སྨན་བཅོས་སྐབས་མེ་མདའ་རྒྱབ་ནས་གྲོངས་འདུག།

བོད་ནས་འབྱོར་བའི་གནས་ཚུལ་ལྟར་ན། བོད་དགའ་ལྡན་དགོན་པའི་དགེ་འདུན་པ་བསོད་ནམས་རྡོ་རྗེ་ལྷ་སར་སྨན་བཅོས་སུ་ཕེབས་དགོས་བྱུང་ཞིང་ཁོང་ལྷ་སར་འབྱོར་རྗེས། ཟླ་བ་འདིའི་ཚེས་༦ཉིན་རྒྱབ་ཆུ་ཚོད་བཞི་པ་ལྔ་པ་ཙམ་ལ་། ཁོང་ལྷ་སའི་བར་སྐོར་ཤར་ངོས་ཁྲེན་ཀོན་ཆུས་བུ་བཅོལ་ཁང་དང་པོའི་ཉེན་རྟོག་པའི་སྟབས་བདེའི་ས་ཚིགས་ཁུལ་དུ་ཡོད་སྐབས། གློ་བུར་དུ་ཁོང་གི་རྒྱབ་ནས་སྙིང་ཁར་མེ་མདའ་ཕོག་སྟེ། འཕྲལ་དུ་ལྷ་ས་གྲོང་ཁྱེར་གྱི་སྨན་ཁང་དུ་བསྐྱལ་ཡང་མྱུར་སྐྱོབ་མ་ཐུབ་པར་། འདས་གྲོངས་སུ་ཕེབས་ཡོད་པ་རེད་འདུག་ལ། ཁོང་ད་ལོ་དགུང་གྲངས་བཞི་བཅུར་ཕེབས་ཡོད་པ་རེད་འདུག

གནས་ཚུལ་ངོ་སྤྲོད་གནང་མཁན་དེས་གསུངས་ན། མེ་མདའ་ཆེད་མངགས་ཁོང་ལ་བརྒྱབ་པ་ཡིན་མིན་གནས་ཚུལ་གསལ་པོ་མེད་ན་ཡང་། སྐབས་དེ་དུས་ལྷ་ས་གྲོང་ཁྱེར་ཁྲེན་ཀོན་ཆུས་བུ་བཅོལ་ཁང་དང་པོའི་ཉེན་རྟོག་པའི་སྟབས་བདེའི་ས་ཚིགས་ཀྱི་ཉེན་རྟོག་པའི་མེ་མདའ་ཁ་ཤོར་ཡོད་པའི་གནས་ཚུལ་ཞིག་བཤད་ཀྱི་ཡོད་པ་རེད་འདུག  ཉེན་རྟོག་པའི་མེ་མདའི་འོག་ནས་འདས་གྲོངས་སུ་གྱུར་བའི་དགའ་ལྡན་དགོན་པའི་སྐུ་ཞབས་བསོད་ནམས་རྡོ་རྗེ་ལགས་ནི་། ལྷ་ས་གྲོང་ཁྱེར་ཁོངས་ཀྱི་མལ་གྲོ་གུང་དཀར་རྫོང་། གུང་དཀར་གྲོང་བརྡལ་གྱི་བང་ང་གྲོང་ཆོ་ནས་ཡིན་ཞིང་། ཁོང་གི་ཕ་ཡི་མཚན་ལ་བྱམས་པ་ཞུ་བ་དང་དགུང་གྲངས་༧༧ལ་ཕེབས་ཀྱི་ཡོད་པ་རེད་འདུག  ཡང་ཤེས་རྟོག་བྱུང་བའི་གནས་ཚུལ་ལ་གཞིགས་ན། བསོད་ནམས་རྡོ་རྗེ་ལགས་འདས་གྲོངས་སུ་ཕེབས་པའི་གནས་ཚུལ་ཐོན་རྗེས། གཞུང་ཕྱོགས་ནས་ཉེན་རྟོག་པའི་མེ་མདའ་ཁ་ཤོར་བའི་སྐོར་གླེང་མི་ཆོག་པ་བཟོས་ཤིང་། ལྷ་སའི་ནང་དེའི་སྐོར་གླེང་མི་ཆོག་པ་བརྗོད་འདུག་ལ། འབྲེལ་ཡོད་གནས་ཚུལ་བཤད་མཁན་རེ་བཟུང་འཛིན་བཟུང་ཡང་བྱས་ཡོད་པ་རེད་འདུག  གཞན་ཡང་བསོད་ནམས་རྡོ་རྗེ་ལགས་ཀྱི་ཕུང་པོ་དགའ་ལྡན་དགོན་པས་རྩིས་ལེན་བྱེད་པར་བསྐྱོད་སྐབས་། དགོན་པར་བརྩིས་སྤྲོད་མ་བྱས་པར་། ཆེས་༧ཉིན་། མལ་གྲོ་གུང་དཀར་ལ་ཡོད་པའི་ནང་མིར་བརྩིས་སྤྲོད་བྱས་ཡོད་པ་མ་ཟད་། ནང་མི་དང་ཕ་མ་གཉིས་ལ་འཚོ་རྟེན་གུན་གསབ་བྱས་ནས་། བསོད་ནམས་རྡོ་རྗེ་ལགས་ནད་གཞིས་རྐྱེན་པས་འདས་གྲོངས་སུ་ཕྱིན་ཡོད་པ་ལས་། མེ་མདའ་ཕོག་པའི་གནས་ཚུལ་ཕྱིར་བཤད་མི་ཆོག་པའི་བཙན་བཀའ་ཡང་བཏང་ཡོད་པ་རེད་འདུག