསར་པ་འགོ་བཙུགས་པའི་སྐབས་དེར་སློབ་གྲྭ་ཁག་ནང་བྱེད་སྒོ་སོགས་ཀྱི་ཐོག་ནས་བོད་ཕྲུག་ཚོར་སློབ་གསོ་བཏང་ཡོད་འདུག

མཐར་འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་ སྐད་ཀྱི་ཤེས་ཡོན་སློབ་གསོའི་གཞུང་ལུགས་ཐོག་ནས་བཤད་ན། ཁྱིམ་ཚང་སློབ་གསོ་མ་མ་བརྟེན་པར་སྐད་ཡིག་མི་རབས་རྗེས་མར་སློབ་སྦྱོང་སྤྲད་པའི་ཐབས་ལམ་གཞན་ཞིག་མེད་པ་གསལ་པོ་ཡོད། ཁྱིམ་ཚང་སློབ་གསོའི་ཐོག་ནས་ཕ་སྐད་དང་མ་ཡིག་སོ་སོའི་མི་རབས་རྗེས་མར་ཁྱིམ་ཚང་ནས་ནས་རྨང་གཞི་གཏིང་དགོས་པ་འདི་གསལ་པོ་རེད་ཅེས་གསུངས་བྱུང་།

མགོ་ལོག་ཏུ་ལོ་མང་རིང་སློབ་གསོ་སྤྲད་པའི་སློབ་གྲྭ་ཁག་སྒོ་བརྒྱབ་པའི་རྗེས་སུ། སློབ་མ་ཚོ་གང་དུ་བཏང་ཡོད་པ་དང་། ཁོང་ཚོར་བོད་སྐད་དང་རིག་གཞུང་གི་སློབ་གསོ་ག་ཚོད་ཙམ་མུ་མཐུད་ཐོབ་ཀྱི་ཡོད་པ། དེ་བཞིན་ཁྱིམ་ཚང་དང་ས་གནས་སྤྱི་ཚོགས་དང་འབྲེལ་བ་ཇི་ཙམ་ཉར་ཐུབ་མིན་ནི། བོད་ཁུལ་གྱི་སློབ་གསོར་ལྟ་སྐབས་གལ་ཆེའི་གནད་དོན་ཞིག་ཆགས་ཡོད།།

པར་རིས་སྒྲིག་བཟོ་དང་བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

འབྲེལ་ཡོད་གནས་ཚུལ།

མགོ་ལོག་རྨ་ཆེན་རྫོང་ཁོངས་སློབ་གྲྭ་༣ སྒོ་བརྒྱབ་པ་ནི་“མི་རིཊ་གནས་མི་ཐུབ་པ་བཟོ་ཐབས་རེད།"

མགོ་ལོག་ར་རྒྱའི་གངས་ལྗོངས་རྩྭ་ཐང་བུ་མོའི་སློབ་གྲྭ་ལོ་ ༢༡ རྗེས་སུ་སྒོ་བརྒྱབ་པ།

རྒྱ་ནག་གཞུང་གིས་བོད་ཀྱི་སློབ་གྲྭ་ཁག་སྒོ་བརྒྱབ་ནས་གཞི་རྩའི་ཐོབ་ཐང་རྡོག་རོལ་གཏོང་བཞིན་པ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཐེར་འདོན་གནང་འདུག

རྒྱ་ནག་གཞུང་གིས་བོད་ནང་སྒེར་གྱིས་བཙུགས་པའི་སློབ་གྲྭ་རིམ་པ་སྒོ་བརྒྱབ་ཏུ་བཅུག་པ།

རྒྱ་ནག་གཞུང་གིས་བོད་མདོ་སྨད་མགོ་ལོག་ནང་གནས་པའི་གངས་ལྗོངས་ཤེས་རིག་ནོར་གླིང་ལས་རིགས་སློབ་གྲྭ་སྒོ་བརྒྱབ་བཅུག་པའི་གནད་དོན་གླེང་མོལ།

རྒྱ་ནག་གཞུང་གིས་བོད་མདོ་སྨད་མགོ་ལོག་རྭ་རྒྱའི་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་བཙུགས་པའི་གངས་ལྗོངས་ཤེས་རིག་ནོར་གླིང་སློབ་གྲྭ་སྟེ། བོད་ཀྱི་རིག་གཞུང་དང་སྐད་ཡིག་ལ་སློབ་གཉེར་བྱེད་སའི་སྒེར་གཉེར་སློབ་གྲྭ་གྲགས་ཆེ་ཤོས་ཤིག་སྒོ་བརྒྱབ་བཅུག་འདུག

རྒྱ་ནག་གཞུང་གིས་སེང་འབྲུག་སྟག་རྩེ་སྒེར་གཉེར་སློབ་གྲྭ་སྒོ་བརྒྱབ་རྗེས་དྭ་ཕྲུག་སློབ་ཕྲུག་ཚོ་གར་འགྲོ་གང་བྱེད་མེད་པའི་གནས་སུ་ལྷག་ཡོད་འདུག

དམར་རུ་ཁོངས་གྲོང་ཚོ་གཅིག་པུ་ནས་མི་ ༡༠ རྐྱེན་འདས།

བོད་ནག་ཆུ་སྦྲ་ཆེན་རྫོང་ཁུལ་ནས་ཡིན་པའི་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་ཀྱིས། ནག་ཆུ་སྦྲ་ཆེན་རྫོང་ཁོངས་སོག་ཆུའི་སྟོད་རྒྱུད་དུ་ཆགས་པའི་དམར་རུ་ཁོངས་ཀྱི་གྲོང་ཚོ་ཞིག་གི་ནང་དུ་གཅིག་པུར་མི་ ༡༠ འདས་གྲོངས་སུ་ཕྱིན་འདུག་པས། རྒྱ་ནག་གཞུང་འབྲེལ་གྱིས་འདས་གྲོངས་ཕྱིན་པ་དང་རྨས་སྐྱོན་ཕོག་པའི་གྲངས་ཀ་དེ་དག་ནི་ཁུངས་ལྡན་མ་ཡིན་པར་འདས་གྲོངས་སུ་ཕྱིན་པའི་གྲངས་འབོར་དེ་བས་མང་བ་ཡོད་པའི་ཚོད་དཔག་གནང་གི་ཡོད་པ་གསུང་གི་འདུག་ལ། གྲོང་ཚོ་ཁ་ཤས་སུ་ཁང་པ་གཅིག་གཉིས་ལས་ལྷག་མེད་པ་སོགས་ཀྱི་གནས་སྟངས་བྱུང་འདུག་པས། ས་ཡོམ་བྱུང་པའི་དུས་སྐབས་དེ་ཡང་དགོང་དྲོ་འབྲོག་པ་རྣམས་གཉིད་ཉལ་བའི་དུས་ཚོད་ཡིན་དུས། མི་ཕོན་ཆེ་གྲོངས་ཡོད་ངེས་རེད། འོན་ཀྱང་ད་ལྟའི་ཆར་ས་གནས་སུ་རྒྱ་ནག་གཞུང་གིས་དམ་དྲག་ཆེན་པོ་བྱེད་བཞིན་འདུག་ཅེས་གསུང་གི་འདུག

(RFA Tibetan)

“མི་གྲངས་ ༢༠ ཉུང་མཐར་རྐྱེན་འདས་ཕྱིན་འདུག”

བོད་ཀྱི་ནག་ཆུ་གྲོང་ཁྱེར་སྦྲ་ཆེན་རྫོང་ཁུལ་དུ་འགུལ་ཚད་ ༧ ཅན་གྱི་ས་ཡོམ་གྱི་གནོད་འཚེ་བྱུང་པ་ལྟར། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས། རྒྱ་ནག་གཞུང་གིས་གོད་ཆག་དེ་འབྲེལ་རྒྱལ་སྤྱིའི་བརྒྱུད་ལམ་ཁག་ཏུ་ས་གནས་སུ་མྱུར་སྐྱོབ་ཀྱི་ལས་གཞི་ཤུགས་ཆེ་སྤེལ་བཞིན་ཡོད་པ་བསྒྲགས་འདུག་ཀྱང་། ཉེ་ལམ་ཡང་བལ་བོད་ས་མཚམས་སུ་འདམ་རུད་ཆུ་ལོག་གི་གོད་ཆག་བྱུང་སྐབས་རྒྱ་ནག་གཞུང་ངོས་ནས་གནས་ཚུལ་ཕྱི་གསལ་ནང་གསལ་མཁོ་སྤྲོད་བྱས་མེད་པའི་རྐྱེན་གྱིས། ཐེངས་འདིར་གནས་ཚུལ་ཕྱི་གསལ་ནང་གསལ་མ་བྱེད་བར་དུ་ཡིད་ཆེས་ཐུབ་དཀའ་ཞེས་གསུངས་སོང་།

ས་གནས་སུ་དམ་དྲག

བཀའ་ཤག་གིས་ཚེས་ ༢༣ ཉིན་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། ཚེས་ ༢༢ ཉིན་གྱི་ཕྱི་དྲོར་འབྱོར་བའི་ཁུངས་ལྡན་གནས་ཚུལ་ལྟར་ན། སྦྲ་ཆེན་རྫོང་ཁོངས་རྫ་སྲིབ་དང་དམར་རུ། གངས་ཅན་ས་ཁུལ་གཅིག་པུ་ནས་མི་གྲངས་ ༢༠ རྐྱེན་འདས་སུ་ཕྱིན་ཡོད་པ་དང་། བོད་ཀྱི་ས་ཁུལ་གང་ས་ནས་ངལ་སེལ་རོགས་སྐྱོར་དུ་འགྲོ་མཁན་རྣམས་ལ་དམ་དྲག་བྱེད་བཞིན་ཡོད་པ་སོགས་ཐེར་འདོན་གནང་འདུག

(RFA Tibetan)

ཟླ་ ༡༠ ཚེས་ ༢༢ ཉིན་གྱི་དགོང་མོ་ཆུ་ཚོད་ ༡༠ དང་སྐར་མ་ ༣༣ ཙམ་ལ་བོད་ཀྱི་ནག་ཆུ་གྲོང་ཁྱེར་སྦྲ་ཆེན་རྫོང་ཁུལ་དུ་ས་ཡོམ་གྱི་གོད་ཆག་བྱུང་ཡོད་པ་དང་། ཨ་རིའི་ས་ཡོམ་བརྟག་དཔྱད་དྲ་ཚིགས་ཐོག་ས་ཡོམ་དེ་ནི་འགུལ་ཚད་ ༧ ཅན་ཡིན་པ་བརྗོད་ཡོད། ཚེས་ ༢༢ ཉིན་རྒྱ་ནག་གཞུང་གིས་ས་ཡོམ་གནོད་འཚེ་འདིའི་ཁྲོད་ད་ལྟ་བར་མི་ ༡༦ འདས་གྲོངས་དང་ ༣༢ ལ་རྨས་སྐྱོན་ཕོག་ཡོད་སྐོར་བརྗོད་འདུག་ཀྱང་། (Reuters) གསར་ཁང་གིས་ཚེས་ ༢༣ ཉིན་རྨས་སྐྱོན་ཕོག་པའི་གྲངས་ཀ་ ༧༦ ལ་སླེབས་ཡོད་ཀྱང་། རྒྱ་ནག་གཞུང་འབྲེལ་བརྒྱུད་ལམ་དུ་འདས་གྲོངས་ཕྱིན་པའི་གྲངས་འབོར་ ༡༦ ཐོག་དེ་མུར་ལྷག་ཡོད་པ་བཀོད་འདུག

མཆོད་འབུལ་སྨོན་ལམ་གནང་པ།

ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ངོས་ནས། གནོད་འཚེ་ཕོག་མཁན་དང་ནང་མི་ལྟོས་བཅས་ལ་གདུང་སེམས་མཉམ་སྐྱེད་ཀྱི་གཞུང་འབྲེལ་མཆོད་འབུལ་སྨོན་ལམ་འཚོགས་སོང་བ་དང་། སྨོན་ལམ་ཐོག་བཅར་བའི་བོད་མི་ཁག་གཅིག་གིས་བོད་ནང་ས་ཡོམ་དང་ཆུ་རུད་སོགས་ཀྱི་གོད་ཆག་བསྟུད་མར་བྱུང་བཞིན་པ་ནི་རྒྱ་ནག་གཞུང་གིས་བོད་ཀྱི་ཁོར་ཡུག་ལ་གཏོར་བཤིག་གིས། བོད་ནང་ཚད་ལས་བརྒལ་བའི་འཛུགས་སྐྲུན་ལ་བརྟེན་ནས་བྱུང་བ་ཞིག་ཡིན་སྐོར་གསུང་མཁན་འདུག

བློ་བཟང་དཔལ་ལྡན་ལགས་ཀྱིས། རྒྱ་ནག་གཞུང་གིས་ཕྱི་ལོ་ ༡༩༥༩ ནས་བཟུང་རང་ཉིད་ཀྱི་དགོས་འདུན་གྲུབ་ཆེད་དུ་བོད་ནང་འགྱུར་བ་ཞེ་དྲགས་བཏང་ཡོད་པ་དང་། དཔེར་ན་གཏེར་ཁ་སྔོག་འདོན་དང་ཤིང་ནགས་གཅོད་འབྲེག་ལ་སོགས་པའི་ཁོར་ཡུག་ལ་གནོད་འཚེ་བྱེད་པ་སོགས་མ་འོས་པའི་ལས་དོན་མང་པོ་གྲུབ་པའི་རྐྱེན་གྱིས། འབྱུང་བ་འཁྲུག་གི་ཡོད་པ་དང་དེར་བརྟེན་ས་ཡོམ་དང་ཆུ་ལོག་གི་གནོད་འཚེ་མང་པོ་འབྱུང་བཞིན་ཡོད་པས། དེ་དག་བྱུང་ཚེ་སྤྱི་ཡོངས་ལ་གནོད་ཀྱི་ཡོད་པས་དེ་རིགས་འགྱུར་བ་གཏོང་ཚེ་ཕན་ཐོགས་ཆེན་པོ་ཡོད་པ་གསུང་གི་འདུག་ལ། ཚེ་དབང་རིག་འཛིན་ལགས་ཀྱིས། རྒྱ་ནག་གཞུང་གིས་བོད་ཀྱི་ཁོར་ཡུག་ལ་གཏོར་སྐྱོན་བཏང་བ་དེ་ཨེ་ཤེ་ཡ་གཙོ་བོར་གྱུར་བའི་འཛམ་གླིང་ཁྱོ་ཡོངས་ལ་གནོད་ཀྱི་ཡོད་པས། རྒྱ་ནག་གིས་རྒྱལ་སྤྱིའི་ཚོགས་འདུའི་ཁྲོད་བོད་ཀྱི་ཁོར་ཡུག་སྲུང་སྐྱོབ་བྱེད་ཀྱི་ཡོད་ཚུལ་བརྗོད་ཀྱི་ཡོད་ཀྱང་། དངོས་སུ་ལག་བསྟར་བྱེད་ཀྱི་མེད་པར་བརྟེན་བོད་མི་མང་པོའི་ཚེ་སྲོག་ཤོར་བཞིན་ཡོད་པ་གསུང་གི་འདུག ཡང་སྐལ་བཟང་དོན་གྲུབ་ལགས་ཀྱིས། རྒྱ་ནག་གིས་བྱེད་སྟངས་མ་ཤེས་ནས་ཆུ་རགས་མང་པོ་འཛུགས་སྐྲུན་བྱས་ཏེ། ཆུ་རགས་དེ་དག་གིས་ས་གཤིས་ལ་གནོད་སྐྱོན་ཕྱིན་ཏེ་གོད་ཆག་དེ་དག་བྱུང་གི་ཡོད་པར་སེམས་ཞེས་འདི་ག་རླུང་འཕྲིན་ཁང་ལ་གསུངས་བྱུང་།

(RFA Tibetan)

ཐེངས་འདིར་བོད་ཀྱི་ནག་ཆུ་གྲོང་ཁྱེར་སྦྲ་ཆེན་རྫོང་ཁུལ་དུ་བྱུང་བའི་ས་ཡོམ་འགུལ་ཚད་ ༧ ཅན་གྱི་གནོད་འཚེ་དེ་ནི། ཕྱི་ལོ་ ༢༠༢༥ ཟླ་ ༡ ཚེས་ ༧ ཉིན་བོད་ཀྱི་གཞིས་ཀ་རྩེ་ས་ཁུལ་དིང་རི་རྫོང་དུ་ས་ཡོམ་འགུལ་ཚད་རིམ་པ་ ༧.༡ བརྒྱབ་སྟེ། ས་ཡོམ་ཁྲོད་མི་༡༢༦རྐྱེན་འདས་དང་མི་གྲངས་ ༣༣༧ ལ་རྨས་སྐྱོན་ཕོག་པ་སོགས་བྱུང་བའི་རྗེས་སུ་འགུལ་ཚད་ཤུགས་ཆེ་དེ་ལྟར་བྱུང་བ་ཐོག་མ་དེ་ཆགས་ཀྱི་ཡོད་པ་རེད། བཞུགས་སྒར་རྡ་སར་ནག་ཆུའི་ས་ཡོམ་ཁྲོད་རྐྱེན་འདས་དང་རྨས་སྐྱོན་ཕོག་པ་སོགས་ཡོངས་ཀྱི་ཆེད་དུ་གདུང་སེམས་མཉམ་སྐྱེད་ཆེད་ཕྱི་དྲོར་མར་མེ་ཁྲོམ་སྐོར་གནང་སོང་།།

པར་ལེན་དང་བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

འབྲེལ་ཡོད་གནས་ཚུལ།

ནག་ཆུ་སྦྲ་ཆེན་རྫོང་དུ་ས་ཡོམ་འགུལ་ཚད་ ༧ བརྒྱབ་སྟེ་མི་ ༡༦ རྐྱེན་འདས་དང་ ༤༦ ལ་རྨས་སྐྱོན།

བརྗེ་ལེན་གྱི་ལས་རིམ་འདི་དང་འབྲེལ་བའི་ཐད་གོ་སྒྲིག་གནང་མཁན་གྱི་འགན་འཁུར་བ་ J&V originals co.,LTD འགན་འཛིན་ཝི་ཝིཡན་ལིའུ་ཡིས་གསུངས་དོན་དུ། ང་ཚོས་བོད་ཀྱི་ཟློས་གར་ཚོགས་པར་ཐེ་ཝན་དུ་གདན་ཞུས་གནང་སྟེ། རིག་གཞུང་འཁྲབ་སྟོན་གནང་བ་དེས་འཁྲབ་སྟོན་ཙམ་མིན་པར། དེ་ནི་ཧ་ཅང་གི་ངོ་མཚར་ཆེ་བའི་ལོ་རྒྱུས་རང་བཞིན་ལྡན་པའི་རིག་གཞུང་དེ་དག་མུ་མཐུད་རྒྱུན་འཛིན་དང་མི་རབས་གསར་པ་ཚོར་བློ་སྐྱེད་སྤེལ་རྒྱུ་སོགས་ལ་དམིགས་ཏེ་གོ་སྒྲིག་ཞུས་པ་ཡིན་པ་གསུངས་བྱུང་།

(J & V Originals Co., Ltd.)

ཕྱོགས་གཅིག་ནས་རྒྱ་ནག་གཞུང་གིས། བོད་ཀྱི་སྲོལ་རྒྱུན་གྱི་ཟློས་གར་སྒྱུ་རྩལ་ལ་རྒྱ་ནག་གི་ཁྱད་ཆོས་ལྡན་པའི་རྣམ་པའི་ཐོག་ནས་སྲེ་ལྷད་བྱས་དང་བྱེད་མུས་ཡིན་པའི་དུས་སྐབས་འདིར། བཙན་བྱོལ་དུ་ཡོད་པའི་བོད་མི་རྣམས་ཀྱིས་རང་གི་ཐུན་མིན་སྲོལ་རྒྱུན་གྱི་རིག་གཞུང་དང་ཟློས་གར་སྒྱུ་རྩལ་རྣམས་དྲི་མ་མེད་པར་འཛིན་སྐྱོང་སྤེལ་གསུམ་བྱེད་རྒྱུ་ནི་འགག་རྩ་ལ་ཐུགས་ཡོད་ཅེས་ཐེ་ཝན་རྒྱ་རིགས་གཟིགས་མོ་བ་ཞིག་གིས་གསུངས་བྱུང་།

ད་རེས་ཐེ་ཝན་དུ་ཨེ་ཤེ་ཡའི་སྒྱུ་རྩལ་དང་རིག་གཞུང་འཁྲབ་སྟོན་གྱི་དུས་སྟོན་གོ་སྒྲིག་གནང་མཁན་རྣམས་ཀྱིས། ཐེངས་འདིའི་དུས་སྟོན་དེས་ཐེ་ཝན་གྱི་མི་མང་དང་བོད་མིའི་བར་སྲོལ་རྒྱུན་དང་དེང་རབས་ཀྱི་རིག་གཞུང་བརྗེ་ལེན་བྱས་ཏེ། ཕན་ཚུན་གོ་རྟོགས་ཟབ་ཏུ་གཏོང་བར་ཕན་ཐོགས་ཆེན་པོ་བྱུང་སྐོར་ཐེ་ཝན་གྱི་མི་རིགས་ཡིན་པ་ཧུའང་། ཧིན་ཧུཡི། དང་བྷེ་ཊི་བཅས་གཟིགས་མོ་བ་ཁག་ཅིག་གིས་བརྗོད་བྱུང་།

J&V Originals Co., Ltd. (雙象文創有限公司) ནི་ཕྱི་ལོ་ ༢༠༡༠ ཟླ་ ༣ པར་གསར་འཛུགས་བྱས་པའི་ཐེ་ཝན་གྱི་རིག་གནས་དང་གསར་གཏོད་ལས་རིགས་ཀྱི་ཚོང་ལས་ཁང་ཞིག་ཡིན་ཞིང་།ཚོང་ལས་ཁང་གི་ལྟེ་གནས་ཐེ་ཝན་གྱི་ཐའེ་པེ་གྲོང་ཁྱེར་དུ་ཡོད་པ་རེད། ཚོང་ལས་ཁང་འདིས་གཙོ་བོ་རིག་གནས་དང་སྒྱུ་རྩལ་གྱི་མཛད་སྒོ་ཁག་དང་། འཁྲབ་སྟོན་སྒྱུ་རྩལ། འགྲེམས་སྟོན། མཛད་སྒོའི་འཆར་འགོད་དང་གོ་སྒྲིག དེ་བཞིན་དྲིལ་བསྒྲགས་ཞབས་ཞུ་སོགས་ཀྱི་ལས་དོན་གཉེར་བཞིན་ཡོད་པ་རེད།

ཐེ་ཝན་དུ་བསྐོང་ཚོགས་བྱས་པའི་ཧི་མ་ལ་ཡའི་རིག་གཞུང་དུས་སྟོན་ཐོག་བོད་དང་བལ་ཡུལ། རྒྱ་གར་སོགས་ཧི་མ་ལ་ཡའི་རི་རྒྱུད་དང་འབྲེལ་བའི་རིག་གཞུང་སྣ་ཚོགས་ཤིག་འགྲེམས་སྟོན་དང་འཁྲབ་སྟོན་གནང་འདུག

བོད་ཀྱི་ཟློས་གར་ཚོགས་པ་ནི། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་ཀྱི་ཐུན་མོང་མ་ཡིན་པའི་ཟློས་གར་དང་རོལ་དབྱངས་ཀྱི་སྒྱུ་རྩལ་མི་ཉམས་རྒྱུན་འཛིན་སླད་ ༡༩༥༩ ལོར་བཙན་བྱོལ་ལ་ཆིབས་སྒྱུར་གནང་མ་ཐག དུས་ཡུན་ཟླ་བ་ ༥ ཡི་རྗེས་ལ་ཟློས་གར་ཚོགས་པ་དེ་གསར་འཛུགས་གནང་པ་ཞིག་ཡིན་པ་རེད།།

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

ད་རེས་ཀྱི་ས་ཡོམ་གནོད་འཚེ་འདིའི་ཁྲོད་ད་ལྟ་བར་མི་ ༡༦ འདས་གྲོངས་སུ་སོང་ཡོད་པ་དང་། མི་ ༤༦ ལ་རྨས་སྐྱོན་ཕོག་ཡོད་པའི་ཁོངས་ནས་མི་ ༡༡ ལ་རྨས་སྐྱོན་ཚབས་ཆེན་ཕོག་ཡོད་ཅིང་། ཁང་པ་ལོག་པ་སོགས་ཁྱིམ་དུད་ ༣༣༩ ཙམ་ལ་གནོད་འཚེ་བྱུང་ཡོད་སྐོར་རྒྱ་ནག་གཞུང་འབྲེལ་བརྒྱུད་ལམ་ནས་གནས་ཚུལ་སྤེལ་འདུག

(RFA Tibetan)

ཡང་གཞུང་ཕྱོགས་ནས་གསལ་བསྒྲགས་སྤེལ་བའི་ནང་གོར་མོ་ནས་ལྷ་ས་བར་གྱི་རི་ལི་འདི་ནག་ཆུ་བརྒྱུད་སྐྱོད་ཀྱི་ཡོད་པར་བརྟེན་བཀག་ཡོད་པ་བརྗོད་འདུག་ལ། ས་ཡོམ་སྐབས་རི་ནས་རྡོ་ལྷུང་སྟེ་གཞུང་ལམ་འགག་པའི་གནས་ཚུལ་ཡང་ཐོན་འདུག

(Citizen Photo via REUTERS)

རྒྱ་ནག་གི་ས་ཡོམ་བརྟག་དཔྱད་དྲ་ཚིགས་ཐོག་ས་ཡོམ་གྱི་གཏིང་ཚད་ཁོ་ལོ་མི་ཌར་ ༡༠ ཙམ་དང་། ས་ཡོམ་བྱུང་ཡུལ་ལྟེ་གནས་ཀྱི་ཉེ་འཁོར་ས་བབ་མཐོ་ཚད་ཆ་སྙོམས་མི་ཌར་ ༤༨༦༤ ཙམ་ཡོད་པའི་ས་མཐོའི་བྱང་ཐང་ཁུལ་དུ་ཡིན་སྐོར་བརྗོད་འདུག

དེ་མིན་ཁང་པ་དང་ལམ། གློག་སོགས་རྨང་གཞིའི་སྒྲིག་ཆས་ལ་གཏོར་བཤིག་ཇི་ཙམ་བྱུང་ཡོད་མེད་གནས་ཚུལ་ཁ་གསལ་མི་འདུག

(མི་སེར་གྱི་འདྲ་པར།)

འོན་ཀྱང་སྤྱི་ཚོགས་དྲ་ལམ་ཐོག་ནས་མཐོང་བའི་གནས་ཚུལ་ལ་གཞིགས་ན། གཞུང་ལམ་དང་ཁང་པར་སེར་ཁ་གས་པ་དང་། ཁང་པ་ལོག་པ། རི་ནས་རྡོ་ཟགས་ཏེ་གཞུང་ལམ་འགག་པ་དང་། མང་ཚོགས་མཚན་མོ་ཁང་པའི་ཕྱི་ལ་ཐོན་ནས་འགའ་རེ་མོ་ཌའི་ནང་བསྡད་པ་དང་འགའ་རེ་ཐང་དུ་བསྡད་ཡོད་པ་མཐོང་རྒྱུ་འདུག

རྒྱ་ནག་གཞུང་གི་བརྒྱུད་ལམ་ནང་མྱུར་སྐྱོབ་བྱེད་མཁན་མི་གསོད་རུ་ཁག་དང་དམག་མི་སོགས་མངགས་གཏོང་བྱས་པ་བརྗོད་འདུག

ས་ཡོམ་འགུལ་ཚད་རིམ་པ་ ༧ བྱུང་བའི་རྗེས་སུ་དགོང་དྲོ་ཆུ་ཚོད་༡༠ སྐར་མ་ ༥༩ ཡི་ཐོག་འགུལ་ལྷག་རིམ་པ་ ༣.༩ ཞིག་བྱུང་འདུག་ལ། དེ་རྗེས་ཆུ་ཚོད་༡༢དང་སྐར་མ་༣ གྱི་ཐོག་འགུལ་ལྷག་རིམ་པ་༣.༤ བྱས་པ་སོགས་འགུལ་ལྷག་ཐེངས་ཁ་ཤས་བྱུང་འདུག

པར་རིས་སྒྲིག་བཟོ་བ། ནོར་སྡེ་སྒྲོལ་མ།

བརྙན་པར་སྒྲིག་སྦྱོར་བ། སྒྲོལ་དཀར།

ཕྱི་ལོ་ ༢༠༢༦ ཟླ་ ༧ ཚེས་ ༥ ཉིན་རྭ་རྒྱ་དགོན་པའི་མཁན་ཟུར་བློ་བཟང་བསྟན་པ་ལགས་ཀྱི་གྲྭ་ཤག་གི་མཆོད་ཁང་ནང་ནས། རྒྱ་ནག་ཉེན་རྟོག་པས་༧གོང་ས་༧སྐྱབས་མགོན་ཆེན་པོའི་སྐུ་པར་བཀའ་སློབ་མཐེབ་སྡེར་རིགས་རྙེད་སོན་བྱུང་ཡོད་པར་བརྟེན། ཁོང་ལ་དུས་ཡུན་ལོ་ལྔའི་བཙོན་འཇུག་ཁྲིམས་ཐག་བཅད་འདུག

དེ་ཡང་ཐེའི་ལྦན་བཅའ་བཞུགས་ཆབ་སྲིད་བཙོན་ཟུར་རྭ་རྒྱ་དགེ་བཤེས་བློ་བཟང་དཔལ་ལྡན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་པ་ལྟར་ན། ཕྱི་ལོ་ ༢༠༢༦ ཟླ་ ༧ ཚེས་ ༥ ཉིན་རྭ་རྒྱ་དགོན་པའི་མཁན་ཟུར་བློ་བཟང་བསྟན་པ་ལགས་ཀྱིས་གྲྭ་ཤག་གི་སྒོར། མི་གཞན་ནང་དུ་འགྲོ་མི་ཆོག་པའི་རྒྱ་ཡིག་གི་སྦྱར་བྱང་ཞིག་སྦྱར་ཡོད་པ་དང་། སྐབས་དེར་སུ་གང་གིས་ཀྱང་ཁོང་ལ་གནས་ཚུལ་ཅི་བྱུང་ཤེས་རྟོགས་བྱུང་མི་འདུག དེ་རྗེས་སུ་གོ་ཐོས་ལྟར་ན། ཉེན་རྟོག་པས་ཁོང་གི་གྲྭ་ཤག་ལ་བསྔོག་བཤེར་སྐབས། མཆོད་ཁང་ནང་དུ་༧གོང་ས་༧སྐྱབས་མགོན་ཆེན་པོའི་སྐུ་པར་དང་། མཐེབ་སྡེར་རམ་ཡིག་ཆ་གསོག་སྣོད་ཅིག་གི་ནང་དུ་༧གོང་ས་མཆོག་གི་བཀའ་སློབ་རིགས་དང་། ཁོང་གི་བརྙན་རིས་ཁ་ཤས་ཡོད་པ་རྙེད་སོན་བྱུང་ཡོད་ཚུལ་དང་། དེར་བརྟེན་ཁོང་ལ་དུས་ཡུན་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་འགྲེལ་བརྗོད་གནང་བྱུང་།

གནས་ཚུལ་མཁོ་སྤྲོད་པ་གཞན་ཞིག་གིས། ད་ལྟའི་ཆར་ཁོང་ཟི་ལིང་གི་ས་ཕག་བཟོ་གྲྭའི་ནང་ངལ་རྩོལ་བཙོན་འཇུག་བྱས་ཡོད་འདུག ཉེན་རྟོག་པས་ཁོང་འཛིན་བཟུང་སྐབས་ནང་མིར་བརྡ་ཐོ་བཏང་ཡོད་མེད་དང་། ཁྲིམ་བཤེར་སྐབས་རང་ཉིད་ལ་འདོད་པ་ཡོད་པའི་ཁྲིམས་རྩོད་པ་རག་ཡོད་མེད་བཅས་ལ་གསལ་ཁ་གང་ཡང་མི་འདུག ས་གནས་ལ་དམ་དྲག་ཆེ་སྟབས། འདིའི་སྐོར་གྱི་གནས་ཚུལ་བཤད་ཐུབ་མཁན་མི་འདུག་ཅེས་གསུང་གི་འདུག

ད་ཐེངས་གཅིག་པུ་མ་ཡིན་པར་སྔ་ལོར་ཡང་ཁོང་གིས་༧གོང་ས་༧སྐྱབས་མགོན་ཆེན་པོ་མཆོག་དགུང་ལོ་དགུ་བཅུར་ཕེབས་པའི་གོ་སྟོན་སྐབས་ས་གནས་སུ་༧སྐུའི་ཞབས་བརྟན་སོགས་ཀྱི་བྱེད་སྒོ་སྤེལ་བའི་ཉེས་པ་བཅུགས་ཏེ་མགོ་ལོག་རྨ་ཆེན་རྫོང་ཉེན་རྟོག་པས་ཁོང་བཀག་འགོག་གི་གནས་ཚུལ་ཞིག་ཀྱང་བྱུང་འདུག

དགེ་བཤེས་བློ་བཟང་དཔལ་ལྡན་ལགས་ཀྱིས་མུ་མཐུད་གསུངས་དོན་དུ། ཕྱི་ལོ་ ༢༠༢༥ ནང་༧གོང་ས་༧སྐྱབས་མགོན་ཆེན་པོ་མཆོག་དགུང་ལོ་དགུ་བཅུའི་གོ་སྟོན་སྐབས། མཁན་ཟུར་བློ་བཟང་བསྟན་པ་ལགས་ཀྱིས་ས་གནས་མི་མང་ལ་༧གོང་ས་མཆོག་གི་ཞབས་བརྟན་དང་། མཚན་སྔགས་བློ་འཛིན་གྱི་དགེ་བསྐུལ་བྱས་ཏེ། ཞབས་བརྟན་མང་དུ་གསོག་མཁན་རྣམས་ལ། ༧གོང་ས་མཆོག་གི་བཀའ་སློབ་ཚན་པ་ཞིག་བྲིས་པའི་གཟེངས་རྟགས་སྤྲད་པར་བརྟེན། ཕྱི་ལོ་ ༢༠༢༥ ཟླ་ ༥ ནང་མགོ་ལོག་རྨ་ཆེན་རྫོང་ཉེན་རྟོག་པས་བཀག་འགོག་དང་། ཉིན་མང་པོའི་རིང་འདྲི་རྩད་སྣ་ཚོགས་བྱས་ནས་གློད་ཡོད་པའི་སྐོར་གསུངས་བྱུང་།

མཁན་ཟུར་བློ་བཟང་བསྟན་པ་ལགས་འཛིན་བཟུང་དང་འབྲེལ་བཙན་བྱོལ་ནང་གནས་སྡོད་བོད་མི་ཁག་ཅིག་གིས། གནས་སྟངས་དེས་བོད་ནང་ཆོས་དད་རང་དབང་མེད་པའི་རྣམ་པ་གསལ་པོར་མཚོན་ཞིང་། ཁོང་གང་མྱུར་གློད་བཀྲོལ་དགོས་པ་ནན་སྐུལ་བྱེད་ཀྱི་འདུག

དེ་ཡང་རྡ་སར་གནས་སྡོད་མཚམས་གཅོད་ལགས་ཀྱིས། རྒྱ་ནག་གཞུང་གི་རྩ་ཁྲིམས་ནང་བོད་ནང་ཆོས་དད་རང་དབང་ཡོད་པའི་གནས་སྟངས་བཤད་ཀྱི་ཡོད་ཀྱང་། ད་ཆ་མཁན་པོ་ལགས་འཛིན་བཟུང་བྱས་ཡོད་པ་དེས་བོད་ནང་ཆོས་དད་རང་དབང་མེད་པའི་རྣམ་པ་གསལ་པོར་མཚོན་ཐུབ་ཅིང་། ཁོང་གིས་༧གོང་ས་མཆོག་གི་སྐུ་པར་ཉར་ཚགས་གནང་བ་དེ་ནག་ཉེས་གང་གི་ཁོངས་སུ་ཡིན་པ་དང་ཁྲིམས་ག་རེ་འགལ་ཡོད་རེད་ཅེས་དྲིས་འདོད་བྱུང་ཞེས་གསུང་གི་འདུག་ལ། དེ་འབྲེལ་བསྟན་འཛིན་བདེ་སྐྱོང་ལགས་ཀྱིས། རྒྱ་ནག་གཞུང་གིས་མཁན་པོ་ཁོང་འཛིན་བཟུང་བྱས་པ་དེ་ནི་ཁོང་གིས་༧གོང་ས་མཆོག་གི་སྐུ་པར་ཉར་ཚགས་དང་། བོད་ཀྱི་ཆོས་དང་རིག་གཞུང་མཁྱེན་རྒྱ་ཡངས་པའི་རྐྱེན་གྱིས་རེད་འདུག་པས། བྱེད་བབ་དེ་དག་ནི་རྒྱ་ནག་གཞུང་གིས་མི་རིགས་མཐུན་སྒྲིལ་གྱི་ཁྲིམས་བརྒྱུད་བོད་མི་རིགས་རྩ་བརླག་གཏོང་བའི་སྲིད་བྱུས་ཤིག་ཡིན་པས། དེར་ངོ་རྒོལ་དང་གང་མགྱོགས་གློད་བཀྲོལ་དགོས་པ་ནན་བརྗོད་བྱ་རྒྱུ་ཡིན་ཞེས་གསུང་གི་འདུག

རྭ་རྒྱ་དགོན་པའི་མཁན་ཟུར་བློ་བཟང་བསྟན་པ་ལགས་ནི། རྭ་རྒྱ་དགོན་པའི་མཁན་རབས་ང་བཞི་པ་དང། ཁོང་ཕྱི་ལོ་ ༡༩༦༥ ལོར་ཙང་ཀི་ཚོ་སྡེ་བཞིའི་ནང་ཚན། ཧཱ་ཤིས་ཧ་སྡེ་བར་ཡབ་སྐལ་བཟང་དར་རྒྱས་དང་། ཡུམ་འཕགས་ཅ་གཉིས་ཀྱི་སྲས་སུ་འཁྲུངས་ཤིང་། དགུང་ལོ་བརྒྱད་ནས་བཟུང་སློབ་གྲྭར་ཞུགས་ཏེ་སློབ་ཆུང་མཐར་ཕྱིན། ཕྱི་ལོ་ ༡༩༨༣ ལོར་དགེ་བའི་བཤེེས་གཉེན་མཁན་ཟུར་བཟོད་པ་རྒྱ་མཚོའི་མདུན་ནས་རབ་ཏུ་བྱུང་སྟེ་རྭ་རྒྱ་དགོན་དུ་ཆོས་ཞུགས་བྱས་ཤིང་། ཁོང་ནམ་རྒྱུན་སློབ་གཉེར་ལ་སྦྱང་བརྩོན་ཆེ་ཞིང་། མི་རིགས་གྱི་ལར་ཞེན་དང་། ༧གོང་ས་༧སྐྱབས་མགོན་ཆེན་པོ་མཆོག་ལ་དད་དམ་གཙང་བ་ཞིག་ཡིན་པ་གནས་ཚུལ་མཁོ་སྤྲོད་པས་འདི་ག་རླུང་འཕྲིན་ཁང་ལ་གསུངས་བྱུང་།

རྩ་བའི་རྒྱ་ནག་གཞུང་གིས་འདས་པའི་ཟླ་བ་གསུམ་ནང་། མགོ་ལོག་རྨ་ཆེན་རྫོང་ཁོངས་བོད་པའི་སློབ་གྲྭ་ ༣ སྒོ་བརྒྱབ་པའི་གནས་ཚུལ་ཞིག་ཀྱང་ཐོན་ཡོད་པ་ནི། གནད་དོན་དབྱེ་ཞིབ་པ་ཚོས་དེ་ནི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཁྲིམས་ཡིག་ལ་བརྟེན་ནས་བྱུང་བ་ཞིག་དང་། “མི་རིགས་གསོན་གནས་མེད་པ་བཟོ་ཐབས་རེད།” ཅེས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ཡོད་ལ། མགོ་ལོག་ཁུལ་གྱི་སློབ་གྲྭ་གསུམ་སྒོ་བརྒྱབ་པ་དང་ལྷན་དུ། དེའི་ཉེ་འཁོར་ཏེ། དཔེར་ན་རྭ་རྒྱ་དགོན་པ་དང་ཉེ་འཁོར་གྱི་ཡུལ་སྡེ་ཚོར་རྒྱ་གཞུང་གིས་མི་རིགས་ལ་བསུན་གཙེར་དང་། རིག་གཞུང་ལ་དམ་དྲག་བྱེད་བཞིན་ཡོད་པ་རེད་འདུག

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

ཟླ་ ༡༠ ཚེས་ ༢༡ ཉིན་ཨ་རིའི་གྲོས་ཚོགས་འོག་མའི་ཁྲལ་བསྡུ་དང་ཐབས་བྱུས་ཚོགས་ཆུང་གི་ཚོགས་གཙོ་ཇེ་སཎ་སིམིཐ་ (Jason Smith) ལགས་ཀྱིས་སྣེ་ཁྲིད་པའི་གྲོས་ཚོགས་འོག་མའི་འཐུས་མི་ལྔ་དམིགས་བསལ་གནམ་གྲུ་བརྒྱུད། ཆེད་དུ་བཞུགས་སྒར་རྡ་སར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁར་བཅར་སོང་།

གྲོས་ཚོགས་འཐུས་མི་ཇེ་སཎ་སིམིཐ་ (Jason Smith) ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གི་བཀའ་དྲིར་ལན་འདེབས་གནང་སྐབས། ཐེངས་འདིར་༧གོང་ས་༧སྐྱབས་མགོན་ཆེན་པོ་མཆོག་མཇལ་རྒྱུ་བྱུང་བ་དང་བཀའ་མོལ་ཞུ་རྒྱུ་བྱུང་བ་དེར་དགའ་ཚོར་ཆེན་པོ་བྱུང་ཞེས་དང་། ༧གོང་ས་༧སྐྱབས་མགོན་ཆེན་པོ་མཆོག་དགུང་ལོ་བགྲེས་པོར་ཕེབས་བཞིན་པའི་སྐབས་འདིར། ཨ་རིའི་ངོས་ནས་མུ་མཐུད་ལས་འགན་རྒྱུན་སྐྱོང་བྱ་རྒྱུ་གལ་ཆེ་ཞིང་། ང་ཚོའི་དབར་མཐུན་པའི་ཆ་མང་པོ་ཡོད། ཨ་རིའི་སྤྱི་མཐུན་ཚོགས་པ་དང་མང་གཙོ་ཚོགས་པའི་གཞུང་འཛིན་སུ་ཡིན་མིན་ལ་མ་ལྟོས་པར་ཚང་མས་༧གོང་ས་༧སྐྱབས་མགོན་ཆེན་པོ་མཆོག་དང་ཁོང་གི་བོད་ཐོག་གི་དགོངས་གཞིར་རྒྱབ་སྐྱོར་ཤུགས་ཆེ་གནང་གི་ཡོད། ཅེས་གསུངས་བྱུང་།

(OHHDL)

མཇལ་ཁའི་སྐབས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཡིན་དུས་ཕན་ཚུན་རོགས་ཕན་བྱེད་རྒྱུ་ཧ་ཅང་གལ་ཆེ་ཞིང་། ངས་ཨ་རི་གཙོ་བོར་གྱུར་བའི་ནུབ་ཕྱོགས་རྒྱལ་ཁབ་ཚོས་ང་ཚོར་རྒྱབ་སྐྱོར་ཤུགས་ཆེ་གནང་བར་མངགས་བརྗོད་དང་རྗེས་སུ་ཡིད་རངས་ཞུ་ཡི་ཡོད་ཅེས་གྲོས་ཚོགས་འཐུས་མི་རྣམས་ལ་བཀའ་བསྩལ་འདུག

ཨ་རིའི་གྲོས་ཚོགས་འོག་མའི་ཁྲལ་བསྡུ་དང་ཐབས་བྱུས་ཚོགས་ཆུང་གི་ཚོགས་གཙོ་ཇེ་སཎ་སིམིཐ་ (Jason Smith) ལགས་ཀྱིས་སྣེ་ཁྲིད་པའི་གྲོས་ཚོགས་འོག་མའི་འཐུས་མི་ལྔ་པོ་དེ་དག་ལས་གཅིག་མ་གཏོགས་གཞན་ཆ་ཚང་སྤྱི་མཐུན་ཚོགས་པའི་གྲོས་ཚོགས་འཐུས་མི་ཡིན་འདུག་ཅིང་། བཞུགས་སྒར་རྡ་སར་བཅར་བའི་གྲོས་ཚོགས་འཐུས་མི་ཁོང་རྣམས་ནི། གྲོས་ཚོགས་འཐུས་མི་ཌེ་ཝིཌ་ ཤུཝེ་ཀརྚ་ (Rep.David Schweikert) ལགས་དང་། ཨེ་ལིས་ སཊེ་ཧྥེ་ནིཀ་ (Rep Elise Stefanik)། ཨེན་ཌི་ཨོ་གྷལསི་ (Rep. Andy Ogles)། ལའོ་རཱ་ ཧྥརེཌ་མན་ (Rep Laura Friedman) བཅས་ཡིན་པ་དང་། ཁོང་རྣམས་མཇལ་ཁ་གྲུབ་མ་ཐག་འཕྲལ་མར་བཞུགས་སྒར་རྡ་སའི་ཉེ་འདབས་སུ་ཆགས་པའི་གྷ་གྷལ་གནམ་ཐང་ནས་ཕེབས་ཐོན་གནང་སོང་།

རྩ་བའི་ཉེ་ལམ་ཟླ་ ༩ པའི་ཟླ་མཇུག་ཏུ་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་བྷརཱ་ཡེན་མསཏི་ (Brian Mast) ལགས་ཀྱིས་སྣེ་ཁྲིད་པའི་ཨ་རིའི་ཆབ་སྲིད་ཚོགས་པ་ཟུང་སྦྲེལ་གྱི་གྲོས་ཚོགས་འཐུས་མི་ཁག་ཅིག་བཞུགས་སྒར་རྡ་རམ་ས་ལར་ཆེད་དུ་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁར་བཅར་ཡོད་ཅིང་། སྐབས་དེར་ཁོང་རྣམས་ནས་ཀྱང་ཨ་རིའི་ངོས་ནས་བོད་དོན་ལ་རྒྱབ་སྐྱོར་མུ་མཐུད་གནང་ངེས་ཡིན་པ་ནན་བརྗོད་གནང་ཡོད་པ་རེད།།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

འབྲེལ་ཡོད་གནས་ཚུལ།

ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པས་༧གོང་ས་མཆོག་གི་མཇལ་ཁ་ཞུས་པ།

ཨ་རིའི་གྲོས་ཚོགས་ཀྱི་ཆབ་སྲིད་ཚོགས་པ་ཟུང་སྦྲེལ་གྱི་སྐུ་ཚབ་ཚོགས་པ་ཞིག་རྡ་སར་ཕེབས་པ།

ཆོས་ཚོགས་ཀྱི་དབུ་འཛིན་ཉི་ཡག་སྤྲུལ་སྐུ་མཆོག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་དོན་ལྟར་ན། ད་རེས་ཀྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མངྒ་ (Prem Singh Tamang) མཆོག་དང་ས་སྐྱ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་གིས་དབུས་པས་འབྲས་གཞུང་དགོན་གནས་བློན་ཆེན་བསོད་ནམས་བླ་མ་མཆོག གཞན་ཡང་མངའ་སྡེའི་བློན་ཆེན་ཁག་ཅིག་དང་། འབྲས་ལྗོངས་ཁུལ་གྱི་རིས་མེད་དགོན་སྡེ་ཁག་གི་སྐུ་ཚབ་དང་མཁན་བླ་འདུས་མང་ཡོངས། དད་ལྡན་མང་ཚོགས་བཅས་བརྒྱ་ཕྲག་དུ་མ་ལྷན་འཛོམས་གནང་ཡོད་པ་རེད།

(RFA Tibetan)

འབྲས་གཞུང་དགོན་གནས་བློན་ཆེན་བསོད་ནམས་བླ་མ་ལགས་ཀྱིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་གིས་དུས་རྒྱུན་དུ་ནང་པ་སངས་རྒྱས་པའི་བསྟན་པ་འབྲས་ལྗོངས་ཙམ་མིན་པར་འཛམ་གླིང་ཁྱོན་ཡོངས་སུ་དར་ཁྱབ་ཡོང་ཆེད་ཐུགས་འཁུར་དང་རྒྱབ་སྐྱོར་གང་ཡོང་གནང་བཞིན་པ་ལ་འབྲས་ལྗོངས་ནང་གི་བླ་མ་དང་དགེ་འདུན་པ་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་བཞིན་ཡོད་ཅེས་གསུངས་སོང་།

(པྲེམ་སིངྒ་རྟ་མང་།)

ཡང་ཕྱི་ཟླ་ ༡༠ ཚེས་ ༡༨ ཉིན་དཔལ་ས་སྐྱ་ཁྲི་འཛིན་ཞེ་གཉིས་པ་རཏ་ན་བཛྲ་རིན་པོ་ཆེ་མཆོག་གིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མངྒ་ (Prem singh Tamang) མཆོག་དང་མཇལ་མོལ་གནང་ཡོད་པ་དང་། སྐབས་དེར་མངའ་སྡེའི་སྤྱི་ཁྱབ་བློན་ཆེན་མཆོག་གིས་ད་རེས་རིན་པོ་ཆེ་མཆོག་གིས་མཇལ་ཁ་ཐོབ་པ་དེ་གུས་ཞབས་དང་བྱིན་རླབས་ལྡན་པའི་མྱོང་ཚོར་ཞིག་བྱུང་སོང་ཞེས་དང་། རིན་པོ་ཆེ་མཆོག་སྐུ་ཁམས་གསལ་ཐང་དང་སྐུ་ཚེ་ཡུན་རིང་བརྟན་ཅིང་འགྲོ་བ་སེམས་ཅན་ཀུན་ལ་ཕན་རླབས་རྒྱ་ཆེ་སྒྲུབ་ཐུབ་པའི་སྨོན་འདུན་ཞུས་ཡོད་པ་ཁོང་སྐུ་སྒེར་གྱི་ངོ་དེབ་ཐོག་འཁོད་འདུག

དཔལ་ས་སྐྱ་༧གོང་མ་ཁྲི་ཆེན་རིན་པོ་ཆེ་མཆོག་འབྲས་ལྗོངས་སུ་ཕེབས་པའི་མཛད་རིམ་ཁྲོད་དད་ལྡན་མང་ཚོགས་ལ་སངས་རྒྱས་སྨན་ལྷའི་དབང་དང་། དེ་བཞིན་ནུབ་སྦང་གྷལ་མངའ་སྡེའི་ཀ་ལན་སྦུག་ས་སྐྱ་རྩེ་ཆེན་ཕྲིན་ལས་དར་རྒྱས་གླིང་དགོན་པར་མཛད་རིམ་ཡོད་པ་རེད།།

བརྙན་པར་སྒྲིག་སྦྱོར་བ། པ་སངས་ཚེ་རིང་།

བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་ཀྱི་རྡོ་རྗེ་སློབ་དཔོན་དུ་གླིང་མཆོག་སྤྲུལ་རིན་པོ་ཆེ་དབུ་བཞུགས་ཐོག བོད་ཀྱི་ཟློས་གར་ཚོགས་པ་དང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། བལ་ཡུལ་ལྷ་མོ་ཚོགས་པ་བཅས་ཀྱིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ། ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད།

(RFA Tibetan)

བརྟན་བཞུགས་འདིའི་ཆེད་དུ་འཛམ་གླིང་ས་ཕྱོགས་གང་ས་ནས་ཁྱོན་མི་གྲངས་ཆིག་སྟོང་ལྷག་བཞུགས་སྒར་དུ་ཆེད་བཅར་ཞུས་ཡོད་པ་དང་། དམིགས་བསལ་ཟློས་གར་གྱི་ཚོགས་མི་ཟུར་པ་དང་བོད་ཀྱི་རིག་གཞུང་འཁྲབ་སྟོན་ཐད་དོ་དབྱིངས་ཡོད་མཁན་ཁག་ཅིག་གིས། བརྟན་བཞུགས་དངོས་ནི་༧གོང་ས་མཆོག་གི་དགོངས་གཞི་ལྟར་བོད་ཀྱི་རིག་གཞུང་གཅེས་འཛིན་བྱ་རྒྱུ་དེ་ཡིན་པས། མུ་མཐུད་དེའི་ཐད་ཕྱག་ལས་གནང་རྒྱུའི་སེམས་ཤུགས་སྐྱེས་པ་དང་བློ་སྤོབས་སྦྱིན་ཡོད་པ་འདི་ག་རླུང་འཕྲིན་ཁང་ལ་གསུང་གི་འདུག

(RFA Tibetan)

དེ་ཡང་བོད་ཀྱི་གཞས་མ་པ་སངས་ལྷ་མོ་ལགས་ཀྱིས། ཐེངས་འདིར་བརྟན་བཞུགས་འབུལ་ཐུབ་པར་ཁོང་སྒྱུ་རྩལ་བ་ཞིག་ཡིན་པའི་ཆ་ནས་ཧ་ཅང་དགའ་པོ་དང་སྐལ་པ་བཟང་པོ་ཚོར་བྱུང་ཞེས་དང་། མུ་མཐུད་བོད་ཀྱི་གཞས་དང་ཞབས་བྲོ། རིག་གཞུང་སྲུང་སྐྱོབ་སོགས་ཀྱི་ཐད་ཕྱག་ལས་གནང་རྒྱུའི་ཆོད་སེམས་བརྟན་པོ་ཡོད་ཅེས་གསུང་གི་འདུག་ལ། སུད་སིར་གནས་བཞུགས་སྒོ་པེ་སྐྱིད་འཛོམས་ལགས་ཀྱིས། ད་བར་ཕྱི་རྒྱལ་ལ་སླེབས་ཏེ་བོད་པའི་ཕྲུ་གུ་ཡོད་ཚད་ལ་ལོ་ ༣༠ རིང་གཞས་དང་རོལ་ཆ་བསླབས་མྱོང་ཡོད་ལ། ད་ཆ་རྒས་ཡོལ་ཟིན་ཡང་མུ་མཐུད་སེམས་ཤུགས་མ་ཆག་པར་ད་དུང་གང་ཐུབ་བྱེད་དགོས་པའི་སེམས་ཤུགས་ཤིག་བསླེབས་ཡོད་པ་གསུང་གི་འདུག

མི་ཚེའི་མཐའ་མཇུག་བར་ “བོད་ཀྱི་རིག་གཞུང་ཐོག་ལས་དོན་བསྒྲུབ་རྒྱུ་ཡིན།"

ཡང་བསོད་ནམས་བཀྲ་ཤིས་ལགས་ཀྱིས། ཁོང་གི་མི་ཚེའི་དབུགས་མཐའ་མའི་དབར་མུ་མཐུད་ད་ཆ་གནང་བཞིན་བོད་པའི་རིག་གཞུང་ལ་དོ་ཁུར་གྱི་ཕྱག་ལས་གནང་རྒྱུ་ཡིན་ཞེས་དང་། དེའི་རྒྱུ་མཚན་ནི་གཙོ་བོ་ད་ལྟའི་གཞོན་སྐྱེས་ལ་རེ་བ་མཐོང་གི་ཡོད་པ་དང་། དེ་ཡང་ད་ཆ་སློབ་གྲྭ་ཁག་གི་ནང་ཡོད་པའི་བོད་པའི་སློབ་ཕྲུག་ཚོས་ཟློས་ཟུར་ཚོས་འཁྲབ་མ་ཐུབ་པའི་ལྷ་མོའི་འཁྲབ་སྟོན་སོགས་གནང་བཞིན་པ་རིགས་མཐོང་དུས་སེམས་ཤུགས་ཤིག་ཡོང་གི་ཡོད་པ་དང་། བསྟན་པ་མུ་མཐུད་དར་གྱི་ཡོད་པའི་ཚོར་བ་ཡོང་གི་འདུག་ཅེས་འདི་ག་རླུང་འཕྲིན་ཁང་ལ་གསུངས་བྱུང་།

ཐེངས་འདིའི་བརྟན་བཞུགས་ཀྱི་འབུལ་ཚན་དུ་བོད་ཀྱི་ཟློས་གར་ཚོགས་པ་ཐུན་མོང་གི་༧གོང་ས་མཆོག་སྐུ་ཚེ་ཡུན་དུ་བརྟན་ཆེད། གྲུབ་ཆེན་ཐང་སྟོང་རྒྱལ་པོའི་སྐུ་བརྙན་ཞིག་དང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གིས་༧གོང་ས་མཆོག་ལ་བཀའ་དྲིན་རྗེས་དྲན་གྱི་ཆོས་ཀྱི་འཁོར་ལོའི་གཟེངས་རྟགས་ཤིག་འབུལ་བཞེས་མཛད་ཡོད་པ་རེད།

(RFA Tibetan)

བརྟན་བཞུགས་གྲུབ་པའི་རྗེས་བོད་ཀྱི་ཟློས་གར་ཚོགས་པ་དང་ཟློས་ཟུར་རྣམས་ཀྱིས་༧སྐུའི་ལྷག་དཀར་སྲུང་བརྩི་ཞུ་ཆེད། ཆོལ་ཁ་གསུམ་གྱི་སྲོལ་རྒྱུན་སྒོར་གཞས་འཁྲབ་སྟོན་གནང་སོང་།།

པར་ལེན་དང་བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

ལྷ་སའི་ཕོ་བྲང་པོ་ཏ་ལའི་ཐང་ཆེན་དུ་པར་ལེན་བྱས་པ་དང་ཕོ་བྲང་པོ་ཏ་ལའི་ཐང་ཆེན་གྱི་དམངས་ཕན་ཉེན་རྟོག་ས་ཚིགས་སུ་ཁྲིད་ནས་ཐོ་བཀོད་བརྟག་དཔྱད་བྱེད་ཀྱི་ཡོད་པ་དང་། ཉིན་རེ་ལས་ཉིན་རེ་དམ་དྲག་ཆེ་བ་ཡོད་པའི་ཚོར་སྣང་ཡོང་གི་ཡོད་པའི་ཐོག་མཉམ་དུ་པར་ལེན་ན་ཡང་ཇ་འཐུང་བར་ཁྲིད་པ་ཟེར་ཉེན་རྟོག་པས་འདྲི་རྩད་བྱེད་ཀྱི་ཡོད་པ་བརྗོད་ནས་དོན་དངོས་ཐོག་ཉེ་བའི་ལོ་ཤས་རིང་མང་ཚོགས་ཧ་ཅང་མང་པོས་ཕོ་བྲང་པོ་ཏ་ལ་དང་དེའི་ཉེ་ཁོར་དུ་འཕྲེད་དར་འཕྱར་ནས་འདྲ་པར་བརྒྱབ་པའི་དབང་གིས་ཉེན་རྟོག་པས་འདྲི་རྩད་དང་ས་ཆ་འདི་ནས་ཕྱིར་ཕུད་བཏང་བའི་གནས་ཚུལ་ཐོན་མྱོང་ཡོད་པ་སོགས་ཀྱི་སྐོར་Yesterday ཟེར་ཁ་ས་ཞེས་པའི་དྲ་ཚིགས་ཀྱིས་ཟླ་ ༡༠ ཚེས་ ༡༧ ཉིན་བརྙན་དང་བཅས་པའི་གནས་ཚུལ་སྤེལ་འདུག་ལ། མུ་མཐུད་བརྗོད་པར། ཕོ་བྲང་པོ་ཏ་ལའི་ཐང་ཆེན་དུ་རྒྱ་མི་ཡུལ་སྐོར་བར་ཞིབ་བཤེར་བྱས་པའི་གནས་ཚུལ་འདི་ཟླ་ ༡༠ ཚེས་ ༡ ཉིན་ཐོན་པ་ཞིག་དང་། སྤྱི་ཚོགས་དྲ་ལམ་ཐོག་བོད་དུ་ཡུལ་སྐོར་ལ་སྐྱོད་མཁན་ཚོས་བགྲོ་གླེང་བྱས་པའི་ནང་ཕོ་བྲང་པོ་ཏ་ལའི་ཐང་ཆེན་དུ་མེ་ལྕགས་ཀྱང་འཁྱེར་མི་ཆོག་པ་དང་། ཐང་ཆེན་གྱི་ཕྱི་སྐོར་དུ་དྲ་གྲོགས་མང་པོས་པར་ལེན་བྱེད་སར་ད་ཆ་པར་ལེན་བྱེད་ཆོག་གི་མི་འདུག་ཅེས་བརྗོད་མཁན་ཡང་བྱུང་འདུག ཡང་བརྙན་གྱི་ནང་འཕྲེད་དར་འཁྱེར་ནས་པར་ལེན་བྱེད་སྐབས་ཉེན་རྟོག་པས་བཀག་འགོག་བྱས་པ་དང་། རྣོ་ངར་གྱི་ས་ཁུལ་ལ་འདི་འདྲ་བྱ་མི་རུང་བ་དང་། མི་སེར་གྱི་ཐོབ་ཐང་ལག་འཁྱེར་ཡོད་དམ་ཐོ་བཀོད་བྱ་དགོས་ཞེས་ཉེན་རྟོག་པས་བརྗོད་པ་བརྙན་ནང་དུ་མཐོང་རྒྱུ་འདུག

(བདེ་འཇགས་ལྷ་ས།)

༧རྒྱལ་བའི་ཕོ་བྲང་པོ་ཏ་ལའི་སྐུ་དཀར་གསོལ་བར་མང་ཚོགས་བཀག་འགོག

ཉེ་ཆར་ཕོ་བྲང་པོ་ཏ་ལའི་དོ་དམ་ལས་ཁུངས་ཀྱིས་ ༢༠༢༦ ལོའི་ཕོ་བྲང་ལ་སྐུ་དཀར་གསོལ་བའི་ལས་ཀའི་ཐད་གསལ་བསྒྲགས་ཤིག་སྤེལ་ཡོད་པའི་ནང་ད་ལོ་ནས་མང་ཚོགས་དང་སྤྱི་ཚོགས་ཐོག་གི་ཚོགས་པས་སྐུ་དཀར་གསོལ་བའི་ལས་ཀར་མཉམ་ཞུགས་མི་ཆོག་པ་དང་། ཕོ་བྲང་པོ་ཏ་ལ་ནི་འཛམ་གླིང་རིག་གནས་ཤུལ་བཞག་དང་རྒྱལ་ཡོངས་གཙོ་གནད་རིག་དངོས་སྲུང་སྐྱོང་ས་གནས་ཡིན་པས། གང་ཅིའི་བདེ་འཇགས་དང་སྐུ་དཀར་གསོལ་བའི་སྤུས་ཚད་བཅས་ལ་གཞིགས་ནས་ད་ལོའི་སྐུ་དཀར་གསོལ་བའི་ལས་ཀ་ཕོ་བྲང་གི་ཉམས་གསོ་རུ་ཁག་དང་ཕྱོགས་གསུམ་པའི་ཆེད་ལས་ཚོགས་པ་ཁོ་ནས་བྱ་རྒྱུ་ཡིན་པ་བརྗོད་འདུག

འོན་ཀྱང་རང་གི་བདེ་འཇགས་ཆེད་མིང་བརྗོད་འདོད་མེད་པའི་བོད་ནང་གི་བོད་མིས་བརྗོད་པར། ལོ་ལྟར་སྐུ་དཀར་གསོལ་བའི་ལས་ཀ་ཕོ་བྲང་གི་ཆེད་ལས་པའི་བཀོད་སྒྲིག་འོག་སྤེལ་བ་དང་། མང་ཚོགས་ཀྱིས་གཙོ་བོ་དཀར་རག་དབོར་བ་དང་བདེ་འཇགས་ཀྱི་གནས་སྟངས་འོག་སྐུ་དཀར་གསོལ་གྱི་ཡོད་པ་དང་། ཉེ་བའི་ལོ་ཤས་ནང་བོད་ཀྱི་ས་ཁུལ་མང་པོ་ནས་བོད་མི་རྒན་གཞོན་མང་པོ་ཆེད་མངགས་ལྷ་སར་ཡོང་ནས་༧རྒྱལ་བའི་ཕོ་བྲང་ལ་སྐུ་དཀར་གསོལ་བའི་ལས་ཀར་དྭང་བླངས་མཉམ་ཞུགས་བྱེད་པ་དེ་ཆོས་དད་དང་བོད་ཀྱི་རིག་གཞུང་དང་འབྲེལ་བའི་གལ་ཆེའི་བྱེད་སྒོ་ཞིག་ཏུ་ངོས་འཛིན་བྱེད་ཀྱི་ཡོད་རེད་ཅེས་དང་། ད་ལྟ་གཞུང་གིས་བོད་མིའི་བྱེད་སྒོ་མང་པོ་ཞིག་བོད་ཞེན་འཕེལ་བའི་ནུས་པ་ཡོད་པར་ངོས་འཛིན་གྱིས་བོད་མི་འདུ་འཛོམས་མང་སའི་བྱེད་སྒོ་ཁག་དང་། དམིགས་བསལ་ཆོས་ཕྱོགས་ཀྱི་བྱེད་སྒོ་སོགས་མང་པོར་བཀག་འགོག་བྱེད་པ་དང་མཉམ་དུ་སྤྱི་ཚོགས་དྲ་ལམ་ཐོག་བོད་པའི་སྤྱི་ཚོགས་ནང་བྱེད་སྒོའི་རྣམ་པ་འདྲ་མིན་སྤེལ་བཞིན་ཡོད་པའི་དྲིལ་བསྒྲགས་བྱེད་ཀྱི་ཡོད། འདི་ནི་ཤེལ་སྒོའི་ནང་གི་མོག་མོག་རེད་ཅེས་དཔེ་མཚོན་ཐོག་ནས་མིག་མདུན་གྱི་རྣམ་པ་ཙམ་ལས་དོན་དངོས་ཐོག་འདི་ལྟར་མེད་ཅེས་བརྗོད་བྱུང་།

(བོད་ལྗོངས་ཉིན་རེའི་ཚགས་པར།)

རྒྱ་ནག་གི་རྒྱལ་དོན་གུང་གསེང་ལ་ལྷ་ས་གཙོས་པའི་ས་ཁུལ་ཁག་ཏུ་དམ་དྲག

རྒྱ་ནག་གི་རྒྱལ་སྟོན་གུང་གསེང་སྐབས་སུ་ལྷ་ས་ནི་རྒྱ་ནག་ནང་གི་ཡུལ་སྐོར་ས་ཚིགས་གྲགས་ཆེ་བ་ཞིག་ཏུ་གྱུར་ཏེ་རྒྱ་ནག་ནས་ཡུལ་སྐོར་བ་དང་མོ་ཌ་མང་པོ་སླེབས་ཡོད་འདུག་ལ། བོད་རང་སྐྱོང་ལྗོངས་རིག་གནས་དང་ཡུལ་སྐོར་ལས་ཁུངས་ཀྱིས་རྒྱལ་སྟོན་གུང་གསེང་རིང་པོ་ཏ་ལ་དང་གཙུག་ལག་ཁང་གཙོས་པའི་ཡུལ་སྐོར་ས་ཁུལ་གཙོ་བོ་ཁག་ལ་ཐད་ཀར་ཞིབ་བཤེར་བྱས་ཏེ། ཡུལ་སྐོར་ལས་ཁུངས་ ༩༩༠ ལ་ཞིབ་བཤེར་དང་ལས་བྱེད་ ༡༢༧༠ མངགས་གཏོང་བྱས་པ། ཁྲིམས་འགལ་དང་སྒྲིག་འགལ་གྱི་གནད་དོན་ ༡༤ དང་བདེ་འཇགས་ཉེན་ཁ་ ༢༥ རྩད་གཅོད་ཐུབ་ཡོད་པ་བརྗོད་འདུག

གཞུང་ཕྱོགས་ཀྱི་གྲངས་ཐོ་ལྟར་ན། ཟླ་ ༡༠ ཚེས་ ༡ ནས་ ༧ བར་ཕོ་བྲང་པོ་ཏ་ལར་ཡུལ་སྐོར་བ་ ༤༣༨༠༥ སླེབས་པ་དང་། གཙུག་ལག་ཁང་དུ་མི་ཁྲི་ ༥ ལྷག་ཙམ་སླེབས་ནས་དེའི་རིང་ཡུལ་སྐོར་བ་མང་དུ་ཕྱིན་པ་དང་བདེ་འཇགས་ཀྱི་དམ་དྲག་གཉིས་མཉམ་དུ་འཕར་བའི་རྒྱབ་ལྗོངས་གསལ་པོ་མངོན་ཐུབ་ཀྱི་འདུག བོད་རང་སྐྱོང་ལྗོངས་ཡོངས་སུ་ཡང་ཉེན་རྟོག་ལས་ཁུངས་ཀྱིས་ཡུལ་སྐོར་ས་ཚིགས་དང་། ཚོང་ལས་ཁུལ། ལམ་གཙོ་བོ་དང་མི་ཚོགས་མང་སར་སྐོར་ཞིབ་དང་བདེ་འཇགས་ཞིབ་བཤེར་ཤུགས་ཆེ་རུ་བཏང་འདུག་ལ། གཞུང་འབྲེལ་གྱི་གནས་ཚུལ་ནང་། ལྷ་ས་དང་གཞིས་ཀ་རྩེ། ལྷོ་ཁ། ཉིང་ཁྲི། ཆབ་མདོ། ནག་ཆུ། མངའ་རིས་བཅས་སུ་ཉེན་རྟོག་པ་ལས་གནས་སུ་བཞག་ནས་སྐོར་ཞིབ་དང་ཉེན་ཁ་ཞིབ་བཤེར་བྱས་ཡོད་པའི་གནས་ཚུལ་སྤེལ་འདུག

(རྟའུ་སྤྱི་བདེ།)

བོད་ཀྱི་ས་ཁུལ་གཞན་ཁག་ཏུ་དམ་དྲག

ཡང་རྒྱ་ནག་གི་རྒྱལ་སྟོན་གུང་གསེང་སྐབས་བོད་ཀྱི་ས་ཁུལ་གཞན་ཁག་གི་ནང་དུ་ཡང་རྒྱ་ནག་ནས་ཡུལ་སྐོར་བ་དང་མོ་ཌ་མང་དུ་ཕྱིན་པ་དང་མཉམ་དུ་ཉེན་རྟོག་དང་ལམ་འགྲུལ་གྱི་དོ་དམ་ཡང་ཆེ་རུ་བཏང་འདུག དཔེར་ན། ཁམས་དཀར་མཛེས་ཁུལ་དུ་ཟླ་ ༡༠ ཚེས་ ༡ ནས་ཚེས་ ༢ བར་མོ་ཌ་འགྲོ་འོང་བྱེད་ཐེངས་ ༡༡༨༠༠༠ ལྷག་བྱུང་ཡོད་པ་དང་། ཉེན་རྟོག་པས་ལམ་གཙོ་བོ་དང་ཡུལ་སྐོར་ས་ཚིགས་ཁག་ཏུ་ཞིབ་བཤེར་ཤུགས་ཆེ་རུ་བཏང་ཡོད་སྐོར་གཞུང་འབྲེལ་གྱི་དཀར་མཛེས་གཏོང་སྦྱོར་གྱིས་གནས་ཚུལ་སྤེལ་འདུག

ཡང་ཁམས་རྟའུ་རྫོང་དུ་ཡང་རྒྱལ་སྟོན་གྱི་གུང་གསེང་ཉིན་བདུན་རིང་ཡུལ་སྐོར་བ་འབུམ་གཉིས་ལྷག་དང་མོ་ཌ་འགྲོ་འོང་ཐེངས་ ༧༥༠༠༠ ཙམ་སླེབས་པ་དང་། ཉེན་རྟོག་པ་ཡོངས་རྫོགས་ལས་གནས་སུ་བཞག་ནས་བདེ་འཇགས་ས་ཚིགས་ ༢༡ བཙུགས་ཏེ། ལམ་འགྲུལ་དོ་དམ་དང་། ཡུལ་སྐོར་ས་ཚིགས་ལ་སྲུང་བྱ། སྐབས་འཕྲལ་རོགས་སྐྱོར་བཅས་བྱས་ཡོད་པ་བརྗོད་འདུག

(ཟི་ལིང་ཤར་གྲོང་སྤྱི་བདེ།)

དེ་བཞིན་ཟི་ལིང་གྲོང་ཁྱེར་དུ་མཚོན་ན་ཡང་ཉེན་རྟོག་པས་རི་ལིའི་བབ་ཚུགས་དང་མགྲོན་ཁང་། རོལ་རྩེད་ས་ཆ། ཁྲོམ་གཞུང་སོགས་ལ་སྐོར་གཡེང་ཞིབ་བཤེར་བྱས་ཡོད་པ་བརྗོད་འདུག

བོད་ཀྱི་ས་ཁུལ་ཁག་ནང་རྒྱ་ནག་གི་རྒྱལ་སྟོན་གུང་གསེང་སྐབས་ཡུལ་སྐོར་བ་གཅིག་པུར་དམིགས་པ་ཞིག་མ་ཡིན་པར། ས་གནས་བོད་མིའི་ཁྲོད་ལ་ཡང་གཅིག་མཚུངས་ཀྱི་དམ་དྲག་དང་། ཞིབ་བཤེར་བྱས་ཡོད་འདུག

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

མགོ་ལོག་རྨ་ཆེན་རྫོང་ཁོངས་བོད་པའི་སློབ་གྲྭ་ ༣ སྒོ་བརྒྱབ་པ་ནི་ “མི་རིགས་གསོན་གནས་མེད་པ་བཟོ་ཐབས་རེད།”ཅེས་བོད་མིའི་སྒྲིག་འཛུགས་དང་འགྲོ་བ་མིའི་ཐོབ་ཐང་ལྟ་ཞིབ་པས་ངོས་འཛིན་གནང་གི་འདུག

མགོ་ལོག་རྨ་ཆེན་རྫོང་ཁོངས་སློབ་གྲྭ་ ༣ སྒོ་བརྒྱབ་པ།

རྒྱ་ནག་གཞུང་གིས་འདས་པའི་ཟླ་བ་གསུམ་ནང་མགོ་ལོག་རྨ་ཆེན་རྫོང་གི་ཁོངས་སུ་ཡོད་པའི་བོད་པའི་སློབ་གྲྭ་གསུམ་སྟེ། གངས་ལྗོངས་རྩྭ་ཐང་བུ་མོའི་སློབ་གྲྭ་དང་། ཇ་སག་སྡེ་བའི་སློབ་ཆུང་། མགོ་ལོག་རྟ་བྲག་དྭ་ཕྲུག་སློབ་གྲྭ་བཅས་སྒོ་བརྒྱབ་འདུག བོད་མིའི་སྒྲིག་འཛུགས་ཀྱིས་བོད་ནང་གི་སློབ་གྲྭ་ཁག་ཏུ་མི་རིགས་གསོན་གནས་ཀྱི་ལས་དོན་འགྲུབ་བཞིན་པར་ངོས་འཛིན་གྱིས་སློབ་གྲྭ་དེ་དག་སྒོ་བརྒྱབ་པ་ཡིན་སྐོར་དགོངས་ཚུལ་གསུང་གི་འདུག

འདས་པའི་ཟླ་བ་གསུམ་ནང་མགོ་ལོག་རྨ་ཆེན་རྫོང་གི་ཁོངས་སུ་ཡོད་པའི་བོད་པའི་སློབ་གྲྭ་གསུམ་སྒོ་བརྒྱབ་པ་དང་འབྲེལ། སྔར་ཡོད་ཁྲིམས་མཐུན་ཡིན་པའི་སློབ་གྲྭ་དང་། དེ་སྔ་ནས་རྒྱ་ནག་གཞུང་འབྲེལ་གྱི་ངོ་བོར་བསྒྱུར་ཟིན་པའི་སློབ་གྲྭ་མང་པོ་ཞིག ད་ཆ་མི་རིགས་མཐུན་སྒྲིལ་གྱི་ཁྲིམས་ཡིག་ལག་བསྟར་རྗེས་སུ་མི་རིགས་ཀྱི་སྐད་ཡིག་འབུར་ཐོན་གྱིས་སློབ་མ་མང་པོ་ཞིག་ཐོན་གྱི་ཡོད་པ་ལྟར། ཁྲིམས་ཐོག་གི་སློབ་གྲྭ་བཙུགས་པའི་ཆ་རྐྱེན་ཚང་གི་མེད་པ་སོགས་བརྗོད་དེ་སྒོ་རྒྱག་བཅུག་བཞིན་ཡོད་པ་ཆབ་སྲིད་བཙོན་ཟུར་རྭ་རྒྱ་དགེ་བཤེས་བློ་བཟང་དཔལ་ལྡན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་ལ། སློབ་གྲྭ་འདི་དག་སྒོ་རྒྱག་དགོས་པའི་ཡིག་ཐོག་བཀོད་ཁྱབ་རིགས་བཏང་མེད་པར། རྫོང་གི་འབྲེལ་ཡོད་ཚན་པས་དགེ་རྒན་ལ་བརྡ་སྤྲད་དེ། སློབ་གྲྭ་ཚོགས་ཆོག་གི་མེད་པ་བརྗོད་ཡོད་སྐོར་གསུངས་བྱུང་།

ཕྱི་ལོ་ ༢༠༠༦ ལོར་རྩ་ཐང་བུ་མོའི་སློབ་གྲྭ་ཕེབས་མྱོང་བ་ཆབ་སྲིད་བཙོན་ཟུར་གཞན་ཞིག་གིས། རྩྭ་ཐང་བུ་མོའི་སློབ་གྲྭ་དེ་ནས་བོད་ནང་ཤེས་ལྡན་མི་སྣ་དང་སྤྱི་ཚོགས་ཞབས་ཞུ་སྒྲུབ་མཁན་མང་པོ་ཞིག་ཐོན་བཞིན་པར་རྒྱ་ནག་གིས་སེམས་ཚབས་བྱས་ཤིང་། ལྷག་པར་ཁོང་གིས་ངོ་ཤེས་པའི་སློབ་གྲྭའི་ལས་བྱེད་ཅིག་གིས། འདས་པའི་ལོ་མང་རིང་རྒྱ་ནག་གཞུང་གིས་སློབ་གྲྭ་དེའི་དགེ་རྒན་ལ་འབོད་སྒུག་ཐེངས་མང་བྱས་ཡོད་པར་བརྟེན། དུས་ཡུན་ཇི་ཙམ་སློབ་གྲྭ་དེ་རྒྱུན་གནས་ཐུབ་མིན་ཡང་ཤེས་ཚོད་དཀའ་བ་རེད་ཅེས་བརྗོད་མྱོང་ཡོད་སྐོར་ལུང་འདྲེན་གྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྗོད་བྱུང་།

“མི་རིགས་གསོན་གནས་མེད་པ་བཟོ་ཐབས་རེད།”

འདས་པའི་ཟླ་བ་གསུམ་རིང་རྒྱ་ནག་གཞུང་གིས་བོད་པའི་སློབ་གྲྭ་གསུམ་བསྟུད་མར་སྒོ་བརྒྱབ་པ་ནི། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ལག་བསྟར་དང་འབྲེལ་བ་ཡོད་ཅིང་། དེ་ནི་རྒྱ་ནག་གཞུང་གིས་ཞེད་སྣང་འོག་ལག་བསྟར་བྱས་པ་ཞིག་ཡིན་པ། བོད་མིའི་སྒྲིག་འཛུགས་དང་འགྲོ་བ་མིའི་ཐོབ་ཐང་ཐད་ཉམས་ཞིབ་པས་ངོས་འཛིན་གནང་གི་འདུག

དེ་ཡང་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། རྒྱ་ནག་གཞུང་གིས་བོད་ནང་དུ་ཡོད་པའི་སློབ་གྲྭ་སྒོ་རྒྱག་པ་ད་རེས་ཐེངས་དང་པོ་མ་ཡིན་པར། དུས་ནས་དུས་སུ་སློབ་གྲྭ་སྒོ་རྒྱག་པའི་གནས་སྟངས་ཡོང་གི་ཡོད་པ་ནི། རྒྱ་ནག་གཞུང་གིས་བོད་ནང་ཡོད་པའི་བོད་རྒྱ་ཆེ་མི་མང་གིས་བོད་ཀྱི་སྐད་དང་རིག་གཞུང་ལ་དོ་སྣང་གིས་བོད་མི་རིགས་གསོན་གནས་ཆེད་ལད་ཀ་བྱེད་བཞིན་པར། རྒྱ་ནག་གཞུང་གིས་དེར་སྐྱོན་ཞིག་ཏུ་ངོས་འཛིན་གྱིས་ཞེད་སྣང་འོག་སློབ་གྲྭ་དེ་དག་སྒོ་རྒྱག་བཞིན་ཡོད་པ་རེད་ཅེས་གསུང་གི་འདུག་ལ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཟླ་བ་བཀྲ་ཤིས་ལགས་ཀྱིས། རྒྱ་ནག་གཞུང་གིས་མི་རིགས་རྒྱ་སྒྱུར་གྱི་སྲིད་ཇུས་ལག་བསྟར་འོག་ཏུ། བོད་ཡིག་སློབ་གྲྭ་ཁག་གི་ཡིག་ཆ་ཚད་ལྡན་མེད་པར་ཁ་གཡར་ནས། སྔ་རྗེས་སུ་བོད་ཀྱི་སྐད་ཡིག་སློབ་གསོ་གཙོ་གཉེར་བྱེད་པའི་སློབ་གྲྭ་ཆུང་འབྲིང་གསུམ་སྒོ་བརྒྱབ་པ་ཞིག་ཡིན་པ་གསུངས་བྱུང་།

(མི་སེར་གྱི་འདྲ་པར།)

ཇ་སག་སྡེ་བའི་སློབ་ཆུང་།

ཟླ་བ་ ༩ པའི་ནང་སྒོ་བརྒྱབ་པའི་ཇ་སག་སྡེ་བའི་སློབ་ཆུང་ནི། ཕྱི་ལོ་ ༡༩༩༥ ལོར་སྔར་གྱི་རྭ་རྒྱ་ཡུལ་ཚོ་ཇ་སག་འབྲོག་སྡེའི་ཨུ་ཡོན་ལྷན་ཁང་གི་འབྲོག་པ་རྣམས་ཀྱིས་མ་དངུལ་བསྡུ་རུབ་བྱས་ནས་གསར་འཛུགས་བྱས་པ་ཞིག་རེད་འདུག་ཅིང་། ཕྱི་ལོ་ ༢༠༠༨ ལོར་ཡིག་ཐོག་ནས་ “རྭ་རྒྱ་གྲོང་རྡལ་བཅའ་སྡོད་སློབ་གྲྭ་ཨང་གཉིས་པ” ཞེས་མིང་བསྒྱུར་བྱས་འདུག

མགོ་ལོག་རྟ་བྲག་དྭ་ཕྲུག་སློབ་གྲྭ

ཡང་ཕྱི་ཟླ་༡༠ པའི་ཟླ་མགོར་སྒོ་བརྒྱབ་པའི་མགོ་ལོག་རྟ་བྲག་དྭ་ཕྲུག་སློབ་གྲྭ་ནི། ཕྱི་ལོ་ ༢༠༠༥ ལོར་ཇར་མ་ནིར་གནས་བཞུགས་གནང་མཁན་འདས་པོ་སྨན་པ་རྟའུ་བློ་བཟང་དཔལ་ལྡན་ལགས་དང་ཁོང་གི་བཟའ་ཟླ་ཆོས་ཉིད་ལྷ་མོ་ལགས་གཉིས་ཀྱིས་གསར་འཛུགས་བྱས་པ་ཞིག་དང་། སློབ་གྲྭ་དེས་ལོ་ ༢༠ ཙམ་རིང་ཕ་མ་མེད་པའི་བོད་ཀྱི་བྱིས་པ་རྣམས་ལ་ཟས་གོས་དང་། སྡོད་ཁང་། སྨན་བཅོས། ཤེས་ཡོན་བཅས་རིན་མེད་དུ་མཁོ་སྤྲོད་བྱས་ཡོད་འདུག

གངས་ལྗོངས་རྩྭ་ཐང་བུ་མོའི་སློབ་གྲྭ

ཨེ་ཤེ་ཡ་རང་དབང་རླུང་འཕྲིན་ཁང་ལ་བོད་ནས་འབྱོར་བའི་གནས་ཚུལ་ལྟར་ན། ༢༠༠༥ ལོར་བོད་ཀྱི་སློབ་གསོའི་ཐོག་ཕྱག་ལས་གནང་མཁན་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་གསར་བཙུགས་གནང་པའི་གངས་ལྗོངས་རྩྭ་ཐང་བུ་མོའི་སློབ་གྲྭ་འདི་བཞིན་འདི་ལོའི་ཟླ་ ༨ ཚེས་ ༢༨ ཉིན་རྒྱ་ནག་གཞུང་གིས་སྒོ་བརྒྱབ་ཡོད་པའི་སྐོར་རང་གི་བདེ་འཇགས་ཆེད་མིང་བརྗོད་འདོད་མེད་པ་འབྲེལ་ཡོད་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྗོད་བྱུང་ལ། སྐབས་དེ་དུས་སློབ་མ་ ༤༥༠ ཙམ་དང་དགེ་ལས་ ༦༠ ཙམ་ཡོད་འདུག

(China Daily)

ཞི་ཅིན་ཕིང་དང་བོད་མི་རིགས།

རྩ་བའི་དེ་སྔ་ཕྱི་ལོ་ ༢༠༢༤ ཟླ་ ༦ ཚེས་ ༡༨ ཉིན་རྒྱ་ནག་གི་སྲིད་འཛིན་ཞི་ཅིན་ཕིང་གློ་བུར་དུ་མཚོ་སྔོན་ཞིང་ཆེན་ཟེར་བའི་ནང་ཆེད་བསྐྱོད་བྱས་ཏེ་བོད་ཀྱི་དགོན་པ་དང་སློབ་གྲྭ་སོགས་སུ་ལྟ་སྐོར་གྱིས་བོད་བརྒྱུད་ནང་བསྟན་རྒྱ་སྒྱུར་གྱི་ལས་དོན་དང་། ཀྲུང་ཧྭ་མི་རིགས་གཅིག་གྱུར་གྱི་སློབ་གསོའི་ནུས་པར་བརྟག་ཞིབ་བྱས་ཡོད་ཅིང་། དེའི་རྗེས་ཀྱི་ཟླ་ ༧ པའི་ནང་བོད་མདོ་སྨད་མགོ་ལོག་རྭ་རྒྱ་དགོན་པའི་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་བཙུགས་པའི་གངས་ལྗོངས་ཤེས་རིག་ནོར་གླིང་སློབ་གྲྭ་དངོས་སུ་སྒོ་བརྒྱབ་རྒྱུའི་ཡོངས་གྲགས་གསལ་བསྒྲགས་བྱས་ཡོད་པ་རེད།།

(བོད་འབྱོར།/RFA)

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

འབྲེལ་ཡོད་གནས་ཚུལ།

མགོ་ལོག་ར་རྒྱའི་གངས་ལྗོངས་རྩྭ་ཐང་བུ་མོའི་སློབ་གྲྭ་ལོ་ ༢༡ རྗེས་སུ་སྒོ་བརྒྱབ་པ།

རྒྱ་ནག་གཞུང་གིས་བོད་ཀྱི་སློབ་གྲྭ་ཁག་སྒོ་བརྒྱབ་ནས་གཞི་རྩའི་ཐོབ་ཐང་རྡོག་རོལ་གཏོང་བཞིན་པ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཐེར་འདོན་གནང་འདུག

རྒྱ་ནག་གཞུང་གིས་བོད་ནང་སྒེར་གྱིས་བཙུགས་པའི་སློབ་གྲྭ་རིམ་པ་སྒོ་བརྒྱབ་ཏུ་བཅུག་པ།

རྒྱ་ནག་གཞུང་གིས་བོད་མདོ་སྨད་མགོ་ལོག་ནང་གནས་པའི་གངས་ལྗོངས་ཤེས་རིག་ནོར་གླིང་ལས་རིགས་སློབ་གྲྭ་སྒོ་བརྒྱབ་བཅུག་པའི་གནད་དོན་གླེང་མོལ།

རྒྱ་ནག་གཞུང་གིས་བོད་མདོ་སྨད་མགོ་ལོག་རྭ་རྒྱའི་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་བཙུགས་པའི་གངས་ལྗོངས་ཤེས་རིག་ནོར་གླིང་སློབ་གྲྭ་སྟེ། བོད་ཀྱི་རིག་གཞུང་དང་སྐད་ཡིག་ལ་སློབ་གཉེར་བྱེད་སའི་སྒེར་གཉེར་སློབ་གྲྭ་གྲགས་ཆེ་ཤོས་ཤིག་སྒོ་བརྒྱབ་བཅུག་འདུག

རྒྱ་ནག་གཞུང་གིས་སེང་འབྲུག་སྟག་རྩེ་སྒེར་གཉེར་སློབ་གྲྭ་སྒོ་བརྒྱབ་རྗེས་དྭ་ཕྲུག་སློབ་ཕྲུག་ཚོ་གར་འགྲོ་གང་བྱེད་མེད་པའི་གནས་སུ་ལྷག་ཡོད་འདུག

ཡུ་རོབ་མཐུན་ཚོགས་ཀྱིས་བོད་ནང་དུ་བོད་མིའི་ཆོས་དད་རང་དབང་ལ་དམ་དྲག་དང་བོད་ཀྱི་རིག་གཞུང་དང་སྐད་ཡིག་ལ་ཉེན་ཁ་བཟོ་བ་དང་། བོད་ཕྲུག་ཚོ་བཅའ་སྡོད་སློབ་གྲྭར་བཙན་དབང་ཐོག་ནས་འཇུག་གི་ཡོད་པའི་གནད་དོན་རྣམས་ལུང་འདྲེན་གྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་ “བློ་ཚབས་ཆེན་པོ་བྱེད་དགོས་པ་” ཞིག་གི་འོག་ཏུ་གནས་ཡོད་ཅེས་ཕྱི་ལོ་ ༢༠༢༦ ཟླ་ ༡༠ ཚེས་ ༡༩ ཉིན་ཡུ་རོབ་མནའ་འབྲེལ་མཐུན་ཚོགས་ཀྱི་མགྲིན་ཚབ་པ་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ནས་ལན་འདེབས་གནང་པའི་ནང་གསུངས་བྱུང་།

ཡུ་རོབ་མནའ་འབྲེལ་མཐུན་ཚོགས་ཀྱིས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པའི་ཐད་ལ་ཐུགས་འཚབ་ཡོད་པ་གླེང་སློང་གནང་ཡོད་པ་དང་། ཡུ་རོབ་མཐུན་ཚོགས་ཀྱི་མགྲིན་ཚབ་པས། མཐུན་ཚོགས་ངོས་ནས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་སྐུ་ཁམས་བདེ་ཐང་ཡིན་མིན་དང་གང་དུ་བཞུགས་ཡོད་མེད་ཐད་མུ་མཐུད་གནས་ཚུལ་རྩད་འཚོལ་བྱེད་བཞིན་ཡོད་པ་གསུངས་ཤིང་། ཆོས་ལུགས་ཀྱི་སྤྱི་ཚོགས་ཁག་ལ་གཞུང་གི་ཐེ་བྱུས་མེད་པར་རང་ཉིད་ཀྱི་ཆོས་ཕྱོགས་ཀྱི་དབུ་ཁྲིད་འདེམས་རྒྱུའི་རང་དབང་ལྡན་དགོས་པའི་ཡིད་ཆེས་བྱེད་ཀྱི་ཡོད་ཅེས་གསུངས་བྱུང་།

མི་རིགས་མཐུན་སྒྲིལ་གྱི་ཁྲིམས་དང་རྒྱལ་མཚམས་བརྒལ་བའི་དྲག་གནོན།

རྒྱ་ནག་གིས་རྒྱ་སྐྱེད་གཏོང་བཞིན་པའི་རྒྱལ་མཚམས་ལས་བརྒལ་བའི་དྲག་གནོན་ལ་གདོང་ལེན་དང་འབྲེལ། ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་དཔོན་རིགས་དང་མཉམ་དུ་ཆབ་སྲིད་ཀྱི་འབྲེལ་བ་ནམ་བྱུང་ལ་འགྲོ་བ་མིའི་ཐོབ་ཐང་གི་གནད་དོན་གླེང་དགོས་པ་དང་། ཚོང་དང་དཔལ་འབྱོར་གྱི་འབྲེལ་ལམ་ཁོ་ན་མ་ཡིན་པར། ཡུ་རོབ་མཐུན་ཚོགས་དང་རྒྱ་ནག་གི་འབྲེལ་ལམ་ནང་དུ་གྲངས་ཉུང་མི་རིགས་ཀྱི་ཐོབ་ཐང་སྲུང་སྐྱོབ་ཀྱི་གནད་དོན་འདི་གལ་ཆེ་བའི་ཆ་ཤས་ཤིག་ཏུ་བཞག་དགོས་པ་གསུངས་ཡོད། དེ་ཡང་འདི་ལོ་ཕྱི་ཟླ་ ༤ ནང་ཡུ་རོབ་གྲོས་ཚོགས་ཀྱི་རྒྱ་ནག་གི་མི་རིགས་མཐུན་སྒྲིལ་སྐོར་གྱི་ཁྲིམས་གསར་པའི་ཐད་སེམས་འཚབ་ཡོད་པའི་གྲོས་ཆོད་བཏོན་ཡོད་པ་དང་། ཁྲིམས་ཡིག་འདིས་གྲངས་ཉུང་མི་རིགས་ཀྱི་སྨྲ་བརྗོད་དང་བསམ་བློའི་རང་དབང་། ཆོས་དད་རང་དབང་སོགས་ཡོངས་རྫོགས་སྔར་ལྷག་ཚོད་འཛིན་བྱེད་ངེས་ཡིན་པ་གསལ་སྟོན་གྱིས་རྒྱ་ནག་ངོས་ནས་ཁྲིམས་དེ་མེད་པར་བཟོ་དགོས་པའོ་སྐུལ་མ་གནང་ཡོད། གྲོས་ཆོད་དེས་རྒྱ་ནག་གི་ཁྲིམས་དེའི་ཁྱབ་ཁོངས་རྒྱ་ནག་གི་རྒྱལ་མཚམས་བརྒལ་བའི་དྲག་གནོན་བྱེད་ཕྱོགས་ཀྱི་ནང་གསེས་དོན་ཚན་ལ་སྐྱོན་བརྗོད་བྱས་པ་དང་དེ་དག་རྒྱལ་མཚམས་བརྒལ་བའི་དྲག་གནོན་གྱི་རྣམ་པ་ཡིན་ཞིང་ཡུ་རོབ་མཐུན་ཚོགས་ཀྱི་ཚོགས་མིའི་རྒྱལ་ཁབ་ཚང་མས་རྒྱ་ནག་གཞུང་དང་ལྷན་དུ་རྒྱལ་མཚམས་བརྒལ་བའི་དྲག་གནོན་བྱེད་པའི་ཉེན་ཁ་ལས་སྐྱོབ་ཆེད་ཕྱིར་སྤྲོད་ཆིངས་ཡིག་མཚམས་འཇོག་དགོས་པའི་སྐུལ་མ་གནང་ཡོད་པ་རེད།

ཡུ་རོབ་གྲོས་ཚོགས་སུ་བོད་ནང་ཆུ་ལོག་གི་གནོད་འཚེའི་སྐོར་ལན་འདེབས་དགོས་པ་དང་བཅའ་སྡོད་སློབ་གྲྭ་མཚམས་འཇོག་དགོས་པའི་འབོད་སྐུལ།

ཉེ་ལམ་ཕྱི་ཟླ་ ༨ ཚེས་ ༢༦ ཉིན་བོད་དང་བལ་ཡུལ་གྱི་ས་མཚམས་ས་ཁུལ་དུ་ཆུ་ལོག་གི་དོན་རྐྱེན་ཚབས་ཆེ་བྱུང་པའི་ཁྲོད་རྒྱ་ནག་གཞུང་གིས་གོད་ཆག་དང་འབྲེལ་བའི་གནས་ཚུལ་ཆ་ཚང་ཕྱིར་བསྒྱགས་བྱེད་དགོས་པ་དང་། རྒྱ་ནག་གཞུང་གིས་རྒྱལ་སྤྱིའི་རང་དབང་ཅན་གྱི་གསར་འགོད་པ་དང་རོགས་སྐྱོར་ཚོགས་པ་རྣམས་གནོད་འཚེ་ཕོག་པའི་ས་ཁུལ་དུ་རང་དབང་ངང་བསྐྱོད་འཇུག་དགོས་པ། ལྷག་པར་དུ་བོད་ཐོག་འཛིན་པའི་རྒྱ་ནག་གཞུང་གི་སྲིད་བྱུས་གཞན་མང་དག་ཅིག་ཕྱི་གསལ་ནང་གསལ་བཟོས་དགོས་པའི་སྐོར་ཡུ་རོབ་གྲོས་ཚོགས་ནང་དུ་སྙན་ཐོ་བཏོན་པའི་སྐབས་རྒྱབ་གཉེར་གནང་འདུག

ཞུ་སྐུལ་རྒྱབ་གཉེར་གནང་པ་དེ་ནི་ཕྱི་ཟླ་ ༡༠ ཚེས་ ༧ ཉིན་ཡུ་རོབ་མནའ་འབྲེལ་དང་རྒྱ་ནག་བར་གྱི་འབྲེལ་བའི་སྐོར་གྱི་སྙན་ཐོ་ཞིག་ཡུ་རོབ་གྲོས་ཚོགས་ནང་དུ་བཏོན་པའི་སྐབས་བྱུང་ཞིང་། གྲོས་ཚོགས་འཐུས་མི་ ༤༥༤ ཡི་རྒྱབ་སྐྱོར་ཐོག་གཏན་འབེབས་གནང་བའི་སྙན་ཐོ་གཏན་འབེབས་ཀྱི་ཆ་ཤས་སུ་བགྲོ་གླེང་གནང་པའི་སྐབས་བྱུང་པ་དང་། སྙན་ཐོ་དེའི་ནང་འགྲོ་བ་མིའི་ཐོབ་ཐང་གི་གནས་ཚུལ་ཙམ་མིན་པར་རྒྱ་ནག་གཞུང་གིས་རང་དབང་ཅན་གྱི་གནས་ཚུལ་སྤེལ་མཁན་ལ་དམ་དྲག་ཤུགས་ཆེ་བྱེད་བཞིན་པའི་སྐོར་འབུར་འདོན་གྱིས་བོད་ནས་གནས་ཚུལ་ཁོ་སྒྲུབ་བྱ་རྒྱུའི་དཀའ་ངལ་གྱི་གནད་དོན་སྐོར་ལ་ཡང་གསལ་སྟོན་བྱས་འདུག

སྙན་ཐོ་འདི་ཡུ་རོབ་གྲོས་ཚོགས་ཀྱི་རྒྱ་ནག་འབྲེལ་ལམ་གྱི་དམིགས་བསལ་སྐུ་ཚབ་གྲོས་ཚོགས་འཐུས་མི་ཧིལ་ཌེ་ཝོཊ་མནསི་ (Hilde Vautmans) ལགས་ཀྱིས་ཡུ་རོབ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་སྐུ་ཚབ་ངོ་བོའི་ཐོག་ཟིན་བྲིས་བཀོད་པ་ཞིག་ཡིན་པ་དང་། སྙན་ཐོ་འདིའི་ནང་རྒྱ་ནག་གཞུང་གིས་བོད་ནང་བོད་མི་རིགས་ཀྱི་ངོ་བོ་དང་སྐད་ཡིག ཆོས་དང་རིག་གཞུང་བཅས་པ་རྩ་མེད་གཏོང་སྟེ། བཙན་དབང་གི་ཐོག་ནས་མི་རིགས་མཉམ་བསྲེས་དང་རྒྱ་བསྒྱུར་གྱི་སྲིད་བྱུས་སྤེལ་བཞིན་པ་ཁག་ཐེར་འདོན་གྱིས་སྐྱོན་བརྗོད་བྱས་འདུག

སྙན་ཐོའི་ནང་ད་དུང་། བལ་བོད་ས་མཚམས་ས་ཁུལ་དུ་ཆུ་ལོག་གི་དོན་རྐྱེན་ཁྲོད། ས་མཚམས་ཀྱི་ཕྱོགས་གཉིས་ཀར་གོད་ཆག་དང་ཤི་རྨས་ཀྱི་དོན་རྐྱེན་ཤུགས་ཆེ་བྱུང་ཡོད་ཀྱང་། རྒྱ་ནག་གཞུང་གིས་རྐྱེན་འདས་ཀྱི་གྲངས་འབོར་ཚད་ལྡན་ཕྱི་གསལ་མ་བྱས་པ་དང་། ཆུ་ལོག་ནས་ཐར་པའི་མི་རྣམས་ཀྱི་མྱོང་བའི་སྐོར་ཕྱི་ལ་བཤད་པ་རྣམས་སྤྱི་ཚོགས་དྲྭ་ལམ་ནས་བསུབ་པ་མ་ཟད། མང་ཚོགས་རྣམས་ལ་ཆུ་ལོག་གི་གོད་ཆག་དང་འབྲེལ་བའི་གནས་ཚུལ་སྤེལ་རྒྱུར་དམ་དྲག་བྱས་པ་སོགས་རྒྱ་ནག་གིས་གནས་ཚུལ་འགྲོ་རྒྱུག་ལ་དམ་དྲག་མངོན་གསལ་བྱས་པ་དང་། ཕྱི་རྒྱལ་གྱི་གསར་འགོད་པ་ཚོ་གཞུང་གི་ལྟ་སྐུལ་འོག་གནོད་འཚེ་ཕོག་པའི་ས་ཁུལ་དུ་བསྐྱོད་བཅུག་པ་ཙམ་མ་གཏོགས་རྒྱ་ནག་གི་སྤྱི་བདེ་ལྷན་ཁང་གིས་གོད་ཆག་སྐོར་གྱི་གནས་ཚུལ་མཉམ་སྤྱོད་བྱེད་མཁན་གྱི་མི་ཚོར་ཉེས་ཆད་གཏོང་གི་ཡོད་པ་སོགས་འཁོད་འདུག

ཡུ་རོབ་གྲོས་ཚོགས་ནས་རྒྱ་ནག་གཞུང་ལ་རང་དབང་ཅན་གྱི་ཞིབ་འཇུག་པ་དང་གསར་འགོད་པ། འགྲོ་བ་མིའི་ཐོབ་ཐང་ཚོགས་པ་ཁག་ལ་འཕྲལ་མར་བཀག་འགོག་མེད་པར་རྨས་སྐྱོན་གྱི་གྲངས་ཀ་ཆ་ཚང་ཡོང་བསྒྲགས་བྱས་དགོས་ཤིང་། བདེན་དཔང་ར་སྤྲོད་འཕེར་བའི་གནས་ཚུལ་རྣམས་ཕྱིར་བསྒྲགས་བྱ་དགོས་པའི་དགོས་འདུན་བཏོན་ཡོད་པ་རེད།

“ཡུ་རོབ་གྲོས་ཚོགས་ཀྱི་གྲོས་ཆོད་ལག་བསྟར་དགོས།”

དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྤྱི་མཐུན་ཚོགས་པའི་སྲིད་བྱུས་འགན་འཛིན་ཝིན་སེནཊ་མེ་ཊེན(Vincent Metten) ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ད་ལྟའི་ཆར་གདོང་ལེན་བྱ་དགོས་པ་གཙོ་བོ་གཅོག་ནི་ཡུ་རོབ་གྲོས་ཚོགས་ཀྱི་གྲོས་འཆར་བཏོན་པ་དེ་དག་དངོས་ཡོད་ཀྱི་ལག་བསྟར་བྱ་ཐུབ་པར་སྒྱུར་རྒྱུ་དེ་ཡིན་པ་དང་། སྙན་ཐོ་དེ་ non-binding ཞེས་ཁྲིམས་ཀྱི་བཀའ་བཅད་འོག་མི་ཚུད་པར་མདོར་ན་ཡུ་རོབ་མནའ་འབྲེལ་གྱི་ལས་ཁུངས་དང་ཚོགས་མིའི་རྒྱལ་ཁབ་ཚོས་ཁྲིམས་མཐུན་ཐོག་ནས་ད་རེས་ཀྱི་གྲོས་ཆོད་གྲོས་འཆར་བཏོན་པ་དེ་ཚོ་ལག་བསྟར་བྱེད་དགོས་པའི་ཁྲིམས་ཐོག་ནས་དགོས་མཁོ་མེད་པ་རེད་ཅེས་བརྗོད་བྱུང་།

(ICT)

ཁོང་གིས་ཡུ་རོབ་མནའ་འབྲེལ་གྱི་ཁོངས་གཏོགས་རྒྱལ་ཁབ་ཁག་དང་ཡུ་རོབ་ཀྱི་ཕྱི་འབྲེལ་ལས་དོན་ལས་ཁུངས། དེ་བཞིན་ཡུ་རོབ་ལྷན་ཚོགས་ཀྱིས་གྲོས་འཆར་དེ་དག་ལ་དོ་སྣང་བྱས་ཏེ་རྒྱ་ནག་གཞུང་ལ་གནད་དོན་དེ་དག་གླེང་དགོས་ཤིང་། ཡུ་རོབ་མནའ་འབྲེལ་གྱི་ཁོངས་སུ་ཚུད་པའི་རྒྱལ་ཁབ་ཀྱི་རྒྱལ་ས་དང་བསྟི་གནས་ཁག་ཏུ་ཞུ་གཏུགས་ལས་དོན་སྤེལ་དགོས་པ་གལ་ཆེན་རང་བཞིན་ཡིན་པ་ནན་བརྗོད་གནང་བྱུང་།

སྐྱིད་གྲོང་དུ་གནོད་འཚེ་བྱུང་ནས་ཟླ་བ་གཅིག་ལྷག་འགྲོ་བཞིན་ཡོད་པའི་སྐབས་སུ་བོད་ཕྱོགས་ཀྱི་འདས་གྲོངས་དང་གར་སོང་ཆ་མེད་ཀྱི་མཐའ་མའི་གྲངས་ཐོ་དང་། འདས་པོའི་ངོ་རྟགས་ངོས་འཛིན་གྱི་གནས་སྟངས། གར་སོང་ཆ་མེད་དུ་གྱུར་བ་ག་ཚོད་བརྙེད་ཡོད་མེད་བཅས་གནས་ཚུལ་ཁ་གསལ་ཞིག་ད་ལྟའང་རྒྱ་ནག་གཞུང་གིས་གསལ་བསྒྲགས་བྱེད་ཀྱི་མེད་པ་རེད། ཆུ་ལོག་གི་བྱུང་བ་དེས་བོད་ནང་ནས་གནས་ཚུལ་ཐོབ་པར་དཀའ་ངལ་ཡོད་པའི་སྐོར་དོ་སྣང་ཞིག་སླེབས་ཡོད་ལ་། ཨེ་ཤེ་ཡ་རང་དབང་རླུང་འཕྲིན་ཁང་གིས་བོད་ནང་གི་གོད་ཆག་དང་རོགས་སྐྱོར་གྱི་དཀའ་ངལ་སྐོར་གསར་འགོད་བྱེད་ཡོད་པ་ལྟར་ད་རེས་ཡུ་རོབ་གྲོས་ཚོགས་ཀྱི་སྙན་ཐོ་དེས་རྒྱ་ནག་ལ་དྲི་བ་གལ་ཆེན་པོ་ཞིག་བཏང་གི་ཡོད། དྲི་བ་དེ་ནི་རྒྱལ་སྤྱིའི་སྤྱི་ཚོགས་ནས་རྒྱ་ནག་གཞུང་གི་དངོས་ཡོད་གནས་ཚུལ་ཕྱི་གསལ་བྱ་དགོས་པའི་འབོད་སྐུལ་དེ་དངོས་ཡོད་ཀྱི་བྱ་སྤྱོད་ལ་འགྱུར་ཐུབ་ཀྱི་ཡོད་མིན་དེ་ཆགས་ཡོད།

རྩ་བའི་ཨེ་ཤི་ཡ་རང་དབང་རླུང་འཕྲིན་ཁང་ལ་ཕྱི་ཟླ་ ༩ ཚེས་ ༢༩ ཉིན་བོད་མདོ་སྨད་ནས་ཡིན་པའི་བོད་མི་ཞིག་གིས་བོད་ནང་ཁུལ་དུ་གནས་ཚུལ་གསལ་པོ་ཤེས་ཀྱི་མེད་པ་དང་། དཔེར་ན། མི་ག་ཚོད་ཙམ་འདས་གྲོངས་སུ་སོང་བ་དང་མི་ག་ཚོད་ཙམ་ཞིག་གར་སོང་ཆ་མེད་དུ་གྱུར་བའི་གྲངས་ཐོར་རྫུན་བཟོ་བྱས་པའི་སྣང་ཚུལ་ཡོད་པ། ད་དུང་ཞལ་འདེབས་ཀྱི་སྐོར་ལ་མཚོན་ན། བོད་ནང་ནས་ཞལ་འདེབས་བསྡུ་རུབ་ཀྱི་ཐད་དོ་དམ་བྱས་པའི་གནས་ཚུལ་བྱུང་ཡོད་པ་ཡང་གསུངས་ཡོད།

དེ་ཡང་ཆུ་ལོག་གི་གོད་ཆག་གི་གནས་ཚུལ་ཁ་གསལ་མེད་པའི་གནད་དོན་དེ་དག་དང་རྒྱ་ནག་གིས་བོད་ཐོག་འཛིན་པའི་གཞི་རྒྱ་ཆེ་བའི་སྲིད་བྱུས་ལ་སྐྱོན་བརྗོད་གནང་ཡོད་པ་ད་རེས་ཡུ་རོབ་གྲོས་ཚོགས་ཀྱི་གྲོས་འཆར་དེའི་ནང་འཁོད་ཡོད།

བཅའ་སྡོད་སློབ་གྲྭ་དང་ཆོས་དད་རང་དབང་།

སྙན་ཐོ་དེའི་ནང་རྒྱ་ནག་གིས་བོད་ནང་དུ་ཐབས་བྱུས་ལྡན་པའི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་མི་རིགས་ཀྱི་ངོ་བོ་རྩ་མེད་གཏོང་བཞིན་པ་མ་ཟད། རྒྱ་ནག་གིས་བོད་ནང་གི་མནའ་བོའི་རིག་གནས་ཤུལ་བཞག་གི་ལྟེ་གནས་རྩ་གཏོར་བཏང་བ་དང་རྒྱ་ཁྱབ་ཀྱི་ལྟ་སྲུང་དམ་དྲག་བྱས་པ། དེ་བཞིན་བཙན་དབང་གི་ངལ་རྩོལ་རྒྱུག་བཅུག་པ་སོགས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་སེམས་འཚབ་ཆེད་འདོན་གནང་བ་མ་ཟད། ལྷག་པར་དུ་རྒྱ་ནག་གཞུང་གིས་བཅའ་སྡོད་སློབ་གྲྭའི་ནང་དུ་བོད་པའི་བྱིས་པ་ས་ཡ་གཅིག་ཙམ་ཕ་མ་དང་བཙན་དབང་གི་ཁ་བྲལ་བཏང་སྟེ་མི་རིགས་རྒྱ་སྒྱུར་དང་མཉམ་བསྲེས་ཀྱི་སློབ་སྦྱོང་སྤྲོད་བཞིན་པ་དང་འབྲེལ། བཅའ་སྡོད་སློབ་གྲྭའི་ལམ་ལུགས་དེས་བོད་པའི་བྱིས་པ་ཚོ་ཕ་མ་དང་ཁ་བྲལ་བཏང་བའི་སེམས་ཁམས་ཀྱི་ཛ་དྲག་དཀའ་ངལ་འཕྲད་པ་མ་ཟད། དེས་བོད་ཀྱི་སྐད་ཡིག་དང་གོམས་སྲོལ་ཡོངས་རྫོགས་ལ་དོ་ཕོག་ཤུགས་ཆེ་གཏོང་གི་ཡོད་སྟབས། བཅའ་སྡོད་སློབ་གྲྭའི་འགྲོ་ལུགས་དེ་འཕྲལ་དུ་མཚམས་འཇོག་བྱེད་དགོས་པ་འཁོད་འདུག

ད་དུང་སྙན་ཐོའི་བརྒྱུད་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་བྱེད་སྒོ་ཁག་གི་ཐོག་ལ་ཐེ་བྱུས་བྱེད་བཞིན་པ་དང་། ལྷག་པར་དུ་མ་འོངས་༸རྒྱལ་བའི་ཡང་སྲིད་འདེམས་རྒྱུའི་བདག་དབང་རྩོད་ཐབས་བྱེད་བཞིན་པར་སྐྱོན་བརྗོད་དང་འབྲེལ། བོད་མིའི་ཆོས་དད་རང་དབང་སྲུང་སྐྱོབ་བྱ་རྒྱུ་དེ་ནི་བློས་གཏོང་བྱ་ཐབས་མེད་པའི་གནད་དོན་ཞིག་ཡིན་པ་མ་ཟད་གཞན་ཡང་རྒྱ་ནག་གི་བཙོན་འཇུག་འོག་གར་སོང་ཆ་མེད་དུ་གྱུར་བའི་༸ཀུན་གཟིགས་༸པན་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གི་སྐོར་ལ་གནས་ཚུལ་ཕྱི་གསལ་བྱེད་དགོས་པ་བཅས་འཁོད་འདུག

བརྙན་པར་སྒྲིག་སྦྱོར་བ། བསྟན་འཛིན་བདེ་སྐྱིད།

འབྲེལ་ཡོད་གནས་ཚུལ།

ཡུ་རོབ་གྲོས་ཚོགས་སུ་བོད་ནང་ཆུ་ལོག་གི་གནོད་འཚེའི་སྐོར་གསལ་བཤད་དགོས་པའི་དགོས་འདུན་བཏོན།

མགོ་ལོག་ར་རྒྱའི་གངས་ལྗོངས་རྩྭ་ཐང་བུ་མོའི་སློབ་གྲྭ་ལོ་ ༢༡ རྗེས་སུ་སྒོ་བརྒྱབ་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། ཟླ་ ༡༠ ཚེས་ ༡༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་མཛད་དེ། འདི་ལོར་རྒྱ་གར་དང་བལ་ཡུལ་གཉིས་ནས་ཐོན་པའི་དགེ་བཤེས་མ་ ༣༣ དང་འཇང་དགུན་ཆོས་ནང་མཉམ་ཞུགས་གནང་མཁན་སོགས་བཙུན་མ་ཁྱོན་ ༥༠༠ ལྷག་ལ་མཇལ་ཁ་དང་། འཕགས་བོད་གྲུབ་ཆེན་སྐྱེས་མ་ཉེར་གཅིག་གི་གསོལ་འདེབས་དད་པའི་མཆོད་སྤྲིན་གྱི་ལྗགས་ལུང་བསྩལ་ཡོད་པ་རེད།

(OHHDL)

བོད་ཀྱི་བཙུན་མའི་ལས་འཆར་གྱི་འགན་འཛིན་སྤྱི་ཟུར་དབུ་དཀར་ཚང་གཡུ་སྒྲོན་ལགས་ཀྱིས། ༧རྒྱལ་དབང་རིན་པོ་ཆེའི་ཐུགས་རྗེའི་བཀའ་དྲིན་ལ་བརྟེན་ནས་ད་ཆ་དགེ་བཤེས་མ་ཐོན་ཐེངས་དགུ་པ་དེ་ཆགས་ཀྱི་ཡོད་པ་དང་ད་རེས་སྐལ་བ་བཟང་པོ་བྱུང་ཞིང་། མ་འོངས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གྱི་ཐད་བོད་ཀྱི་བཙུན་མས་ཞབས་འདེགས་རླབས་ཆེན་བསྒྲུབ་པའི་རེ་བ་གནང་གི་ཡོད་པ་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

(OHHDL)

འདི་ལོར་དགེ་བཤེས་མའི་བསླབ་པ་ཐར་སོན་བྱུང་པའི་དགེ་བཤེས་མ་ཁོང་རྣམས་ནི་སྐབས་དགུ་པ་ཆགས་ཀྱི་ཡོད་པ་དང་། རྒྱ་བལ་གཉིས་སུ་རྟེན་གཞི་བྱས་པའི་དགོན་སྡེ་ཁག་ལྔ་ནས་དགེ་བཤེས་མ་ ༣༣ ཐོན་པ་ཞིག་ཆགས་ཀྱི་འདུག ཁོང་རྣམས་ཀྱིས་ཕྱི་ཟླ་ ༡༠ ཚེས་ ༡༧ ཉིན་ཐེག་ཆེན་ཆོས་གླིང་གཙུག་ལག་ཁང་དུ་བོད་བརྒྱུད་ནང་བསྟན་གྱི་སྐབས་ ༩ དགེ་བཤེས་མའི་བསླབ་པ་མཐར་སོན་གྱི་དམ་འཇོག་དང་མཛད་སྒོ་འཚོགས་ཡོད་པ་རེད་ལ། འདི་ལོའི་འཇང་དགུན་ཆོས་ལ་མཚོན་ན་ཐེངས་སུམ་བཅུ་པ་ཆགས་ཀྱི་འདུག་ཅིང་། དེའི་ཐོག་དགོན་སྡེ་ཁག་བཅུ་གཅིག་གི་བཙུན་མས་མཉམ་ཞུགས་གནང་ཡོད་པ་དང་། དགེ་བཤེས་མ་ཐོན་ཟིན་པ་རྣམས་ལ་༧གོང་ས་མཆོག་གི་མཇལ་ཁ་ཐོབ་པར་དགའ་ཚོར་བྱུང་ཞིང་། དགེ་བཤེས་མའི་སློབ་གཉེར་གནང་རྒྱུའི་དམིགས་ཡུལ་ཡོད་པ་རྣམས་ལ་སེམས་ཤུགས་འཕར་མ་བསྐྲུན་ཡོད་པ་གསུང་གི་འདུག

དེ་ཡང་དགེ་བཤེས་མ་ཆོས་དབྱིངས་བཟང་མོ་ལགས་ཀྱིས། དེ་སྔ་༧གོང་ས་མཆོག་གིས་མཇལ་ཁ་ཞིག་གི་སྐབས་དགེ་བཤེས་མའི་སློབ་གཉེར་གནང་དགོས་པའི་བཀའ་སློབ་ཕེབས་པ་བཞིན། ཐེངས་འདིར་རང་ཉིད་ཀྱི་ལས་འགན་ཞིག་གྲུབ་པའི་ཚོར་བ་ཞིག་བྱུང་པར་དགའ་ཚོར་ཆེན་པོ་ཡོང་གི་འདུག་ཅེས་གསུང་གི་འདུག་ལ། དགེ་བཤེས་མ་ཐུབ་བསྟན་བསྟན་འཛིན་ལགས་ཀྱིས། ལོ་ངོ་ཉི་ཤུ་ལྷག་གི་རིང་གཞུང་ཆེན་ཀ་པོད་ལྔ་ལ་ཐོས་བསམ་སློབ་གཉེར་གནང་སྟེ། ད་ཆ་དགེ་བཤེས་མ་ཐོན་གྲུབ་པ་དང་༧གོང་ས་མཆོག་གི་མཇལ་ཁ་ཐོབ་པར་བསྐལ་བ་བཟང་པོ་ཚོར་བཞིན་ཡོད་ཅེས་གསུང་གི་འདུག

ཡང་དགེ་བཤེས་མ་ཐུབ་བསྟན་སྒྲོལ་དཀར་ལགས་ཀྱིས། ཐེངས་འདིར་དགེ་བཤེས་མ་ཐོན་ཐུབ་པ་དེ་ཧ་ཅང་བསྐལ་བ་བཟང་པོ་ཚོར་གྱི་འདུག་ལ། དེ་ནི་གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་དང་དགེ་བའི་བཤེས་གཉེན། སྦྱིན་བདག་བཅས་ཀྱི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་ཞེས་གསུང་གི་འདུག

(OHHDL)

བཙུན་མ་ལྷ་མོ་ལགས་ཀྱིས། དེ་སྔ་འཇང་དགུན་ཆོས་རྒྱུན་ལྡན་འཚོགས་སྐབས་༧གོང་ས་མཆོག་གི་མཇལ་ཁ་ཐོབ་ཀྱི་མེད་ཀྱང་། ཐེངས་འདིར་མཇལ་ཁ་ཐོབ་པ་ནི་བསོད་ནམས་ཆེན་པོ་བྱུང་ཞིང་། ལྷག་པར་དུ་འཕགས་བོད་གྲུབ་ཆེན་སྐྱེས་མ་ཉེར་གཅིག་གི་གསོལ་འདེབས་ཀྱི་ལྗགས་ལུང་དེ་བཞིན་༧གོང་ས་མཆོག་གི་སྐུ་མདུན་ནས་ཐོབ་པར་དེ་བས་བསོད་ནམས་ཆེ་བ་བྱུང་ཞེས་གསུང་གི་འདུག་ལ། ཁོང་ལྟ་བུ་ད་ཆ་དབུ་མ་ལོ་རིམ་གསུམ་པར་བསླེབས་ཡོད་ཅིང་། ཁྱོན་དགེ་བཤེས་མ་ཐོབ་པར་ལོ་དགུ་ལྷག་ཡོད་དུས་སྐབས་དེར་༧གོང་ས་མཆོག་སྐུ་བཞུགས་མཛད་ངེས་ཡིན་པས་ང་ལ་གོ་སྐབས་ད་དུང་ཐོབ་རྒྱུ་ཡོད་པའི་ཚོར་བ་སྐྱིད་པོ་ཞིག་ཡོང་གི་འདུག་ཅེས་གསུངས་བྱུང་།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འཕགས་བོད་གྲུབ་ཆེན་སྐྱེས་མ་ཉེར་གཅིག་གི་གསོལ་འདེབས་ལྗགས་ལུང་བསྩལ་གྲུབ་རྗེས། ཐེག་ཆེན་ཆོས་གླིང་གཙུག་ལག་ཁང་དུ་གནས་གཟིགས་སུ་ཆིབས་བསྒྱུར་མཛད་སོང་།

རི་བོ་དགེ་ལྡན་པའི་མདོ་སྔགས་ཀྱི་གཞུང་ཆེན་ལ་སློབ་གཉེར་གནང་བའི་བརྒྱུད་རིམ་ལྟར་ན། མདོ་སྔགས་གཉིས་ལ་སློབ་གཉེར་མཐར་སོན་བྱུང་བའི་དགེ་བཤེས་མ་རྣམས་ཀྱིས། གོ་སྐབས་དང་བསྟུན་རིགས་གཅིག་རྐང་འཛིན་ཐོག་ཉམས་ཞིབ་ཀྱི་སློབ་གཉེར་གནང་མཁན་ཁག་ཅིག་དང་། རྒྱ་གར་ནང་ཆོས་ཚོགས་སོགས་ཤེས་ཡོན་དང་འབྲེལ་བའི་ཚོགས་ཆེན་དུ་ཞུགས་མཁན་དང་། མང་ཚོགས་ཁྲོད་ནང་ཆོས་ངོ་སྤྲོད་དང་ཤེས་ཡོན་སྡེ་ཁག་ཏུ་ལྟ་གྲུབ་སློབ་དཔོན་སོགས་གནང་མཁན་ཡང་མང་དག་ཅིག་འབྱུང་བཞིན་ཡོད་པ་རེད།།

པར་ལེན། བདེ་སྐྱིད་ཀུན་སྒྲོལ།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

འདི་ག་རླུང་འཕྲིན་ཁང་ལ་བོད་ནས་འབྱོར་བའི་གནས་ཚུལ་ལྟར་ན། ༢༠༠༥ ལོར་བོད་ཀྱི་སློབ་གསོའི་ཐོག་ཕྱག་ལས་གནང་མཁན་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་གསར་བཙུགས་གནང་པའི་གངས་ལྗོངས་རྩྭ་ཐང་བུ་མོའི་སློབ་གྲ་འདི་བཞིན་ད་ལོ་ཟླ་ ༨ ཚེས་ ༢༨ ཉིན་རྒྱ་ནག་གཞུང་གིས་སྒོ་བརྒྱབ་ཡོད་པའི་སྐོར་རང་གི་བདེ་འཇགས་ཆེད་མིང་བརྗོད་འདོད་མེད་པ་འབྲེལ་ཡོད་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྗོད་བྱུང་ལ། སྐབས་དེ་དུས་སློབ་མ་ ༤༥༠ ཙམ་དང་དགེ་ལས་ ༦༠ ཙམ་ཡོད་ཅིང་། ད་ལྟ་མགོ་ལོག་ཁུལ་གྱི་སློབ་གྲྭ་ཁག་ནང་རྒྱལ་གཅེས་ཀྱི་དམར་པོའི་ལྟ་བའི་སློབ་གསོ་ཤུགས་ཆེན་སྤེལ་བཞིན་ཡོད་པ་དང་། གངས་ལྗོངས་རྩྭ་ཐང་བུ་མོའི་སློབ་གྲྭ་འདི་དམངས་བཙུགས་གཞུང་རོགས་ཀྱི་རྣམ་པར་གྱུར་ནས་སློབ་གསོའི་ནང་དོན་ནི་གཞུང་གི་སློབ་གསོའི་བཀོད་སྒྲིག་ཐོག་བོད་ཀྱི་སྐད་ཡིག་གཙོ་བཟུང་གི་འཚོ་བའི་སྲོལ་རྒྱུན་སློབ་གསོའི་ནང་དོན་ཡང་ཚུད་པ་ཞིག་ཡིན་ཞིང་། གཞུང་གི་སློབ་གསོའི་ཁ་ཕྱོགས་དམིགས་ཡུལ་དང་མི་མཐུན་པར་ངོས་འཛིན་བྱས་པ་ཞིག་རེད་ཅེས་བརྗོད་མཁན་བྱུང་། བོད་ནང་གི་བོད་མིས་གནས་ཚུལ་ཁ་གསལ་བརྗོད་རྒྱུར་ཞེད་སྣང་དང་གཞུང་གི་གནས་ཚུལ་བཀག་སྡོམ་ཤུགས་ཆེན་ཡིན་པར་བརྟེན་སློབ་དུས་གསར་པ་ནས་སློབ་གྲྭ་སྒོ་བརྒྱབ་པའི་རྗེས་སློབ་མ་ཚོ་གང་དུ་སྤོས་པ་དང་། སྒོ་རྒྱག་པའི་གཞུང་འབྲེལ་གྱི་རྒྱུ་མཚན་གང་ཡིན་ད་ལྟ་ཁ་གསལ་མེད་པ་རེད་འདུག

ད་ལྟའི་ཆར་ར་རྒྱ་གྲོང་རྡལ་བུ་མོའི་སློབ་གྲྭ་སྒོ་བརྒྱབ་པའི་རྒྱུ་མཚན་གང་ཡིན་དང་། སུས་བཀའ་བཏང་བ། སློབ་མ་ཚོ་གང་དུ་སྤོས་པ་སོགས་ཀྱི་གནས་ཚུལ་གཞུང་འབྲེལ་གསལ་བཤད་ཁ་གསལ་ཞིག་ད་བར་མཐོང་རྒྱུ་མི་འདུག

(མི་སེར་གྱི་འདྲ་པར།)

ཐོག་མར་སློབ་གྲྭ་གསར་བཙུགས་དང་བོད་ཕྲུག་གསོ་སྐྱོང་།

བོད་ཀྱི་སློབ་གསོ་བ་འཇིགས་མེད་རྒྱལ་མཚན་ལགས་ཀྱིས་ ༡༩༩༧ ལོ་ནས་བུ་མོའི་སློབ་གྲྭ་ཞིག་འཛུགས་རྒྱུའི་ཆེད་དུ་ས་གནས་སློབ་གསོ་ལས་ཁུངས་ལ་རེ་ཞུ་གནང་པ་དང་། ༢༠༠༡ ལོར་རྨ་ཆེན་རྫོང་གིས་ཆོག་མཆན་སྤྲད་པའི་རྗེས་ཁོང་གིས་རྒྱ་སྒོར་ས་ཡ་གསུམ་ལྷག་གི་མ་དངུལ་བསྡུས་ནས། ༢༠༠༥ ལོར་ར་རྒྱའི་ཨ་མྱེས་རི་བོའི་འདབས་སུ་བུ་མོའི་སློབ་གྲྭ་དངོས་སུ་བཙུགས་པ་དང་། སྐབས་དེར་ཁོང་གིས་བུ་མོའི་སློབ་གསོ་ནི་ཨ་མའི་སློབ་གསོ་ཡིན་ལ། ཨ་མའི་སློབ་གསོ་ནི་མི་རིགས་ཡོངས་ཀྱི་སློབ་གསོའི་རྩ་བ་ཡིན་ཞེས་པའི་ལྟ་གྲུབ་གཙོ་བོར་བཞག་ཡོད་འདུག

ཡང་ ༢༠༠༥ ལོའི་ཟླ་ ༡༠ ཚེས་ ༡༥ ཉིན་སློབ་གྲྭ་འདི་དངོས་སུ་སྒོ་ཕྱེ་གནང་སྐབས་སློབ་མ་ ༢༠༣ དང་དགེ་ལས་ ༡༥ ཡོད་པ་དང་། སློབ་གྲྭས་ཐོག་མར་ལོ་རེར་བུ་མོ་ ༤༠ བསྡུས་ནས་ལོ་དྲུག་གི་ནང་སློབ་མ་ ༢༤༠ ལ་སླེབས་རྒྱུའི་འཆར་གཞི་བཟོས་ཡོད་ཀྱང་ལོ་གཉིས་པར་སློབ་མའི་གྲངས་ ༢༤༠ ལ་སླེབས་ཡོད། རྗེས་སུ་སློབ་གྲྭ་དེ་དམངས་བཙུགས་གཞུང་རོགས་ཟེར་བའི་རྣམ་པར་གྱུར་ནས་སློབ་གྲྭའི་མིང་ལ་ར་རྒྱ་གྲོང་རྡལ་བུ་མོའི་སློབ་གྲྭ་ཞེས་མིང་ལ་བསྒྱུར་བ་བཏང་པ་སོགས་རྒྱ་ནག་གཞུང་འབྲེལ་བརྒྱུད་ལམ་གྱིས་གནས་ཚུལ་སྤེལ་འདུག

སློབ་གྲྭ་དེའི་སློབ་ཁྲིད་ཐོག་བོད་ཡིག་དང་། རྒྱ་ཡིག དབྱིན་ཡིག་གསུམ་དང་། རྩིས་རིག ཚན་རིག རིག་གནས་དང་ལུས་རྩལ་སོགས་དེང་རབས་ཀྱི་སློབ་ཚན་དང་བོད་ཀྱི་རིག་གནས་ཟུང་འབྲེལ་བྱས་པའི་ཐོག་ར་རྒྱའི་སློབ་གྲྭ་ཁག་གིས་གྲྭ་སའི་རིག་ལམ་གྱི་སློབ་སྟངས་ལྟ་བུའི་ཐབས་ལམ་ཡང་དེང་རབས་སློབ་ཁྲིད་ནང་བེད་སྤྱོད་དང་། སློབ་མ་ཚོའི་ཁྲོད་བྱེད་སྒོ་སྣ་ཚོགས་གོ་སྒྲིག་བྱེད་པ་སོགས་ཡོད་འདུག གངས་ལྗོངས་རྩྭ་ཐང་བུ་མོའི་སློབ་གྲྭ་ནས་གསོ་སྐྱོང་བྱུང་བའི་བོད་པའི་བུ་མོ་མང་པོ་ད་ཆ་ལས་གནས་འདྲ་མིན་གྱི་ནང་རང་རྐྱ་འཕེར་བའི་ཐོག་ནས་སྤྱི་ཚོགས་ནང་ཞབས་འདེགས་གྲུབ་ནས་ཡོད་འདུག

ཕྱི་ཟླ་ ༡༠ ཚེས་ ༡༦ ཉིན་དྲ་ཐོག་ལ་འབྲེལ་ཡོད་སློབ་མས་དེ་རིང་མ་ཡུམ་སློབ་གྲྭའི་སྐྱེ་སྐར་རེད་ཅེས་པའི་བརྙན་དང་འདྲ་པར་སྤེལ་ནས་དྲན་གསོ་བྱས་པ་ཡང་མཐོང་རྒྱུ་འདུག

ཡང་ ༡༩༩༤ ལོར་བཙུགས་པའི་འཇིགས་མེད་རྒྱལ་མཚན་མི་རིགས་ལས་རིགས་སློབ་གྲྭ་འདི་ ༢༠༢༤ ལོའི་ཟླ་ ༧ པར་ལོ་ ༣༠ ཙམ་གྱི་རྗེས་སུ་རྒྱ་ནག་གཞུང་གིས་སྒོ་བརྒྱབ་ཡོད་པ་དང་། སློབ་གྲྭ་དེས་བོད་ཡིག་དང་བོད་ཀྱི་རིག་གཞུང་གཙོ་བོར་བཞག་པའི་སློབ་གསོ་དང་དེང་རབས་ཀྱི་ལས་རིགས་སློབ་གསོ་ཟུང་འབྲེལ་ངང་སྤེལ་ཡོད།

(མི་སེར་གྱི་འདྲ་པར།)

མགོ་ལོག་མཚོ་ཤར་སློབ་འབྲིང་གསར་བཙུགས།

འདི་ལོ་ཟླ་བ་བརྒྱད་པའི་ནང་གངས་ལྗོངས་རྩྭ་ཐང་བུ་མོའི་སློབ་གྲྭ་སྒོ་བརྒྱབ་པ་དང་དུས་མཚུངས་མགོ་ལོག་ཁུལ་གྱི་སློབ་གསོ་ཚན་པས་གསར་དུ་བཙུགས་པའི་མགོ་ལོག་མཚོ་ཤར་སློབ་འབྲིང་འདི་ཕྱི་ཟླ་ ༩ ཚེས་ ༡ ཉིན་དངོས་སུ་སློབ་འགོ་ཚུགས་ཡོད་པ་དང་། མགོ་ལོག་ཁུལ་ནས་ཐོག་མའི་སློབ་མ་ ༡༢༠༠ བསྡུས་ཡོད་པའི་ཁོངས་ནས་སློབ་མ་ ༡༠༩༠ བོད་པ་ཡིན་པ་དང་དེའི་ནང་སློབ་མ་ ༩༠༦ འབྲོག་པ་དང་ཞིང་པའི་བུ་ཕྲུག་ཡིན་པ་གཞུང་འབྲེལ་བརྒྱུད་ལམ་ནང་བཀོད་འདུག་ལ། གཞུང་ཕྱོགས་ཀྱིས་མགོ་ལོག་ཁུལ་གྱི་སློབ་མ་ཚོ་ས་དམའ་བའི་མཚོ་ཤར་ཁུལ་དུ་སྤོས་པ་དང་། མཐོ་སྒང་ས་ཁུལ་གྱི་བཅའ་སྡོད་སློབ་གསོ་རྒྱ་སྐྱེད་ཀྱི་ལས་གཞི་ཞིག་ཡིན་པར་བརྗོད་འདུག འོན་ཀྱང་གངས་ལྗོངས་རྩྭ་ཐང་བུ་མོའི་སློབ་མ་ཚོ་སློབ་གྲྭ་གསར་པ་འདིར་སྤོས་ཡོད་མེད་གནས་ཚུལ་ཁ་གསལ་མེད་རུང་། སློབ་གྲྭ་གསར་པ་འདིའི་ནང་རྨ་ཆེན་རྫོང་ནས་སློབ་མ་ཡོད་པ་བརྗོད་འདུག

(མགོ་ལོག་སློབ་གསོ།)

མགོ་ལོག་གི་སློག་གྲྭ་ཁག་ལ་དོ་དམ་དང་སྟངས་འཛིན།

གངས་ལྗོངས་རྩྭ་ཐང་བུ་མོའི་སློབ་གྲྭ་གཞུང་ཕྱོགས་ཀྱིས་སྒོ་བརྒྱབ་པའི་དུས་ཚོད་འདིའི་རིང་མགོ་ལོག་གི་སློབ་གྲྭ་ཁག་ཏུ་རྒྱལ་ཁབ་ཀྱི་སྤྱི་སྐད་དམ་རྒྱ་སྐད་ཁྱབ་སྤེལ་གྱི་ལས་འགུལ་རྒྱ་བསྐྱེད་བཏང་ཡོད་ཅིང་། ཟླ་ ༩ པར་མགོ་ལོག་ཁུལ་གྱིས་སྤྱི་སྐད་ཁྱབ་སྤེལ་གཟའ་འཁོར་ཞེས་པའི་ལས་འགུལ་སྤེལ་ནས་སློབ་མ་ཚོར་ཚད་ལྡན་གྱི་རྒྱ་སྐད་སྦྱོང་སྤྱོད་དང་། རྒྱ་ནག་ཀྲུང་ཧྭ་མི་རིགས་མཉམ་སྡེབ་ཀྱི་འདུ་ཤེས་བརྟན་དུ་གཏོང་དགོས་པའི་ནན་བརྗོད་བྱས་འདུག་ལ། ཟླ་བ་བརྒྱད་པར་མགོ་ལོག་ཁུལ་གྱི་སློབ་གསོ་ཚན་པས་ཀྱང་སློབ་གསོའི་ཁོངས་ཀྱི་བདེ་འཇགས་དང་ཁྲིམས་འགལ་གནས་ཚུལ་གྱི་ཁུངས་སྣེ་བསྡུ་རྒྱུའི་གསལ་བསྒྲགས་བྱས་འདུག་ དེ་བཞིན་འདི་ལོ་ཟླ་བ་བརྒྱད་པར་རྒྱ་ནག་དབུས་རྩ་འཛུགས་ལས་ཁུངས་དང་སློབ་གསོ་ལྷན་ཁང་གིས་སློབ་ཆུང་དང་འབྲིང་སློབ་ཀྱི་འགོ་ཁྲིད་དོ་དམ་གཏན་འབེབས་གསར་བཅོས་བྱས་པའི་ནང་སློབ་གྲྭའི་དོ་དམ་ནང་དམར་ཤོག་གི་ཕྱོགས་ཡོངས་ཀྱི་འགོ་ཁྲིད་དང་ཆབ་སྲིད་ཀྱི་ཚད་གཞི་གཙོ་བོར་བཞག་དགོས་པའི་གཏན་འབེབས་དེས་སློབ་གྲྭའི་འགོ་ཁྲིད་ལ་དམར་ཤོག་གི་སློབ་གསོའི་སྲིད་བྱུས་དང་གོང་རིམ་གྱི་ཐག་གཅོད་ལག་བསྟར། བསམ་བློའི་ཆབ་སྲིད་ཀྱི་སློབ་གསོ་དང་སློབ་གྲྭའི་བརྟན་ལྷིང་སོགས་ཀྱི་ཐད་འགན་འཁྲི་ཇེ་ཆེར་བཏང་ཡོད་འདུག

(མགོ་ལོག་སློབ་གསོ།)

ཉེ་བའི་ལོ་ཤས་རིང་མགོ་ལོག་གི་སློབ་གྲྭ་ཁག་ཅིག་སྒོ་བརྒྱབ་པ།

ཉེ་བའི་ལོ་ཤས་ནང་མགོ་ལོག་གཙོས་པའི་བོད་ཁུལ་དུ་བོད་སྐད་ཡིག་དང་རིག་གཞུང་སློབ་ཁྲིད་གཙོ་བོར་གྱུར་པའི་སྒེར་གཉེར་སློབ་གྲྭ་ཁ་ཤས་ཤིག་གཅིག་རྗེས་གཉིས་མཐུད་ངང་རྒྱ་ནག་གཞུང་གིས་སྒོ་བརྒྱབ་ཡོད་པ་དང་། མགོ་ལོག་ཁུལ་དུ་མཚོན་ན། ༢༠༢༤ ལོའི་ཟླ་བ་བདུན་པར་མགོ་ལོག་རྨ་ཆེན་རྫོང་གི་འཇིགས་མེད་རྒྱལ་མཚན་མི་རིགས་ལས་རིགས་སློབ་གྲྭ་འདི་བཞིན་ལོ་༣༠ ཙམ་གྱི་རྗེས་སུ་སྒོ་བརྒྱབ་པ་དང་། སྒོ་རྒྱབ་སྐབས་སློབ་གྲྭ་དེར་སློབ་མ་ ༡༤༠༠ ཙམ་དང་དགེ་ལས་ ༥༨ ཙམ་ཡོད་འདུག་ལ། ༢༠༢༥ ལོའི་ཟླ་ ༡༢ པར་མགོ་ལོག་གཅིག་སྒྲིལ་རྫོང་གི་རྡོ་རྗེ་བརྟན་མི་རིགས་ལས་རིགས་སློབ་གྲྭ་ཡང་གློ་བུར་དུ་སྒོ་བརྒྱབ་པ་དང་། སློབ་གྲྭ་དེར་སློབ་མ་ ༡༣༠༠ ལྷག་ཡོད་འདུག ཡང་ ༢༠༢༦ ལོའི་ཟླ་ ༦ ཚེས་ ༢༤ ཉིན་མགོ་ལོག་གི་ཧུང་དཀར་རྡོ་རྗེ་ལས་རིགས་མཐོ་འབྲིང་སློབ་གྲྭ་ཡང་སྒོ་བརྒྱབ་ཡོད་པ་རེད།།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

འབྲེལ་ཡོད་གནས་ཚུལ།

རྒྱ་ནག་གཞུང་གིས་བོད་ཀྱི་སློབ་གྲྭ་ཁག་སྒོ་བརྒྱབ་ནས་གཞི་རྩའི་ཐོབ་ཐང་རྡོག་རོལ་གཏོང་བཞིན་པ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཐེར་འདོན་གནང་འདུག

རྒྱ་ནག་གཞུང་གིས་བོད་ནང་སྒེར་གྱིས་བཙུགས་པའི་སློབ་གྲྭ་རིམ་པ་སྒོ་བརྒྱབ་ཏུ་བཅུག་པ།

རྒྱ་ནག་གཞུང་གིས་བོད་མདོ་སྨད་མགོ་ལོག་ནང་གནས་པའི་གངས་ལྗོངས་ཤེས་རིག་ནོར་གླིང་ལས་རིགས་སློབ་གྲྭ་སྒོ་བརྒྱབ་བཅུག་པའི་གནད་དོན་གླེང་མོལ།

རྒྱ་ནག་གཞུང་གིས་བོད་མདོ་སྨད་མགོ་ལོག་རྭ་རྒྱའི་དགེ་འདུན་པ་འཇིགས་མེད་རྒྱལ་མཚན་ལགས་ཀྱིས་བཙུགས་པའི་གངས་ལྗོངས་ཤེས་རིག་ནོར་གླིང་སློབ་གྲྭ་སྟེ། བོད་ཀྱི་རིག་གཞུང་དང་སྐད་ཡིག་ལ་སློབ་གཉེར་བྱེད་སའི་སྒེར་གཉེར་སློབ་གྲྭ་གྲགས་ཆེ་ཤོས་ཤིག་སྒོ་བརྒྱབ་བཅུག་འདུག

རྒྱ་ནག་གཞུང་གིས་སེང་འབྲུག་སྟག་རྩེ་སྒེར་གཉེར་སློབ་གྲྭ་སྒོ་བརྒྱབ་རྗེས་དྭ་ཕྲུག་སློབ་ཕྲུག་ཚོ་གར་འགྲོ་གང་བྱེད་མེད་པའི་གནས་སུ་ལྷག་ཡོད་འདུག

“ང་སྔོན་མ་ཆུང་དུས་ནས་རི་མོ་འབྲི་རྒྱུ་སོགས་ལ་དགའ་པོ་ཡོད། ཆུང་དུས་ངའི་པཱ་ལགས་ཡང་ཕལ་ཆེར་རི་མོ་འབྲི་རྒྱུར་དགའ་པོ་ཡོད་པ་ཤེས་ཀྱི་ཡོད། ངས་རི་མོ་བྲིས་པ་ཐོག་མ་དེ་ནི། ཨང་གྲངས་ ༢ དེ་ངང་པ་ནང་བཞིན་བྲིས་རྒྱུ་དེ་རེད།” ཅེས་བོད་པའི་བུད་མེད་གློག་བརྙན་བཟོ་སྐྲུན་པ་ཀུན་བཟང་སྐྱིང་གྲོང་ལགས་ཀྱིས་གློག་བརྙན་བཟོ་སྐྲུན་གྱི་མི་ཚེའི་བརྒྱུད་རིམ་སྐོར་ངོ་སྤྲོད་གནང་སྐབས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

ཡར་ཀླུངས་། གློག་བརྙན་དང་པོ།

ཁེ་ན་ཌའི་ཊོ་རོན་ཊོ་གློག་བརྙན་དུས་སྟོན་ (Toronto International Film Festival) ནང་བདམས་ཐོན་བྱུང་བའི་ (100 Sunset ) ཞེས་པ་བཟོ་སྐྲུན་གནང་མཁན། ཁེ་ན་ཌར་གནས་སྡོད་བོད་ཀྱི་བུད་མེད་གློག་བརྙན་བཟོ་སྐྲུན་པ་ཀུན་བཟང་སྐྱིད་གྲོང་ལགས་ཀྱི་རི་མོ་བྲིས་སྐབས་ཀྱི་རྒྱུ་ཆ་དགའ་ཤོས་སོལ་བ་རེད་འདུག་པ་དང་། ཁོང་གི་དུས་ཐུང་གློག་བརྙན་དང་ཤོས་ཡར་ཀླུངས་ཞེས་པ་དེ་སོལ་བ་བེད་སྤྱོད་གནང་སྟེ་བཟོས་པ་ཞིག་ཆགས་ཀྱི་འདུག

སོལ་བས་རི་མོ་བྲིས་ཏེ་འགུལ་རིས་གློག་བརྙན་བཟོས་པ།

ཀུན་བཟང་སྐྱིད་གྲོང་་ལགས་ཀྱིས་མུ་མཐུད་གསུངས་དོན་དུ། “ངས་རི་མོ་བྲིས་པའི་རྒྱུ་ཆ་དགའ་ཤོས་ནི་སོལ་བའམ་(ཀོ་ལ་)རེད། སོལ་བ་ནི་སོབ་པ་དང་འཇམ་པའི་རང་བཞིན་ཡིན་དུས་ཚོར་བ་དངོས་དང་བསམ་ཤེས་ཐུབ་པ་ཡོང་གི་འདུག ངའི་དུས་ཐུང་གློག་བརྙན་དང་ཤོས་སྐར་མ་ལྔ་ཅན་ཡར་ཀླུངས་ཞེས་པ་དེ་ཡང་། སོལ་བ་བེད་སྤྱད་དེ་བཟོས་པ་ཞིག་ཡིན། དེ་ཡང་རི་མོ་བྲིས། བསུབས། པར་རྒྱག (ཡར་ཀླུངས་གི་འགུལ་རིས་གློག་བརྙན་གྱི་བརྒྱུད་རིམ།) ཡར་ཀླུངས་རྗེས་ལ་ངའི་མདུན་ལམ་ཁ་གསལ་དུ་ཕྱིན་སོང་།” ཞེས་གསུངས་བྱུང་།

ཀུན་བཟང་སྐྱིད་གྲོང་ལགས་ཀྱིས་བཟོ་སྐྲུན་གནང་བའི་གློག་བརྙན་ 100 Sunset ཞེས་པ་དེ་ཕྱི་ལོ་ ༢༠༢༥ ལོའི་ཊོ་རོན་ཊོ་གློག་བརྙན་དུས་སྟོན་ (Toronto International Film Festival) ནང་བདམས་ཐོན་བྱུང་ཡོད་པ་རེད། ཁོང་གིས་གསུངས་ན། (TIFF) གློག་བརྙན་དུས་སྟོན་དེའི་ནང་ཚོད་ལྟ་ (Experimental) དང་གཏམ་རྒྱུད་ (Narrative) གཉིས་ཀ་ཚུད་ཐབས་བྱེད་ཀྱི་ཡོད་དུས། “ངའི་ལས་ཀར་ཡག་པོ་མཐོང་སྟེ་བདམས་པ་དེར་བཀའ་དྲིན་ཆེན་པོ་ཚོར་གྱི་འདུག་”ཅེས་གསུང་གི་འདུག

(RFA Tibetan)

བུ་མོ་གཉིས་ཀྱི་སྒྲུང་།

(100 Sunset ) ཞེས་པའི་གློག་བརྙན་དེ་ནི་ཁེ་ན་ཌ་ཊོ་རོན་ཊོའི་ (Parkdale) ས་གནས་སུ་གནས་སྡོད་བྱེད་པའི་བོད་རིགས་བུ་མོ་ཞིག་གིས། ས་གནས་དེར་གསར་དུ་གནས་སྤོ་བྱས་པའི་བོད་རིགས་བུ་མོ་གཞན་ཞིག་དང་ཐུག་འཕྲད་བྱུང་ནས་གྲོགས་པོ་ཆགས་ཤིང་། ཁོང་གཉིས་ཀྱིས་བོད་པའི་སྤྱི་ཚོགས་ནང་བཙན་གྱིས་བཀལ་བའི་རིག་གཞུང་སྲུང་སྐྱོབ་སོགས་ཀྱི་རེ་བ་ལས་ཐར་ཐབས་བྱེད་བཞིན་པའི་སྒྲུང་ཞིག་རེད་འདུག་ལ། གློག་བརྙན་དེ་དེ་སྔ་ (DIFF) ཞེས་རྡ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐེངས་ ༡༤ པའི་ཐོག་རྡ་སར་གཟིགས་འབུལ་ཡང་ཞུས་ཡོད་པ་རེད།

ཕྱི་ལོ་ ༢༠༢༠ ལོར་ཁོང་གིས་བཟོ་སྐྲུན་གནང་བའི་འགུལ་རིས་གློག་བརྙན་ཐུང་ངུ་ཡར་ཀླུངས་ཞེས་པ་དེ་བྱང་ཨ་མི་རི་ཀའི་འགུལ་རིས་གློག་བརྙན་དུས་སྟོན་ཆེ་གྲས་ཨོ་ཊ་ཝའི་རྒྱལ་སྤྱིའི་གློག་བརྙན་དུས་སྟོན་(Ottawa International Animation Festival ) དུ་བདམས་ཐོན་བྱུང་ཡོད་པ་རེད། ཡར་ཀླུངས་ཞེས་པའི་འགུལ་རིས་གློག་བརྙན་དེ་ནི་བུ་སྤུན་གསུམ་དང་ཡར་ཀླུངས་གཙང་པོའི་དབར་གྱི་འབྲེལ་བ་དང་ཁོང་རྣམ་པས་སྤྱི་ཚོགས་དང་ཁོར་ཡུག་ཐད་མཐོང་ཕྱོགས་སོགས་ལ་གཞིར་བཞག་པའི་སྐར་མ་ལྔ་ཅན་གྱི་གློག་བརྙན་ཞིག་ཡིན་འདུག

ཀུན་བཟང་ལགས་ཀྱིས་གསུངས་དོན་དུ། “ཡར་ཀླུངས་གཙང་པོ་དེ་བོད་ནས་རྒྱ་གར་དུ་རྒྱུག་པ་ཞིག་ཡིན་དུས། ཐོག་མ་ངས་རྒྱ་ནག་གིས་བོད་ནང་འཛུགས་སྐྲུན་བྱེད་བཞིན་པའི་ཆུ་མཛོད་སྐོར་འབྲི་དགོས་བསམ་ཡང་། ཕྱིས་སུ་བསམ་བློ་ཞིབ་མོར་བཏང་དུས། ཨ་མ་ལགས་རྒྱ་གར་བྱང་ཤར་ཁུལ་དུ་ཆགས་པའི་ཨ་རུ་ནཱ་ཅལ་མངའ་སྡེའི་ནང་གི་ཏི་ཛུ་དར་རྒྱས་གླིང་བོད་མིའི་གཞིས་ཆགས་ནས་ཡིན་པ་དང་། ཆུང་དུས་སྐབས་དབྱར་དུས་ཕལ་མོ་ཆེ་ཏི་ཛུར་བསྐྱོད་དེ། ཉེ་འགྲམ་གྱི་ཡར་ཀླུངས་གཙང་པོ་དང་ལོ་དྷི་གཙང་པོ་གཉིས་མཐུད་སའི་ཟམ་པ་དེའི་ཐོག་རྩེད་མོ་དང་། གཙང་པོའི་འགྲམ་དུ་ཉིན་རེར་ཐེངས་བཞི་ཙམ་ཕྱིན་ནས་རྩེད་མོ་རྩེད་པ་དང་འཁྲུས་རྒྱག་པ་སོགས་བྱེད་ཀྱི་ཡོད་སྟབས། གཙང་པོ་དེ་མིའི་རིགས་ཀྱི་འཚོ་བའི་ཆ་ཤས་གལ་ཆེན་ཞིག་ཏུ་གྱུར་ཡོད་པ་ཤེས་ཏེ་

རྒྱུག་ཆུ་དེའི་ཉེ་འཁོར་དུ་འཚོ་སྡོད་བྱེད་མཁན་རྣམས་ཀྱི་མི་ཚེའི་སྐོར་འབྲི་འདོད་བྱུང་།” ཞེས་གསུང་གི་འདུག

“གློག་བརྙན་ཞིག་བཟོ་བར་ཡིན་གཅིག་འགྲོ་སོང་ཆེན་པོ་དེ་འདྲ་བཏང་མི་དགོས།”

ཀུན་བཟང་ལགས་ཀྱིས་ཁོང་ལྟ་བུ་ཁེ་ན་ཌར་འཚར་ལོངས་བྱུང་བའི་རྐྱེན་གྱིས་གློག་བརྙན་འདོན་སྤེལ་དང་རང་ཉིད་ཀྱི་སྒྱུ་རྩལ་ཕྱིར་སྟོན་རྒྱུའི་སྡིངས་ཆ་དང་གོ་སྐབས་མི་ཉུང་བ་ཞིག་བྱུང་བཞིན་ཡོད་ཀྱང་། མཐུན་རྐྱེན་དེ་རིགས་མེད་པའི་བོད་པའི་གཞོན་སྐྱེས་ཚོས་རང་ཉིད་ཀྱི་སྒྱུ་རྩལ་ཕྱིར་འདོན་ཐབས་ཀྱི་ཐད་གསུངས་སྐབས། “གལ་ཏེ་ཁྱེད་རང་དེབ་ཞིག་བྲིས་ཀྱི་ཡོད་ན། དེབ་ག་རེ་ག་རེ་བྲིས་ཚར་ཡོད་པ་དེ་དག་གི་ཐོག་ཤེས་རྟོགས་བྱུང་ཚེ། དེས་ཁྱེད་རང་ལ་ཁྱེད་རང་གི་སྒྲུང་གང་འདྲ་བྲིས་དགོས་པའི་བསམ་བློ་གསར་པ་བསྐྲུན་ཐུབ་ཀྱི་རེད།” ཅེས་དང་། “གློག་བརྙན་ཞིག་བཟོ་བར་ཡིན་གཅིག་འགྲོ་སོང་ཆེན་པོ་དེ་འདྲ་བཏང་མི་དགོས་པར། རང་ཉིད་ལ་ཆ་མཚོན་ན་ཡར་ཀླུངས་ཞེས་པའི་འགུལ་རིས་གློག་བརྙན་དེ་ནི། དེ་སྔ་ཏོག་དབྱིབས་ནད་ཡམས་ཁྱབ་གདལ་བྱུང་སྐབས་སུ་ཉལ་ཁང་ནས་བྲིས་པ་ཞིག་དང་། དེའི་སྐབས་མཐུན་རྐྱེན་ཞེ་དྲགས་མེད་པས་སོལ་བ་བེད་སྤྱོད་བྱས་ཏེ་བྲིས་པ་ཞིག་ཡིན་པས། བློ་ཁོག་ཆེ་ཙམ་དང་བསམ་བློ་རྒྱ་ཆེ་ཙམ་གཏོང་དགོས་གལ་ཆེ་བར་མཐོང་།”ཞེས་དང་། “སྒྲུང་བྲིས་ཀྱི་ཡོད་ནའང་རེད། གློག་བརྙན་བཟོ་ཡི་ཡོད་ན་རེད། (Tibet film festival) དང་ (Dharamsala international film festival) ཟེར་བ་དེ་དག་ནི་བཙན་བྱོལ་བོད་མི་རྣམས་ལ་མཚོན་ན། རང་ཉིད་ཀྱི་སྒྱུ་རྩལ་ཕྱིར་སྟོན་ཐུབ་སའི་སྡིངས་ཆ་གལ་ཆེན་ཞིག་ཏུ་མཐོང་གི་འདུག་པས། རང་ཉིད་ཀྱི་སྒྱུ་རྩལ་རྣམས་རིམ་བཞིན་གྲུབ་རྗེས་ཕྱིར་འདོན་སྤེལ་གནང་དགོས་རྒྱུ་དེ་གལ་ཆེན་པོ་རེད་” ཅེས་གསུང་གི་འདུག

ཀུན་བཟང་སྐྱིད་གྲོང་ལགས་ནི་ཁེ་ན་ཌར་རྟེན་གཞི་བྱས་པའི་ (Emily Carr) སྒྱུ་རྩལ་དང་བཟོ་བཀོད་ཀྱི་གཙུག་ལག་སློབ་གཉེར་ཁང་ (York university) ནས་སློབ་ཐོན་ཟིན་པ་ཞིག་རེད་འདུག་ལ། ཕྱི་ལོ་ ༢༠༢༦ ལོར་ཁོང་གིས་དུས་ཐུང་གློག་བརྙན་ (Letters from Tibet) ཞེས་པ་ཞིག་བཟོ་སྐྲུན་གནང་འདུག་ཅིང་། དེ་ནི་ཁོང་གིས་གློག་བརྙན་ནང་ལོ་རྒྱུས་ཡིག་ཚགས་དང་པར་རིས་དེ་རིགས་བེད་སྤྱོད་བྱས་པ་ཐོག་མ་དེ་ཆགས་ཡོད་པ་གསུངས་བྱུང་། ད་ལྟའི་ཆར་ཁོང་གིས་གློག་བརྙན་གསར་པའི་སྒྲུང་གཞི་བྲིས་བཞིན་ཡོད་པ་རེད།།

པར་ལེན་དང་བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

གྲོས་ཚོགས་འཐུས་མི་ ༤༥༤ ཡིས་ཞུ་སྐུལ་སྙན་ཐོར་རྒྱབ་སྐྱོར་གནང་པ།

ཞུ་སྐུལ་རྒྱབ་གཉེར་གནང་པ་དེ་ནི་ཕྱི་ཟླ་ ༡༠ ཚེས་ ༧ ཉིན་ཡུ་རོབ་མནའ་འབྲེལ་དང་རྒྱ་ནག་བར་གྱི་འབྲེལ་བའི་སྐོར་གྱི་སྙན་ཐོ་ཞིག་ཡུ་རོབ་གྲོས་ཚོགས་ནང་དུ་བཏོན་པའི་སྐབས་བྱུང་ཞིང་། གྲོས་ཚོགས་འཐུས་མི་ ༤༥༤ ཡི་རྒྱབ་སྐྱོར་ཐོག་གཏན་འབེབས་གནང་བའི་སྙན་ཐོ་གཏན་འབེབས་ཀྱི་ཆ་ཤས་སུ་བགྲོ་གླེང་གནང་པའི་སྐབས་བྱུང་པ་དང་། སྙན་ཐོ་དེའི་ནང་འགྲོ་བ་མིའི་ཐོབ་ཐང་གི་གནས་ཚུལ་ཙམ་མིན་པར་རྒྱ་ནག་གཞུང་གིས་རང་དབང་ཅན་གྱི་གནས་ཚུལ་སྤེལ་མཁན་ལ་དམ་དྲག་ཤུགས་ཆེ་བྱེད་བཞིན་པའི་སྐོར་འབུར་འདོན་གྱིས་བོད་ནས་གནས་ཚུལ་ཁོ་སྒྲུབ་བྱ་རྒྱུའི་དཀའ་ངལ་གྱི་གནད་དོན་སྐོར་ལ་ཡང་གསལ་སྟོན་བྱས་འདུག

སྙན་ཐོ་འདི་ཡུ་རོབ་གྲོས་ཚོགས་ཀྱི་རྒྱ་ནག་འབྲེལ་ལམ་གྱི་དམིགས་བསལ་སྐུ་ཚབ་གྲོས་ཚོགས་འཐུས་མི་ཧིལ་ཌེ་ཝོཊ་མནསི་ (Hilde Vautmans) ལགས་ཀྱིས་ཡུ་རོབ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་སྐུ་ཚབ་ངོ་བོའི་ཐོག་ཟིན་བྲིས་བཀོད་པ་ཞིག་ཡིན་པ་དང་། སྙན་ཐོ་འདིའི་ནང་རྒྱ་ནག་གཞུང་གིས་བོད་ནང་བོད་མི་རིགས་ཀྱི་ངོ་བོ་དང་སྐད་ཡིག ཆོས་དང་རིག་གཞུང་བཅས་པ་རྩ་མེད་གཏོང་སྟེ། བཙན་དབང་གི་ཐོག་ནས་མི་རིགས་མཉམ་བསྲེས་དང་རྒྱ་བསྒྱུར་གྱི་སྲིད་བྱུས་སྤེལ་བཞིན་པ་ཁག་ཐེར་འདོན་གྱིས་སྐྱོན་བརྗོད་བྱས་འདུག

(ཡུ་རོབ་གྲོས་ཚོགས་ཀྱི་དྲ་རྒྱ།)

སྙན་ཐོའི་ནང་ད་དུང་། བལ་བོད་ས་མཚམས་ས་ཁུལ་དུ་ཆུ་ལོག་གི་དོན་རྐྱེན་ཁྲོད། ས་མཚམས་ཀྱི་ཕྱོགས་གཉིས་ཀར་གོད་ཆག་དང་ཤི་རྨས་ཀྱི་དོན་རྐྱེན་ཤུགས་ཆེ་བྱུང་ཡོད་ཀྱང་། རྒྱ་ནག་གཞུང་གིས་རྐྱེན་འདས་ཀྱི་གྲངས་འབོར་ཚད་ལྡན་ཕྱི་གསལ་མ་བྱས་པ་དང་། ཆུ་ལོག་ནས་ཐར་པའི་མི་རྣམས་ཀྱི་མྱོང་བའི་སྐོར་ཕྱི་ལ་བཤད་པ་རྣམས་སྤྱི་ཚོགས་དྲྭ་ལམ་ནས་བསུབ་པ་མ་ཟད། མང་ཚོགས་རྣམས་ལ་ཆུ་ལོག་གི་གོད་ཆག་དང་འབྲེལ་བའི་གནས་ཚུལ་སྤེལ་རྒྱུར་དམ་དྲག་བྱས་པ་སོགས་རྒྱ་ནག་གིས་གནས་ཚུལ་འགྲོ་རྒྱུག་ལ་དམ་དྲག་མངོན་གསལ་བྱས་པ་དང་། ཕྱི་རྒྱལ་གྱི་གསར་འགོད་པ་ཚོ་གཞུང་གི་ལྟ་སྐུལ་འོག་གནོད་འཚེ་ཕོག་པའི་ས་ཁུལ་དུ་བསྐྱོད་བཅུག་པ་ཙམ་མ་གཏོགས་རྒྱ་ནག་གི་སྤྱི་བདེ་ལྷན་ཁང་གིས་གོད་ཆག་སྐོར་གྱི་གནས་ཚུལ་མཉམ་སྤྱོད་བྱེད་མཁན་གྱི་མི་ཚོར་ཉེས་ཆད་གཏོང་གི་ཡོད་པ་སོགས་འཁོད་འདུག

ཡོ་རོབ་གྲོས་ཚོགས་ནས་རྒྱ་ནག་གཞུང་ལ་རང་དབང་ཅན་གྱི་ཞིབ་འཇུག་པ་དང་གསར་འགོད་པ། འགྲོ་བ་མིའི་ཐོབ་ཐང་ཚོགས་པ་ཁག་ལ་འཕྲལ་མར་བཀག་འདོམས་མེད་པར་རྨས་སྐྱོན་གྱི་གྲངས་ཀ་ཆ་ཚང་ཡོང་བསྒྲགས་བྱས་དགོས་ཤིང་། བདེན་དཔང་ར་སྤྲོད་འཕེར་བའི་གནས་ཚུལ་རྣམས་ཕྱིར་བསྒྲགས་བྱ་དགོས་པའི་དགོས་འདུན་བཏོན་ཡོད་པ་རེད།

“ཡོ་རོབ་གྲོས་ཚོགས་ཀྱི་གྲོས་ཆོད་ལག་བསྟར་དགོས།”

དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གི་ཡོ་རོབ་སྤྱི་མཐུན་ཚོགས་པའི་སྲིད་བྱུས་འགན་འཛིན་ཝིན་སེནཊ་མེ་ཊེན(Vincent Metten) ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ད་ལྟའི་ཆར་གདོང་ལེན་བྱ་དགོས་པ་གཙོ་བོ་གཅོག་ནི་ཡུ་རོབ་གྲོས་ཚོགས་ཀྱི་གྲོས་འཆར་བཏོན་པ་དེ་དག་དངོས་ཡོད་ཀྱི་ལག་བསྟར་བྱ་ཐུབ་པར་སྒྱུར་རྒྱུ་དེ་ཡིན་པ་དང་། སྙན་ཐོ་དེ་ non-binding ཞེས་ཁྲིམས་ཀྱི་བཀའ་བཅད་འོག་མི་ཚུད་པར་མདོར་ན་ཡུ་རོབ་མནའ་འབྲེལ་གྱི་ལས་ཁུངས་དང་ཚོགས་མིའི་རྒྱལ་ཁབ་ཚོས་ཁྲིམས་མཐུན་ཐོག་ནས་ད་རེས་ཀྱི་གྲོས་ཆོད་གྲོས་འཆར་བཏོན་པ་དེ་ཚོ་ལག་བསྟར་བྱེད་དགོས་པའི་ཁྲིམས་ཐོག་ནས་དགོས་མཁོ་མེད་པ་རེད་ཅེས་བརྗོད་བྱུང་།

ཁོང་གིས་ཡུ་རོབ་མནའ་འབྲེལ་གྱི་ཁོངས་གཏོགས་རྒྱལ་ཁབ་ཁག་དང་ཡུ་རོབ་ཀྱི་ཕྱི་འབྲེལ་ལས་དོན་ལས་ཁུངས། དེ་བཞིན་ཡུ་རོབ་ལྷན་ཚོགས་ཀྱིས་གྲོས་འཆར་དེ་དག་ལ་དོ་སྣང་བྱས་ཏེ་རྒྱ་ནག་གཞུང་ལ་གནད་དོན་དེ་དག་གླེང་དགོས་ཤིང་། ཡུ་རོབ་མནའ་འབྲེལ་གྱི་ཁོངས་སུ་ཚུད་པའི་རྒྱལ་ཁབ་ཀྱི་རྒྱལ་ས་དང་བསྟི་གནས་ཁག་ཏུ་ཞུ་གཏུགས་ལས་དོན་སྤེལ་དགོས་པ་གལ་ཆེན་རང་བཞིན་ཡིན་པ་ནན་བརྗོད་གནང་བྱུང་།

གནོད་འཚེའི་གནས་ཚུལ་མཁོ་སྤྲོད་དང་འགན་འཁྲི་འཁུར་ཕྱོགས།

སྐྱིད་གྲོང་དུ་གནོད་འཚེ་བྱུང་ནས་ཟླ་བ་གཅིག་ལྷག་འགྲོ་བཞིན་ཡོད་པའི་སྐབས་སུ་བོད་ཕྱོགས་ཀྱི་འདས་གྲོངས་དང་གར་སོང་ཆ་མེད་ཀྱི་མཐའ་མའི་གྲངས་ཐོ་དང་། འདས་པོའི་ངོ་རྟགས་ངོས་འཛིན་གྱི་གནས་སྟངས། གར་སོང་ཆ་མེད་དུ་གྱུར་བ་ག་ཚོད་བརྙེད་ཡོད་མེད་བཅས་གནས་ཚུལ་ཁ་གསལ་ཞིག་ད་ལྟའང་རྒྱ་ནག་གཞུང་གིས་གསལ་བསྒྲགས་བྱེད་ཀྱི་མེད་པ་རེད། ཆུ་ལོག་གི་བྱུང་བ་དེས་བོད་ནང་ནས་གནས་ཚུལ་ཐོབ་པར་དཀའ་ངལ་ཡོད་པའི་སྐོར་དོ་སྣང་ཞིག་སླེབས་ཡོད་ལ་། ཨེ་ཤེ་ཡ་རང་དབང་རླུང་འཕྲིན་ཁང་གིས་བོད་ནང་གི་གོད་ཆག་དང་རོགས་སྐྱོར་གྱི་དཀའ་ངལ་སྐོར་གསར་འགོད་བྱེད་ཡོད་པ་ལྟར་ད་རེས་ཡུ་རོབ་གྲོས་ཚོགས་ཀྱི་སྙན་ཐོ་དེས་རྒྱ་ནག་ལ་དྲི་བ་གལ་ཆེན་པོ་ཞིག་བཏང་གི་ཡོད། དྲི་བ་དེ་ནི་རྒྱལ་སྤྱིའི་སྤྱི་ཚོགས་ནས་རྒྱ་ནག་གཞུང་གི་དངོས་ཡོད་གནས་ཚུལ་ཕྱི་གསལ་བྱ་དགོས་པའི་འབོད་སྐུལ་དེ་དངོས་ཡོད་ཀྱི་བྱ་སྤྱོད་ལ་འགྱུར་ཐུབ་ཀྱི་ཡོད་མིན་དེ་ཆགས་ཡོད།

རྩ་བའི་ཨེ་ཤི་ཡ་རང་དབང་རླུང་འཕྲིན་ཁང་ལ་ཕྱི་ཟླ་ ༩ ཚེས་ ༢༩ ཉིན་བོད་མདོ་སྨད་ནས་ཡིན་པའི་བོད་མི་ཞིག་གིས་བོད་ནང་ཁུལ་དུ་གནས་ཚུལ་གསལ་པོ་ཤེས་ཀྱི་མེད་པ་དང་། དཔེར་ན། མི་ག་ཚོད་ཙམ་འདས་གྲོངས་སུ་སོང་བ་དང་མི་ག་ཚོད་ཙམ་ཞིག་གར་སོང་ཆ་མེད་དུ་གྱུར་བའི་གྲངས་ཐོར་རྫུན་བཟོ་བྱས་པའི་སྣང་ཚུལ་ཡོད་པ། ད་དུང་ཞལ་འདེབས་ཀྱི་སྐོར་ལ་མཚོན་ན། བོད་ནང་ནས་ཞལ་འདེབས་བསྡུ་རུབ་ཀྱི་ཐད་དོ་དམ་བྱས་པའི་གནས་ཚུལ་བྱུང་ཡོད་པ་ཡང་གསུངས་ཡོད།

དེ་ཡང་ཆུ་ལོག་གི་གོད་ཆག་གི་གནས་ཚུལ་ཁ་གསལ་མེད་པའི་གནད་དོན་དེ་དག་དང་རྒྱ་ནག་གིས་བོད་ཐོག་འཛིན་པའི་གཞི་རྒྱ་ཆེ་བའི་སྲིད་བྱུས་ལ་སྐྱོན་བརྗོད་གནང་ཡོད་པ་ད་རེས་ཡུ་རོབ་གྲོས་ཚོགས་ཀྱི་གྲོས་འཆར་དེའི་ནང་འཁོད་ཡོད།

བཅའ་སྡོད་སློབ་གྲྭ་དང་ཆོས་དད་རང་དབང་།

སྙན་ཐོ་དེའི་ནང་རྒྱ་ནག་གིས་བོད་ནང་དུ་ཐབས་བྱུས་ལྡན་པའི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་མི་རིགས་ཀྱི་ངོ་བོ་རྩ་མེད་གཏོང་བཞིན་པ་མ་ཟད། རྒྱ་ནག་གིས་བོད་ནང་གི་མནའ་བོའི་རིག་གནས་ཤུལ་བཞག་གི་ལྟེ་གནས་རྩ་གཏོར་བཏང་བ་དང་རྒྱ་ཁྱབ་ཀྱི་ལྟ་སྲུང་དམ་དྲག་བྱས་པ། དེ་བཞིན་བཙན་དབང་གི་ངལ་རྩོལ་རྒྱུག་བཅུག་པ་སོགས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་སེམས་འཚབ་ཆེད་འདོན་གནང་བ་མ་ཟད། ལྷག་པར་དུ་རྒྱ་ནག་གཞུང་གིས་བཅའ་སྡོད་སློབ་གྲྭའི་ནང་དུ་བོད་པའི་བྱིས་པ་ས་ཡ་གཅིག་ཙམ་ཕ་མ་དང་བཙན་དབང་གི་ཁ་བྲལ་བཏང་སྟེ་མི་རིགས་རྒྱ་སྒྱུར་དང་མཉམ་བསྲེས་ཀྱི་སློབ་སྦྱོང་སྤྲོད་བཞིན་པ་དང་འབྲེལ། བཅའ་སྡོད་སློབ་གྲྭའི་ལམ་ལུགས་དེས་བོད་པའི་བྱིས་པ་ཚོ་ཕ་མ་དང་ཁ་བྲལ་བཏང་བའི་སེམས་ཁམས་ཀྱི་ཛ་དྲག་དཀའ་ངལ་འཕྲད་པ་མ་ཟད། དེས་བོད་ཀྱི་སྐད་ཡིག་དང་གོམས་སྲོལ་ཡོངས་རྫོགས་ལ་དོ་ཕོག་ཤུགས་ཆེ་གཏོང་གི་ཡོད་སྟབས། བཅའ་སྡོད་སློབ་གྲྭའི་འགྲོ་ལུགས་དེ་འཕྲལ་དུ་མཚམས་འཇོག་བྱེད་དགོས་པ་འཁོད་འདུག

ད་དུང་སྙན་ཐོའི་བརྒྱུད་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་བྱེད་སྒོ་ཁག་གི་ཐོག་ལ་ཐེ་བྱུས་བྱེད་བཞིན་པ་དང་། ལྷག་པར་དུ་མ་འོངས་༸རྒྱལ་བའི་ཡང་སྲིད་འདེམས་རྒྱུའི་བདག་དབང་རྩོད་ཐབས་བྱེད་བཞིན་པར་སྐྱོན་བརྗོད་དང་འབྲེལ། བོད་མིའི་ཆོས་དད་རང་དབང་སྲུང་སྐྱོབ་བྱ་རྒྱུ་དེ་ནི་བློས་གཏོང་བྱ་ཐབས་མེད་པའི་གནད་དོན་ཞིག་ཡིན་པ་མ་ཟད་གཞན་ཡང་རྒྱ་ནག་གི་བཙོན་འཇུག་འོག་གར་སོང་ཆ་མེད་དུ་གྱུར་བའི་༸ཀུན་གཟིགས་༸པན་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གི་སྐོར་ལ་གནས་ཚུལ་ཕྱི་གསལ་བྱེད་དགོས་པ་བཅས་འཁོད་འདུག

མི་རིགས་མཐུན་སྒྲིལ་གྱི་ཁྲིམས་དང་རྒྱལ་མཚམས་བརྒལ་བའི་དྲག་གནོན།

རྒྱ་ནག་གིས་རྒྱ་སྐྱེད་གཏོང་བཞིན་པའི་རྒྱལ་མཚམས་ལས་བརྒལ་བའི་དྲག་གནོན་ལ་གདོང་ལེན་དང་འབྲེལ། ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་དཔོན་རིགས་དང་མཉམ་དུ་ཆབ་སྲིད་ཀྱི་འབྲེལ་བ་ནམ་བྱུང་ལ་འགྲོ་བ་མིའི་ཐོབ་ཐང་གི་གནད་དོན་གླེང་དགོས་པ་དང་། ཚོང་དང་དཔལ་འབྱོར་གྱི་འབྲེལ་ལམ་ཁོ་ན་མ་ཡིན་པར། ཡུ་རོབ་མཐུན་ཚོགས་དང་རྒྱ་ནག་གི་འབྲེལ་ལམ་ནང་དུ་གྲངས་ཉུང་མི་རིགས་ཀྱི་ཐོབ་ཐང་སྲུང་སྐྱོབ་ཀྱི་གནད་དོན་འདི་གལ་ཆེ་བའི་ཆ་ཤས་ཤིག་ཏུ་བཞག་དགོས་པ་གསུངས་འདུག་ལ། དེ་ཡང་འདི་ལོ་ཕྱི་ཟླ་ ༤ ནང་ཡུ་རོབ་གྲོས་ཚོགས་ཀྱི་རྒྱ་ནག་གི་མི་རིགས་མཐུན་སྒྲིལ་སྐོར་གྱི་ཁྲིམས་གསར་པའི་ཐད་སེམས་འཚབ་ཡོད་པའི་གྲོས་ཆོད་བཏོན་ཡོད་པ་དང་། ཁྲིམས་ཡིག་འདིས་གྲངས་ཉུང་མི་རིགས་ཀྱི་སྨྲ་བརྗོད་དང་བསམ་བློའི་རང་དབང་། ཆོས་དད་རང་དབང་སོགས་ཡོངས་རྫོགས་སྔར་ལྷག་ཚོད་འཛིན་བྱེད་ངེས་ཡིན་པ་གསལ་སྟོན་གྱིས་རྒྱ་ནག་ངོས་ནས་ཁྲིམས་དེ་མེད་པར་བཟོ་དགོས་པའོ་སྐུལ་མ་གནང་ཡོད། གྲོས་ཆོད་དེས་རྒྱ་ནག་གི་ཁྲིམས་དེའི་ཁྱབ་ཁོངས་རྒྱ་ནག་གི་རྒྱལ་མཚམས་བརྒལ་བའི་དྲག་གནོན་བྱེད་ཕྱོགས་ཀྱི་ནང་གསེས་དོན་ཚན་ལ་སྐྱོན་བརྗོད་བྱས་པ་དང་དེ་དག་རྒྱལ་མཚམས་བརྒལ་བའི་དྲག་གནོན་གྱི་རྣམ་པ་ཡིན་ཞིང་ཡུ་རོབ་མཐུན་ཚོགས་ཀྱི་ཚོགས་མིའི་རྒྱལ་ཁབ་ཚང་མས་རྒྱ་ནག་གཞུང་དང་ལྷན་དུ་རྒྱལ་མཚམས་བརྒལ་བའི་དྲག་གནོན་བྱེད་པའི་ཉེན་ཁ་ལས་སྐྱོབ་ཆེད་ཕྱིར་སྤྲོད་ཆིངས་ཡིག་མཚམས་འཇོག་དགོས་པའི་སྐུལ་མ་གནང་ཡོད་པ་རེད།།

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

(ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་།)

དོན་གཅོད་དོན་གྲུབ་རྒྱལ་པོ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་པར། ཚེས་ ༡༤ ཡི་མཚན་མོ་ཆུ་ཚོད་ ༡༡ ཡོལ་ཙམ་ལ་ཤེལ་སྒོ་ཆག་པའི་སྒྲ་ཐོས་པ་དང་ཁང་པའི་ནང་ལ་དུ་བས་ཁེངས་པ་མཐོང་ཕྲལ་ལམ་སེང་སྒེའུ་ཁུང་བཅག་སྟེ་ཕྱིར་ཐོན་ཐུབ་པ་དང་། ད་དུང་འབར་མ་ཐུབ་པའི་སྣུམ་གྱི་མེ་སྲེག་འབར་མདེལ་གཞན་ཞིག་སྒེའུ་ཁུང་སྟེང་འཕྱང་ནས་ཡོད་པ་དང་། སྐབས་དེ་དུས་ཤེལ་ཧྲུག་གིས་རྐང་པར་རྨས་སྐྱོན་ཅུང་ཙམ་བྱུང་སྐོར་གསུངས་བྱུང་། ད་རེས་དོན་གཅོད་ཀྱི་བཞུགས་གནས་དང་དོན་གཅོད་ལས་ཁུངས་ཀྱི་ཁང་པར་དྲག་རྒོལ་བྱས་པ་འདིའི་ངོ་བོར་བལྟས་ན། རྐུན་མ་འཕྲོག་བཅོམ་དེ་འདྲ་མ་ཡིན་པར། དེའི་རྒྱབ་ཏུ་ཆབ་སྲིད་ཀྱི་བརྡ་ལན་ཞིག་སྤྲོད་ཀྱི་ཡོད་པ་ལྟ་བུའི་དོགས་པ་གནང་ཞིང་། དོན་གྲུབ་རྒྱལ་པོ་ལགས་ཀྱིས་གསུངས་དོན་དུ། འཇིགས་སྐུལ་ཉེན་བརྡའི་རྣམ་པ་ཞིག་མངོན་གྱི་ཡོད་པས། དེར་འཇིགས་པ་དང་ཞུམ་པའི་གནས་སྟངས་གང་ཡང་མེད་པ་དང་། དོན་རྐྱེན་འདིའི་རྒྱབ་ཏུ་ཆབ་སྲིད་ཀྱི་ཤུགས་རྐྱེན་ཞིག་ཡོད་སྲིད་པར་ང་ཚོས་དོགས་པ་བྱེད་ཀྱི་ཡོད་ཅེས་གསུངས་བྱུང་།

དོན་རྐྱེན་གྱི་རྒྱབ་ལྗོངས་དང་ཉེན་རྟོག་པའི་ཞིབ་འཇུག

ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་དུ་དྲག་རྒོལ་གྱི་དོན་རྐྱེན་འདི་སུས་བརྩམས་པ་ཡིན་མིན་དང་དམིགས་ཡུལ་གང་ཡིན་ཉེན་རྟོག་པས་ཞིབ་འཇུག་མ་ཚར་བར་བརྗོད་ཁག་པོ་ཡིན་པ་དང་། ང་ཚོས་ལྷོ་ཨ་ཧྥི་རི་ཀའི་མི་མང་ལ་མི་དགའ་བ་བྱེད་དོན་མེད་ལ། ལྷོ་ཨ་ཧྥི་རི་ཀའི་མི་མང་གིས་ཀྱང་ང་ཚོར་མི་དགའ་བ་བྱེད་དགོན་གང་ཡང་མེད། དེ་བས་བོད་དོན་ལ་ཤེས་རྟོགས་ཡོད་མཁན་ཚོས་ང་ཚོར་ཤ་ཚ་དང་རྒྱབ་སྐྱོར་བྱེད་མཁན་མ་གཏོགས་མི་དགའ་བ་བྱེད་མཁན་གཅིག་ཀྱང་མཐོང་མ་བྱུང་། དམིགས་བསལ་ལྷོ་ཨ་ཧྥི་རི་ཀའི་ནང་ནང་ཆོས་ལ་དོ་སྣང་བྱེད་མཁན་མང་པོ་ཡོད་པ་དང་། ད་རེས་དོན་གཅོད་ཁང་ལ་དྲག་རྒོལ་བྱས་པར་ཚང་མས་དོ་ཁུར་གནང་གི་ཡོད་སྐོར་དོན་གཅོད་ནས་གསུངས་བྱུང་།

དོན་རྐྱེན་དེ་བྱུང་མཚམས་ས་གནས་མེ་གསོད་རུ་ཁག་གིས་མེ་བསད་མཚམས་སུ་ལི་ཊལ་ཊོན་ (Lyttelton) ས་གནས་ཉེན་རྟོག་པས་དོན་རྐྱེན་ལ་ཞིབ་འཇུག་བྱེད་བཞིན་ཡོད་ཀྱང་། ས་གནས་ཉེན་རྟོག་ལས་ཁུངས་ཀྱི་མགྲིན་ཚབ་པ་ Brigadier BM Muridili ཡིས། “ད་ལྟའི་ཆར་དྭོགས་གཞི་ཡོད་པའི་མི་སྣ་འཛིན་བཟུང་བྱ་རྒྱུ་བྱུང་མེད་“ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

(ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་།)

ཤེས་རྟོགས་བྱུང་བར་གཞིགས་ན། ད་རེས་ཀྱི་དྲག་རྒོལ་ནི་ཐེངས་གཉིས་པ་ཆགས་ཤིང་། འདི་ལོ་ཟླ་ ༧ ཚེས་ ༦ སྟེ་༸གོང་ས་མཆོག་གི་༧སྐུའི་འཁྲུངས་སྐར་ཉིན་མོ་དེར་བཞུགས་གནས་སུ་སྣུམ་གྱི་འབར་མདེལ་གསུམ་གཡུགས་ཡོད་པ་དང་། དེ་དུས་སྣུམ་གྱི་འབར་མདེལ་གཅིག་ལས་འབར་མེད་པར་བརྟེན་གནོད་སྐྱོན་ཆེ་བ་བྱུང་མེད་པ་རེད་འདུག

སྐུ་ཚབ་དོན་གཅོད་ལས་ཁུངས་ཀྱིས་ཕྱི་ཟླ་ ༧ པའི་ནང་“སྣུམ་གྱི་མེ་སྲེག་འབར་མདེལ་" གཡུགས་པའི་གནས་དོན་ཐད་ལའང་ས་གནས་ཀྱི་ཉེན་རྟོག་ལས་ཁུངས་སུ་ཞུ་སྐུལ་དང་ཐོ་འགོད་སྙན་གསེང་གནང་ཡོད་པ་རེད།

དོན་གྲུབ་རྒྱལ་པོ་ལགས་ནི་ ༢༠༢༦ ལོའི་ཟླ་གསུམ་པ་ནས་ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཀྱི་ཐུགས་འགན་བཞེས་ཡོད་འདུག

རྒྱལ་སྤྱིའི་ཚོགས་སྡེ་ཁག་གི་དོ་སྣང་།

ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་དུ་སྣུམ་གྱི་འབར་མདེལ་གཡུགས་པའི་དོན་རྐྱེན་འདི་བྱུང་པའི་རྗེས་སུ་ཌེས་མོནཌ་དང་ལི་ཡ་ཊུ་ཊུ་རྒྱུན་འཛིན་ཐེབས་རྩས་གསལ་བསྒྲགས་ཤིག་སྤེལ་ཡོད་པའི་ནང་། དྲག་པོའི་རྒོལ་རྡུང་འདི་ནི་ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་ལ་ལོ་འདིའི་ནང་ཐེངས་གཉིས་པ་ཡིན་ཞིང་། ཉེན་རྟོག་པས་དོན་རྐྱེན་གཉིས་ཀར་མྱུར་དུ་ཞིབ་ཚགས་ངང་ཞིབ་འཇུག་བྱ་དགོས་པ་དང་། སྐུ་ཚབ་ལས་ཁུངས་ལ་བདེ་འཇགས་ཀྱིས་འགན་སྲུང་གདེང་ངེས་སྤྲོད་དགོས་པའི་རེ་སྐུལ་གནང་འདུག་ལ། མི་ཞིག་གི་རིགས་རྒྱུད་དང་ཡོང་ཁུངས། ཡང་ན་དད་པའི་རྐྱེན་གྱིས་རང་གི་སྡོད་གནས་མེར་བསྲེགས་སྲིད་པའི་འཇིགས་སྣང་འོག་སྡོད་དགོས་པ་འདི་ལྷོ་ཨ་ཧྥི་རི་ཀའི་སྤྱི་ཚོགས་གང་ཞིག་ལའང་འཕྲད་མི་རུང་ཞིག་རེད་ཅེས་བརྗོད་འདུག

ཡང་ཌེས་མོནཌ་དང་ལི་ཡ་ཊུ་ཊུ་རྒྱུན་འཛིན་ཐེབས་རྩས་མུ་མཐུད་གསལ་བསྒྲགས་ནང་བཀོད་པར། ལྷོ་ཨ་ཧྥི་རི་ཀའི་གཞུང་གིས་བོད་ཀྱི་སྐུ་ཚབ་དོན་གཅོད་ཁང་ལ་དངོས་སུ་གཞུང་འབྲེལ་གྱི་ངོས་འཛིན་མེད་ཀྱང་། དོན་གཅོད་ཁང་གི་གནས་ཡུལ་དང་ལས་བྱེད་ཀྱི་བདེ་འཇགས་ལ་སྲུང་སྐྱོབ་བྱ་རྒྱུ་ནི་གཞུང་གི་འགན་འཁྲི་ཡིན་པ་བརྗོད་འདུག

(AP)

དེ་བཞིན་བོད་རང་བཙན་སློབ་ཕྲུག་ཚོགས་པས་གསལ་བསྒྲགས་སྤེལ་བའི་ནང་། ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་ལ་ཟླ་བ་བཞིའི་ནང་སྣུམ་གྱི་མེ་སྲེག་འབར་མདེལ་ཐེངས་གཉིས་པ་གཡུགས་པ་དེར་ངོ་རྒོལ་བྱས་ཏེ། དྲག་རྒོལ་དེ་རིགས་ནི་བོད་མིར་ཕྱི་རྒྱལ་དུ་རྒྱལ་མཚམས་བརྒལ་བའི་གནོན་ཤུགས་ཀྱི་ཉེན་ཁ་དང་འབྲེལ་ཡོད་སྲིད་པ་བརྗོད་ནས་ལྷོ་ཨ་ཧྥི་རི་ཀའི་ཉེན་རྟོག་པ་དང་གཞུང་གིས་དོན་རྐྱེན་གཉིས་ཀར་མྱུར་དུ་ཆ་ཚང་པོ་དང་། རང་དབང་ལྡན་པའི་ཞིབ་འཇུག་བྱ་དགོས་པ་དང་། ཆབ་སྲིད་ཀྱི་དམིགས་ཡུལ་དང་ཕྱི་རྒྱལ་གྱི་གཞུང་ཞིག་དང་འབྲེལ་ཡོད་མེད་ཀྱང་ཞིབ་འཇུག་བྱ་དགོས་པའི་རེ་སྐུལ་གནང་འདུག་ལ། དེ་བཞིན་ལྷོ་ཨ་ཧྥི་རི་ཀའི་བོད་མིའི་སྤྱི་ཚོགས་ལ་བདེ་འཇགས་སྲུང་སྐྱོབ་མྱུར་དུ་སྤྲོད་དགོས་པ་དང་། དོན་གཅོད་དོན་གྲུབ་རྒྱལ་པོ་ལགས་དང་བོད་མིའི་སྤྱི་ཚོགས་ལ་རྒྱབ་སྐྱོར་ཡོད་པ་སོགས་བརྗོད་འདུག

ཡང་རྒྱལ་སྤྱིའི་བོད་དོན་ལས་འགུལ་ཁང་གིས་ཟླ་ ༡༠ ཚེས་ ༡༦ ཉིན་གསལ་བསྒྲགས་ཤིག་སྤེལ་ཡོད་པའི་ནང་ལྷོ་ཨ་ཧྥི་རི་ཀའི་བོད་ཀྱི་སྐུ་ཚབ་དོན་གཅོད་ཁང་ལ་དྲག་རྒོལ་གྱི་དོན་རྐྱེན་འདིར་སྐྱོན་བརྗོད་དང་། ད་རེས་ཀྱི་དོན་རྐྱེན་འདི་དང་ཟླ་བ་བདུན་པའི་ནང་གི་དོན་རྐྱེན་གཉིས་ཀར་ཞིབ་འཇུག་ཆ་ཚང་པོ་ཞིག་བྱས་ཏེ་ཉེས་ཅན་པར་འགན་འཁྲི་འཁུར་དུ་འཇུག་དགོས་པ་དང་། ལྷོ་ཨ་ཧྥི་རི་ཀའི་ཕྱི་ནས་གནོན་ཤུགས་སམ་ཐེ་ཇུས་ཡོད་མེད་ཀྱང་རྩད་གཅོད་བྱ་དགོས་པའི་རེ་སྐུལ་གནང་འདུག

༡༩༩༧ ལོར་སྐབས་དེའི་སྲིད་འཛིན་ནེལ་སོན་མན་ཌེ་ལ་ཡི་མོས་མཐུན་འོག་བོད་ཀྱི་སྐུ་ཚབ་དོན་གཅོད་ཁང་བཙུགས་པ་དང་། ལས་ཁུངས་དེས་བོད་མི་དང་ལྷོ་ཨ་ཧྥི་རི་ཀའི་མི་མང་བར་རིག་གནས་དང་། སློབ་གསོ། ཆོས་ལུགས་བཅས་ཀྱི་བརྗེ་རེས་བརྒྱུད་ཕན་ཚུན་ཤེས་རྟོགས་ཆེ་རུ་གཏོང་བའི་ལས་དོན་གྲུབ་ཡོད་པ་བཀོད་འདུག རྒྱལ་སྤྱིའི་བོད་དོན་ལས་འགུལ་ཁང་ནས་དྲག་རྒོལ་འདིས་ལྷོ་ཨ་ཧྥི་རི་ཀའི་རྩ་ཁྲིམས་ཀྱིས་འགན་སྲུང་བྱས་པའི་གཞི་རྩའི་རང་དབང་ལ་ཐད་ཀར་བརྩི་མེད་རྡོག་རོལ་བཏང་བ་ཞིག་ཡིན་པར་བརྗོད་ནས་ལྷོ་ཨ་ཧྥི་རི་ཀའི་གཞུང་གིས་གནས་ཚུལ་འདིར་མྱུར་དུ་ཐེ་ཇུས་དང་ལན་འདེབས་བྱ་དགོས་པའི་རེ་སྐུལ་གནང་འདུག

(AP)

བཙན་བྱོལ་བོད་མི་དང་ལྷོ་ཨ་ཧྥི་རི་ཀའི་འབྲེལ་བ།

༸གོང་ས་མཆོག་དང་ལྷོ་ཨ་ཧྥི་རི་ཀའི་འབྲེལ་བ་ནི་ ༡༩༩༦ ལོའི་ཆིབས་བསྒྱུར་ནས་བཟུང་གཏིང་ཟབ་ཏུ་ཕྱིན་ཡོད། སྐབས་དེར་༸གོང་ས་མཆོག་ནས་སྲིད་འཛིན་ནེལ་སོན་མན་ཌེ་ལ་དང་ཌེས་མོནཌ་ཊུ་ཊུ་བཅས་དང་མཇལ་འཕྲད་གནང་ཡོད་ལ། ༡༩༩༧ ལོར་པི་རི་ཊོ་རི་ཡ་རུ་བོད་ཀྱི་སྐུ་ཚབ་དོན་གཅོད་ཁང་དངོས་སུ་བཙུགས་གནང་འདུག ཡང་ ༡༩༩༩ ལོར་ལྷོ་ཨ་ཧྥི་རི་ཀར་ཆིབས་བསྒྱུར་གནང་པ་དང་། འོན་ཀྱང་ ༢༠༠༩ ལོར་རྒྱལ་སྤྱིའི་ཞི་བདེའི་ཚོགས་འདུར་ཆིབས་བསྒྱུར་མཛད་འཆར་ཡོད་རུང་རྒྱ་ནག་དང་ཚོང་འབྲེལ་གི་ཐོག་ནས་ཐོངས་མཆན་ཕུལ་མེད་ལ། ༢༠༡༡ ལོར་ནས་ ཌེས་མོནཌ་ཊུ་ཊུ་དགུང་གྲངས་ ༨༠ ལ་ཕེབས་པའི་དགའ་སྟོན་ལ་༸གོང་ས་མཆོག་མགྲོན་འབོད་ཞུས་ཀྱང་། ཐོངས་མཆན་ཡུན་རིང་འགྱངས་ནས་མཐར་ཆིབས་བསྒྱུར་ཕྱིར་འཐེན་གནང་དགོས་བྱུང་ཡོད། ཡང་ ༢༠༡༤ ལོར་ནོ་སྦེལ་ཞི་བདེའི་གཟེངས་རྟགས་བཞེས་མཁན་ཚོའི་ཚོགས་འདུར་ཆིབས་བསྒྱུར་གནང་རྒྱུའི་མཛད་འཆར་ཡོད་ན་ཡང་ཐོངས་མཆན་གྱི་གནད་དོན་ཐོག་ནས་ཆིབས་བསྒྱུར་གནང་ཐུབ་མེད། སྐབས་དེ་དུས་འགྲོ་བ་མིའི་ཐོབ་ཐང་ཚོགས་པ་སོགས་ཀྱིས་དེ་ནི་རྒྱ་ནག་དང་ལྷོ་ཨ་ཧྥི་རི་ཀའི་འབྲེལ་བའི་གནོན་ཤུགས་དང་འབྲེལ་བ་ཡོད་པར་བརྗོད་ཡོད་ལ། དམིགས་བསལ་ཌེས་མོནཌ་ཊུ་ཊུ་དང་༸གོང་ས་མཆོག་རྣམ་གཉིས་ནི་ལོ་མང་རིང་མཛའ་འབྲེལ་དམ་ཟབ་ཡོད་པ་དང་། སྐུ་ཞབས་ཌེས་མོནཌ་ཊུ་ཊུ་ཡིས་༸གོང་ས་མཆོག་ལ་ཐོངས་མཆན་མ་ཕུལ་པར་ཡོངས་ཁྱབ་ཀྱིས་ངོ་རྒོལ་ཡང་གནང་མྱོང་ཡོད་པ་མ་ཟད། ཆེད་མངགས་བཞུགས་སྒར་རྡ་རམ་ས་ལར་༸གོང་ས་མཆོག་མཇལ་བར་ཕེབས་ཡོད།

ཁ་སྣོན་གསར་འགོད། ནོར་སྡེ་སྒྲོལ་མ་དང་། བསྟན་འཛིན་བདེ་སྐྱིད།

བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

བོད་དོན་ལས་འགུལ་བསྟི་གནས་ཁང་གི་ (TibCERT) བོད་ཀྱི་གློག་ཀླད་ཉེན་སྲུང་ལྟ་ཞིབ་ཀྱི་གྲ་སྒྲིག་ཚན་ཁག་གིས། ༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བཞིན་པའི་སྐབས་རྒྱ་ནག་གི་དྲྭ་རྒྱའི་གསང་ཉུལ་གྱི་ལས་འགུལ་ཤུགས་ཆེ་རུ་ཕྱིན་པ་དང་། བཙན་བྱོལ་བོད་པའི་སྤྱི་ཚོགས་ལ་དམིགས་པའི་དྲ་རྒྱའི་གཏོར་རྒོལ་གྱི་གྲངས་འབོར་གྱི་ཚད་གཞི་འཕར་བ་གསལ་སྟོན་གནང་ཐོག དུས་ཡུན་དེའི་རིང་སྤྱི་ཚོགས་ཁྲོད་དོན་རྐྱེན་ ༤༩ ཤེས་རྟོགས་བྱུང་ཡོད་ཀྱང་། དོན་རྐྱེན་གྱི་གྲངས་འབོར་དངོས་ནི་དེ་བས་ཀྱང་མང་བ་ཡོད་པའི་དོགས་གཞི་བྱེད་ཀྱི་འདུག

དོན་རྐྱེན་ ༤༩ ར་ཕྲོད་བྱུང་པ།

དེ་ཡང་(TibCERT) ཡི་གདོང་ལེན་འགན་འཁུར་བ་ (Response manager) དགེ་འཕེལ་ནོར་བཟང་ལགས་ཀྱིས་གསུངས་དོན་དུ། ང་ཚོ་བོད་པ་ཡིན་དུས་བོད་དོན་དང་འབྲེལ་བའི་གནས་ཚུལ་ལ་རང་བཞིན་གྱིས་དོ་དབྱིངས་ཡོང་གི་ཡོད་ཙང་། སིམ་འཛུལ་བྱེད་མཁན་ཚོས། ༧སྐུ་མདུན་གྱི་འཁྲུངས་སྐར་དང་། བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་བའི་དུས་སྐབས། སྲིད་སྐྱོང་ལ་དྭགས་ཕེབས་པ་སོགས་ཀྱི་ནང་དོན་འདྲ་མིན་བེད་སྤྱད་དེ། དེ་དག་ལས་ཁེ་བཟང་བླངས་ཀྱི་ཡོད་པ་གསུངས་ཀྱི་འདུག དེ་ཡང་ཁོང་གིས་དཔེར་ན། བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་སྐབས་བོད་མི་རྣམས་ཀྱིས་སྤྱི་ཚོགས་དྲྭ་ལམ་ཐོག་དོ་སྣང་ཤུགས་ཆེ་བྱས་ཡོད་པའི་སྐབས་དེར། སིམ་འཛུལ་བ་ཚོས་གོ་སྐབས་སུ་བླངས་ཏེ་ཚོགས་སྒེར་ ༤༩ ཙམ་ལ་དེ་འབྲེལ་གློག་འཕྲིན་བརྒྱུད་སིམ་འཛུལ་བྱས་ཡོད་པའི་གནས་ཚུལ་ཤེས་རྟོགས་ཐུབ་ཡོད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

བོད་ཀྱི་གློག་ཀླད་ཉེན་སྲུང་ལྟ་ཞིབ་ཀྱི་གྲ་སྒྲིག་ཚན་ (TibCERT) གྱིས་འདས་པའི་ཉམས་ཞིབ་བྱས་པའི་ཁྲོད། རྒྱ་ནག་ཕྱོགས་ནས་བོད་པའི་དུས་ཆེན་ཁག་དང་ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་འཁྲུངས་སྐར་སྐབས། མངོན་གསལ་དོད་པོའི་སྒོ་ནས་ལས་ཤུགས་ཇེ་ཆེར་གཏོང་གི་ཡོད་པ་ནི། ཉམས་ཞིབ་བརྒྱུད་འབུ་བཟོས་མཁན་སོགས་རྒྱ་ནག་དང་འབྲེལ་བ་ཡོད་པ་ཤེས་རྟོགས་ཐུབ་པ་དང་ར་སྤྲོད་ཀྱང་ཐུབ་ཡོད་པ་གསུང་གི་འདུག

གློག་འཕྲིན་བརྒྱུད་དྲ་ཐོག་འཐབ་རྒོལ།

སྙན་ཐོ་དེའི་ནང་ (Mustang Panda) དང་ (China-Nexus APT) ཞེས་པའི་ལྟ་ཞིབ་རུ་ཁག་གཉིས་བཀོལ་སྤྱོད་བྱས་ཏེ་དྲྭ་རྒྱར་སིམ་འཛུལ་དང་གཏོར་རྒོལ་གྱི་ལས་འགུལ་མི་འདྲ་བ་ཁག་ཅིག་གསལ་སྟོན་གནང་ཡོད་པ་ནི། (LotusLite backdoor) ཞེས་པའི་བརྒྱུད། དམིགས་འབེན་བཟུང་བའི་བོད་པའི་སྤྱི་ཚོགས་ནང་ཡོད་པའི་མི་སྣ་གལ་ཆེན་དང་ཚོགས་པ་གལ་ཆེན་རྣམས་ལ་མགོ་སྐོར་གཏོང་བྱེད་ཀྱི་གློག་འཕྲིན་ (Email) བཏང་སྟེ། ཁོ་ཚོའི་ཡོ་བྱད་ལ་གནོད་སྐྱོན་གཏོང་ཐབས་བྱས་ཤིང་། གཉིས་པ་(SNOWLIGHT/VShell) བརྒྱུད་བོད་པའི་སྤྱི་ཚོགས་ཀྱིས་བེད་སྤྱོད་བྱེད་པའི་དྲ་ཚིགས་ཤིག་ལ་སིམ་འཛུལ་གཏོར་རྒོལ་བཏང་སྟེ། དྲ་ཚིགས་གཏོར་སྐྱོན་ཕོག་པ་དེའི་ནང་ལྟ་ཀློག་བྱེད་མཁན་སུ་ཡིན་རུང་། དེ་དག་གི་ཡོ་བྱད་གཏོར་སྐྱོན་གྱི་ཉེན་ཁའི་ནང་ཚུད་པ་སོགས། ཐབས་ལམ་དེས་མི་མང་པོ་ཞིག་ལ་གནོད་སྐྱོན་ཐེབས་སྲིད་པ་གྱུར་ཡོད་པ་བཀོད་འདུག་ལ། ཕྱི་ལོ་ ༢༠༢༦ ཟླ་ ༧ པའི་ནང་བརྙེད་སོན་བྱུང་ཡོད་པ་ནི་ (China-Nexus APT) ཡིས་བཀོལ་སྤྱོད་བྱས་པའི་ (SNOWLIGHT/VShell) ཡིན་པ་དང་། དེས་བོད་ཡིག་གི་སྡེ་ཚན་མི་འདྲ་བ་ཁག་གི་རྩོམ་ཡིག་ ༡༨ ཀྱི་ནང་དོན་སོགས་ལ་གནོད་འཚེ་ཅན་གྱི་ (JavaScript) བཅུག་ཡོད་པ་ཤེས་རྟོགས་ར་ཕྲོད་བྱུང་འདུག

དགེ་འཕེལ་ནོར་བཟང་ལགས་ཀྱིས་གསུངས་ན། རྒྱལ་སྤྱིའི་ཁྲོད་དྲྭ་རྒྱའི་འཇབ་རྒོལ་དང་སིམ་འཛུལ་སོགས་ཀྱི་དགོས་དམིགས་འདྲ་མིན་ཡོད་ཀྱང་། བོད་པའི་གནད་དོན་དེ་ནི་ཆབ་སྲིད་ཁོ་ན་ཡིན་པས། དྲྭ་ཐོག་འཇབ་རྒོལ་དེ་དག་བརྒྱུད་རྒྱ་ནག་ཕྱོགས་ནས་བོད་པའི་སྤྱི་ཚོགས་ཁྲོད་ཀྱི་གནས་ཚུལ་ག་ཚོད་མང་བ་ཤེས་ཚེ་དེའི་ཚོད་ཀྱིས་རྒྱ་ནག་གིས་བོད་ཀྱི་ཁ་གཏད་དུ་སྲིད་བྱུས་གཏིང་རྒྱུར་ཁེ་ཕན་བསྐྲུན་བཞིན་ཡོད་པ་གསུང་གི་འདུག

(TibCERT) ཞེས་བོད་ཀྱི་གློག་ཀླད་ཉེན་སྲུང་ལྟ་ཞིབ་ཀྱི་གྲ་སྒྲིག་ཚན་ཁག་གིས་འདོན་སྤེལ་གནང་བའི་སྙན་ཐོ་དེའི་བརྗོད་གཞིར་ (His Holiness The Dalai Lama’s 91st Birthday: A Celebration Shadowed by China’s transnational repression efforts) ཞེས་པ་འདོན་སྤེལ་བྱས་ཡོད་ཅིང་། གཙོ་བོ་འདི་ལོའི་འཁྲུངས་སྐར་སྐབས་རྒྱ་ནག་གིས་བོད་མིའི་ཐོག་ལ་ལྟ་སྲུང་དང་དྲ་ཐོག་ནས་གནོད་སྐྱོན་གཏོང་བའི་བྱ་འགུལ་གསལ་སྟོན་བྱེད་པའི་སྙན་ཐོག་ཞིག་ཡིན་འདུག་ལ། བཙན་བྱོལ་བོད་མིའི་སྤྱི་ཚོགས་སྤྱི་དང་། ཁྱད་པར་༧གོང་ས་མཆོག་གི་ཕོ་བྲང་དང་། བོད་མིའི་སྒྲིག་འཛུགས་ཀྱི་བསྟི་གནས་ཁག་གི་གློག་ཀླད་ནང་རྒྱ་ནག་གི་དྲ་འབུ་དང་། ཉུལ་ཞིབ་ཀྱི་མཉེན་ཆས་བཏང་པའི་གནས་ཚུལ་ར་ཕྲོད་བྱུང་པ་ནི་ལོ་ངོ་བཅུ་ཕྲག་གོང་ནས་བྱུང་བཞིན་པའི་གནད་དོན་ཞིག་ཆགས་ཡོད།

བོད་མི་ལས་འགུལ་བ་དང་ཤུགས་རྐྱེན་ལྡན་པའི་ཚོགས་སྒེར་དམིགས་འབེན་དུ་འཛིན་པ།

གཞན་ཨ་རིའི་གློག་བརྙན་འཁྲབ་སྟོན་པ་དང་རྒྱལ་སྤྱིའི་བོད་དོན་ལས་འགུལ་ཁང་ (ICT) གི་འགན་འཛིན་ལྷན་ཚོགས་ཀྱི་ཚོགས་གཙོ་ (Richard Gere) ལགས་ཀྱིས་ཀྱང་། རྒྱ་ནག་གཞུང་དང་འབྲེལ་བ་ཡོད་པའི་ཚན་པ་ཁག་གིས་མིས་བཟོས་རིག་ནུས་སོགས་བཀོལ་སྤྱོད་ཀྱིས་ལྟ་ཞིབ་བྱེད་འདོད་ཡོད་པའི་བོད་མི་སྒེར་གྱི་ཞིབ་ཕྲའི་གནས་ཚུལ་ཕྱོགས་བསྡུ་བྱེད་བཞིན་ཡོད་པས། དེ་ནི་བོད་མི་ཁོ་ན་ཙམ་ཡིན་པར། ཆོས་ལུགས་ཀྱི་ཚོགས་སྡེ་ཁག་དང་། ལས་འགུལ་བ། གསར་འགོད་པ། ཐ་ན་རྒྱ་ནག་ལ་ངོ་རྒོལ་བྱེད་མཁན་ཡོངས་རྫོགས་ལ་མ་འོངས་པར་འཕྲད་སྲིད་པའི་དཀའ་ཉེན་གཅིག་པུ་མིན་པར་ད་ལྟ་ཉིད་དུ་འབྱུང་བཞིན་པ་ཞིག་རེད་ཅེས་གསུངས་འདུག

(lhuboom/RFA)

དེང་གི་དུས་སུ་དྲྭ་རྒྱ་ནི་འགྲོ་བ་མིའི་ཉིན་རེའི་བྱ་གཞག་གི་ནང་ལྡོག་ཏུ་མི་རུང་བའི་ཆ་ཤས་གལ་ཆེན་ཤིག་ཏུ་གྱུར་ཡོད་ཅིང་། དྲ་ཐོག་གི་བདེ་འཇགས་ཀྱིས་སྒེར་གྱི་བདེ་འཇགས་ལའང་ཤུགས་རྐྱེན་ཆེན་པོ་ཡོད་པར་བརྟེན། བོད་མི་ཚོར་རྒྱ་ནག་ཕྱོགས་ནས་དྲ་ཐོག་མྱུལ་ཞིབ་དང་ལྟ་སྲུང་། རྒོལ་རྡུང་གཏོང་བཞིན་ཡོད་པ་ཉམས་ཞིབ་རིམ་པའི་བརྒྱུད་ཤེས་རྟོགས་བྱུང་སྟེ། བོད་དོན་ལས་འགུལ་བསྟི་གནས་ཁང་གིས་ (TibCERT) ཞེས་བོད་ཀྱི་གློག་ཀླད་ཉེན་སྲུང་ལྟ་ཞིབ་ཀྱི་གྲ་སྒྲིག་ཚན་ཁག་དེ་བསྐྲུན་ཏེ། ཚན་པ་དེས་བོད་མི་ཚོར་དྲྭ་ཐོག་གི་བདེ་འཇགས་དང་འཇབ་རྒོལ་སོགས་ལས་གཡོལ་ཐབས་ཀྱི་ཟབ་སྦྱོང་སྤྲོད་ཀྱི་ཡོད་པ་རེད།།

པར་ལེན་དང་བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

ཕྱི་ཟླ་ ༡༠ ཚེས་ ༡༤ རེས་གཟའ་ལྷག་པའི་ཉིན་བླ་མ་བཟོད་པ་རིན་པོ་ཆེ་མཆོག་གིས་ཕྱི་ལོ་ ༡༩༧༤ ལོར་ཨོསི་ཊརེ་ལི་ཡར་ཕྱག་བཏབ་པའི་སྤྱན་རས་གཟིགས་ཀྱི་ཆོས་ཚོགས་ནས་དད་ལྡན་པ་ ༡༦༠ ལྷག་གིས་བཞུགས་སྒར་རྒྱལ་བའི་ཕོ་བྲང་དུ་ཆེད་བཅར་ཞུས་ཏེ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་བ་དང་། སྐབས་དེར་བརྟན་བཞུགས་ཀྱི་འབུལ་མཚན་དུ་རྗེ་ཙོང་ཁ་ཆེན་པོའི་རྗེ་ཚེ་འཛིན་མའི་སྐུ་ ༡༣༥ ཕུལ་ཏེ། ༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༡༣༠ ལྷག་སྐུ་བཞུགས་མཛད་རྒྱུའི་གསོལ་འདེབས་ཞུས་འདུག

(OHHDL)

དེ་ཡང་སྤྱན་རས་གཟིགས་ཆོས་ཚོགས་ནང་དགེ་རྒན་གྱི་ཕྱག་ལས་གནང་བཞིན་པ་དགེ་བཤེས་ཕུན་ཚོགས་ཚུལ་ཁྲིམས་ལགས་ཀྱིས། མཇལ་ཁའི་སྐབས་ཁོང་རྣམས་ཀྱིས་༧གོང་ས་༧སྐྱབས་མགོན་ཆེན་པོ་མཆོག་ལ་རྗེ་ཙོང་ཁ་པ་ཆེན་པོའི་རྗེ་ཚེ་འཛིན་མའི་སྐུ་ ༡༣༥ ཞིག་འབུལ་རྟེན་དུ་ཕུལ་ཡོད་ཡོད་ཅིང་། དེའི་རྒྱུ་མཚན་ནི་འདས་པའི་ལོ་གཉིས་ལྷག་གི་རིང་༧གོང་ས་༧སྐྱབས་མགོན་ཆེན་པོ་མཆོག་གིས་དགུང་གྲངས་ ༡༣༥ ལྷག་སྐུ་བཞུགས་མཛད་རྒྱུའི་བཀའ་ཡང་སེ་ཕེབས་བཞིན་ཡོད་ཀྱང་། དེར་བོད་པའི་སྤྱི་ཚོགས་ནང་དེ་ཙམ་གྱིས་དོ་སྣང་བྱེད་ཀྱིན་མེད་པའི་རྣམ་པ་ཞིག་ཚོར་ཡོད་པར་བརྟེན། བརྟན་བཞུགས་སྐབས་སྐུ་ཚེ་ཡུན་དུ་བརྟན་པའི་གསོལ་འདེབས་ཞུས་ཡོད་ཅིང་། སྐབས་དེར་༧གོང་ས་མཆོག་གིས་ཐུགས་དགྱེས་ཚོར་ཆེན་པོས་སྣང་དག་མེད་ཅེས་བཀའ་སྩལ་མཛད་ཡོད་པ་གསུང་གི་འདུག

ཨོསི་ཊརེ་ལི་ཡར་རྟེན་གཞི་བྱས་པའི་སྤྱན་རས་གཟིགས་ཆོས་ཚོགས་ནས་ཡིན་པ་ཨེ་རིན་ལི་ (Erinlee) ལགས་ཀྱིས། ༧གོང་ས་མཆོག་གི་གམ་དུ་བསླེབས་པ་དང་ངས་དུས་ཚོད་གང་བོར་ཁོང་སྐུ་ཚེ་ཡུན་རིང་བརྟན་པའི་སྨོན་ལམ་རྒྱག་བཞིན་ཡོད་པ་ཚོར་བྱུང་། ཞི་བདེ་ལྡན་པའི་ཚོར་བ་བྱུང་ལ། ཁོང་མཇལ་ཁར་བཅར་མཁན་གྱི་མི་རེ་རེས་༧གོང་ས་མཆོག་གི་བྱམས་སྙིང་རྗེའི་བདག་ཉིད་ཀྱི་ཡོན་ཏན་དེ་བླངས་ཏེ། འཛམ་གླིང་ནང་ཁྱབ་སྤེལ་གཏོང་དགོས་པ་ནི་ད་ལྟའི་དུས་སུ་འཛམ་གླིང་ལ་མཁོ་བའི་གནད་དོན་གལ་ཆེན་ཞིག་རེད་ཅེས་གསུང་གི་འདུག

བརྟན་བཞུགས་བསྟར་འབུལ་ཆེད་དུ་བཞུགས་སྒར་དུ་བཅར་བའི་སྤྱན་རས་གཟིགས་ཆོས་ཚོགས་ཀྱི་དད་ལྡན་པ་ ༡༦༠ རྣམས་ནི། ཕལ་ཆེ་བ་ཨོསི་ཊརེ་ལི་ཡ་དང་ཡོ་རོབ། ཨ་རི། སིངྒ་པུར། ཐའི་ལེནཌ། མ་ལེ་ཤི་ཡ་བཅས་ནས་བཅར་འདུག་ལ། དགེ་བཤེས་ཕུན་ཚོགས་ཚུལ་ཁྲིམས་ལགས་ཀྱིས་གསུངས་ན། དུས་རྒྱུན་ཁོང་གིས་སློབ་འཁྲིད་གནང་སྐབས་སུ་མི་ཚེའི་ནང་༧གོང་ས་མཆོག་ཐེངས་གཅིག་མཇལ་རྒྱུ་དང་བྱིན་རླབས་ཞུ་རྒྱུ་བྱུང་ཚེ། དེ་ནི་ཁོང་གིས་འཛིན་གྲྭ་ཐེངས་བརྒྱ་ཚོགས་པ་ལས་བྱིན་རླབས་ཆེ་བ་ཡོད་ཅེས་ཡང་ཡང་གསུང་གི་ཡོད་པ་འགྲེལ་བརྗོད་གནང་བྱུང་།

(RFA Tibetan)

ཡང་ཕྱི་ལོ་ ༡༩༨༠ དང་ ༩༠ ནང་གློག་བརྙན་བརྒྱ་ལྷག་འཁྲབ་ཟིན་པའི་རྒྱ་གར་གྱི་གློག་བརྙན་འཁྲབ་སྟོན་པ་དྷན་དྷ་ནོ་འ་ (Dan Dhanoa) ལགས་དང་ཁོང་གི་བཟའ་ཟླ་བརྙན་འཕྲིན་འཁྲབ་སྟོན་པ་དང་ཀ་ཐག་སྒྱུ་རྩལ་བ་ (Nandita Puri) ལགས་ཀྱིས་༧གོང་ས་མཆོག་གི་མཇལ་ཁ་ཐོག་མ་དེ་ཞུས་སོང་།

སྐབས་དེར་དྷན་དྷ་ནོ་འ་ལགས་ཀྱིས། “ང་ཚོས་དུས་ཡུན་རིང་པོ་ནས་༧གོང་ས་༧སྐྱབས་མགོན་ཆེན་པོ་མཆོག་མཇལ་འདོད་ཡོད་པས་ཐེངས་འདིར་མཇལ་ཁ་ཐོབ་པར་དགའ་ཚོར་ཆེན་པོ་བྱུང་། ༧གོང་ས་མཆོག་གི་ཞལ་རས་དང་འཛུམས་མདངས་ནི་ཡིད་དུ་འོང་བ་ཞིག་འདུག་ལ། ངས་མ་འོངས་མུ་མཐུད་མཇལ་ཁ་ཞུ་ཐུབ་པའི་རེ་བ་བྱེད་བཞིན་ཡོད།” ཅེས་དང་། ཁོང་གི་བཟའ་ཟླ་ (Nandita Puri) ལགས་ཀྱིས། “ངས་ལོ་མང་པོའི་གོང་ནས་༧གོང་ས་མཆོག་གི་བྱམས་སྙིང་རྗེ་དང་ཞི་བདེ་སོགས་དང་འབྲེལ་བའི་ཕྱག་དེབ་དེ་དག་ཀློག་གི་ཡོད་པས། ཐེངས་འདིར་དངོས་སུ་མཇལ་བ་དང་ཧ་ཅང་ཉེ་འགྲམ་ནས་མཇལ་དུས་ཚོར་བ་ཧ་ཅང་གྱི་བརྗོད་མི་ཐུབ་པ་ཞིག་བྱུང་། ངས་མཇལ་ཁའི་སྐབས་༧གོང་ས་མཆོག་སྐུའི་འཕྲོད་བཞེས་གང་ལེགས་དང་སྐུ་ཚེ་ཡུན་རིང་བརྟན་པའི་སྨོན་ལམ་བཏབ་པ་ཡིན།” ཞེས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

གློག་བརྙན་འཁྲབ་སྟོན་པ་ (Dan Dhanoa) ལགས་ལ་མཚོན་ན་ཁོང་གིས་རྒྱ་གར་གློག་བརྙན་འཁྲབ་པ་ཕལ་ཆེ་བའི་ནང་ཁ་གཏད་པ་འཁྲབ་འདུག་ལ། དེ་ཡང་ཁོང་གི་གློག་བརྙན་གྲགས་ཆེ་བ་ཁ་ཤས་ནི། (Mard) དང་། (Karma)། (Tridev)། (Sanam Bewafa) སོགས་ཡིན་པ་རེད།།

བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

ཕྱི་ཟླ་ ༡༠ ཚེས་ ༩ ཉིན་རྒྱ་ནག་དབུས་སྒྲིག་ཁྲིམས་ལྟ་ཞིབ་ལས་ཁུངས་ཀྱིས་གསལ་བསྒྲགས་བྱས་པར། ཏིང་ཡེ་ཤན་གྱིས་དཔོན་གནས་ཀྱི་དབང་ཆ་བེད་སྤྱད་ནས་ལས་གཞིའི་གན་རྒྱ་དང་ཚོང་ལས་གཉེར་སྐྱོང་བཅས་ཀྱི་ཐད་ཁེ་ཕན་སྤྲད་དེ་རྒྱུ་ནོར་འབོར་ཆེན་ཁྲིམས་འགལ་གྱིས་བླངས་པའི་ཉེས་འཛུགས་དང་། དེ་མིན་ཡང་དཔོན་རིགས་འདེམས་བསྐོ་དང་བསྐོ་བཞག་གི་ལས་དོན་ནང་སྒྲིག་འགལ་གྱིས་མི་གཞན་ལ་ཁེ་ཕན་སྤྲད་པ་སོགས་ཀྱི་ཉེས་འཛུགས་བྱས་འདུག

༢༠༢༦ ལོར་བོད་ནང་གི་དཔོན་རིགས་ལ་མུ་མཐུད་ཞིབ་བཤེར།

༢༠༢༦ ལོར་བོད་རང་སྐྱོང་ལྗོངས་ཀྱི་དཔོན་རིགས་དང་གཞུང་འབྲེལ་ཁེ་ལས་ཀྱི་འགན་འཛིན་མང་པོ་ཞིབ་བཤེར་འོག་ཚུད་བཞིན་འདུག་ལ། ཟླ་ ༧ པར་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་གཙོ་གཞོན་པ་ཟུར་པ་ཝང་ཅུན་དམར་ཤོག་ཚོགས་པ་དང་གཞུང་གི་གོ་གནས་ནས་ཕུད་པ་དང་། ཟླ་ ༨ པར་བོད་ལྗོངས་ཨར་ལས་དང་འཛུགས་སྐྲུན་རྒྱུ་ཆའི་ཚོགས་པའི་སྤྱི་གཉེར་གཞོན་པ་མ་བིན་ཞིབ་བཤེར་འོག་ཚུད་ཡོད། ཟླ་བ་དགུ་པ་གཅིག་པུའི་ནང་དཔོན་རིགས་དགུ་ཙམ་ལ་སྒྲིག་འགལ་ཁྲིམས་འགལ་ཐོག་ནས་ཞིབ་བཤེར་བྱེད་འགོ་བཙུགས་འདུག

(བོད་ལྗོངས་ཉིན་རེའི་ཚགས་པར།)

ལོ་གསུམ་གྱི་རིང་བོད་ནང་སྒྲིག་འགལ་ཁྲིམས་འགལ་གྱི་གྱོད་གཞི་ ༦༠༠༠ ལྷག་ཐོ་བཀོད།

༢༠༢༥ ལོའི་ཟླ་ ༧ པར་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ཟུར་པ་ཝུ་དབྱིང་ཇེ་ལ་རྒྱ་སྒོར་དུང་ཕྱུར་ ༣.༤༣ ལྷག་ལྐོག་ཟ་བྱས་པའི་ནག་ཉེས་འོག་ལོ་གཉིས་ཕྱིར་འགྱངས་ཀྱིས་སྲོག་ཐོག་ཁྲིམས་བཅད་བཏང་ཡོད་ལ། ༢༠༢༦ ལོའི་ཟླ་ ༦ པར་བོད་རང་སྐྱོང་ལྗོངས་སྲིད་གཞུང་གི་ཚོགས་གཙོ་ཟུར་པ་ཆེ་དགྲ་ལྷར་རྒྱ་སྒོར་དུང་ཕྱུར་ ༡.༥༨ ལྷག་ལྐོག་ཟ་བྱས་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་ཡོད།

(Nordhey)

(Nordhey)

དེ་ལྟར་ཉེ་བའི་ལོ་ཤས་ནང་བོད་རང་སྐྱོང་ལྗོངས་སུ་སྒྲིག་འགལ་ཁྲིམས་འགལ་ཐོག་ལྐོ་ཟ་རུལ་སུངས་ཀྱི་གྱོད་གཞི་མང་པོ་ཐོན་ཡོད་པ་རྒྱ་ནག་གཞུང་ཕྱོགས་ཀྱི་གྲངས་ཐོ་ལས་མཐོང་ཐུབ་པ་ཞིག་རེད་འདུག

བོད་རང་སྐྱོང་ལྗོངས་སྒྲིག་ཁྲིམས་ལྟ་ཞིབ་ལས་ཁུངས་ཀྱི་ལོ་རེའི་ལས་དོན་སྙན་ཞུར་གཞིགས་ན། ༢༠༢༣ ལོར་སྒྲིག་འགལ་དང་ཁྲིམས་འགལ་གྱི་གྱོད་གཞི་ ༡༨༠༠ ལྷག་ཐོ་འགོད་བྱས་པ་དང་། ༢༠༢༤ ལོར་གྱོད་གཞི་ ༢༡༠༠ ལྷག་ཙམ་དང་། དེ་བཞིན་ ༢༠༢༥ ལོར་གྱོས་གཞི་ ༢༢༠༠ ལྷག་ཐོ་འགོད་བྱས་ཡོད་འདུག

དེ་ལྟར་བྱས་ན། ལོ་གསུམ་ནང་གྱོད་གཞི་ ༦༡༠༠ ལྷག་ཐོ་འགོད་བྱས་པ་དང་། མི་ ༦༣༠༠ ལྷག་ལ་ཉེས་ཆད་བཏང་ཡོད་འདུག ལྷག་པར་དུ་ ༢༠༢༥ ལོར་རང་སྐྱོང་ལྗོངས་རིམ་པས་དོ་དམ་བྱེད་པའི་དཔོན་རིགས་ ༣༠ ལྷག་ལ་གྱོད་གཞི་བཙུགས་པ་དེ། སྔ་ལོ་ལས་བརྒྱ་ཆ་ ༦༣.༢ འཕར་ཡོད་པ་གཞུང་ཕྱོགས་ནས་བརྗོད་འདུག

(Nordhey)

འོན་ཀྱང་གྲངས་ཐོ་འདིར་ལྐོག་ཟ་རུལ་སུངས་ཁོ་ན་མ་ཡིན་པར། སྒྲིག་འགལ་དང་ཁྲིམས་འགལ་གྱི་རིགས་གཞན་དག་ཀྱང་ཚུད་འདུག་པས། དེ་རིགས་སྲིད་དོན་དང་འབྲེལ་བ་ཡོད་མེད་ཁ་གསལ་མི་འདུག གྲངས་ཐོ་དེ་ཚོས་ཞིབ་བཤེར་གྱི་གྱོད་གཞི་འཕར་བ་མཚོན་པ་ལས། ལྐོག་ཟ་རུལ་སུངས་དངོས་སུ་ཇི་ཙམ་འཕར་ཡོད་མེད་ཁ་གསལ་མི་འདུག

(བོད་ལྗོངས་བརྙན་འཕྲིན།)

གསར་སྤེལ་ལས་གཞི་དང་རུལ་སུངས་ཀྱི་འབྲེལ་བ།

བོད་ནང་གི་དཔོན་རིགས་ཁག་གི་གྱོད་གཞིར་བལྟས་ན། ཁག་ཅིག་ནི་གསར་སྤེལ་ལས་གཞིའི་གན་རྒྱ་དང་། གསར་སྤེལ་དང་འབྲེལ་བའི་ས་ཁང་། གཏེར་ཁ་དང་ས་ཆའི་ཁེ་ཕན་སོགས་དང་འབྲེལ་བ་ཡོད་འདུག་ལ།

ཝུ་དབྱིང་ཇེའི་གྱོད་གཞིར་ལས་གཞི་གན་རྒྱ་དང་ཁེ་ལས་གཉེར་སྐྱོང་གི་ཁེ་ཕན་ཚུད་ཡོད་པ་དང་། ཆེ་དགྲ་ལྷའི་གྱོད་གཞིར་ས་ཁང་གསར་སྤེལ་དང་འཛུགས་སྐྲུན་གན་རྒྱ། འཛིན་སྐྱོང་གི་ཆོག་མཆན་སོགས་ཚུད་ཡོད།

དེ་བཞིན་ཝང་ཅུན་གྱིས་གཏེར་ཁ་གསར་སྤེལ་དང་འཛུགས་སྐྲུན་ས་ཆ་ཐོབ་ཐབས་སུ་མི་གཞན་ལ་ཁེ་ཕན་སྤྲད་ནས་རྒྱུ་ནོར་བླངས་པའི་ཉེས་འཛུགས་བྱས་ཡོད།

རྒྱ་ནག་གཞུང་གི་བོད་ནང་ཡོད་པའི་དཔོན་རིགས་ཀྱི་ལྐོག་ཟ་རུལ་སུངས་དང་གསར་སྤེལ་ལས་གཞིའི་བར་འབྲེལ་བ་ཡོད་པ་དེས། གཞུང་གིས་བོད་ནང་སྤེལ་བའི་ལས་གཞི་དེ་དག་གི་ཁེ་ཕན་སུ་ལ་ཐོབ་ཀྱི་ཡོད་མེད་དང་། ས་གནས་བོད་མིར་ཕན་ཐོགས་ཇི་ཙམ་ཡོད་མེད་སོགས་ཀྱི་དྲི་བ་ཡང་ཐོན་གྱི་ཡོད།

རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་ཀྱིས་རྒྱ་ནག་གཞུང་གིས་བོད་ཁུལ་དུ་འཛིན་སྐྱོང་ཐོག་ལ་དོ་སྣང་ཡག་པོ་བྱེད་ཀྱི་མེད་པའི་རྐྱེན་གྱིས་མི་སྣ་འདི་འདྲ་ཐོན་གྱི་ཡོད་པ་གཅིག་རེད། དེ་མིན་ན་རྒྱ་ནག་གཞུང་གིས་བོད་ལ་འཛུགས་སྐྲུན་ལས་གཞི་བྱེད་ཀྱི་ཡོད་ཟེར་བའི་མཐའ་མའི་གྲུབ་འབྲས་འདི་ལ་ལས་གཞི་འདི་ཡག་པོ་ཡོང་མི་ཐུབ་པ་ནི་མི་སྣ་འདི་ཚོའི་རྐྱེན་གྱི་རེད་ཅེས་དབྱེ་ཞིབ་གནང་གི་འདུག

ཆབ་སྲིད་དང་འཛིན་སྐྱོང་གི་གནས་བབ།

བོད་ནང་མི་མང་གི་ཆབ་སྲིད་དང་ཆོས་དད། གཏམ་བརྗོད་རང་དབང་བཅས་ལ་དམ་དྲག་ཆེ་བའི་གནས་སྟངས་འོག་དཔོན་རིགས་ཀྱི་ལྐོག་ཟ་རུལ་སུངས་དང་དབང་ཆ་ལོག་པར་བེད་སྤྱོད་བྱས་པར་མི་མང་གིས་ལྟ་རྟོག་དང་གཏུག་བཤེར་བྱེད་ཐུབ་མིན་ཡང་གནད་དོན་གལ་ཆེན་ཞིག་ཆགས་ཡོད།

བུ་ཆུང་ཚེ་རིང་ལགས་ཀྱིས་མུ་མཐུད་གསུངས་པར། དམར་ཤོག་ཚོགས་པའི་དབང་འཛིན་འོག་ལ་བོད་ས་ཁུལ་གྱི་ལས་འཆར་དང་འཛིན་སྐྱོང་བྱེད་སྟངས་འདི་མི་དམངས་ཀྱི་དགོས་མཁོ་དང་མི་དམངས་ཀྱི་འདོད་བློ་གཞི་བཟུང་འགྲོ་ཐུབ་ཀྱི་མེད་པ་ཞིག་མངོན་གྱི་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

ཉེ་ཆར་ཞིབ་བཤེར་འོག་ཚུད་པའི་དཔོན་རིགས་མང་པོ་ནི་དམར་ཤོག་ཚོགས་པའི་འགོ་ཁྲིད་དང་ཚོགས་མི། གཞུང་འབྲེལ་གྱི་ཁེ་ལས་ཚན་པའི་འགན་འཛིན་ཆགས་ཀྱི་ཡོད།

རྒྱ་ནག་གཞུང་གིས་ལྐོག་ཟ་རུལ་སུངས་བྱེད་མཁན་རྩད་གཅོད་བྱས་དེ་དམར་ཤོག་ཚོགས་པའི་སྒྲིག་ཁྲིམས་དང་འཛིན་སྐྱོང་སྲ་བརྟན་བཟོ་བའི་ལས་འགུལ་དུ་འཇུག་པར་འགྲེལ་བརྗོད་བྱེད་ཀྱི་ཡོད།

འོན་ཀྱང་བོད་ནང་གི་མཐོ་རིམ་དཔོན་རིགས་ནས་གཤམ་འོག་བར་ཞིབ་བཤེར་གྱི་གྱོད་གཞི་མང་པོ་ཐོན་པ་དེས་འཛིན་སྐྱོང་ལམ་ལུགས་དང་དབང་ཆའི་འཐབ་རྩོད་ནང་དཀའ་ངལ་གང་མཚོན་མིན་ཐད་དྲི་བ་ཡང་ཐོན་གྱི་ཡོད།

བུ་ཆུང་ཚེ་རིང་ལགས་ཀྱིས་གསུངས་པར། རང་སྐྱོང་ལྗོངས་ལྟ་བུའི་འགོ་ཁྲིད་མཐོ་ཤོས་ནས་གཤམ་འོག་བར་རིམ་པ་སྣ་ཚོགས་ཀྱི་མི་སྣ་བར་ལྐོག་ཟ་རུལ་སུངས་ཀྱི་གནས་ཚུལ་འདུག འདི་ཚོ་བོད་ས་ཁུལ་གྱི་སྒྲོམ་གཞི་དེ་རང་རུལ་པ་ལྟ་བུ་ཞིག་ཡོད་པར་ངོས་འཛིན་བྱེད་ཆོག་པ་འདུག ཆབ་སྲིད་ཀྱི་གནས་ཚུལ་དེ་ཚོ་འཁྱེར་ཡོང་ན་དེ་ལས་སྡུག་པ་ཞིག་ཡོད་ཅེས་གསུངས་བྱུང་།

(བོད་ལྗོངས་བརྙན་འཕྲིན།)

ལྐོག་ཟ་རུལ་སུངས་དང་བོད་མིའི་འཚོ་བ།

བོད་ནང་གི་བོད་མིའི་ངོས་ནས་དཔོན་རིགས་ལ་ཉེས་ཆད་གང་བཏང་བ་ཙམ་མ་ཡིན་པར་ལྐོག་ཟ་རུལ་སུངས་ཀྱི་བྱ་སྤྱོད་དེ་དག་གིས་མི་མང་གི་འཚོ་བར་ཤུགས་རྐྱེན་གང་འདྲ་ཐེབས་ཡོད་མེད་ཀྱང་གལ་ཆེན་པོ་ཆགས་ཡོད་ལ།

ལྷག་པར་དུ་གསར་སྤེལ་དང་འཛུགས་སྐྲུན་གྱི་ལས་གཞི་ཁག་ནང་། ས་ཆའི་གུན་གསབ་དང་། ལས་ཀའི་གོ་སྐབས། གཞུང་གི་དངུལ་རྩིས། ས་གནས་ཀྱི་མི་མང་ལ་ཁེ་ཕན་ཇི་ཙམ་ཐོབ་ཡོད་མེད་སོགས་ཀྱི་ཐད་ཕྱི་གསལ་ནང་གསལ་དགོས་ཀྱི་ཡོད།

འོན་ཀྱང་གཞུང་འབྲེལ་གྱི་གསལ་བསྒྲགས་ཁག་ཏུ་དཔོན་རིགས་ཀྱིས་རྒྱུ་ནོར་ཇི་ཙམ་ལྐོག་ཟ་བྱས་པ་དང་། ས་གནས་མི་མང་ལ་གྱོང་གུན་གང་བྱུང་བ། གནོད་སྐྱོན་དེ་དག་ལ་གུན་གསབ་ཡོད་མེད་སོགས་གྱོད་གཞི་ཚང་མའི་ཐད་གནས་ཚུལ་ཁ་གསལ་གང་ཡང་བཀོད་མི་འདུག

བུ་ཆུང་ཚེ་རིང་ལགས་ཀྱིས་མུ་མཐུད་གསུངས་པར། ད་ལྟ་དཔོན་རིགས་ལྐོག་ཟ་བྱེད་མཁན་མང་དུ་ཕྱིན་པ་འདིས་བོད་ཀྱི་ས་ཁུལ་དུ་འཛིན་སྐྱོང་གི་སྒྲོམ་གཞི་བརྟན་པོ་མེད་པ་དང་། ཡང་ན་དྲང་བདེན་མེད་པ་ཞིག་ལ་རྩིས་དགོས་ཀྱི་ཡོད། དེ་མིན་འཇོན་ཐང་མེད་པའི་མི་སྣ་ཤ་སྟག་བསྐོ་བཞག་བྱེད་ཀྱི་ཡོད་པར་རྩིས་རྒྱུ་རེད་ཅེས་བརྗོད་བྱུང་།

མཇུག་བསྡོམས།

རྒྱ་ནག་གཞུང་གིས་ལྐོག་ཟ་རུལ་སུངས་རྩད་གཅོད་བྱས་པ་དེ་དམར་ཤོག་ཚོགས་པའི་སྒྲིག་ཁྲིམས་དང་གཞུང་གི་འཛིན་སྐྱོང་སྲ་བརྟན་བཟོ་བའི་ལས་འགུལ་ཞིག་ཏུ་འགྲེལ་བརྗོད་བྱེད་བཞིན་ཡོད། འོན་ཀྱང་བོད་རང་སྐྱོང་ལྗོངས་ནང་མཐོ་རིམ་དཔོན་རིགས་ནས་ས་གནས་རིམ་པ་བར་གྱི་འགོ་ཁྲིད་དང་ལས་བྱེད་ནང་མུ་མཐུད་གྱོད་གཞི་ཐོན་བཞིན་པ་དེས། ལྐོག་ཟ་རུལ་སུངས་རྩད་གཅོད་ཀྱི་ནུས་པ་དང་། དབང་ཆའི་ལྟ་ཞིབ། གསར་སྤེལ་ལས་གཞིའི་ཁེ་ཕན་བཅས་ཀྱི་ཐད་དྲི་བ་མང་པོ་ཡོང་གི་ཡོད།

ལྷག་པར་དུ་དཔོན་རིགས་ཀྱི་ལྐོག་ཟ་རུལ་སུངས་གྱོད་གཞི་དེ་དག་གིས་བོད་ཀྱི་གསར་སྤེལ་དང་འཛུགས་སྐྲུན་གྱི་ལས་གཞིའི་གྲུབ་འབྲས་དང་། ས་གནས་མི་མང་གི་འཚོ་བར་གནོད་སྐྱོན་ཇི་ཙམ་བཟོས་ཡོད་མེད་ཐད་ད་དུང་ཞིབ་འཇུག་དང་གསལ་བཤད། ལས་དོན་ཁག་ཕྱི་གསལ་ནང་གསལ་དགོས་པར་གྱུར་ཡོད།།

པར་རིས་སྒྲིག་བཟོ་དང་བརྙན་པར་སྒྲིག་སྦྟོར་བ། ནོར་སྡེ་སྒྲོལ་མ།

ཕྱི་ལོ་ ༢༠༢༦ ཟླ་ ༡༠ ཚེས་ ༡༡ རེས་གཟའ་ཉི་མའི་ཞོགས་པ་བལ་ཡུལ་དབུས་ཕྱོགས་གོར་ཁ་རྫོང་གི་ཁྱབ་ཁོངས་ Budhi Gandaki གཙང་པོའི་ཁུལ་དུ་ཆུ་ལོག་གི་དོན་རྐྱེན་ཚབས་ཆེ་བྱུང་བའི་ཁྲོད་བལ་བོད་ས་མཚམས་བཙུམ་ཁུལ་གྱི་འབྲོག་པ་བེུད་གཉིས་དང་སྐྱེས་པ་གསུམ་གར་སོང་ཆ་མེད་དུ་གྱུར་ཡོད་པ་ས་གནས་སུ་འགོ་དཔོན་ཞིག་གི་སྐུ་མཆེད་ཡིན་པ་བྱེས་ཀྱི་གདན་ས་དགའ་ལྡན་ཤར་རྩེའི་མཁན་རིན་པོ་ཆེ་བྱང་ཆུབ་སངས་རྒྱས་མཆོག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

(རོའི་ཊརསི་དང་མི་སེར་གྱི་པར།)

འབྲོག་པ་བེུད་གཉིས་དང་སྐྱེས་པ་གསུམ་གར་སོང་ཆ་མེད་དུ་གྱུར་འདུག

དགེ་བཤེས་བྱང་ཆུབ་སངས་རྒྱས་མཆོག དགའ་ལྡན་ཤར་རྩེའི་མཁན་རིན་པོ་ཆེ།

ཆུ་ལོག་གི་དོན་རྐྱེན་དེའི་འོག་ས་ཆ་དམའ་སར་ཡོད་པའི་མི་མང་གི་སྡོད་ཁྱིམ་དང་ཟམ་པ་གཏོར་བཤིག་སོང་པ་དང་འགྲུལ་ལམ་འགག་པ་སོགས་ཀྱི་མི་གྲངས་ ༦༥༠ ཙམ་ལ་གནོད་སྐྱོན་བྱུང་ཡོད་པའི་གནས་ཚུལ་འདུགཆུ་ལོག་གི་དོན་རྐྱེན་དེ་བྱུང་བའི་རྗེས་བལ་ཡུལ་གཞུང་གི་ཐད་འཕུར་གནམ་གྲུ་བཏང་སྟེ་མི་གྲངས་ ༧༠༠ ས་གནས་སུ་འགྲེམ་འཇོག་གིས་མྱུར་སྐྱོབ་ཀྱི་ལས་འགུལ་སྤེལ་ཡོད་ཅིང་། ད་བར་མི་གྲངས་ ༩༥ མྱུར་སྐྱོབ་ཐུབ་པའི་ནང་ཕྱི་རྒྱལ་གྱི་འགྲུལ་བཞུད་པ་ ༩ ཚུད་ཡོད་འདུག

(Xinhua)

ད་རེས་བལ་ཡུལ་གྱི་གོར་ཁ་རྫོང་ཁུལ་དུ་ཆུ་ལོག་དོན་རྐྱེན་བྱུང་བ་དེ་ནི་ཉེ་ཆར་བལ་བོད་ས་མཚམས་སྐྱིད་གྲོང་དང་ར་སུ་ཝ་ཁུལ་དུ་ཆུ་ལོག་གི་དོན་རྐྱེན་དང་མི་འདྲ་བ་ཞིག་བྱུང་ཡོད་ཅིང་། རི་དང་ས་ཉིལ་བར་བརྟེན་ནས་ཆུ་ལོག་དེ་བྱུང་པར་ངོས་འཛིན་བྱེད་ཀྱི་ཡོད་འདུག བལ་བོད་ས་མཚམས་སྐྱིད་གྲོང་ཁུལ་དུ་ཕྱི་ཟླ་ ༨ ཚེས་ ༢༦ ཉིན་བྱུང་པའི་འཁྱགས་རོམ་ཉིལ་བ་ལས་བྱུང་པར་ངོས་འཛིན་བྱེད་བཞིན་བའི་འདམ་རྡོ་ཆུ་རུད་ཀྱི་དོན་རྐྱེན་དེའི་འོག་མི་གྲངས་ ༡༤༠༠ ཙམ་གྱི་ཚེ་སྲོག་ཤོར་བ་དང་མི་གྲངས་ ༥༠༠༠ ཙམ་གར་སོང་ཆ་མེད་དུ་འགྱུར་ཡོད་པ་བརྗོད་ཀྱི་ཡོད་པ་རེད་ལ། དོན་རྐྱེན་དེ་བྱུང་ནས་ཕྱི་ཚེས་ ༡༣ ཉིན་ཉིན་ཞག་ ༤༩ སོང་བའི་དུས་ཚིགས་འཁེལ་བ་དང་བསྟུན་ནས་དགའ་ལྡན་ཤར་རྩེ་གྲྭ་ཚང་གིས་གདུང་སེམས་མཉམ་སྐྱེད་དང་བསྔོ་སྨོན་མཆོད་འབུལ་གནང་བཞིན་ཡོད་པ་མཁན་རིན་པོ་ཆེ་བྱང་ཆུབ་སངས་རྒྱས་མཆོག་གིས་གསུངས་བྱུང་།།

ཁ་སྣོན་གསར་འགོད། བདེ་སྐྱིད་ཀུན་སྒྲོལ།

བརྙན་པར་སྒྲིག་སྦྱོར་བ། པདྨ་དངོས་གྲུབ།

འབྲེལ་ཡོད་གནས་ཚུལ།

སྐྱིད་གྲོང་གྱི་གནོད་འཚེ་བྱུང་ཡུལ་དུ་བོད་མིའི་ངལ་སེལ་རོགས་སྐྱོར་ལ་བཀག་སྡོམ།

སྐྱིད་གྲོང་འགག་སྒོའི་རི་ཟུར་གྲོང་ཚོ་ནས་མི་ ༢༦ འདས་གྲོངས་སུ་སོང་ཡོད་པ་བརྗོད་བྱུང་།

གནས་སྤོ་དང་མྱུར་སྐྱོབ་ཁྲོད་ཀྱི་གནས་ཚུལ་ལ་བོད་ནང་དུ་ཚོད་འཛིན།

སྐྱིད་གྲོང་གི་ཁྱིམ་དུད་ ༡༥ དང་གར་སོང་ཆ་མེད་དུ་སོང་བའི་བོད་མི་སྣེ་ཤེན་པ་བཅུ།

འདམ་རུད་ཆུ་ལོག་གོད་ཆག་གི་རྒྱུ་རྐྱེན་གླེང་པ།

གངས་རིའི་འཁྱགས་རུད་ལས་བྱུང་བའི་གནོད་འཚེ་རེད་དམ།

སྐར་མ་གསུམ་གྱི་ནང་ལ་ཡོད་ཚད་འཁྱེར་བའི་ཆུ་རུད།

བལ་ཡུལ་ཏི་མུ་རེ་ནས་བོད་པ་ ༣༥ ཙམ་དང་བོད་སྐྱིད་གྲོང་གི་བོད་མི་ཁྱིམ་ཚང་མང་པོ་ཆུས་འཁྱེར།

འདམ་རུད་ཀྱི་རྐྱེན་རྩ་འདི་འཁྱགས་རྡོ་ཉིལ་བའི་རྐྱེན་གྱིས་ཡིན་པར་ངོས་འཛིན་གནང་གི་འདུག

བོད་ཀྱི་སྐྱིད་གྲོང་དང་བལ་ཡུལ་གྱི་ས་མཚམས་སུ་འདམ་རུད་དང་ཆུ་ལོག་ཚབས་ཆེན་བྱུང་འདུག