བོད་ནང་བོད་མི་ཚོས་ས་ག་ཟླ་བ་ཟབ་རྒྱས་ངང་སྲུང་བརྩི་གནང་བ།


2016.05.23
བོད་ནང་བོད་མི་ཚོས་ས་ག་ཟླ་བ་ཟབ་རྒྱས་ངང་སྲུང་བརྩི་གནང་བཞིན་པ། ༢༠༡༦།༥།༢༡ བོད་ནང་བོད་མི་ཚོས་ས་ག་ཟླ་བ་ཟབ་རྒྱས་ངང་སྲུང་བརྩི་གནང་བཞིན་པ། ༢༠༡༦།༥།༢༡
བོད་འབྱོར།

བོད་ཁྱོན་ཡོངས་སུ་བོད་མི་ཚོས་རྣམ་པ་འདྲ་མིན་ཐོག་བཞི་པ་ས་ག་ཟླ་བ་སྲུང་བརྩི་ཟབ་རྒྱས་ཞུས་གནང་བཞིན་ཡོད་པ་རེད།
དེ་ཡང་ལོ་རེ་བོད་ཟླ་བཞི་པར་ས་ག་ཟླ་བའམ་འབུམ་འགྱུར་ཟླ་བ་ཟེར་ཞིང་། ས་ག་ཟླ་བའི་ཚེས་༡༥་ཉིན་སྟོན་པ་ཤཀྱ་ཐུབ་པ་སྐུ་བལྟམས་པ་དང་། སངས་རྒྱས་པ། སྐུ་མྱ་ངན་ལས་འདས་པ་བཅས་ཀྱི་དུས་ཆེན་གསུམ་འཛོམས་ཁྱད་པར་ཅན་ཞིག་ལ་བརྟེན་ནས། ས་ག་ཟླ་བའི་རིང་བོད་ནང་དུ་ཡོད་པའི་བོད་མི་ཚོས་ལྷ་ལྡན་ཇོ་བོ་ཤཀྱ་རྣམ་གཉིས་གཙོ་བོར་གྱུར་བའི་རྩེ་ཤོད་ཀྱི་རྟེན་གཙོ་ཁག་དང་། གདན་ས་ཆེན་པོ་རྣམ་གསུམ། དེ་བཞིན་ལྷ་སའི་ཉེ་འཁོར་བསམ་ཡས་དགོན་པ་ལ་སོགས་པའི་བོད་ཁྱོན་ཡོངས་ཀྱི་རྟེན་མཆོག་རྣམས་ལ་བོད་མི་གཙོ་བོར་གྱུར་བའི་དད་ལྡན་པ་ཚོས་སྙན་དར་དང་། མཆོད་འབུལ། སྨྱུང་གནས་སྲུང་བ། སློང་མོར་སྦྱིན་པ་བཏང་བ། དམར་ཟས་སྤང་ནས་དཀར་ཟས་ལ་རོལ་བ་སོགས་བཞི་པ་ས་ག་ཟླ་བའི་དུས་ཚིགས་ཆོས་ཕྱོགས་ཀྱི་བྱེད་སྒོ་ཇེ་མང་སྤེལ་གནང་བཞིན་ཡོད་པ་རེད།
ཡང་ཕྱི་ཚེས་༢༡་འམ་བོད་ཟླ་བཞི་པའི་ཚེས་༡༥་ཉིན་བོད་ནང་གི་བོད་མི་མང་པོ་ཞིག་ལྷོ་ཁ་བསམ་ཡས་དགོན་པར་གནས་མཇལ་དུ་འབྱོར་གནང་ཡོད་པ་དང་། དེར་འབྱོར་བའི་བོད་མི་ཚོས་ལྷོ་ཁའི་གནས་ཆེན་ཁག་སྐོར་གནང་བ་དང་སྦྲགས་མར་མེའི་མཆོད་མེ་འབུལ་བ་དང་།    བསང་གསོལ་གནང་བ་སོགས་ཆོས་ཕྱོགས་ཀྱི་བྱེད་སྒོ་མང་པོའི་ནང་ཚ་ཚ་འུར་འུར་གྱིས་མཉམ་ཞུགས་གནང་ཡོད་པ་རེད། དེ་ག་ནང་བཞིན་ཡང་བོད་མདོ་སྟོད་དང་། མདོ་སྨད་བཅས་པའི་ས་ཁུལ་ནང་དུའང་བཞི་པ་ས་ག་ཟླ་བའི་ནང་དཀོན་མཆོག་ལ་མཆོད་འབུལ་དང་། སྤྲང་པོར་སྦྱིན་པ་བཏང་བ། དམར་ཟས་སྤང་ནས་དཀར་ཟས་ལ་རོལ་བ་སོགས་པའི་ཆོས་ཕྱོགས་ཀྱི་བྱེད་སྒོའི་སྣ་མང་སྤེལ་གནང་བཞིན་ཡོད་པ་མ་ཟད། མདོ་སྨད་བླ་བྲང་དགོན་པར་ལོ་ལྟར་ས་ག་ཟླ་བའི་ཚེས་བཅོ་ལྔ་ཉིན་དགོན་པའི་མཐའ་འཁོར་དུ་སྤྲང་པོ་བརྒྱ་ཕྲག་མང་པོ་འཛོམས་ཀྱི་ཡོད་པ་རྣམས་ལ་བོད་མི་གཙོ་བོར་གྱུར་བའི་དད་ལྡན་པ་ཚོས་སྤྲང་པོར་སྦྱིན་པ་བཏང་བ་དང་། སེམས་ཅན་སྲོག་བླུ་གནང་བ་སོགས་ཆོས་ཕྱོགས་ཀྱི་ལས་འགུལ་སྣ་ཚོགས་སྤེལ་གནང་བཞིན་ཡོད་པ་རེད།
ད་ལོར་ཟླ་ལྷག་གི་རྐྱེན་པས་བོད་ཟླ་བཞི་བའམ་ས་ག་ཟླ་བ་གཉིས་ཡོད་པ་རེད།    

གསར་འགོད་པ་དབྱངས་སྒྲོལ།  

བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
དབོན་སྟོད་དགོན་པའི་ཕྱག་མཛོད་བགྲེས་པ་དང་གྲོང་ཚོའི་ལས་བྱེད་པ་གཉིས་ཀྱི་གྱོད་དོན་གཞུང་ཕྱོགས་གྱོད་ཞིབ་པར་རྩིས་སྤྲད་ཟིན་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎