Yawropa parlaménti ezaliri bulghariyeni Uyghur musapirlarni qayturmasliqqa chaqirdi

Melum bolushiche, 2017-yili 27-iyul küni türkiye chégrasidin bulghariyege ötken besh Uyghur bulghariyede siyasiy panahliqqa iltimas sun'ghan bolup, yéqinda bulghariye köchmenler idarisi ularning iltimasini ret qilghan.

Shuning bilen köchmenler idarisi bu Uyghurlarni yighiwélish merkizige apirip, xitaygha qayturuwétishke teyyarlan'ghan. Bu ehwaldin xewer tapqan yawropa parlaméntining bir qisim ezaliri bu munasiwet bilen bayanat élan qilip, özlirining bu qarargha qarshi ikenlikini bildürdi.

16-Yanwarda élan qilin'ghan bayanatqa yawropa parlaméntining bir qisim ezaliri, jümlidin yawropa parlaméntining mu'awin re'isi fabyo massimo kastaldo imza qoyghan. Shuning bilen birge bu Uyghur panahlan'ghuchilar nawada xitaygha qayturulsa ularning qamaqqa, qiynaqqa hemde ölümge duch kélish éhtimali barliqi, shuning üchün bulghariye hökümitining xelq'ara qanun boyiche ish körüp bu Uyghurlargha siyasiy panahliq bérishi lazimliqi tilgha élin'ghan.

Bayanatta Uyghurlar diyaridiki siyasiy weziyetning yéqinqi birnechche yildin buyan bekmu keskinliship ketkenliki, nöwette Uyghurlarning eng eqelliy insan heqliriningmu tartiwélin'ghanliqi, bu halning xelq'aradiki birnechche chong teshkilatning zor diqqitini qozghap kéliwatqanliqi alahide tekitlinidu. Shuningdek xitayning herqachan xitaygha qayturulghan siyasiy panahliq tiligüchilerni qattiq jazalap kéliwatqanliqi eskertilidu.

Yawropa parlaménti ezalirining bu bayanati wakaletsiz milletler teshkilati teripidinmu élan qilindi.

Melum bolushiche, bu besh Uyghur heqqidiki guwahliq yighini 16-yanwar we 26-yanwar künliri ötküzülidighan bolup, yighinda bu heqtiki ehwallar yene bir qétim qarap chiqilidiken.