ﺋﯘﻳﻐﯘﺭ ﺋﯧﻠﯩﺪﺍ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﯩﻜﻰ ﺋﻪﯓ ﻣﯘﻫﯩﻢ ﻣﻪﺳﯩﻠﻪ ﻧﯧﻤﻪ؟

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺑﯧﻴﺠﯩﯖﺪﯨﻜﻰ ﻳﻪﺭ ﺋﺎﺳﺘﻰ ﭘﻮﻳﯩﺰ ﺋﯩﺴﺘﺎﻧﺴﯩﺴﯩﺪﯨﻜﻰ ﺋﻪﻳﺪﯨﺰ ﻫﻪﻗﻘﯩﺪﯨﻜﻰ ﺗﻪﺷﯟﯨﻘﺎﺕ ﺗﺎﺧﺘﯩﺴﻰ. 1-ﺩﯦﻜﺎﺑﯩﺮ. AFP

ﺋﯘﻳﻐﯘﺭ ﺋﯧﻠﯩﺪﺍ ﺗﯘﻧﺠﻰ ﺋﻪﻳﺪﯨﺰ ﯞﯨﺮﯗﺳﻰ (HIV)ﺑﯩﻠﻪﻥ ﻳﯘﻗﯘﻣﻼﻧﻐﯘﭼﻰ 1996 - ﻳﯩﻠﻰ ﺑﺎﻳﻘﺎﻟﻐﺎﻧﺪﯨﻦ ﺑﺎﺷﻼﭖ ﻫﺎﺯﯨﺮﻏﺎ ﻗﻪﺩﻩﺭ ﺋﻮﻥ ﻳﯩﻠﻐﺎ ﻳﻪﺗﻤﯩﮕﻪﻥ ﯞﺍﻗﯩﺖ ﺋﯩﭽﯩﺪﻩ ﺋﯘﻳﻐﯘﺭ ﺋﯧﻠﻰ ﺋﻪﻳﺪﯨﺰ ﺋﻪﯓ ﺗﯩﺰ ﺗﺎﺭﻗﯩﻠﯩﯟﺍﺗﻘﺎﻥ ﺟﺎﻳﻐﺎ ﺋﺎﻳﻼﻧﺪﻯ. 2006 - ﻳﯩﻠﯩﺪﯨﻜﻰ ﺋﻪﻳﺪﯨﺰ ﺗﻪﻛﺸﯜﺭﯛﺵ ﻧﻪﺗﯩﺠﯩﺴﯩﺪﯨﻦ ﺋﯘﻳﻐﯘﺭ ﺋﯧﻠﯩﺪﺍ ﻫﺎﺯﯨﺮﻏﺎ ﻗﻪﺩﻩﺭ ﺑﺎﻳﻘﺎﻟﻐﺎﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺳﺎﻧﯩﻨﯩﯔ 14 ﻣﯩﯖﺪﯨﻦ ﺋﺎﺷﻘﺎﻧﻠﯩﻘﻰ ﺋﺎﺷﻜﺎﺭﯨﻼﻧﺪﻯ ﺑﯘ ﻳﯘﻗﯘﻣﻼﻧﻐﯘﭼﯩﻠﯩﺮﯨﻨﯩﯔ 88%ﺗﻰ ﺋﯘﻳﻐﯘﺭﻻﺭ. ﺋﯘﻳﻐﯘﺭ ﺋﯧﻠﯩﺪﺍ ﺋﻪﻳﺪﯨﺰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ ﺋﻪﻣﯩﻠﻰ ﺳﺎﻧﻨﯩﯔ 60ﻣﯩﯖﺪﯨﻦ ﺋﺎﺷﯩﺪﯨﻐﺎﻧﻠﯩﻘﻰ ﻣﯚﻟﭽﻪﺭﻟﻪﻧﻤﻪﻛﺘﻪ. ﺧﯩﺘﺎﻳﺪﯨﻜﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭﻧﯩﯔ 10%ﻧﻰ ﺋﻰ ﺋﯘﻳﻐﯘﺭﻻﺭ ﺋﯩﮕﯩﻠﻪﻳﺪﯗ. ﺋﯘﻻﺭﻧﯩﯔ ﺋﺎﺭﯨﺴﯩﺪﺍ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﺑﯩﻠﻪﻥ ﺷﯘﻏﯘﻟﻼﻧﻐﯘﭼﯩﻼﺭ 85% ﻛﻪ ﻳﯧﻘﯩﻦ.

ﺋﯘﻳﻐﯘﺭ ﺋﯧﻠﯩﺪﻩ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺶ ﺩﺍﺋﯩﺮﯨﺴﻰ ﻛﻪﯓ

ﺑﯘ ﺳﺎﻧﻠﯩﻖ ﻣﻪﻟﯘﻣﺎﺗﻼﺭﺩﯨﻦ ﻛﯚﺭﯛﯞﯦﻠﯩﺸﻘﺎ ﺑﻮﻟﯩﺪﯗﻛﻰ ﺋﻪﻳﺪﯨﺰ ﺋﯘﻳﻐﯘﺭﻻﺭﻏﺎ ﺗﻪﻫﺪﯨﺖ ﺋﯧﻠﯩﭗ ﻛﻪﻟﻤﻪﻛﺘﻪ. ﻧﯚﯞﻩﺗﺘﻪ ﺋﻪﻳﺪﯨﺰ ﯞﯨﺮﯗﺳﻰ ﺋﯘﻳﻐﯘﺭ ﺋﯧﻠﯩﻨﯩﯔ ﺑﯘﻟﯘﯓ ﭘﯘﺷﻘﺎﻗﻠﯩﺮﯨﻐﯩﭽﻪ ﻳﺎﻣﺮﺍﯞﺍﺗﻘﺎﻥ ﺑﻮﻟﯘﭖ ﺳﺘﺎﺗﯩﺴﺘﯩﻜﯩﻠﯩﻖ ﻣﻪﻟﯘﻣﺎﺗﻼﺭﺩﯨﻦ ﻣﻪﻟﯘﻣﻜﻰ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﻨﯩﯔ 5 ﺋﻮﺑﻼﺳﺖ ﺷﻪﻫﻪﺭ ﻫﻪﻣﺪﻩ 69 ﻧﺎﻫﯩﻴﯩﺴﯩﺪﻩ ﺋﻪﻳﺪﯨﺰ ﺑﺎﻳﻘﺎﻟﻐﺎﻥ. ﺑﻮﻟﯘﭘﻤﯘ ﻫﻪﺗﺘﺎ ﻳﯧﺰﯨﻼﺭﺩﯨﻤﯘ ﺋﻪﻳﺪﯨﺰﻧﯩﯔ ﺑﺎﻳﻘﯩﻠﯩﺸﻰ ﺋﯘﻳﻐﯘﺭ ﺋﯧﻠﯩﻨﯩﯔ ﺋﻪﻳﺪﯨﺰﻧﯩﯔ ﻗﻮﺭﺷﺎﯞﯨﺪﺍ ﻗﺎﻟﻐﺎﻧﻠﯩﻘﯩﺪﯨﻦ ﺩﯦﺮﻩﻙ ﺑﻪﺭﻣﻪﻛﺘﻪ.

ﺋﻪﻳﺪﯨﺰ ﺗﯩﺰ ﺗﺎﺭﻗﯩﻠﯩﯟﺍﺗﻘﺎﻥ ﺑﺎﺷﻘﺎ ﺟﺎﻳﻼﺭﻏﺎ ﺳﯧﻠﯩﺸﺘﯘﺭﻏﺎﻧﺪﺍ ﺋﯘﻳﻐﯘﺭ ﺋﯧﻠﯩﻨﯩﯔ ﺋﻪﻫﯟﺍﻟﻰ ﺑﯩﺮ ﻗﻪﺩﻩﺭ ﺋﺎﻻﻫﯩﺪﻩ ﺑﻮﻟﯘﭖ، ﺋﻪﻳﺪﯨﺰﻟﻪﺭﻧﯩﯔ ﻛﯚﭘﯜﻛﭽﯩﺴﻰ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﻫﻪﻣﺪﻩ ﺋﺎﺳﺎﺳﻪﻥ 20 ﻳﺎﺷﺘﯩﻦ 40 ﻳﺎﺷﻘﯩﭽﻪ ﺑﻮﻟﻐﺎﻥ ﻳﺎﺷﻼﺭﺩﯗﺭ.

ﺋﯘﻳﻐﯘﺭ ﺋﯧﻠﯩﺪﻩ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺶ ﺳﯜﺭﺋﯩﺘﻰ ﻛﯩﺸﯩﻨﻰ ﭼﯚﭼﯩﺘﯩﺪﯗ

ﺋﯘﻳﻐﯘﺭ ﺋﯧﻠﯩﺪﻩ ﺋﻪﻳﺪﯨﺰ ﺗﺎﺭﻗﯩﻠﯩﺸﯩﻨﯩﯔ ﺳﯜﺭﺋﯩﺘﻰ ﺧﻪﻟﻘﺌﺎﺭﺍﺩﺍ ﺋﻪﻳﺪﯨﺰ ﺗﻪﺗﻘﯩﻘﺎﺕ ﻗﯩﻠﻐﯘﭼﻰ ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﭼﯚﭼﯜﺗﻤﻪﻛﺘﻪ. ﺋﺎﻣﯧﺮﯨﻜﺎ ﭘﺎﻳﺘﻪﺧﺘﻰ ﯞﺍﺷﯩﻨﮕﺘﻮﻧﺪﯨﻜﻰ ﺋﻪﻳﺪﯨﺰ ﺗﻪﺗﻘﯩﻘﺎﺕ ﻣﻪﺭﻛﯩﺰﻯ ﺋﯘﭼﯘﺭ ﺑﯚﻟﯜﻣﯩﻨﯩﯔ ﻣﻪﺳﺌﯘﻟﻰ ﺋﺎﺭﯞﺍﻧﺘﻮﺱ ﺋﻪﭘﻪﻧﺪﻯ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ ﺋﯘﻳﻐﯘﺭ ﺋﯧﻠﯩﻨﯩﯔ ﺋﻪﻳﺪﯨﺰ ﯞﻩﺯﯨﻴﯩﺘﻰ ﻛﻪﻡ ﺋﯘﭼﺮﺍﻳﺪﯨﻐﺎﻥ ﺋﺎﻻﻫﯩﺪﻩ ﺟﯩﺪﺩﻯ ﺋﻪﻫﯟﺍﻝ ﺩﻩﭖ ﻛﯚﺭﺳﻪﺗﺘﻰ.

ﺋﺎﺭﯞﺍﻧﺘﻮﺱ ﺋﻪﭘﻪﻧﺪﻯ ﺧﯩﺘﺎﻳﻨﯩﯔ ﺋﻮﻣﯘﻣﯩﻲ ﺋﻪﻳﺪﯨﺰ ﯞﻩﺯﯨﻴﯩﺘﯩﻨﯩﯔ ﺋﯧﻐﯩﺮﻟﯩﻘﯩﻨﻰ ﻫﻪﻣﺪﻩ ﺑﯘﻧﯩﯖﻐﺎ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﯞﺍﻗﺘﯩﺪﺍ ﻫﻪﻡ ﺗﻮﻏﺮﺍ ﺗﻪﺩﺑﯩﺮ ﻗﻮﻟﻼﻧﻤﯩﻐﺎﻧﻠﯩﻘﯩﻨﯩﯔ ﺋﺎﺳﺎﺳﻠﯩﻖ ﺳﻪﯞﻩﺏ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺋﻮﺗﺘﯘﺭﻏﺎ ﻗﻮﻳﺪﻯ.

ﺋﺎﺭﯞﺍﻧﺘﻮﺱ ﺋﻪﭘﻪﻧﺪﻯ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﺋﯘﻳﻐﯘﺭ ﺋﯧﻠﯩﻨﯩﯔ ﻫﻪﻗﯩﻘﻰ ﺋﻪﻫﯟﺍﻟﯩﻨﻰ ﺑﯩﻠﻤﻪﻳﻤﻪﻥ ﺋﻪﻣﻤﺎ ﻣﻪﻟﯘﻡ ﺑﻮﻟﻐﺎﻥ ﺋﻪﻳﺪﯨﺰ ﻫﻪﻗﻘﯩﺪﯨﻜﻰ ﺳﺎﻧﻠﯩﻖ ﻣﻪﻟﯘﻣﺎﺗﻼﺭﻧﻰ ﺋﯧﻠﯩﭗ ﺋﯧﻴﺘﻘﺎﻧﺪﺍ ﮔﻪﺭﭼﻪ ﺋﯘﻳﻐﯘﺭﻻﺭﺩﺍ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺶ ﺗﺎﺭﯨﺨﯩﻨﻰ ﺋﺎﻓﺮﯨﻘﯩﻐﺎ ﺋﻮﺧﺸﺎﺵ ﺩﯗﻧﻴﺎﺩﺍ ﺋﻪﻳﺪﯨﺰ ﺋﻪﯓ ﺋﯧﻐﯩﺮ ﺟﺎﻳﻼﺭﻏﺎ ﺳﯧﻠﯩﺸﺘﯘﺭﺍﻟﻤﯩﺴﺎﻗﻤﯘ، ﺋﻪﻣﻤﺎ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺶ ﺳﯜﺭﺋﯩﺘﻰ ﻳﯩﮕﯩﺮﻣﻪ ﻣﯩﻠﻴﻮﻥ ﺋﻪﺗﺮﺍﭘﯩﺪﯨﻜﻰ ﺧﻪﻟﻘﻘﻪ ﻧﯩﺴﺒﻪﺗﻪﻥ ﺑﯘ ﺋﺎﺟﺎﻳﯩﭗ ﻳﯘﻗﯩﺮﻯ ﻧﯩﺴﺒﻪﺕ. ﺩﯗﻧﻴﺎﺩﺍ ﺋﻪﻳﺪﯨﺰ ﺗﺎﺭﻗﯩﻠﯩﺸﯩﻨﯩﯔ ﺗﯧﺰﻟﯩﻚ ﺋﻪﻫﯟﺍﻟﻰ ﺑﯩﻠﻪﻥ ﺳﯧﻠﯩﺸﺘﯘﺭﻏﺎﻧﺪﯨﻤﯘ ﺑﯘ ﻛﯩﺸﯩﻨﻰ ﭼﯚﭼﯩﺘﯩﺪﯨﻐﺎﻥ ﺳﺎﻧﻼﺭﺩﯗﺭ".

ﺋﻪﯓ ﻫﺎﻟﻘﯩﻠﯩﻖ ﻣﻪﺳﯩﻠﻪ ﺧﻪﻟﻘﻨﯩﯔ ﺑﯘ ﻫﻪﻗﺘﻪ ﻗﻮﻏﺪﯨﻨﯩﺶ ﺋﯧﯖﯩﻨﯩﯔ ﺗﯚﯞﻩﻥ ﺑﻮﻟﯘﯞﺍﺗﻘﺎﻧﻠﯩﻘﻰ

ﺋﺎﺭﯞﺍﻧﺘﻮﺱ ﺋﻪﭘﻪﻧﺪﻯ "ﺋﯘﻳﻐﯘﺭ ﺋﯧﻠﯩﺪﻩ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺸﯩﺪﺍ ﺋﻪﯓ ﺋﻪﺟﻪﻟﻠﯩﻚ ﻣﻪﺳﯩﻠﻪ ﻧﯧﻤﻪ ؟" ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺋﺎﺟﯟﺍﺏ ﺑﯧﺮﯨﭗ ﻣﯘﻧﺪﺍﻕ ﺩﻩﻳﺪﯗ:

"ﻣﯧﻨﯩﯖﭽﻪ ﺋﯘﻳﻐﯘﺭ ﺭﺍﻳﻮﻧﯩﺪﺍ ﺋﻪﻳﺪﯨﺰﻧﻰ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻜﺘﯩﻦ ﺋﺎﻳﺮﯨﭗ ﻗﺎﺭﯨﻐﯩﻠﻰ ﺑﻮﻟﻤﺎﻳﺪﯗ، ﻟﯧﻜﯩﻦ ﻧﯚﯞﻩﺗﺘﻪ ﺋﯘﻳﻐﯘﺭ ﯞﻩﺯﯨﻴﯩﺘﯩﺪﯨﻦ ﺋﯧﻴﺘﻘﺎﻧﺪﺍ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﺋﯘﭼﺮﺍﯞﺍﺗﻘﺎﻥ ﺋﻪﯓ ﻫﺎﻟﻘﯩﻠﯩﻖ ﻣﻪﺳﯩﻠﻪ ﺧﻪﻟﻘﻨﯩﯔ ﺑﯘ ﻫﻪﻗﺘﻪ ﻗﻮﻏﺪﯨﻨﯩﺶ ﺋﯧﯖﯩﻨﯩﯔ ﺗﯚﯞﻩﻥ ﺑﻮﻟﯘﯞﺍﺗﻘﺎﻧﻠﯩﻘﻰ. ﻳﻪﻧﻰ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺳﺎﯞﺍﺗﻠﯩﺮﯨﺪﯨﻦ ﺧﻪﯞﻩﺭﺳﯩﺰﻟﯩﻜﯩﺪﯗﺭ".

ﺋﺎﺭﯞﺍﻧﺘﻮﺱ ﺋﻪﭘﻪﻧﺪﻯ "ﺋﯘﻳﻐﯘﺭ ﺋﯧﻠﯩﻨﯩﯔ ﻣﯘﺷﯘﻧﺪﺍﻕ ﺋﺎﻻﻫﯩﺪﻩ ﺑﯩﺮ ﯞﻩﺯﯨﻴﯩﺘﯩﮕﻪ ﻧﯩﺴﺒﻪﺗﻪﻥ ﺋﻪﻳﺪﯨﺰﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﺋﻪﯓ ﻣﯘﻫﯩﻢ ﻳﻮﻝ ﻧﯧﻤﻪ ؟" ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ:

"ﺧﻪﻟﻘﺌﺎﺭﺍﺩﺍ ﺋﻪﻳﺪﯨﺰﻧﯩﯔ ﺗﺎﺭﻗﯩﻠﯩﺸﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﺋﻮﻣﯘﻣﻴﯜﺯﻟﯜﻙ ﻗﻮﻟﻠﯩﻨﯩﯟﺍﺗﻘﺎﻥ ﺋﯘﺳﯘﻝ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﭼﻪﻛﻜﯜﭼﯩﻠﻪﺭﻧﯩﯔ ﺋﻮﺧﺸﺎﺵ ﻳﯩﯖﻨﯩﻨﻰ ﺋﯩﺸﻠﯩﺘﯩﺸﯩﺪﯨﻦ ﺳﺎﻗﻠﯩﻨﯩﺶ، ﺑﯩﺨﻪﺗﻪﺭ ﺑﻮﻟﻤﯩﻐﺎﻥ ﺟﯩﻨﺴﯩﻲ ﺋﺎﻻﻗﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺩﯦﮕﻪﻧﻠﻪﺭ ﺋﻪﻣﻤﺎ ﺋﯘﻳﻐﯘﺭ ﺋﯧﻠﯩﺪﺍ ﺗﯧﺨﻰ ﺑﯘ ﺧﯩﻞ ﺋﯘﺳﯘﻟﻼﺭﻧﻰ ﻗﻮﻟﻠﯩﻨﯩﺸﺘﯩﻦ ﺑﯘﺭﯗﻧﻘﻰ ﺋﻪﯓ ﺋﺎﺳﺎﺳﯩﻲ ﺑﺎﺳﻘﯘﭺ ﻳﻪﻧﻰ ﺗﻪﺷﯟﯨﻘﺎﺕ ﺋﻪﻳﺪﯨﺰ ﻫﻪﻗﻘﯩﺪﻩ ﺧﻪﻟﻘﻨﻰ ﺳﺎﯞﺍﺗﻘﺎ ﺋﯩﮕﻪ ﻗﯩﻠﯩﺶ ﺗﺎﻣﺎﻣﻼﻧﻤﯩﻐﺎﻥ ﺑﯩﺮ ﯞﻩﺯﯨﻴﻪﺗﺘﻪ ﺋﻪﻟﯟﻩﺗﺘﻪ ﺑﯘ ﺟﺎﻳﺪﯨﻜﻰ ﺋﻪﯓ ﺟﯩﺪﺩﻯ ﺷﯘﻧﺪﺍﻗﻼ ﻣﯘﻫﯩﻢ ﯞﺍﺳﯩﺘﻪ ﺋﻪﯓ ﺋﺎﯞﺍﻝ ﺋﻪﻳﺪﯨﺰﮔﻪ ﻗﺎﺭﺷﻰ ﺗﻪﺷﯟﯨﻘﺎﺗﻨﻰ ﻛﯜﭼﻪﻳﺘﯩﺶ"

ﺑﯘﻻﺭ ﺋﻪﻳﺪﯨﺰ ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﻛﯚﺯ ﻗﺎﺭﺍﺷﻼﺭ ﺋﻪﻣﻪﺱ. ﺋﯘﻳﻐﯘﺭﻻﺭﻣﯘ ﻧﯚﯞﻩﺗﺘﻪ ﺋﻪﻳﺪﯨﺰ ﺗﻪﺷﯟﯨﻘﺎﺕ ﻛﯜﭼﯩﻨﯩﯔ ﺋﺎﺟﯩﺰ ﺋﯩﻜﻪﻧﻠﯩﻜﯩﻨﻰ ﺋﯩﻨﻜﺎﺱ ﻗﯩﻠﻤﺎﻗﺘﺎ ﺷﯘﻧﺪﺍﻗﻼ ﺑﯘ ﻣﻪﺳﯩﻠﯩﮕﻪ ﻛﯚﯕﯜﻝ ﺑﻮﻟﯩﯟﺍﺗﻘﺎﻥ ﺋﯘﻳﻐﯘﺭﻻﺭ ﺋﯘﻳﻐﯘﺭﻻﺭﺩﺍ ﺋﻪﻳﺪﯨﺰﻧﯩﯔ ﻳﻪﻧﯩﻤﯘ ﺋﻪﯞﺝ ﺋﯧﻠﯩﺸﯩﻨﻰ ﺗﻮﺳﺎﺵ ﺋﯜﭼﯜﻥ ﺗﻪﺷﯟﯨﻘﺎﺗﻨﻰ ﺗﯧﻠﯧﯟﯨﺰﻭﺭ ﺭﺍﺩﯨﺌﻮﻻﺭﺩﺍ ﻛﻪﯓ ﺩﺍﺋﯩﺮﯨﺪﻩ ﺗﻪﺷﯟﯨﻖ ﻗﯩﻠﯩﺶ ﺑﯩﻠﻪﻥ ﺗﻪﯓ ﺟﺎﻣﺎﺋﻪﺕ ﺧﻪﯞﻩﭘﺴﯩﺰﻟﯩﻚ ﺗﺎﺭﻣﺎﻗﻠﯩﺮﻯ، ﻫﯚﻛﯜﻣﻪﺕ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﺋﻪﺗﻜﻪﺳﺘﯩﭽﯩﻠﯩﺮﯨﮕﻪ ﺯﻩﺭﺑﻪ ﺑﯧﺮﯨﺸﻨﻰ ﻛﯜﭼﻪﻳﺘﯩﺶ ﻛﯧﺮﻩﻙ. ﺋﯩﺸﺴﯩﺰﻟﯩﻖ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺸﻰ ﻛﯧﺮﻩﻙ. ﺋﻪﯓ ﻣﯘﻫﯩﻤﻰ ﺋﯘﻳﻐﯘﺭﻻﺭﻧﯩﯔ ﺗﻪﺑﯩﻲ ﺋﻪﺧﻼﻕ ﻣﻪﻛﺘﯩﭙﻰ ﺑﻮﻟﻐﺎﻥ ﺩﯨﻨﻨﯩﻲ ﺋﯧﺘﯩﻘﺎﺩﯨﻐﺎ ﺗﻮﺳﻘﯘﻧﻠﯘﻕ ﻗﯩﻠﻤﺎﺳﻠﯩﻖ ﻛﯧﺮﻩﻙ. ﺩﯦﮕﻪﻧﺪﻩﻙ ﻛﯚﺯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﻏﺎ ﻗﻮﻳﻤﺎﻗﺘﺎ. (ﮔﯜﻟﭽﯧﻬﺮﻩ)