ﺑﯧﻠﮕﯩﻴﯩﺪﯨﻤﯘ ﺋﯘﻳﻐﯘﺭ ﭼﯧﻤﭙﯩﻴﻮﻧﻰ ﺑﺎﺭ

ﺋﯘﻳﻐﯘﺭ ﺧﻪﻟﻘﻰ ﺋﯚﺯﻟﯩﺮﯨﻨﯩﯔ ﻛﯚﭘﻠﯩﮕﻪﻥ ﻣﻪﺷﮭﯘﺭ ﺳﯩﻴﺎﺳﯩﻴﻮﻧﻠﯩﺮﻯ، ﺋﺎﻟﯩﻤﻠﯩﺮﻯ، ﻣﻪﺩﻩﻧﯩﻴﻪﺕ ﯞﻩ ﺟﺎﻣﺎﺋﻪﺕ ﺋﻪﺭﺑﺎﭘﻠﯩﺮﯨﻐﺎ ﺋﯩﮕﻪ ﺑﻮﻟﯘﭘﻼ ﻗﺎﻟﻤﺎﺳﺘﯩﻦ ﺑﻪﻟﻜﻰ، ﻳﻪﻧﻪ ﺩﯗﻧﻴﺎﯞﻯ ﺭﯦﻜﻮﺭﺗﻼﺭﻧﻰ ﻳﺎﺭﺍﺗﻘﺎﻥ ﺋﺎﺗﺎﻗﻠﯩﻖ ﺗﻪﻧﮭﻪﺭﯨﻜﻪﺗﭽﯩﻠﯩﺮﻯ ﯞﻩ ﭼﯧﻤﭙﯩﻴﻮﻧﻠﯩﺮﯨﻐﯩﻤﯘ ﺋﯩﮕﻪ.

ﭘﻪﺧﯩﺮﻟﯩﻚ ﺗﻪﻧﮭﻪﺭﯨﻜﻪﺗﭽﯩﻠﯩﺮﯨﻤﯩﺰ

ﺩﺍﺭﯞﺍﺯﻟﯩﻖ ﺋﯘﻳﻐﯘﺭ ﺋﻪﻥ-ﺋﻪﻧﯩﯟﻯ ﺗﻪﻧﮭﻪﺭﯨﻜﻪﺕ ﺗﯜﺭﻯ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ ﺑﯜﮔﯜﻧﻜﻰ ﻛﯜﻧﺪﻩ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﯨﻦ ﻳﯧﺘﯩﺸﯩﭗ ﭼﯩﻘﻘﺎﻥ ﺋﺎﺩﯨﻞ ﮬﻮﺷﯘﺭ، ﺋﻪﺳﻘﻪﺭ ﻗﺎﺗﺎﺭﻟﯩﻖ ﻳﺎﺵ ﺩﺍﺭﯞﺍﺯﻻﺭ ﺩﯗﻧﻴﺎ ﮔﯧﻨﯘﺱ ﺭﯦﻜﻮﺭﺗﻰ ﻳﺎﺭﯨﺘﯩﺶ ﺑﯩﻠﻪﻥ ﺩﯗﻧﻴﺎ ﻳﯜﺯﯨﺪﯨﻜﻰ ﻳﯩﮕﺎﻧﻪ ﺷﻪﺧﺴﻠﻪﺭﮔﻪ ﺋﺎﻳﻠﯩﻨﯩﭗ، ﺋﯘﻳﻐﯘﺭ ﺩﺍﺭﯞﺍﺯﭼﯩﻠﯩﻘﯩﻨﻰ ﺩﯗﻧﻴﺎﻏﺎ ﺗﻮﻧﯘﺷﺘﯘﺭﺩﻯ.

ﻗﯘﻣﻠﯘﻕ ﻣﻪﻟﯩﻜﯩﺴﻰ ﺩﻩﭖ ﻧﺎﻡ ﺋﺎﻟﻐﺎﻥ ﮔﯜﻝ ﺯﯙﮬﺮﻩ ﺗﻪﻛﻠﯩﻤﺎﻛﺎﻧﻨﻰ ﻳﯜﮔﯜﺭﻩﭖ ﻛﯧﺴﯩﭗ ﺋﯚﺗﯜﺷﺘﻪﻙ ﺩﯗﻧﻴﺎﯞﻯ ﺗﻪﯕﺪﺍﺷﺴﯩﺰ ﻧﻪﺗﯩﺠﻪ ﻳﺎﺭﺍﺗﺴﺎ، ﺋﯘﻳﻐﯘﺭ ﻗﯩﺰﻯ ﻧﯘﺭﮔﯜﻝ ﺳﺎﯞﯗﺕ ﺧﯩﺘﺎﻳﻨﯩﯔ ﭼﯩﯖﺪﺍﯞ ﺷﻪﮬﯩﺮﯨﺪﻩ ﺋﯚﺗﻜﯜﺯﯛﻟﮕﻪﻥ ﺧﻪﻟﻘﺎﺭﺍﻟﯩﻖ ﻣﺎﺭﺍﻓﻮﻧﭽﻪ ﻳﯜﮔﺮﻩﺵ ﻣﯘﺳﺎﺑﯩﻘﯩﺴﯩﺪﻩ ﭼﯧﻤﭙﯩﻴﻮﻥ ﺑﻮﻟﯘﺵ ﺑﯩﻠﻪﻥ ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﻗﻪﮬﺮﯨﻤﺎﻧﻠﯩﻖ ﺋﻪﻧﺌﻪﻧﯩﺴﯩﻨﻰ ﺟﺎﺭﻯ ﻗﯩﻠﺪﯗﺭﺩﻯ.

ﺋﯘﻳﻐﯘﺭ ﺧﻪﻟﻘﻰ ﺋﺎﺭﯨﺴﯩﺪﯨﻦ ﻳﻪﻧﻪ ﺗﻪﻧﮭﻪﺭﯨﻜﻪﺗﻨﯩﯔ ﮬﻪﻣﻤﻪ ﺗﯜﺭﻟﯩﺮﻯ ﺑﻮﻳﯩﭽﻪ ﺩﯦﮕﯜﺩﻩﻙ ﺋﺎﺗﺎﻗﻠﯩﻖ ﻣﺎﮬﯩﺮﻻﺭ ﻳﯧﺘﯩﺸﯩﭗ ﭼﯩﻘﻘﺎﻥ ﺑﻮﻟﯘﭖ، 60- ﻳﯩﻠﻼﺭﺩﺍ ﭘﯜﺗﯜﻥ ﺧﯩﺘﺎﻳﻨﻰ ﺯﯨﻠﺰﯨﻠﯩﮕﻪ ﺳﺎﻟﻐﺎﻥ ﯞﺍﻟﯩﺒﻮﻝ ﻣﺎﮬﯩﺮﻟﯩﺮﯨﺪﯨﻦ ﺯﯙﮬﺮﻩ ﯞﻩ ﻣﺎﻟﯩﻚ، 90-ﻳﯩﻠﻼﺭﺩﯨﻦ ﺋﯧﺘﯩﺒﺎﺭﻩﻥ ﻣﻪﺷﮭﯘﺭ ﺑﻮﻟﯘﭖ ﺗﻮﻧﯘﻟﻐﺎﻥ ﯞﺍﺳﻜﯩﺘﺒﻮﻝ ﻣﺎﮬﯩﺮﻯ ﯞﻩ ﺗﯩﺮﯨﻨﯧﺮﻯ ﺋﺎﺩﯨﻠﺠﺎﻥ ﮬﻪﻡ ﭼﯧﻠﯩﺶ ﻣﺎﮬﯩﺮﻟﯩﺮﻯ ﺋﺎﺑﻠﯩﺰ ﺗﻮﻗﺴﯘﻥ، ﮬﺎﺟﻰ ﺷﯘﻧﯩﯖﺪﻩﻙ ﺑﺎﺷﻘﺎ ﻳﻪﻧﻪ ﺋﯘﺯﯗﻧﻐﺎ ﻳﯜﮔﺮﻩﺵ، ﺋﺎﺕ ﺑﻪﻳﮕﯩﺴﻰ، ﺳﯘ ﺋﯜﺯﯛﺵ ﻗﺎﺗﺎﺭﻟﯩﻖ ﺗﯜﺭﻟﯜﻙ ﺳﺎﮬﻪﻟﻪﺭﺩﯨﻜﻰ ﭼﯧﻤﭙﯩﻴﻮﻧﻼﺭﻧﻰ ﻣﯩﺴﺎﻝ ﻗﯩﻠﯩﺶ ﻣﯘﻣﻜﯩﻦ.

ﺑﻮﻛﺲ ﺋﯘﻳﻐﯘﺭﻻﺭ ﺋﻪﯓ ﻳﺎﺧﺸﻰ ﻛﯚﺭﮔﻪﻥ ﺗﻪﻧﮭﻪﺭﯨﻜﻪﺕ ﺗﯜﺭﻟﯩﺮﯨﻨﯩﯔ ﺑﯩﺮﻯ ﺑﻮﻟﯘﭖ، ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ ﺑﯘ ﺳﺎﮬﻪﺩﻩ ﺋﯘﻳﻐﯘﺭ ﻣﺎﮬﯩﺮﻟﯩﺮﻯ ﭘﯜﺗﯜﻥ ﺧﯩﺘﺎﻱ ﺑﻮﻳﯩﭽﻪ ﯞﻩ ﺑﻪﺯﻯ ﺧﻪﻟﻘﺎﺭﺍﻟﯩﻖ ﻣﯘﺳﺎﺑﯩﻘﯩﻠﻪﺭﺩﻩ ﻣﯘﺗﻠﻪﻕ ﻏﺎﻟﯩﭗ ﻛﯧﻠﯩﺶ ﺑﯩﻠﻪﻥ ﺋﯘﻳﻐﯘﺭ ﻣﯩﻠﻠﯩﻲ ﺭﻭﮬﯩﻨﻰ ﻳﻪﻧﻪ ﺑﯩﺮ ﻗﯧﺘﯩﻢ ﻧﺎﻣﺎﻳﻪﻥ ﻗﯩﻠﺪﻯ. ﺋﻪﻧﻪ ﺷﯘﻻﺭﻧﯩﯔ ﺋﯩﭽﯩﺪﻩ ﺋﺎﻻﮬﯩﺪﻩ ﺋﻮﺭﯗﻧﻐﺎ ﺋﯩﮕﯩﻠﯩﺮﯨﺪﯨﻦ ﺑﯩﺮﻯ، ﺧﯩﺘﺎﻳﻨﯩﯔ ﺑﻮﻛﺲ ﺷﺎﮬﻰ ﺩﻩﭖ ﻧﺎﻡ ﺋﺎﻟﻐﺎﻥ ﺋﺎﺑﺪﯗﺷﯜﻛﯜﺭﺩﯗﺭ.

ﺋﯘﻳﻐﯘﺭ ﻳﯩﮕﯩﺘﻠﯩﺮﯨﺪﯨﻦ ﺋﺎﺑﺪﯗﺷﯜﻛﯜﺭ، ﺋﺎﺑﺪﯗﺭﺍﺧﻤﺎﻥ ﯞﻩ ﺋﻪﻛﺮﻩﻡ ﻗﺎﺗﺎﺭﻟﯩﻘﻼﺭﻧﯩﯔ ﮬﻪﺭ ﻗﯧﺘﯩﻤﻠﯩﻖ ﻛﻪﺳﻜﯩﻦ ﺋﯧﻠﯩﺸﯩﺶ ﻣﻪﻳﺪﺍﻧﻠﯩﺮﯨﺪﺍ ﺋﯚﺯ ﺭﻩﻗﯩﭙﻠﯩﺮﯨﻨﻰ ﻣﯘﺷﺘﻼﭖ ﻳﯩﻘﯩﺘﯩﺸﻠﯩﺮﻯ، ﺭﻩﻗﯩﭙﻠﯩﺮﯨﮕﻪ ﺋﺎﺗﻘﺎﻥ ﮬﻪﺭ ﺑﯩﺮ ﻣﯘﺷﺘﯩﻐﺎ ﺋﯘﻻﺭﻧﯩﯔ ﻗﻪﮬﺮﯨﻤﺎﻥ ﺋﻪﺟﺪﺍﺩﻟﯩﺮﯨﺪﯨﻦ ﻣﯩﺮﺍﺱ ﻗﺎﻟﻐﺎﻥ ﻣﯩﻠﻠﯩﻲ ﺭﻭﮬﻰ ﻳﻪﻧﻰ ﻣﻪﺭﺗﻠﯩﻚ ،ﺑﺎﺗﯘﺭﻟﯘﻕ ﺋﯘﺩﯗﻣﻰ ﺳﯩﯖﮕﻪﻧﻠﯩﻜﻰ ﻛﯚﺭﯛﻧﯜﭖ ﺗﯘﺭﯨﺪﯗ.

ﺋﯘﻳﻐﯘﺭ ﺧﻪﻟﻘﯩﻨﯩﯔ ﻣﯘﺗﻠﻪﻕ ﻛﯚﭘﭽﯩﻠﯩﻚ ﺋﯚﺯ ﺋﺎﻧﺎ ﯞﻩﺗﯩﻨﯩﺪﻩ ﻳﺎﺷﯩﻐﺎﻧﺪﯨﻦ ﺳﯩﺮﺕ ﻳﻪﻧﻪ ﺋﯧﻨﯩﻘﺴﯩﺰ ﻣﻪﻟﯘﻣﺎﺗﻼﺭ ﺑﻮﻳﯩﭽﻪ ﻧﺎﮬﺎﻳﯩﺘﻰ ﺯﻭﺭ ﺳﺎﻧﺪﯨﻜﻰ ﺋﯘﻳﻐﯘﺭﻻﺭ ﺋﻮﺗﺘﯘﺭﺍ ﺋﺎﺳﯩﻴﺎ ﺟﯘﻣﮭﯘﺭﯨﻴﻪﺗﻠﯩﺮﯨﺪﻩ ﻳﺎﺷﺎﻳﺪﯗ.

ﺑﯘﻻﺭﻧﯩﯔ ﺋﺎﺭﯨﺴﯩﺪﯨﻨﻤﯘ ﻛﯚﭘﻠﯩﮕﻪﻥ ﺩﯗﻧﻴﺎ ﭼﯧﻤﭙﯩﻴﻮﻧﻠﯩﺮﻯ ﻳﯧﺘﯩﺸﯩﭗ ﭼﯩﻘﻘﺎﻥ. ﻣﻪﺳﯩﻠﻪﻥ، ﭼﺎﻣﺒﺎﺷﭽﯩﻠﯩﻖ ﻣﺎﮬﯩﺮﻯ ﮬﯧﻴﺘﺎﺧﯘﻧﻮﭖ، ﺋﺎﻣﯧﺮﯨﻜﯩﺪﺍ ﺋﯚﺗﻜﯜﺯﯛﻟﮕﻪﻥ ﭼﺎﻣﺒﺎﺷﭽﯩﻠﯩﻖ ﻣﯘﺳﺎﺑﯩﻘﯩﺴﯩﺪﻩ ﺋﯚﺯﻯ ﺑﯩﻠﻪﻥ ﮬﻪﻝ ﻗﯩﻠﻐﯘﭺ ﻣﯘﺳﺎﺑﯩﻘﯩﻐﻪ ﭼﯜﺷﻜﻪﻥ ﺧﯩﺘﺎﻱ ﭼﺎﻣﺒﺎﺷﭽﯩﺴﯩﻨﻰ ﻳﯧﯖﯩﭗ، ﺩﯗﻧﻴﺎ ﭼﯧﻤﭙﯩﻴﻮﻧﻰ ﺑﻮﻟﻐﺎﻥ. ﺯﺍﻛﯩﺮ ﺗﻮﺧﺘﯩﻴﯧﯟ ، ﺋﻪﺧﻤﻪﺗﺠﺎﻥ ﻗﺎﺗﺎﺭﻟﯩﻘﻼﺭﻣﯘ ﺑﯩﺮ ﻗﺎﻧﭽﻪ ﻗﯧﺘﯩﻢ ﺗﺎﻳﻼﻧﺪﭼﻪ ﺑﻮﻛﺲ ﺑﻮﻳﯩﭽﻪ ﺩﯗﻧﻴﺎ ﭼﯧﻤﭙﯩﻴﻮﻧﻰ ﺋﺎﺗﺎﻟﻐﺎﻥ ﺋﯩﺪﻯ.

ﺋﯘﻳﻐﯘﺭﻻﺭ ﺧﯩﺘﺎﻳﻼﺭﺩﯨﻦ ﺑﯘﺭﯗﻥ ﺋﻮﻟﯩﻤﭙﯩﻜﺘﺎ ﭼﯧﻤﭙﯩﻴﻮﻥ ﺑﻮﻟﻐﺎﻥ

70-80-ﻳﯩﻠﻼﺭﺩﺍ ﺑﻮﻟﺴﺎ ﺋﺎﺑﺪﯗﺭﺍﺧﻤﺎﻥ ﺋﯩﺴﯩﻤﻠﯩﻚ ﺋﯘﻳﻐﯘﺭ ﺋﯘﺯﯗﻥ ﻣﻪﺯﮔﯩﻞ ﺳﺎﺑﯩﻖ ﺳﻮﯞﯦﺖ ﺋﯩﺘﺘﯩﭙﺎﻗﯩﻨﯩﯔ ﺑﻮﻛﺲ ﭼﯧﻤﭙﯩﻴﻮﻧﻰ ﺑﻮﻟﯘﭖ، ﻛﯚﭖ ﻗﯧﺘﯩﻢ ﺩﯗﻧﻴﺎ ﻣﯘﺳﺎﺑﯩﺴﯩﮕﻪ ﻗﺎﺗﻨﺎﺷﻘﺎﻥ ﮬﻪﻡ ﻳﺎﯞﺭﻭﭘﺎ ﭼﯧﻤﭙﯩﻴﻮﻧﻰ ﺑﻮﻟﻐﺎﻥ.

ﺋﺎﻻﮬﯩﺪﻩ ﺗﯩﻠﻐﺎ ﺋﯧﻠﯩﺸﻘﺎ ﺗﯧﮕﯩﺸﻠﯩﻚ ﻛﯩﺸﻰ 50-ﻳﯩﻠﻼﺭﺩﺍ ﺩﯗﻧﻴﺎ ﺋﻮﻟﯩﻤﭙﯩﻚ ﭼﯧﻤﭙﯩﻴﻮﻧﻰ ﺑﻮﻟﻐﺎﻥ ﻣﺎﺧﻤﯘﺕ ﺋﯚﻣﻪﺭﻭﭖ ﺑﻮﻟﯘﭖ، ﺋﯘ ﻗﺎﺭﯨﻐﺎ ﺋﯧﺘﯩﺶ ﺗﯜﺭﻯ ﺑﻮﻳﯩﭽﻪ ﭼﯧﻤﭙﯩﻴﻮﻥ ﺑﻮﻟﻐﺎﻥ ﺋﯩﺪﻯ.

ﻗﺎﺯﺍﻗﯩﺴﺘﺎﻧﻠﯩﻖ ﻣﺎﺧﻤﯘﺕ ﺋﯚﻣﻪﺭﻭﭖ ﺋﯘﻳﻐﯘﺭ ﻣﯩﻠﻠﯩﺘﻰ ﺋﯩﭽﯩﺪﯨﻦ ﺑﯩﺮﯨﻨﭽﻰ ﻗﯧﺘﯩﻢ ﺋﻮﻟﯩﻤﭙﯩﻜﻜﻪ ﻗﺎﺗﻨﺎﺷﻘﺎﻥ ﮬﻪﻣﺪﻩ ﺋﺎﻟﺘﯘﻥ ﻣﯧﺪﺍﻝ ﺋﺎﻟﻐﺎﻥ ﺷﻪﺧﺲ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ ﺋﯘﻳﻐﯘﺭ ﺗﻪﻧﮭﻪﺭﯨﻜﻪﺕ ﺗﺎﺭﯨﺨﯩﺪﯨﻦ ﺋﻮﺭﯗﻥ ﺋﺎﻟﺪﻯ. ﺗﻪﻧﮭﻪﺭﯨﻜﻪﺕ ﺋﯩﺸﻠﯩﺮﻯ ﻣﯘﺗﻪﺧﻪﺳﺴﯩﺴﻠﯩﺮﯨﻨﯩﯔ ﺋﯧﻴﺘﯩﺸﯩﭽﻪ، ﺋﯘﻳﻐﯘﺭ ﻳﯩﮕﯩﺘﻰ ﻣﺎﺧﻤﯘﺕ ﺋﯚﻣﻪﺭﻭﭖ ﺋﻮﻟﯩﻤﭙﯩﻚ ﭼﯧﻤﭙﯩﻴﻮﻧﻰ ﺑﻮﻟﻐﺎﻥ ﭼﺎﻏﻼﺭﺩﺍ ﺗﯧﺨﻰ ﺧﯩﺘﺎﻳﻼﺭﺩﯨﻦ ﺋﻮﻟﯩﻤﭙﯩﻚ ﭼﯧﻤﭙﯩﻴﻮﻧﻰ ﻳﯧﺘﯩﺸﯩﭗ ﭼﯩﻘﻤﯩﻐﺎﻥ ﺋﯩﻜﻪﻥ.

ﺑﯧﻠﮕﯩﻴﯩﺪﯨﻤﯘ ﺋﯘﻳﻐﯘﺭ ﭼﯧﻤﭙﯩﻴﻮﻧﻰ ﺑﺎﺭ

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ ﺑﯩﺮ ﻕ ﺋﯩﺴﯩﻢ ﺋﯘﻳﻐﯘﺭﻻﺭ ﻳﺎﯞﺭﻭﭘﺎ ﺩﯙﻟﻪﺗﻠﯩﺮﻯ ﯞﻩ ﺷﯩﻤﺎﻟﯩﻲ ﺋﺎﻣﯧﺮﯨﻜﯩﻐﺎ ﻛﯧﻠﯩﭗ ﻣﺎﻛﺎﻧﻼﺷﻤﺎﻗﺘﺎ. ﺋﯘﻻﺭﻧﯩﯔ ﺯﻭﺭ ﺑﯩﺮ ﻗﯩﺴﯩﻤﻰ ﻗﺎﺯﺍﻗﯩﺴﺘﺎﻥ، ﻗﯩﺮﻏﯩﺰﯨﺴﺘﺎﻥ ﯞﻩ ﺋﯚﺯﺑﯧﻜﯩﺴﺘﺎﻥ ﻗﺎﺗﺎﺭﻟﯩﻖ ﻣﻪﻣﻠﯩﻜﻪﺗﻠﻪﺭﺩﯨﻦ ﻛﻪﻟﮕﻪﻥ. ﻳﺎﯞﺭﻭﭘﺎﺩﯨﻜﻰ ﺑﯧﻠﮕﯩﻴﻪ ﺋﯘﻳﻐﯘﺭﻻﺭ ﺧﯧﻠﻰ ﻛﯚﭖ ﻣﺎﻛﺎﻧﻼﺷﻘﺎﻥ ﺟﺎﻳﻼﺭﻧﯩﯔ ﺑﯩﺮﻯ ﺑﻮﻟﯘﭖ، ﺑﯧﻠﮕﯩﻴﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﻪﺗﭽﯩﻠﯩﻜﻰ ﻣﻪﺩﻩﻧﯩﻴﻪﺕ-ﺳﻪﻧﺌﻪﺕ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺭﺍﯞﺍﺟﻼﻧﺪﯗﺭﯗﺷﺘﯩﻦ ﺑﺎﺷﻘﺎ ﻳﻪﻧﻪ ﺗﻪﻧﮭﻪﺭﯨﻜﻪﺕ ﺋﯩﺸﻠﯩﺮﯨﻐﯩﻤﯘ ﺋﯧﺘﯩﺒﺎﺭ ﺑﻪﺭﻣﻪﻛﺘﻪ.

ﺑﯧﻠﮕﯩﻴﻪ ﺋﯘﻳﻐﯘﺭﻟﯩﺮﻯ ﺗﻪﺭﯨﭙﯩﺪﯨﻦ ﭼﯩﻘﯩﺮﯨﻠﯩﺪﯨﻐﺎﻥ "ﺋﯜﻣﯩﺪ" ﺋﯩﻨﺘﯧﺮﻧﯧﺖ ﺗﻮﺭﯨﺪﯨﻜﻰ ﺋﯘﭼﯘﺭﻻﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻳﯧﻘﯩﻨﺪﺍ 17 ﻳﺎﺷﻠﯩﻖ ﺋﯘﻳﻐﯘﺭ ﻳﯩﮕﯩﺘﻰ ﺭﻭﺳﯘﻝ ﺯﯨﻴﺎﯞﯨﺪﯨﻨﻮﭖ، ﻳﺎﺷﻼﺭﻧﯩﯔ ﺑﻮﻛﺲ ﻣﯘﺳﺎﺑﯩﻘﯩﺴﯩﺪﻩ ﭘﯜﺗﯜﻥ ﺑﯧﻠﮕﯩﻴﻪ ﭼﯧﻤﭙﯩﻴﻮﻧﻰ ﺑﻮﻟﯘﭖ ﺋﺎﺗﺎﻟﻐﺎﻥ ﺋﯩﻜﻪﻥ.

ﻗﺎﺯﺍﻗﯩﺴﺘﺎﻧﺪﯨﻦ ﺑﯧﻠﮕﯩﻴﯩﮕﻪ ﻛﯧﻠﯩﭗ ﭼﻮﯓ ﺑﻮﻟﻐﺎﻥ ﺭﻭﺳﯘﻝ ﺑﻮﻛﺴﻘﺎ ﺋﺎﻻﮬﯩﺪﻩ ﺋﯩﺸﺘﯩﻴﺎﻕ ﺑﺎﻏﻼﭖ، ﻣﻪﺷﯩﻖ ﺋﯧﻠﯩﭗ ﺑﺎﺭﻏﺎﻥ، ﺋﯘﻧﯩﯔ ﺗﺎﻻﻧﺘﯩﻨﻰ ﺳﻪﺯﮔﻪﻥ ﺑﯧﻠﮕﯩﻴﯩﻨﯩﯔ ﻣﻪﺷﮭﯘﺭ ﺑﻮﻛﺲ ﭼﯧﻤﭙﯩﻴﻮﻧﻰ ﯞﻩ ﺗﺮﯨﻨﯧﺮﻯ ﺟﯧﻜﺴﻮﻥ ﺋﻮﺳﯧﻲ ﺑﻮﻧﯘﺳﻨﯩﯔ ﻳﯧﺘﻪﻛﭽﯩﻠﯩﻜﯩﺪﻩ ﻣﻪﺷﯩﻖ ﺋﯧﻠﯩﭗ ﺑﺎﺭﻏﺎﻥ. 17 ﻳﺎﺷﻠﯩﻖ ﺑﯘ ﻳﺎﺵ ﻳﯩﮕﯩﺘﯩﻨﯩﯔ ﭼﯧﻤﭙﯩﻴﻮﻥ ﺑﻮﻟﻐﺎﻧﻠﯩﻘﻰ ﮬﻪﻗﻘﯩﺪﯨﻜﻰ ﺧﻪﯞﻩﺭﻟﻪﺭ ﮬﻪﻣﺪﻩ ﺋﯘ ﯞﻩ ﺋﯘﻳﻐﯘﺭﻻﺭ ﮬﻪﻗﻘﯩﺪﯨﻜﻰ ﺋﯘﭼﯘﺭﻻﺭ ﺑﯧﻠﮕﯩﻴﻪ ﻣﻪﺗﺒﯘﺋﺎﺗﻠﯩﺮﯨﺪﯨﻦ ﺋﻮﺭﯗﻥ ﺋﺎﻟﻐﺎﻥ.

ﺗﻪﻧﮭﻪﺭﯨﻜﻪﺕ ﺋﺎﺩﻩﻣﻨﯩﯔ ﺳﺎﻻﻣﻪﺗﻠﯩﻜﻰ ﺋﯜﭼﯜﻥ ﭘﺎﻳﺪﯨﻠﯩﻖ ﺑﻮﻟﯘﭘﻼ ﻗﺎﻟﻤﺎﺳﺘﯩﻦ ﺑﻪﻟﻜﻰ، ﺧﻪﻟﻘﺎﺭﺍ ﻣﯘﺳﺎﺑﯩﻘﯩﻠﻪﺭﺩﻩ ﺋﺎﻟﺘﯘﻥ ﻣﯧﺪﺍﻟﻼﺭﻏﺎ ﺋﯧﺮﯨﺸﯩﺶ ﺑﯩﺮ ﻣﯩﻠﻠﻪﺗﻨﯩﯔ ﺩﯗﻧﻴﺎﯞﻯ ﺷﯚﮬﺮﯨﺘﻰ ﯞﻩ ﻗﯘﺩﺭﯨﺘﯩﻨﻰ ﺋﺎﺷﯘﺭﯗﺷﺘﺎ ﯞﺍﺳﯩﺘﯩﭽﯩﻠﯩﻚ ﺭﻭﻝ ﺋﻮﻳﻨﺎﻳﺪﯗ. (ﺋﯜﻣﯩﺪﯞﺍﺭ)