བོད་མིའི་སྒྲིག་འཛུགས་ཀྱིས་དངུལ་ཁང་འཛུགས་འཆར་ཡོད་པ།


2016.09.29
སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་བའི་ཉིན་མཐའ་མ། ༢༠༡༦།༩།༢༩ སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་བའི་ཉིན་མཐའ་མ། ༢༠༡༦།༩།༢༩
འཇིགས་མེད་སྙན་གྲགས།/RFA

དབུས་བོད་མིའི་སྒྲིག་འཛུགས་ཀྱི་བཀའ་ཤག་ནས་དམིགས་བསལ་ལས་བྱེད་༡༨་ལས་མ་བརྒལ་བ་ཐད་ཀར་བསྐོ་བཞག་གནང་ཆོག་པའི་ཁྲིམས་འཆར་ལ་སྤྱི་འཐུས་རྣམས་ཀྱིས་མང་མོས་རྒྱབ་སྐྱོར་གནང་འདུག  
དེ་ཡང་འདི་ཟླའི་ཚེས་༢༧་ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་བའི་ལས་ཉིན་བདུན་པའི་སྐབས། བཀའ་ཤག་གིས་དམིགས་བསལ་ལས་བྱེད་༡༨་ལས་མ་བརྒལ་བ་ཐད་ཀར་བསྐོ་བཞག་གནང་ཆོག་པ་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་བཏོན་གནང་བ་དེར་ངོ་ཡོད་སྤྱི་འཐུས་༣༡་རྒྱབ་སྐྱོར་གནང་སྟབས་མང་མོས་ཐག་གཅོད་བྱུང་འདུག  
སྒྲིག་གཞི་བསྐྱར་བཅོས་ནང་གསལ་ལྟར་ན། དམིགས་བསལ་དགོས་གལ་བྱུང་ཚེ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལྟར་བཀའ་ཤག་ནས་ལས་བྱེད་ས་མིག་རྩ་འབོར་བརྒྱ་ཆ་༣་མམ་ལས་བྱེད་པ་༡༨་ལས་མ་བརྒལ་བ་ལོ་དུས་རྒྱས་བཅད་ཐོག་བཀའ་ཤག་སྐབས་སོ་སོའི་ལས་ཡུན་རིང་ལས་བྱེད་འདེམས་བསྐོ་ལྷན་ཁང་དང་གོ་བསྡུར་གྱིས་ཐད་བསྐོ་ཆོག་རྒྱུ། ལས་བྱེད་དེ་རིགས་བཀའ་ཤག་སྐབས་སོ་སོའི་ལས་ཡུན་ཁྱུར་རྗེས་ཟླ་བ་གསུམ་ནང་ཚུན་ལ་མཚམས་འཇོག་དགོས། དེ་དག་གི་ལས་འགན་དང་གནས་རིམ། ཕོགས་ཐོབ། ཁེ་ཕན་བཅས་བཀའ་ཤག་གིས་གཏན་འབེབས་བྱ་རྒྱུ་ཞེས་འཁོད་ཡོད་འདུག
ཡང་སྲིད་སྐྱོང་བློ་བཟང་སེངྒེ་མཆོག་གིས་བོད་མིའི་སྒྲིག་འཛུགས་ཀྱིས་དངུལ་ཁང་ཞིག་གསར་འཛུགས་གནང་འཆར་ཡོད་སྐོར་གསུང་དོན། ཨ་མེ་རི་ཀའི་USAID་ཞེས་པ་ནས་རོགས་དངུལ་ཐོན་གྲབས་ཡོད། རོགས་དངུལ་དེ་བྱུང་ན་ལོ་རྗེས་མར་ཨ་སྒོར་འབུམ་༥་དང་དེ་ནས་ལོ་རེར་ཨ་སྒོར་ས་ཡ་༡་རེ་དངུལ་བུན་གཡར་རྒྱུའི་ལས་གཞི་སྤེལ་རྒྱུ་ཡིན། དང་པོ་NBFC་ཞེས་པའི་དངུལ་ཁང་འཛུགས་དགོས་ཀྱི་ཡོད་རེད། ཕྱི་ལོ་༢༠༡༨་ལོར་དངུལ་ཁང་ཞིག་འཛུགས་རྒྱུར་རྒྱ་གར་གཞུང་གིས་བཀའ་འཁྲོལ་གནང་གི་རེད། དེར་ལོ་གསུམ་རིང་ཞིབ་འཇུག་གནང་ཚར་ཡོད་ལ་རོགས་དངུལ་ཡང་ཞུས་ཚར་བ་རེད། རོགས་དངུལ་ཐོན་གྲབས་ཡོད། ད་ལྟ་ནས་གོམ་པ་སྤོ་དགོས་སྟབས་དངུལ་ཁང་སྐོར་ཤེས་མཁན་ཨ་རི་དང་ཡོ་རོབ་སོགས་ནས་ཁྱད་ལས་པ་ཞིག་གདན་འདྲེན་ཞུ་དགོས་བྱུང་ཚེ་དེར་ཆེ་མཐོང་ཡང་ཞུ་དགོས་ཆགས་ཡོད་ཅེས་སོགས་ཀྱི་གསལ་བཤད་གནང་ཡོད་པ་རེད།
འདི་ཚེས་༢༩་ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་མཇུག་སྒྲིལ་ཡོད་པ་རེད།

གསར་འགོད་པ་སེང་གེ་རི་བསོད་ནམས་ལྷ་མོ།

བལྟ་བཤེར་མང་ཤོས་བྱས་པའི་གནས་ཚུལ།
RFA
རྒྱལ་ཁབ་ཁག་བཅོ་བརྒྱད་ནང་བོད་དོན་དང་བླངས་ཞུ་གཏུག་པ་ ༥༢༡ དང་བླང་གི་ཐོག་ནས་འཛུལ་ཞུགས་གནང་ཡོད་སྐོར། ཕྱི་དྲིལ་བཀའ་བློན་ནས་གྲོས་ཚོགས་སུ་གསུངས་པ།
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
དཔྱ་དངུལ་ཆག་ཡང་བཏང་བའི་ལོ་གཅིག་ནང་བོད་མི་དྲུག་སྟོང་ལྔ་བརྒྱ་ལྷག་གིས་དཔྱ་དངུལ་ལག་དེབ་གསར་བཟོ་དང་བསྐྱར་གསོ་གནང་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎