ﺋﻪﻳﺪﯨﺰ ﻫﻪﻗﻘﯩﺪﻩ ﺋﻮﻣﯘﻣﯩﻲ ﭼﯜﺷﻪﻧﭽﻪ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

1999-ﻳﯩﻠﻰ 25-ﻣﺎﻱ ﻛﯜﻧﻰ ﺑﯩﺮ ﺧﯩﺘﺎﻱ ﺳﺎﻗﭽﯩﺴﻰ ﺑﯧﻴﺠﯩﯖﺪﯨﻜﻰ ﺯﻩﻫﻪﺭﻟﯩﻖ ﭼﯧﻜﯩﻤﻠﯩﻜﻜﻪ ﻗﺎﺭﺷﻰ ﺗﯘﺭﯗﺵ ﺗﻪﺭﺑﯩﻴﯩﻠﻪﺵ ﻣﻪﺭﻛﯩﺰﻯ ﺋﺎﻟﺪﯨﺪﺍ . AFP

ﺋﻪﻳﺪﯨﺰ ﻳﻪﻧﻰ HIV ﯞﯨﺮﯗﺳﻰ ﻧﯚﯞﻩﺗﺘﻪ ﭘﯜﺗﯜﻥ ﺋﯩﻨﺴﺎﻧﯩﻴﻪﺕ ﺩﯗﻧﻴﺎﺳﯩﺪﺍ، ﺋﯩﻨﺴﺎﻧﻼﺭﻧﯩﯔ ﺳﺎﻏﻼﻣﻠﯩﻘﯩﻐﺎ ﺋﯧﻐﯩﺮ ﺗﻪﻫﺪﯨﺖ ﺳﯧﻠﯩﯟﺍﺗﻘﺎﻥ، ﺋﯚﻟﯜﺵ ﻧﯩﺴﺒﯩﺘﻰ ﻧﺎﻫﺎﻳﯩﺘﻰ ﻳﯘﻗﯩﺮﻯ، ﺋﯜﻧﯜﻣﻠﯜﻙ ﺩﻭﺭﯨﺴﻰ ﺑﻮﻟﻤﯩﻐﺎﻥ ﺑﯩﺮﺧﯩﻞ ﺋﯚﺗﻜﯜﺭ ﻳﯘﻗﯘﻣﭽﺎﻥ ﻛﯧﺴﻪﻟﻠﯩﻚ ﯞﯨﺮﯗﺳﻰ. ﮔﻪﺭﭼﻪ ﺋﯘﻳﻐﯘﺭﻻﺭﺩﺍ ﺋﻪﻳﺪﯨﺰﻧﯩﯔ ﺑﺎﻳﻘﯩﻠﯩﺸﻰ ﺑﯩﺮ ﻗﻪﺩﻩﺭ ﻛﯧﻴﯩﻦ ﻫﯧﺴﺎﺑﻼﻧﺴﯩﻤﯘ ﺋﯘﻧﯩﯔ ﺗﺎﺭﻗﯩﻠﯩﺶ، ﻗﺎﭘﻼﺵ ﺳﯜﺭﺋﯩﺘﻰ ﻛﯩﺸﯩﻨﻰ ﭼﯚﭼﯩﺘﯩﺪﯨﻐﺎﻥ ﺩﻩﺭﯨﺠﯩﮕﻪ ﻳﻪﺗﺘﻰ. ﺷﯘﻧﺪﺍﻗﻼ ﺋﯘﻳﻐﯘﺭ ﺋﯧﻠﯩﺪﻩ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻜﻨﯩﯔ ﻳﺎﻣﺮﯨﺸﻰ، ﺟﻪﻣﺌﯩﻴﻪﺕ ﺋﻪﺧﻼﻗﯩﻨﯩﯔ ﺑﯘﺯﯗﻟﯘﺷﻰ ﻗﺎﺗﺎﺭﻟﯩﻖ ﺋﺎﻣﯩﻠﻼﺭ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺸﯩﺪﺍ ﺋﺎﻛﺘﯩﭗ ﺋﺎﻣﯩﻞ ﺑﻮﻟﻤﺎﻗﺘﺎ. ﺋﯘﻳﻐﯘﺭﻻﺭ ﺋﻪﻳﺪﯨﺰﺩﯨﻦ ﺗﻪﻫﺪﯨﺖ ﻫﯧﺲ ﻗﯩﻠﯩﺸﻘﺎ ﺑﺎﺷﻠﯩﺪﻯ، ﺷﯘﻧﺪﺍﻗﻼ ﺋﻪﻳﺪﯨﺰﺩﯨﻦ ﺳﺎﻗﻠﯩﻨﯩﺶ ﺋﯜﭼﯜﻥ ﺋﻪﯓ ﺋﺎﯞﺍﻝ ﺋﯘﻧﻰ ﺗﻮﻧﯘﭖ ﻳﯧﺘﯩﺶ ﻛﯧﺮﻩﻙ ﺋﻪﻟﯟﻩﺗﺘﻪ.

ﺋﻪﻳﺪﯨﺰﻧﯩﯔ ﺩﯗﻧﻴﺎﺩﺍ، ﺧﯩﺘﺎﻳﺪﯨﻜﻰ ﺗﺎﺭﻗﯩﻠﯩﺶ ﯞﻩﺯﯨﻴﯩﺘﻰ

ﺋﯩﻨﺴﺎﻧﻼﺭﺩﺍ ﺗﯘﻧﺠﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﻰ 1981- ﻳﯩﻠﻰ ﺋﺎﻣﯧﺮﯨﻜﯩﺪﺍ ﺑﺎﻳﻘﺎﻟﻐﺎﻥ. ﻧﯚﯞﻩﺗﺘﻪ ﺋﻪﻳﺪﯨﺰ ﻛﯧﺴﯩﻠﻰ ﺩﯗﻧﻴﺎﺩﯨﻜﻰ 240 ﺩﯙﻟﻪﺕ ﯞﻩ ﺭﺍﻳﻮﻧﻐﺎ ﺗﺎﺭﻗﺎﻟﺪﻯ. 2001 - ﻳﯩﻠﯩﻐﭽﻪ ﺑﻮﻟﻐﺎﻥ ﻗﯩﺴﻘﯩﻐﯩﻨﻪ 20 ﻳﯩﻞ ﺋﯩﭽﯩﺪﻩ ﭘﯜﺗﯜﻥ ﺩﯗﻧﻴﺎﺩﯨﻜﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻧﻼﺭﻧﯩﯔ ﺳﺎﻧﻰ 60 ﻣﯩﻠﻴﻮﻧﻐﺎ ﻳﯩﺘﯩﭗ ﺑﯘﻧﯩﯔ ﺋﯩﭽﯩﺪﻩ 22 ﻣﯩﻠﻴﻮﻥ ﺋﺎﺩﻩﻡ ﺋﯚﻟﮕﻪﻥ.

ﮔﻪﺭﭼﻪ ﺋﯩﻨﺴﺎﻧﻼﺭ ﺋﻪﻳﺪﯨﺰ ﻛﯧﺴﯩﻠﻰ ﺑﯩﻠﻪﻥ 20 ﻧﻪﭼﭽﻪ ﻳﯩﻞ ﻛﯜﺭﻩﺵ ﻗﯩﻠﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﻫﺎﺯﯨﺮﻏﺎ ﻗﻪﺩﻩﺭ ﻳﻪﻧﯩﻼ ﺑﯘ ﻛﯧﺴﻪﻟﻨﻰ ﺩﺍﯞﺍﻻﺷﺘﺎ ﺋﯜﻧﯜﻣﻠﯜﻙ ﺋﯘﺳﯘﻟﯩﻨﻰ ﺗﯧﭙﯩﭗ ﭼﯩﻘﻘﯩﻨﻰ ﻳﻮﻕ. ﻣﯚﻟﭽﻪﺭﮔﻪ ﻗﺎﺭﯨﻐﺎﻧﺪﺍ ﻫﺎﺯﯨﺮ ﻛﯜﻧﯩﮕﻪ 1400 ﺋﺎﺩﻩﻡ ﻳﯧﯖﯩﺪﯨﻦ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻠﯩﻨﺪﯨﻜﻪﻥ.

ﺧﯩﺘﺎﻳﺪﺍ ﺑﻮﻟﺴﺎ -1985ﻳﯩﻠﻰ ﺗﯘﻧﺠﻰ ﺑﻮﻟﯘﭖ ﺋﻪﻳﺪﯨﺰ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﻐﯘﭼﯩﻐﺎ ﺩﯨﺌﺎﮔﻨﯘﺯ ﻗﯘﻳﯘﻟﻐﺎﻧﺪﯨﻦ ﺗﺎﺭﺗﯩﭗ 2005 - ﻳﯩﻠﯩﻨﯩﯔ ﺋﺎﺧﯩﺮﻏﺎ ﻗﻪﺩﻩﺭ ﺧﯩﺘﺎﻱ ﺑﻮﻳﯩﭽﻪ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﯩﻨﻰ ﻳﯘﻗﺘﯘﺭﯞﺍﻟﻐﺎﻧﻼﺭ 840 ﻣﯩﯖﮕﻪ ﻳﻪﺗﻜﻪﻥ ﺑﻮﻟﯘﭖ، ﻣﯘﺗﻪﺧﻪﺳﺴﯩﻠﻪﺭﻧﯩﯔ ﻣﯚﻟﭽﻪﺭﻟﯩﺸﯩﭽﻪ، ﺋﻪﻣﯩﻠﻰ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﯩﻨﻰ ﻳﯘﻗﺘﯘﺭﯞﺍﻟﻐﺎﻧﻼﺭ ﺳﺎﻧﻰ 1 ﻣﯩﻠﻴﻮﻧﺪﯨﻦ ﺋﯧﺸﯩﭗ ﻛﻪﺗﻜﻪﻥ.

ﺧﯩﺘﺎﻳﺪﺍ ﻧﯘﭘﯘﺱ ﺳﺎﻧﻰ ﻛﯚﭖ ﺑﻮﻟﻐﺎﭼﻘﺎ ﺋﻪﻳﺪﯨﺰ ﻛﯧﺴﯩﻠﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺳﺎﻧﻰ ﻛﯚﭖ، ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﯞﻩ ﺋﯘﻧﻰ ﺩﺍﯞﺍﻻﺵ ﯞﻩﺯﯨﻴﯩﺘﻰ ﻳﻪﻧﯩﻼ ﻛﯩﺸﯩﻨﻰ ﺋﻪﻧﺪﯨﺸﯩﮕﻪ ﺳﺎﻟﯩﺪﯗ. ﺋﯚﺗﻜﻪﻥ ﻳﯩﻠﻰ ﺩﯗﻧﻴﺎ ﺳﻪﻫﯩﻴﻪ ﺗﻪﺷﻜﯩﻼﺗﯩﻤﯘ ﺧﯩﺘﺎﻳﻨﯩﯔ ﺋﻪﻳﺪﯨﺰ ﯞﻩﺯﯨﻴﯩﺘﯩﻨﯩﯔ ﺋﻪﮔﻪﺭﺩﻩ ﻣﯘﺷﯘ ﺳﯜﺭﺋﻪﺗﺘﻪ ﺗﻪﺭﻩﻗﻘﯩﻲ ﻗﯩﻠﺴﺎ ﺩﯗﻧﻴﺎﻏﯩﻤﯘ ﺗﻪﻫﺪﯨﺖ ﺋﯧﻠﯩﭗ ﻛﯧﻠﯩﺸﻰ ﻣﯘﻣﻜﯩﻨﻠﯩﻜﯩﻨﻰ ﺋﺎﮔﺎﻫﻼﻧﺪﯗﺭﻏﺎﻥ ﻫﻪﻣﺪﻩ ﻫﯚﻛﯜﻣﻪﺗﻨﯩﯔ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﺟﯩﺪﺩﯨﻲ ﺗﻪﺩﺑﯩﺮ ﻗﻮﻟﻠﯩﻨﯩﺸﻘﺎ ﭼﺎﻗﯩﺮﻏﺎﻥ ﺋﯩﺪﻯ. ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﯩﻨﯩﯔ 2005 - ﻳﯩﻠﻠﯩﻖ ﺋﻪﻳﺪﯨﺰ ﺩﻭﻛﻼﺗﯩﺪﯨﻤﯘ ﺧﯩﺘﺎﻳﻨﯩﯔ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﻳﯧﺘﻪﺭﻟﯩﻚ ﺗﻪﺩﺑﯩﺮ ﻗﻮﻟﻼﻧﻤﯩﻐﺎﻧﻠﯩﻘﻰ ﺋﻪﻳﯩﺒﻠﻪﻧﮕﻪﻥ.

ﻣﯘﺗﻪﺧﻪﺳﺴﯩﻠﻪﺭﻧﯩﯔ ﻣﯚﻟﭽﻪﺭﻟﯩﺸﯩﭽﻪ ﺋﻪﮔﻪﺭ ﺧﯩﺘﺎﻳﺪﺍ ﭘﺎﺋﺎﻝ ﺗﻪﺩﺑﯩﺮ ﻗﻮﻟﻼﻧﻤﯩﻐﺎﻧﺪﺍ، 2010 - ﻳﯩﻠﻐﺎ ﺑﺎﺭﻏﺎﻧﺪﺍ ﺟﯘﯕﮕﻮ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﻭﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ 10 ﻣﯩﻠﻴﻮﻧﻐﺎ ﻳﯩﺘﯩﺶ ﺋﯧﻬﺘﯩﻤﺎﻟﻰ ﺑﺎﺭ ﺋﯩﻜﻪﻥ.

ﺋﻪﻳﺪﯨﺰﻧﯩﯔ ﺋﯘﻳﻐﯘﺭﻻﺭﺩﯨﻜﻰ ﺗﺎﺭﻗﯩﻠﯩﺶ ﯞﻩﺯﯨﻴﯩﺘﻰ

ﺋﯘﻳﻐﯘﺭ ﺋﯧﻠﯩﺪﻩ ﮔﻪﺭﭼﻪ ﺗﯘﻧﺠﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﻰ -1996ﻳﯩﻠﻰ ﺑﺎﻳﻘﺎﻟﻐﺎﻥ ﺑﻮﻟﺴﯩﻤﯘ ﺑﯩﺮﺍﻕ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﺟﯩﻨﺴﯩﻲ ﻛﯧﺴﻪﻟﻠﯩﻚ ﯞﻩ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺶ ﻛﻮﻧﺘﺮﯗﻝ ﻗﯩﻠﯩﺶ ﻣﻪﺭﻛﯩﺰﯨﺪﯨﻦ ﺋﻪﻫﯟﺍﻝ ﺋﯩﮕﯩﻠﯩﻨﯩﺸﯩﭽﻪ، ﻧﯚﯞﻩﺗﺘﻪ ﭘﯜﺗﯜﻥ ﺷﯩﻨﺠﺎﯕﺪﺍ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻧﻼﺭﻧﯩﯔ ﺳﺎﻧﻰ 11ﻣﯩﯔ 303 ﻛﯩﺸﻰ ﺑﻮﻟﯘﭖ (ﺑﯘﻻﺭ ﭘﻪﻗﻪﺕ ﺗﻪﻛﺸﯜﺭﯛﭖ ﺋﯧﻨﯩﻘﻼﻧﻐﺎﻧﻠﯩﺮﻯ ﺧﺎﻻﺱ، ﺋﯘﻳﻐﯘﺭ ﺋﯧﻠﯩﺪﻩ ﺑﺎﺭﻟﯩﻖ ﻧﻮﭘﻮﺳﯩﻨﯩﯔ ﻫﻪﻣﻤﯩﺴﯩﻨﯩﯔ ﻗﯧﻨﯩﻨﻰ ﺗﻪﻛﺸﯜﺭﯛﭖ ﭼﯩﻘﯩﺶ ﺧﯩﺰﻣﻪﺕ ﺷﺎﺭﺍﺋﯩﺘﻰ ﯞﻩ ﺋﯩﻘﺘﯩﺴﺎﺩﯨﻲ ﺷﺎﺭﺍﺋﯩﺖ ﺟﻪﻫﻪﺗﺘﯩﻦ ﺋﯧﻠﯩﭗ ﺋﯧﻴﺘﻘﺎﻧﺪﺍ ﻣﯘﻣﻜﯩﻦ ﺋﻪﻣﻪﺱ)، ﻳﯘﻗﯘﻣﻼﻧﻐﺎﻧﻼﺭﻧﯩﯔ ﺋﯩﭽﯩﺪﻩ%85 ﺋﯘﻳﻐﯘﺭﻻﺭ ﺋﯩﻜﻪﻥ.

ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺶ ﺗﯧﺰﻟﯩﮕﯩﻨﻰ ﺩﯗﻧﻴﺎ ﺑﻮﻳﯩﭽﻪ ﺋﻮﺭﺗﺎﻕ ﻗﻮﻟﻠﯩﻨﯩﺪﯨﻐﺎﻥ ﻫﯧﺴﺎﺑﻼﺵ ﻓﻮﺭﻣﯩﻠﯩﺴﻰ ﺑﻮﻳﯩﭽﻪ ﻫﯧﺴﺎﺑﻠﯩﻐﺎﻧﺪﺍ، ﭘﯜﺗﯜﻥ ﺷﯩﻨﺠﺎﯕﺪﺍ 2003-ﻳﯩﻠﯩﻨﯩﯔ ﻳﯩﻞ ﺑﯧﺸﯩﺪﯨﻼ ﺋﻪﻳﺪﯨﺰ ﯞﯨﺮﯗﺳﯩﻨﻰ ﺋﯧﻠﯩﭗ ﻳﯜﺭﮔﯜﭼﯩﻠﻪﺭﻧﯩﯔ ﺳﺎﻧﻰ 100 ﻣﯩﯖﺪﯨﻦ ﺋﯧﺸﯩﭗ ﻛﻪﺗﻜﻪﻥ. ﮔﻪﺭﭼﻪ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﯘﻧﺎﺳﯩﯟﻩﺗﻠﯩﻚ ﺩﺍﺋﯩﺮﯨﻠﻪﺭ ﺋﯘﻳﻐﯘﺭ ﺋﯧﻠﯩﻨﯩﯔ ﺋﻪﻳﺪﯨﺰ ﺋﻪﻫﯟﺍﻟﻰ ﻫﻪﻗﻘﯩﺪﻩ ﺋﯧﻨﯩﻖ ﻣﻪﻟﯘﻣﺎﺕ ﺋﯧﻼﻥ ﻗﯩﻠﻤﯩﺴﯩﻤﯘ ﺋﻪﻣﻪﻟﯩﻴﻪﺗﺘﻪ ﺋﯘﻳﻐﯘﺭ ﺋﯧﻠﯩﺪﻩ ﺋﻪﻳﺪﯨﺰ ﯞﻩﺯﯨﻴﯩﺘﯩﻨﯩﯔ ﻧﺎﻫﺎﻳﯩﺘﻰ ﺋﯧﻐﯩﺮﻟﯩﻘﯩﻨﻰ ﺋﯘﻳﻐﯘﺭﻻﺭ ﺋﯚﺯﻟﯩﺮﯨﻤﯘ ﻗﯩﻴﺎﺱ ﻗﯩﻠﯩﺸﻤﺎﻗﺘﺎ. ﭘﯜﺗﯜﻥ ﺩﯗﻧﻴﺎﺩﯨﻜﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ %60ﺗﻰ ﺟﯩﻨﺴﯩﻲ ﻳﻮﻝ ﺋﺎﺭﻗﯩﻠﯩﻖ ﻳﯘﻗﯘﻣﻼﻧﻐﺎﻥ ﺑﻮﻟﯘﭖ، ﺧﯩﺘﺎﻳﺪﺍ ﺑﻮﻟﺴﺎ %70ﺗﯩﻦ ﻛﯚﭘﺮﻩﻛﻰ ﻗﺎﻥ ﺋﺎﺭﻗﯩﻠﯩﻖ ﻳﯘﻗﯘﻣﻼﻧﻐﺎﻥ. ﺋﯘﻳﻐﯘﺭﻻﺭﺩﺍ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺸﻰ ﺑﻮﻟﺴﺎ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﺑﯩﻠﻪﻥ ﺯﯨﭻ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﯘﭖ ﺋﺎﺳﺎﺳﻠﯩﻘﻰ ﻳﻪﻧﯩﻼ ﺯﻩﻫﻪﺭﻧﻰ ﺗﻮﻣﯘﺭﺩﯨﻦ ﺋﻮﻛﯘﻝ ﻗﯩﻠﯩﭗ ﺋﯘﺭﯗﺵ. ﺋﻪﻣﻤﺎ ﻳﯧﻘﯩﻨﻘﻰ ﺗﻪﻛﺸﯜﺭﯛﺵ ﻧﻪﺗﯩﺠﯩﻠﯩﺮﯨﺪﯨﻦ ﻣﻪﻟﯘﻣﻜﯩﻘﺎﻻﻳﻤﯩﻘﺎﻥ ﺟﯩﻨﺴﯩﻲ ﻣﯘﻧﺎﺳﯩﯟﻩﺕ ﺋﯚﺗﻜﯜﺯﯛﺷﻤﯘ ﺋﯘﻳﻐﯘﺭﻻﺭﺩﺍ ﺋﻪﻳﺪﯨﺰ ﯞﯨﺮﯗﺳﯩﻨﯩﯔ ﺗﺎﺭﻗﯩﻠﯩﺸﯩﺪﯨﻜﻰ ﻳﻪﻧﻪ ﺑﯩﺮ ﺋﯚﺗﻜﯜﺭ ﺳﻪﯞﻩﺏ ﺑﻮﻟﻤﺎﻗﺘﺎ.

"ﺋﻪﻳﺪﯨﺰ" ﺩﯦﮕﻪﻥ ﻧﯩﻤﻪ ؟

ﺋﻪﻳﺪﯨﺰ ﺩﯦﮕﻪﻥ ﺑﯘ ﺳﯚﺯ ﺋﯩﻨﮕﻠﯩﺰﭼﻪ ﺋﺎﺗﺎﻟﻐﯘﻧﯩﯔ ﺗﻪﺭﺟﯩﻤﯩﺴﻰ ﺑﻮﻟﯘﭖ، ﺗﯩﺒﺒﯩﻲ ﺋﯩﻠﻤﯩﺪﻩ "ﺋﯩﻤﻮﻧﯩﺖ ﺧﺎﺭﻩﻛﺘﯩﺮﻟﯩﻚ ﻛﻪﻣﺘﯜﻛﻠﯜﻙ ﺋﯘﻧﯟﯦﺮﺳﺎﻝ ﻛﯧﺴﯩﻠﻰ" ﺩﻩﭖ ﺋﺎﺗﯩﻠﺪﯗ. HIV ﺑﻮﻟﺴﺎ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﻭﺳﯩﺪﯗﺭ. ﺋﻪﻳﺪﯨﺰ ﻛﯧﺴﯩﻠﯩﻨﯩﯔHIV ﯞﯨﺮﻭﺳﻰ ﭘﻪﻳﺪﺍ ﻗﯩﻠﻐﺎﻥ ﻳﯘﻗﯘﻣﻠﯘﻕ ﻛﯧﺴﻪﻟﻠﯩﻚ ﺋﯩﻜﻪﻧﻠﯩﻜﯩﻨﻰ ﻛﯚﺭﯛﯞﺍﻟﻐﯩﻠﻰ ﺑﻮﻟﯩﺪﯗ.

ﺋﻪﻳﺪﯨﺰ ﯞﯨﺮﯗﺳﻰ ﺋﺎﺳﺎﺳﻠﯩﻘﻰ ﺟﯩﻨﺴﻰ ﻣﯘﻧﺎﺳﯩﯟﻩﺕ ﺋﯚﺗﻜﯜﺯﯛﺵ، ﻗﺎﻥ ﺋﺎﺭﻗﯩﻠﯩﻖ، ﯞﻩ ﺑﺎﻻ ﺋﯧﻤﯩﺘﯩﺶ ﻗﺎﺗﺎﺭﻟﯩﻖ ﺋﯜﭺ ﺧﯩﻞ ﻳﻮﻝ ﺋﺎﺭﻗﯩﻠﯩﻖ ﻳﯘﻗﯩﺪﯗ.

ﺳﺎﻏﻼﻡ ﺋﺎﺩﻩﻡ ﺗﯧﺮﯨﺴﻰ ﺑﯩﻠﻪﻥ ﺑﻪﺩﻩﻥ ﻗﺎﺗﻠﯩﻤﻰ ﺯﻩﺧﻤﯩﻠﻪﻧﺴﻪ ﻳﻪﻧﻪ ﻛﯩﻠﯩﭗ ﺑﯘ ﺯﻩﺧﻤﻪ ﺋﻮﺭﻧﻰ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﺎﺭﻻﺭﻧﯩﯔ ﻗﯧﻨﻰ، ﺋﯘﺭﯗﻗﺪﺍﻥ، ﺋﯩﺴﭙﯧﺮﻣﺎ، ﺳﯜﺕ ﺳﯘﻳﯘﻗﻠﯩﻘﻰ ﺑﯩﻠﻪﻥ ﺋﯘﭼﺮﺍﺷﻘﺎ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﻳﯘﻗﺘﯘﺭﯞﺭﺍﻟﯩﺪﯗ.

ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﻭﺳﻰ ﺋﺎﺩﻩﻡ ﺋﻮﺭﮔﺎﻧﯩﺰﯨﻤﯩﻐﺎ ﻛﯩﺮﮔﻪﻧﺪﯨﻦ ﺑﺎﺷﻼﭖ، ﺋﺎﺩﻩﻡ ﺋﻮﺭﮔﺎﻧﯩﺰﯨﻤﻰ ﺋﯘﻧﯩﯔ ﺑﯩﻠﻪﻥ ﻛﯜﺭﻩﺵ ﻗﯩﻠﯩﺸﻨﻰ ﺑﺎﺷﻼﻳﺪﯗ. ﯞﯨﺮﯗﺱ ﺋﺎﺩﻩﻡ ﺑﻪﺩﯨﻨﺪﻩ ﻛﯚﭘﯩﻴﯩﺶ ﺋﯜﭼﯜﻥ ﻣﻪﻟﯘﻡ ﯞﺍﻗﯩﺖ ﻛﯧﺘﯩﺪﯗ. ﺑﺎﺷﻠﯩﻨﯩﺶ ﺑﺎﺳﻘﯘﭼﯩﺪﺍ ﻳﯘﻗﯘﻣﻼﻧﻐﯘﭼﯩﻼﺭﻧﯩﯖﻜﯧﺴﻪﻟﮕﻪ ﻗﺎﺭﺷﻰ ﺗﯘﺭﯗﺵ ﺋﯩﻘﺘﯩﺪﺍﺭﻯ ﺋﯧﻐﯩﺮ ﺯﯨﻴﺎﻧﻐﺎ ﺋﯘﭼﺮﯨﻐﺎﻥ ﺑﻮﻟﻐﺎﭼﻘﺎ ﺭﻭﺷﻪﻥ ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯛﻟﻤﻪﻳﺪﯗ. ﺑﯘﻧﺪﺍﻕ ﻛﯩﺸﯩﻠﻪﺭ ﺋﻪﻳﺪﯨﺰ ﯞﯨﺮﯗﺳﯩﻨﻰ ﻳﯘﻗﺘﯘﺭﯞﺍﻟﻐﯘﭼﯩﻼﺭ ﺩﻩﭖ ﺋﺎﺗﯩﻠﯩﺪﯗ. ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺋﯩﻤﻮﻧﯩﺖ ﺋﯩﻘﺘﯩﺪﺍﺭﻯ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﭖ ﻣﻪﻟﯘﻡ ﺩﻩﺭﯨﺠﯩﺪﻩ ﻳﻪﺗﻜﻪﻧﺪﯨﻦ ﻛﯧﻴﯩﻦ، ﺑﺎﺷﻘﺎ ﻣﯩﻜﺮﻭﺑﻼﺭ ﺋﺎﺩﻩﻡ ﺑﻪﺩﯨﻨﯩﮕﻪ ﻛﯩﺮﯨﺸﻜﻪ ﺑﺎﺷﻼﻳﺪﯗ. ﺷﯘﻧﯩﯔ ﺑﯩﻠﻪﻥ ﻛﯚﭖ ﺧﯩﻞ ﻛﯧﺴﻪﻟﻠﯩﻚ ﻳﯜﺯ ﺑﯧﺮﯨﺪﯗ. ﺑﯘ ﺋﺎﺩﻩﺗﺘﻪ ﭘﯘﺭﺳﻪﺕ ﺧﺎﺭﻩﻛﺘﯧﺮﻟﯩﻚ ﻳﯘﻗﯘﻣﻠﯩﻨﯩﺶ ﺩﻩﭖ ﺋﺎﺗﯩﻠﯩﺪﯗ. ﻣﻪﺳﯩﻠﻪﻥ: ﺋﯧﻐﯩﺮ ﻫﺎﻟﺪﺍ ﺋﯩﭽﻰ ﺳﯜﺭﯛﺵ، ﺋﯚﭘﻜﻪ ﻳﺎﻟﻠﯘﻏﻰ ﯞﻩ ﺑﺎﺷﻘﺎ ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯨﻠﯩﺪﯗ. ﻳﻪﻧﻪ ﺑﻪﺯﻯ ﻳﯘﻗﯘﻣﻼﻧﻐﯘﭼﯩﻼﺭﺩﺍ ﮔﻮﻣﯘﺷﻠﯘﻕ ﻗﺎﺗﺎﺭﻟﯩﻖ ﺋﺎﻻﻣﻪﺗﻠﻪﺭ ﻛﯚﺭﯨﻠﯩﺪﯗ. ﺑﯘ ﯞﺍﻗﯩﺘﺘﺎ ﻳﯘﻗﯘﻣﻼﻧﻐﯘﭼﯩﻼﺭ ﺋﻪﻳﺪﯨﺰ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﯘﭖ ﺑﻮﻟﻐﺎﻥ ﺑﻮﻟﯩﺪﯗ.

ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﺋﯩﭙﺎﺩﯨﻠﯩﺮﻯ ﻛﯚﭖ ﺧﯩﻞ ﺑﻮﻟﯘﭖ، ﺋﻪﯓ ﺋﺎﺧﯩﺮﺩﺍ ﻗﺎﺗﺘﯩﻖ ﺋﯩﭽﻰ ﺳﯜﺭﯛﺵ، ﺋﯚﭘﻜﻪ ﻳﺎﻟﻠﯘﻏﻰ، ﺋﯩﺸﺸﯩﻘﻠﯩﻖ ﺭﺍﻙ ﻗﺎﺗﺎﺭﻟﯩﻖ ﻛﯧﺴﻪﻟﻠﯩﻜﻠﻪﺭ ﺑﯩﻠﻪﻥ ﺗﯩﻨﻰ ﺋﺎﺟﯩﺰﻻﭖ ﺋﯚﻟﯜﭖ ﻛﯧﺘﯩﺪﯗ. ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺗﻪﺭﻩﻗﻘﻰ ﻗﯩﻠﯩﭗ، ﺋﻪﻳﺪﯨﺰ ﻛﯧﺴﯩﻠﯩﮕﻪ ﺋﺎﻳﻼﻧﻐﯘﭼﯩﻼﺭ ﺑﯩﺮ ﻗﺎﻧﭽﻪ ﺋﺎﻳﺪﯨﻦ ﻛﯧﻴﯩﻦ ﺑﯩﺮ ﻗﺎﻧﭽﻪ ﻳﯩﻠﻐﯩﭽﻪ ﺋﯚﻣﯜﺭ ﻛﯚﺭﯨﺪﯗ. ﺋﺎﺩﻩﺗﺘﻪ 8 ﻳﯩﻠﺪﯨﻦ 10 ﻳﯩﻠﻐﯩﭽﻪ ﺑﻮﻟﯩﺪﯗ. ﻳﺎﺧﺸﻰ ﺩﺍﯞﺍﻟﯩﻨﯩﺶ، ﺋﯘﺯﯗﻗﻠﯩﻨﯩﺶ، ﺳﺎﻗﻠﯩﻘﻨﻰ ﺳﺎﻗﻼﺵ ﻗﺎﺗﺎﺭﻟﯩﻖ ﺋﯜﻧﯜﻣﻠﯜﻙ ﺗﻪﺩﺑﯩﺮﻟﻪﺭﻧﻰ ﻗﻮﻟﻼﻧﻐﺎﻧﺪﯨﻼ ﻛﯧﺴﻪﻟﻠﯩﻚ ﺗﻪﺭﻩﻗﻘﻰ ﻗﯩﻠﯩﺶ ﯞﺍﻗﺘﯩﻨﻰ ﺋﯘﺯﺍﺭﺗﯩﺸﻘﺎ ﺑﻮﻟﯩﺪﯗ. ﮔﻪﺭﭼﻪ ﺋﻪﻳﺪﯨﺰ ﻛﯧﺴﯩﻠﯩﻨﻰ ﺋﯜﻧﯜﻣﻠﯜﻙ ﺩﺍﯞﺍﻻﺵ ﺋﯘﺳﯘﻟﻰ ﺑﻮﻟﻤﯩﺴﯩﻤﯘ ﻟﯩﻜﯩﻦ، ﺋﯘﻧﻰ ﻳﻪﻧﯩﻼ ﺩﺍﯞﺍﻻﺷﻘﺎ ﺑﻮﻟﯩﺪﯗ.

ﻫﺎﺯﯨﺮﻏﺎ ﻗﻪﺩﻩﺭ ﯞﯨﺮﯗﺳﻘﺎ ﻗﺎﺭﺷﻰ ﺩﺍﯞﺍﻻﺵ ﺋﯘﺳﯘﻟﻰ ﺑﺎﺭﻟﯩﻘﻘﺎ ﻛﻪﻟﮕﻪﻥ ﺑﻮﻟﺴﯩﻤﯘ ﻟﯧﻜﯩﻦ، ﺋﯩﭽﻜﻰ ﺋﻮﺭﮔﺎﻧﯩﺰﯨﻤﺪﯨﻜﻰ ﺋﻪﻳﺪﯨﺰ ﯞﯨﺮﯗﺳﯩﻨﻰ ﺗﯘﻟﻠﯘﻕ ﻳﻮﻗﯩﺘﯩﺪﯨﻐﺎﻥ ﺋﯘﺳﯘﻝ ﺗﯧﭙﯩﻠﻐﯩﻨﻰ ﻳﻮﻕ. ﻟﯧﻜﯩﻦ ﺋﯘﻧﯩﯔ ﻛﯚﭘﯩﻴﯩﭗ ﺗﺎﺭﻗﯩﻠﯩﺸﯩﻨﻰ ﻛﻮﻧﺘﺮﻭﻝ ﻗﯩﻠﻐﯩﻠﻰ ﺑﻮﻟﯩﺪﯗ. ﻣﯘﺷﯘﻧﺪﺍﻕ ﺑﻮﻟﻐﺎﻧﺪﺍ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺋﯚﻣﺮﯨﻨﻰ ﺋﯘﺯﺍﺭﺗﻘﯩﻠﻰ ﺑﻮﻟﯩﺪﯗ.

ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﺋﺎﻻﻣﻪﺗﻠﯩﺮﻯ ﻗﺎﻳﺴﯩﻼﺭ ؟

ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻧﺪﯨﻦ ﺑﺎﺷﻼﭖ، ﺗﻪﺭﻩﻗﻘﯩﻲ ﻗﯩﻠﻐﺎﻧﻐﺎ ﻗﻪﺩﻩﺭ 4 ﺩﻩﯞﯨﺮﮔﻪ ﺑﯚﻟﯩﻨﯩﺪﯗ.

ﺟﯩﺪﺩﯨﻲ ﺧﺎﺭﻩﻛﺘﯧﺮﻟﯩﻚ ﻳﯘﻗﯘﻣﻠﯩﻨﯩﺶ ﺩﻩﯞﺭﻯ. ﺋﺎﺩﻩﺗﺘﻪ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﻳﯘﻗﯘﻣﻼﻧﻐﺎﻧﺪﯨﻦ ﻛﯧﻴﯩﻦ، 2~6 ﻫﻪﭘﺘﻪ ﺋﯩﭽﯩﺪﻩ ﺋﯘﻧﯩﯔ ﺋﺎﻻﻣﻪﺗﻠﯩﺮﻯ ﻛﯚﺭﯨﻠﯩﺪﯗ. ﺋﺎﻻﻣﻪﺗﻠﯩﺮﻯ: ﻗﯩﺰﯨﺶ، ﻛﺎﺭﻧﺎﻱ ﺋﺎﻏﺮﯨﺶ، ﻟﯩﻤﻔﺎﻟﯩﻖ ﺋﯩﺸﺸﯩﻖ، ﺗﯧﺮﻩ ﻗﯩﭽﯩﺸﯩﺶ ﻗﺎﺗﺎﺭﻟﯩﻖ ﺋﺎﻻﻣﻪﺗﻠﻪﺭ ﻛﯚﺭﯛﻟﯜﭖ، ﺋﺎﺩﻩﺗﺘﻪ 2 ﻫﻪﭘﺘﻪ ﺋﻪﺗﺮﺍﭘﯩﺪﺍ ﺩﺍﯞﺍﻣﻠﯩﺸﯩﭗ، ﺋﯚﺯﻟﯩﮕﯩﺪﯨﻦ ﻳﻮﻗﺎﭖ ﻛﯧﺘﯩﺪﯗ. ﺑﻪﺯﯨﺪﻩ ﻧﯧﺮﯞﺍ ﺳﯧﺴﺘﯩﻤﯩﺴﻰ ﺋﺎﻏﺮﯨﺶ، ﺑﺎﺵ ﺋﺎﻏﺮﯨﺶ، ﭘﯜﺗﯜﻥ ﺑﻪﺩﯨﻨﻨﯩﯔ ﺑﻮﻏﯘﻣﻠﯩﺮﻯ ﺳﯩﺮﻗﯩﺮﺍﭖ ﺋﺎﻏﺮﯨﺶ، ﺗﯘﻗﯘﻟﻤﯩﻼﺭ ﺋﺎﻏﺮﯨﺶ، ﻧﯧﺮﯞﺍ ﭘﻪﺭﺩﻩ ﻳﺎﻟﻠﯘﻏﻰ ﻳﺎﻛﻰ ﻳﺎﻟﻠﯘﻍ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﯘﺵ ﺋﺎﻻﻣﻪﺗﻠﯩﺮﻯ ﻛﯚﺭﯨﻠﯩﺪﯗ. ﻟﯧﻜﯩﻦ ﻫﻪﻣﻤﻪ ﺋﺎﺩﻩﻣﺪﻩ ﺭﻭﺷﻪﻥ ﺑﻮﻟﻐﺎﻥ ﺟﯩﺪﺩﻯ ﺧﺎﺭﻩﻛﺘﯧﺮﻟﯩﻚ ﻳﯘﻗﯘﻣﻠﯩﻨﯩﺶ ﺩﻩﯞﺭﻯ ﺑﻮﻟﯩﯟﻩﺭﻣﻪﻳﺪﯗ. ﺋﯘﻧﯩﯔ ﻛﯚﺭﯛﻟﯜﺵ ﻧﯩﺴﺒﯩﺘﻰ 50% ~ 70 % ﮔﯩﭽﻪ ﺑﻮﻟﯩﺪﯗ.

ﻛﯧﺴﻪﻟﺴﯩﺰ ﻳﯘﻗﯘﻣﻠﯩﻨﯩﺶ ﺩﻩﯞﺭﻯ. ﺋﯘﻧﯩﯔ ﺋﺎﻻﻫﯩﺪﯨﻠﯩﮕﻰ ﺭﻭﺷﻪﻥ ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯛﻟﻤﻪﻳﺪﯗ. ﺑﯘ ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﻳﯘﺷﯘﺭﯗﻥ ﺩﻩﯞﺭﻯ ﺩﻩﭖ ﺋﺎﺗﯩﻠﯩﺪﯗ. ﻳﯘﺷﯘﺭﯗﻥ ﺩﻩﯞﺭﯨﺪﻩ ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﯞﯨﺮﯗﺳﻰ ﺋﺎﺩﻩﻡ ﺑﻪﺩﯨﻨﺪﻩ ﻛﯚﭘﯩﻴﯩﺸﻜﻪ ﺑﺎﺷﻼﭖ ﺋﻮﺭﮔﺎﻧﯩﺰﯨﻤﺪﺍ ﻣﯘﻧﺎﺳﯩﭗ ﻗﺎﺭﺷﻰ ﻛﯜﭺ ﭘﻪﻳﺪﺍ ﺑﻮﻟﯩﺪﯗ. ﻳﯘﺷﯘﺭﯗﻥ ﻣﻪﺯﮔﯩﻞ ﺋﯩﭽﯩﺪﻩ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﻳﯘﺷﯘﺭﯗﺵ ﺧﺎﺭﺍﻛﺘﯧﺮﯨﮕﻪ ﺋﯩﮕﻪ ﺑﻮﻟﯘﭖ، ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﯩﻨﻰ ﺑﯩﺮﮔﻪ ﺋﯧﻠﯩﭗ ﻳﯜﺭﮔﻪﻥ ﺑﻮﻟﯩﺪﯗ، ﺑﯘ ﯞﺍﻗﯩﺘﺘﺎ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﯩﻨﯩﯔ ﺋﺎﺩﻩﻡ ﺑﻪﺩﯨﻨﯩﮕﻪ ﻳﯘﻗﯘﭖ ﻛﯩﺮﯨﺶ ﻧﯩﺴﯩﺘﻰ 100 % ﮔﻪ ﻳﻪﺗﻜﻪﻥ ﺑﻮﻟﯩﺪﯗ.

ﭘﯜﺗﯜﻥ ﺑﻪﺩﻩﻧﻠﯩﻚ ﻟﯩﻤﻔﺎﻟﯩﻖ ﺋﯩﺸﯩﻖ ﻛﯧﺴﯩﻠﯩﻨﯩﯔ ﺩﺍﯞﺍﻣﻠﯩﺸﯩﺶ ﺩﻩﯞﺭﻯ. ﻳﯘﺷﯘﺭﯗﻥ ﻣﻪﺯﮔﯩﻠﻨﯩﯔ ﺋﯘﺯﯗﺭﯨﺸﯩﻐﺎ ﺋﻪﮔﯩﺸﯩﭗ، ﯞﯨﺮﯗﺱ ﺋﺎﺩﻩﻡ ﺋﻮﺭﮔﺎﻧﯩﺰﯨﻤﯩﺪﺍ ﺋﯚﺯﻟﯜﻛﺴﯩﺰ ﻛﯚﭘﯩﻴﯩﭗ، ﺋﯩﻤﻮﻧﯩﺖ ﺳﯧﺴﺘﯩﻤﯩﺴﯩﻐﺎ ﺑﯘﺯﻏﯘﻧﭽﯩﻠﯩﻖ ﻗﯩﻠﯩﺸﻘﺎ ﺑﺎﺷﻼﻳﺪﯗ. ﺩﺍﯞﺍﻣﻠﯩﻖ ﻗﯩﺰﯨﺶ، ﺩﺍﯞﺍﻣﻠﯩﻖ ﺋﯩﭽﻰ ﺳﯜﺭﯛﺵ، ﺳﻪﯞﻩﺑﻰ ﺋﯧﻨﯩﻖ ﺑﻮﻟﻤﯩﻐﺎﻥ ﻫﺎﻟﺪﺍ ﺑﻪﺩﻩﻥ ﺋﯧﻐﯩﺮﻟﯩﻐﻰ ﺗﯚﯞﻩﻧﻠﻪﭖ ﻛﯧﺘﯩﺶ، ﻛﯚﭖ ﺗﻪﺭﻟﻪﺵ، ﺑﺎﺵ ﺋﺎﻏﺮﯨﺶ ﻗﺎﺗﺎﺭﻟﯩﻖ ﺋﺎﻻﻣﻪﺗﻠﻪﺭ ﻛﯚﺭﯨﻠﯩﺪﯗ. ﺑﻮﻟﯘﭘﻤﯘ ﺑﻪﺩﻩﻧﻨﯩﯔ ﺋﯩﻜﻜﯩﺪﯨﻦ ﺋﺎﺭﺗﯘﻕ ﻳﯧﺮﯨﺪﻩ ﭼﻮﯓ - ﻛﯩﭽﯩﻜﻠﯩﮕﻰ 1 ﻣﯩﻠﻠﯩﻤﯧﺘﯩﺮ ﺋﻪﺗﺮﺍﭘﯩﺪﺍ ﻟﯩﻤﻔﺎﻟﯩﻖ ﺋﯩﺸﺸﯩﻖ ﭘﻪﻳﺪﺍ ﺑﻮﻟﻐﺎﻥ ﺑﻮﻟﯘﭖ ﺋﺎﻏﺮﯨﻤﺎﻳﺪﯗ. ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﯞﯨﺮﯗﺳﻰ ﺋﺎﺩﻩﻡ ﺋﻮﺭﮔﺎﻧﯩﺰﯨﻤﯩﻐﺎ ﻛﯩﺮﮔﻪﻥ ﺑﻮﻟﯩﺪﯗ.

ﺋﻪﻳﺪﯨﺰ ﻛﯧﺴﯩﻠﻰ ﺩﻩﯞﺭﻯ. ﺋﻮﺭﮔﺎﻧﯩﺰﯨﻤﻨﯩﯔ ﺋﯩﻤﻮﻧﯩﺖ ﺳﯧﺴﺘﯩﻤﯩﺴﻰ ﺋﯧﻐﯩﺮ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﻳﺪﯗ. ﺋﺎﺩﻩﺗﺘﻪ ﺋﯘﻧﯩﯔ ﺋﯩﭙﺎﺩﯨﻠﯩﺮﻯ ﻛﯚﭖ ﺧﯩﻞ ﺑﻮﻟﯘﭖ ﭘﯜﺗﯜﻥ ﺑﻪﺩﻩﻥ ﺋﺎﻏﺮﯨﺶ، ﻫﺎﻟﺴﯩﺰﻟﯩﻨﯩﺶ، ﺭﻭﻫﺴﯩﺰﻟﯩﻨﯩﺶ، ﺋﯚﭘﻜﻪ ﻳﺎﻟﻠﯘﻏﻰ، ﺗﻮﺑﯧﺮﻛﯩﻠﻴﯘﺯ، ﺋﯜﭼﻪﻱ ﻳﺎﻟﻠﯘﻏﻰ ﻗﺎﺗﺎﺭﻟﯩﻖ ﻛﯧﺴﻪﻟﻠﯩﻚ ﻛﯚﺭﯨﻠﯩﺪﯗ.

ﺋﻪﻳﺪﯨﺰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺩﻩﺭﻫﺎﻝ ﺋﯚﻟﯜﭖ ﻛﻪﺗﻤﻪﻳﺪﯗ. ﺑﯘ ﺑﯩﺮ ﺋﺎﺩﻩﻣﻨﯩﯔ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﻳﯘﻗﺘﯘﺭﯞﺍﻟﻐﺎﻧﺪﯨﻦ ﺗﺎﺭﺗﯩﭗ، ﺋﯚﻟﯜﭖ ﻛﻪﺗﻜﯩﭽﻪ 4 ﺑﺎﺳﻘﯘﭼﻨﻰ ﺑﺎﺷﺘﯩﻦ ﻛﯚﭼﯜﺭﺩﯨﻐﺎﻧﻠﯩﻐﯩﺪﯨﻦ ﺧﯘﻻﺳﯩﻼﭖ ﭼﯩﻘﯩﺮﯨﻠﺪﻯ. 1 - 2 ﺑﺎﺳﻘﯘﭺ ﻳﻪﻧﯩﻼ ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯛﻟﻤﯩﮕﻪﻥ ﺑﺎﺳﻘﯘﭺ ﺑﻮﻟﯩﺪﯗ. ﻟﯩﻜﯩﻦ، ﺋﻮﺭﮔﺎﻧﯩﺰﯨﻤﺪﺍ ﺋﻪﻳﺪﯨﺰ ﯞﯨﺮﯗﺳﻰ ﻳﯘﺷﯘﺭﯗﻥ ﺳﯩﯖﯩﭗ ﻛﯩﺮﯨﭗ، ﻳﯘﻗﯘﻣﻠﯩﻨﯩﺶ ﺧﺎﺭﻩﻛﺘﯩﺮﯨﻨﻰ ﺋﺎﻟﻐﺎﻥ ﺑﻮﻟﯩﺪﯗ. 3 - 4 ﺑﺎﺳﻘﯘﭺ "ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯛﻟﯩﺶ ﺩﻩﯞﺭﻯ" ﺑﻮﻟﯘﭖ، ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺋﯧﻠﯩﭗ ﻳﯜﺭﮔﯜﭼﯩﻠﻪﺭﻧﻰ "ﺋﻪﻳﺪﯨﺰ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﻐﺎﻧﻼﺭ" ﺩﻩﻳﻤﯩﺰ.

ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺋﯧﻠﯩﭗ ﻳﯜﺭﮔﯜﭼﯩﻠﻪﺭ ﺑﯩﻠﻪﻥ ﺋﻪﻳﺪﯨﺰ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﻐﯘﭼﯩﻼﺭﻧﯩﯔ ﻫﻪﻣﻤﯩﺴﯩﻨﯩﯔ ﺋﻮﺭﮔﺎﻧﯩﺰﯨﻤﯩﺪﺍ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﻮﻟﯩﺪﯗ. ﺑﯘﻻﺭ ﺑﯩﺮﺩﻩﻙ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺩﻩﭖ ﺋﺎﺗﯩﻠﯩﺪﯗ.

ﻳﯘﺷﯘﺭﯗﻥ ﺩﻩﯞﺭﻯ ﻗﺎﻧﭽﻪ ﺋﯘﺯﯗﻥ ﺑﻮﻟﺴﺎ، ﺋﻪﻳﺪﯨﺰ ﻛﯧﺴﯩﻠﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺋﯚﻣﺮﻯ ﺷﯘﻧﭽﻪ ﺋﯘﺯﯗﻥ ﺑﻮﻟﯩﺪﯗ. ﺷﯘﯕﺎ ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﻫﻪﺭﮔﯩﺰﻣﯘ ﺋﯚﺯﯨﻨﻰ ﺗﺎﺷﻠﯩﯟﯦﺘﯩﭗ، ﺭﻭﻫﯩﻲ ﭼﯜﺷﻜﯜﻧﻠﯩﻜﻜﻪ ﺋﯘﭼﯩﺮﻣﺎﺳﺘﯩﻦ، ﺑﻪﻟﻜﻰ ﺋﺎﻣﺎﻝ ﻗﯩﻠﯩﭗ ﻛﯧﺴﻪﻟﻠﯩﻜﻨﯩﯔ ﺗﻪﺭﻩﻗﻘﯩﻲ ﻗﯩﻠﯩﺸﯩﻨﻰ ﺋﯘﺯﺍﺭﺗﯩﺶ ﻻﺯﯨﻢ. ﭘﻪﻗﻪﺗﻼ ﺗﻪﺭﻩﻗﻘﯩﻲ ﻗﯩﻠﯩﺶ ﺩﻩﯞﺭﯨﮕﻪ ﻛﯩﺮﻣﯩﺴﯩﻼ، ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﯩﻨﻰ ﺋﯧﻠﯩﭗ ﻳﯜﺭﮔﯩﭽﯩﻠﻪﺭ ﻧﻮﺭﻣﺎﻝ ﺋﺎﺩﻩﻣﮕﻪ ﺋﻮﺧﺸﺎﺵ ﺋﻪﻣﮕﻪﻙ ﻗﯩﻼﻻﻳﺪﯗ. ﯞﻩ ﺗﯘﺭﻣﯘﺵ ﻛﻪﭼﯜﺭﻩﻟﻪﻳﺪﯗ. ﺗﻪﺭﻩﻗﻘﯩﻲ ﻗﯩﻠﯩﺶ ﺩﻩﯞﺭﯨﮕﻪ ﻛﯩﺮﮔﻪﻧﺪﯨﻤﯘ ﭘﺎﺋﺎﻝ ﺩﺍﯞﺍﻻﻧﺴﺎ ﺷﯘ ﺋﺎﺭﻗﯩﻠﯩﻖ ﺋﯚﻣﯜﺭﻧﻰ ﺋﯘﺯﺍﺭﺗﻘﯩﻠﻰ ﺑﻮﻟﯩﺪﯗ.

ﺋﺎﺩﻩﺗﺘﯩﻜﻰ ﻛﯜﻧﺪﯨﻠﯩﻚ ﺗﯘﺭﻣﯘﺷﺘﺎ ﺋﯘﭼﺮﺍﺷﻘﺎﻧﺪﺍ ﺋﻪﻳﺪﯨﺰ ﻛﯧﺴﯩﻠﻰ ﻳﯘﻗﺎﻣﺪﯗ ؟

ﺋﺎﺩﻩﺗﺘﯩﻜﻰ ﻛﯜﻧﺪﯨﻠﯩﻚ ﺗﯘﺭﻣﯘﺷﺘﺎ ﺋﯘﭼﯩﺮﺍﺷﻘﺎﻧﺪﺍ ﺋﻪﻳﺪﯨﺰ ﯞﯨﺮﯗﺳﻰ ﻛﯧﺴﯩﻠﻰ ﻳﯘﻗﻤﺎﻳﺪﯗ.

ﻣﻪﺳﯩﻠﻪﻥ:

1) ﺋﻪﻳﺪﯨﺰ ﻛﯧﺴﯩﻠﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻥ ﺑﯩﻤﺎﺭ ﺑﯩﻠﻪﻥ ﻗﻮﻝ ﺋﯧﻠﯩﺸﯩﭗ ﻛﯜﺭﯛﺷﯩﺶ، ﻗﯘﭼﺎﻗﻠﯩﺸﯩﺶ ﻗﺎﺗﺎﺭﻟﯩﻘﻼﺭ. 2) ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻥ ﺑﯩﻤﺎﺭﻻﺭ ﺑﯩﻠﻪﻥ ﺑﯩﺮﮔﻪ ﺗﺎﻣﺎﻕ ﻳﯧﻴﯩﺶ، ﺋﯩﭽﯩﻤﻠﯩﻚ ﺋﯩﭽﯩﺶ ﯞﻩ ﺋﻮﺭﺗﺎﻕ ﻫﺎﻟﺪﺍ ﻗﺎﭼﺎ - ﻗﯘﭼﺎ، ﭼﯘﻛﺎ، ﺭﻭﻣﻜﺎ ﺋﯩﺸﻠﯩﺘﯩﺶ. 3) ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻥ ﺑﯩﻤﺎﺭﻻﺭ ﺑﯩﻠﻪﻥ ﺗﻪﺭﻩﺗﺨﺎﻧﺎ، ﯞﺍﻧﻨﺎ، ﺳﯘ ﺋﯜﺯﯛﺵ ﻛﯚﻟﭽﯩﮕﻰ، ﺗﯧﻠﯧﻔﯘﻥ، ﻣﺎﺷﯩﻨﺎ ﻗﺎﺗﺎﺭﻟﯩﻘﻼﺭﻧﻰ ﺋﻮﺭﺗﺎﻕ ﺋﯩﺸﻠﻪﺗﻜﻪﻧﺪﻩ. 4)ﺋﻪﻳﺪﯨﺰ ﻛﯧﺴﯩﻠﻰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺑﯩﻠﻪﻥ ﺑﯩﺮﮔﻪ ﺑﻮﻟﯘﺵ، ﺋﻪﻣﮕﻪﻙ ﻗﯩﻠﯩﺶ، ﯞﻩ ﺋﻪﻣﮕﻪﻙ ﺳﺎﻳﻤﺎﻧﻠﯩﺮﯨﻨﻰ ﺑﯩﺮﮔﻪ ﺋﯩﺸﻠﻪﺗﻜﻪﻧﺪﻩ. 5)ﻣﺎﺩﺩﻯ ﺑﯘﻳﯘﻡ، ﭘﯘﻝ ﻗﺎﺗﺎﺭﻟﯩﻘﻼﺭﻧﻰ ﺑﯩﺮﮔﻪ ﺋﯩﺸﻠﻪﺗﻜﻪﻧﺪﻩ. 6) ﭘﺎﺷﺎ، ﭼﯩﯟﯨﻦ، ﻫﺎﺷﺎﺭﻩﺕ ﭼﺎﻗﻘﺎﻧﺪﺍ. 7) ﻳﯚﺗﻜﻪﻟﮕﻪﻥ، ﭼﯜﺷﻜﯜﺭﮔﻪﻧﺪﻩ، ﻳﯧﺸﻰ ﺋﺎﻗﻘﺎﻧﺪﺍ، ﺗﻪﺭ ﭼﯩﻘﻘﺎﻧﺪﺍ، ﺳﯜﻳﺪﯨﻜﻰ ﭼﺎﭼﺮﺍﭖ ﻛﻪﺗﻜﻪﻧﺪﻩ.

ﭘﻪﻗﻪﺕ ﻳﯘﻗﯘﻣﻼﻧﻐﯘﭼﻰ ﺑﯩﻠﻪﻥ ﻗﺎﻥ، ﺳﯩﭙﯩﺮﻣﺎ، ﺟﯩﻨﺴﻰ ﺋﺎﻻﻗﻪ ﯞﻩ ﺑﺎﻻ ﺋﯧﻤﯩﺘﯩﺶ ﻗﺎﺗﺎﺭﻟﯩﻖ ﻫﻪﺭﯨﻜﻪﺗﻠﻪﺭﺩﻩ ﻳﯘﻗﯘﻣﻠﯩﻨﯩﺶ ﺋﻪﻫﯟﺍﻟﻰ ﻛﯚﺭﯛﻟﯩﺪﯗ.