ﺋﯘﻳﻐﯘﺭ ﺋﯧﻠﯩﺪﻩ، ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺳﻪﻧﺌﻪﺗﭽﻰ ﻗﯩﺰ ﻗﻮﺑﯘﻝ ﻗﯩﻠﯩﺶ ﺋﯧﻼﻧﻠﯩﺮﻯ ﺑﺎﺭﻏﺎﻧﺴﯧﺮﻯ ﻛﯚﭘﻪﻳﻤﻪﻛﺘﻪ
2007-03-29
ﻳﯧﻘﯩﻨﺪﺍ، ﺑﯩﺰ ﺋﯘﻳﻐﯘﺭ ﺋﯧﻠﯩﻨﯩﯔ ﻳﯧﺰﺍ - ﻗﯩﺸﻼﻗﻠﯩﺮﯨﺪﯨﻦ ﺑﻮﻟﯘﭘﻤﯘ، ﺋﯘﻳﻐﯘﺭﻻﺭ ﺯﯨﭻ ﺋﻮﻟﺘﯘﺭﺍﻗﻼﺷﻘﺎﻥ ﻗﻪﺷﻘﻪﺭ، ﺧﻮﺗﻪﻥ ﻫﻪﻣﺪﻩ ﺋﺎﻗﺴﯘ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻦ ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﺗﯜﺭﻛﯜﻡ - ﺗﯜﺭﻛﯜﻣﻠﻪﭖ ﺧﯩﺘﺎﻳﻨﯩﯔ ﻫﻪﺭ ﻗﺎﻳﺴﻰ ﺟﺎﻳﻠﯩﺮﯨﺪﯨﻜﻰ ﺯﺍﯞﯗﺕ، ﻛﺎﺭﺧﺎﻧﯩﻼﺭﻏﺎ ﺋﯩﺸﭽﯩﻠﯩﻘﻘﺎ ﺋﯧﻠﯩﭗ ﻛﯧﺘﯩﻠﯩﯟﺍﺗﻘﺎﻧﻠﯩﻘﻰ ﻫﻪﻗﻘﯩﺪﻩ ﺋﺎﯕﻠﯩﺘﯩﺸﻼﺭ ﺑﻪﺭﮔﻪﻥ ﺋﯩﺪﯗﻕ. ﺭﺍﺩﯨﺌﻮﻣﯩﺰﻧﯩﯔ ﺋﯩﮕﯩﻠﯩﺸﯩﭽﻪ، ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﻪﻛﯩﺘﯩﻠﯩﯟﺍﺗﻘﺎﻥ ﺑﯘ ﺋﯘﻳﻐﯘﺭ ﻗﯩﺰﻟﯩﺮﻯ ﻳﯧﺰﯨﻼﺭﺩﯨﻜﻰ ﻳﯧﺸﻰ 18ﺩﯨﻦ 25 ﻳﺎﺷﻘﯩﭽﻪ ﺑﻮﻟﻐﺎﻥ، ﺗﻮﻱ ﻗﯩﻠﻤﯩﻐﺎﻥ، ﭼﯩﺮﺍﻳﻠﯩﻖ، ﻛﯧﻠﯩﺸﻜﻪﻥ ﻗﯩﺰﻻﺭ ﺑﻮﻟﯘﭖ، ﺋﯘﻻﺭﻧﯩﯔ ﻛﯚﭖ ﺳﺎﻧﺪﯨﻜﯩﺴﻰ ﻣﻪﺟﺒﯘﺭﯨﻲ ﻫﺎﻟﺪﺍ ﺋﯧﻠﯩﭗ ﻛﯧﺘﯩﻠﮕﻪﻥ. ﺋﺎﻣﺎﻟﺴﯩﺰ ﻗﺎﻟﻐﺎﻥ ﺑﯩﺮ ﻗﯩﺴﯩﻢ ﺋﺎﺗﺎ - ﺋﺎﻧﯩﻼﺭ ﺋﯩﻼﺟﻰ ﻳﻮﻕ ﺗﯧﺨﻰ ﺗﻮﻱ ﻗﯩﻠﯩﺶ ﻳﯧﺸﯩﻐﺎ ﺗﻮﺷﻤﯩﻐﺎﻥ ﻗﯩﺰﻟﯩﺮﯨﻨﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﻪﯞﻩﺗﻤﻪﺳﻠﯩﻚ ﺋﯜﭼﯜﻥ، ﺗﻮﻳﯩﻨﻰ ﻗﯩﻠﯩﯟﯦﺘﯩﺸﻜﻪ ﻣﻪﺟﺒﯘﺭ ﺑﻮﻟﻐﺎﻥ.
"ﺋﯘﺳﺴﯘﻟﭽﻰ" ﻗﻮﺑﯘﻝ ﻗﯩﻠﯩﺶ ﺋﯧﻼﻧﻠﯩﺮﻯ
ﺩﯦﻤﻪﻙ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﻩ، "ﺩﯦﻬﻘﺎﻥ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺷﯩﻨﺠﺎﯓ ﺳﯩﺮﺗﯩﻐﺎ ﻳﯚﺗﻜﻪﺵ" ﺩﯦﮕﻪﻥ ﺳﯩﻴﺎﺳﻪﺕ ﺗﯜﭘﻪﻳﻠﯩﺪﯨﻦ، ﻧﯘﺭﻏﯘﻧﻠﯩﻐﺎﻥ ﻧﺎﻣﺮﺍﺕ ﺩﯦﻬﻘﺎﻥ ﻗﯩﺰﻟﯩﺮﻯ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺑﯧﺮﯨﭗ ﺋﯩﺸﻠﻪﺷﻜﻪ ﻣﻪﺟﺒﯘﺭ ﺑﻮﻟﻐﺎﻥ. ﻳﯧﻘﯩﻨﺪﺍ ﺧﯩﺘﺎﻱ ﺋﯚﻟﻜﯩﺴﯩﺪﻩ ﺋﻮﻗﻪﺕ ﻗﯩﻠﯩﭗ ﻳﯜﺭﮔﻪﻥ ﺑﯩﺮ ﺋﯘﻳﻐﯘﺭ ﻳﺎﺵ ﺭﺍﺩﯨﺌﻮﻣﯩﺰﻧﯩﯔ ﻫﻪﻗﺴﯩﺰ ﻟﯩﻨﯩﻴﯩﺴﯩﮕﻪ ﺗﯧﻠﯧﻔﻮﻥ ﻗﯩﻠﯩﭗ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﻧﯘﺭﻏﯘﻧﻠﯩﻐﺎﻥ ﻗﯩﺰﻻﺭﻧﯩﯔ ﯞﺍﯓ ﻟﯧﭽﯜﻩﻧﻨﯩﯔ ﻳﯘﺭﺗﻰ ﺳﻪﻧﺪﯗﯕﻐﺎ ﺋﺎﭘﯩﺮﯨﻠﻐﺎﻧﻠﯩﻘﯩﻨﻰ ﺋﺎﺷﻜﺎﺭﯨﻼﭖ، ﺋﯚﺯﯨﻨﯩﯔ ﺑﯘ ﺧﯩﻞ ﺋﻪﻫﯟﺍﻟﺪﯨﻦ ﻗﺎﺗﺘﯩﻖ ﻧﻪﭘﺮﻩﺗﻠﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.
ﺑﯘﻧﺪﯨﻦ ﺋﯩﻜﻜﻰ ﻛﯜﻥ ﺋﯩﻠﮕﯩﺮﻯ، ﺭﺍﺩﯨﺌﻮﻣﯩﺰﻧﯩﯔ ﻫﻪﻗﺴﯩﺰ ﻟﯩﻨﯩﻴﯩﺴﯩﮕﻪ ﺗﯧﻠﯧﻔﻮﻥ ﻗﯩﻠﻐﺎﻥ ﺋﯜﺭﯛﻣﭽﯩﺪﯨﻜﻰ ﺑﯩﺮ ﺋﯘﻳﻐﯘﺭ ﻳﺎﺵ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﻨﯩﯔ ﻏﯘﻟﺠﺎ، ﺧﻮﺗﻪﻥ، ﺋﺎﻗﺴﯘ، ﻗﻪﺷﻘﻪﺭ ﻗﺎﺗﺎﺭﻟﯩﻖ ﻳﻪﺭﻟﯩﻚ ﺗﯧﻠﯧﯟﯨﺰﯨﻴﻪ ﺋﯩﺴﺘﺎﻧﺴﯩﻠﯩﺮﻯ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ "ﺋﯘﺳﯘﻟﭽﻰ ﻗﯩﺰ ﻗﻮﺑﯘﻝ ﻗﯩﻠﯩﺶ" ﻫﻪﻗﻘﯩﺪﻩ، ﺗﻮﺧﺘﯩﻤﺎﻱ ﺋﯧﻼﻥ ﺑﯧﺮﯨﺪﯨﻐﺎﻥ ﺑﻮﻟﯘﭖ ﻛﻪﺗﻜﻪﻧﻠﯩﻜﯩﻨﻰ ﻫﻪﻣﺪﻩ ﻧﯘﺭﻏﯘﻧﻠﯩﻐﺎﻥ ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﺑﯘﻧﺪﺍﻕ ﺋﯧﻼﻧﻼﺭﻏﺎ ﺋﯩﺸﯩﻨﯩﭗ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ ﻣﻪﻟﯘﻡ ﻗﯩﻠﺪﻯ.
ﻳﯧﺮﯨﻢ ﻳﺎﻟﯩﯖﺎﭺ "ﺋﯘﻳﻐﯘﺭﭼﻪ ﺋﯘﺳﺴﯘﻟﻼﺭ"
ﺭﺍﺩﯨﺌﻮﻣﯩﺰﻧﯩﯔ ﻫﻪﻗﺴﯩﺰ ﻟﯩﻨﯩﻴﯩﺴﯩﮕﻪ ﺗﯧﻠﯧﻔﻮﻥ ﻗﯩﻠﻐﺎﻥ ﺑﯘ ﺋﯘﻳﻐﯘﺭ ﻳﺎﺵ ﺑﯩﺮ ﻗﯩﺴﯩﻢ ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﭘﯘﻝ ﺋﯜﭼﯜﻥ ﻫﻪﻣﻤﯩﺪﯨﻦ ﯞﺍﺯ ﻛﯧﭽﯩﭗ، ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﻪﺵ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ، ﺋﯘﻻﺭﻧﯩﯔ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﻮﻳﻨﯩﻐﺎﻥ ﺋﯘﺳﯘﻟﻰ ﺋﯘﻳﻐﯘﺭﭼﻪ ﺋﯘﺳﯘﻝ ﺋﻪﻣﻪﺱ، ﺑﻪﻟﻜﻰ ﺋﯘﻳﻐﯘﺭﭼﻪ ﻣﯘﺯﯨﻜﯩﻐﺎ ﻛﻪﻟﺘﯜﺭﯛﭖ ﺋﻮﻳﻨﯩﻐﺎﻥ ﺋﻪﺭﻩﺑﭽﻪ ﻳﯧﺮﯨﻢ ﻳﺎﻟﯩﯖﺎﭺ ﺋﯘﺳﯘﻝ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.
ﺭﺍﺩﯨﺌﻮﻣﯩﺰﻧﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻥ ﺋﯩﺴﻤﯩﻨﻰ ﻣﻪﻟﯘﻡ ﻗﯩﻠﯩﺸﻨﻰ ﺧﺎﻟﯩﻤﯩﻐﺎﻥ ﺋﯜﺭﯛﻣﭽﯩﺪﯨﻜﻰ ﺑﯩﺮ ﺋﺎﻳﺎﻝ ﻫﺎﺯﯨﺮ ﻫﻪﺭﻗﺎﻳﺴﻰ ﺗﯧﻠﯧﯟﯨﺰﻭﺭﻻﺭﺩﺍ "ﺋﯘﺳﯘﻟﭽﻰ ﻗﯩﺰ" ﯞﻩ ﻣﻮﺩﯦﻞ ﻗﯩﺰ ﺋﯧﻠﯩﺶ ﻫﻪﻗﻘﯩﺪﯨﻜﻰ ﺋﯧﻼﻧﻼﺭﻧﯩﯔ ﻛﯜﻧﺴﯧﺮﻯ ﻛﯚﭘﯩﻴﯩﭗ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ، ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﭘﯘﻝ ﺋﯜﭼﯜﻥ ﻫﻪﻣﻤﯩﺪﯨﻦ ﯞﺍﺯ ﻛﯧﭽﯩﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، ﺋﯘﻳﻐﯘﺭ ﺋﺎﺗﺎ- ﺋﺎﻧﯩﻠﯩﺮﯨﻨﯩﯔ ﺑﯘ ﺧﯩﻞ ﺋﻪﻫﯟﺍﻟﺪﯨﻦ ﺋﯩﻨﺘﺎﻳﯩﻦ ﺋﻪﻧﺪﯨﺸﻪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. (ﻣﯧﻬﺮﯨﺒﺎﻥ)
ﻣﯘﻧﺎﺳﯩﯟﻩﺗﻠﯩﻚ ﻣﺎﻗﺎﻟﯩﻼﺭ
- ﭼﻪﺗﺌﻪﻟﻠﻪﺭﺩﯨﻜﻰ ﺋﯘﻳﻐﯘﺭ ﺋﺎﻳﺎﻟﻼﺭ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻳﺎﻟﻼﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﻠﯩﺮﯨﺪﯨﻦ ﺋﻪﻧﺪﯨﺸﻪ ﻗﯩﻠﻤﺎﻗﺘﺎ
- " ﺑﯩﺮ ﺋﺎﺋﯩﻠﯩﺪﯨﻦ ﺑﯩﺮﻧﻰ" ﺋﯧﻠﯩﭗ ﻣﯧﯖﯩﺶ ﺳﯩﻴﺎﺳﯩﺘﻰ ﺑﯘﻳﯩﭽﻪ ﺋﯘﻳﻐﯘﺭ ﻳﺎﺷﻠﯩﺮﻯ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺑﯧﺮﯨﺸﻘﺎ ﻣﻪﺟﺒﯘﺭﻻﻧﻤﺎﻗﺘﺎ
- ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺩﯦﻬﻘﺎﻥ ﺋﻪﻣﮕﻪﻙ ﻛﯜﭼﻠﯩﺮﯨﻨﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﯩﺸﯩﺪﯨﻜﻰ ﻣﻪﺧﭙﯩﻲ ﯞﻩ ﺋﺎﺷﻜﺎﺭﺍ ﺗﻪﺭﻩﭘﻠﻪﺭ
- ﺋﯘﻳﻐﯘﺭ ﺩﯦﻬﻘﺎﻧﻠﯩﺮﻯ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﯩﺸﭽﯩﻠﯩﻘﻘﺎ ﺋﯧﻠﯩﭗ ﻛﯧﺘﯩﻠﮕﻪﻥ ﺑﺎﻟﯩﻠﯩﺮﯨﻨﯩﯔ ﻫﺎﻟﯩﺪﯨﻦ ﺋﻪﻧﺪﯨﺸﻪ ﻗﯩﻠﻤﺎﻗﺘﺎ
- ﭘﯩﭽﺎﻥ ﻧﺎﻫﯩﻴﯩﺴﯩﺪﯨﻜﻰ ﺋﯘﻳﻐﯘﺭ ﻗﯩﺰﻻﺭ ﺧﯩﺘﺎﻱ ﺋﯚﻟﻜﯩﺴﯩﺪﻩ ﻗﺎﻧﺪﺍﻕ ﺋﺎﻗﯩﯟﻩﺗﻠﻪﺭﮔﻪ ﺩﯗﭺ ﻛﯧﻠﯩﺪﯗ ؟
 | ﺑﯧﺴﯩﺶ |  |
ﺋﻪﯞﻩﺗﯩﺶ |
