ﺭﯗﺳﯩﻴﻪ ﺟﯩﺪﺩﯨﻲ ﺋﯩﺸﻼﺭ ﻣﯩﻨﯩﺴﺘﯩﺮﻯ، ﮔﯧﻨﯧﺮﺍﻝ ﺋﺎﺭﻣﯩﻴﻪ ﺷﻮﻳﮕﯘ: ﺗﯘﯞﺍﻻﺭ ﺋﯘﻳﻐﯘﺭﻻﺭﻧﯩﯔ ﺗﯘﯞﺍﺩﺍ ﻗﺎﻟﻐﺎﻥ ﻗﯧﺮﯨﻨﺪﺍﺷﻠﯩﺮﻯ

• ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻳﯧﻘﯩﻨﺪﺍ ﺭﯗﺳﯩﻴﻪ ﺟﯩﺪﺩﯨﻲ ﺋﯩﺸﻼﺭ ﻣﯩﻨﯩﺴﺘﯩﺮﻯ، ﮔﯧﻨﯧﺮﺍﻝ ﺋﺎﺭﻣﯩﻴﻪ ﺳﯧﺮﮔﯧﻲ ﺷﻮﻳﮕﯘ ﻗﺎﺯﺍﻗﯩﺴﺘﺎﻥ ﭘﺎﻳﺘﻪﺧﺘﻰ ﺋﺎﺳﺘﺎﻧﺎﻏﺎ ﻛﯧﻠﯩﭗ، ﻗﺎﺯﺍﻗﯩﺴﺘﺎﻥ ﺟﯘﻣﻬﯘﺭﯨﻴﻪﺗﻠﯩﻚ ﺋﯘﻳﻐﯘﺭ ﻣﻪﺩﻩﻧﯩﻴﻪﺕ ﻣﻪﺭﻛﯩﺰﯨﻨﯩﯔ ﺭﻩﺋﯩﺴﻰ ﺋﻪﺧﻤﻪﺗﺠﺎﻥ ﺷﺎﺭﺩﯨﻨﻮﻑ، ﺩﻭﻛﺘﻮﺭ ﺋﺎﺑﻠﯩﺰ ﺋﺎﺑﺪﯗﻟﻼﻳﯧﯟ ﺑﺎﺷﻠﯩﻖ ﺑﻪﺵ ﻛﯩﺸﯩﻠﯩﻚ ﺑﯩﺮ ﯞﻩﻛﯩﻠﻠﻪﺭ ﺋﯚﻣﯩﻜﯩﻨﻰ ﻗﻮﺑﯘﻝ ﻗﯩﻠﯩﭗ، ﺋﯘﻻﺭ ﺑﯩﻠﻪﻥ ﺗﯘﯞﺍﻻﺭ ﺑﯩﻠﻪﻥ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﯨﻜﻰ ﻣﻪﺩﻩﻧﯩﻴﻪﺕ ﺋﺎﻻﻗﯩﻠﯩﺮﻯ ﺟﯜﻣﻠﯩﺪﯨﻦ ﺗﯜﯞﺍﺩﯨﻜﻰ ﻗﻪﺩﯨﻤﻜﻰ ﺋﯘﻳﻐﯘﺭ ﻗﻪﻟﺌﻪﺳﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﭘﯩﻼﻧﻰ ﺑﻮﻳﯩﭽﻪ ﻫﻪﻣﻜﺎﺭﻟﯩﻖ ﻣﻪﺳﯩﻠﯩﻠﯩﺮﻯ ﺑﻮﻳﯩﭽﻪ ﻣﯘﺯﺍﻛﯩﺮﻩ ﺋﯧﻠﯩﭗ ﺑﺎﺭﻏﺎﻥ.

ﺗﯘﯞﺍ ﻣﯩﻠﻠﯩﺘﯩﺪﯨﻦ ﺑﻮﻟﻐﺎﻥ ﺭﯗﺳﯩﻴﯩﻨﯩﯔ ﮔﯧﻨﯧﺮﺍﻝ ﺋﺎﺭﻣﯩﻴﻪ ﻫﻪﺭﺑﯩﻲ ﺋﯘﻧﯟﺍﻧﯩﺪﯨﻜﻰ ﻣﯩﻨﯩﺴﺘﯩﺮﻯ ﺳﯧﺮﮔﯧﻲ ﺷﻮﻳﮕﯘ ﺳﯚﺯﯨﺪﻩ ﺋﯚﺯﯨﻨﯩﯔ ﺋﯘﻳﻐﯘﺭﻻﺭﻏﺎ ﺋﺎﻻﻫﯩﺪﻩ ﻗﯩﺰﯨﻘﯩﺪﯨﻐﺎﻧﻠﯩﻘﻰ، ﺗﯘﯞﺍ ﺑﯩﻠﻪﻥ ﺋﯘﻳﻐﯘﺭﻻﺭﻧﯩﯔ ﻗﻪﺩﯨﻤﯩﻲ ﻣﻪﺩﻩﻧﯩﻴﻪﺕ ﺑﺎﻏﻠﯩﻨﯩﺸﻰ ﺑﺎﺭﻟﯩﻘﯩﻨﻰ ﺋﻪﺳﻜﻪﺭﺗﻜﻪﻥ.

ﺋﯚﺗﻜﻪﻥ ﻳﯩﻠﻰ ﺭﯗﺳﯩﻴﻪ ﺟﯩﺪﺩﯨﻲ ﺋﯩﺸﻼﺭ ﻣﯩﻨﯩﺴﺘﯩﺮﻯ، ﮔﯧﻨﯧﺮﺍﻝ ﺋﺎﺭﻣﯩﻴﻪ ﺳﯧﺮﮔﯧﻲ ﺷﻮﻳﮕﯘﻧﯩﯔ ﺑﺎﺷﻼﻣﭽﯩﻠﯩﻘﯩﺪﺍ ﺭﯗﺳﯩﻴﯩﻨﯩﯔ ﺳﯩﺒﯩﺮﯨﻴﻪ ﺭﺍﻳﻮﻧﯩﺪﯨﻜﻰ ﺗﯘﯞﺍ ﺟﯘﻣﻬﯘﺭﯨﻴﯩﺘﯩﻨﯩﯔ ﺗﯧﺮﻩ ﺧﯚﻝ ﺩﻩﭖ ﺋﺎﺗﺎﻟﻐﺎﻥ ﺟﺎﻳﯩﻐﺎ ﺟﺎﻳﻼﺷﻘﺎﻥ ﻣﯩﻼﺩﻯ 8 - ﺋﻪﺳﯩﺮﺩﯨﻜﻰ ﺋﯘﻳﻐﯘﺭ ﻗﺎﻏﺎﻧﻰ ﻣﻮﻳﯘﻧﭽﯘﺭﻧﯩﯔ ﻗﻪﻟﺌﻪﺳﻰ ﭘﻮﺭ - ﺑﺎﺟﯩﻨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﻫﻪﻣﺪﻩ ﺋﯘ ﺟﺎﻳﺪﺍ ﺋﺎﺭﺧﯧﺌﻮﻟﻮﮔﯩﻴﯩﻠﯩﻚ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﺶ ﺧﯩﺰﻣﯩﺘﻰ ﺑﺎﺷﻼﻧﻐﺎﻥ ﺑﻮﻟﯘﭖ، ﺑﯘﻧﯩﯖﻐﺎ ﻣﻮﺳﻜﯟﺍ، ﻗﺎﺯﺍﻥ، ﺳﺎﻧﻜﺘﭙﯧﺘﯧﺮﺑﯘﺭﮒ ﻗﺎﺗﺎﺭﻟﯩﻖ ﺷﻪﻫﻪﺭﻟﻪﺭﻧﯩﯔ ﺋﺎﻟﯩﻤﻠﯩﺮﻯ ﺋﯩﺸﺘﯩﺮﺍﻙ ﻗﯩﻠﻐﺎﻧﺪﯨﻦ ﺳﯩﺮﺕ ﻳﻪﻧﻪ ﻣﻪﺧﺴﯘﺱ ﺑﯩﺮ ﻓﻮﻧﺪ ﻫﻪﻡ ﻣﻪﺳﻠﯩﻬﻪﺗﭽﯩﻠﻪﺭ ﻛﻮﻣﯩﺘﯧﺘﻰ ﻗﯘﺭﯗﻟﯘﭖ، ﺋﯘﻧﯩﯖﻐﺎ ﺭﯗﺳﯩﻴﻪ ﺩﯙﻟﻪﺕ ﺩﯗﻣﺎﺳﯩﻨﯩﯔ ﺭﻩﺋﯩﺴﻰ ﮔﻠﯩﺰﻧﻮﻑ، ﺭﯗﺳﯩﻴﻪ ﺋﯩﭽﻜﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻧﯘﺭﻏﺎﻟﯩﻴﯧﯟ، ﺑﯩﺨﻪﺗﻪﺭﻟﯩﻚ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻰ ﭘﺎﺗﺮﯗﺷﯧﯟ، ﻣﻮﺳﻜﯟﺍ ﺷﻪﻫﻪﺭ ﺑﺎﺷﻠﯩﻘﻰ ﻟﯘﺷﻜﻮﯞ ﻫﻪﻡ ﺗﺎﺗﺎﺭﯨﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﭘﺮﯦﺰﯨﺪﯦﻨﺘﻰ ﺷﻪﻣﯩﻴﯧﯟ ﯞﻩ ﺑﺎﺷﻘﺎ ﺑﯩﺮ ﻗﯩﺴﯩﻢ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺭﯗﺳﯩﻴﻪ ﺩﯙﻟﻪﺕ ﺭﻩﻫﺒﻪﺭﻟﯩﺮﻯ ﯞﻩ ﺑﺎﻱ-ﻛﺎﺭﺧﺎﻧﯩﭽﯩﻼﺭ ﻗﺎﺗﻨﺎﺷﻘﺎﻥ ﺋﯩﺪﻯ.

ﺋﯚﺗﻜﻪﻥ ﻫﻪﭘﺘﯩﺪﻩ ﻣﯩﻨﯩﺴﺘﯩﺮ ﺷﻮﻳﮕﯘ ﻗﺎﺯﺍﻗﯩﺴﺘﺎﻥ ﭘﺎﻳﺘﻪﺧﺘﻰ ﺋﺎﺳﺘﺎﻧﺎﻏﺎ ﻛﻪﻟﮕﻪﻧﺪﻩ ﻗﺎﺯﺍﻗﯩﺴﺘﺎﻥ ﺋﯘﻳﻐﯘﺭ ﻣﻪﺩﻩﻧﯩﻴﻪﺕ ﻣﻪﺭﻛﯩﺰﻯ ﯞﻩﻛﯩﻠﻠﯩﺮﻯ ﺑﯩﻠﻪﻥ ﻛﯚﺭﯛﺷﻜﻪﻥ ﺑﻮﻟﯘﭖ، ﺳﯚﻫﺒﻪﺗﻜﻪ ﺋﯩﺸﺘﯩﺮﺍﻙ ﻗﯩﻠﻐﺎﻥ ﺩﻭﻛﺘﻮﺭ ﺋﺎﺑﻠﯩﺰ ﺋﺎﺑﺪﯗﻟﻼﻳﯧﯟ ﺗﯧﻠﯧﻔﻮﻥ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﺪﻯ.

ﻳﯘﻗﯩﺮﯨﺪﯨﻜﻰ ﺋﯘﻟﯩﻨﯩﺸﺘﯩﻦ، ﺳﯩﻠﻪﺭ ﺋﯚﺯ ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺳﯧﺮﮔﯧﻲ ﺷﻮﻳﮕﯘ ﺑﯩﻠﻪﻥ ﺑﻮﻟﻐﺎﻥ ﻣﻪﺯﻛﯘﺭ ﺋﯘﭼﺮﯨﺸﯩﺸﻘﺎ ﻗﺎﺗﻨﺎﺷﻘﺎﻥ، ﻗﺎﺯﺍﻗﯩﺴﺘﺎﻥ ﺟﯘﻣﻬﯘﺭﯨﻴﻪﺗﻠﯩﻚ ﻣﻪﺩﻩﻧﯩﻴﻪﺕ ﺋﯩﺘﺘﯩﭙﺎﻗﯩﻨﯩﯔ ﺋﺎﻟﯩﻤﻼﺭ ﻛﯧﯖﯩﺸﯩﻨﯩﯔ ﻣﻪﺳﺌﯘﻟﻰ ﺩﻭﻛﺘﻮﺭ ﺋﺎﺑﻠﯩﺰ ﺋﺎﺑﺪﯗﻟﻼﻳﯧﯟ ﺋﻪﭘﻪﻧﺪﻯ ﺑﯩﻠﻪﻥ ﻣﻪﺯﻛﯘﺭ ﺋﯘﭼﺮﯨﺸﯩﺸﻨﯩﯔ ﻣﻪﺯﻣﯘﻧﻠﯩﺮﻯ ﻫﻪﻗﻘﯩﺪﻩ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﻨﻰ ﺋﺎﯕﻼﻳﺴﯩﻠﻪﺭ.