ﺋﯩﻨﻘﯩﻼﺑﯩﻲ ﺷﺎﺋﯩﺮ ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻣﻨﯩﯔ "ﻫﻪﺳﺮﻩﺕ" ﻧﺎﻣﻠﯩﻖ ﺷﯧﺌﯩﺮ ﺗﻮﭘﻠﯩﻤﻰ ﻫﻪﻗﻘﯩﺪﻩ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭﺟﺎﻥ ﺗﻮﺧﺘﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻡ ﺋﯘﻳﻐﯘﺭ ﻳﯧﯖﯩﻠﯩﻖ ﻫﻪﺭﯨﻜﯩﺘﯩﻨﯩﯔ ﺑﺎﻳﺮﺍﻗﺪﺍﺭﻯ، ﺟﺎﻣﺎﺋﻪﺕ ﺋﻪﺭﺑﺎﺑﻰ، ﺋﺎﺗﺎﻗﻠﯩﻖ ﺋﺎﻟﯩﻢ، ﺷﯘﻧﺪﺍﻗﻼ ﻳﯧﯖﻰ ﺯﺍﻣﺎﻥ ﺋﯘﻳﻐﯘﺭ ﻣﺎﺋﺎﺭﯨﭙﯩﻐﺎ ﺋﺎﺳﺎﺱ ﺳﺎﻟﻐﯘﭼﯩﻼﺭﻧﯩﯔ ﺑﯩﺮﻯ ﺑﻮﻟﻐﺎﻥ ﺋﺎﺑﺪﯗﻟﻘﺎﺩﯨﺮ ﺩﺍﻣﻮﻟﻼﻣﻨﯩﯔ ﺋﺎﺋﯩﻠﯩﺴﯩﺪﻩ، ﺋﯘﻳﻐﯘﺭ ﺋﯧﻠﯩﻨﯩﯔ ﺋﺎﺗﯘﺵ ﺷﻪﻫﯩﺮﯨﺪﻩ 1894 - ﻳﯩﻠﻰ ﺩﯗﻧﻴﺎﻏﺎ ﻛﻪﻟﮕﻪﻥ ﺋﯩﻨﻘﯩﻼﺑﯩﻲ ﺷﺎﺋﯩﺮ ﺋﯩﺪﻯ.

ﺳﯩﺮﺍﺟﯩﺪﺩﯨﻦ ﺋﻪﺯﯨﺰﯨﻲ ﺑﯩﻠﻪﻥ ﺳﯚﻫﺒﻪﺕ

ﯞﻩﺗﻪﻧﭙﻪﺭﯞﻩﺭ ﻳﺎﺵ ﺋﺎﻟﯩﻢ ﺳﯩﺮﺍﺟﯩﺪﺩﯨﻦ ﺋﻪﺯﯨﺰﯨﻲ ﺋﯩﻨﻘﯩﻼﺑﯩﻲ ﺷﺎﺋﯩﺮ ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻡ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ: " ﺋﯩﻨﻘﯩﻼﺑﯩﻲ ﺷﺎﺋﯩﺮ ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻡ ﺑﺎﺷﻼﻧﻐﯘﭺ - ﺋﻮﺗﺘﯘﺭﺍ ﻣﻪﻛﺘﻪﭘﻠﻪﺭﻧﻰ ﻗﻪﺷﻘﻪﺭﺩﻩ ﭘﯜﺗﺘﯜﺭﮔﻪﻥ. ﺑﯘ ﺟﻪﺭﻳﺎﻧﺪﺍ ﺋﺎﺗﯩﺴﻰ ﺋﺎﺑﺪﯗﻗﺎﺩﯨﺮ ﺩﺍﻣﻮﻟﻼﻡ ﯞﻩ ﺑﺎﺷﻘﺎ ﺋﯘﺳﺘﺎﺯﻻﺭﺩﯨﻦ ﺋﻪﺭﻩﺏ، ﭘﺎﺭﺱ ﺗﯩﻠﻠﯩﺮﯨﻨﻰ ﺋﯚﮔﻪﻧﮕﻪﻥ. ﺷﯘﻧﯩﯖﺪﯨﻦ ﻛﯧﻴﯩﻦ، ﺩﺍﻣﻮﻟﻼﻡ ﺋﻮﻏﻠﯩﻨﻰ ﭼﻪﺕ ﺋﻪﻟﺪﯨﻜﻰ ﺋﺎﻟﯩﻲ ﺑﯩﻠﯩﻢ ﻳﯘﺭﺗﻠﯩﺮﯨﺪﺍ ﺋﻮﻗﯘﺗﯘﺵ ﻣﻪﻗﺴﯩﺘﯩﺪﻩ ﻫﯩﻨﺪﯨﺴﺘﺎﻧﻐﺎ ﺋﻪﯞﻩﺗﯩﺪﯗ. 1924 - ﻳﯩﻠﻰ 8- ﺋﺎﻳﺪﺍ ﺧﯩﺘﺎﻱ ﻣﯘﺳﺘﻪﺑﯩﺖ ﻫﺎﻛﯩﻤﯩﻴﯩﺘﯩﻨﯩﯔ ﭘﯩﻼﻧﻠﯩﺸﻰ، ﺳﺎﺗﻘﯘﻥ ﻣﯘﻧﺎﭘﯩﻘﻼﺭﻧﯩﯔ ﻗﻮﻝ ﺳﯧﻠﯩﺸﻰ ﺑﯩﻠﻪﻥ ﺋﺎﺑﺪﯗﻟﻘﺎﺩﯨﺮ ﺩﺍﻣﻮﻟﻼﻡ ﻗﻪﺷﻘﻪﺭ ﺷﻪﻫﯩﺮﯨﺪﻩ ﺷﻪﭘﻘﻪﺗﺴﯩﺰﻟﻪﺭﭼﻪ ﺷﯧﻬﯩﺖ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻦ، ﺋﯘ ﺋﺎﻧﺎ ﻳﯘﺭﺗﯩﻐﺎ ﻗﺎﻳﺘﯩﭗ ﺑﯧﺮﯨﭗ، ﯞﻩﺗﯩﻨﻰ ﯞﻩ ﺧﻪﻟﻘﯩﻨﯩﯔ ﻣﯘﺳﺘﻪﻗﯩﻠﻠﯩﻘﻰ ﻳﻮﻟﯩﺪﺍ ﺗﻮﺧﺘﺎﯞﺳﯩﺰ ﻛﯜﺭﻩﺵ ﻗﯩﻠﻐﺎﻥ. ﺋﯩﻨﻘﯩﻼﺑﯩﻲ ﺷﺎﺋﯩﺮ ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻡ ﻫﯩﻨﺪﯨﺴﺘﺎﻧﺪﯨﻦ ﻗﺎﻳﺘﯩﭗ ﺑﺎﺭﻏﺎﻧﺪﯨﻦ ﻛﯧﻴﯩﻨﻜﻰ 58 ﻳﯩﻠﻠﯩﻖ ﻫﺎﻳﺎﺗﯩﻨﯩﯔ 43 ﻳﯩﻠﺪﯨﻦ ﻛﯚﭘﺮﻩﻛﯩﻨﻰ ﺧﯩﺘﺎﻱ ﻣﯘﺳﺘﻪﺑﯩﺘﻠﯩﺮﯨﻨﯩﯔ ﺗﯜﺭﻣﯩﻠﯩﺮﯨﺪﻩ ﺋﯚﺗﻜﯜﺯﮔﻪﻥ. 1980- ﻳﯩﻠﻰ ﻛﯜﺯ ﺋﺎﻳﻠﯩﺮﯨﺪﺍ ﻛﯧﺴﻪﻟﻠﯩﻚ ﺳﻪﯞﻩﺑﯩﺪﯨﻦ ﻗﺎﻣﺎﻗﺘﯩﻦ ﺑﻮﺷﯩﺘﯩﻠﻐﺎﻥ. ﺩﯗﻧﻴﺎ ﺳﯩﻴﺎﺳﯩﻲ ﺗﺎﺭﯨﺨﯩﺪﺍ ﻣﯩﺴﻠﻰ ﻛﯚﺭﯛﻟﻤﯩﮕﻪﻥ ﺩﻩﺭﯨﺠﯩﺪﻩ ﺋﯘﺯﯗﻥ ﻣﯘﺩﺩﻩﺕ ﺗﯜﺭﻣﯩﺪﻩ ﻳﺎﺗﻘﺎﻥ ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻡ 1982 - ﻳﯩﻠﻰ ﺋﯜﺭﯛﻣﭽﯩﺪﻩ ﭘﻮﻳﯩﺰ ﯞﻩﻗﻪﺳﯩﺪﻩ ﺑﯘ ﺩﯗﻧﻴﺎﺩﯨﻦ ﺋﺎﻳﺮﯨﻠﻐﺎﻥ."

ﺷﺎﺋﯩﺮﻧﯩﯔ ﺷﯧﺌﯩﺮ ﻳﯧﺰﯨﺸﻘﺎ ﺑﺎﺷﻠﯩﺸﻰ

ﺳﯩﺮﺍﺟﯩﺪﺩﯨﻦ ﺋﻪﺯﯨﺰﯨﻴﻨﯩﯔ ﺋﯧﻴﺘﯩﺸﯩﭽﻪ، ﺋﺎﺑﺪﯗﻟﺌﻪﺯﯨﺰ ﻣﻪﺧﺴﯘﻣﻨﯩﯔ 1920 - ﻳﯩﻠﻼﺭﺩﯨﻦ ﺑﺎﺷﻼﭖ ﺷﯧﺌﯩﺮﻻﺭﻧﻰ ﻳﯧﺰﯨﺸﻘﺎ ﺑﺎﺷﻠﯩﻐﺎﻧﻠﯩﻘﻰ ﻣﻪﻟﯘﻡ. ﺋﯚﺯﯨﻨﯩﯔ ﺋﯩﺠﺎﺩﯨﻴﻪﺕ ﺳﻪﻣﻪﺭﯨﻠﯩﺮﯨﮕﻪ ﺋﯧﺘﯩﻘﺎﺩ ﻧﻮﻗﺘﯩﺴﯩﺪﯨﻦ ﻗﺎﺭﺍﺷﻨﻰ ﺑﯩﺮ ﻣﯩﻨﯘﺗﻤﯘ ﺋﯘﻧﯘﺗﻤﯩﻐﺎﻥ ﺷﺎﺋﯩﺮ ﺋﯚﺯﯨﻨﯩﯔ ﻣﯘﺗﻠﻪﻕ ﺳﯚﻳﮕﯜﺳﯩﻨﻰ، ﺋﯩﺨﻼﺳﯩﻨﻰ، ﺋﻪﻗﯩﻞ ﭘﺎﺭﺍﺳﯩﺘﯩﻨﻰ ﯞﻩ ﺷﯘﻧﺪﺍﻗﻼ ﺑﺎﺭﻟﯩﻘﯩﻨﻰ ﺧﻪﻟﻘﯩﻨﻰ ﺋﯚﺯﯨﻨﯩﯔ ﺋﯩﺰﺯﻩﺕ -ﺋﺎﺑﺮﻭﻳﯩﻨﻰ، ﺋﺎﺭ- ﻧﻮﻣﯘﺳﯩﻨﻰ، ﻣﻪﺩﻩﻧﯩﻲ - ﻣﯩﺮﺍﺳﻠﯩﺮﯨﻨﻰ، ﺩﯨﻨﯩﻲ ﯞﻩ ﻣﯩﻠﻠﯩﻲ ﺋﯧﺘﯩﻘﺎﺩﯨﻨﻰ ﻗﻮﻏﺪﺍﺷﻘﺎ ﭼﺎﻗﯩﺮﯨﺸﺘﯩﻦ، ﺟﻪﻧﻨﻪﺕ ﻣﯩﺴﺎﻟﻰ ﮔﯜﺯﻩﻝ ﯞﻩﺗﯩﻨﯩﻨﯩﯔ ﺗﻪﺑﯩﺌﯩﻲ ﻣﻪﻧﺰﯨﺮﯨﻠﯩﺮﯨﻨﻰ ﺗﻪﺳﯟﯨﺮﻟﻪﺷﺘﯩﻦ، ﺭﻩﻗﯩﺒﻠﻪﺭﮔﻪ ﻧﻪﭘﺮﻩﺕ ﻳﺎﻏﺪﯗﺭﯗﺷﺘﯩﻦ ﺑﺎﺷﻘﯩﺴﯩﻐﺎ ﺋﯩﺸﻪﻧﻤﯩﮕﻪﻥ. ﺷﺎﺋﯩﺮﻧﯩﯔ ﯞﻩﺗﯩﻨﯩﮕﻪ ﺑﻮﻟﻐﺎﻥ ﺳﺎﭖ ﻣﯘﻫﻪﺑﺒﯩﺘﻰ ﯞﻩ ﺋﯩﺨﻼﺳﻰ ﺭﻩﻗﯩﺒﻠﻪﺭﮔﻪ ﻳﺎﻏﺪﯗﺭﻏﺎﻥ ﻧﻪﭘﺮﯨﺘﯩﺪﻩ ﺋﯚﺯ ﺋﯩﭙﺎﺩﯨﺴﯩﻨﻰ ﺗﺎﭘﻘﺎﻥ ﺑﻮﻟﺴﺎ، ﻛﯜﺭﻩﺷﺘﯩﻜﻰ ﺳﻪﯞﯨﺮﭼﺎﻧﻠﯩﻘﻰ ﺋﯜﺯﻟﯜﻛﺴﯩﺰﻟﯩﻜﯩﺪﻩ، ﭘﯩﺪﺍﻛﺎﺭﻟﯩﻘﻰ ﺋﯩﺴﻴﺎﻧﻜﺎﺭﻟﯩﻘﯩﺪﺍ ﺋﯚﺯ ﺋﯩﭙﺎﺩﯨﺴﯩﻨﻰ ﺗﺎﭘﻘﺎﻥ.

ﺳﯩﺮﺍﺟﯩﺪﺩﯨﻦ ﺋﻪﺯﯨﺰﯨﻲ ﻳﻪﻧﻪ ﻣﯘﻧﺪﺍﻕ ﺩﻩﻳﺪﯗ:" ﺷﺎﺋﯩﺮ ﺋﯚﺯ ﻣﯘﺩﺩﯨﺌﺎﺳﯩﻨﻰ ﺗﯚﯞﻩﻧﺪﯨﻜﻰ ﺑﯧﻴﯩﺘﺘﺎ ﻣﯘﻧﺪﺍﻕ ﺋﻮﭼﯘﻗﻠﯩﻐﺎﻥ:

ﻫﯩﻤﻤﯩﺘﯩﻢ ﭘﺎﻙ، ﻧﯩﻴﯩﺘﯩﻢ ﺷﺎﻥ - ﺷﻪﺭﻩﭘﻨﻰ ﺗﻮﻟﺪﯗﺭﯗﺵ، ﻣﯩﻠﻠﯩﺘﯩﻤﮕﻪ ﻳﯧﯖﻰ ﺑﺎﺷﺘﯩﻦ ﺋﻪﺭﻛﯩﻦ - ﺋﺎﺯﺍﺩﻩ ﻳﻮﻝ ﻗﯘﺭﯗﺵ، ﻳﻪﺭ ﻳﯜﺯﯨﻨﯩﯔ ﺟﻪﻧﻨﯩﺘﻰ ﺑﻮﻟﻐﺎﻥ ﻣﯘﻗﻪﺩﺩﻩﺱ ﯞﻩﺗﯩﻨﯩﻢ، ﮔﯜﻟﺸﯩﻨﯩﻤﻨﻰ ﻳﺎﺷﻨﯩﺘﯩﭗ ﺋﺎﯞﺍﺕ ﺋﯧﺘﯩﭗ ﮔﯜﻟﻠﻪﻧﺪﯛﺭﯛﺵ.

ﺷﺎﺋﯩﺮ ﻣﯩﻠﻠﯩﺘﯩﻨﻰ ﺋﻮﻳﻐﯩﺘﯩﺶ، ﻳﯧﯖﯩﻠﯩﻘﻘﺎ ﺋﯩﻨﺘﯩﻠﺪﯛﺭﯛﺵ، ﯞﻩﺗﻪﻧﻨﻰ ﺳﯚﻳﯜﺵ، ﺯﯗﻟﯘﻣﻐﺎ ﻗﺎﺭﺷﻰ ﺗﯘﺭﯗﺷﻨﻰ ﺷﯧﺌﯩﺮﻟﯩﺮﯨﻨﯩﯔ ﺋﺎﺳﺎﺳﯩﻲ ﻣﻪﺭﻛﯩﺰﻯ ﻗﯩﻠﻐﺎﻥ. ﺷﺎﺋﯩﺮ:

ﺋﯘﻟﯘﻍ ﯞﻩﺗﯩﻨﯩﻢ ﺷﺎﻧﻠﻰ ﺗﯘﭘﺮﺍﻗﻠﯩﺮﻯ، ﮔﯜﺯﻩﻝ ﺗﺎﻍ ‏- ﺋﻮﺭﻣﺎﻥ، ﭼﯩﻤﻪﻥ ﺑﺎﻏﻠﯩﺮﻯ، ﺟﺎﻫﺎﻥ ﺯﯨﻨﻨﯩﺘﻰ، ﻳﻪﺭ ﻳﯜﺯﻯ ﺟﻪﻧﻨﯩﺘﻰ، ﻳﯧﻘﯩﻤﻠﯩﻖ، ﻛﯚﯕﯜﻟﻠﯜﻙ ﻫﻪﻣﻤﻪ ﻳﺎﻗﻠﯩﺮﻯ.

ﻳﺎﺭﺍﺷﻘﺎﻥ ﺋﻪﺟﻪﭖ ﺯﯨﺒﯘ ‏- ﺯﯨﻨﻨﻪﺗﻠﯩﺮﻯ، ﻛﯧﻠﯩﺸﻜﻪﻥ ﺋﯧﻘﯩﻨﻠﯩﺮﻯ ﻫﻪﻳﯟﻩﺗﻠﯩﺮﻯ، ﯞﻩﺗﻪﻥ ﯞﺍﺭﯨﺴﻰ ﺗﯜﺭﻙ ﻧﻪﺳﻠﻰ ﺑﻮﻟﯘﭖ، ﺷﻪﺭﻩﭘﻠﯩﻚ ﺋﻪﺳﻠﻰ ﯞﻩ ﺷﻪﯞﻛﻪﺗﻠﯩﺮﻯ.

ﺩﯦﮕﻪﻥ ﺷﯧﺌﯩﺮﻟﯩﺮﯨﺪﺍ، ﺋﯚﺯﯨﻨﯩﯔ ﯞﻩﺗﯩﻨﯩﮕﻪ ﺑﻮﻟﻐﺎﻥ ﺋﯩﺨﻼﺳﻰ ﺑﯩﻠﻪﻥ ﺳﯚﻳﮕﯜﺳﯩﻨﻰ ﺋﯩﭙﺎﺩﯨﻠﻪﺵ ﺑﯩﻠﻪﻥ ﺑﯩﺮﮔﻪ ﯞﻩﺗﻪﻥ ﺧﻪﻟﻘﯩﻨﻰ ﺑﯘ ﯞﻩﺗﻪﻧﻨﯩﯔ ﻗﻪﺩﺭﯨﻨﻰ ﺑﯩﻠﯩﺸﻜﻪ ﭼﺎﻗﯩﺮﻏﺎﻥ ﺑﻮﻟﺴﺎ،

ﻣﯩﻠﻠﯩﺘﯩﻢ ﻣﯩﻠﻠﯩﻲ ﻫﻪﻣﯩﻴﻪﺕ ﺷﺎﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﻫﻪﻕ - ﺗﻮﻏﺮﺍ ﻧﯩﻴﻪﺕ ﺟﺎﻣﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﺳﺎﭖ ﺋﺎﺩﯨﻤﯩﻴﻠﯩﻚ ﺳﺎﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﺑﯩﺮﻟﯩﻚ ﻣﻪﺋﯩﻴﻪﺕ ﻳﺎﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﻣﻪﻧﺪﯨﻦ ﯞﻩﺳﯩﻴﻪﺕ ﻗﺎﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ.

ﻣﯩﻠﻠﯩﺘﯩﻢ ﺋﯩﻨﺴﺎﻧﯩﻴﻪﺕ ﻣﻪﻳﺪﺍﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﺋﯩﺴﻼﻣﯩﻴﻪﺕ ﺋﯩﻤﺎﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﻫﻪﻗﻘﺎﻧﯩﻴﻪﺕ ﯞﯨﺠﺪﺍﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﺗﯘﺭﺍﻧﯩﻴﻪﺕ ﺋﯘﻧﯟﺍﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ، ﻣﯩﻠﻠﯩﺘﯩﻢ ﻫﯚﺭ ﺋﺎﭘﯩﻴﻪﺕ ﺩﻩﯞﺭﺍﻧﯩﺪﯨﻦ ﺋﺎﻳﺮﯨﻠﻤﯩﺴﯘﻥ.

ﺩﯦﮕﻪﻥ ﺷﯧﺌﯩﺮﻟﯩﺮﯨﺪﺍ، ﺧﻪﻟﻘﯩﻨﻰ ﺋﯚﺯﯨﻨﯩﯔ ﺋﯩﺰﺯﻩﺕ - ﺋﺎﺑﺮﻭﻳﯩﻨﻰ، ﺋﺎﺭ- ﻧﻮﻣﯘﺳﯩﻨﻰ، ﻣﻪﺩﻩﻧﯩﻲ - ﻣﯩﺮﺍﺳﻠﯩﺮﯨﻨﻰ، ﺩﯨﻨﯩﻲ ﯞﻩ ﻣﯩﻠﻠﯩﻲ ﺋﯧﺘﯩﻘﺎﺩﯨﻨﻰ، ﮔﯜﺯﻩﻝ ﺋﻪﺧﻼﻗﯩﻨﻰ ﻗﻮﻏﺪﺍﺷﻘﺎ ﭼﺎﻗﯩﺮﻏﺎﻥ."

" ﻫﻪﺳﺮﻩﺕ " ﻧﺎﻣﻠﯩﻖ ﺷﯧﺌﯩﺮﻻﺭ ﺗﻮﭘﻠﯩﻤﻰ

ﺷﺎﺋﯩﺮﻧﯩﯔ 2002 - ﻳﯩﻠﻰ 8- ﺋﺎﻳﺪﺍ ﺗﯜﺭﻛﯩﻴﯩﺪﻩ ﺗﻪﻛﻠﯩﻤﺎﻛﺎﻥ ﺋﯘﻳﻐﯘﺭ ﻧﻪﺷﺮﯨﻴﺎﺗﻰ ﺗﻪﺭﯨﭙﯩﺪﯨﻦ ﻧﻪﺷﺮ ﻗﯩﻠﯩﻨﻐﺎﻥ "ﻫﻪﺳﺮﻩﺕ" ﻧﺎﻣﻠﯩﻖ ﺷﯧﺌﯩﺮﻻﺭ ﺗﻮﭘﻠﯩﻤﻰ، ﺋﯘﻧﯩﯔ ﻳﺎﺯﻏﺎﻥ ﻣﯩﯖﻼﺭﭼﻪ ﺷﯧﺌﯩﺮﻟﯩﺮﯨﺪﯨﻦ ﺑﯩﺮ ﺗﺎﻣﭽﻪ ﺑﻮﻟﯘﭖ، ﺋﯘﻳﻐﯘﺭ ﺋﯧﻠﯩﺪﻩ " ﻣﻪﺩﻩﻧﯩﻴﻪﺕ ﺋﯩﻨﻘﯩﻼﺑﻰ" ﺩﻩﭖ ﺋﺎﺗﺎﻟﻐﺎﻥ ﻣﯩﻠﻠﯩﻲ ﻣﯩﺮﺍﺳﻼﺭﻧﻰ ﻳﻮﻗﯩﺘﯩﺶ ﻫﻪﺭﯨﻜﯩﺘﯩﺪﻩ ﺷﺎﺋﯩﺮﻧﯩﯔ ﻧﯘﺭﻏﯘﻧﻠﯩﻐﺎﻥ ﻗﻮﻝ ﻳﺎﺯﻣﯩﻠﯩﺮﻯ ﺷﯘ ﻣﻪﺩﻩﻧﯩﻲ ﻣﯩﺮﺍﺳﻼﺭ ﺑﯩﻠﻪﻥ ﺑﯩﺮﮔﻪ ﻗﻪﺑﺮﯨﮕﻪ ﻛﯚﻣﯜﻟﮕﻪﻥ.

"ﻫﻪﺳﺮﻩﺕ" ﻧﺎﻣﻠﯩﻖ ﺷﯧﺌﯩﺮﻻﺭ ﺗﻮﭘﻠﯩﻤﻰ ﺷﺎﺋﯩﺮﻧﯩﯔ ﭼﻮﯓ ﻗﯩﺰﻯ ﺯﻩﻳﻨﻪﭖ ﺧﺎﻧﯩﻤﻨﯩﯔ ﺳﺎﻗﻼﭖ ﻗﺎﻻﻟﯩﻐﺎﻥ ﺋﺎﺯ ﻗﯩﺴﻤﯩﻐﺎ ﺋﺎﺳﺎﺳﻪﻥ ﺭﻩﺗﻠﻪﭖ ﺗﻮﭘﻼﻧﻐﺎﻥ. (ﺋﯚﻣﻪﺭﺟﺎﻥ)