ﺋﯘﻳﻐﯘﺭﻻﺭ ﺗﯜﺭﻙ ﺩﯗﻧﻴﺎﺳﻰ ﻣﻪﺩﻩﻧﯩﻴﻪﺕ ﻛﯚﺭﮔﻪﺯﻣﯩﺴﯩﮕﻪ ﻗﺎﺗﻨﺎﺷﺘﻰ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺩﻩﻧﯩﻴﻪﺕ ﯞﻩ ﻫﻪﻣﻜﺎﺭﻟﯩﻖ ﺟﻪﻣﺌﯩﻴﯩﺘﻰ ﺋﻪﻧﻘﻪﺭﻩ ﺷﯚﺑﯩﺴﻰ ﺟﻪﻣﺌﯩﻴﯩﺘﻰ ﺗﻪﺭﯨﭙﯩﺪﯨﻦ ﻧﻪﺷﯩﺮ ﻗﯩﻠﯩﻨﻐﺎﻥ ﮔﯧﺰﯨﺖ، ﮊﯗﺭﻧﺎﻝ، ﻛﯩﺘﺎﺑﻼﺭ، ﺋﯘﻳﻐﯘﺭﻻﺭﻧﯩﯔ ﻛﯩﻴﯩﻢ-ﻛﯧﭽﻪﻛﻠﯩﺮﻯ ﯞﻩ ﻣﯘﺯﯨﻜﺎ ﭼﺎﻟﻐﯘ ﺋﻪﺳﯟﺍﺑﻠﯩﺮﯨﻨﻰ ﻛﯚﺭﮔﻪﺯﻣﻪ ﻗﯩﻠﺪﻯ. RFA Photo / Erkin Tarim

ﺗﯜﺭﻛﯩﻴﻪ ﻣﺎﺋﺎﺭﯨﭙﭽﯩﻼﺭ ﺋﯘﻳﯘﺷﻤﯩﺴﯩﻨﯩﯔ ﺋﻮﺭﯗﻧﻼﺷﺘﯘﺭﯗﺷﻰ ﺑﯩﻠﻪﻥ ﺗﯜﺭﻛﯩﻴﻪ ﻣﺎﺋﺎﺭﯨﭗ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺷﯘﺭﺍ ﺯﺍﻟﯩﺪﺍ ﺗﯜﺭﻙ ﺩﯗﻧﻴﺎﺳﻰ ﻣﻪﺩﻩﻧﯩﻴﻪﺕ ﻛﯚﺭﮔﻪﺯﻣﯩﺴﻰ ﺋﯚﺗﻜﯜﺯﯛﻟﺪﻯ. ﺑﯘ ﻛﯚﺭﮔﻪﺯﻣﯩﮕﻪ ﺋﻪﺯﻩﺭﺑﻪﻳﺠﺎﻥ ﻣﻪﺩﻩﻧﯩﻴﻪﺕ ﺟﻪﻣﺌﯩﻴﯩﺘﻰ، ﻗﯩﺮﯨﻢ ﺗﺎﺗﺎﺭ ﺟﻪﻣﺌﯩﻴﯩﺘﻰ، ﺳﯩﭙﯘﺭﯗﺱ ﻣﻪﺩﻩﻧﯩﻴﻪﺕ ﺟﻪﻣﺌﯩﻴﯩﺘﻰ، ﺋﯩﺮﺍﻕ ﺗﯜﺭﻛﻤﻪﻧﻠﯩﺮﻯ ﻣﻪﺩﻩﻧﯩﻴﻪﺕ ﺟﻪﻣﺌﯩﻴﯩﺘﻰ، ﺑﺎﻟﻘﺎﻥ ﺗﯜﺭﻛﻠﯩﺮﻯ ﯞﻩﺧﭙﻰ ﺑﺎﺷﭽﯩﻠﯩﻘﯩﺪﯨﻜﻰ ﻛﯚﭖ ﺳﺎﻧﺪﺍ ﺋﺎﻣﻤﯩﯟﻯ ﺗﻪﺷﻜﯩﻼﺗﻼﺭ ﻗﺎﺗﻨﺎﺷﺘﻰ ﯞﻩ ﺑﯚﻟﯜﻡ ﺋﯧﭽﯩﭗ ﺋﯚﺯﻟﯩﺮﯨﻨﯩﯔ ﻣﻪﺩﻩﻧﯩﻴﯩﺘﯩﮕﻪ ﺧﺎﺱ ﺑﯘﻳﯘﻣﻠﯩﺮﯨﻨﻰ ﻛﯚﺭﮔﻪﺯﻣﻪ ﻗﯩﻠﺪﻯ. ﺋﯘﻳﻐﯘﺭﻻﺭﻏﺎ ﯞﺍﻛﺎﻟﯩﺘﻪﻥ ﺋﻪﻧﻘﻪﺭﻩﺩﻩ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺩﻩﻧﯩﻴﻪﺕ ﯞﻩ ﻫﻪﻣﻜﺎﺭﻟﯩﻖ ﺟﻪﻣﺌﯩﻴﯩﺘﻰ ﺋﻪﻧﻘﻪﺭﻩ ﺷﯚﺑﯩﺴﻰ ﺑﯩﺮ ﺑﯚﻟﯜﻡ ﺋﯧﭽﯩﭗ، ﺟﻪﻣﺌﯩﻴﯩﺘﻰ ﺗﻪﺭﯨﭙﯩﺪﯨﻦ ﻧﻪﺷﯩﺮ ﻗﯩﻠﯩﻨﻐﺎﻥ ﮔﯧﺰﯨﺖ، ﮊﯗﺭﻧﺎﻝ، ﻛﯩﺘﺎﺑﻼﺭ، ﺋﯘﻳﻐﯘﺭﻻﺭﻧﯩﯔ ﻛﯩﻴﯩﻢ-ﻛﯧﭽﻪﻛﻠﯩﺮﻯ ﯞﻩ ﻣﯘﺯﯨﻜﺎ ﭼﺎﻟﻐﯘ ﺋﻪﺳﯟﺍﺑﻠﯩﺮﯨﻨﻰ ﻛﯚﺭﮔﻪﺯﻣﻪ ﻗﯩﻠﺪﻯ.

ﺑﯘﻻﺭﺩﯨﻦ ﺑﺎﺷﻘﺎ ﺋﯘﻳﻐﯘﺭ ﺩﯨﻴﺎﺭﯨﻨﯩﯔ ﻗﯩﺴﻘﯩﭽﻪ ﺗﺎﺭﯨﺨﻰ، ﻳﻪﺭ ﺋﺎﺳﺘﻰ ﯞﻩ ﻳﻪﺭ ﺋﯜﺳﺘﻰ ﺑﺎﻳﻠﯩﻘﻠﯩﺮﻯ ﯞﻩ ﺋﯘﻳﻐﯘﺭﻻﺭ ﺩﯗﭼﺎﺭ ﺑﻮﻟﯩﯟﺍﺗﻘﺎﻥ ﺋﯩﻨﺴﺎﻥ ﻫﻪﻗﻠﯩﺮﻯ ﺩﻩﭘﺴﻪﻧﺪﯨﻠﯩﺮﻯ ﻛﯚﺭﺳﯩﺘﯩﻠﮕﻪﻥ ﺭﻩﺳﯩﻤﻠﻪﺭﻣﯘ ﻛﯚﺭﮔﻪﺯﻣﻪ ﻣﻪﻳﺪﺍﻧﯩﻐﺎ ﺋﯧﺴﯩﻠﻐﺎﻥ ﺑﻮﻟﯘﭖ، ﺑﯘ ﻛﯚﭖ ﺳﺎﻧﺪﺍ ﺟﯘﺭﻧﺎﻟﯩﺴﺘﻼﺭﻧﯩﯔ ﯞﻩ ﻛﯩﺸﯩﻠﻪﺭﻧﯩﯔ ﺩﯨﻘﻘﻪﺕ ﺋﯧﺘﯩﺒﺎﺭﯨﻨﻰ ﺋﯚﺯﯨﮕﻪ ﺗﺎﺭﺗﺘﻰ. ﻫﻪﺭﻗﺎﻳﺴﻰ ﺗﯧﻠﯩﯟﯨﺰﯨﻴﻪﻟﻪﺭ ﺑﯘ ﻛﯚﺭﮔﻪﺯﻣﻪ ﻫﻪﻗﻘﯩﺪﻩ ﺑﻪﺭﮔﻪﻥ ﺧﻪﯞﻩﺭﻟﯩﺮﯨﺪﻩ ﺋﯘﻳﻐﯘﺭ ﻣﻪﺳﯩﻠﯩﺴﯩﮕﻪ ﺋﺎﻻﻫﯩﺪﻩ ﻳﻪﺭ ﺑﻪﺭﺩﻯ. ﺑﯩﺰ ﺑﯘ ﻛﯚﺭﮔﻪﺯﻣﻪ ﻣﻪﻳﺪﺍﻧﯩﻐﺎ ﺑﯧﺮﯨﭗ، ﺑﯘ ﻛﯚﺭﮔﻪﺯﻣﯩﻨﻰ ﺋﺎﭼﻘﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺩﻩﻧﯩﻴﻪﺕ ﯞﻩ ﻫﻪﻣﻜﺎﺭﻟﯩﻖ ﺟﻪﻣﺌﯩﻴﯩﺘﻰ ﺑﺎﺷﻠﯩﻘﻰ ﻫﺎﻳﺮﯗﻟﻼﻫ ﺋﻪﻓﻪﻧﺪﯨﮕﯩﻞ ﺋﻪﭘﻪﻧﺪﻯ ﯞﻩ ﺯﯨﻴﺎﺭﻩﺗﭽﯩﻠﻪﺭﮔﻪ ﻣﯩﻜﺮﻭﻓﻮﻧﯩﻤﯩﺰﻧﻰ ﺋﯘﺯﺍﺗﺘﯘﻕ.

ﻛﯚﺭﮔﻪﺯﻣﯩﻨﻰ ﻛﯚﺯﺩﯨﻦ ﻛﻪﭼﯜﺭﯨﯟﺍﺗﻘﺎﻥ ﻳﻪﺭﻟﯩﻚ ﺧﻪﻟﯩﻘﻠﻪﺭ. RFA Photo / Erkin Tarim

ﻛﯧﻴﯩﻦ ﺑﯘ ﻳﻪﺭﺩﻩ ﻛﯚﺭﮔﻪﺯﻣﻪ ﺋﯧﭽﯩﭗ ﺋﻮﻟﺘﯘﺭﻏﺎﻥ ﯞﻩ ﺋﯘﻳﻐﯘﺭ ﺑﯚﻟﻤﯩﺴﯩﻨﻰ ﺋﺎﻳﻠﯩﻨﯩﯟﺍﺗﻘﺎﻥ ﺋﻪﺯﻩﺭﺑﻪﻳﺠﺎﻥ ﻣﻪﺩﻩﻧﯩﻴﻪﺕ ﺟﻪﻣﺌﯩﻴﯩﺘﻰ ﺋﯩﺠﺮﺍﺋﯩﻴﻪ ﻫﻪﻳﺌﻪﺕ ﺋﻪﺯﺍﺳﻰ ﺩﺭ. ﻳﺎﻟﭽﯩﻦ ﺳﺎﺭﯨﻘﺎﻳﺎ ﺋﻪﭘﻪﻧﺪﻯ ﺑﯘ ﻛﯚﺭﮔﻪﺯﻣﯩﻨﻰ ﻛﯚﺭﮔﻪﻧﺪﯨﻦ ﻛﯧﻴﯩﻨﻜﻰ ﺗﻪﺳﯩﺮﺍﺗﯩﻨﻰ ﺋﺎﯕﻠﯩﺘﯩﭗ ﻣﯘﻧﺪﺍﻕ ﺩﯦﺪﻯ: "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺩﯦﮕﻪﻥ ﯞﺍﻗﯩﺘﺘﺎ ﻛﯚﺯ ﺋﺎﻟﺪﯨﻤﻐﺎ ﺑﯩﺮ ﻣﯘﺟﺎﺩﯨﻠﻪ ﻛﯧﻠﯩﺪﯗ. ﺋﻪﻣﻤﺎ ﺑﯘ ﺩﯗﻧﻴﺎﺩﯨﻜﻰ ﺋﻪﯓ ﻗﯧﻴﯩﻦ ﻣﯘﺟﺎﺩﯨﻠﯩﻠﻪﺭﺩﯨﻦ ﺑﯩﺮﯨﺪﯗﺭ. ﺑﯘ ﺋﯘﺯﯗﻥ ﻳﯩﻠﻼﺭﺩﯨﻦ ﺑﯧﺮﻯ ﻫﺎﺭﻣﺎﻱ ﺗﺎﻟﻤﺎﻱ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﻣﯘﺟﺎﺩﯨﻠﯩﺪﯗﺭ. ﺋﯘﻳﻐﯘﺭ ﺩﯦﮕﻪﻥ ﯞﺍﻗﯩﺘﺘﺎ ﻛﯚﺯ ﺋﺎﻟﺪﯨﻤﻐﺎ ﺑﺎﻱ ﻣﻪﺩﻩﻧﯩﻴﻪﺗﻜﻪ ﺋﯩﮕﻪ ﺑﯩﺮ ﻣﯩﻠﻠﻪﺕ ﻛﯧﻠﯩﺪﯗ. ﺋﯘﻳﻐﯘﺭﻻﺭ ﺑﯘ ﻛﯚﺭﮔﻪﺯﻣﯩﺪﯨﻤﯘ ﻛﯚﺭﮔﯩﻨﯩﻤﯩﺰﺩﻩﻙ، ﺑﺎﻱ ﻳﯧﻤﻪﻙ ﺋﯩﭽﻤﻪﻙ، ﻛﯩﻴﯩﻢ-ﻛﯧﭽﻪﻙ ﯞﻩ ﺳﻪﻧﺌﻪﺕ ﻣﻪﺩﻩﻧﯩﻴﯩﺘﯩﮕﻪ ﺋﯩﮕﻪ. ﺋﻪﭘﺴﯘﺳﻜﻰ ﺑﯜﮔﯜﻥ ﺑﯘﻧﺪﺍﻕ ﺑﺎﻱ ﻣﻪﺩﻩﻧﯩﻴﻪﺗﻜﻪ ﺋﯩﮕﻪ ﺑﯩﺮ ﻣﯩﻠﻠﻪﺕ ﺧﯩﺘﺎﻱ ﺧﻪﻟﻖ ﺟﯘﻣﻬﯘﺭﯨﻴﯩﺘﯩﻨﯩﯔ ﭘﯩﻼﻧﻠﯩﻖ ﻫﺎﻟﺪﺍ ﻳﯜﺭﮔﯜﺯﯨﯟﺍﺗﻘﺎﻥ ﺋﺎﺳﺴﯩﻤﯩﻠﻴﺎﺗﺴﯩﻴﻪ ﺳﯩﻴﺎﺳﯩﺘﯩﮕﻪ ﺩﯗﭼﺎﺭ ﺑﻮﻟﻤﺎﻗﺘﺎ."

ﺩﺭ. ﻳﺎﻟﭽﯩﻦ ﺳﺎﺭﯨﻘﺎﻳﺎ ﺋﻪﭘﻪﻧﺪﻯ ﻳﻪﻧﻪ ﻣﯘﻧﺪﺍﻕ ﺩﯦﺪﻯ: " ﺑﯜﮔﯜﻧﻜﻰ ﻛﯜﻧﺪﻩ ﺋﯘﻳﻐﯘﺭﻻﺭ ﺋﯚﺯ ﯞﻩﺗﯩﻨﻰ ﺑﻮﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﻣﯘﺋﺎﻣﯩﻠﯩﺴﻰ ﻛﯚﺭﻣﻪﻛﺘﻪ. ﺧﯩﺘﺎﻱ ﻧﻮﭘﯘﺳﻰ ﻛﯚﭘﻪﻳﮕﻪﻧﺴﯧﺮﻯ ﺋﯚﺯ ﺗﯘﭘﺮﺍﻗﻠﯩﺮﯨﺪﺍ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﻫﺎﻟﯩﻐﺎ ﭼﯜﺷﯜﭖ ﻗﯧﻠﯩﺶ ﺋﺎﻟﺪﯨﺪﺍ ﺗﯘﺭﻣﺎﻗﺘﺎ. ﺋﻪﻣﻤﺎ ﻣﻪﻥ ﺋﯘﻳﻐﯘﺭﻻﺭﻧﯩﯔ ﺋﻪﺯﻩﺭﺑﻪﻳﺠﺎﻧﻐﺎ ﺋﻮﺧﺸﺎﺵ ﺑﺎﻟﺪﯗﺭﺭﺍﻕ ﺋﯚﺯ ﺋﻪﺭﻛﯩﻨﻠﯩﻜﯩﮕﻪ، ﻣﯘﺳﺘﻪﻗﯩﻞ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺩﯙﻟﯩﺘﯩﮕﻪ ﺋﯩﮕﻪ ﺑﻮﻟﯘﺷﯩﻨﻰ ﺗﯩﻠﻪﻳﻤﻪﻥ. ﺑﯩﺰ ﻗﻪﻳﺴﻪﺭﯨﺪﻩ ﺋﯩﺴﺘﺎﻧﺒﯘﻟﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺗﻪﺷﻜﯩﻼﺗﻠﯩﺮﯨﻨﯩﯔ ﭘﺎﺋﺎﻟﯩﻴﻪﺗﻠﯩﺮﻯ ﺋﺎﺭﻗﯩﻠﯩﻖ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺩﺍﯞﺍﺳﻰ ﺑﯩﻠﻪﻥ ﺗﻮﻧﯘﺷﺘﯘﻕ. ﻣﻪﻥ ﺗﯜﺭﻛﯩﻴﯩﺪﻩ ﻫﺎﺭﻣﺎﻱ ﺗﺎﻟﻤﺎﻱ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﺋﻪﺭﻛﯩﻨﻠﯩﻜﻰ ﺋﯜﭼﯜﻥ ﻛﯜﺭﻩﺵ ﻗﯩﻠﯩﯟﺍﺗﻘﺎﻥ ﺋﯘﻳﻐﯘﺭ ﻗﯧﺮﯨﻨﺪﺍﺷﻠﯩﺮﯨﻤﻨﻰ ﻛﯚﺭﺩﯛﻡ، ﻫﻪﻣﻤﯩﺴﻰ ﺋﯚﺯ ﺋﺎﻧﺎ ﺗﯩﻠﯩﻨﻰ ﺑﯩﻠﯩﺪﯗ. ﺋﯘﻳﻐﯘﺭﻻﺭ ﺋﯚﺯ ﺩﻩﯞﺍﺳﯩﻐﺎ ﺋﯩﮕﻪ ﭼﯩﻘﯩﺸﻘﺎ ﺩﺍﯞﺍﻡ ﻗﯩﻠﺴﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﭼﻮﻗﯘﻡ ﺋﺎﺯﺍﺕ ﺑﻮﻟﯩﺪﯗ." (ﺋﻪﺭﻛﯩﻦ ﺗﺎﺭﯨﻢ)