ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﺍ ﺗﻮﻧﯘﻟﻐﺎﻥ ﺋﯩﻤﺎﻡ ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻢ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭﺟﺎﻥ ﺗﻮﺧﺘﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻢ ﺷﺎﻳﺎﺭﻟﯩﻖ ﺋﺎﺑﺪﯗﺯﺍﻫﯩﺮ ﺩﺍﻣﻮﻟﻼﻣﻨﯩﯔ ﺋﻮﻏﻠﻰ ﺑﻮﻟﯘﭖ، ﺩﺍﺩﯨﺴﻰ ﺑﯩﻠﻪﻥ 1936- ﻳﯩﻠﻰ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻐﺎ ﻛﯧﻠﯩﭗ ﻳﻪﺭﻟﯩﺸﯩﭗ ﻗﺎﻟﻐﺎﻥ ﺋﯩﻜﻪﻥ. ﺋﺎﺑﺪﯗﺭﻩﻗﯩﭗ ﻫﺎﺟﯩﻢ ﯞﻩﺗﻪﻧﺪﯨﻦ ﻛﯩﭽﯩﻚ ﭼﯩﻘﯩﭗ، ﻣﻪﻛﻜﯩﺪﻩ ﺋﻮﻗﯘﭖ ﻳﯧﺘﯩﻠﮕﻪﻧﻠﯩﻜﻰ ﯞﻩ ﻗﯘﺭﺋﺎﻥ ﻛﺎﺭﯨﻤﻨﻰ ﺗﻮﻟﯘﻕ ﻳﺎﺩﻗﺎ ﺋﺎﻟﻐﺎﻧﻠﯩﻘﻰ ﺋﯜﭼﯜﻥ ﺋﻪﺭﻩﺏ ﺗﯩﻠﻰ ﺋﯘﻧﯩﯔ ﺋﯚﺯ ﺋﺎﻧﺎ ﺗﯩﻠﯩﻐﺎ ﺋﻮﺧﺸﺎﺵ ﺑﻮﻟﯘﭖ ﻛﻪﺗﻜﻪﻥ ﺑﻮﻟﯘﭖ،ﺋﯘ ﻣﻪﻛﻜﻪ ﻣﯘﻛﻪﺭﺭﻩﻣﻪ ﺷﻪﻫﯩﺮﯨﻨﯩﯔ ﻣﻪﺳﻔﻪﻟﻪ ﻣﻪﻫﻪﻟﻠﯩﺴﯩﺪﯨﻜﻰ ﻛﻮﻧﻜﺎﺭﯨﻴﻪ ﻣﻪﺳﭽﯩﺘﯩﺪﻩ ﻫﺎﻳﺎﺗﯩﻨﯩﯔ ﺋﺎﺧﯩﺮﯨﻐﺎ ﻗﻪﺩﻩﺭ ﺋﯩﻤﺎﻡ ﯞﻩ ﺧﻪﺗﯩﭗ ﺑﻮﻟﯘﭖ ﺋﯚﺗﻜﻪﻥ.

ﺋﻪﻫﻤﻪﺩ ﻣﯚﻣﯩﻦ ﺋﻪﭘﻪﻧﺪﻯ ﺑﯩﻠﻪﻥ ﺳﯚﻫﺒﻪﺕ

ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻨﯩﯔ ﻣﻪﻛﻜﻪ ﻣﯘﻛﻪﺭﺭﻩﻣﻪ ﺷﻪﻫﯩﺮﯨﺪﻩ ﺗﯘﺭﯗﺷﻠﯘﻕ ﺋﻪﻫﻤﻪﺩ ﻣﯚﻣﯩﻦ ﺋﻪﭘﻪﻧﺪﻯ ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻢ ﻫﻪﻗﻘﯩﺪﻩ ﻣﯘﻧﺪﺍﻕ ﺩﯦﺪﻯ:"ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻤﻨﯩﯔ ﺗﻮﻟﯘﻕ ﺋﯩﺴﻤﻰ ﺋﺎﺑﺪﯗﺭﻩﻗﯩﭗ ﺋﺎﺑﺪﯗﺯﺍﻫﯩﺮ ﺳﻮﭘﻰ ﺩﻩﻳﻤﯩﺰ. ﺋﺎﺗﯩﺴﻰ ﺷﺎﻳﺎﺭﻧﯩﯔ ﻣﻪﺷﻬﯘﺭ ﺋﯚﻟﯩﻤﺎﻟﯩﺮﯨﺪﯨﻦ ﺋﯩﻜﻪﻥ. ﺑﯘﻻﺭ ﺩﺍﺩﺍ - ﺑﺎﻻ ﺋﯩﻜﻜﯩﺴﻰ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻐﺎ 1936- ﻳﯩﻠﻠﯩﺮﻯ ﻛﻪﻟﮕﻪﻥ ﺋﯩﻜﻪﻥ. ﻳﯘﺭﺗﺘﯩﻦ ﻛﯩﭽﯩﻚ ﭼﯩﻘﻘﺎﻧﻠﯩﻘﺘﯩﻦ، ﺑﯘ ﻳﻪﺭﺩﻩ ﺋﻪﺭﻩﺏ ﺗﯩﻠﯩﻨﻰ ﻳﺎﺧﺸﻰ ﺋﻮﻗﯘﭖ ﻳﯧﺘﯩﻠﮕﻪﻥ، ﺋﯜﺳﺘﯜﻥ ﻣﻪﻟﯘﻣﺎﺗﻠﯩﻖ ﻛﯩﺸﻰ ﺋﯩﻜﻪﻥ. ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻢ ﻛﯩﭽﯩﻚ ﭘﯧﺌﯩﻞ، ﺋﻪﺧﻼﻗﻠﯩﻖ ﯞﻩ ﺗﻪﻗﯟﺍﺩﺍﺭ ﻛﯩﺸﻰ ﺋﯩﺪﻯ. ﻣﻪﺳﭽﯩﺘﻨﯩﯔ ﺋﺎﺭﻗﯩﺴﯩﺪﯨﻜﻰ ﻛﯩﭽﯩﻜﻜﯩﻨﻪ ﺋﯩﺸﺨﺎﻧﯩﺴﯩﺪﺍ ﺋﺎﻧﺎ ﯞﻩﺗﻪﻧﺪﯨﻦ ﻛﻪﻟﮕﻪﻥ ﻫﺎﺟﯩﻼﺭ ﺑﯩﻠﻪﻥ ﻣﯘﯕﺪﯨﺸﯩﭗ ﺋﻮﻟﺘﯘﺭﺍﺗﺘﻰ. ﺋﯘﻻﺭﻧﯩﯔ ﺩﻩﺭﺗﻠﯩﺮﯨﮕﻪ ﻗﯘﻻﻕ ﺳﯧﻠﯩﭗ، ﺋﯧﻬﺘﯩﻴﺎﺟﻰ ﺑﺎﺭ ﻛﯩﺸﯩﻠﻪﺭﮔﻪ ﻣﺎﺩﺩﯨﻲ ﯞﻩ ﻣﻪﻧﯩﯟﻯ ﻫﻪﺭ ﺗﻪﺭﻩﭘﺘﯩﻦ ﻳﺎﺭﺩﻩﻡ ﻗﻮﻟﯩﻨﻰ ﺳﯘﻧﺎﺗﺘﻰ. ﻣﻪﻛﻜﯩﻨﯩﯔ ﻣﻪﺷﻬﯘﺭ ﻣﻪﺳﺠﯩﺪﻟﯩﺮﯨﺪﯨﻦ ﺑﻮﻟﻐﺎﻥ ﺑﯩﺮ ﻣﻪﺳﭽﯩﺘﺘﻪ ﺑﯩﺮ ﺋﯘﻳﻐﯘﺭ ﺋﯩﻤﺎﻣﻨﯩﯔ ﺋﺎﺭﻗﯩﺴﯩﺪﺍ ﺗﯘﺭﯗﭖ ﻧﺎﻣﺎﺯ ﺋﻮﻗﯘﺵ ﯞﻩﺗﻪﻧﺪﯨﻦ ﻛﻪﻟﮕﻪﻥ ﻫﺎﺟﯩﻠﯩﺮﯨﻤﯩﺰ ﺋﯜﭼﯜﻥ ﺑﯩﺮ ﭘﻪﺧﯩﺮ ﺋﯩﺪﻯ. ﺋﺎﺑﺪﯗﺭﻩﻗﯩﭗ ﻫﺎﺟﯩﻢ ﺭﺍﻣﯩﺰﺍﻥ ﺋﺎﻳﻠﯩﺮﯨﺪﺍ ﺷﯘ ﻣﻪﺳﭽﯩﺘﺘﻪ ﺧﻪﺗﻤﻪ ﺋﯚﺗﻪﺗﺘﻰ."

ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻤﻨﯩﯔ ﭘﺎﺋﺎﻟﯩﻴﻪﺗﻠﯩﺮﻯ

ﺋﻪﻫﻤﻪﺩ ﻣﯚﻣﯩﻦ ﺋﻪﭘﻪﻧﺪﻯ ﻳﻪﻧﻪ ﻣﯘﻧﺪﺍﻕ ﺩﯨﺪﻯ:"ﺋﺎﺑﺪﯗﺭﻩﻗﯩﭗ ﻫﺎﺟﯩﻢ ﺋﯩﻤﺎﻡ ﯞﻩ ﺧﺎﺗﯩﺒﻠﯩﻖ ﻗﯩﻠﯩﺶ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ ﻣﻪﻛﻜﻪ ﺷﻪﻫﻪﺭﻟﯩﻚ ﺋﯩﺪﺍﺭﯨﺴﯩﺪﺍ ﺑﯩﺮ ﺑﯚﻟﯜﻣﻨﯩﯔ ﺑﺎﺷﻠﯩﻘﻰ ﺑﻮﻟﯘﭖ ﺋﯩﺸﻠﯩﮕﻪﻥ. ﻛﯧﻴﯩﻨﻜﻰ ﯞﺍﻗﯩﺘﻼﺭﺩﺍ 'ﺩﯗﻧﻴﺎ ﺋﯩﺴﻼﻡ ﺋﯩﺘﺘﯩﭙﺎﻗﻰ (ﺭﺍﺑﯩﺘﯘﻝ ﺋﯩﺴﻼﻡ)' ﺩﺍ ﺑﯩﺮ ﻗﺎﻧﭽﻪ ﻳﯩﻞ ﺋﻮﺗﺘﯘﺭﺍ ﺋﺎﺳﯩﻴﺎ ﻣﯘﺳﯘﻟﻤﺎﻧﻠﯩﺮﯨﻨﯩﯔ ﺧﯩﺰﻣﯩﺘﯩﻨﻰ ﻗﯩﻠﺪﻯ. ﻣﯘﻧﺪﯨﻦ ﺑﺎﺷﻘﺎ ﻧﯩﻜﺎﻫ ﺋﯩﺸﻠﯩﺮﯨﻨﻰ ﺑﯧﺠﯩﺮﻩﺗﺘﻰ. ﺋﺎﺑﺪﯗﺭﻩﻗﯩﭗ ﻫﺎﺟﯩﻢ 1993- ﻳﯩﻠﻰ ﺋﺎﻟﻤﯘﺗﯘﻏﺎ ﺑﯧﺮﯨﭗ ﺭﺍﻣﯩﺰﺍﻥ ﺋﯧﻴﯩﺪﺍ، ﺋﺎﻟﻤﯘﺗﯩﻨﯩﯔ ﻣﻪﺭﻛﯩﺰﻯ ﻣﻪﺳﭽﯩﺘﯩﺪﻩ ﻣﯘﺳﯘﻟﻤﺎﻧﻼﺭﻏﺎ ﺗﻪﺭﺍﯞﯨﻬ ﻧﺎﻣﯩﺰﻯ ﺋﻮﻗﯘﭖ ﺑﻪﺭﮔﻪﻥ ﺋﯩﻜﻪﻥ. ﻫﻪ ﺭ ﻳﯩﻠﻰ ﻫﻪﺭﻩﻣﮕﻪ ﻛﻪﻟﮕﻪﻥ ﺋﯘﻳﻐﯘﺭﻻﺭ ﺭﺍﻣﯩﺰﺍﻥ ﺋﯧﻴﯩﺪﯨﻦ ﺗﺎ ﻫﻪﺝ ﯞﺍﻗﺘﯩﻐﯩﭽﻪ 4 ﺋﺎﻱ ﺑﯘ ﻛﯩﺸﯩﺪﯨﻦ ﭘﺎﻳﺪﯨﻠﯩﻨﺎﺗﺘﻰ. ﭘﺎﺳﭙﻮﺭﺗﻰ ﻳﯜﺗﯜﭖ ﻛﻪﺗﻜﻪﻧﻠﻪﺭﮔﻪ ﭘﺎﺳﭙﻮﺭﺕ ﺋﯧﻠﯩﺶ ﺋﯜﭼﯜﻥ ﻣﺎﯕﺎﺗﺘﻰ، ﭘﯘﻟﻰ ﻳﯩﺘﯩﭗ ﻛﻪﺗﻜﻪﻧﻠﻪﺭﮔﻪ ﭘﯘﻝ ﻫﻪﻝ ﻗﯩﻠﯩﭗ ﺑﯧﺮﻩﺗﺘﻰ. ﺋﺎﻳﺮﻭﭘﯩﻼﻥ ﺑﯧﻠﯩﺘﻰ ﻳﯩﺘﯩﭗ ﻛﻪﺗﻜﻪﻧﻠﻪﺭﮔﻪ ﺑﯧﻠﻪﺕ ﺋﯧﻠﯩﭗ ﺑﯧﺮﻩﺗﺘﻰ. ﺩﯨﻨﻰ ﻣﻪﻟﯘﻣﺎﺗﻰ ﻳﻮﻗﻼﺭﻏﺎ ﻣﻪﻟﯘﻣﺎﺕ ﺑﯧﺮﻩﺗﺘﻰ. ﺑﯘ ﺋﺎﺩﻩﻡ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﺪﯨﻜﻰ ﺋﯘﻳﻐﯘﺭﻻﺭ ﺋﯩﭽﯩﺪﻩ ﺩﯨﻨﯩﻤﯩﺰﻏﺎ، ﯞﻩﺗﯩﻨﯩﻤﯩﺰﮔﻪ ﻛﯚﭖ ﺧﯩﺰﻣﻪﺕ ﻗﯩﻠﻐﺎﻥ ﻛﯩﺸﻰ ﺋﯩﺪﻯ. ﺋﺎﺑﺪﯗﺭﻩﻗﯩﭗ ﻫﺎﺟﯩﻤﻨﯩﯔ ﺟﯜﻣﻪ ﻧﺎﻣﺎﺯﻟﯩﺮﯨﺪﺍ ﺋﻮﻗﯘﻏﺎﻥ ﺧﯘﺗﺒﯩﻠﯩﺮﻯ ﺗﻮﭘﻠﯩﻨﯩﭗ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﺍ ﺋﯘﻳﻐﯘﺭ ﺗﯩﻠﯩﺪﺍ ﻧﻪﺷﯩﺮ ﻗﯩﻠﯩﻨﻐﺎﻥ."

ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻤﻨﯩﯔ ﯞﺍﭘﺎﺗﻰ

ﺋﻪﻫﻤﻪﺩ ﻣﯚﻣﯩﻦ ﺋﻪﭘﻪﻧﺪﯨﻨﯩﯔ ﺋﯧﻴﺘﯩﺸﯩﭽﻪ، ﻣﻪﺭﻫﯘﻡ 1998- ﻳﯩﻠﻰ ﺋﺎﯞﻏﯘﺳﺖ ﺋﺎﻳﻠﯩﺮﯨﺪﺍ ﻛﯧﺴﻪﻝ ﺳﻪﯞﻩﺑﻰ ﺑﯩﻠﻪﻥ ﻣﻪﻛﻜﻪ ﻣﯘﻛﻪﺭﺭﻩﻣﻪ ﺷﻪﻫﯩﺮﯨﻨﯩﯔ ﺷﻪﺭﻗﻰ ﺟﻪﻧﯘﭖ ﺗﻪﺭﯨﭙﯩﺪﯨﻜﻰ ﻫﻪﺭﻩﻣﮕﻪ 6 ﻛﯩﻠﻮﻣﯧﺘﯩﺮ ﻛﯧﻠﯩﺪﯨﻐﺎﻥ ﻫﯩﺠﺮﻩﺕ ﻣﻪﻫﻪﻟﻠﯩﺴﯩﺪﯨﻜﻰ ﻳﯧﯖﻰ ﺋﯚﻳﯩﺪﻩ ﯞﺍﭘﺎﺕ ﺑﻮﻟﻐﺎﻥ ﺋﯩﻜﻪﻥ. ﺋﺎﺑﺪﯗﺭﻩﻗﯩﭗ ﻗﺎﺭﻯ ﻫﺎﺟﯩﻢ 6 ﻗﯩﺰ، 3 ﺋﻮﻏﯘﻝ، 9 ﭘﻪﺭﺯﻩﻧﺘﻨﯩﯔ ﺋﺎﺗﯩﺴﻰ ﺋﯩﻜﻪﻥ. (ﺋﯚﻣﻪﺭﺟﺎﻥ)