Awstraliye hökümiti jasuslar we chet'el hökümetlirining kashilisini tekshüridighanliqini bildürdi

Xitay sodigerlirining awstraliye hökümet xizmitige parakendichilik qilghanliqi toghrisidiki uchurlardin kéyin, awstraliye hökümiti 6-iyun seyshenbe küni jasuslar we chet'el hökümetlirining kashilisini tekshüridighanliqini bildürdi.

Awstraliye döletlik radi'osi a b s ning xewiridin melum bolushiche, awstraliye istixbarat orgini yéqinda awstraliyediki hakimiyet yürgüzüwatqan partiyige pul i'ane qilghan ikki neper xitay sodigerning xitay kompartiyisi bilen yéqin munasiwiti barliqini éniqlighan. Bu setchilik otturigha chiqqandin kéyin, awstraliye bash ministiri malkolum turnbull seyshenbe küni muxbirlargha bayanat bérip, hökümetning mezkur weqeni yenimu chongqurlap tekshüridighanliqini, chet'el jasusliri we hökümetlirining awstraliyening hökümet xizmetlirige qilidighan kashilisini éniqlap bir terep qilidighanliqini bildürgen.

Roytérs agéntliqining awstraliyediki munasiwetlik taratqularning xewerliridin neqil élip körsitishiche, awstraliye puqraliqigha ötüp bolghan xu'ang shyawmo, we chaw chawing isimlik ikki sodiger ikki yil ilgiri awstraliyediki hökümet organlirigha öz namida 6.7 Milyon awstraliye dolliri i'ane qilghan bolup, bu ikki kishining xitay kompartiyisi bilen yéqin alaqisi barliqi heqqidiki xewerler tarqalghandin kéyin, istixbarat organliri mezkur weqeni tekshürüshke bashlighan.