ཨེ་ཤེ་ཡའི་དུས་སྟོན་ནང་བོད་མི་མཉམ་ཞུགས་གནང་བ།
2014.05.17
ཚེས་༡༧ཉིན་ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་མི་ཚོ་ཨེ་ཤེ་ཡའི་དུས་སྟོན་ནང་མཉམ་ཞུགས་ཀྱིས་སོ་སོའི་རིག་གཞུང་འཁྲབ་སྟོན་སོགས་ཀྱི་གནས་ཚུལ་འབྲེལ་ཡོད་མི་སྣ་བསྟན་འཛིན་ལྷུན་གྲུབ་ལགས་སུ་འདི་ག་རླུང་འཕྲིན་ཁང་གིས་ཐད་ཀར་བཅར་འདྲིར་ངོ་སྤྲོད་གནང་བར་གསན་རོགས༎
ཨ་མི་རི་ཀའི་རྒྱལ་སའི་གྲོས་ཚོགས་མདུན་ཐང་དུ་ཚོགས་པའི་ཨེ་ཤེ་ཡའི་དུས་སྟོན་ནང་བོད་མི་མཉམ་ཞུགས་གནང་བར་མི་མང་པོས་དོ་སྣང་བྱས་འདུག དེ་ཡང་སྤྱི་ཟླ་༥ཚེས༡༧ཉིན་ཨ་མི་རི་ཀའི་རྒྱལ་སའི་གྲོས་ཚོགས་མདུན་ཐང་དུ་ཨེ་ཤེ་ཡའི་རྒྱལ་སྤྱིའི་དུས་སྟོན་ཆེན་མོ་ཚོགས་ཡོད་པ་དང་། དེའི་ནང་ཨེ་ཤེ་ཡའི་ཡུལ་གྲུ་འདྲ་མིན་གྱི་སྐུ་ཚབ་མཉམ་ཞུགས་བྱས་ཡོད་པ་ལྟར་ཨ་རིའི་རྒྱལ་སའི་མངའ་ཁུལ་གྱི་བོད་མི་ཚོ་ཡང་བོད་ཀྱི་སྐུ་ཚབ་བྱས་ནས་དུས་སྟོན་སྐབས་བོད་དང་འབྲེལ་བའི་བྱེད་སྒོ་འདྲ་མིན་སྤེལ་ཡོད་པ་རེད། ཐོག་མར་ཡུལ་གྲུ་སོ་སོའི་འཐུས་ཚབ་ཚོས་སོ་སོའི་མི་རིགས་དང་རྒྱལ་ཁབ་ཀྱི་ངོ་བོ་མཚོན་པའི་རུ་སྒྲིག་ཁྲོམ་སྐོར་བྱེད་སྐབས་ཡུལ་གྲུ་འདྲ་མིན་ནས་ཡིན་པའི་ལྟད་མོ་བ་ཚོས་བོད་མི་ཚོར་རྒྱབ་སྐྱོར་ཐལ་མོ་བརྡབ་པ་མ་ཟད་ཁག་གཅིག་བོད་རང་དབང་ཞེས་འབོད་སྒྲ་སྒྲོག་ནས་རྒྱབ་སྐྱོར་གྱོ་རྣམ་པ་མཚོན་ཐབས་བྱས་སོང་། བོད་མིའི་འཐུས་ཚབ་ཀྱི་འབྲེལ་ཡོད་མི་སྣ་བསྟན་འཛིན་ལྷུན་འགྲུབ་ནས་བརྗོད་དོན། ཨེ་ཤེ་ཡའི་དུས་སྟོན་ལ་བོད་མི་ཚོ་མཉམ་ཞུགས་བྱས་ནས་བོད་མི་རིགས་ཀྱི་ངོ་བོ་མཚོན་ཐབས་བྱས་བ་ཡིན། ཨ་རིའི་རྒྱལ་སར་འཛམ་གླིང་གི་ཡུལ་གྲུ་གང་སའི་མི་སྣ་འཛོམས་ཡོད་པས་མི་མང་པོས་དོ་སྣང་དང་རྒྱབ་སྐྱོར་བྱེད་ཀྱི་འདུག ད་ལོར་ང་ཚོ་དུས་སྟོན་འདིར་ཞུགས་ཐེངས་གཉིས་བ་ཡིན་ལ་ལོ་སྔོན་མར་ང་ཚོའི་རུ་སྒྲིག་ཁྲོམ་སྐོར་ལ་ཨང་གཉིས་བའི་གཟེངས་བསྟོད་ཐོབ་ཡོད་ཅེས་ངོ་སྤྲོད་བྱས་ཡོད། ཨེ་ཤེ་ཡའི་དུས་སྟོན་འདི་ནི་གཙོ་བོ་ཨ་མི་རི་ཀར་ཡོད་པའི་ཨེ་ཤེ་ཡའི་ཡུལ་གོམས་གཤིས་ལུགས་ཐེབས་རྩ་ཁང་ Asia Heritage Foundation ཞེས་བས་ལོ་ལྟར་གོ་སྒྲིག་བྱས་ནས་ད་ལོ་ཐེངས་དགུ་བ་དེ་ཡིན་པ་དང་། སྐབས་དེར་ཨེ་ཤེ་ཡའི་ཡུལ་གྲུ་ཁག་མང་ཆེ་བའི་འཐུས་ཚབ་མཉམ་ཞུགས་ཀྱིས་འཁྲབ་སྟོན་མི་སྣ་སྟོང་ཕྲག་བརྒལ་བ་འཛོམས་ཀྱི་ཡོད་འདུག
གསར་འགོད་པ་ཀླུ་འབུམ།