ﻣﻪﺟﺒﯘﺭﯨﻲ ﮬﺎﺷﺎﺭ ﭘﻪﻳﺰﯨﯟﺍﺕ ﻧﺎﮬﯩﻴﯩﺴﯩﺪﯨﻜﻰ ﺩﯦﮭﻘﺎﻧﻼﺭﻧﻰ ﺗﻪﺱ ﻛﯜﻧﮕﻪ ﻗﻮﻳﺪﻯ

• ﻣﯘﺧﺒﯩﺮﯨﻤﯩﺰ ﭘﻪﺭﯨﺪﻩﻧﯩﯔ ﺑﯘ ﮬﻪﻗﺘﯩﻜﻰ ﭘﺮﻭﮔﺮﺍﻣﻤﯩﺴﻰ
• Download story audio

ﺑﯩﺰﮔﻪ ﺗﯧﻠﯧﻔﻮﻥ ﻗﯩﻠﻐﺎﻥ ﺋﯘﻳﻐﯘﺭﻻﺭ، ﺑﯘ ﻳﻪﺭﺩﯨﻜﻰ ﮬﺎﺷﺎﺭ ﺋﻪﻣﮕﯩﻜﯩﻨﯩﯔ ﺩﯦﮭﻘﺎﻧﻼﺭﻏﺎ ﺋﯧﻐﯩﺮ ﻗﯩﻴﯩﻨﭽﯩﻠﯩﻘﻼﺭﻧﻰ ﺗﯘﻏﺪﯗﺭﯨﯟﺍﺗﻘﺎﻧﻠﯩﻘﯩﻨﻰ ﮬﻪﻣﺪﻩ ﺑﯘﻧﯩﯖﻐﺎ ﻧﯘﺭﻏﯘﻥ ﺩﯦﮭﻘﺎﻧﻼﺭﻧﯩﯔ ﻧﺎﺭﺍﺯﻯ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﯩﭗ، ﺑﯘ ﺋﻪﮬﯟﺍﻟﻨﻰ ﺑﯩﺰﻧﯩﯔ ﭘﯜﺗﯜﻥ ﺩﯗﻧﻴﺎﻏﺎ ﺋﺎﯕﻠﯩﺘﯩﺸﯩﻤﯩﺰﻧﻰ ﺗﻪﯞﺳﯩﻴﻪ ﻗﯩﻠﺪﻯ. ﺑﯩﺰ ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ، ﺑﯘ ﮬﻪﻗﺘﻪ ﺗﯧﺨﯩﻤﯘ ﻛﯚﭖ ﺋﯘﭼﯘﺭﻻﺭﻏﺎ ﺋﯧﺮﯨﺸﯩﺶ ﺋﯜﭼﯜﻥ ﮬﺎﺷﺎﺭﻏﺎ ﺋﯧﻠﯩﭗ ﭼﯩﻘﯩﺶ ﺋﻪﮬﯟﺍﻟﻰ ﺑﯩﺮ ﻗﻪﺩﻩﺭ ﺋﯧﻐﯩﺮ ﺑﻮﻟﯩﯟﺍﺗﻘﺎﻥ ﭘﻪﻳﺰﯨﯟﺍﺕ ﻧﺎﮬﯩﻴﯩﺴﯩﻨﯩﯔ ﻣﻪﻟﯘﻡ ﻳﯧﺰﯨﺴﯩﺪﯨﻜﻰ ﺩﯦﮭﻘﺎﻧﻼﺭﻧﯩﯔ ﺋﯚﻳﯩﮕﻪ ﺗﯧﻠﯧﻔﻮﻥ ﻗﯩﻠﺪﯗﻕ.

ﺩﯦﮕﻪﻧﺪﻩﻙ ﺗﯧﻠﯧﻔﻮﻧﯩﻤﯩﺰ ﺋﯘﻻﻧﻐﺎﻧﻼﺭﻧﯩﯔ ﮬﻪﻣﻤﯩﺴﻰ ﮬﻪﻗﯩﻘﻪﺗﻪﻥ ﺑﯘ ﻳﻪﺭﺩﻩ ﮬﺎﺷﺎﺭ ﻣﻪﺯﮔﯩﻠﻰ ﺑﺎﺷﻠﯩﻨﯩﭗ ﻛﻪﺗﻜﻪﻧﻠﯩﻜﯩﻨﻰ ﻣﻪﻟﯘﻡ ﻗﯩﻠﺪﻯ. ﺋﯘﻻﺭﻧﯩﯔ ﺑﯩﻠﺪﯛﺭﯨﺸﯩﭽﻪ، ﺩﯦﮭﻘﺎﻧﻼﺭ ﮬﺎﺯﯨﺮ ﮬﺎﺷﺎﺭﻏﺎ ﻣﻪﺟﺒﯘﺭﯨﻲ ﺋﺎﺳﺎﺳﺘﺎ ﺋﯧﻠﯩﭗ ﭼﯩﻘﯩﻠﯩﺪﯨﻜﻪﻥ. ﺋﻪﮔﻪﺭ ﭼﯩﻘﻤﺎﻳﺪﯨﻐﺎﻧﻼﺭ ﺑﻮﻟﺴﺎ، ﮬﯚﻛﯜﻣﻪﺕ ﺋﯘﻻﺭﻧﻰ ﻳﻪﻧﯩﻼ ﭘﯘﻝ ﺗﯚﻟﯩﺘﯩﺶ ﺋﯘﺳﯘﻟﻰ ﺑﯩﻠﻪﻥ ﺟﺎﺯﺍﻻﻳﺪﯨﻜﻪﻥ. ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺑﯩﺰ، ﭘﻪﻳﺰﯨﯟﺍﺕ ﻧﺎﮬﯩﻴﯩﺴﯩﻨﯩﯔ ﻣﻪﻟﯘﻡ ﺑﯩﺮ ﻳﯧﺰﯨﺴﯩﺪﯨﻜﻰ ﺑﯩﺮ ﺋﯘﻳﻐﯘﺭ ﺩﯦﮭﻘﺎﻥ ﺑﯩﻠﻪﻥ ﺳﯚﮬﺒﻪﺕ ﺋﯧﻠﯩﭗ ﺑﺎﺭﺩﯗﻕ. ﺋﯘ ﺑﯩﺰﮔﻪ ﺑﯘ ﻳﻪﺭﺩﯨﻜﻰ ﮬﺎﺷﺎﺭ-ﺳﯧﻠﯩﻘﻼﺭﻧﯩﯔ ﺩﯦﮭﻘﺎﻧﻼﺭﻧﻰ ﺗﻪﺱ ﻛﯜﻧﮕﻪ ﻗﻮﻳﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘﻧﯩﯔ ﺋﯧﻴﺘﯩﺸﯩﭽﻪ ﻳﻪﻧﻪ، ﺭﻩﮬﺒﻪﺭ ﻛﺎﺩﯨﺮﻻﺭ ﺑﻪﺯﯨﺪﻩ ﮬﻪﺗﺘﺎ ﮬﺎﺷﺎﺭﻏﺎ ﭼﯩﻘﻤﯩﻐﺎﻧﻼﺭﻧﻰ ﺋﯘﺭﯗﭘﻤﯘ ﺳﺎﻟﯩﺪﯨﻜﻪﻥ.

ﻛﺎﺩﯨﺮﻻﺭ ﮬﻪﺗﺘﺎ ﮬﺎﺷﺎﺭﻏﺎ ﻛﯧﭽﯩﻜﯩﭗ ﻗﺎﻟﻐﺎﻥ ﺩﯦﮭﻘﺎﻧﻼﺭﻧﻰ ﺋﯘﺭﯨﺪﯨﻜﻪﻥ

ﺑﯩﺰ ﻳﻪﻧﻪ ﺑﯘ ﺭﺍﻳﻮﻧﻐﺎ ﺩﺍﯞﺍﻣﻠﯩﻖ ﺗﯧﻠﯧﻔﻮﻥ ﻗﯩﻠﻐﯩﻨﯩﻤﯩﺰﺩﺍ، ﺗﯧﻠﯧﻔﻮﻧﯩﻤﯩﺰ ﺋﯘﻻﻧﻐﺎﻥ ﺑﯩﺮ ﺩﯦﮭﻘﺎﻥ ﺋﺎﻳﺎﻝ، ﻳﻮﻟﺪﯨﺸﻰ ﯞﺍﭘﺎﺕ ﺑﻮﻟﻐﺎﻧﺪﯨﻦ ﻛﯧﻴﯩﻦ، ﺋﯚﺯﯨﻨﯩﯔ 9 ﺑﺎﻟﯩﺴﻰ ﺑﯩﻠﻪﻥ ﻗﺎﻟﻐﺎﻧﻠﯩﻘﯩﻨﻰ، ﺷﯘﻧﺪﺍﻗﻼ ﺋﯘﻧﯩﯔ ﺑﯩﺮ ﺋﻮﻏﻠﻰ ﮬﺎﺷﺎﺭﻏﺎ ﭼﯩﻘﯩﭗ ﻛﻪﺗﻜﻪﻧﻠﯩﻜﻰ ﺋﯜﭼﯜﻥ، ﭘﯜﺗﯜﻥ ﺋﯧﺘﯩﺰ-ﺋﯧﺮﯨﻖ ﺋﯩﺸﻠﯩﺮﯨﻨﯩﯔ ﺋﯚﺯﯨﮕﻪ ﻳﺎﻟﻐﯘﺯ ﻗﺎﻟﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺑﯩﺰ ﻳﻪﻧﻪ ﺑﯘ ﻳﻪﺭﺩﯨﻜﻰ ﻳﻪﻧﻪ ﺑﯩﺮ 70 ﻳﺎﺷﻠﯩﻖ ﺋﯘﻳﻐﯘﺭ ﺩﯦﮭﻘﺎﻥ ﺑﯩﻠﻪﻥ ﺳﯚﮬﺒﻪﺗﻠﯩﺸﯩﺶ ﭘﯘﺭﺳﯩﺘﯩﮕﻪ ﺋﯩﮕﻪ ﺑﻮﻟﺪﯗﻕ. ﺋﯘ ﺑﯩﺰﮔﻪ، ﻧﯚﯞﻩﺗﺘﯩﻜﻰ ﮬﺎﺷﺎﺭ ﺋﻪﻣﮕﯩﻜﯩﺪﯨﻦ ﺑﻪﻛﺮﻩﻙ ﮬﻪﺭ ﻳﯩﻠﻰ ﻛﯜﺯﺩﻩ ﺩﯦﮭﻘﺎﻧﻼﺭﻧﻰ ﻣﻪﺟﺒﯘﺭﯨﻲ ﺑﯩﯖﺘﯘﺋﻪﻥ ﻛﯧﯟﻩﺯﻟﯩﻜﻠﯩﺮﯨﮕﻪ ﺋﯧﻠﯩﭗ ﺑﯧﺮﯨﭗ ﭘﺎﺧﺘﺎ ﺗﻪﺭﮔﯜﺯﯨﺪﯨﻐﺎﻥ ﺋﻪﮬﯟﺍﻟﻨﯩﯔ، ﺩﯦﮭﻘﺎﻧﻼﺭﻏﺎ ﮬﻪﻣﻤﯩﺪﯨﻦ ﺗﻪﺱ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘﻧﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻛﯧﯟﻩﺯ ﺗﯧﺮﯨﺶ ﺋﻪﻣﮕﯩﻜﻰ ﺋﯩﻨﺘﺎﻳﯩﻦ ﺟﺎﭘﺎﻟﯩﻖ ﺑﻮﻟﻐﺎﭼﻘﺎ ﮬﯧﭽﻘﺎﻳﺴﻰ ﺩﯦﮭﻘﺎﻧﻨﯩﯔ ﺋﯘ ﻳﻪﺭﮔﻪ ﺑﯧﺮﯨﺸﻜﻪ ﺭﺍﻳﻰ ﺑﻮﻟﻤﺎﻳﺪﯨﻜﻪﻥ، ﮬﻪﺗﺘﺎ 40-50 ﻛﯜﻥ ﺩﺍﯞﺍﻣﻠﯩﺸﯩﺪﯨﻐﺎﻥ ﺑﯘ ﮬﺎﺷﺎﺭ ﻣﻪﺯﮔﯩﻠﯩﺪﯨﻜﻰ ﺑﺎﺭﻟﯩﻖ ﻳﯩﻤﻪﻙ-ﺋﯩﭽﻤﻪﻛﻜﻪ ﺩﯦﮭﻘﺎﻧﻼﺭ ﺋﯚﺯﻯ ﭘﯘﻝ ﭼﯩﻘﯩﺮﯨﺪﯨﻜﻪﻥ.

70 ﻳﺎﺷﻠﯩﻖ ﺑﯘ ﺑﻮﯞﺍﻱ ﺳﯚﺯﯨﻨﯩﯔ ﺋﺎﺧﯩﺮﯨﺪﺍ، ﺋﯚﺯﯨﻨﯩﯔ ﺋﯧﺴﯩﻨﻰ ﺑﯩﻠﺴﻪ، ﺑﯘ ﻳﻪﺭﺩﻩ ﮬﺎﺷﺎﺭ ﺑﺎﺭﻟﯩﻘﯩﻨﻰ، ﮔﻪﺭﭼﻪ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﺋﯩﻠﮕﯩﺮﻯ "ﺷﯩﻨﺠﺎﯕﻨﻰ ﺋﺎﺯﺍﺩ ﻗﯩﻠﯩﻤﯩﺰ" ﺩﻩﭖ ﺑﯘ ﻳﻪﺭﮔﻪ ﻛﯩﺮﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺑﯘ ﻳﻪﺭﺩﯨﻜﻰ ﮬﺎﺷﺎﺭ-ﺳﯧﻠﯩﻘﻼﺭﻧﯩﯔ ﮬﯧﭽﻘﺎﻧﭽﻪ ﻳﻪﯕﮕﯩﻠﻠﯩﻤﯩﮕﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﯞﯨﻼﻳﻪﺗﻜﻪ ﺑﯘ ﮬﻪﻗﺘﻪ ﺋﻪﺭﺯ ﺳﯘﻧﯘﭖ ﺑﺎﺭﻏﺎﻥ ﺩﯦﮭﻘﺎﻧﻼﺭ ﮬﻪﺗﺘﺎ ﺳﻮﻻﭖ ﻗﻮﻳﯘﻟﻐﺎﻥ

ﺑﯩﺰ ﻳﻪﻧﻪ ﭘﻪﻳﺰﯨﯟﺍﺕ ﻧﺎﮬﯩﻴﯩﺴﯩﻨﯩﯔ ﻣﻪﻟﯘﻡ ﺑﯩﺮ ﻳﯧﺰﯨﺴﯩﺪﯨﻜﻰ ﺋﯘﻳﻐﯘﺭ ﻛﺎﺩﯨﺮﻧﻰ ﺯﯨﻴﺎﺭﻩﺕ ﻗﯩﻠﯩﭗ، ﺋﯘﻧﯩﯖﺪﯨﻦ ﺑﯘ ﻳﻪﺭﺩﯨﻜﻰ ﮬﺎﺷﺎﺭ ﺋﻪﮬﯟﺍﻟﯩﻨﻰ ﺳﯜﺭﯛﺷﺘﯘﺭﺩﯗﻕ. ﺋﯘ ﺭﺍﺩﯨﺌﻮﻣﯩﺰﻧﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﯩﭗ، ﺩﯦﮭﻘﺎﻧﻼﺭﻧﯩﯔ ﮬﺎﺷﺎﺭﻏﺎ ﭼﯩﻘﻤﺎﻱ ﺋﺎﻣﺎﻟﻰ ﻳﻮﻗﻠﯩﻐﯩﻨﻰ، ﭼﯜﻧﻜﻰ ﮬﯚﻛﯜﻣﻪﺗﻨﯩﯔ ﮬﺎﺷﺎﺭﻏﺎ ﭼﯩﻘﯩﺸﺘﯩﻦ ﺋﯚﺯﯨﻨﻰ ﺗﺎﺭﺗﻘﺎﻧﻼﺭﻧﻰ ﻳﻪﻧﯩﻼ ﭘﯘﻝ ﺗﯚﻟﯩﺘﯩﺶ ﺋﯘﺳﯘﻟﻰ ﺋﺎﺭﻗﯩﻠﯩﻖ ﺟﺎﺯﺍﻻﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺑﯩﺰ ﺩﯦﮭﻘﺎﻧﻼﺭﻧﯩﯔ ﺯﺍﺭﯨﻨﻰ ﺋﺎﯕﻠﯩﻐﺎﻧﺪﯨﻦ ﻛﯧﻴﯩﻦ، ﺑﯘ ﮬﻪﻗﺘﻪ ﻳﻪﻧﻪ ﭘﻪﻳﺰﯨﯟﺍﺕ ﻧﺎﮬﯩﻴﯩﺴﯩﺪﯨﻜﻰ ﻣﯘﻧﺎﺳﯩﯟﻩﺗﻠﯩﻚ ﮬﯚﻛﯜﻣﻪﺕ ﺋﻮﺭﯗﻧﻠﯩﺮﻯ ﺑﯩﻠﻪﻥ ﺋﺎﻻﻗﻠﯩﺸﯩﺸﻘﺎ ﺗﯩﺮﯨﺸﻘﺎﻥ ﺑﻮﻟﺴﺎﻗﻤﯘ، ﺋﻪﻣﻤﺎ ﯞﺍﻗﯩﺖ ﭘﻪﺭﻗﻰ ﺗﯜﭘﻪﻳﻠﯩﺪﯨﻦ ﺋﯘﻻﺭ ﺑﯩﻠﻪﻥ ﺳﯚﺯﻟﯩﺸﻪﻟﻤﻪﻱ ﻗﺎﻟﺪﯗﻕ. ﺑﯩﺰ ﻳﻪﻧﻪ ﺑﯘ ﮬﻪﻗﺘﻪ ﺗﯧﺨﯩﻤﯘ ﻛﯚﭖ ﺋﯘﭼﯘﺭﻻﺭﻧﻰ ﺋﯩﮕﯩﻠﻪﺷﻜﻪ ﺩﺍﯞﺍﻣﻠﯩﻖ ﺗﯩﺮﯨﺸﯩﻤﯩﺰ. (ﭘﻪﺭﯨﺪﻩ)