གནམ་བདེ་སྒོ་མོ་ཆེའི་ཐང་ཆེན་གྱི་ལས་འགུལ་དྲན་གསོ།

༄༅༎དེ་རིང་རེས་གཟའ་ཉི་མའི་ཉིན་དམངས་གཙོ་དོན་གཉེར་ཅན་དང་དམངས་གཙོར་རྒྱབ་སྐྱོར་གནང་མཁན་ཧོང་ཀོང་མི་དམངས་བརྒྱ་ཕྲག་གྱིས་གོམ་བགྲོད་བྱས་ཏེ། དེ་སྔ་ཕྱི་ལོ་༡༩༨༩ ལོའི་ཕྱི་ཟླ་དྲུག་པའི་ཚེས་༤ཉིན་རྒྱ་ནག་གཞུང་གིས་པེ་ཅིང་གནམ་བདེ་སྒོ་མོ་ཆེའི་ཐང་ཆེན་ཐོག་དམངས་གཙོའི་ལས་འགུལ་སྤེལ་མཁན་སློབ་ཕྲུག་དམར་གསོད་ཆེན་པོ་བཏང་སྟེ་མི་ལོ་༢༣ འཁོར་བའི་དྲན་གསོ་བྱས་ཡོད་པ་རེད།

དེ་ཡང་དམངས་གཙོ་དོན་གཉེར་ཅན་ཚོས་ཧོང་ཀོང་གི་ས་གནས་གཞུང་གི་ལས་ཁུངས་བར་ངོ་རྒོལ་གྱི་གོམ་བགྲོད་བྱས་ཡོད་པ་དང༌། སྐབས་དེར་ཕེ་རན་སི་གསར་འགོད་པས། ངོ་རྒོལ་ལས་འགུལ་ནང་མཉམ་ཞུགས་གནང་མཁན་ཁག་ཅིག་ལ་བཀའ་འདྲི་ཞུས་པའི་སྐབས། རྒྱ་ནག་གཞུང་གི་བཀའ་བཀོད་ལ་ཉན་འཇོག་བྱེད་པ་དང་བློ་ཁ་ལྟ་མཁན་གྱི་ཧོང་ཀོང་གི་འོས་བསྡུའི་ཚོགས་ཆུང་དེ་ཡིས་བསྐོ་བཞག་བྱས་པའི་ཧོང་ཀོང་ས་གནས་གཞུང་གི་འགོ་ཁྲིད་ལིཨུང་ཁྲུན་ཡིང་ཧོང་ཀོང་གི་སྤྱི་ཁྱབ་པ་དྲོ་ནལདྲ་ཙང་ཕྱི་ཟླ་གཉིས་པའི་ནང་ལས་བསྒྱུར་འགྲོ་མཁན་ཡིན་པ་ཁོང་གི་ཚབ་ཏུ་བསྐོ་བཞག་བྱ་རྒྱུའི་བློ་འཚབ་ཡོད་པའི་འགྲེལ་བརྗོད་བྱས་ཡོད་ཅིང༌། དེའི་ནང་ནས་མཐོ་རིམ་སློབ་གྲྭའི་སློབ་མ་ཞིག་གིས་། ང་ཚོ་ཧོང་ཀོང་གི་གནད་དོན་ཐོག་ལ་རྒྱ་ནག་གཞུང་གི་ཐེ་ཇུས་དང་བཀའ་བཀོད་བཏང་དགོས་དོན་མེད་ཅེས་དང༌། ཡང་ཧོང་ཀོང་གི་གྲོས་ཚོགས་ཀྱི་འཐུས་མི་ཞིག་གིས། ཇི་སྲིད་རྒྱ་ནག་ནང་དུ་ཆབ་སྲིད་ཚོགས་པ་ཞིག་གིས་དབང་བསྒྱུར་བྱེད་པའི་གཞུང་གནས་པ་དེ་སྲིད་དུ་ང་ཚོས་ངོ་རྒོལ་མུ་མཐུད་བྱེད་རྒྱུ་ཡིན་ཞེས་འགྲེལ་བརྗོད་བྱས་ཡོད་པ་རེད།།