ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺗﯘﻏﯘﻟﻐﺎﻥ ﻛﯜﻥ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭﺟﺎﻥ ﺗﻮﺧﺘﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺩﯗﻧﻴﺎﻧﯩﯔ ﻫﻪﺭﻗﺎﻳﺴﻰ ﺟﺎﻳﻠﯩﺮﯨﺪﯨﻜﻰ ﻣﯘﺳﯘﻟﻤﺎﻧﻼﺭ ﭘﻪﻳﻐﻪﻣﺒﯩﺮﯨﻤﯩﺰ ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﺗﻮﻏﯘﻟﻐﺎﻥ ﻛﯜﻧﯩﻨﻰ ﺧﺎﺗﯩﺮﯨﻠﯩﻤﻪﻛﺘﻪ. ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﺩﯗﻧﻴﺎﻏﺎ ﻛﯧﻠﯩﺸﻰ ﻫﻪﻗﯩﻘﻪﺗﻪﻥ ﺑﯩﺮ ﻳﻮﺭﯗﻕ ﺩﯗﻧﻴﺎﻧﯩﯔ ﺗﯘﻏﯘﻟﯘﺷﻰ ﺋﯩﺪﻯ. ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﻣﯩﻼﺩﯨﻴﯩﻨﯩﯔ 571 - ﻳﯩﻠﻰ 20 - ﺋﺎﭘﺮﯨﻞ، ﻓﯩﻞ ﻳﯩﻠﻰ ﺭﻩﺑﯩﻴﻪﻟﺌﻪﯞﯞﻩﻝ ﺋﺎﻳﻨﯩﯔ 12 - ﻛﯜﻧﻰ ﺩﯛﺷﻪﻧﺒﻪ ﻛﯜﻧﻠﯜﻛﺘﻪ، ﻫﺎﺯﯨﺮﻗﻰ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻨﯩﯔ ﻣﻪﻛﻜﻪ ﺷﻪﻫﯩﺮﯨﺪﯨﻜﻰ ﻗﯘﺭﻩﻳﺶ ﻗﻪﺑﯩﻠﯩﺴﯩﻨﯩﯔ ﺋﻪﯓ ﻣﯚﺗﯩﯟﻩﺭ ﺋﺎﺋﯩﻠﯩﺴﻰ ﺑﻮﻟﻐﺎﻥ ﺑﻪﻧﻰ ﻫﺎﺷﯩﻢ ﺋﺎﺋﯩﻠﯩﺴﯩﺪﻩ ﺩﯗﻧﻴﺎﻏﺎ ﻛﻪﻟﮕﻪﻥ. ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺗﻮﻏﯘﻟﻐﺎﻥ ﻛﯜﻥ ﺑﯘﻳﯩﻞ ﻣﺎﺭﺗﻨﯩﯔ 20 - ﻛﯜﻧﯩﮕﻪ ﺗﻮﻏﺮﺍ ﻛﻪﻟﮕﻪﻥ.

ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻨﯩﯔ ﻣﻪﻛﻜﻪ ﻣﯘﻛﻪﺭﺭﻩﻣﻪ ﺷﻪﻫﯩﺮﯨﺪﻩ ﺗﯘﺭﯗﺷﻠﯘﻕ ﺋﺎﺑﺪﯗﻟﯧﺘﯩﭗ ﻫﺎﺟﯩﻢ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﺗﯘﻏﯘﻟﻐﺎﻥ ﻛﯜﻧﻰ ﺧﺎﺗﯩﺮﯨﺴﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺳﯚﻫﺒﯩﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺋﯩﺪﻯ.

ﺋﺎﺑﺪﯗﻟﯧﺘﯩﭗ ﻫﺎﺟﯩﻢ ﺑﯩﻠﻪﻥ ﺳﯚﻫﺒﻪﺕ

ﺋﺎﺑﺪﯗﻟﯧﺘﯩﭗ ﻫﺎﺟﯩﻢ ﻣﻪﯞﻟﯘﺕ ﭘﺎﺋﺎﻟﯩﻴﯩﺘﻰ ﺗﻮﻏﺮﯗﻟﯘﻕ ﻣﯘﻧﺪﺍﻕ ﺩﯦﺪﻯ:" ﻣﯘﺳﯘﻟﻤﺎﻧﻼﺭ ﻫﻪﺭ ﻳﯩﻠﻰ ﺑﯘ ﻫﻪﭘﺘﯩﻨﻰ ﺋﯩﻨﺴﺎﻧﻼﺭﻏﺎ ﺋﺎﻟﻼﻫ ﺗﺎﺋﺎﻻ ﺗﻪﺭﯨﭙﯩﺪﯨﻦ ﺭﻩﻫﻤﻪﺕ ﯞﻩ ﺷﻪﭘﻘﻪﺕ ﺑﻮﻟﯘﭖ ﻛﻪﻟﮕﻪﻥ ﺋﯩﺴﻼﻡ ﭘﻪﻳﻐﻪﻣﺒﯩﺮﻯ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﺗﻮﻏﯘﻟﻐﺎﻥ ﻛﯜﻧﯩﻨﻰ ﺧﺎﺗﯩﺮﯨﻠﻪﺵ ﻫﻪﭘﺘﯩﺴﻰ ﺩﻩﭖ ﻗﻪﺩﯨﺮﻟﻪﭖ ﻛﻪﻟﻤﻪﻛﺘﻪ.

ﯞﻩﺗﯩﻨﯩﻤﯩﺰ ﺋﻮﺗﺘﯘﺭﺍ ﺋﺎﺳﯩﻴﺎ ﻣﻪﻣﻠﯩﻜﻪﺗﻠﯩﺮﯨﺪﻩ ﺑﻮﻟﺴﺎ، ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻡ ﺩﯗﻧﻴﺎﻏﺎ ﻛﻪﻟﮕﻪﻥ ﺭﻩﺑﯩﺌﯘﻝ ﺋﻪﯞﯞﻩﻝ ﺋﯧﻴﯩﻨﻰ "ﻣﻪﯞﻟﯘﺕ ﺋﯧﻴﻰ"ﺩﻩﭖ ﺋﺎﺗﯩﺸﯩﺪﯗ ﯞﻩ ﺑﯘ ﺋﺎﻳﺪﺍ ﺋﯚﻳﻠﻪﺭﺩﻩ ﺟﺎﻣﺎﺋﻪﺕ ﺑﻮﻟﯘﭖ ﻧﯚﯞﻩﺕ ﺑﯩﻠﻪﻥ ﻣﻪﯞﻟﯘﺕ ﺋﻮﻗﯘﺵ ﭘﺎﺋﺎﻟﯩﻴﻪﺗﻠﯩﺮﻯ ﺋﯧﻠﯩﭗ ﺑﯧﺮﯨﻠﯩﺪﯗ. ﺑﯘﻻﺭﻧﯩﯔ ﻫﻪﻣﻤﯩﺴﻰ ﭘﻪﻳﻐﻪﻣﺒﯩﺮﯨﻤﯩﺰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﺑﻮﻟﻐﺎﻥ ﺳﯚﻳﮕﯜ، ﻣﯘﻫﻪﺑﺒﻪﺕ ﯞﻩ ﺋﯩﺨﻼﺳﯩﻨﻰ ﺋﯩﺰﻫﺎﺭ ﻗﯩﻠﯩﺪﯨﻐﺎﻥ ﭘﺎﺋﺎﻟﯩﻴﻪﺗﻠﻪﺭﺩﯗﺭ. ﺋﻪﻣﻤﺎ ﺋﻪﯓ ﺗﻮﻏﺮﯨﺴﻰ، ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﻰ ﻫﻪﻣﯩﺸﻪ ﻳﺎﺩ ﺋﯧﺘﯩﭗ، ﺋﯘﻧﯩﯔ ﮔﯜﺯﻩﻝ ﺋﻪﺧﻼﻗﯩﻨﻰ ﯞﻩ ﺋﯧﺴﯩﻞ ﭘﻪﺯﯨﻠﻪﺗﻠﯩﺮﯨﻨﻰ ﻫﻪﺭ ﺑﯩﺮ ﻣﯘﺳﯘﻟﻤﺎﻥ ﺋﯚﺯﯨﮕﻪ ﺋﯜﻟﮕﻪ ﻗﯩﻠﻐﺎﻥ ﻫﺎﻟﺪﺍ، ﺋﯘﻧﯩﯔ ﻳﻮﻟﯩﻐﺎ ﺋﯩﺰﭼﯩﻞ ﺋﻪﮔﯩﺸﯩﺶ، ﺋﯘﻧﯩﯔ ﺑﯘﻳﺮﯨﻐﺎﻧﻠﯩﺮﯨﻨﻰ ﺋﻮﺭﯗﻧﻼﭖ، ﺗﻮﺳﻘﺎﻧﻠﯩﺮﯨﻨﻰ ﺗﻪﺭﻙ ﺋﯧﺘﯩﺶ، ﺷﯘﻧﺪﺍﻗﻼ ﻫﻪﺭﻛﯩﻢ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﺑﻮﻟﻐﺎﻥ ﻫﯚﺭﻣﯩﺘﯩﻨﻰ، ﺳﯚﻳﮕﯜﺳﯩﻨﻰ ﯞﻩ ﺋﯩﺨﻼﺳﯩﻨﻰ ﺋﻪﻣﻪﻟﯩﻲ ﻫﻪﺭﯨﻜﯩﺘﻰ ﺑﯩﻠﻪﻥ ﻛﯚﺭﺳﯩﺘﯩﺸﺘﯩﻦ ﺋﯩﺒﺎﺭﻩﺗﺘﯘﺭ."

ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﻰ ﻗﯩﺴﻘﯩﭽﻪ ﺗﻮﻧﯘﺷﺘﯘﺭﯗﺵ

ﺋﺎﺑﺪﯗﻟﯧﺘﯩﭗ ﻫﺎﺟﯩﻢ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﻰ ﺗﻮﻧﯘﺷﺘﯘﺭﯗﭖ ﻣﯘﻧﺪﺍﻕ ﺩﯦﺪﻯ:" ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺋﺎﻟﻼﻫ ﺗﺎﺋﺎﻻﻧﯩﯔ ﻳﻪﺭ ﻳﯜﺯﯨﺪﯨﻜﻰ ﺋﻪﻟﭽﯩﺴﻰ، ﭘﻪﻳﻐﻪﻣﺒﻪﺭﻟﻪﺭﻧﯩﯔ ﺋﻪﯓ ﺋﺎﺧﯩﺮﻗﯩﺴﻰ، ﺋﯩﻨﺴﺎﻧﻼﺭﻏﺎ ﺋﺎﻟﻼﻫ ﺗﻪﺭﯨﭙﯩﺪﯨﻦ ﺋﯩﺴﻼﻡ ﺩﯨﻨﯩﻨﻰ ﺋﯧﻠﯩﭗ ﻛﯧﻠﯩﺶ ﺑﯩﻠﻪﻥ، ﺳﺎﻣﺎﯞﯨﻲ ﺩﯨﻨﻼﺭﻧﻰ ﺗﻮﻟﯘﻗﻠﯩﻐﺎﻥ ﯞﻩ ﺑﯘ ﺩﯨﻨﻼﺭﻧﯩﯔ ﻏﺎﻳﯩﺴﯩﻨﻰ ﺋﻪﻣﻪﻟﮕﻪ ﺋﺎﺷﯘﺭﻏﺎﻥ ﺋﻪﯓ ﺷﻪﺭﻩﭘﻠﯩﻚ ﭘﻪﻳﻐﻪﻣﺒﻪﺭﺩﯗﺭ. ﺋﯩﻠﮕﯩﺮﻯ ﺋﺎﻟﻼﻫ ﺗﺎﺋﺎﻻ ﺗﻪﺭﯨﭙﯩﺪﯨﻦ ﻛﻪﻟﮕﻪﻥ ﻫﻪﺭ ﺑﯩﺮ ﭘﻪﻳﻐﻪﻣﺒﻪﺭ ﺑﯩﺮ ﻣﻪﺧﺴﯘﺱ ﻣﯩﻠﻠﻪﺕ ﺋﺎﺭﯨﺴﯩﻐﺎ ﺋﻪﯞﻩﺗﯩﻠﮕﻪﻥ ﺑﻮﻟﺴﺎ، ﭘﻪﻳﻐﻪﻣﺒﯩﺮﯨﻤﯩﺰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﭘﯜﺗﯜﻥ ﺋﯩﻨﺴﺎﻧﯩﻴﻪﺗﻜﻪ ﻗﺎﺭﯨﺘﯩﻠﻐﺎﻥ ﺋﻮﻣﯘﻣﻴﯜﺯﻟﯜﻙ ﺑﯘﺭﭼﯩﻨﻰ ﺯﯨﻤﻤﯩﺴﯩﮕﻪ ﺋﺎﻟﻐﺎﻥ ﻫﺎﻟﺪﺍ ﭘﯜﺗﯜﻥ ﺋﺎﻟﻪﻣﮕﻪ ﭘﻪﻳﻐﻪﻣﺒﻪﺭ ﺑﻮﻟﯘﭖ ﺋﻪﯞﻩﺗﯩﻠﮕﻪﻥ. ﺋﺎﻟﻼﻫ ﺗﺎﺋﺎﻻ ﻗﯘﺭﺋﺎﻥ ﻛﻪﺭﯨﻤﺪﻩ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﻣﻪﺧﺴﯘﺱ ﻗﯩﻠﯩﭗ ﻣﯘﻧﺪﺍﻕ ﺩﻩﻳﺪﯗ: "ﺳﯧﻨﻰ ﺑﯩﺰ ﭘﻪﻗﻪﺕ ﭘﯜﺗﯜﻥ ﺋﯩﻨﺴﺎﻧﻼﺭ ﺋﯜﭼﯜﻥ (ﻣﯚﻣﯩﻨﻠﻪﺭﮔﻪ ﺟﻪﻧﻨﻪﺕ ﺑﯩﻠﻪﻥ) ﺧﯘﺵ ﺧﻪﯞﻩﺭ ﺑﻪﺭﮔﯜﭼﻰ ﯞﻩ (ﻛﯘﭘﭙﺎﺭﻻﺭﻧﻰ ﺋﺎﺯﺍﺏ ﺑﯩﻠﻪﻥ) ﺋﺎﮔﺎﻫﻼﻧﺪﯗﺭﻏﯘﭼﻰ ﻗﯩﻠﯩﭗ ﺋﻪﯞﻩﺗﺘﯘﻕ، ﯞﻩ ﻟﯧﻜﯩﻦ ﺋﯩﻨﺴﺎﻧﻼﺭﻧﯩﯔ ﺗﻮﻟﯩﺴﻰ (ﺑﯘﻧﻰ) ﺑﯩﻠﻤﻪﻳﺪﯗ." (ﺳﻪﺑﻪء ﺳﯜﺭﯨﺴﻰ 28- ﺋﺎﻳﻪﺕ)

ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﻣﯘﺷﯘﻧﺪﺍﻕ ﺋﺎﻻﻫﯩﺪﻩ ﭘﻪﻳﻐﻪﻣﺒﻪﺭ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ، ﺋﯘﻧﯩﯔ ﭘﻪﯞﻗﯘﻟﺌﺎﺩﺩﻩ ﺭﻭﻟﻰ ﺋﺎﺭﻗﯩﺴﯩﺪﺍ، ﻣﯘﺳﯘﻟﻤﺎﻧﻼﺭﻧﯩﯔ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﻫﯚﺭﻣﻪﺕ ﻗﯩﻠﯩﺸﻰ ﺑﺎﺭﻟﯩﻖ ﭘﻪﻳﻐﻪﻣﺒﻪﺭﻟﻪﺭﮔﻪ ﻫﯚﺭﻣﻪﺕ ﻗﯩﻠﻐﺎﻧﻠﯩﻖ ﺑﯩﻠﻪﻥ ﺑﺎﺭﺍﯞﻩﺭ ﺑﻮﻟﯩﺪﯗ ﺩﻩﻳﺪﯨﻐﺎﻥ ﺋﻮﺭﯗﻧﻐﺎ ﻛﯚﺗﯜﺭﯛﻟﮕﻪﻥ ﯞﻩ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺋﺎﻟﻼﻫ ﺗﺎﺋﺎﻻﻧﯩﯔ ﻣﺎﺧﺘﯩﺸﯩﻐﺎ ﺳﺎﺯﺍﯞﻩﺭ ﺑﻮﻟﻐﺎﻥ. ﺋﺎﻟﻼﻫ ﺗﺎﺋﺎﻻ ﻗﯘﺭﺋﺎﻥ ﻛﻪﺭﯨﻤﺪﻩ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ" ﺳﻪﻥ ﻫﻪﻗﯩﻘﻪﺗﻪﻥ ﺑﯜﻳﯜﻙ ﺋﻪﺧﻼﻗﻘﺎ ﺋﯩﮕﯩﺴﻪﻥ" ﺩﻩﭖ ﻣﺎﺧﺘﯩﻐﺎﻥ.

ﺑﺎﻟﯩﻠﯩﻖ ﭼﺎﻏﻠﯩﺮﻯ

ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺋﺎﻧﯩﺴﯩﻨﯩﯔ ﻗﻮﺭﺳﯩﻘﯩﺪﯨﻜﻰ ﯞﺍﻗﺘﯩﺪﺍ ﺋﯘ ﺗﯘﻏﯘﻟﯘﺷﺘﯩﻦ 2 ﺋﺎﻱ ﻗﺎﻟﻐﺎﻧﺪﺍ ﺋﺎﺗﯩﺴﻰ ﯞﺍﭘﺎﺕ ﺑﻮﻟﯩﺪﯗ. ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ 6 ﻳﺎﺵ ﯞﺍﻗﺘﯩﺪﺍ ﺋﺎﻧﯩﺴﯩﺪﯨﻨﻤﯘ ﺋﺎﻳﺮﯨﻠﯩﭗ ﻳﯧﺘﯩﻢ ﻗﺎﻟﯩﺪﯗ. ﺷﯘﻧﺪﯨﻦ ﺑﺎﺷﻼﭖ ﺑﻮﯞﯨﺴﻰ ﺋﺎﺑﺪﯗﻟﻤﯘﺗﺘﻪﻟﯩﺒﻨﯩﯔ ﺗﻪﺭﺑﯩﻴﯩﺴﯩﺪﻩ ﻗﺎﻟﯩﺪﯗ. ﺑﻮﯞﯨﺴﻰ ﯞﺍﭘﺎﺕ ﺑﻮﻟﻐﺎﻧﺪﯨﻦ ﻛﯧﻴﯩﻦ، 8 ﻳﺎﺷﻼﺭ ﺋﻪﺗﺮﺍﭘﯩﺪﯨﻜﻰ ﯞﺍﻗﺘﯩﺪﺍ ﺗﺎﻏﯩﺴﻰ ﺋﻪﺑﯘ ﺗﺎﻟﯩﺒﻨﯩﯔ ﻫﯧﻤﺎﻳﯩﺴﯩﮕﻪ ﺗﺎﭘﺸﯘﺭﯗﻟﯩﺪﯗ.

ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺋﯚﺳﻤﯜﺭﻟﯜﻙ ﭼﺎﻏﻠﯩﺮﯨﻨﻰ ﺋﺎﯞﯞﺍﻝ ﻗﻮﻱ ﺑﯧﻘﯩﺶ، ﻛﯧﻴﯩﻨﭽﻪ ﺗﺎﻏﯩﺴﻰ ﺑﯩﻠﻪﻥ ﺋﻪﺭﻩﺏ ﻳﯧﺮﯨﻢ ﺋﺎﺭﯨﻠﯩﺪﯨﻜﻰ ﻳﯧﻘﯩﻦ ﺟﺎﻳﻼﺭﻏﺎ، ﺋﺎﻧﺪﯨﻦ ﺷﺎﻣﻐﺎ ﺑﯧﺮﯨﭗ ﺳﻮﺩﯨﮕﻪﺭﻟﯩﻚ ﻗﯩﻠﯩﺶ ﺑﯩﻠﻪﻥ ﺋﯚﺗﻜﯜﺯﯨﺪﯗ. ﺋﯘ ﻛﯩﭽﯩﻜﯩﺪﯨﻨﻼ ﺋﯚﺯﯨﻨﯩﯔ ﮔﯜﺯﻩﻝ ﺋﻪﺧﻼﻗﻰ ﯞﻩ ﺋﺎﻟﯩﻴﺠﺎﻧﺎﭖ ﭘﻪﺯﯨﻠﯩﺘﻰ ﺑﯩﻠﻪﻥ ﺧﻪﻟﻖ ﺋﺎﺭﯨﺴﯩﺪﺍ ﺋﺎﻻﻫﯩﺪﻩ ﺗﻮﻧﯘﻟﻐﺎﻥ، ﻫﻪﺗﺘﺎ ﻛﯩﺸﯩﻠﻪﺭ ﺗﻪﺭﯨﭙﯩﺪﯨﻦ "ﺋﯩﺸﻪﻧﭽﻠﯩﻚ ﻣﯘﻫﻪﻣﻤﻪﺩ"، "ﺭﺍﺳﺘﭽﯩﻞ ﻣﯘﻫﻪﻣﻤﻪﺩ" ﺩﯦﮕﻪﻧﮕﻪ ﺋﻮﺧﺸﺎﺵ ﺋﯧﺴﯩﻞ ﺋﯜﻧﯟﺍﻧﻼﺭﻏﺎ ﺋﯧﺮﯨﺸﻜﻪﻥ، 25 ﻳﯧﺸﯩﺪﺍ ﺋﯚﻳﻠﻪﻧﮕﻪﻥ.

ﭘﻪﻳﻐﻪﻣﺒﻪﺭ ﺑﻮﻟﯩﺸﻰ

ﭘﻪﻳﻐﻪﻣﺒﯩﺮﯨﻤﯩﺰ ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﻗﯩﺮﯨﻖ ﻳﺎﺷﻘﺎ ﻳﻪﺗﻜﻪﻥ ﭼﯧﻐﯩﺪﺍ ﻣﻪﻛﻜﯩﺪﯨﻜﻰ ﻫﯩﺮﺍ ﻏﺎﺭﯨﺪﺍ ﺋﺎﻟﻼﻫﻘﺎ ﺋﯩﺒﺎﺩﻩﺕ ﻗﯩﻠﯩﭗ ﺋﻮﻟﺘﯘﺭﻏﯩﻨﯩﺪﺍ ﺋﺎﻟﻼﻫ ﺟﻪﺑﺮﺍﺋﯩﻞ ﺋﯩﺴﯩﻤﻠﯩﻚ ﭘﻪﺭﯨﺸﺘﯩﻨﻰ ﺋﻪﯞﻩﺗﯩﺶ ﺋﺎﺭﻗﯩﻠﯩﻖ، ﺋﯘﻧﯩﯖﻐﺎ ﭘﻪﻳﻐﻪﻣﺒﻪﺭﻟﯩﻚ ﯞﻩﺯﯨﭙﯩﺴﯩﻨﻰ ﺗﺎﭘﺸﯘﺭﻏﺎﻥ. ﭘﻪﻳﻐﻪﻣﺒﯩﺮﯨﻤﯩﺰ ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﺩﻩﺳﻠﻪﭘﻜﻰ ﯞﻩﻫﯩﻴﻨﯩﯔ ﺑﺎﺷﻠﯩﻨﯩﺸﯩﺪﺍ ﺋﯘ ﻗﺎﺗﺘﯩﻖ ﻗﻮﺭﻗﯘﭖ ﻛﯧﺘﯩﺪﯗ ﯞﻩ ﺋﯚﻳﯩﮕﻪ ﻗﺎﻳﺘﯩﭗ ﻛﯧﻠﯩﭗ، ﺋﺎﻳﺎﻟﻰ ﺧﻪﺩﯨﭽﻪ ﺭﻩﺯﯨﻴﻪﻟﻼﻫﯘ ﺋﻪﻧﻬﺎﻏﺎ "ﻣﻪﻥ ﻗﻮﺭﻗﯘﭖ ﻛﻪﺗﺘﯩﻢ، ﻣﯧﻨﻰ ﻳﯚﮔﻪﭖ ﻗﻮﻳﯘﯓ" ﺩﯦﮕﻪﻧﺪﻩ ﺋﺎﻳﺎﻟﻰ ﺋﯘﻧﯩﯖﻐﺎ: "ﺳﯩﺰ ﻳﺎﺧﺸﻰ ﺋﺎﺩﻩﻣﺴﯩﺰ ـ ﺋﺎﺟﯩﺰﻻﺭﻏﺎ ﻳﺎﺭﺩﻩﻡ ﻗﯩﻠﯩﺴﯩﺰ، ﻳﯧﺘﯩﻤﻠﻪﺭﻧﯩﯔ ﺑﯧﺸﯩﻨﻰ ﺳﯩﻼﻳﺴﯩﺰ. ﺋﺎﻟﻼﻫ ﺳﯩﺰﻧﻰ ﻫﻪﺭﮔﯩﺰ ﺧﻮﺭﻟﯩﻤﺎﻳﺪﯗ" ﺩﯦﮕﻪﻥ ﻣﻪﺷﻬﯘﺭ ﺳﯚﺯﯨﻨﻰ ﺋﯧﻴﺘﯩﺶ ﺋﺎﺭﻗﯩﻠﯩﻖ ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻐﺎ ﺗﻪﺳﻪﻟﻠﻰ ﺑﯧﺮﯨﺪﯗ ﯞﻩ ﺋﯘﻧﯩﯔ ﺩﯨﻨﯩﻨﻰ ﻗﻮﺑﯘﻝ ﻗﯩﻠﻐﺎﻥ ﺗﯘﻧﺠﻰ ﺷﻪﺧﺲ ﺑﻮﻟﻐﺎﻧﻠﯩﻖ ﺳﯜﭘﯩﺘﻰ ﺑﯩﻠﻪﻥ ﺗﺎﺭﯨﺨﻘﺎ ﻗﻪﻳﺖ ﻗﯩﻠﯩﻨﯩﺪﯗ."

ﺋﺎﺋﯩﻠﯩﺴﻰ ﯞﻩ ﯞﺍﭘﺎﺗﻰ

ﺋﺎﺑﺪﯗﻟﯧﺘﯩﭗ ﻫﺎﺟﯩﻤﻨﯩﯔ ﺋﯧﻴﺘﯩﺸﯩﭽﻪ: ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻣﻨﯩﯔ 4 ﻗﯩﺰ، 3 ﺋﻮﻏﯘﻝ، ﺟﻪﻣﻰ 7 ﭘﻪﺭﺯﻩﻧﺘﻰ ﺑﻮﻟﯘﭖ، ﻗﯩﺰﻯ ﻓﺎﺗﯩﻤﻪ ﺭﻩﺯﯨﻴﻪﻟﻼﻫﯘ ﺋﻪﻧﻬﺎﺩﯨﻦ ﺑﺎﺷﻘﺎ ﭘﻪﺭﺯﻩﻧﺘﻠﯩﺮﯨﻨﯩﯔ ﻫﻪﻣﻤﯩﺴﻰ ﺋﯚﺯﯨﻨﯩﯔ ﻫﺎﻳﺎﺕ ﯞﺍﻗﺘﯩﺪﯨﻼ ﯞﺍﭘﺎﺕ ﺑﻮﻟﯘﺷﻘﺎﻥ ﺋﯩﺪﻯ. ﻗﯩﺰﻯ ﻓﺎﺗﯩﻤﻪ ﺭﻩﺯﯨﻴﻪﻟﻼﻫﯘ ﺋﻪﻧﻬﺎ ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﯞﺍﭘﺎﺗﯩﺪﯨﻦ 6 ﺋﺎﻱ ﻛﯧﻴﯩﻦ ﯞﺍﭘﺎﺕ ﺑﻮﻟﻐﺎﻥ.

ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺋﯚﺯﯨﻨﯩﯔ ﭘﻪﻳﻐﻪﻣﺒﻪﺭﻟﯩﻚ ﯞﻩﺯﯨﭙﯩﺴﯩﻨﻰ ﺗﻮﻟﯘﻕ ﺋﺎﺩﺍ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﻣﯩﻼﺩﯨﻨﯩﯔ 632 - ﻳﯩﻠﻰ، ﻫﯩﺠﺮﯨﻴﻪﻧﯩﯔ 11 - ﻳﯩﻠﻰ ﺭﻩﺑﯩﻴﻪﻟﺌﻪﯞﯞﻩﻝ ﺋﺎﻳﻨﯩﯔ 12 - ﻛﯜﻧﻰ ﺩﯛﺷﻪﻧﺒﻪ ﻛﯜﻧﻠﯜﻛﺘﻪ 63 ﻳﯧﺸﯩﺪﺍ ﺋﺎﻟﻪﻣﺪﯨﻦ ﺋﯚﺗﻜﻪﻥ. (ﺋﯚﻣﻪﺭﺟﺎﻥ)