ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﯞﺍﺗﻘﺎﻧﻠﯩﻘﻰ ﻫﻪﻗﻘﯩﺪﻩ‏

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﮔﯧﺮﻣﺎﻧﯩﻴﯩﻨﯩﯔ ﺑﯧﺮﻟﯩﻨﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ، 2007 -ﻳﯩﻠﻰ 14 - ﺋﯚﻛﺘﻪﺑﯩﺮﺩﯨﻦ ﺗﺎﺭﺗﯩﭗ 2008 - ﻳﯩﻠﻰ 14 - ﻳﺎﻧﯟﺍﺭﻏﯩﭽﻪ ﺩﺍﯞﺍﻣﻠﯩﺸﯩﺪﯨﻐﺎﻥ، "ﻳﯩﭙﻪﻙ ﻳﻮﻟﯩﻨﯩﯔ ﺋﻪﺳﻠﻰ ﻗﯩﻴﺎﭘﯩﺘﻰ" ﻧﺎﻣﻠﯩﻖ ﻛﯚﺭﮔﻪﺯﻣﯩﺪﻩ ﻛﯚﺭﺳﯩﺘﯩﻠﯩﯟﺍﺗﻘﺎﻥ، ﺋﯘﻳﻐﯘﺭ ﺋﯧﻠﯩﻨﺪﯨﻦ ﺗﻪﭘﯩﻠﻐﺎﻥ، 4000 ﻳﯩﻠﻠﯩﻖ ﺗﺎﺭﯨﺨﻘﺎ ﺋﯩﮕﻪ، ﺧﯘﺭﯗﻡ ﺋﯚﺗﯘﻙ. AFP Photo

ﺧﯩﺘﺎﻱ ﺧﻪﻟﻖ ﮔﯧﺰﯨﺘﻰ ﻣﯘﺧﺒﯩﺮﻯ ﻛﺮﻭﺭﺍﻥ ﻫﻪﻗﻘﯩﺪﻩ ﺋﯧﻼﻥ ﻗﯩﻠﻐﺎﻥ ﺯﯨﻴﺎﺭﻩﺕ ﺧﺎﺗﯩﺮﯨﺴﯩﺪﻩ، ﻛﺮﻭﺭﺍﻥ ﻗﻪﺩﯨﻤﯩﻲ ﻳﺎﺩﯨﻜﺎﺭﻟﯩﻖ ﺋﻮﺭﻧﯩﻐﺎ ﺳﺎﻳﺎﻫﻪﺗﭽﯩﻠﻪﺭﻧﯩﯔ ﻗﺎﻻﻳﻤﯩﻘﺎﻥ ﻛﯩﺮﯨﭗ ‏- ﭼﯩﻘﯩﯟﺍﺗﻘﺎﻧﻠﯩﻘﯩﻨﻰ، ﺋﯘﻻﺭﻧﯩﯔ ﻫﻪﺗﺘﺎ ﺑﯘ ﻗﻪﺩﯨﻤﯩﻲ ﺷﻪﻫﻪﺭﮔﻪ ﺋﻪﺧﻠﻪﺗﻠﻪﺭﻧﻰ ﺗﺎﺷﻼﭖ، ﺗﻪﺭﻩﺕ ﻗﯩﻠﯩﭗ، ﺋﺎﺳﺎﺭﻩ ‏- ﺋﻪﺗﯩﻘﻪ ﺋﻮﺭﻧﯩﻨﻰ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﯨﺘﯩﯟﺍﺗﻘﺎﻧﻠﯩﻘﯩﻨﻰ ﺋﯩﺴﭙﺎﺗﻠﯩﻖ ﺳﯜﺭﻩﺗﻠﻪﺭ ﺑﯩﻠﻪﻥ ﻛﯚﺭﺳﻪﺗﻜﻪﻥ ﻫﻪﻣﺪﻩ ﺑﯘﻧﯩﯖﺪﺍ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﻰ ﺑﺎﺷﻘﯘﺭﯗﺵ ﻫﻪﻡ ﻗﻮﻏﺪﺍﺷﻘﺎ ﻣﻪﺳﺌﯘﻝ ﺑﻮﻟﻐﺎﻥ ﭼﺎﻗﯩﻠﯩﻖ ﻧﺎﻫﯩﻴﯩﻠﯩﻚ ﻣﻪﺩﻩﻧﯩﻴﻪﺕ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻰ ﻣﯩﯔ ﺧﻪﻧﮕﺎﯞﻧﯩﯔ ﭼﻪﺕ ﺋﻪﻟﻠﯩﻚ ﺯﯨﻴﺎﺭﻩﺗﭽﯩﻠﻪﺭﺩﯨﻦ ﺋﻮﻥ ﻣﯩﯔ ﻳﯜﻩﻥ ﺋﯧﻠﯩﭙﻼ ﺋﯘﻻﺭﻧﯩﯔ ﻗﻪﺩﯨﻤﯩﻲ ﺷﻪﻫﻪﺭ ﺋﯩﭽﯩﺪﻩ ﺧﺎﻟﯩﻐﺎﻧﭽﻪ ﺯﯨﻴﺎﺭﻩﺕ ﻗﯩﻠﯩﺸﯩﻐﺎ ﻳﻮﻝ ﻗﻮﻳﯘﯞﺍﺗﻘﺎﻧﻠﯩﻘﯩﻨﻰ ﻳﺎﺯﻏﺎﻥ.

ﺑﯩﺰ ﺑﯘ ﻣﻪﻟﯘﻣﺎﺗﻼﺭﻏﺎ ﺋﺎﺳﺎﺳﻪﻥ ﻣﯩﯔ ﺧﻪﻧﮕﺎﯞﻧﻰ ﺯﯨﻴﺎﺭﻩﺕ ﻗﯩﻠﻐﯩﻨﯩﻤﯩﺰﺩﺍ، ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﯞﺍﺗﻘﺎﻧﻠﯩﻘﯩﻨﻰ ﺋﯩﻨﻜﺎﺭ ﻗﯩﻠﻐﺎﻧﺪﯨﻦ ﺑﺎﺷﻘﺎ، ﺧﯩﺘﺎﻱ ﺧﻪﻟﻖ ﮔﯧﺰﯨﺘﯩﺪﻩ ﻣﯘﺧﺒﯩﺮﻧﯩﯔ ﺋﯜﭺ ﺋﯧﻠﯩﺶ ﻣﻪﻗﺴﯩﺘﯩﺪﻩ ﺷﯘﻧﺪﺍﻕ ﺑﯩﺮ ﺗﻮﻗﯘﻟﻤﺎ ﺧﻪﯞﻩﺭﻧﻰ ﺋﯧﻼﻥ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﺑﯘﻧﯩﯔ ﺑﯩﻠﻪﻥ ﻛﺮﻭﺭﺍﻥ ﺷﻪﻫﯩﺮﯨﻨﯩﯔ ﺗﻪﺭﺗﯩﭙﻠﯩﻚ ﺑﺎﺷﻘﯘﺭﯗﻟﻤﺎﻳﯟﺍﺗﻘﺎﻧﻠﯩﻘﻰ ﻫﻪﻡ ﻣﯘﯞﺍﭘﯩﻖ ﻗﻮﻏﺪﺍﻟﻤﺎﻳﯟﺍﺗﻘﺎﻧﻠﯩﻘﻰ ﺳﻪﯞﻩﺑﻠﯩﻚ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﯞﺍﺗﻘﺎﻧﻠﯩﻘﯩﺪﻩﻙ ﻣﻪﺳﯩﻠﻪ ﻳﻪﻧﯩﻤﯘ ﺑﯩﺮ ﻣﯘﺭﻩﻛﻜﻪﭖ ﺑﺎﺳﻘﯘﭼﻘﺎ ﻛﯚﺗﯜﺭﯛﻟﺪﻯ.

" ﻛﯩﺮﻭﺭﺍﻧﻨﻰ ﻛﯩﻢ ﻳﯩﻐﻠﯩﺘﯩﯟﺍﺗﯩﺪﯗ"

ﻧﯚﯞﻩﺗﺘﻪ ﺧﯩﺘﺎﻱ ﺧﻪﻟﻖ ﮔﯧﺰﯨﺘﯩﺪﻩ ﻣﯘﺧﺒﯩﺮ ﺟﺎﯞ ﻳﺎﺧﯘﻱ ﺋﯧﻼﻥ ﻗﯩﻠﻐﺎﻥ " ﻛﯩﺮﻭﺭﺍﻧﻨﻰ ﻛﯩﻢ ﻳﯩﻐﻠﯩﺘﯩﯟﺍﺗﯩﺪﯗ" ﻧﺎﻣﻠﯩﻖ ﻣﺎﻗﺎﻟﻪ ﺧﯩﺘﺎﻳﺪﯨﻜﻰ ﻧﻪﭼﭽﻪ ﻳﯜﺯﻟﯩﮕﻪﻥ ﺋﺎﺳﺎﺳﻠﯩﻖ ﻣﯘﻧﺎﺯﯨﺮﻩ ﺗﻮﺭ ﺑﻪﺗﻠﯩﺮﯨﮕﻪ ﻗﻮﻳﯩﻠﯩﭗ ﺑﯘ ﻫﻪﻗﺘﻪ ﺋﯧﻼﻥ ﻗﯩﻠﯩﻨﻐﺎﻥ ﻣﺎﻗﺎﻟﯩﻠﻪﺭ ﻧﻪﭼﭽﻪ ﻣﯩﯔ ﭘﺎﺭﭼﯩﻐﺎ ﻳﻪﺗﺘﻰ.

ﺑﯩﺰ، ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﯞﺍﺗﻘﺎﻧﻠﯩﻘﻰ ﻫﻪﻗﻘﯩﺪﯨﻜﻰ ﺋﺎﺧﺒﺎﺭﺍﺗﯩﻨﯩﯔ، ﭼﺎﻗﯩﻠﯩﻖ ﻧﺎﻫﯩﻴﯩﻠﯩﻚ ﻣﻪﺩﻩﻧﯩﻴﻪﺕ ﺋﯩﺪﺍﺭﯨﺴﻰ ﺑﺎﺷﻠﯩﻘﻰ ﻣﯩﯔ ﺧﻪﻧﮕﺎﯞ ﺗﻪﺭﯨﭙﯩﺪﯨﻦ ﭘﯜﺗﯜﻧﻠﻪﻱ ﺋﯩﻨﻜﺎﺭ ﻗﯩﻠﯩﻨﻐﺎﻧﻠﯩﻘﻰ ﺗﻮﻏﺮﯨﺴﯩﺪﺍ ﺧﯩﺘﺎﻱ ﺧﻪﻟﻖ ﮔﯧﺰﯨﺘﻰ ﻣﯘﺧﺒﯩﺮﻯ ﺟﺎﯞ ﻳﺎﺧﯘﻳﻨﻰ ﺯﯨﻴﺎﺭﻩﺕ ﻗﯩﻠﯩﺸﻘﺎ ﺗﯩﺮﯨﺸﻘﺎﻥ ﺑﻮﻟﺴﺎﻗﻤﯘ، ﻫﺎﺯﯨﺮﭼﻪ ﺋﺎﻻﻗﻪ ﺋﻮﺭﻧﯩﺘﺎﻟﻤﯩﺪﯗﻕ. ﺋﻪﻣﻤﺎ ﺧﯩﺘﺎﻱ ﺧﻪﻟﻖ ﮔﯧﺰﯨﺘﻰ ﺗﻪﻫﺮﯨﺮ ﺑﯚﻟﯜﻣﻰ ﺋﺎﺭﻗﯩﻠﯩﻖ، ﺟﺎﯞ ﻳﺎﺧﯘﻳﻨﯩﯔ ﻣﻪﺯﻛﯘﺭ ﮔﯧﺰﯨﺘﻨﯩﯔ ﺋﻪﯓ ﺋﯩﻘﺘﯩﺪﺍﺭﻟﯩﻖ ﻳﺎﺵ ﻣﯘﺧﺒﯩﺮﯨﻨﯩﯔ ﺑﯩﺮﻯ ﺋﯩﻜﻪﻧﻠﯩﻜﻰ، ﺋﯘﻧﯩﯔ ﻫﻪﺗﺘﺎ 2007 - ﻳﯩﻠﻰ ﺧﯩﺘﺎﻱ ﺑﯘﻳﯩﭽﻪ 10 ﻣﯘﻧﻪﯞﯞﻩﺭ ﻳﺎﺷﻨﯩﯔ ﺑﯩﺮﻯ ﺑﻮﻟﯘﭖ ﺑﺎﻫﺎﻻﻧﻐﺎﻧﻠﯩﻘﻰ ﻫﻪﻣﺪﻩ ﻣﻪﻣﻠﯩﻜﻪﺗﻠﯩﻚ ﻣﯘﻧﻪﯞﯞﻩﺭ ﺋﺎﺧﺒﺎﺭﺍﺗﭽﻰ ﻧﺎﻣﯩﻐﺎ ﺋﯧﺮﯨﺸﻜﻪﻧﻠﯩﻜﯩﻨﻰ ﺑﯩﻠﺪﯗﻕ. ﺋﯘ ﻳﻪﻧﻪ ﻣﻪﺯﻛﯘﺭ ﮔﯧﺰﯨﺘﻨﯩﯔ ﻣﺎﺋﺎﺭﯨﭗ ﭘﻪﻥ -ﻣﻪﺩﻩﻧﯩﻴﻪﺕ ﺋﯘﭼﯘﺭ ﺑﯚﻟﯜﻣﯩﻨﯩﯔ ﺑﺎﺵ ﺗﻪﻫﺮﯨﺮﻯ ﺋﯩﻜﻪﻥ.

ﮔﻪﺭﭼﻪ ﺑﯩﺰ ﻣﯧﯔ ﺧﻪﻧﮕﺎﯞ ﺗﻪﺭﯨﭙﯩﺪﯨﻦ ﻳﺎﻟﻐﺎﻧﭽﯩﻐﺎ ﭼﯩﻘﯩﺮﯨﻠﻐﺎﻥ ﺑﯘ ﺩﺍﯕﻠﯩﻖ ﺧﯩﺘﺎﻱ ﻣﯘﺧﺒﯩﺮ ﺟﺎﯞ ﻳﺎﺧﯘﻱ ﺑﯩﻠﻪﻥ ﺑﯩﯟﺍﺳﺘﻪ ﺋﺎﻻﻗﻪ ﺋﻮﺭﻧﯩﺘﺎﻟﻤﯩﻐﺎﻥ ﺑﻮﻟﺴﺎﻗﻤﯘ، ﺋﯘﻧﯩﯔ ﺷﻪﺧﺴﻰ ﺗﻮﺭ ﺑﯧﺘﯩﻨﻰ ﺯﯨﻴﺎﺭﻩﺕ ﻗﯩﻠﺪﯗﻕ.

" ﻛﯩﻤﻨﯩﯔ ﻛﯩﺮﯨﺶ ‏- ﻛﯩﺮﻣﻪﺳﻠﯩﻜﯩﻨﻰ ﻣﯩﯔ ﺟﯜﻳﺠﺎﯓ ﺑﻪﻟﮕﯩﻠﻪﻳﺪﯗ "

ﮔﯧﺮﻣﺎﻧﯩﻴﯩﻨﯩﯔ ﺑﯧﺮﻟﯩﻨﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ، 2007 -ﻳﯩﻠﻰ 14 - ﺋﯚﻛﺘﻪﺑﯩﺮﺩﯨﻦ ﺗﺎﺭﺗﯩﭗ 2008 - ﻳﯩﻠﻰ 14 - ﻳﺎﻧﯟﺍﺭﻏﯩﭽﻪ ﺩﺍﯞﺍﻣﻠﯩﺸﯩﺪﯨﻐﺎﻥ، "ﻳﯩﭙﻪﻙ ﻳﻮﻟﯩﻨﯩﯔ ﺋﻪﺳﻠﻰ ﻗﯩﻴﺎﭘﯩﺘﻰ" ﻧﺎﻣﻠﯩﻖ ﻛﯚﺭﮔﻪﺯﻣﯩﺪﻩ ﻛﯚﺭﺳﯩﺘﯩﻠﯩﯟﺍﺗﻘﺎﻥ، ﺋﯘﻳﻐﯘﺭ ﺋﯧﻠﯩﻨﺪﯨﻦ ﺗﻪﭘﯩﻠﻐﺎﻥ، 4000 ﻳﯩﻠﻠﯩﻖ ﺗﺎﺭﯨﺨﻘﺎ ﺋﯩﮕﻪ، ﺋﺎﺩﻩﻡ ﺋﻪﯞﺭﯨﺸﻜﯩﺴﻰ (ﻣﺎﻣﯩﺴﻰ) . AFP Photo

ﺋﯩﻨﺘﯧﺮﻧﯧﺘﺘﯩﻦ ﺟﺎﯞ ﻳﺎﺧﯘﻱ ﺑﯩﻠﻮﮔﻰ (ﺷﻪﺧﺴﻰ ﻣﯘﻻﻫﯩﺰﻩ) ﺗﻮﺭ ﺑﯧﺘﻰ ﺋﯧﭽﯩﻠﯩﺸﻰ ﺑﯩﻠﻪﻧﻼ ﺋﻪﯓ ﻛﯚﭖ ﻣﯘﻻﻫﯩﺰﻩ ﻗﺎﺗﻨﺎﺷﺘﯘﺭﯗﻟﻐﺎﻥ ﺗﯧﻤﯩﻼﺭ ﻗﺎﺗﺎﺭﯨﺪﺍ "ﻛﯩﺮﻭﺭﺍﻧﻨﻰ ﻛﯩﻢ ﻳﯩﻐﻠﯩﺘﯩﯟﺍﺗﯩﺪﯗ" ﺩﯦﮕﻪﻥ ﺗﯧﻤﺎ ﺋﺎﻻﻫﯩﺪﻩ ﻛﯚﺯﮔﻪ ﭼﯧﻠﯩﻘﯩﺪﯗ.

ﺟﺎﯞ ﻳﺎﺧﯘﻱ ﻣﻪﺯﻛﯘﺭ ﺯﯨﻴﺎﺭﻩﺕ ﺧﺎﺗﯩﺮﯨﺴﻰ ﻫﻪﻗﻘﯩﺪﻩ ﺑﯘ ﺷﻪﺧﺴﻰ ﻣﯘﻻﻫﯩﺰﻩ ﺗﻮﺭ ﺑﯧﺘﯩﺪﻩ ﻳﻪﻧﻪ ﻗﺎﻳﺘﺎ ﺗﻪﭘﺴﯩﻠﯩﻲ ﻣﺎﻗﺎﻟﻪ ﺋﯧﻼﻥ ﻗﯩﻠﻐﺎﻥ ﺑﻮﻟﯘﭖ ﺋﯘ ﻣﺎﻗﺎﻟﯩﺴﯩﻨﻰ ﻣﯘﻧﺪﺍﻕ ﺑﺎﺷﻠﯩﻐﺎﻥ: "ﻣﻪﻥ -12ﺋﺎﻳﻨﯩﯔ -4 ﻛﯜﻧﻰ ﺧﻪﻟﻖ ﻛﯜﻧﺪﯨﻠﯩﻚ ﮔﯧﺰﯨﺘﯩﺪﻩ " ﻛﯩﺮﻭﺭﺍﻧﻨﻰ ﻛﯩﻢ ﻳﯩﻐﻠﯩﺘﯩﯟﺍﺗﯩﺪﯗ" ﻧﺎﻣﻠﯩﻖ ﺯﯨﻴﺎﺭﻩﺕ ﺧﺎﺗﯩﺮﻩﻣﻨﻰ ﺋﯧﻼﻥ ﻗﯩﻠﻐﺎﻧﺪﯨﻦ ﺑﯘﻳﺎﻥ ﺑﯘ ﻣﺎﻗﺎﻟﻪ ﺑﯩﺮ ﻧﻪﭼﭽﻪ ﻳﯜﺯ ﺗﻮﺭ ﺑﻪﺗﺘﻪ "ﭼﻪﺕ ﺋﻪﻟﻠﯩﻚ ﺳﺎﻳﺎﻫﻪﺗﭽﯩﻠﻪﺭ ﻛﯩﺮﻭﺭﺍﻧﻨﻰ ﯞﻩﻳﺮﺍﻥ ﻗﯩﻠﻤﺎﻗﺘﺎ"، " ﺑﯩﺰﻧﯩﯔ ﻏﯘﺭﯗﺭﯨﻤﯩﺰ 10 ﻣﯩﯔ ﻳﯜﻩﻧﮕﻪ ﻳﺎﺭﺍﻣﺪﯗ"، " ﻛﺮﻭﺭﺍﻥ ﻣﯘﺷﯘﻧﺪﺍﻕ ﻗﻮﻏﺪﯨﻠﯩﺸﻰ ﻛﯧﺮﻩﻛﻤﯘ"،" ﻛﺮﻭﺭﺍﻥ ﻳﻪﺭ ﺷﺎﺭﯨﺪﯨﻦ ﻣﻪﯕﮕﯜﻟﯜﻙ ﻳﻮﻗﯩﺘﯩﻠﻤﺎﻗﭽﻰ" ﺩﯦﮕﻪﻧﺪﻩﻙ ﺗﯧﻤﯩﻼﺭﺩﺍ ﻗﯩﺰﻏﯩﻦ ﻣﯘﻻﻫﯩﺰﯨﻠﻪﺭﻧﯩﯔ ﻣﻪﻳﺪﺍﻧﻐﺎ ﭼﯩﻘﯩﺸﯩﻐﺎ ﺳﻪﯞﻩﺑﭽﻰ ﺑﻮﭘﺘﯘ، ﺑﯘ ﻫﻪﻗﺘﻪ ﻳﯧﺰﯨﻠﻐﺎﻥ ﺋﯩﻨﻜﺎﺱ ﻫﻪﻡ ﻣﯘﻻﻫﯩﺰﯨﻠﻪﺭ ﻧﻪﭼﭽﻪ ﻣﯩﯔ ﭘﺎﺭﭼﯩﻐﺎ ﺑﺎﺭﯨﺪﯨﻜﻪﻥ. ﺗﻮﺭﺩﺍﺷﻼﺭ ﻫﻪﻡ ﭘﯩﻜﯩﺮﺩﺍﺷﻼﺭ ﻣﯧﻨﯩﯔ ﻛﯩﺮﻭﺭﺍﻧﺪﺍ ﻛﯚﺭﮔﻪﻧﻠﯩﺮﯨﻢ، ﺋﺎﯕﻠﯩﻐﺎﻧﻠﯩﺮﯨﻢ ﻫﻪﻣﺪﻩ ﺧﺎﺗﯩﺮﻟﯩﮕﻪﻧﻠﯩﺮﯨﻢ ﻫﻪﻗﻘﯩﺪﻩ ﻳﻪﻧﯩﻤﯘ ﺗﻪﭘﺴﯩﻠﯩﻲ ﻣﻪﻟﯘﻣﺎﺗﻼﺭﻏﺎ ﺋﯧﺮﯨﺸﯩﺸﻨﻰ ﺧﺎﻻﻳﺪﯨﻜﻪﻥ. ﺷﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﻣﻪﻥ ﻛﯩﺮﻭﺭﺍﻧﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﺷﺘﯩﻜﻰ ﻫﻪﻗﯩﻘﯩﻲ ﺳﻪﯞﻩﺏ ﻫﻪﻡ ﺭﯦﺌﺎﻝ ﺋﻪﻫﯟﺍﻟﻼﺭﻧﻰ ﻳﻪﻧﯩﻤﯘ ﺗﻪﭘﺴﯩﻠﯩﻲ ﺑﺎﻳﺎﻥ ﻗﯩﻠﯩﺸﻨﻰ ﻣﯘﯞﺍﭘﯩﻖ ﻛﯚﺭﺩﯛﻡ، ﺳﯩﻠﻪﺭﻧﯩﯔ ﻣﯧﻨﯩﯔ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﺪﯨﻜﻰ ﻧﻪﻕ ﻣﻪﻳﺪﺍﻥ ﺧﺎﺗﯩﺮﻩﻡ ﺋﺎﺭﻗﯩﻠﯩﻖ ﺗﯧﺨﯩﻤﯘ ﺋﯧﻨﯩﻘﺮﺍﻕ ﺧﯘﻻﺳﯩﮕﻪ ﻛﯧﻠﯩﺪﯨﻐﺎﻧﻠﯩﻘﯩﯖﻼﺭﻏﺎ ﺋﯩﺸﯩﻨﯩﻤﻪﻥ."

ﻣﯘﺧﺒﯩﺮ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﺪﻩ ﺋﯧﻠﯩﭗ ﺑﺎﺭﻏﺎﻥ ﺑﯩﺮ ﻗﺎﻧﭽﻪ ﻛﯜﻧﻠﯜﻙ ﺯﯨﻴﺎﺭﻩﺕ ﺧﺎﺗﯩﺮﯨﺴﻰ ﻫﻪﻣﺪﻩ ﺷﯘ ﺟﺎﻳﺪﺍ ﺗﺎﺭﺗﻘﺎﻥ ﺳﯜﺭﻩﺗﻠﻪﺭﻧﻰ ﺑﯘ ﻣﯘﻻﻫﯩﺰﻩ ﺗﻮﺭﯨﻐﺎ ﺗﻪﭘﺴﯩﻠﯩﻲ ﻗﻮﻳﻐﺎﻥ ﺑﻮﻟﯘﭖ، ﺑﯘ ﻫﻪﻗﺘﻪ ﻗﯩﺴﻘﯩﭽﻪ ﺗﻮﻧﯘﺷﺘﯘﺭﯗﺵ ﺑﯧﺮﯨﭗ ﺋﯚﺗﻤﻪﻛﭽﯩﻤﻪﻥ.

-22 ﺳﯧﻨﺘﻪﺑﯩﺮ ﻛﯜﻧﻰ، ﺧﻪﻟﻖ ﻛﯜﻧﺪﯨﻠﯩﻚ ﮔﯧﺰﯨﺘﻰ ﻣﯘﺧﺒﯩﺮﻯ ﺟﺎﯞ ﻳﺎﺧﯘﻱ ﻟﻮﭘﻨﯘﺭﻧﻰ ﻛﯧﺴﯩﭗ ﺋﯚﺗﯜﺵ ﺗﻪﺗﻘﯩﻘﺎﺕ ﮔﯘﺭﯗﭘﭙﯩﺴﻰ ﺑﯩﻠﻪﻥ ﻟﻮﭘﻨﯘﺭﻧﯩﯔ ﻣﻪﺭﻛﯩﺰﻯ ﺭﺍﻳﻮﻧﯩﻐﺎ ﻛﻪﻟﮕﻪﻧﺪﻩ، ﺗﺎﺳﺎﺩﯨﭙﯩﻲ ﻫﺎﻟﺪﺍ ﺷﻪﺭﻕ ﻧﯧﻔﯩﺖ ﻗﯧﺪﯨﺮﯨﺶ ﺩﻩﭖ ﺑﻪﻟﮕﻪ ﻗﻮﻳﯘﻟﻐﺎﻥ ﺗﯚﺕ ﺋﺎﭘﺘﻮﻣﻮﺑﯩﻠﻨﯩﯔ ﻗﻪﺩﯨﻤﯩﻲ ﺷﻪﻫﻪﺭﮔﻪ ﻗﺎﺭﺍﭖ ﻛﯩﺮﯨﭗ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ ﻛﯚﺭﮔﻪﻥ. ﺋﯘﻻﺭ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﻰ ﻗﻮﻏﺪﺍﺵ ﭘﻮﻧﻜﯩﺘﯩﮕﻪ ﻛﻪﻟﮕﻪﻧﺪﻩ ﺑﯘ ﺗﯚﺕ ﺋﺎﭘﺘﻮﻣﻮﺑﯩﻠﻐﺎ ﺗﻮﺳﺎﻟﻐﯘﺳﯩﺰ ﻗﻪﺩﯨﻤﯩﻲ ﺷﻪﻫﻪﺭ ﺧﺎﺭﺍﺑﯩﺴﻰ ﺋﯩﭽﯩﮕﻪ ﻛﯩﺮﯨﺸﻜﻪ ﻳﻮﻝ ﺑﯧﺮﯨﻠﮕﻪﻥ.

ﻣﯘﺧﺒﯩﺮ ﭘﯘﻧﻜﯩﺘﯩﺪﯨﻜﻰ ﺧﯩﺰﻣﻪﺗﭽﯩﻠﻪﺭﺩﯨﻦ ﻧﯧﻤﻪ ﺋﯜﭼﯜﻥ ﺑﯘ ﻣﺎﺷﯩﻨﯩﻼﺭﻧﯩﯔ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﮕﻪ ﻛﯩﺮﯨﺸﯩﮕﻪ ﺭﯗﺧﺴﻪﺕ ﺑﻪﺭﮔﻪﻧﻠﯩﻜﯩﻨﻰ ﺳﻮﺭﯨﻐﺎﻧﺪﺍ، ﺋﯘﻻﺭ " ﻣﯩﯔ ﺟﯜﻳﺠﺎﯓ ﺗﯧﻠﯧﻔﻮﻧﺪﺍ ﺭﯗﺧﺴﻪﺕ ﺑﻪﺭﺩﻯ، ﻛﯩﻤﻨﯩﯔ ﻛﯩﺮﯨﺶ ‏- ﻛﯩﺮﻣﻪﺳﻠﯩﻜﯩﻨﻰ ﻣﯩﯔ ﺟﯜﻳﺠﺎﯓ ﺑﻪﻟﮕﯩﻠﻪﻳﺪﯗ" ﺩﯦﮕﻪﻥ.

ﻧﯧﻔﯩﺖ ﻗﯧﺪﯨﺮﯨﺶ ﺧﺎﺩﯨﻤﻠﯩﺮﻯ ﻗﻪﺩﯨﻤﯩﻲ ﺷﻪﻫﻪﺭﺩﻩ ﻧﯧﻤﻪ ﻗﯩﻠﯩﺪﯗ ﺩﻩﭖ ﮔﯘﻣﺎﻥ ﺑﯩﻠﻪﻥ ﺋﻪﮔﻪﺷﻜﻪﻥ ﻣﯘﺧﺒﯩﺮ، ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﻪﺭ ﺧﺎﺭﺍﺑﯩﺴﯩﻐﺎ ﻛﻪﻟﮕﻪﻧﺪﻩ، 12 ﻧﻪﭘﻪﺭ ﻳﺎﭘﻮﻧﻠﯘﻕ ﺳﺎﻳﺎﻫﻪﺗﭽﯩﻨﯩﯔ ﺑﯩﺮ ﻧﻪﭼﭽﻪ ﺧﯩﺘﺎﻱ ﻳﻮﻝ ﺑﺎﺷﻠﯩﻐﯘﭼﻰ ﺑﯩﻠﻪﻥ ﻛﺮﻭﺭﺍﻥ ﻗﻪﺩﯨﻤﯩﻲ ﻳﺎﺩﯨﻜﺎﺭﻟﯩﻖ ﺋﻮﺭﻧﯩﺪﺍ ﺧﺎﻟﯩﻐﺎﻧﭽﻪ ﺩﻩﺳﺴﻪﭖ ‏- ﭼﻪﻳﻠﻪﭖ ﻳﯜﺭﮔﯩﻨﯩﻨﻰ ﻫﻪﺗﺘﺎ ﺋﯘﻻﺭﻧﯩﯔ ﻳﻪﺭﺩﯨﻦ ﺳﺎﭘﺎﻝ ﻗﺎﭼﺎ ﺳﯘﻧﯘﻗﻠﯩﺮﻯ ﻗﺎﺗﺎﺭﻟﯩﻖ ﺑﯘﻳﯘﻣﻼﺭﻧﻰ ﺋﯧﻠﯩﯟﺍﻟﻐﺎﻧﻠﯩﻘﯩﻨﻰ ﺳﯜﺭﻩﺗﻜﻪ ﺗﺎﺭﺗﯩﯟﺍﻟﻐﺎﻥ، ﻣﯘﺧﺒﯩﺮ ﺑﯧﺮﯨﭗ ﺋﯘﻻﺭﻧﻰ ﺯﯨﻴﺎﺭﻩﺕ ﻗﯩﻠﻤﺎﻗﭽﻰ ﺑﻮﻟﻐﺎﻧﺪﺍ ﺋﯘﻻﺭ ﻳﺎﭘﻮﻧﭽﻪ ﺑﯩﺮ ﻧﯧﻤﯩﻠﻪﺭﻧﻰ ﺩﻩﭖ ﺋﯚﺯﻟﯩﺮﯨﻨﻰ ﻗﺎﭼﯘﺭﻏﺎﻥ.

" ﺳﺎﻳﺎﻫﻪﺗﭽﯩﻠﻪﺭ 10 ﻣﯩﯔ ﻳﯜﻩﻥ ﺑﯩﻠﻪﻧﻼ ﺗﻮﺳﺎﻗﺘﯩﻦ ﺋﯚﺗﻪﻟﻪﻳﺪﯗ "

ﻣﯘﺧﺒﯩﺮﻧﯩﯔ ﺗﻪﭘﺴﯩﻠﯩﻲ ﺑﺎﻳﺎﻥ ﻗﯩﻠﯩﺸﯩﭽﻪ، ﺑﯘ ﺳﺎﻳﺎﻫﻪﺗﭽﯩﻠﻪﺭ ﭼﺎﻗﯩﻠﯩﻖ ﻧﺎﻫﯩﻴﯩﻠﯩﻚ ﻣﻪﺩﻩﻧﯩﻴﻪﺕ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻰ ﻣﯩﯔ ﺧﻪﻧﮕﺎﯞﻧﯩﯔ ﺑﯩﯟﺍﺳﺘﻪ ﺗﻪﺳﺘﯩﻘﻰ ﺑﯩﻠﻪﻥ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﻪﺭ ﺋﯩﭽﯩﺪﻩ ﺯﯨﻴﺎﺭﻩﺗﺘﻪ ﺑﻮﻟﯘﺵ ﺭﯗﺧﺴﯩﺘﯩﮕﻪ ﺋﯧﺮﯨﺸﻜﻪﻥ ﺑﻮﻟﯘﭖ ﺑﯘﻧﯩﯔ ﺋﯜﭼﯜﻥ ﺋﯘﻻﺭﻧﯩﯔ ﻫﻪﺭ ﺑﯩﺮﻯ 10 ﻣﯩﯔ ﻳﯜﻩﻧﺪﯨﻦ ﺋﺎﺳﺎﺭﻩ ‏- ﺋﻪﺗﯩﻘﻪ ﻗﻮﻏﺪﺍﺵ ﭘﯘﻟﻰ ﺗﺎﭘﺸﯘﺭﻏﺎﻥ ﺋﯩﻜﻪﻥ.

ﺑﯘﻻﺭﺩﯨﻦ ﺑﺎﺷﻘﺎ، ﻣﯘﺧﺒﯩﺮ ﻳﻪﻧﻪ ﻛﺮﻭﺭﺍﻥ ﻗﻪﺩﯨﻤﯩﻲ ﺷﻪﻫﯩﺮﯨﻨﯩﯔ ﻛﯩﺮﯨﺶ ﺋﯧﻐﯩﺰﯨﺪﺍ ﺑﻪﺵ ﺟﺎﻳﺪﺍ ﺋﻪﺧﻠﻪﺕ ﺩﯙﯞﯨﺴﻰ، ﻳﻪﻧﻪ ﺧﺎﺭﺍﺑﻪ ﺋﯩﭽﯩﺪﯨﻤﯘ ﺋﯜﭺ ﺟﺎﻳﺪﺍ ﺋﺎﺩﻩﻣﻠﻪﺭﻧﯩﯔ ﺗﻪﺭﻩﺕ ﻫﻪﻡ ﺋﻪﺧﻠﻪﺕ ﺩﯙﯞﯨﻠﯩﺮﯨﻨﻰ ﺋﯘﭼﺮﺍﺗﻘﺎﻥ ﺑﻮﻟﯘﭖ، ﺗﻪﭘﺴﯩﻠﯩﻲ ﺳﯜﺭﻩﺗﻠﻪﺭﻧﻰ ﺗﺎﺭﺗﯩﯟﺍﻟﻐﺎﻥ.

ﻣﯘﺧﺒﯩﺮ ﻣﺎﻗﺎﻟﯩﺴﯩﻨﯩﯔ ﺋﺎﺧﯩﺮﯨﺪﺍ "ﻛﯩﺮﻭﺭﻩﻧﮕﻪ ﺗﯚﺕ ﺋﻪﺗﺮﺍﭘﺘﯩﻦ ﻛﯩﺮﮔﯩﻠﻰ ﺑﻮﻟﯩﺪﯗ. ﺋﻪﻣﻤﺎ ﻣﺎﺷﯩﻨﯩﻠﯩﻖ ﻗﻪﺩﯨﻤﯩﻲ ﺷﻪﻫﻪﺭﮔﻪ ﻛﯩﺮﯨﺪﯨﻐﺎﻧﻼﺭ ﭼﻮﻗﯘﻡ 30 ﻛﯩﻠﻮﻣﯧﺘﯩﺮ ﻳﯩﺮﺍﻗﺘﺎ ﻫﻪﻡ 18 ﻛﯩﻠﻮﻣﯧﺘﯩﺮ ﻳﯩﺮﺍﻗﺘﺎ ﻗﯘﺭﯗﻟﻐﺎﻥ ﺋﯩﻜﻜﻰ ﺗﻮﺳﺎﻗﺘﯩﻦ ﻳﻪﻧﻰ ﻛﺮﻭﺭﺍﻥ ﻣﻪﺩﻩﻧﯩﻲ ﻳﺎﺩﯨﻜﺎﺭﻟﯩﻘﻼﺭﻧﻰ ﻗﻮﻏﺪﺍﺵ ﭘﻮﻧﻜﯩﺘﯩﺪﯨﻦ ﺋﯚﺗﯜﺵ ﻛﯧﺮﻩﻙ،ﺳﺎﻳﺎﻫﻪﺗﭽﯩﻠﻪﺭ 10 ﻣﯩﯔ ﻳﯜﻩﻥ ﺑﯩﻠﻪﻧﻼ ﺑﯘ ﺗﻮﺳﺎﻗﺘﯩﻦ ﺋﯚﺗﻪﻟﻪﻳﺪﯗ، ﺑﯩﺮﺍﻕ، ﻗﻪﺩﯨﻤﯩﻲ ﺷﻪﻫﻪﺭ ﺋﯩﭽﯩﺪﻩ ﺑﯩﺮﻣﯘ ﻗﻮﻏﺪﯨﻐﯘﭼﻰ ﻳﻮﻕ، ﭘﻪﻗﻪﺕ ﻗﺎﻻﻳﻤﯩﻘﺎﻥ ﺩﻩﺳﺴﯩﻤﻪﯓ ﺩﯦﮕﻪﻥ ﺑﯩﺮ ﻛﯩﭽﯩﻚ ﺑﻪﻟﮕﯩﻼ ﺑﺎﺭ، ﻛﯩﺸﯩﻠﻪﺭ ﻗﻪﺩﯨﻤﯩﻲ ﺷﻪﻫﻪﺭ ﺋﯩﭽﯩﺪﻩ ﻧﯧﻤﻪ ﻗﯩﻠﻐﯘﺳﻰ ﻛﻪﻟﺴﻪ ﺷﯘﻧﻰ ﻗﯩﻼﻻﻳﺪﯗ. ﺑﯘ ﺟﺎﻱ ﻣﯘﺷﯘﻧﺪﺍﻕ ﻣﯘﯞﺍﭘﯩﻖ ﻗﻮﻏﺪﺍﻟﻤﺎﻱ ﻛﯧﺘﯩﯟﻩﺭﺳﻪ ﺑﯩﺮ ﻧﻪﭼﭽﻪ ﻳﯩﻠﻐﺎ ﻗﺎﻟﻤﺎﻳﻼ، ﺗﺎﺭﯨﺨﺘﯩﻦ ﻳﻪﻧﻪ ﺑﯩﺮ ﻗﯧﺘﯩﻢ ﻏﺎﻳﯩﭗ ﺑﻮﻟﯩﺪﯗ ﺷﯘﻧﺪﺍﻗﻼ ﻣﻪﯕﮕﯜ ﺋﻪﺳﻠﯩﮕﻪ ﻛﻪﻟﻤﻪﻳﺪﯗ" ﺩﻩﻳﺪﯗ. (ﮔﯜﻟﭽﯧﻬﺮﻩ)