Obama térrorluqqa qarshi turushning amérika qimmet qarashliri da'irisidin chiqip ketmeslikini teshebbus qildi

6-Dékabir amérika dölet bixeterliki heqqide axirqi qétim söz qilghan prézidént obama aldi bilen amérika armiyisige minnetdarliq bildürdi, andin donald trampning musulmanlar heqqidiki sözlirini uning namini tilgha almay turup tenqid qildi.

U bu heqte “Térrorluqqa qarshi urush, hergiz islamgha qarshi urush emes” dep eskertti hem amérika qimmet qarashlirini qoghdash we qanun'gha hörmet qilishning hergiz ajizliqning ipadisi emes, belki amérikining eng chong küch-quwwiti ikenlikini tekitlidi.

Obama özining ötken 8 yildiki térrorluqqa qarshi istratégiyesini xelq'ara hemkarliqni kücheytish we yerlikning maslishishni qolgha keltürüsh, bu arqiliq amérikining adem we iqtisad chiqimini téjesh dep izahlidi. Ötken 8 yilda amérikining dölet sirtidiki térrorchilarning hujumigha uchrimighanliqini tilgha alghan obama “Bu hergiz térrorchilarning bizge qarshi bir hujumni oylimighanliqi we pilanlimighanliqidin emes” dédi.

Roytiris qatarliq xelq'ara axbaratlarda keng orun alghan obamaning dölet bixeterlik nutqi heqqidiki xewerlerde bayan qilinishiche, obama dewride amérikining iraq we afghanistandiki eskiri 180mingdin 15 minggha chüshürülgen, gu'entanamodiki mehbuslarning sani 800din 60 qa kémeygen.